Zechariah -14 -

ဇာခရိအနာဂတ္တိကျမ်း - ၁၄

ယေရုရှလင်မြို့နှင့် လူမျိုးအပေါင်း

1ထာဝရဘုရား၏နေ့ရက်သည် ရောက်သောအခါ၊ သူတစ်ပါးတို့သည် သင်၏ဥစ္စာကိုလုယူ၍ သင့်အလယ်၌ ဝေဖန်ကြလိမ့်မည်။ 2ယေရုရှလင်မြို့ကို တိုက်စေခြင်းငှာ၊ လူမျိုးအပေါင်းတို့ကို ငါစုဝေးစေမည်။ မြို့ကိုတိုက်ယူပြီးလျှင်၊ အိမ်တို့ကိုလုယက်၍ မိန်းမတို့ကို အဓမ္မပြုကြလိမ့်မည်။ မြို့သားတစ်ဝက်ကိုသိမ်းသွား၍ တစ်ဝက်သာ မြို့၌ကျန်ကြွင်းလိမ့်မည်။

3ထာဝရဘုရားသည်လည်း စစ်တိုက်ရာကာလ၌ တိုက်သကဲ့သို့၊ ထိုလူမျိုးတို့ကို တိုက်သွားတော်မူမည်။ 4ထိုနေ့ရက်၌ ခြေတော်သည် ယေရုရှလင်မြို့ အရှေ့၊ သံလွင်တောင်ပေါ်မှာရပ်၍၊ သံလွင်တောင်သည် အရှေ့ဘက်မှ အနောက်ဘက်တိုင်အောင် အလယ်၌ကွဲသဖြင့်၊ အလွန်ကြီးသောချိုင့်ဖြစ်လိမ့်မည်။ တောင်တစ်ဝက်သည် မြောက်ဘက်သို့လည်းကောင်း၊ တစ်ဝက်သည် တောင်ဘက်သို့လည်းကောင်း ရွှေ့ရလိမ့်မည်။ 5သင်တို့သည် ငါ့တောင်ကြားချိုင့်လမ်းဖြင့် ပြေးကြလိမ့်မည်။ ထိုချိုင့်သည် အာဇလမြို့တိုင်အောင် မီ လိမ့်မည်။ ယုဒရှင်ဘုရင် ဩဇိမင်းလက်ထက်၊ မြေကြီးလှုပ်၍ သင်တို့သည် ပြေးသကဲ့သို့ တစ်ဖန် ပြေးကြလိမ့်မည်။ ငါ၏ ဘုရားသခင်ထာဝရဘုရား ကြွလာတော်မူ၍၊ မိမိသန့်ရှင်းသူအပေါင်းတို့သည် ပါကြလိမ့်မည်။ 6ထိုနေ့ရက်၌ အလင်းမရှိ၊ မြတ်သောအရာတို့သည် ယုတ်လျော့လိမ့်မည်။ 7နေ့မဟုတ်၊ ညမဟုတ်၊ ထာဝရဘုရား သိတော်မူသောနေ့ရက်တစ်ရက်ဖြစ်၍၊ ညဉ့်ဦးယံအချိန်ရောက်မှ လင်းလိမ့်မည်။ 8ထိုနေ့ရက်၌ အသက်ရေသည် ယေရုရှလင်မြို့မှထွက်၍၊ နွေကာလဖြစ်စေ၊ ဆောင်းကာလဖြစ်စေ၊ အရှေ့ပင်လယ်သို့ တစ်ဝက်၊ အနောက်ပင်လယ်သို့ တစ်ဝက် စီးသွားလိမ့်မည်။ 9ထာဝရဘုရားသည် တစ်ပြည်လုံးတွင် ရှင်ဘုရင် ဖြစ်တော်မူမည်။ ထိုနေ့ရက်၌ ထာဝရဘုရားတစ်ပါးတည်း၊ နာမတော်တစ်ပါးတည်း ဖြစ်တော်မူမည်။ 10ဂေဘမြို့မှသည် ယေရုရှလင်မြို့ တောင်ဘက်၊ ရိမ္မုန်မြို့တိုင်အောင် တစ်ပြည်လုံးကို ချိုင့်ကဲ့သို့ တညီတည်း ဖြစ်စေတော်မူမည်။ မြို့သည်လည်း ဗင်္ယာမိန်တံခါးမှသည် အရင်တံခါးရာ၊ မြို့ထောင့်တံခါး တိုင်အောင်လည်းကောင်း၊ ဟာနနေလရဲတိုက်မှသည် စပျစ်သီးနယ်ရာ တန်ဆာတော် တိုင်အောင်လည်းကောင်း ချီးမြှောက်ခြင်းကိုခံ၍၊ မြို့ဟောင်းရာ၌ တစ်ဖန် တည်ရလိမ့်မည်။ 11နောက်တစ်ဖန် ယေရုရှလင်မြို့သည် ကျိန်ခြင်းဘေးကိုမခံ၊ မြို့သားတို့သည် နေရာကျ၍ စိုးရိမ်စရာမရှိဘဲ နေကြလိမ့်မည်။

