Psalms-66 -

ဆာလံကျမ်း - ၆၆

ဘုရားရှင်၏ကြီးမြတ်ခြင်း

1မြေကြီးသားအပေါင်းတို့၊ ဘုရားသခင့်ရှေ့တော်၌ ကျူးဧသောအသံကိုပြု၍၊ 2နာမတော်၏ဂုဏ်ကို သီချင်းဆိုကြလော့။ ချီးမွမ်းခြင်း၏ ဂုဏ်အသရေကိုပြကြလော့။ 3ကိုယ်တော်စီရင်သော အမှုတို့သည် အလွန်အံ့ဩဖွယ် ဖြစ်ကြပါ၏။ တန်ခိုးတော်ကြီးသောကြောင့်၊ ရန်သူတို့သည် ကိုယ်တော်ကို တောင်းပန်ကြပါလိမ့်မည်။ 4မြေကြီးသားအပေါင်းတို့သည် ကိုယ်တော်ကို ကိုးကွယ်၍၊ သီချင်းဆိုကြပါစေသော။ နာမတော်အား သီချင်းဆိုကြပါစေသောဟု ဘုရားသခင်အား လျှောက်ထားကြလော့။ 5ဘုရားသခင် စီရင်တော်မူသောအမှုတော်ကို လာ၍ ကြည့်ကြလော့။ လူသားတို့တွင် စီရင်တော်မူသော အမှုတို့သည် အံ့ဩဖွယ်ဖြစ်ကြ၏။ 6ပင်လယ်ကို ကုန်းဖြစ်စေတော်မူ၏။ သူတို့သည် ရေစီးရာအရပ်ကို ခြေဖြင့်လျှောက်သွားကြသည်ဖြစ်၍၊ ငါတို့သည် ဘုရားသခင်၌ ဝမ်းမြောက်ကြ၏။ 7တန်ခိုးတော်အားဖြင့် အစဉ်အမြဲ အုပ်စိုးတော်မူ၏။ မျက်စိတော်သည် လူအမျိုးမျိုးတို့ကို ကြည့်ရှုသည်ဖြစ်၍၊ ငြင်းဆန်သောသူတို့သည် မဝါကြွားကြစေနှင့်။ 8အချင်းလူစုတို့၊ ငါတို့ ဘုရားသခင်ကို ကောင်းချီးပေးကြလော့။ ဂုဏ်ကျေးဇူးတော်ကို ချီးမွမ်းသော စကားသံနှင့် ကြွေးကြော်ကြလော့။ 9ငါတို့အသက်ကို မသေစေမည်အကြောင်းနှင့် ခြေကိုလည်း မချော်စေမည်အကြောင်း စောင့်မတော်မူ၏။

10အိုဘုရားသခင်၊ ကိုယ်တော်သည် အကျွန်ုပ်တို့ကို စုံစမ်းတော်မူပြီ။ ငွေကိုစစ်ဆေးသကဲ့သို့ အကျွန်ုပ်တို့ကို စစ်ဆေးတော်မူပြီ။ 11ကျော့ကွင်းထဲမှာ ကျော့မိစေ၍၊ ကျောကုန်းပေါ်မှာ လေးသောဝန်ကို တင်တော်မူပြီ။ 12အကျွန်ုပ်တို့ခေါင်းပေါ်မှာ သူတစ်ပါးကိုစီးစေတော်မူပြီ။ မီး၌လည်းကောင်း၊ ရေ၌လည်းကောင်း သွားရသော်လည်း၊ ကျေးဇူးတော်ကြောင့် ကြွယ်ဝခြင်းသို့ ရောက်ကြပါ၏။ 13မီးရှို့ရသောယဇ်ပါလျက် အိမ်တော်သို့ အကျွန်ုပ်သွားပါမည်။ 14ဆင်းရဲခံရစဉ်အခါ၊ အကျွန်ုပ်သည် နှုတ်ကိုဖွင့်၍ မြွက်ဆိုသည်အတိုင်း၊ သစ္စာဝတ်ကို ဖြေပါမည်။ 15ဆူဖြိုးသောသိုးတို့ကို နံ့သာပေါင်းနှင့်တကွ မီးရှို့ရာယဇ်ပြု၍ ပူဇော်ပါမည်။ နွားနှင့် ဆိတ်တို့ကိုလည်း စီရင်ပါမည်။

