Psalms-140 -

ဆာလံကျမ်း - ၁၄၀

ကွယ်ကာစောင့်ထိန်းရန်ဆုတောင်း

1အိုထာဝရဘုရား၊ ဆိုးသောသူ၏လက်မှ အကျွန်ုပ်ကိုကယ်နုတ်တော်မူပါ။ ကြမ်းတမ်းသောသူ၏လက်မှ အကျွန်ုပ်ကို ကွယ်ကာစောင့်မတော်မူပါ။ 2ထိုသူတို့သည် နှလုံးထဲမှာ မကောင်းသောအကြံအစည်ရှိ၍၊ စစ်မှုကို အစဉ်နှိုးဆော်ကြပါ၏။ 3သူတို့သည်မြွေကဲ့သို့ မိမိတို့လျှာကိုသွေးတတ်ကြပါ၏။ သူတို့နှုတ်ခမ်းအထဲမှာ မြွေဆိုးအဆိပ်အတောက်ရှိပါ၏။ 4အိုထာဝရဘုရား၊ မတရားသောသူ၏လက်မှ အကျွန်ုပ်ကို ကွယ်ကာစောင့်မတော်မူပါ။ ကြမ်းတမ်းသော သူ၏လက်မှ ကွယ်ကာစောင့်မတော်မူပါ။ သူတို့သည် အကျွန်ုပ်ကိုလှဲခြင်းငှာ ကြံစည်ကြပါ၏။ 5မာနကြီးသောသူတို့သည် အကျွန်ုပ်ဖို့ကျော့ကွင်းနှင့် ကြိုးသေးများကို ဝှက်ထားကြပါ၏။ အကျွန်ုပ်သွားရာလမ်း၌ ကွန်ရွက်ကိုဖြန့်၍ ညွှတ်များကိုထားကြပါ၏။ 6ကိုယ်တော်သည် အကျွန်ုပ်၏ဘုရားသခင်ဖြစ်တော်မူ၏ဟု ထာဝရဘုရားအား လျှောက်ထားပါ၏။ အိုထာဝရဘုရား၊ အကျွန်ုပ်ဆုတောင်းသောစကားကို နားထောင်တော်မူပါ။ 7အိုဘုရားရှင် ထာဝရဘုရား၊ ကိုယ်တော်သည် အကျွန်ုပ်၏ကယ်တင်ခြင်းအစွမ်းသတ္တိ ဖြစ်တော်မူ၏။ စစ်တိုက်ရသောနေ့၌ အကျွန်ုပ်၏ဦးခေါင်းကို ဖုံးအုပ်တော်မူ၏။

8အိုထာဝရဘုရား၊ မတရားသောသူ၏ အလိုပြည့်စုံရသောအခွင့်၊ သူ၏အကြံထမြောက်ရသောအခွင့် ရှိစေတော်မမူပါနှင့်။ 9ထိုသို့သောသူတို့သည် အကျွန်ုပ်ပတ်လည်၌၊ မိမိတို့ဦးခေါင်းကို မချီးမြှောက်ရဘဲ၊ မိမိတို့မြွက်ဆိုသော မကောင်းကျိုးသည် မိမိတို့ကို လွှမ်းမိုးပါစေသော။ 10မီးခဲတို့သည် ထိုသူတို့အပေါ်သို့ ကျရောက်ကြပါစေသော။ မီးထဲသို့လည်းကောင်း၊ နက်သောတွင်းထဲသို့လည်းကောင်း ကျကြပါစေသော။ တစ်ဖန်မထကြပါစေနှင့်။ 11ကဲ့ရဲ့တတ်သောသူသည် မြေပေါ်မှာနေရာမမြဲပါစေနှင့်။ ကြမ်းတမ်းသောသူကိုလည်း ဖျက်ဆီးသည်တိုင်အောင် ဘေးဥပဒ်သည် လိုက်ပါစေသော။ 12ထာဝရဘုရားသည် ဆင်းရဲသောသူ၏အမှုကိုစောင့်၍၊ ငတ်မွတ်သောသူဘက်၌ တရားစီရင်တော်မူမည်ဟု ငါသိ၏။ 13အကယ်စင်စစ်တရားသောသူတို့သည် နာမတော်ကို ချီးမွမ်းကြပါလိမ့်မည်။ သဘောဖြောင့်သောသူတို့သည် အထံတော်၌ နေရကြပါလိမ့်မည်။

ဆာလံကျမ်း - ၁၄၀ (အနက်ဖွင့်)

ဆာ ၁၄၀၊လူဆိုးသူယုတ်တို့လက်ထဲမှ

၁၄၀:၁–၃ ရန်သူများ၏လုပ်ကြံခြင်းမှ လွတ်မြောက်ခွင့်ပေးရန် ဒါဝိဒ်မင်းစတင်ဆုတောင်းသည်။ လူဆိုးများက အသက်ရန်ရှာကြသည်။ လူယုတ်မာများက နှိပ်ကွပ်ကြသည်။ ထိုသူများက သူများကို ဒုက္ခမပေး လျှင် စားမဝင်၊ သူများကို မနှိပ်စက်လျှင် အိပ်မပျော်ကြသူများဖြစ်သည်။ တဘက်လူကို အားမနာ လျှာမကျိုးပြောကြသည်။ မြွေကဲ့သို့ပင် လျှာအောက်၌ အဆိပ်ပါကြသည်။ ပြောစကားများသည် နားထောင် ချင်စဖွယ်မရှိ။ အဆိပ်အတောက်ချည်းဖြစ်သည်။

