Psalms-104 -

ဆာလံကျမ်း - ၁၀၄

ဖန်ဆင်းခြင်းအရှင်

1အို ငါ့ဝိညာဉ်၊ ထာဝရဘုရားကို ကောင်းချီးပေးလော့။ အကျွန်ုပ်၏ဘုရားသခင် ထာဝရဘုရား၊ ကိုယ်တော်သည် အလွန်ကြီးမြတ်တော်မူ၏။ ဘုန်းတန်ခိုးအာနုဘော်နှင့် တန်ဆာဆင်တော်မူ၏။ 2အဝတ်နှင့်ခြုံသကဲ့သို့၊ အလင်းနှင့် ကိုယ်တော်ကိုခြုံတော်မူထသော၊ မိုးကောင်းကင်ကို မျက်နှာကြက်ကဲ့သို့ ကြက်တော်မူထသော၊ 3နေတော်မူရာအထက်ခန်း၊ အမြစ်ကိုရေ၌ တည်တော်မူထသော၊ မိုးတိမ်ရထားကိုစီး၍၊ လေအတောင်တို့ဖြင့် ကြွသွားတော်မူထသော၊ 4မိမိတမန်တို့ကို လေကဲ့သို့လည်းကောင်း၊ မိမိအစေအပါတို့ကို မီးလျှံကဲ့သို့လည်းကောင်း ဖြစ်စေတော်မူထသော၊ 5မြေကြီးအမြစ်ကို ကာလအစဉ်အမြဲ မရွေ့မလှုပ်စေခြင်းငှာ၊ တည်တော်မူသောဘုရားပေတည်း။

6ကိုယ်တော်သည် မြေကြီးကို အဝတ်နှင့်ဖုံးသကဲ့သို့၊ ပင်လယ်နှင့် ဖုံးတော်မူ၍၊ ရေတို့သည် တောင်များအပေါ်မှာ ရပ်နေကြပါ၏။ 7တစ်ဖန်ဆုံးမတော်မူ၍ သူတို့သည် ပြေးကြပါ၏။ မိုးချုန်းတော်မူသံကိုကြား၍၊ အလျင်အမြန် ပြန်သွားကြပါ၏။ 8တောင်တို့သည် တက်လျက်၊ ချိုင့်တို့သည်ဆင်းလျက်၊ သူတို့ဖို့ ခွဲခန့်တော်မူသော အရပ်သို့ ရောက်ကြပါ၏။ 9ရေတို့သည် ပြန်လာ၍ မြေကြီးကို မလွှမ်းမိုးစေခြင်းငှာ၊ မကျော်ရသောနယ်စပ်ကို ပိုင်းခြားတော်မူ၏။

10ထာဝရဘုရားသည် ချိုင့်များထဲသို့ စမ်းရေကိုလွှတ်တော်မူ၍၊ ရေသည် တောင်တို့တွင်စီးလျက်၊ 11မြေတိရစ္ဆာန်အပေါင်းတို့အား သောက်ရသောအခွင့်ကို ပေး၏။ မြည်းရိုင်းတို့သည် အငတ်ပြေရကြ၏။ 12ထိုရေအနားမှာ မိုးကောင်းကင်ငှက်တို့သည် နေရာကျ၍၊ သစ်ပင်အခက်အလက်တို့တွင် ကြွေးကြော်ကြ၏။ 13အထက်ခန်းတော်ထဲက တောင်များကို ရေပေးတော်မူ၏။ စီရင်ပြုပြင်တော်မူခြင်းအကျိုးကြောင့်၊ မြေကြီးသည် ရောင့်ရဲလျက်ရှိ၏။ 14တိရစ္ဆာန်ဖို့ မြက်ပင်ကိုလည်းကောင်း၊ လူသုံးဖို့ စပါးပင်ကိုလည်းကောင်း ပေါက်စေတော်မူသဖြင့်၊ မြေကြီးထဲက မုန့်ကိုထုတ်ဖော်တော်မူ၏။ 15စပျစ်ရည်သည်လည်း လူတို့ကို ရွှင်လန်းစေ၏။ ဆီအားဖြင့်လည်း သူတို့မျက်နှာကို ပြောင်စေတော်မူ၏။ မုန့်သည်လည်း၊ သူတို့နှလုံးကိုထောက်မ၏။ 16ထာဝရဘုရား၏ သစ်ပင်၊ စိုက်တော်မူသော လေဗနုန်အာရဇ်ပင်တို့သည်လည်း ရောင့်ရဲလျက်ရှိကြ၏။ 17ထိုအပင်တို့၌ ငှက်တို့သည် အသိုက်လုပ်တတ်ကြ၏။ ထင်းရှူးပင်တို့၌ တောငန်းတို့သည် နေရာကျတတ်ကြ၏။ 18မြင့်သောတောင်တို့သည် တောဆိတ်များမှီခိုရာ၊ ကျောက်တို့သည် ရှာဖန်ယုန်များ မှီခိုရာ ဖြစ်ကြ၏။ 19ချိန်းချက်သောအချိန်ဖို့၊ လကို ဖန်ဆင်းတော်မူပြီ။ နေသည်လည်း၊ မိမိဝင်ရသော အချိန်ကိုသိ၏။

