Zechariah -10 -

ဇာခရိအနာဂတ္တိကျမ်း - ၁၀

ကယ်တင်ရန်ကတိတော်

1နောက်မိုး ရွာရာကာလတွင် မိုးရွာစေမည်အကြောင်း၊ ထာဝရဘုရားထံတော်၌ ဆုတောင်းကြလော့။ ထာဝရဘုရားသည် လျှပ်စစ်ကိုပြင်ဆင်၍ များစွာမိုးရွာစေသဖြင့်၊ ခပ်သိမ်းသောလူတို့အဖို့ လယ်ပြင်၌ အပင် ပေါက်စေတော်မူမည်။ 2တေရပ်ရုပ်တုတို့သည် အနတ္တစကားကို ပြောကြ၏။ ပရောဖက်လုပ်သော သူတို့သည် မုသားရူပါရုံကိုမြင်၍၊ မမှန်သောအိပ်မက်ကို ဟောပြောကြ၏။ အချည်းနှီး နှစ်သိမ့်စေကြ၏။ ထိုကြောင့်၊ သိုးစုကဲ့သို့ လည်သွား၍ သိုးထိန်းမရှိသောကြောင့် ဆင်းရဲခံရကြ၏။ 3သိုးထိန်းတို့ကို ငါအမျက်ထွက်၍၊ ဆိတ်ထီးတို့ကို စစ်ကြောသဖြင့်၊ ကောင်းကင်ဗိုလ်ခြေအရှင် ထာဝရဘုရားသည် မိမိသိုးစု ယုဒအမျိုးကို အကြည့်အရှုကြွလာ၍၊ ဘုန်းတော်ကိုဆောင်သော စစ်တိုက်မြင်းကဲ့သို့ ဖြစ်စေတော်မူမည်။ 4ထိုအမျိုးထဲက တိုက်ထောင့်အမြစ်ကျောက်၊ တံစို့၊ စစ်တိုက်လေး၊ မင်းဖြစ်သော လူအပေါင်းတို့သည် ထွက်ကြလိမ့်မည်။ 5သူတို့သည် စစ်တိုက်ရာတွင် လမ်း၌ရှိသောရွှံ့ကိုနင်းသော စစ်သူရဲကဲ့သို့ ဖြစ်ကြလိမ့်မည်။ ထာဝရဘုရား၏ ကျေးဇူးတော်ကို ခံရသောကြောင့်၊ စစ်တိုက်၍ မြင်းစီးသူရဲတို့ကို အရှက်ခွဲကြလိမ့်မည်။ 6ယုဒအမျိုးကိုလည်း ငါခိုင်ခံ့စေမည်။ ယောသပ်အမျိုးကိုလည်း ငါကယ်တင်မည်။ သူတို့ကို သနားစုံမက်သောကြောင့် နေရာချမည်။ သူတို့သည် နှင်ထုတ်ခြင်းကို မခံဖူးသကဲ့သို့ ဖြစ်ကြလိမ့်မည်။ ငါသည် သူတို့၏ ဘုရားသခင် ထာဝရဘုရားဖြစ်၍ သူတို့စကားကို နားထောင်မည်။ 7ဧဖရိမ်အမျိုးသားတို့သည် သူရဲကဲ့သို့ ဖြစ်၍၊ စပျစ်ရည်နှင့်ဝသကဲ့သို့ ဝမ်းမြောက်ကြလိမ့်မည်။ သားမြေးတို့သည် မြင်လျက် ဝမ်းမြောက်၍၊ ထာဝရဘုရားကိုအမှီပြုလျက် ရွှင်လန်းကြလိမ့်မည်။ 8သူတို့ကို ငါနှိုးဆော်၍ စုဝေးစေမည်။ သူတို့သည် ငါ၏ရွေးနုတ်ခြင်းကို ခံရသောအားဖြင့်၊ အရင်များပြားသကဲ့သို့ တစ်ဖန် များပြားကြလိမ့်မည်။ 9သူတို့ကို တစ်ပါးအမျိုးသားတို့တွင် မျိုးစေ့ကဲ့သို့ ငါကြဲသဖြင့်၊ ဝေးသောပြည်၌ ငါ့ကိုအောက်မေ့၍၊ သားမြေးတို့နှင့်တကွ အသက်ရှင်လျက် ပြန်လာကြလိမ့်မည်။ 10သူတို့ကို အဲဂုတ္တုပြည်မှ တစ်ဖန် ငါဆောင်ခဲ့ဦးမည်။ အာရှုရိပြည်မှခေါ်၍ စုဝေးစေမည်။ ဂိလဒ်ပြည်နှင့် လေဗနုန်ပြည်သို့ တစ်ဖန် ငါဆောင်ခဲ့သဖြင့်၊ သူတို့ နေစရာဖို့ မြေမလောက်နိုင်။ 11ပင်လယ်အလယ်၌ လျှောက်သွား၍ ညှဉ်းဆဲလျက်၊ ပင်လယ်တံပိုးများကို ဒဏ်ခတ်တော်မူမည်။ မြစ်၌ နက်နဲသောအရပ်ရှိသမျှတို့လည်း ခန်းခြောက်ကြလိမ့်မည်။ အာရှုရိပြည်၏မာနကို နှိမ့်ချ၍၊ အဲဂုတ္တုမင်း၏အာဏာသည်လည်း ကွယ်ပျောက်လိမ့်မည်။ 12သူတို့ကို ထာဝရဘုရားအားဖြင့် ငါခိုင်ခံ့စေမည်။ နာမတော်ကို အမှီပြုလျက် လှည့်လည်၍ သွားကြလိမ့်မည်ဟု ထာဝရဘုရား မိန့်တော်မူ၏။

