Song of Solomon -6 -

ရှောလမုန်သီချင်း - ၆

1မိန်းမတကာတို့ထက် အဆင်းလှသောအစ်မ၊ သင်ချစ်ရာသခင်သည် အဘယ်အရပ်သို့ ကြွတော်မူသနည်း။ အကျွန်ုပ်တို့သည် သင်နှင့်အတူ သူ့ကိုရှာရမည်အကြောင်း၊ သင်ချစ်ရာသခင်သည် အဘယ်အရပ်သို့ လွှဲသွားတော်မူသည်ကို ပြောပါ။

2ငါချစ်ရာသခင်သည် ဥယျာဉ်တော်၌ သစ်သီးကို စား၍၊ နှင်းပွင့်ကို ဆွတ်ယူမည်ဟု၊ ဥယျာဉ်တော်တွင် နံ့သာတောသို့ ဆင်းသွားတော်မူပေ၏။ 3ငါချစ်ရာသခင်သည် ငါ့ကိုဆိုင်တော်မူ၏။ ငါသည်လည်း သခင်ကို ဆိုင်ပေ၏။ နှင်းတော၌ ကျက်စားတော်မူ၏။

တုနှိုင်းမရသောအလှ

4ငါချစ်သောနှမ၊ သင်သည် တိရဇမြို့ကဲ့သို့ လှ၏။ ယေရုရှလင်မြို့ကဲ့သို့ တင့်တယ်၏။ စစ်မျက်နှာကဲ့သို့ ကြောက်မက်ဖွယ် ဖြစ်၏။ 5သင်၏မျက်စိတို့ကို ငါမှလွှဲပါ။ သူတို့သည် ငါ့ကိုအောင်ပြီ။ သင်၏ဆံပင်သည်လည်း၊ ဂိလဒ်တော်ပေါ်မှ ဆင်းလာသော ဆိတ်စုကဲ့သို့ဖြစ်၏။ 6သင်၏သွားတို့သည်လည်း၊ ရေချိုးရာမှတက်လာသော သိုးစုကဲ့သို့ဖြစ်ကြ၏။ တစ်ကောင်မျှ မလျော့၊ အမွှာသာ ဖွားတတ်ကြ၏။ 7နားပန်းဆံကြားမှာ ပါးတို့သည် သလဲသီးရှက်နှင့် တူကြ၏။ 8မိဖုရားခြောက်ကျိပ်၊ မောင်းမမိဿံရှစ်ကျိပ်၊ အပျိုတော်အတိုင်းမသိ ရှိကြ၏။ 9ငါ့ချိုး၊ ငါ၏စုံလင်သူသည် ငါ၌တစ်ပါးတည်းရှိ၏။ ဖွားမြင်သောမိခင်၌ အချစ်ဆုံးသောသမီးဖြစ်၏။ လူမျိုးသမီးတို့သည် သူ့ကိုမြင်၍ ကောင်းချီးပေးကြ၏။ မိဖုရားများနှင့် မောင်းမမိဿံများတို့သည် ချီးမွမ်းကြ၏။

10လကဲ့သို့ တင့်တယ်လျက်၊ နေကဲ့သို့ ထွန်းလင်းလျက်၊ စစ်မျက်နှာကဲ့သို့ ကြောက်မက်ဖွယ်ဖြစ်လျက်၊ နံနက်ကဲ့သို့ မျှော်ရှုသောသတို့သမီးကား၊ အဘယ်သူနည်း။

11ချိုင့်ထဲမှာ သစ်သီးများကို ကြည့်ရှု၍၊ စပျစ်နွယ်ပင် သန်သည် မသန်သည်ကိုလည်းကောင်း၊ သလဲပင်ပွင့်သည် မပွင့်သည်ကိုလည်းကောင်း သိခြင်းငှာ၊ ငါပြုစုသော ဥယျာဉ်သို့ ငါဆင်းသွား၏။ 12သတိမရမီ ငါ့ဝိညာဉ်သည် အမိနဒိပ်ရထားကို စီးသကဲ့သို့ ဖြစ်၏။

13အိုရှုလမိတ်၊ ပြန်လာပါ။ ပြန်လာပါ။ အကျွန်ုပ်တို့သည် သင့်ကိုရှုမြင်ရမည်အကြောင်း၊ ပြန်လာပါ။ ပြန်လာပါ။

ရှုလမိတ်၌ အဘယ်သို့သောအရာကို တွေ့မြင်ကြလိမ့်မည်နည်း။ စစ်တပ်နှစ်တပ်ကဲ့သို့ တွေ့မြင်ကြပါမည်။

ရှောလမုန်သီချင်း - ၆ (အနက်ဖွင့်)