20ကိုယ်တော်သည် မှောင်မိုက်ကို စီရင်တော်မူ၍ ညဖြစ်ပါ၏။ ထိုအချိန်၌ တောတိရစ္ဆာန်အပေါင်းတို့သည်တွားလျက် ထွက်တတ်ကြပါ၏။ 21ခြင်္သေ့ပျိုတို့သည် လုယက်ခြင်းအလိုငှာဟောက်၍၊ ဘုရားသခင့်ထံမှာ အစာကို ရှာကြပါ၏။ 22တစ်ဖန် နေထွက်ပြန်လျှင်၊ သူတို့သည် ဆုတ်သွား၍ နေမြဲတွင်းတို့၌ အိပ်နေကြပါ၏။ 23လူသည်လည်း လုပ်ဆောင်ပြုမူခြင်းငှာ ညဉ့်ဦးတိုင်အောင် ထွက်သွားပါ၏။ 24အို ထာဝရဘုရား၊ ကိုယ်တော်စီရင် ပြုပြင်တော်မူသောအရာတို့သည် အလွန်များပြားပါ၏။ ရှိရှိသမျှတို့ကို ပညာတော်အားဖြင့် ဖန်ဆင်းတော်မူ၏။ မြေကြီးသည် ဘဏ္ဍာတော်နှင့် ကြွယ်ဝပါ၏။ 25မရေတွက်နိုင်အောင် တွားတတ်သောတိရစ္ဆာန်အစရှိသော တိရစ္ဆာန်အကြီးအငယ်အများတို့နေရာ ကြီးမားကျယ်ဝန်းသော သမုဒ္ဒရာလည်းရှိပါသေး၏။ 26ထိုအရပ်၌ သင်္ဘောတို့သည် သွားလာကြပါ၏။ ထိုအရပ်၌ ကွန့်မြူးစေခြင်းငှာ ဖန်ဆင်းတော်မူသော ငါးကြီးလဝိသန်သည်လည်းရှိပါ၏။ 27ထိုသို့သော တိရစ္ဆာန်အပေါင်းတို့သည် အချိန်တန်လျှင် အစာကျွေးတော်မူစေခြင်းငှာ၊ ကိုယ်တော်ကို မျှော်လင့်လျက်နေကြပါ၏။ 28ကိုယ်တော်ချထားတော်မူသည်အတိုင်း သူတို့သည် သိမ်းယူကြပါ၏။ လက်တော်ကို ဖွင့်တော်မူသောအားဖြင့်၊ သူတို့သည် ကောင်းသောအရာနှင့် ရောင့်ရဲကြပါ၏။ 29မျက်နှာတော်ကိုလွှဲတော်မူလျှင်၊ သူတို့သည် ပင်ပန်းကြပါ၏။ သူတို့အသက်ကို ရုပ်သိမ်းတော်မူလျှင်၊ သူတို့သည်သေ၍ မိမိတို့မြေမှုန့်ထဲသို့ ပြန်သွားကြပါ၏။ 30တစ်ဖန်ဝိညာဉ်တော်ကိုလွှတ်၍၊ သူတို့ကိုဖန်ဆင်းတော်မူသဖြင့်၊ မြေကြီးမျက်နှာကို အသစ်ပြုပြင်တော်မူ၏။