12ယေရုရှလင်မြို့ကို တိုက်လာသော လူမျိုးအပေါင်းတို့၌ ထာဝရဘုရား ပေးတော်မူသော ဘေးဒဏ်ဟူမူကား၊ ခြေဖြင့်ရပ်လျက်ပင် သူတို့အသားလျော့ပျက်လိမ့်မည်။ မျက်အိမ်၌ မျက်လုံး လျော့ပျက်လိမ့်မည်။ လျှာသည်လည်း ခံတွင်း၌ လျော့ပျက်လိမ့်မည်။ 13ထိုနေ့ရက်၌ ထာဝရဘုရား၏တန်ခိုးတော်ကြောင့် သူတို့သည် အလွန်ရုန်းရင်းခတ်မျှပြု၍၊ တစ်ယောက်ကိုတစ်ယောက် လက်ချင်းရိုက်သော်လည်း၊ တစ်ယောက်ကိုတစ်ယောက် တိုက်၍ သတ်ကြလိမ့်မည်။ 14ယုဒအမျိုးသားတို့လည်း ယေရုရှလင်မြို့၌ တိုက်ကြလိမ့်မည်။ ပတ်လည်၌နေသော တစ်ပါးအမျိုးသားအပေါင်းတို့၏ ဥစ္စာစည်းစိမ်တည်းဟူသော၊ များစွာသော ရွှေငွေအဝတ်တန်ဆာစုပုံလျက် ရှိကြလိမ့်မည်။ 15မြင်း၊ လား၊ ကုလားအုတ်၊ မြည်းမှစ၍ ရန်သူတပ်တွင် ရှိသမျှသော တိရစ္ဆာန်တို့၌ပေးသောဘေးဒဏ်သည်၊ အထက်ဆိုခဲ့ပြီးသော ဘေးဒဏ်နှင့် တူလိမ့်မည်။

16ယေရုရှလင်မြို့ကို တိုက်လာသော လူမျိုးအပေါင်းတို့တွင် ကျန်ကြွင်းသမျှသောသူတို့သည်၊ ကောင်းကင်ဗိုလ်ခြေအရှင် ထာဝရဘုရားတည်းဟူသော ရှင်ဘုရင်ကို ကိုးကွယ်၍၊ သကေနေပွဲခံအံ့သောငှာ မြို့တော်သို့ နှစ်တိုင်းအစဉ် တက်လာကြလိမ့်မည်။ 17ကောင်းကင်ဗိုလ်ခြေအရှင် ထာဝရဘုရားဟူသော ရှင်ဘုရင်ကို ကိုးကွယ်အံ့သောငှာ၊ မြို့တော်သို့တက်၍ မလာသောမြေကြီးသား အဆွေအမျိုးရှိသမျှအပေါ်သို့ မိုးမရွာရ။ 18အဲဂုတ္တုပြည်သား အဆွေအမျိုးသည် မတက်မလာလျှင်၊ မိုးမရွာဘဲနေသဖြင့်၊ သကေနေပွဲကိုခံအံ့သောငှာတက်၍ မလာသောလူမျိုးတို့၌၊ ထာဝရဘုရားပေးတော်မူသောဘေးဒဏ်သည် ထိုသူတို့ကိုလည်း ထိလိမ့်မည်။ 19ဤရွေ့ကား၊ သကေနေပွဲကိုခံအံ့သောငှာ တက်၍မလာသော အဲဂုတ္တုအမျိုးသား၊ တစ်ပါးအမျိုးသားအပေါင်းတို့ခံရသော အပြစ်ပေတည်း။

