Psalms-103 -

ဆာလံကျမ်း - ၁၀၃

ဘုရားသခင်၏မေတ္တာတော်

1အို ငါ့ဝိညာဉ်၊ ထာဝရဘုရားကို ကောင်းချီးပေးလော့။ ငါ၏အထဲမှာရှိသမျှတို့၊ သန့်ရှင်းသောနာမတော်ကို ကောင်းချီးပေးကြလော့။ 2အို ငါ့ဝိညာဉ်၊ ထာဝရဘုရားကို ကောင်းချီးပေးလော့။ ကျေးဇူးတော်အပေါင်းကို မမေ့လျော့နှင့်။ 3သင်၏အပြစ်အလုံးစုံတို့ကိုဖြေလွှတ်၍၊ သင်၏အနာရောဂါရှိသမျှတို့ကိုလည်း ပျောက်စေတော်မူ၏။ 4သင်၏အသက်ကို ဖျက်ဆီးခြင်းထဲကရွေး၍ ကျေးဇူးတော်၊ ကရုဏာတော်များနှင့် သင်၏ခေါင်းကို ပတ်ရစ်တော်မူ၏။ 5သင့်ကိုအသက်ကြီးစဉ်၊ ကောင်းသောအရာနှင့် ရောင့်ရဲစေတော်မူသဖြင့်၊ သင်၏အရွယ်သည် ရွှေလင်းတ၏အရွယ်ကဲ့သို့ ပြုပြင်ခြင်းရှိ၏။

6ထာဝရဘုရားသည် ညှဉ်းဆဲခြင်းကို ခံရသမျှသောသူတို့အဖို့ တရားပေး၍ စီရင်ဆုံးဖြတ်တော်မူ၏။ 7ဘာသာဓလေ့တော်တို့ကို မောရှေ၌လည်းကောင်း၊ စီရင်တော်မူသော အမှုအရာတို့ကို ဣသရေလအမျိုးသားတို့၌လည်းကောင်း ပြတော်မူပြီ။ 8ထာဝရဘုရားသည် သနားတတ်သောသဘော၊ ကျေးဇူးပြုတတ်သောသဘော၊ စိတ်ရှည်၍၊ ကရုဏာကြွယ်ဝသောသဘော ရှိတော်မူ၏။ 9အစဉ်မပြတ် အပြစ်တင်တော်မူသည် မဟုတ်။ အငြိုးကို အမြဲထားတော်မူသည် မဟုတ်။ 10ငါတို့ပြစ်မှားခြင်းနှင့် အလျောက် ငါတို့၌ပြုတော်မမူတတ်။ ငါတို့၌ ဒုစရိုက်ရှိသည်အတိုင်း အပြစ်ကို ပေးတော်မမူတတ်၊ 11မြေကြီးပေါ်တွင် ကောင်းကင်အမြင့်ရှိသည် အတိုင်း၊ ထာဝရဘုရားကို ကြောက်ရွံ့သောသူတို့၌ ကရုဏာတော်သည် အားကြီးပေ၏။ 12အရှေ့မျက်နှာစွန်းသည် အနောက်မျက်နှာစွန်းနှင့် ဝေးသည်အတိုင်း၊ ငါတို့အပြစ်များကို ငါတို့နှင့် ဝေးစေတော်မူ၏။ 13အဘသည် သားတို့ကို သနားစုံမက်သည်နည်းတူ၊ ထာဝရဘုရားသည် ကြောက်ရွံ့သောသူတို့ကို သနားစုံမက်တော်မူ၏။ 14အကြောင်းမူကား၊ ငါတို့ကိုယ်ခန္ဓာကို သိတော်မူ၏။ ငါတို့သည် မြေမှုန့်ဖြစ်ကြောင်းကို အောက်မေ့တော်မူ၏။ 15လူတို့၏နေ့ရက်ကာလသည် မြက်ပင်ကဲ့သို့ဖြစ်၏။ လူသည်လယ်ပြင်၌ရှိသော ပန်းပွင့်ကဲ့သို့ ပွင့်တတ်၏။ 16လေသည်လွန်သွားလျှင် အပွင့်ပျောက်၍၊ သူ၏နေရာသည် နောက်တစ်ဖန် သူ့ကိုမသိရာ။ 17ထာဝရဘုရား၏ကရုဏာတော်မူကား၊ ကြောက်ရွံ့သော သူတို့အပေါ်သို့ ကာလအစဉ်အဆက် သက်ရောက်တတ်၏။ 18သစ္စာတော်ကိုစောင့်၍ ပညတ်တော်တို့ကိုကျင့်ခြင်းငှာ၊ သတိပြုသောသူတို့၏ သားစဉ်မြေးဆက်တို့သည် ကုသလတရားတော်နှင့် ဆိုင်ရကြ၏။