31ထာဝရဘုရား၏ဘုန်းတော်သည် နိစ္စအမြဲတည်၏။ ထာဝရဘုရားသည် မိမိအမှုတော်တို့တွင် ဝမ်းမြောက်တော်မူ၏။ 32မြေကြီးကို ကြည့်ရှုတော်မူ၍ သူသည် တုန်လှုပ်တတ်၏။ တောင်တို့ကိုတို့တော်မူ၍၊ သူတို့သည် မီးခိုးထွက်တတ်ကြပါ၏။ 33ငါသည် အသက်ရှင်စဉ်၊ ထာဝရဘုရားကိုသီချင်းဆိုမည်။ ငါဖြစ်သည် ကာလပတ်လုံး၊ ငါ၏ဘုရားသခင်ကို ထောမနာသီချင်းဆိုမည်။ 34ငါဥဒါန်းကျူးခြင်းအသံသည် နှစ်သက်တော်မူဖွယ်ဖြစ်၍၊ ထာဝရဘုရား၌ ငါရွှင်လန်းလိမ့်မည်။ 35ပြစ်မှားသောသူတို့ကို မြေကြီးမှသုတ်သင်ပယ်ရှင်း၍၊ မတရားသောသူတို့သည် နောက်တစ်ဖန်မဖြစ်ရကြ။ အိုငါ့ဝိညာဉ်၊ ထာဝရဘုရားကို ကောင်းချီးပေးလော့။ ဟာလေလုယ။

ဆာလံကျမ်း - ၁၀၄ (အနက်ဖွင့်)

ဆာ ၁၀၄ ဖန်ဆင်းရှင်စောင့်ရှောက်သခင်

နယူးယော့၊ လန်ဒန်၊ တိုကျိုစသည့်မြို့ကြီးများတွင် လူသန်းပေါင်းများစွာတို့ စား၀တ်နေရေးအဖို့ နေစဉ်ပျားပန်းခတ်မျှ ပြေးလွှားနေကြပုံကို မြင်ယောင်ကြည့်ပါ။ ထိုသူများ စားဝတ်နေရေးပြေလည်ဖို့ ရေပေး ဝေစနစ်၊ အဆောက်အဦး နေရာထိုင်ခင်းပြဿနာ၊ ဗိုက်ဖြည့်ရေးနှင့် အခြားလူ့အရေးကိစ္စ ဗာဟီရများကို မည်သို့ လုပ်ဆောင်ကြသနည်း။

ထိုမျှမက ထုထယ်ပမာဏကြီးမားသော လူ့လောကကြီးက ဘုရားသခင်က စနစ်တကျ ကိုင်တွယ် စီမံပါသည်။ ဖန်ဆင်းထားသော သတ္တဝါများအတွက် ရေအလုံအလောက်ပေးပါသည်။ လူ့အစားအစာ သားရဲ တိရစ္ဆာန်များ၊ ရေပျော်ငါးနှင့် ကျေးငှက်များအတွက် ဖူလုံအောင်စီစဉ်ပေးသည်။ ခိုလှုံစရာနေရာနှင့် နေအိမ်များပြင်ဆင်ပေးသည်။ ထိုအချက်များကို စဉ်းစားတွေးတောလျှင် ဘုရားရှင်၏ ဉာဏ်ပညာတော်သည် ကြီးမား၍ ဖန်ဆင်းရှင် စောင့်ရှောက်သခင် ပီသပါပေသည်။

၁၀၄:၁–၃ ဘုရားသခင်အား နေရာတိုင်းမှာ ချီးမွမ်းကိုးကွယ်ရမည့်ကြောင်း လှုံ့ဆော်ပြီးနောက် နာမည်မသိသော ဆာလံဆရာက ဘုရားသခင်၏ဘုန်းတော် ဘွဲ့ဟိမဝန္တာ ချီးမွမ်းဖွင့်ထားသည်။ အစွမ်းအစ ရှိသမျှ ဘာသာစကားရှိသမျှ ချီးမွမ်းပါသည်။ မျက်စိဖြင့်မြင်နိုင်သောဘုရားရှင်သည် ထိုချီးမွမ်းခန်းမက ပိုမိုကြီးကျယ်ပါသည်။ ကိုယ်တော်၏ကြီးမြတ်ခြင်းကို နှုတ်ဖြင့်မြွက်ဆိုမမီနိုင်ပါ။