ဇာခရိအနာဂတ္တိကျမ်း - ၁၀ (အနက်ဖွင့်)

(ဆ) မိုးရွာသွန်းရန် ဘုရားရှင်ထံဆုတောင်းကြခြင်း (၁၀:၁–၂)

မိုးမှန်မှန်ရွာသွန်းစေဖို့ တန်ဖိုးမရှိသော ရုပ်တုဆင်းတုများထံအမှီမပြုဘဲ ထာဝရဘုရားရှင်ထံ၌သာ ဆုတောင်းကြရန်၊ ဣသရေလလူ ပရိသတ်တို့အား တိုက်တွန်းနှိုးဆော်သည်။ ရုပ်တုဆင်းတုအားကိုးလျက် ရေလိုက်လွဲနေလျှင် သိုးသိန်းမရှိသော သိုးစုကဲ့သို့ မျက်စိလည် လမ်းမှားရောက်ကြလိမ့်မည်။

(ဇ) ယုဒခေါင်းဆောင်များကို အပြစ်ပေးခြင်း မေရှိယရှင်ပြန်ထမြောက်ခြင်းနှင့် လူသားများကို လောက အောင်မြင်ခွင့်ပေးခြင်း (၁၀:၃–၅)

၁၀:၃ ဘုရားသခင်၏အမျက်တော်သည် သိုးထိန်းတို့အပေါ် ကျရောက်ခဲ့သဖြင့် ဘုရားလူများပြန့်ကြဲ ကွဲလွင့်ခဲ့ရသည်။ ဘုရားရှင်သည် မိမိသိုးစုထံ နောက်တဖန်အကြည့်အရှုကြွလာ၍ သူတို့အား စစ်မြင်းကဲ့သို့ ခွန်အားပြည့်စုံစေမည်။

၁၀:၄–၅ အငယ်(၄)ကို ကျမ်းစာသုတေသီအများစုက မေရှိယကတိတော်အဖြစ် အနက်ဖွင့်ဆိုကြသည်။ ယုဒမျိုးနွယ်ထဲမှ တိုက်ထောင့်အမြစ်ကျောက်၊ တံစို့၊ စစ်လေး၊ မင်းဖြစ်မည့်သူများ ပေါ်ထွက်လာမည်။ အချို့ကမူ ဣသရေလလူမျိုးတို့ ပြန်လည်စုစည်းမိကြမည့် အတိတ်စိမ်းအဖြစ် မှတ်ယူသည်။ Feinbergက”မေရှိယသခင်ပေါ် ထွန်း၍ ဖိနှိပ်သူများကို ဤမြေပေါ်မှ ပယ်ရှားလိမ့်မည်ဟု ဆိုသည်၁၁ (KJVကိုကြည့်)။။ မည်သို့ပင်ဖြစ်စေ၊ ယုဒတို့က သူတို့ရန်သူများအပေါ်အောင်ပွဲဆင်မည်သာဖြစ်သည်။

(ဈ) ဣသရေလနှင့် ယုဒလူများ ပြန်လည်သင့်မြတ် ပေါင်းစည်းမိမည် (၁၀:၆–၁၂)

အပိုဒ်ငယ် ၆-၁၂တွင် ကမ္ဘာအနှံ့ပြန့်ကြဲနေသော ဣသရေလ(ယောသပ်)နှင့် ယုဒလူတို့ ပြန်လည် ပေါင်းစည်းမိကြမည်။ ဣသရေလ (ဧဖရိမ်)သည် စစ်မက်ဗိုလ်ပါအင်အားတောင့်တင်းမည်။

သခင်ဘုရား တံပိုးမှုတ်သောအခါ ဂိလက်၊ လေဗနုန်၊ အဲဂုတ္တုနှင့် ဆီးရီးယား အပြည်ပြည်အရပ်ရပ်၌ ကွဲလွှင့်ပျံ့နှံ့နေသော ယုဒလူများ ပြန်လည်စုဝေးလာကြမည်။ ယုဒလူမျိုးအား ကျွန်ပြုသူများကိုလည်း ဘုရားရှင်က ပြစ်ဒဏ်ပေး အရေးယူလိမ့်မည်။ ယုဒနှင့်ဣသရေလအမျိုးတို့သည် နာမတော်မြတ်၌ ဘုန်းကျက် သရေတင့်တယ်မည်။ ပင်လယ်အလယ်၌ လျှောက်သွားခြင်းဆိုသည်မှာ လူမျိုးတော်လွှတ်မြောက်ရန် ပင်လယ်နီ ဖြတ်သန်းခြင်းကို ဆိုလိုသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။