19ထာဝရဘုရားသည် ပလ္လင်တော်ကို ကောင်းကင်ဘုံ၌ တည်တော်မူ၍၊ အာဏာတော်သည် ခပ်သိမ်းသော အရပ်တို့ကိုနှံ့ပြား၏။ 20တန်ခိုးကြီး၍ နှုတ်ကပတ်တော်အသံကို နားထောင်လျက်၊ အမိန့်တော်အတိုင်း ဆောင်ရွက်သော ကောင်းကင်တမန်တော်တို့၊ ထာဝရဘုရားကို ကောင်းချီးပေးကြလော့။ 21အလိုတော်သို့လိုက်သော အမှုတော်ထမ်း၊ ကောင်းကင်ဗိုလ်ခြေတော်အပေါင်းတို့၊ ထာဝရဘုရားကို ကောင်းချီးပေးကြလော့။ 22နိုင်ငံတော်အရပ်ရပ်၌ စီရင်ဖန်ဆင်းတော်မူသမျှတို့၊ ထာဝရဘုရားကို ကောင်းချီးပေးကြလော့။ အို ငါ့ဝိညာဉ်၊ ထာဝရဘုရားကို ကောင်းချီးပေးလော့။

ဆာလံကျမ်း - ၁၀၃ (အနက်ဖွင့်)

ဆာ ၁၀၃:၁ လူများက ဆာလံကျမ်းကို နှစ်သက်သဘောကျသည့် အကြောင်းအရင်းများထဲတွင် နှုတ်ဖြင့်မမြွက်ဆိုသော နိုးကြားဆော်သြခြင်းလည်း ပါ၀င်သည်။ နား၀င်ချိုသာအောင် ဆွဲဆောင်စည်းရုံး သည်။ ဆာ၁၀၃ ထက် စိတ်ဓါတ်ခံစားချက် နှိုးဆွပေးသော အခြားကျမ်းချက်မရှိ။ ဤကျမ်းပိုဒ်ကို မှန်ကြည့်၍ တလုံးခြင်းဖတ်ရှုလျှင် ကျေးဇူးတော်ချီးမွမ်းချင်စိတ် တဖွားဖွား တရဲရဲပေါ်လာမည်။ စိတ်ဝိညာဉ်များကို နှိုးဆွပေးသည်။ ဘုရားသခင်ကို ကောင်းချီးပေးဖို့ ဆော်သြသည်။ စိတ်ဝိညာဉ်ဆိုသည့်အခါ စိတ်ချည်း သက်သက် မဟုတ်။ ခန္ဓာကိုယ်လည်း အကြုံး၀င်သွားသည်။ ဝိညာဉ်၊ စိတ်၊ ခန္ဓာကိုယ်သည် ဘုရားရှင်အား ချီးမွမ်းကိုးကွယ်ရန် ပေးထားခြင်းဖြစ်သည်။