ဆာလံဆရာသည် အရှေ့အနောက် ဘယ်ညာကြည့်ရှုဆင်ခြင်ပြီး “အကျွန်ုပ်၏ဘုရားသခင် ထာ၀ရ ဘုရားသခင်သည် ကြီးမြတ်တော်မူပါပေသည်“ဟု ၀န်ခံချီးမွမ်းသည်။ ထို့နောက် တွေ့မြင်ရသမျှ အသေးစိတ် ချယ်မှုန်းသည်။ ကိုယ်တော်၏ဝတ်ရုံတော်သည် ဘုန်းတန်ခိုးပြည့်စုံသည်။ အလင်းရောင်ကို ဝတ်ရုံတော်တွင် တန်ဆာဆင်သည်။ ထိုအလင်းရောင်သည် ဖြောင့်မတ်စင်ကြယ်ခြင်း အမှတ်အသားဖြစ်သည်။ ကောင်းကင် အထက်ဘုံနန်းတွင် စံမြန်းတော်မူ၍ လူ့လောကကို ဇာခန်းစည်ကုလားကာဖြင့် ခြားထားပါသည်။ ကောင်းကင်ထောက်တိုင်များကို ရေများဖုံးလွှမ်းရာ ကမ္ဘာမြေပေါ်တွင် ပန္နက်တည်ထားပါသည်။ ယေဟော ဝါဘုရားရှင်သည် တိမ်လွှာရထားကိုစီး၍ လေတောင်ပန်များဖြင့် လှုပ်ရှားသွားလာပါသည်။

၁၀၄:၄ ကောင်းကင်တမန်များကို လေကဲ့သို့၎င်း၊ အစေအပါးများကို မီးလျှံကဲ့သို့၎င်း ဖန်ဆင်းထား ပါသည်။ ဟေဗြဲကျမ်းမူတွင် လေနှင့်ဝိညာဉ်သည် စကားလုံးအတူတူဖြစ်၍ ကောင်းကင်တမန်နှင့် စေတမန်ဟု ပြန်ဆိုထားသည်။ ဤစည်းကမ်းချက်၏သဘောသဘာကို ဟေဗြဲ ၁:၇တွင်ကြည့်ရှုပါ။ (ဂရိဘာသာစကားတွင် လည်း ဟေဗြဲစကားကဲ့သို့ပင် အဓိပ္ပါယ်နှစ်ခွ သက်ရောက်သည်)။

၁၀၄:၅–၉ ဆာလံဆရာက ကမ္ဘာဦးကျမ်းအခန်းကြီး(၁)ဖန်ဆင်းခြင်းအစသို့ ပြန်ခေါ်သွားသည်။ တနေ့ပြီးတနေ့ ဖန်ဆင်းခြင်းသတ္တဝါများကို ကျွေးမွေးစောင့်ရှောက်ပုံအကြောင်းဖြစ်၏။ မနုဿလူသားများ နှင့် အဟိတ်တိရစ္ဆာန်များ ကျွေးမွေးမစပုံရှင်းပြသည်။

ပထမတွင် ကမ္ဘာမြေကြီးအား ခိုင်ခံ့မြဲမြံအောင်မည်သို့ အုတ်မြက်ပန္နက်တည်ကြောင်းရှင်းပြသည်။ အပြင်ပန်းသဏ္ဍာန်တွင် ကမ္ဘာမြေကြီးကိုရေဖြင့်လွှမ်းခြုံထားသည်။ တောင်ကုန်းတောင်တန်းများပေါ်လွင် စေသည်။ “တတိယနေ့တွင်ဘုရားသခင်က မြေကြီးတပိုင်းရေတပိုင်းရှိစေဟု အမိန့်ရှိသည်နှင့် ကုန်းမြေပေါ် လာသည်” (က ၁:၉)။ ရေပြင်သည် ရုတ်ခြည်းတနေရာတွင် စုစည်းသဖြင့် ကုန်းမြင့်ဒေသနှင့်ရေပြင်ချိုင့်ဝှမ်း ဒေသ တခုစီပေါ်ထွန်းလာသည်။ ပင်လယ်သမုဒ္ဒရာ ရေပြင်နေရာကို သီးသန့်သတ်မှတ်ပေးလိုက်သဖြင့် ကုန်းမြေကို ကျူးကျော်သိမ်းပိုက်ခြင်းမပြုနိုင်။

