Psalms-33 -

ဆာလံကျမ်း - ၃၃

ထောမနာသီချင်း

1ဖြောင့်မတ်သောသူတို့၊ ထာဝရဘုရားကိုအမှီပြု၍ ရွှင်လန်းစွာ သီချင်းဆိုကြလော့။ ထောမနာပြုခြင်းအကျင့်သည် သဘောဖြောင့်သောသူတို့နှင့် ထိုက်တန်လျောက်ပတ်ပေ၏။ 2စောင်းတီး၍ ထာဝရဘုရားကို ချီးမွမ်းကြလော့။ ကြိုးဆယ်ပင်ရှိသော တူရိယာနှင့် ထောမနာသီချင်းဆိုကြလော့။ 3ရှေ့တော်၌ အသစ်သောသီချင်းကို ဆိုကြလော့။ တံပိုးမှုတ်ခြင်းနှင့်တကွ သာယာစွာ တီးကြလော့။ 4အကြောင်းမူကား၊ ထာဝရဘုရား၏နှုတ်ကပတ်တော်သည် ဖြောင့်မတ်ပေ၏။ စီရင်တော်မူသမျှသော အမှုတို့သည်လည်း သစ္စာတရားနှင့် ညီကြ၏။ 5ဖြောင့်မတ်စွာကျင့်ခြင်းနှင့် တရားသဖြင့် စီရင်ခြင်းကိုနှစ်သက်တော်မူ၏။ ပထဝီမြေကြီးသည် ထာဝရဘုရား၏ ကျေးဇူးတော်နှင့် ပြည့်ဝလျက်ရှိ၏။

6ထာဝရဘုရား၏ နှုတ်ကပတ်တော်အားဖြင့် မိုးကောင်းကင်ကိုလည်းကောင်း၊ နှုတ်တော်အသက်အားဖြင့် မိုးကောင်းကင် တန်ဆာများကိုလည်းကောင်း ဖန်ဆင်းတော်မူ၏။ 7သမုဒ္ဒရာရေကို စုပုံစုဝေးစေတော်မူ၏။ နက်နဲသောသမုဒ္ဒရာကိုလည်း လုံခြုံရာအရပ်တို့၌ သိုထားတော်မူ၏။ 8ထာဝရဘုရားကို မြေကြီးတစ်ပြင်လုံး ကြောက်ရွံ့စေ။ လောကီနိုင်ငံသားအပေါင်းတို့သည် ရိုသေလေးမြတ်ကြစေ။ 9အကြောင်းမူကား၊ ထာဝရဘုရားမြွက်ဆို၍၊ မြွက်ဆိုတော်မူသည်အတိုင်းဖြစ်၏။ အမိန့်တော်ရှိ၍၊ မိန့်တော်မူသည်အတိုင်း တည်လျက်နေ၏။

10ထာဝရဘုရားသည် တစ်ပါးအမျိုးသားတို့၏တိုင်ပင်ခြင်းကိုပယ်တော်မူ၏။ လူစုတို့၏ကြံစည်ခြင်းကိုလည်း ဖျက်ဆီးတော်မူ၏။ 11ထာဝရဘုရား၏ပြဌာန်းတော်မူခြင်းသည် ကာလအနန္တနှင့်ဆိုင်၍၊ စိတ်နှလုံးတော်၏အကြံအစည်တို့သည် သားစဉ်မြေးဆက် အဆုံးတိုင်အောင်တည်ကြလိမ့်မည်။ 12ထာဝရဘုရားသည် အကြင်အမျိုး၏ဘုရားဖြစ်၍၊ အကြင်လူစုကို မိမိအမွေဥစ္စာဖို့ ရွေးကောက်တော်မူ၏၊ ထိုအမျိုးနှင့် ထိုလူစုသည်မင်္ဂလာရှိ၏။