၁၀၃:၂ ဝတ်ပြုကိုးကွယ်ခြင်း အခမ်းအနားစဖို့ ခေါင်းလောင်းတီးပြန်ပြီ။ ခံစားခဲ့ရသော ကျေးဇူးတော် များကို ပြန်လည်ရေတွက်ဖို့ မမေ့နှင့်။ အဘယ်သို့ဆိုသော် လူသည် မကြာခဏမေ့လွယ်သည်။ ခန္ဓာကိုယ် ကျန်းမာခြင်း၊ စိတ်ကြည်လင်ခြင်း၊ အကြားအမြင် အာရုံငါးပါး ကောင်းမွန်နေခြင်းများကို ကျေးဇူးတင် ရသည်။ ကျေးဇူးရှိသည့်အတိုင်း နာမတော်ထင်ရှားဘို့ အသုံးပြုရသည်။

၁၀၃:၃ ထိုမျှသာမက အပြစ်ဒုစရိုက်များကို အမှတ်မထား။ ဗွေမယူဘဲ ခွင့်လွှတ်တော်မူသောကြောင့် လည်း ကျေးဇူးတင်ရသည်။ အပြစ်ခွင့်လွှတ်ခြင်း ကျေးဇူးတော်သည် ကြီးမားပါပေသည်။ အပြစ်ခွင့်လွှတ်ခြင်း ခံရသူသည် ဆီးနှင်းထက်ဖြူစင်သွားသည်။ တခါကလူတယောက်က အနှစ်သက်ဆုံးစကားလုံးကို သူ့အုတ်ဂူ ပေါ်တွင် ကမ္ဗည်းထိုးသည်။ ထိုစကားလုံးမှာ ခွင့်လွှတ်ခြင်းဖြစ်သည်။ အိုင်းရစ်လူမျိုးတဦးကလည်း “သခင်ယေရှုက ငါ့အပြစ်များကို ခွင့်လွှတ်လိုက်ပြီဟူသောစကားသည်ဆုံးသည်ဟုမရှိ။ အမြဲကြားယောင်နေ ဆဲ”ဟု ဆိုသည်။ ခရစ်တော်၏အသွေးက အပြစ်ဒုစရိုက်များကို ပြောင်လက်သွားအောင် ခဝါချဆေးကြော လိုက်ပြီ။ မှတ်သားစရာဒုတိယအချက်မှာ အနာရောဂါဟူသမျှကင်းငြိမ်းစေပြီ။ အနာရောဂါပြဿနာ ပေါ်ပေါက်လာတိုင်း အပြစ်ခွင့်လွှတ်ခြင်းက အနာရောဂါကင်းငြိမ်းစေသည်ကို သတိရပါ။ ခန္ဓာကိုယ် အရေးသည် စိတ်ဓါတ်မှာအရင်းခံသည်။ စိတ်ထောင်းကိုယ်ကြေ၊ စိတ်ပျိုကိုယ်နုဟုဆိုသည်။ သို့သော် အနာရောဂါတိုင်းသည် အပြစ်၏အကျိုးဆက် မဟုတ်သော်လည်း အပြစ်ခွင့်လွှတ်ခြင်း စိတ်ဆင်းရဲချည်နှောင် မှုများ ကင်းလွတ်ကျန်းမာသွားသည်မှာ သေချာသည်။

အပေါ်က မေးခွန်းရှိနေသော်လည်း သင့်အနာရောဂါများကို မည်သူကင်းငြိမ်းစေသလဲ။ လက်တွေ့ ကျကျပြောရလျှင် အနာရောဂါဟူသမျှသည် မကင်းငြိမ်းပါ။ ထိုအချိန်ကာလတွင် ဘုရားရှင်မပါရှိလျှင် များမကြာမီ သေပွဲဝင်ကြရသည်။ သို့ဆိုလျှင် ဤကျမ်းစကားသည် ဘာကိုဆိုလိုသလဲ။