၁၄၀:၄–၅ သို့ကြောင့် ရန်သူများ၏ ကြော့ကွင်းထဲသို့မကျရောက်စေရန် ဆာလံဆရာက ဆုတောင်း သည်။ လူဆိုးများသည် ထောင်ချောက်ဆင်ရာတွင် အထူးကျွမ်းကျင်ကြသည်။ လှည့်စားတတ်ကြသည်။ မမြင်ကွယ်ရာတွင် ပုန်းအောင်းကြပြီး ဆာလံဆရာသွားရာလမ်းတွင် မာယာထောင်ချောက်ဆင်ကြသည်။ ကွန်ယက်ဖြန့် ထားကြသည်။ ညွတ်များလည်း ထောင်ထားကြသည်။

၁၄၀:၆–၈ ထိုလူသတ်ဖို့ အကြံအစည်မှ ကွယ်ကာတော်မူပါ။ ကိုယ်တော်ထံသို့နီးအောင် ဆွဲခေါ် တော်မူပါ။

ဆက်ကပ်ခြင်း –ကိုယ်တော်သည် အကျွန်ုပ်၏ ဘုရားသခင်၊

ကိုးကွယ်ခြင်း –အကျွန်ုပ်ဆုတောင်းသံ နားထောင်တော်မူပါ။

မှီခိုခြင်း –အကျွန်ုပ်၏မီခိုခြင်းအစွမ်းသတ္တိ၊ဘုရားရှင်၊

ကျေးဇူးတင်ခြင်း –စစ်တိုက်ရာနေ့၌ ဦးခေါင်းကို ဖုံးအုပ်ပေးတော်မူ၏

အသနားခံခြင်း –မတရားသောသူ၏အလိုဖြည့်ခွင့်၊ အကြံထမြောက်ခွင့် မရှိစေပါနှင့်။

နောက်ဆုံးကျမ်းပိုဒ်တွင် “ရန်သူများ၏အလိုမပြည့်၊ အကြံမမြောက်ပါစေနှင့်” ဆိုသည်မှာ သူ့ကို သတ်ဘို့ အကြံအစည် တားဆီးခိုင်းခြင်းဖြစ်သည်။ ဘုရားသခင်သည် မကောင်းသောအကြံအစည် သူ့တပါးကို ဒုက္ခပေးမည့်အတွေးအား ကူညီရိုးမရှိ။ သို့ဖြစ်ပါလျှက်နှင့် အဘယ်ကြောင့် ဤသို့ရေးထားပါသနည်း။ ဆာလံဆရာ၏ ဒုက္ခအားဘုရားသခင်ကယ်တင်ပုံကို ဖော်ညွှန်းလိုသည်။

၁၄၀:၉–၁၁ မကောင်းသောသူများ၏ အကြံအစည်များအား ကိုယ်ရှူးကိုယ်ပတ်ကြပါစေဟု ဆာလံဆရာက ဆုတောင်းသည်။ သူတပါးကို ပေးမည့်ဒုက္ခများသည် ထိုမကောင်းသောသူများ၏ ခေါင်းပေါ် သို့ မီးခဲသဖွယ်ကျပါစေ။ လွတ်မသွားကြစေရန် မိုးသီးမိုးဖွဲပမာ ရွာသွန်းပါ။ ပြေးစရာမရှိဘဲ နောက်ချေးပုံထဲသို့ လိမ့်ကျကြပါစေ။ ကမ္ဘာမြေပေါ်မှာ နေရာမြေမရှိ။ လူတကာက နှာခေါင်းရှုံ့ကြပါစေ။ မြန်မြန်ဆန်ဆန် ပျောက်ကွယ်သွားကြပါစေ။ သက်ဇိုးမရှည်ကြပါစေနှင့်။

၁၄၀:၁၂–၁၃ ဆာလံဆရာသည် ဘုရားသခင်၏ဖြောင့်မတ်ခြင်းကို တွေးတောရင်း ကျေနပ်စိတ်ချ သည်။ ဘာတွေဖြစ်မည်လဲ။ ဘုရားသခင်သည် မရှိဆင်းရဲသား ကျောမွဲလူတန်းစားဘက်မှာ ရပ်တည်ကြောင်း ဆာလံဆရာက သိရှိသည်။ ဘုရားရှင်သည် ဖြောင့်မတ်တော်မူသည့်အတိုင်း ငမွဲများကို ကူညီမစလေ့ရှိသည်။ မစတော်မူသည့်အတိုင်းဆင်းရဲသားများက ကျေးဇူးစကားဆိုလေ့ရှိကြသည်။ သဘောကောင်းမနောဖြောင့် သောသူများသည် အထံတော်တွင် အစဉ်ဆည်းကပ်ကြသည်။ ဆင်းရဲဒုက္ခကြုံဆုံသမျှကို ယားသည်ဟုပင် မထင်ကြ။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။

ကြည့်ရှုသူဦးရေ 0