20ထိုနေ့ရက်ကာလတွင် ထာဝရဘုရားအား သန့်ရှင်းခြင်းဟု၊ မြင်း၌ဆွဲသော ဆည်းလည်းအပေါ်မှာပင် အက္ခရာတင်ရလိမ့်မည်။ ထာဝရဘုရား၏အိမ်တော်၌ အိုးတို့သည် ယဇ်ပလ္လင်ရှေ့မှာရှိသော ဖလားကဲ့သို့ ဖြစ်ကြလိမ့်မည်။ 21ထိုမျှမက၊ ယေရုရှလင်မြို့မှစ၍ ယုဒပြည်၌ ရှိသမျှသောအိုးတို့သည် ကောင်းကင်ဗိုလ်ခြေအရှင် ထာဝရဘုရားအား သန့်ရှင်းကြလိမ့်မည်။ ယဇ်ပူဇော်သောသူအပေါင်းတို့သည် လာ၍၊ ထိုအိုးတို့ကို ယူပြီးလျှင် ချက်ပြုတ်ကြလိမ့်မည်။ ထိုနေ့မှစ၍ နောက်တစ်ဖန် ကောင်းကင်ဗိုလ်ခြေအရှင် ထာဝရဘုရား၏အိမ်တော်၌ ခါနနိလူမရှိရ။

ပရောဖက်ဇာခရိ စီရင်ရေးထားသော အနာဂတ္တိကျမ်းပြီး၏။

ဇာခရိအနာဂတ္တိကျမ်း - ၁၄ (အနက်ဖွင့်)

(ည) တပါးအမျိုးသားများစုဖွဲ့၍ ယေရုရှလင်ကို ဆန့်ကျင်ကြမည်။ (၁၄:၁–၂)

ဤကျမ်းပိုဒ်တွင် ဘုရားသခင်၏နေ့ရက်ဆိုသည်မှာ တိုင်းနိုင်ငံများက ယေရုရှလင်မြို့အား နောက်ဆုံး ဝိုင်းဝန်းတိုက်ခိုက်စီးနင်းမည့်နေ့ဖြစ်သည်။ အလုံးအရင်းဖြင့် မြို့တော်အတွင်းသို့ ဝင်ရောက်၍ ဖျက်ဆီးလုယက် ကြမည်။ မြို့သားတဝက်ကို သုံ့ပန်းအဖြစ် ဖမ်းဆီးခေါ်ဆောင်သွား၍ မြို့သားတဝက်သာ ကြွင်းကျန်ရစ်မည်။

(ဋ) ဘုရားရှင်ကိုယ်တိုင် ကြားဝင်လုပ်ဆောင်ခြင်း (၁၄:၃–၅)

ထိုအခါဘုရားသခင်ကိုယ်တော်တိုင် ဇိအုန်တောင်ပေါ်တွင် ပေါ်ထွန်းစေတော်မူမည်။ သံလွင်တောင်သည် မြောက်ဘက်နှင့် တောင်ဘက်ဆီသို့ နှစ်ခြမ်းကွဲထွက်၍ အလယ်တွင် ဧရာမချိုင့်ဝှမ်းကြီး ဖြစ်ပေါ်မည်။ “ငါတို့ ဘုရားသခင် ထာဝရဘုရားကြွလာတော်မူ၍၊ မိမိသန့်ရှင်းသူအပေါင်းတို့သည် ပါကြလိမ့်မည်“။ ထိုအကြောင်းကို Unger က ဤသို့ရှင်းပြထားသည်။

ဟေဗြဲစာပေဟန်ပန်အတိုင်း အဖြစ်အပျက်ကို တဆင့်ကြားစကားဟန်မှ ကိုယ်တိုင်ပါဝင်သည့်နှယ် စွဲငြိ ဖွယ် တင်စားသရုပ်ဖောင်ထားသည်။၁၇

(ဋ္ဌ) ရာသီဥတုနှင့် အလင်းရောင်ကြီးမားစွာ ပြောင်းလဲခြင်း (၁၄:၆–၇)