အဖြေရှာဖွေကြည့်ကြပါစို့။ အောက်ပါအချက်များကို တွေ့မြင်နိုင်သည်-

ပထမအချက်မှာ အနာရောဂါငြိမ်းခြင်း တန်ခိုးရှင်သည် ဘုရားသခင်ဖြစ်သည်။ ထို့ကြောင့် အနာရောဂါဖြစ်ပွားပြီး ပြန်လည်ကျန်းမာသောအခါ ဘုရားသခင်ထံသို့ ကျေးဇူးတင်စကားဆိုရသည်။ အဘယ်သို့ဆိုသော် ကျန်းမာခြင်းပေးပိုင်သောအရှင်သည် ဘုရားရှင်ဖြစ်သည်။ ဓမ္မဟောင်းကျမ်းတွင် ဘုရားသခင်နာမတော်တခုသည် ယေဟောဝါရာဖိ (Jehovah Rophi) ဖြစ်သည်။ အနာရောဂါ ကင်းငြိမ်းစေသော ဘုရားရှင်ဟု အဓိပ္ပါယ်ရသည်။ ကျန်းမာခြင်းအကြောင်းအရင်းသည် ဘုရားသခင်ထံမှ လာပါသည်။

ဒုတိယအချက်မှာ ဘုရားသခင်သည် အနာရောဂါဟူသမျှ ပြီးပျောက်စေနိုင်စွမ်းရှိသည်။ ကိုယ်တော် ထံတွင် မပျောက်နိုင်သော အနာရောဂါဟူ၍မရှိ။ ၀ဋ်နာတံနာအားလုံး ပျောက်ကင်းကျန်းမာစေနိုင်သည်။

တတိယအချက်မှာ ဘုရားသခင်သည် အနာရောဂါအပျောက်ကင်းစေရန် နည်းလမ်းပေါင်းစုံ သုံးသည်။ အချိန်ကာလ အပိုင်းအခြားယူသည်။ အံ့သြဘွယ်ရာပျောက်ကင်းစေနိုင်သည်။ ကိုယ်တော်၏ အနာရောဂါပျောက်ကင်းစေနိုင်စွမ်းကို မည်သူကမှ ဟန့်တားသတ်မှတ်ချက်မပြုနိုင်။

စတုတ္ထအနေဖြင့် သခင်ယေရှုသည် လူ့လောကမှာ ဒေသစာရီကြွချီတော်မူစဉ် ယူဆောင်လာသမျှသော လူနာများကို ကျန်းမာစေသည် (မ ၈:၁၆)။

ပဉ္စမအချက်မှာ အနှစ်တထောင်တိုင်းပြည်တွင်လည်း အနာရောဂါဟူသမျှ ကျန်းမာကင်းငြိမ်းစေ ဦးမည်(ဟေရှာ ၃၃:၂၄၊ ယေ ၃၀:၁၇)။သို့သော် ပုန်ကန်ခြားနားသူများ၏ အပြစ်မပါ (ဟေရှာ ၆၅:၂၀ခ)။

ဤကျမ်းပိုဒ်က ယုံကြည်သူတိုင်းအနာရောဂါများကို ကင်းငြိမ်းစေနိုင်သည်ဟု မဆိုလိုပါ။ အဘယ့် ကြောင့်ဆိုသော် အခြားကျမ်းပိုဒ်များတွင် လူ့ဘဝတိုတောင်းကြောင်းနှင့် ဘဝဆုံးခန်းတိုင်ကြမည့်အကြောင်း (ငယ် ၁၅၊၁၆)ရေးထားသည်။ ဤကျမ်းချက်၏ဆိုလိုရင်းမှာ ယုံကြည်သူများသည် ပြန်လည်ကျန်းမာ နလံထူလာသည့်အခါ ကျေးဇူးတော်ချီးမွမ်းရမည်။ ကရုဏာတော်ခံစားခြင်းဖြစ်သည်။ အနာရောဂါ ကင်းငြိမ်းစေသူကို ကျေးဇူးတုန့်ပြန်ရသည်ဟု သွန်သင်သည်။