၆း၁ ထိုစကားကြောင့် ယေရုရှလင်သမီးပျိုအပေါင်းသည် ထိုလှပဂေးသိုးထိန်းလေးအားမြင် ချင်စမ်းလှသည်။ အဘယ်မှလိုက်ကြည့်ရမည်ပဆိုကြသည်။

၆း၂-၃ သူမ၏အဖြေစကားသည် ချစ်သ၀န်တိုစကားဖုံးဖိထားသည်။ “ဥယျာဉ်တောသို့သွား ချေပြီ” အော်သို့နှယ်။ အဘယ်ကြောင့်ပြောမိလိုက်ပါလိမ့်။ သူမပိုင်ဆိုင်ချင်သည်။ သူ့ရီးစားကလည်း သူ့ကို ပိုင်ဆိုင်ချင်သည်။ ထိုစကားကိုသာ ရပ်သိရွာသိအော်ပြောလိုက်ချင်ပါ၏။

၁၃။ ရှောလမုန်အချစ်အတွက် တဖန်မွေးဖွားခြင်း (၆း၄-၁၀)

ရောလမုန်သည် မလျှော့သောဇွဲဖြင့် အသစ်တဖန်ကြိုးစား ပိုးပန်းနေရပြန်သည်။ အရှေ့တိုင်းသားများ မိန်းမပိုးနည်းဟန်တိုင်း မျက်နှာအလှကို အသားပေးချီးမွမ်းသည်။ ၄း၁-၃ တွင်ဖော်ပြသည်။ အလှဖွဲ့စကားမျိုးထပ်ဆိုသည်။ သူ့စိတ်ထဲတွင် ဤသူငယ်မသည် မိဖုရားခြောက်ဆယ်၊ မောင်းမမိဿံရှစ်ဆယ်၊ မရေတွက်နိုင်သော လှပျိုဖြူကညာများထက်သာ ပါဘိခြင်း။ မယ်တော်သာမက အခြားဘုရင်မများ၊ မောင်မမိဿံများနှင့် မိန်းမသားများကလည်း ချီးမွမ်းကြတန်သည်။ “လကဲ့သို့တင့်တယ်လျက်နေကဲ့သို့ ထွန်းလင်းသူ၊ အောင်ပွဲထံသူစစ်သူရဲကဲ့သို့ မျက်နှာတင့်တယ် သူသည် သူမမှလွဲ၍ အဘယ်မှ ရှာတွေ့မည်နည်း။”

၁၄။ သူ့အချစ်အား နန်းတော်က မဆွဲဆောင်နိုင်ကြောင်းတုန့်ပြန်ခြင်း (၆း၁၁-၁၃)

၆း၁၁-၁၂ ရှောလမုန်မင်းနှင့် မျက်လုံးချင်း အဝေ့တွေ့ဆုံခဲ့ပုံကို စားမြုံ့ပြန်ပြောပြသည်။ ဥယျာဉ်ခြံထဲတွင် သစ်သီးပင်များ လိုက်ကြည့်နေခိုက်၊ ရှောလမုန်မင်း၏ စစ်ရထားကြီးအနားဆီသို့ ရောက်လာသည်။ ဘုရင်မင်းလှည့်အကြည့်မှာ စိတ်လှုပ်ရှား၍ တောသူမအား ယေရုရှလင်နန်းတော်ဆီသို့ တမဟုတ် ချင်းခေါ်ဆောင်လာသည်။ သို့သော်နန်းတွင်းသူဖြစ်ဖို့ စိတ်ကူးမယဉ်၊ မမျှော်မှန်းခဲ့။ မတမ်းတစဘူးသဖြင့် မပျော်မွေ့နိုင်။

၆း၁၃ ယေရုရှလင်ပြန်လည်ထွက်ခွာမည်ပြုစဉ် ရှောလမုန်နှင့် ယေရုရှလင်သမီးပျိုတို့က ဟန့်တားကြသည်။ အလှကို လူမြင်နည်းရာမှ မကွယ်ထားဖို့၊ ၀ါးလုံးခေါင်းထဲ လမသာဖို့စည်းရုံးကြသည်။ သူ့အလှသည် တော်၀င်နန်းနှင့်သာ ထိုက်တန်သည်။ အဘယ်ကြောင့်သူ့ ကိုအခြားသာမန်မိန်များကဲ့သို့ သဘောထားကြပါလိမ့်။ ဤကျမ်းစာပိုဒ်၏ ဒုတိယပိုဒ်သည် အလွန်လေးနက်သောကြောင့် နားလည်ရခက်သည်။ (ဟေဗြဲ Mahanaim) စစ်တပ်နှစ်တပ်ဆိုသည်မှာ ရှုလမိတ်အား ကချေသည်နှစ်ဖွဲ့က တလှည့်စီ ကပြအသုံးတော် ခံသည့်အကြောင်းဖြစ်ဟန်တူသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။

Recent Views: 0