ဤအပိုဒ်၆ကို ခေတ်သစ်ကျမ်းမူများဖြစ်သည့် (Moffatt, RSU, NEB, NIV)တို့က ရှေးဦးကျမ်းများကို မှီးငြမ်း၍ “အပူရှိန်အားလုံးချုပ်ငြိမ်းသွားမည်”ဟု အနက်ဖွင့်ဆိုကြသည်။၁၈ Baldwin ကမူ မည်သည့်ကျမ်းမူမှ မမှီးငြမ်းဘဲ အငယ်-၆ကို သီးသန့် “ကြယ်များကြွယ်လွင့်ကုန်၍ သူတို့အလင်းကွယ်ပျောက်ကုန်မည်”၁၉ ဟု ဖွင့်ဆို ထားသည်။

ရိုးရိုးလေးတွေးလျှင် အဓိပ္ပါယ်ရှင်းပါသည်။ တလောကလုံးမြင်ကွင်း ကြီးမားစွာပြောင်းလဲသွားမည်။

Unger ကမူ အစောပိုင်းကျမ်းကတည်းက ဘုရားသခင်၏နေ့ရက်ကို ၂၄နာရီ တစ်ရက်အဖြစ် ယူဆ ကတည်းက မှားသည်ဟုဆိုကာ ဤကျမ်းပိုဒ်ကို ဟေရှာ ၃၀:၂၆နှင့် ချည်နှောင်းထားသည်။

လ၏အလင်းသည် နေ၏အလင်းကဲ့သို့ဖြစ်၍၊ နေ၏အလင်းသည်လည်း ဖြစ်မြဲထက် ခုနှစ်ဆပိုလိမ့်မည်။ ထာဝရဘုရားသည် မိမိလူတို့၏ကျိုးပျက်ရာကို ပြုပြင်၍ ခံစားရသော ဒဏ်ရာဒဏ်ချက်များကို ပျောက်စေတော် မူမည်။၂၀

(ဍ) အသက်ရေစမ်းချောင်း (၁၄:၈)

အသက်စမ်းရေသည် ယေရုရှလင်မြို့တွင် မြစ်ဖျားခံ၍ တဝက်သည် အရှေ့ဘက်ရှိ ပင်လယ်သေထဲသို့၎င်း၊ တဝက်သည် အနောက်ဘက်ရှိ မြေထဲပင်လယ်ထဲသို့၎င်း ဆယ့်နှစ်ရာသီ စီးဆင်းမည်။

(ဎ) ခရစ်တော်ဘုရင်အဖြစ် စိုးစံခြင်း (၁၄:၉)

ခရစ်တော်သည် ကမ္ဘာမြေကြီးတစ်ခွင်လုံးအား ဘုရင်အဖြစ် စိုးစံမည်။ ထိုအခါ လောကသားတို့က ဘုရားစစ် ဘုရားမှန်ကြောင်း သိလာကြမည်။

(ဏ) ပထဝီအနေအထား‌ပြောင်းလဲခြင်း (၁၄း၁၀)

မြေတပြင်လုံး ချိုင့်ဝှမ်းလွင်ပြင်ဖြစ်သွားမည်။ ယေရုရှလင်မြို့သည် အားလုံးထက်မြင့်မည်။

(တ) ယေရုရှလင်မြို့အား ဘေးမသီရန် လုံခြုံစေခြင်း (၁၄:၁၀)

ယေရုရှလင်မြို့သည် ဘေးရန်ကင်းရှင်း၍ အေးချမ်းသာယာမည်။ မြို့တော်သားများသည်လည်း ခြိမ်း ခြောက်၊ ရန်ပြု၊ ဖျက်ဆီးမည့်ရန်သူများမရှိတော့သဖြင့် ပူပင်ကြောင့်ကျမရှိ နေကြရမည်။

(ထ) ရန်သူတပါးအမျိုးသားများ ကာလနာရောဂါ ကျရောက်ခြင်း (၁၄:၁၂–၁၅)

အပိုဒ်ငယ် ၁၃မှာ ခရစ်တော်က ဣသရေလရန်သူတို့အား နှိမ်နှင်းအောင်နိုင်ပုံဖြစ်သည်။ ထိုရန်သူများကို ကြောက်လန့်ဖွယ် ကာလနာရောဂါဆိုး ခံစားစေမည်။၂၁ “ခြေဖြင့် ရပ်လျက်ပင် သူတို့အသားလျော့ပျက်လိမ့်မည်။ …မျက်လုံးလျော့ပျက်လိမ့်မည်။ လျှာ…လျော့ပျက်လိမ့်မည်။” ထိုဘေးဒဏ်များသည် ဘုရားရှင်ဒဏ်ခတ်ခြင်း ဖြစ်သည်။ ယုဒကျေးလက်သားများကလည်း ယေရုရှလင်မြို့ ကာကွယ်ရေးစစ်ပွဲ၌ ပါဝင်၍ အပျက်အစီးကြီးမား များပြားမည်။