၁၀၃:၄ အနာရောဂါများကိုသာ ကင်းငြိမ်းစေသည်သာမက သင်္ချိုင်းဂူထဲသို့) ဝင်ရောက်မည့်အရေး ပျက်စီးခြင်းမှ ရွေးနှုတ်သည်။ ငရဲပြည်သွားရာလမ်းမှ ပြန်လည်ကယ်ထုတ်သည်။ ဘေးအန္တရာယ် မတော်တဆမှု။ ကံဆိုးမိုးမှောင်ကျခြင်းမှလည်း ကွယ်ကာစောင့်ရှောက်သည်ဟု စာရေးသူက ဖြည့်စွက် ချင်သည်။ ကောင်းကင်နိုင်ငံရောက်စေချင်သောကြောင့် ဘုမသိဘမသိ၊ မနူးမနပ်အရွယ်တွင် အသက်ဘေးရန် ပေါင်းကို လုံခြုံအောင် အထူးကာကွယ်ပေးပါသည်။

စတုတ္ထအချက်မှာ ချစ်ခြင်းမေတ္တာနှင့် ကရုဏာတော်သရဖူ ဆောင်းပေးပါသည်။ ချစ်မွှေးမပါ၊ အပြစ်ဗရဗ္ဗရှိသူများအား ထိုမျှမေတ္တာထားနိုင်ခြင်းသည် အံ့မခန်းလိလိဖြစ်ပါသည်။ ထာဝရအချစ်ဖြင့် တဘက်သတ်ချစ်၍ နေ့စဉ်တိုင်းကရုဏာတော်သင့်ပါသည်။

၁၀၃:၅ ဘ၀တလျှောက်လုံးတွင် အကျင့်သီလကောင်းမွန်ဖို့လည်း သွန်သင်ကြပ်မတ်သည်။ ဟေဗြဲကျမ်းမူတွင် အဓိပ္ပါယ်အနည်းငယ်ပေါက်သည်။ စာပေသဒ္ဒါအလိုအတိုင်းဆိုလျှင် “အကျင့်သီလဖြင့် မိမိကိုယ်ကို တန်ဆာဆင်လော့”ဟူ၍ ဖြစ်ပါသည်။ “သင်၏နှစ်ကာလများ” “သင့်ဘ၀များ”ဟု ဆိုသည်။ မူရင်းစကားလုံးအတိုင်း အနက်ဖွင့်ရန်မဖြစ်နိုင်။ ဆိုလိုသည်မှာ အသက်ရှင်စဉ်အခါ စိတ်ဓါတ်ဖြူစင် ကြည်လင်စွာ အမှုတော်လုပ်ဆောင်လော့ဟုဆိုရပေမည်။

အပြစ်ခွင့်လွှတ်ခြင်း၊ အနာရောဂါကင်းငြိမ်းစေခြင်း၊ ကွယ်ကာခြင်း၊ ဂုဏ်တင့်စေခြင်း၊ အကျင့်သီလ ကောင်းခြင်း စသည့်အချက်များကြောင့် ရွှေလင်းယုန်၏အရွယ်ကဲ့သို့ပြန်လည်နုပျိုမည်။ ဖျားနာခြင်းနှင့် ၀ရုန်းသုန်းကားမှုက ခန္ဓာကိုယ်ကို ထိပါးနိုင်သော်လည်း ဝိညာဉ်ကိုမထိပါးနိုင်။ “အပြင်ရုပ်ခန္ဓာသည် တဖြည်းဖြည်း ယုတ်လျော့သော်လည်း လူသည်တနေ့ပြီးတနေ့တိုးတက်ရင့်ကျက်ရသည်” (၂ကော ၄:၁၆)။ လူ့ကမ္ဘာမြေပေါ်မှာ ထာဝရနုပျိုခြင်းဟူ၍မရှိ။ ထိုသို့ရုပ်ခန္ဓာကိုယ်မနုပျိုနိုင်သော်လည်း ကောင်းကင်မှ လာသော ခွန်အားသည် တိုးတက်မြဲတိုးတက်ပါသည်။