13ထာဝရဘုရားသည် ကောင်းကင်ဘုံကကြည့်ရှု၍၊ လူသားအပေါင်းတို့ကို မြင်တော်မူ၏။ 14ကျိန်းဝပ်တော်မူရာ အရပ်ကကြည့်ရှု၍၊ မြေကြီးပေါ်မှာနေသော သတ္တဝါအပေါင်းတို့ကို မှတ်တော်မူ၏။ 15သူတို့၏စိတ်နှလုံးရှိသမျှတို့ကို ဖန်ဆင်း၍၊ သူတို့ကျင့်သမျှသော အကျင့်တို့ကိုလည်း ဆင်ခြင်တော်မူ၏။ 16ရှင်ဘုရင်မည်သည်ကား၊ များစွာသော အလုံးအရင်းအားဖြင့် ချမ်းသာမရ။ သူရဲသည်လည်း ခွန်အားကြီးသောအားဖြင့် ကယ်လွှတ်ခြင်းသို့မရောက်။ 17မြင်းသော်လည်း ဘေးလွတ်ခြင်းအမှုကို မတတ်နိုင်။ ကြီးစွာသော ခွန်အားဗလဖြင့် မကယ်မယူနိုင်။ 18ထာဝရဘုရားကို ကြောက်ရွံ့သောသူတို့နှင့် ကရုဏာတော်ကို ခိုလှုံသောသူတို့သည်၊ 19သေဘေးနှင့် ကင်းလွတ်မည်အကြောင်း၊ အစာခေါင်းပါးသည်ကာလ၌ အသက်ရှင်မည်အကြောင်း၊ သူတို့ကိုကြည့်ရှုလျက် ရှိတော်မူ၏။ 20ငါတို့၏ဝိညာဉ်သည် ထာဝရဘုရားကို မျှော်လင့်လျက်နေ၏။ ထိုဘုရားသည် ငါတို့ကို မစသောသူ၊ ကွယ်ကာသောသူ ဖြစ်တော်မူ၏။ 21သန့်ရှင်းသောနာမတော်ကို ခိုလှုံသောကြောင့်၊ ငါတို့သည် ထာဝရဘုရား၌ ဝမ်းမြောက်ခြင်းရှိကြ၏။ 22အိုထာဝရဘုရား၊ အကျွန်ုပ်တို့သည် ကိုယ်တော်ကို ကိုးစားသည်နှင့်အညီ၊ အကျွန်ုပ်တို့အပေါ်မှာ ကရုဏာတော် သက်ရောက်ပါစေသော။

ဆာလံကျမ်း - ၃၃ (အနက်ဖွင့်)

ဆာ ၃၃၊ အသစ်သောသီချင်း

အထက်ကျမ်းချက်မှ နောက်ဆုံးအပိုဒ်နှင့်ဤ ကျမ်းချက်မှ ပထမအပိုဒ်သည်ဆက်စပ်သည်။ ကျမ်းပိုဒ်နှစ်ခုစလုံးတွင် ဖြောင့်မတ်သူများက ဘုရားသခင်အား ဝမ်းမြောက်ရွှင်လန်းစွာသီဆိုကြမည့်အကြောင်း ရေး ထားသည်။ ဤဆာလံကျမ်းပိုဒ်တွင် အဘယ့်ကြောင့်ထိုသို့ချီးမွမ်း သီဆိုရသည့်အကြောင်း ရှင်းပြထားသည်။

ရန်သူများ၏ လှုပ်ရှားမှု၊ ညှဉ်းပန်းနှိပ်စက်မှု၊ ဘေးဒုက္ခပေးခြင်းများ မတွေ့ရပါ။ ဣသရေလလူများသည် ထာဝရဘုရားသခင်၏အုပ်စိုးမှုအောက်တွင် ဘေးရန်ကင်းရှင်းစွာ သာယာစိုပြေနေကြသည်။ ဆာလံဆရာက ခရစ်တော်၏နိုင်ငံတော် အစပျိုးထားသည်။ ဖိစည်းနှိပ်စက်တတ်သောနတပါးအမျိုးသားများသည်ယာကုတ်၏ ဘေးဒုက္ခမတိုင်မှီခုတ်ပိုင်းခြင်းခံရပြီ။

` ၃၃:၁–၂ ပထမအပိုဒ်(၇) တွင် ဣသရေလလူမျိုးအား ဘုရားသခင်ကိုဝတ်ပြုကိုးကွယ်ဘို့ ဖိတ် ခေါ်၍ အပိုဒ်ငယ်(၈) တွင်တပါးအမျိုးသားအားဖိတ်ခေါ်ထားသည်။ ချီးမွမ်းကိုးကွယ်ခြင်းသည် သုမင်္ဂလာဖြစ်၍ ဂီတတူရိယာ များဖြင့်တွဲဖက်၍ ချီးမွမ်းသီဆိုရမည်။ စောင်း ကြိုးဆယ်ပင်တပ်တူရိယာ များတီးခတ်၍ သီဆိုချီးမွမ်းရသည်။