16ဘုရားသခင်ကို ကြောက်ရွံ့သောသူအပေါင်းတို့၊ လာ၍ နားထောင်ကြလော့။ ငါ့ဝိညာဉ်အဖို့ အဘယ်သို့ ကျေးဇူးပြုတော်မူသည်ကို ငါကြားပြောမည်။ 17ငါသည် ဘုရားသခင်ကို နှုတ်နှင့်အော်ဟစ်၍၊ ဂုဏ်တော်ကိုလည်း လျှာနှင့်ချီးမွမ်းရပြီ။ 18ငါသည် စိတ်နှလုံးထဲမှာ ဒုစရိုက်ကိုငဲ့ကွက်လျှင်၊ ဘုရားရှင်သည် နားထောင်တော်မမူ။ 19ယခုမူကား၊ ဘုရားသခင်သည် နားထောင်၍၊ ငါမြွက်ဆိုသော ပတ္ထနာစကားသံကို မှတ်တော်မူပြီ။ 20ငါမြွက်ဆိုသော ပတ္ထနာကိုပယ်တော်မမူ။ ကျေးဇူးတော်ကို ငါမှ ရုပ်သိမ်းတော်မမူသော ဘုရားသခင်သည် မင်္ဂလာရှိတော်မူစေသတည်း။

ဆာလံကျမ်း - ၆၆ (အနက်ဖွင့်)

ဆာ ၆၆ လာလော့၊ ကြည့်လော့၊ နားဆင်လော့

၆၆:၁–၄ ပထမအပိုဒ်ငယ် (၄)ခုတွင် ဆာလံဆရာက ဘုရားသခင်၏နာမတော်ချီးမွမ်းသီဆို ကြဖို့လောကသားများအားလုံး ဖိတ်ခေါ်သည်။ နာမတော်ချီးမွမ်းပွဲသည် ခြိမ့်ခြိမ့်သဲပျော်ရွှင်ဘွယ် ဖြစ်မှာသေချာသည်။ ဘုရားသခင်သည် ချီးမွမ်းထိုက်သူဖြစ်သောကြောင့် ချီးမွမ်းထောမနာပြုရ သည်။ စကားလုံးတိုင်းဝါကျတိုင်းသည် ဝတ်ပြုကိုးကွယ်ထိုက်သည့် အကြောင်းဖြစ်သည်။ အနည်း ငယ်ကြည့်ရှုကြပါစို့။

နာမတော်ကိုဂုဏ်ပြုသီချင်းဆိုလော့

ချီးမွမ်းခြင်း၏ဂုဏ်အသရေပြကြလော့

ကိုယ်တော်စီရင်သောအမှုသည်အံ့သြဘွယ်ရာ

ရန်သူတို့ကတောင်းပန်ကြလိမ့်မည်။

နာမတော်အား သီချင်းဆိုကြစေသောဟု

ဘုရားသခင်းအားလျှောက်ထားကြလော့။

ဘုရားသခင်၏နိုင်ငံတော်တည်ဆောက်သောအခါ ဤဆာလံသီချင်းသည်မလွဲမသွေ လူကြိုက်အများဆုံးဖြစ်လာမည်။