ထာ၀ရဘုရားကို မျှော်လင့်သောသူဟူမူကား အားပြည့်ကြလိမ့်မည်။ ရွှေလင်းယုန်ကဲ့သို့ မိမိတို့ အတောင်ကို အသစ်ပြုပြင်ကြလိမ့်မည်။ ပြေးသော်လည်းမပင်ပန်း၊ ခရီးသွားသော်လည်း မမောရကြ (ဟေရှာ ၄၀:၃၀)။

ရွှေလင်းယုန်သည်သက်တမ်းရှည်၍ ခွန်အားတောင့်တင်းသော သတ္တဝါဖြစ်သည်။ အသက်ကို ပြန်လည်နုပျိုစေနိုင်သော်လည်း မသေတတ်သောအမျိုးမဟုတ်။ အလွန်အိုမင်းရွယ်လွန်မှ သေပါသည်။ သို့သော် ဘုရားသခင်အမှုတော်၌ မွေ့လျော်သောသူသည် အစဉ်အဆက် နိုးကြားထကြွသည်။ ခွန်အား ကုန်ခမ်းသည်ဟူ၍ မရှိ။ ရွှေလင်းယုန်ကဲ့သို့ ပင်မြင့်သထက်မြင့်အောင် ပျံသန်းနိုင်သည်။

၁၀၃:၆ ဘုရားသခင်၏ကရုဏာတော်ကို ဟေဗြဲလူမျိုးအပေါ်ဆက်ဆံပုံ၌ အထင်အရှား တွေ့မြင် ရကြသည်။ အထူးသဖြင့် အဲဂုတ္တုကျွန်ဘ၀မှ လွတ်မြောက်လာကြစဉ် မြင်ရသည်။ ထိုအပြုအမူသည် ဖိနှိပ်ခံလူတန်းစားများအပေါ်သို့ တရားမျှတမှု ပြသသည့်အမှုတော်ဖြစ်သည်။

၁၀၃:၇–၈ အဲဂုတ္တုပြည်မှ ကတိတော်မြေသို့ ချီတက်ကြရာဝယ် ဘုရားသခင်က မောရှေနှင့် နောက်လိုက်များကို ခေါင်းဆောင်ခန့်အပ်ခဲ့သည်။ မောရှေကို အသိဉာဏ်ပေး၍ ကိုယ်တော်၏ရည်ရွယ်ချက် ထမြောက်အောင် လမ်းညွှန်ခဲ့သည်။ ဣသရေလများသည် ထိုဖြစ်စဉ်ကို နဖူးတွေ့ဒူးတွေ့ ကြုံတွေ့ခဲ့ကြသည်။ ကိုယ်တော်ပြသောလမ်းကို ဗျာဒိတ်တော်ဖြင့် သိမြင်ကြ၍ ကိုယ်တော်၏လုပ်ဆောင်ပုံကို ရှုမြင်ခြင်းဖြင့် တွေ့မြင်ရသည်။

ဘုရားရှင်ကိုယ်တိုင်ပါ၀င်ခြင်းဖြင့် ကရုဏာတော်နှင့်ကျေးဇူးတော် အထင်အရှားတွေ့မြင်ကြရသည်။ လမ်းပြသည် ဘေးရန်ကွယ်ကာသည်၊ ခြေလှမ်းတိုင်းပြုပြင်ပေးသည်။ သို့သော် သူ့လူများက လမ်းတလျှောက် ဆင်ခြေဆင်လက်ပေးကြသည်။ ပုန်ကန်ကြသည်။ မနာခံငြင်းဆန်ကြသည်။ သို့ဖြင့်လင့်ကစား ဘုရားရှင်က သဘောထားကြီးကြီး၊ စိတ်ရှည်ရှည်ဖြင့် သည်းခံသည်။ ကရုဏာဒေါသထွက်သော်လည်း ကရုဏာတော်က စိုးမိုးသည်။