၃၃:၃ အသစ်သောသီချင်းဆိုသည်မှာ ကယ်လွှတ်ရွှေးနှုတ်ခြင်း သီချင်းဖြစ်သည်။ အပြစ်များခွင့် လွှတ်ခြင်း(ဆာ ၃၂)၏ နောက်ဆက်တွဲဖြစ်၍၊ ခရစ်တော်၏ အသွေးတော်ဖြင့်အပြစ်မျာဆေးကြောခြင်း ခံရသူ များက သီဆိုကြရသည်။ ဤကျမ်းချက်တွင်မူ အနှစ်တထောင်တိုင်းပြည်၌ ရွေးနှုတ်ခြင်းခံရသော ဣသရေလလူ နည်းစုတို့ သီဆိုကြမည့်သီချင်း(ဗျာ ၁၄:၃)ကိုရည်ညွှန်းသည်။

၃၃:၄ ထိုသီချင်းသစ်တွင် ဘုရားသခင်၏ စကားတော်နှင့်အမှုတော်များ ရေးစပ်သီဖွဲ့ထားသည်။ စကားတော်သည်အကြွင်းမဲ့ ဖြောင့်မတ်မှန်ကန်၍ ဘယ်သောအခါမှဖောက်ပြန်ပြောင်းလဲခြင်းမရှိ။ ပရမတ္တ သစ္စာ စကားဖြစ်သည်။ ပြုတော်မူသောအမှုများသည် သစ္စာတရား၌ တည်သည်။ ဖန်ဆင်းခြင်းကိုကြည့်ပါ “ မျိုးကြဲချိန် နှင့် ရုတ်သိမ်းချိန်၊ အေးသော အချိန်နှင့် ပူသောအချိန်၊ ဆောင်းရာသီနှင့် နွေရာသီ၊ နေ့နှင့်ည ” (က-၈:၂၂)ရှိ နေသည်။ ကိုယ်တော်၏ကျွေးမွေးထောက်ပံ့မှု ကိုလည်းကြည့်ပါ။ “ ဘုရားသခင်ကို ချစ်သောသူတည်း ဟူသော ကြံစည်တော်မူခြင်း အတိုင်း ခေါ်တော်မူသောသူတို့၏ အကျိုးကို ခပ်သိမ်းသောအရာ တို့သည်တညီတညွှတ် တည်းပြုကြသည် ” (ရော ၈:၂၈)။ ရွှေးနှုတ်ခြင်းအကြောင်းကို ၁ ယော ၁:၉ တွင် “ မိမိအပြစ်ရှိသမျှကို ဖော်ပြ တောင်းပန်လျှင် ဘုရားသခင်သည် ၎င်းသစ္စာတရားနှင့် လည်းကောင်းပြည့်စုံ၏ဟု ဆိုထားပါသည်။

၃၃:၅ ဘုရားသခင်သည်တိကျ၍ သစ္စာရှိသည်သာမက၊ ဖြောင့်မတ်ခြင်းနှင့်၎င်း၊ တရားမျှတခြင်းနှင့် ၎င်း ပြီးပြည့်စုံသည်။ နေရာတိုင်းတွင် ဘုရားရှင်၏ကောင်းမြတ်ခြင်းကို တွေ့မြင်နိုင်သည်။

၃၃:၆–၇ ဘုရားသခင်၏ကြီးမြတ်ခြင်းကို ကောင်းကင်အရာများနှင့် ဂြိုလ်နက္ခတ်တာရာများ ဖန်ဆင်းသည့်လက်ရာတွင် တွေ့မြင်နိုင်သည်။ ပင်လယ်သမုဒ္ဒရာ များကို လည်း အကန့်အသတ်ထား၍ ဖန်ဆင်းထားသည်။ တချို့လူများက ဣသရေလလူ များကို မိုးကောင်းကင်၏ ကြယ်တာရာများ (က၁၅:၅) ဟုခေါ်ကြ၍ တပါးအမျိုးသားများကို ပင်လယ်ကမ်းခြေရှိသဲမှုန်များ ဟုခေါ်ကြသည်။ သခင်ယေရှု ဒုတိယ အကြိမ် ပြန်လည် ကြွလာသည့် မြင်ကွင်းအဖြစ် ဖေါ်ဆောင်ကြသည်။