၁၀၄:၁၀–၁၃ ဘုရားသခင်၏ ရေထုတ်ဝေရေးနည်းစနစ်သည် အံ့သြဘွယ်ရာ ကောင်းပါပေသည်။ စမ်းရေထွက်များဖြစ်စေ၍ ရေကိုအလျှံပယ်ထုတ်ပေးသည်။ မြစ်ချောင်းရေများသည်လည်း မြစ်ဖျားခံရာ မြင့်ရာကုန်းမြေအရပ်မှ နိမ့်ရာအရပ်သို့ စီးဆင်း၍ ပင်လယ်သမုဒ္ဒရာထဲသို့ စီး၀င်သွားကြသည်။ ရေငတ်နေ သော သတ္တဝါများသည် ထိုချောင်းရေ၊ မြစ်ရေကို သောက်သုံးကြသည်။ ရေများမရောက်နိုင်ရာ သစ်ပင် ပေါ်တွင် ငှက်များအသိုက်ဖွဲ့ကြသည်။ အခြားရေပေးဝေရေး နည်းစနစ်တခုမှာ မိုးရွာခြင်းဖြစ်သည်။ ဧလိဟု ထောက်ပြသည့်အတိုင်း “ရေကို သုန်ဖျင်းစေ၍ အထက်သို့ဆွဲယူတော်မူစေသဖြင့် ရေငွေ့ရှိသည့်အတိုင်း မိုးရွာတတ်၏” (ယော ၃၆:၂၇)။ ကိုယ်တော်ရေပေးဝေစနစ်သည် စနစ်ကောင်းမွန်လှပါသည်။ တောင်ကုန်း တောင်တန်းများမှ စီးဆင်းလာသောရေများကို လယ်တောယာမြေ၊ မြေပြန့်လွင်ပြင်တွင် အိုင်မနေပဲ၊ မြစ်ချောင်းရေမြောင်းများဖြင့် စီးဆင်းစေသည်။

၁၀၄:၁၄–၁၅ နောက်တချက်မှာ ထောက်ပံ့ရေးစနစ်ဖြစ်သည်။ ကောက်ပဲသီးနှံ သစ်သီးဝလံအမျိုးမျိုး ဖြစ်ထွန်းစေပြီ။ တိရစ္ဆာန်များအတွက် အစာဖြစ်စေသည်။ လူများအတွက် ဂျုံစပါးဖြစ်ထွန်းစေသည်။ ထိုသို့ဖြင့် လူနှင့်တိရစ္ဆာန်များအတွက် တမျိုးစီအားထောက်ပံ့သည်။ မြေကြီးထဲက အစာရေစာ ပေါ်ထွက် စေသည်။ မြေကြီးထဲက ပေါက်ရောက်သောစပျစ်ပင်မှ စပျစ်သီးကို လူများက စပျစ်ရည်အဖြစ် ထုတ်လုပ်ကာ သောက်သုံးပျော်မြူးကြသည်။ သံလွင်သီးမှ သံလွင်ဆီထုတ်ယူ၍ သုံးစွဲကြသည်။ ကျန်းမာရေးအတွက် သုံးရုံမက မင်္ဂလာအခန်းအနားတွင်လည်း အသုံးပြုသည်။ မြေကြီးထဲမှ မုန့်ထုတ်ဖော်ကြသည့်အတိုင်း အသက်ဆက်ကြ၍ ခွန်အားလည်းဖြည့်ကြသည်။

၁၀၄:၁၆–၁၈ သစ်တောဝါတောကြီးတွင် စိမ့်စမ်းမြိုင်တောများ တွဲဖက်ပေးသည်။ သစ်သားများ ထုတ်လုပ်ပေးသည်သာမက စိမ့်စမ်းရေများဖြစ်ပေါ်စေသည်။ လေဗနုန်တောင်ပေါ်က အာရဇ်ပင်ကြီးများ သည် လူတို့စိုက်ပျိုးသောအပင်များမဟုတ်။ ထိုအပင်ကြီးများပေါ်တွင် ကျေးငှက်သာရကာတို့ သိုက်မြုံယံ ဆောက်တည်ကြသည်။ ထင်းရှုးပင်ကြီးများသည် တောငန်းကြီးတို့ ပျော်စံမှီခိုရာဖြစ်သည်။ မြင့်မားသော တောင်ထိပ်များသည် တောင်ဆိတ်တို့ကျက်စားရာ၊ ကျောက်တောင်များသည် ရှာဖန်ယုန်တို့ ကျင်လည်ရာ အရပ်အဖြစ် ပေးထားသည်။