၁၀၃:၉–၁၀ ဘုရားသခင်သည် သူ့သားသမီးများ လိမ္မာယဉ်ပါးဖို့ရန် ဆုံးမသော်လည်း ကြာလာသည် နှင့်အမျှ စည်းကမ်းဖောက်ဖျက်လာကြသည်။ အပြစ်စီရင်ရတော့မည်။ ကရုဏာတော်နှင့် ဖီလာဆန့်ကျင် နေပြီ။ လူသည် မိမိအကျင့်တိုင်းသာတရားစီရင်ရမည်ဆိုလျှင် တယောက်မကျန် ငရဲပြည်မြန်းကြရမည်။ သို့သော်လည်း ကရုဏာတော်ကြီးမားလှသောကြောင့် ထိုသို့ ကိုယ်ဖြစ်ကိုယ်ခံ တန်ရာတန်ရာ မစိမ်းကားရက်။ လူတို့၏အပြစ်အဖိုးအခကို တစုံတဦးက ကရာနီကုန်းပေါ်တွင် ပေးဆပ်ခဲ့ပြီ။ ထိုအရှင်သခင်၏လုပ်ဆောင် ချက်ကို ယုံကြည်ကိုးစားလျှင် ဘုရားရှင်က အပြစ်များကို ခွင့်လွှတ်ပါသည်။ အပြစ်ဒဏ်ကို နှစ်ခါပြန်ခံစား ရလေ့မရှိ။ ခရစ်တော်က လူတို့၏အပြစ်ကြွေးဆပ်ခဲ့ပြီ။ ကာယကံရှင်က နောက်ထပ်ပေးဆပ်စရာမလိုတော့။

၁၀၃:၁၁–၁၂ ဘုရားသခင်၏ချစ်ခြင်းမေတ္တာတော်သည် အံ့သြဘွယ်ရာဖြစ်ပါသည်။ အပြစ်နွံတွင်းမှ ကယ်ထုတ်ပေးပါသည်။ ကောင်းကင်နှင့်မြေကြီး ကွာဟမှုတိုင်းတာနိုင်လျှင် ဘုရားသခင်၏မေတ္တာတပိုင်းတစ ခန့်မှန်းနိုင်မည်။ သို့သော် ထိုသို့ပြုလုပ်နိုင်မည်မဟုတ်။ လူတို့နေထိုင်သော စကြ၀ဋ္ဌာ၏အရွယ်ပမာဏကို မည်သူမှ မသိနိုင်။ လူတို့၏အပြစ်များကို ထိုမျှဝေးလံသောအရပ်သို့ ဖယ်ရှားပေးတော်မူသည်။ အရှေ့နှင့် အနောက်သည် ဆုံစည်းနိုင်ခြင်းမရှိသကဲ့သို့ လူတို့သည်လည်း မိမိတို့ထိုအပြစ်ဟောင်းကို ပြန်တွေ့ ရမည်မဟုတ်။ ထိုသို့ အပြစ်ဝေးကွာခြင်းသည် ဘုရားသခင်၏ မဟာမေတ္တာတော်ဖြစ်သည်။ အံ့ဘွယ် မေတ္တာတော်ပါတကား။