(ဒ) ကြွင်းကျန်သော တပါးအမျိုးသားများသည် ယေရုရှလင်၌ ဝတ်ပြုကိုးကွယ်မှု မပြုလျှင် ကပ်ရောဂါဆိုး သင့်စေမည် (၁၄:၁၆–၁၉)

ယေရုရှလင်အား ဝိုင်းဝန်းတိုက်ခိုက်ကြရာတွင် သေကံမရောက် အသက်မပျောက်ဘဲ ကြွင်းကျန်သော သူများသည် ထာဝရဘုရားသခင်အား ဝတ်ပြုကိုးကွယ်ရန် ယေရုရှလင်သို့ ရောက်ရှိလာကြမည်။ ယဇ်ပလ္လင်၌ ပူဇော်သက္ကာပြုကြလိမ့်မည်။ Unger က ဤသို့ရှင်းပြသည်။

ယုဒဘာသာရေးပွဲတော်ခုနှစ်ပါးအနက် ဤတဲတော်ပွဲတစ်ခုတည်းသာလျှင် နိုင်ငံတော်ပရောဖက်ပြုချက် နှင့် ယှဉ်သောပွဲတော်ဖြစ်သည်။ အဘယ့်ကြောင့်နည်း။ တဲတော်ပွဲသာလျှင် ထိုခေတ်ကာလ၌ မပြည့်စုံ ရသေးဘဲ နိုင်ငံတော်ပေါ်ထွန်းမှသာ ပြည့်စုံလာမည်ဖြစ်သည်။၂၂

ယေရုရှလင်သို့ လာရောက်ဝတ်ပြုကိုးကွယ်ရန် ငြင်းပယ်သူများသည် ဆင်းရဲဒုက္ခကြုံကြမည်။ အဲဂုတ္တု ဆိုသည်မှာ မိုးခေါင်မည့်တိုင်းနိုင်ငံများကို ကိုယ်စားပြုခေါ်ဆိုခြင်းဖြစ်သည်။ နာခံခြင်းမရှိသော တိုင်းနိုင်ငံများ၌ မိုးခေါင်သောကြောင့် ဆန်ရေစပါး ရှားပါးငတ်မွတ်ကြမည်။

(ဓ) သာမန်လူ့အသုံးအဆောင်များ ယဇ်ပူဇော်ရာတန်ဆာပလာဖြစ်သွားခြင်းနှင့် ဘုရားအိမ်တော်တွင် ပွဲစျေးခင်းမလုပ်ရခြင်း (၁၄:၂၀–၂၁)

ထိုနေ့ရက်တွင် အရာခပ်သိမ်းသည် “ထာဝရဘုရားအတွက် သန့်ရှင်း“ကြမည်။ လောကီအရာနှင့် ဘုရားဆိုင်ရာဟူ၍ ကွဲပြားခြားနားမှု မရှိ။ မြင်း၌ဆွဲသေခြူ များ။ ယေရုရှလင်နှင့် ယုဒပြည်ရှိ အိုးခွက်ပန်းကန် များသည်လည်း ဝတ်ပြုကိုးကွယ်ရာတန်ဆာပလာများ ဖြစ်မည်။ ညစ်ညူး၍ မစင်ကြယ်သောသူများ၊ ခါနနိသား များအားလုံး ထာဝရဘုရားအိမ်တော်မှ တယောက်မကျန်နှင်ထုတ်ပစ်မည်။

မှတ်စု

၁(၁:၁၈-၂၁) အချို့က ဆန့်ကျင်ဘက်လေးခုဟုသာ မြင်၍ ရူပါရုံရှစ်ခုသို့ ဦးတည်သည်။ (Joyce G. Bladwin, Haggai, Zechariah, Malachi, p.407)။ မည်သို့ပင်ဖြစ်စေ၊ ရှေးဦးပြန်ဆိုချက်များက အင်ပါယာ တစ်ခုချင်းစီကို ဖော်ပြသည်။

၂(၁:၁၈-၂၁) G. Coleman Luck, Zechariah, pp.26,27.