၁၀၄:၁၉–၂၃ ရာသီငှက်ပန်းလည်း အလှည့်ကျပြောင်းလဲစေသည်။ သူ့ရာသီခွင်အလိုက် ချိန်ခါ တိုင်းတာအလိုက် ၀င်ထွက်သွားလာစေသည်။ အချိန်ကာလတာရေတွက်ဖို့ နေ့နှင့်ည တနေတာရေတွက်နိုင်ဖို့ နေဝင်နေထွက် အမှတ်အသားပေးမည်။ သို့ဖြင့် လူနှင့်တိရစ္ဆာန်များသည် နေ့ညဉ့်အတိုင်းအတာဖြင့် ဝမ်းစာ လှည့်လည် လှည့်ပတ်ရှာဖွေစေသည်။ မှောင်မိုက်ညဉ့်နက်ချိန်ကာလတွင် တောတိရစ္ဆာန်များသည် အစာ ရှာထွက်ကြသည်။ အရုဏ်အလင်းသစ်လာလျှင် ဂူထဲသို့ ပြန်အောင်းပြန်သည်။ ထိုသားရဲတိရစ္ဆာန်များ ဂူအောင်းအနားယူသည့်နေ့အချိန်တွင် လူများအလုပ်လုပ်ကြသည်။

၁၀၄:၂၄–၂၆ ဘုရားသခင်စီရင်သော အမှုတော်သည် များပြားလှပါသည်။ “ဘုရားရှင်၏ဉာဏ်ပညာ သည် ကျယ်ပြန့်ပါဘိ” (Knox)။ ဖန်ဆင်းထားသော သတ္တဝါများသည် ကမ္ဘာအနှံပျံ့နှံ့သော်လည်း တကောင် တလေမှ ငတ်မွတ်ခေါင်းပါးခြင်းမရှိ။ အသေးစိတ်ကြည့်ရှု စောင့်ရှောက်ကျွေးမွေးပေးသည်။ ပင်လယ် ထဲတွင်လည်း အမှုံအမွှား အကောင်ငယ်ကလေးများမှစ၍ ဝေလငါးတိုင်အောင် ကြီးငယ်မဟူ သတ္တဝါ အမျိုးမျိုးရှိကြသည်။ ထိုရေနေသတ္တဝါများလည်း ကိုယ်စီအစာရှာကြသည်။

အပိုဒ်ငယ် (၂၆)ပါ သင်္ဘောသမျှ ကြီးမားသော ရေသတ္တဝါကြီးများကို ဆိုလိုသည်။ တချို့က ပင်လယ်သတ္တဝါတမျိုး (က ၁:၂၁)ဟု ခေါ်သည်။ မည်သို့ဆိုစေ ကျမ်းစာသားပါအတိုင်း သင်္ဘောဟု ဖတ်ကြပါစို့။ လဝိသန်ဆိုသည်မှာလည်း ပင်လယ်ပျော်သတ္တဝါကြီးဟု ယူဆရပါသည်။ (ယောဘ ၄၁ကိုလည်း ကြည့်ပါ)။

၁၀၄:၂၇–၃၀ ထိုသို့ သက်ရှိသတ္တဝါအမျိုးမျိုး စုံလင်လှသော်လည်း ဘုရားသခင်က ကိုယ်စီ အစားအစာ ကျွေးထားသည်။ ကိုယ်တော်ကို မှီခိုကြရသည်။ လက်တော်ဖြန့်သည်နှင့် အစာရေစာ ဖူလုံကြသည်။ အထက်အပိုဒ်ငယ် (၁၃)တွင် မိုးရွာသဖြင့် ကမ္ဘာမြေစိမ်းလန်းစိုပြေသည်ဟု ဆိုခဲ့သည်။ အပိုဒ်ငယ် ၁၆တွင် သစ်တော၊ ဝါးတောများ ခိုင်ခံ့တည်ကြည်စေသည်။ ယခုအပိုဒ်ငယ်(၂၇၊၂၈)တွင် သတ္တဝါများ ဗိုက်ပြဿနာ ဖြေရှင်းပေးသည်။