၃၃:၈–၉ ဘုရားသခင်သည်လူ့အတွေးအမြင်ဖြင့် ဉာဏ်စွမ်းမမီနိုင်အောင်ကြီးမြတ်ရကား၊ အကြွင်းမဲ့ရိုသေလေးမြတ်ရသည်။ စကားတော်များသည် တည်ကြည်လေးနက်၍ ဆောက်တည်ဖွယ်ရာဖြစ် သည်။ အမိန့်တော်ရှိသမျှ အတိုင်းဖန်ဆင်းသမျှ ဖြစ်ပေါ်လာကြသည်။

၃၃:၁၀–၁၁ လူ့သမိုင်းတလျှောက်တွင် ဘုရားတရားမဲ့ဝါဒီ များက ဘုရားသခင်ကို ဆန့်ကျင်ကြ သည်။ ဘုရားသခင်၏ လူများကိုလည်း ဖျက်လို ဖျက်ဆီးလုပ်ကြသည်။ ဆရာကြီး Burns က “ မိမိ ကိုယ်ကို လူကြီးသူမဟု ထင်ကြရသော်လည်း ကောက်ရိုးမီးဖြစ်ကြသည် ” ဟုဆိုသည်။ ဘုရားသခင်၏ အကြံအစည် တော်ကိုမည်သည့်အရာကမျှ မတားဆီးနိုင်ပါ။ စကားတော်သည် နိစ္စထာဝရ တည်၍ အစီအစဉ်တော်ရှိသမျှ ဖြစ်ပေါ်လာရစမြဲ။

၃၃:၁၂ ဘုရားရှင် တည်သူများသည်ကောင်းချီးမင်္ဂလာ လမ်းလျှောက်လှမ်းသူများဖြစ်သည်။ ထိုသူ များသည်ပျော်ရွှင်သောတိုင်းနိုင်ငံသားများ ဖြစ်ကြ၍ ယေဟောဝါ ဘုရားကို ဘုရားရှင်တော်အဖြစ်သိရှိကြ သည်။ ရွေးကောက်ထားသူများဖြစ်၍ အမွေဥစ္စာလည်း ခံယူတော်မူကြသည်။

၃၃:၁၃–၁၇ ကောင်းကင်ဘုံယံမှ ဘုရားရှင်က လူအများကိုကြည့်ရှုသော အခါ အကုန်အစင်တွေ့ မြင်သည်။ တယောက်မှပုန်းခို၍ မလွတ်။ လူတို့၏ ပြုမူလုပ်ဆောင်ပုံနှင့် ကြံစည်သမျှသော စိတ်ထားများကို လည်းသိမြင်သည်။ လူသတ်လက်နက်စွဲကိုင်ကြသည်ကိုလည်းမြင်သည်။ ထို လူမိုက်များကိုလည်း သိမြင်သည်။ ဘုရားရှင်ထက် ကြည်း၊ ရေ၊ လေ စစ်တပ်အင်အားကို အားကိုးကြသည်ကိုလည်းတွေ့မြင်သည်။ ကရာနီတောင် ကုန်းသစ္စာက အားလုံးကိုအနိုင်ယူကြောင်းမသိကြသေးပါလား။

၃၃:၁၈–၁၉ ကိုယ်တော်ကိုယုံကြည်ကိုးစား၍ ကယ်တင်ခြင်းရရှိသူ၊ ဂရုဏာတော်ကိုမျှော်လင့်၍ ကျွေးမွေးခြင်းခံရသူများကိုလည်းကိုယ်တော်တွေ့မြင်သည်။ ထိုလူများသည် ကိုယ်တော်အားဝမ်းသာစေသူ များဖြစ်သည်။ ကိုယ်တော်၏အမွေတော်ခံယူကြသူများဖြစ်သည်။

၃၃:၂၀–၂၂ ဆာလံဆရာနှင့် လူများအကြားတွင် မေးခွန်းထုတ်စရာ ကွဲပြားခြားနားမှုမရှိပါ။ ယေဟောဝါ ဘုရားရှင်ကို ကူညီမစသူနှင့် ထောက်ပံ့ကျွေးမွေးသူ အဖြစ်ယုံကြည်လက်ခံကြသည်။ ပျော်ရွှင်ခြင်း အမှန်ခံစားကြ၍ နာမတော်ကိုယုံကြည်အားထားကြသည်။ ကိုယ်တော်ချစ်ခြင်းမေတ္တာကို နေရောင်ခြည်ခွန်အား အဖြစ်ရယူကြသည်။ ကိုယ်တော်ကိုသာတည်မှီကြသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။