၃(၃:၈-၉) Merrill F. Unger, Zechariah, Prophet of Messiah’s Glory, pp.64,65.

၄(၃:၈-၉) Arno C. Gaebelein, Studies in Zechariah, p.42.

၅(၄:၁-၆) Unger, Zechariah, p.75.

၆(၆:၉-၁၃) Joshua နှင့် Jeshua (ဟေဗြဲတွင် ယေရှု)သည် တူညီသောနာမည်များဖြစ်သည်။

၇(၆:၉-၁၃) David Baron, The New Order of Priest-hood, p.30 foot notes.

၈(၇:၁-၃) Bethel သည် ဟေဗြဲစကားဖြစ်၍ ဘုရားအိမ်တော်ဟု အဓိပ္ပါယ်ရသည်။ ဗိမာန်တော်ကိုမူ (ယေဟောဝါ)ဘုရားသခင်၏ အိမ်တော်ဟုခေါ်သည်။ City of Bethel ဗေသလမြို့ဟူသော ဝေါဟာရသည် KJV/ NKJV အတွက် ကွဲလွဲစရာစကားဖြစ်လာသည်။ ဟေဗြဲဘာသာ၌ မရှိသောကြောင့် ယူသုံးခြင်းဖြစ်သည်။ Baldwin က”ဤကျမ်းပိုဒ်စကားလုံးကို အတိအကျပြန်ဆိုရန် နည်းလမ်းမရှိ”ဟု မှတ်ချက်ပြုထားသည်။ (Joyce G. Baldwin, Haggai, Zachariah, Malachi, pp.141-143ကိုကြည့်ပါ)။

၉(၇:၈-၁၄) William Kelly, Lectures Introductory to the Study of Minor Prophets, p.467.

၁၀(၉:၁၄-၁၇) Unger, Zechariah, p.170.

၁၁(၁၀:၄၊၅) C. L. Feinberg, God Remember, p.188.

၁၂(၁၁:၇၊၈) Unger, Zechariah, p.195.

၁၃(၁၁:၁၅-၁၇) Feinberg, God Remember, p.188.

၁၄(၁၂:၁၀-၁၄) ဟေဗြဲ၌ Simeonသည် Shimon ပင်ဖြစ်သည်။ ရှေးစာပေခေတ်ဦးက သရမပါဘဲ ဗျည်း သက်သက်ရေးခဲ့ရာမှ သရပေါင်းထည့်သော် ရှိမိ Shimeiဟု မှားယွင်းနိုင်သည်။

၁၅(၁၃:၆) ကျော်ကြားသော ဓမ္မဟောင်းပညာရှင် Ungerက ဤအပိုဒ်အား ခရစ်တော်နှင့်တွဲစပ်ပေးသည်။ သို့သော်လည်း သူနှင့်သဘောကြိုက်ညီတိုက်ဆိုင်သူ ပညာရှင်နည်းပါးလှကြောင်း ဝန်ခံခဲ့သည်။ သို့ပင်ဖြစ်ငြား Dr. Unger က သူ့အမြင်ကို သူ၏အနက်ဖွ့ကျမ်း၌ စာတိုင်ငါးခုနေရာပေး၍ ကာကွယ်ရေးသားခဲ့သည်။ (pp.228-230).

၁၆(၁၃:၆) G. Coleman Luck, Zechariah, p.113.

၁၇(၁၄:၃-၅) Unger, Zechariah, p.250.

၁၈(၁၄:၆၊၇) Baldwin, Haggai, Zachariah, Malachi, p.203.

၁၉(၁၄:၆၊၇) Ibid.

၂၀(၁၄:၆၊၇) Unger, Zechariah, pp.252,253.

၂၁(၁၄:၁၂-၁၅) ယနေ့ခေတ်စာဖတ်သူများက ဤကျမ်းပိုဒ် ဖော်ပြချက်မြင်ကွင်းစုံသည် နျူကလီယာ တိုက်ခိုက်မှုတစ်ခု၏ကြောက်မက်ဖွယ်အကျိုးဆက်နှင့် ဆင်တူနေကြောင်း သတိပြုမိပေမည်။

၂၂(၁၄:၁၆-၁၉) Unger, Zechariah, p.265.

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။