၆၆:၅–၇ အပိုဒ်ငယ် ၅-၇ပါကျွန်ုပ်တို့၏ နှင့် ကျွန်ုပ်တို့ကို ဟူသောဝေါဟာရသည်နောက်ဆုံး သောနေ့ရက်များ၌ ဣသရေလလူမျိုးများသို့ ဧဝံဂေလိတရားပျံနှံ့သည့်အကြောင်းနှင့် ဣသရေလူများ ကတိုင်းနိုင်ငံသားများ ဖိတ်ခေါ်သည့်အကြောင်းဖြစ်သည်။ အံ့သြဘွယ်ရာကြောက်လန့်ဘွယ်ရာအ ဖြစ်အပျက်နှစ်ခုကြုံတွေ့ခဲ့ကြဘူးသည်။ ပင်လယ်နီဖြတ်သန်းခဲ့ကြစဉ် ကုန်းမြေချောက်ချောက်ပေါ် တွင်ခြေချဖြတ်သန်းခဲ့ကြသည်။ နောက်မကြာမှီ ယော်ဒန်မြစ်အားတဖန်ဖြတ်သန်းကြစဉ် ထိုနည်း အတိုင်းမြေခြောက်ခြောက်ပေါ်တွင် နင်းလျှောက်ရပြန်သည်။ ဣသရေလသမိုင်းကြောင်းတွင် အဘယ်မျှ ထူးဆန်းအံ့သြဘွယ်ရာနည်း။ ထိုဘုရားရှင်ကို သိမြင်သူတိုင်းတိုင်းနိုင်ငံသားများကိုလည်း ကြည့်ရှုနေကြောင်းနားလည်ကြသည်။ ထိုအဖြစ်အပျက်ကို မယုံကြည်ငြင်းပယ်သူများသည် လူမိုက် ဖြစ်သည်။

၆၆:၈–၁၂ ဣသရေလလူမျိုးကိုကောင်းချီးပေးသကဲ့သို့ ဘုရားသခင်ကတပါးအမျိုးသားများ ကိုလည်းတနည်းတဖုံစောင့်ရှောက်ပါသည်။ ထိုသို့ကြည့်ရှုစောင့်ရှောက်ပုံကို အောက်ပါကျမ်းစကား များဖြင့်နားလည်ရသည်-

ငွေကိုစစ်ဆေးသကဲ့သို့ကျွန်ုပ်ကိုစစ်ဆေးတော်မူပြီ (ငယ်၁၀)

ကျော့ကွင်းထဲမှာကျော့မိစေသည် (ငယ်၁၁က)။

လေးသောဝန်ကိုတင်တော်မူပြီ (ငယ်၁၁ခ)။

ခေါင်းပေါ်မှာသူတပါးကို စီးစေတော်မူပြီ (ငယ်၁၂က)။

မီး၌၎င်း၊ရေ၌၎င်းသွားရသောလည်းကျေးဇူးတော်ကြောင့်ကြွယ်ဝခြင်းသို့ရောက်၏ (ငယ်၁၂ခ)

သို့သော်လည်းဘုရားသခင်ကထိုလူများအားစုန်းစုန်းမမြှုပ်စေလိုပါ။ ကြွယ်ဝချမ်းသာ စေမည်။ အနှစ်တထောင်တိုင်းပြည်တွင် ဣသရေလလူများကြွယ်ဝချမ်းသာကြမည်။ ထိုအကြောင်း ကို William ကဤသို့ဆိုသည်-

စာတန်နှင့်လူများက ဣသရေလလူမျိုးကိုမျိုးတုံးစေလို၍တစိုက်မတ်မတ်ကြိုးစားပြသော် လည်းအနှစ်တထောင်တိုင်းပြည်တည်သောနံနက်ခင်း၌ဇိအုန်တောင်ပေါ်တွင် ဣသရေလလူ(၂)မျိုး ပေါ်ပေါက်လာကြသည်။ ဤကျမ်းပိုဒ်အခန်းငယ် ၉ကိုသက်သေထူကြမည်။ ချစ်ခြင်းမေတ္တာနှင့် ဉာဏ်ပညာရှိကြကြောင်း အစစ်ဆေးခံသက်သေထူကြမည် (ငယ် ၁၀-၁၂)။၄၆