ဘုရားသခင်၏ ကျွေးမွေးထောက်ပံ့ခြင်း အစီအစဉ်သည် အံ့သြဘွယ်ပြည့်စုံသည်။ ဆွေမျိုးတဆက် လွန်မြောက်၍ နောက်တဆက်ပေါ်ထွန်းလာသည့်တိုင်အောင် စားသောက်မှီဝဲနိုင်ကြသည်။ အကြောင်းအမျိုး မျိုးကြောင့် ဖန်ဆင်းထားသော တိရစ္ဆာန်တကောင်တိမ်းပါးလျှင်လည်း မျက်နှာတော်ဖုံးအုပ်တော်မူသည်။ အသက်ရုပ်သိမ်းလျှင် မြေမှုန့်ပြန်ဖြစ်သွားကြသည်။ ကမ္ဘာမြေပေါ်တွင် ပင်ပန်းနွမ်းနွယ်လွန်းအားကြီးသည် ဟု မြင်လျှင် အသက်ဇီ၀ရုပ်သိမ်းတော်မူသည်။ တဘက်တွင် ပျောက်ဆုံးခြင်းဖြစ်သော်လည်း အခြားတဘက်တွင် မြေကြီးမျက်နှာသစ်ပြုပြင်ခြင်းဖြစ်၏။

၁၀၄:၃၂ ဆာလံဆရာက သူ့တေးကို ဖန်ဆင်းခြင်းအကြောင်းဖြင့် ဖွင့်လှစ်၍ အပြစ်များချုပ်ငြိမ်းရာ ရွှေခေတ်တွင် ဘုရားသစ်ကို ဂုဏ်ပြုကြည်ညို ချီးမွမ်းကြမည့်အကြောင်းဖြင့် နိဂုံးချုပ်ထားသည်။ ဘုရားသခင် ၏ ကောင်းမြတ်ခြင်းနှင့် ကြီးမြတ်ခြင်းကို ထုတ်ဖော်အမွှမ်းတင်သည်။

ဆာလံဆရာက ဖန်ဆင်းစ သမိုင်းဦးကို ပြန်လည်လွမ်းဆွတ်သည်။ ဖန်ဆင်းထားသော သတ္တဝါများ အလယ်တွင် မိမိကိုယ်ကို ပြန်လည်စစ်ဆေးသည်။ ဥပုသ်နေ့အသစ် ကျင်းပလာတော့မည်။ ဘုရားရှင်သည် ဖန်ဆင်းထားသောအရာများကို သမင်လည်ပြန် ပြန်ကြည့်ခါ အားရကျေနပ်သည်။ စကြဝဋ္ဌာကြီးလည်း ဗိမာန် တော်ဖြစ်လာပြီး ကိုယ်တော်ကို ချီးမွမ်းထောမနာပြုကြမည်။၇၀

ဘုရားသခင်၏ဘုန်းတန်ခိုးအာနုဘော်သည် ကမ္ဘာအဆက်ဆက်တည်မြဲပါစေ။ ဘုရားရှင်သည် ပြုခဲ့သော အမှုတော်အပေါ်တွင် ရွှင်လန်းပါစေ။ ထိုဘုရားရှင်သည် ကြီးမြတ်သော အရှင်သစ်ဖြစ်သည့်အတိုင်း မြေငလျင်ကို လှုပ်စေနိုင်သည်။ မီးတောင်များကိုလည်း ပေါက်ကွဲစေနိုင်သည်။

၁၀၄:၃၃–၃၅ အမည်မသိဆာလံဆရာက သူသည် အသက်ရှင်နေသရွေ့ကာလပတ်လုံး ဘုရား သခင်၏ ကြီးမြတ်ခြင်းကို တေးဖွဲ့ဆိုမည်။ သူ့အတွေးအကြံသည် ယေဟောဝါဘုရား၌ ပျော်ရွှင်မှု စုံမက် ပါရစေဟု ဆုမွန်တောင်းချွေသည်။

ဘုရားသခင်၏ဖန်ဆင်းထားသောလက်ရာတော်၊သတ္တဝါများကို ဖျက်လိုဖျက်ဆီးပြုသောအပြစ်သား များကို ကမ္ဘာမြေပေါ်မှ သုတ်သင်ခြင်းခံကြရပါစေ။ ထိုဆုတောင်းချက်သည် ဘုရားသခင်၏အလိုတော်နှင့် ကိုက်ညီပါပေသည်။

ကျွန်ုပ်တို့ယုံကြည်သူများမှာ အထံတော်၌ခစားသူများဖြစ်သောကြောင့် ကောင်းချီးမင်္ဂလာပြည့်ဝ ကြပါမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။