၆၆:၁၃–၁၅ အပိုဒ်ငယ် ၁၃-၂၀မှ အကျွန်ုပ်နှင့်အကျွန်ုပ်၏ဟူသောဝေါဟာရသည် တကိုယ် တော်ပင်တိုင်ဆိုသည့်အပိုဒ်ဖြစ်သည်။ ကျမ်းစာသုတေသီအများအပြားက တေးသံရှင်သည်ဣသရေ လတို့၏ယဇ်ပုရောဟိတ်ကြီး သခင်ယေရှုဖြစ်သည်ဟုမှတ်ချက်ပြုကြသည်။ အဘဘုရားသခင်ထံသို့ မီးရှို့ရာယဇ်ယူဆောင်လာသည်။ ဆင်းရဲဒုက္ခရောက်စဉ် ပြုထားသောကတိတော်ပြည့်စုံကြောင်း ချီးမွမ်းသည်။ လက်ဝါးကပ်တိုင်ပေါ်မှာ ကိုယ်တော်ခံစားရသည့် ဆင်းရဲဒုက္ခ၊ သူ့လူများအတွက် ကိုယ်တော်ခံစားရသည့်ဝေဒနာ “အမှုရောက်လေရာရာ၌ သူတို့ကိုညှဉ်းဆဲတော်မမူ” (ဟေရှာ ၆၃:၉) လည်းဖြစ်နိုင်သည်။

မီးရှို့ယဇ်၊ နွာဆိတ်၊ သိုးများမီးရှို့ပူဇော်သည့်အကြောင်းဖတ်ရှုသည့်အခါ စာသားပါအတိုင်း အတိအကျကောက်ယူရန်မဟုတ်မ။ မေရှိယသခင်ကသူ့လူများအတွက် ဝိညာဉ်ရေးရာယဇ်ပူဇော် ခြင်းကိုဆိုလိုသည်။ ရွေးကောက်ထားသောလူနည်းစုကို ရည်ညွှန်းသည်။ ဘုရားသခင်၏နိုင်ငံတော် ပြန်လည်တည်ဆောက်သောအခါ ယဇ်ပူဇော်ရမည့်ပုံစံဖြစ်ပါသည်။

၆၆:၁၆–၁၉ အပိုဒ်ငယ် ၅တွင် “လာလော၊ ကြည့်လော့”ဟုဖိတ်ခေါ်၍ ယခုအပိုဒ်ငယ်၁၆တွင် “လာလော့၊ နားထောင်လော့” ဟုဖိတ်ခေါ်သည်။ ဘုရားသခင်၏လက်တော်ရာများကို မျက်စိဖြင့် မြင်နိုင်ကြသော်လည်း စကားတော်များမှာဝိညာဉ်တော်ဖြင့်သာ ကြားသိနိုင်သည်။ မေရှိယသခင်က ဘုရားသခင်ချစ်ကြောက်သူများကိုပင့်ဖိတ်သည်။ ထိုသူများ၏ဆုတောင်းသံများအံ့သြဘွယ်ရာအဖြေ ပေးပုံကိုကြည့်ရှုစေချင်သည်။ ကိုယ်တော်ထံသို့အော်ဟစ်ဆုတောင်းခဲ့ကြသည်မဟုတ်ပါ။ ထိုအကြောင်းကို ဟေဗြဲ ၅:၇တွင် “ထိုခရစ်တော်သည်လူ့ဇာတိအဖြစ်၌ နေစဉ်ကာလ၊ သေခြင်းမှ ကင်းလွှတ်နိုင်တော်မူသောသူကို ကြီးစွာသောကြွေးကြော်ခြင်း၊ မျက်ရည်ကျခြင်းဖြင့်ဆုတောင်း ပဌနာပြု၌ကြောက်ရွံ့ခြင်းအမှု၌ ချမ်းသာရ၏”ဟုဆိုသည်။ စိတ်နှလုံးထဲတွင် အပြစ်ရှိနေလျှင် ထိုဆုတောင်းသံအားဘုရားရှင်နားညောင်းမည်မဟုတ်။ အပြစ်ဒုစရိုက်မပြုလျှင် ဘုရားသခင်က နာညောင်းတော်မူသည် (ဟေဗြဲ ၅:၇)။

၆၆:၂၀ နိဂုံးကျမ်းစကားဖြင့်ခွန်အားယူကြပါစို့။

ငါမြွတ်ဆိုသောပဌာနကိုပယ်တော်မမူ။

ကျေးဇူးတော်ကိုရုပ်သိမ်းခြင်းမပြုသော

ဘုရားသခင်သည်မင်္ဂလာရှိတော်မူစေသတည်း။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။

Recent Views: 0