၁၀၃:၁၃–၁၄ ဆရာကြီးတပါးက လူတို့၏အားနည်းချက်သည် ဘုရားသခင်၏စာနာသနားရာ ဖြစ်သည်ဟု ဆိုဘူးသည်။ ဖခင်များက မိမိရင်သွေးငယ်၏မသိနားမလည်မှုကို အစဉ်သနားခွင့်လွှတ်သကဲ့သို့ ကောင်းကင်ဘုံရှင် ဘုရားသခင်ကလည်း ဖန်ဆင်းထားသောလူများ၏ အားနဲချက်များကို သနားသဖြင့် နားလည်ခွင့်လွှတ်ပါသည်။ ဖုံမှုန့်မှ ဖန်ဆင်းထားသောကြောင့် မြေကြီးဦးနှောက်၊ ဖုံမှုန့်အသားများရှိကြောင်း ကိုယ်တော်သိရှိသည်။ တခါတရံဘုရားသခင်က သတိမှရပါစေဟု ညီးတွားတတ်ကြသည်။ တခါတရံ မိမိဘဝဇစ်မြစ်ကို မေ့လျှော့ပြီး မာန်မာနထောင်လွှားကြသည်။ ဘဝင်မြင့်ကြသည်။ ထင်ရာစိုင်းကြသည်။ ပတ်ဝန်းကျင် အထင်သေးကြသည်။

၁၀၃:၁၅–၁၆ လူသည် တခါသာ မြေကြီးဖြစ်ရသည်မဟုတ်။ သေလွန်လျှင်လည်း မြေကြီးဖုန်မှုန့် ပြန်ဖြစ်ဦးမည်။ ဖုံမှုန့်ကလာသည့်အတိုင်း ဖုံမှုန့်သို့ပြန်ရမည်ဟု ကျမ်းစာလာသည်။ ဘုရားသခင်၏ နှုတ်တော် ထွက်စကားဖြစ်၍ သစ္စာတရားဖြစ်သည်။ လူ့ဘဝနေ့ရက်သည် တိုတောင်းသည်။ တောမြက်ပန်းသို့နှယ် တခဏသာခံသည်။ လေထဲသို့လွင့်ပါသွားသည်နှင့် နောက်တဖန်မမြင်ရတော့ပါ။

၁၀၃:၁၇–၁၈ ဘုရားသခင် ကရုဏာသက်ရောက်ခြင်းအကြောင်းနှင့်မူ ဆန့်ကျင်သည်။ ဘုရား သခင်၏ကရုဏာတော်သည် သူ့ကိုချစ်ကြောက်ရိုသေသူများအပေါ်သို့ ကာလအစဉ်အဆက် တည်မြဲသည်။ အတိုင်းအဆ အကန့်အသတ်မရှိ ကျယ်ပြန့်လေးနက်သည်။ ဘုရားရှင်၏ဖြောင့်မတ်ခြင်း တရားတော်သည် ထိုသူများ၏ သားသမီးများထံသို့တိုင်အောင် ရေရှည်ခံသည်။ ငြိမ်သက်ချမ်းမြေ့ဘွယ်ကောင်းလေစွ။ ခရစ်ယာန်မိဘများသည် သားသမီး၊ မြေးမြစ်များကို လောကီဆန်မှာ စိုးရိမ်ကြသည်။ အမှန်တကယ် ယုံကြည်ခြင်းရှိလျှင် ထိုသို့ဘေးစကားကြောင့် အတွေးများစရာမလို။ မိမိကိုယ်တိုင် ယုံကြည်ခြင်းရှိ၍ ဖြောင့်မတ်မှန်ကန်လျှင် သားမြေးများက နမူနာကယူကြမည်။ သားစဉ်မြေးဆက်တည်တံ့ သည်။ ထွေရာကမာ ကတိသစ္စာပေးစရာမလို။ သစ္စာတော်ကိုစောင့်၍ ပညတ်တော်ကို ကျင့်သောသူ၏ သားစဉ်မြေးဆက်များသည် ကတိတော်နှင့်ဆိုင်ကြ၏။ ကျိုးကြောင်းလျော်ညီယုတ္တိရှိပါပေသည်။

၁၀၃:၁၉:၂၂ ဘုရားရှင်တော်မြတ်သည် သုံးလူ့ထွဋ်တင် ဘုရားသခင်ဖြစ်တော်မူသည်။ ရာဇပလ္လင် တော်သည် ထက်ကောင်းကင်ဘုံနန်းတွင် တည်သည်။ စကြဝဋ္ဌာအနှံ့တွင် အာဏာတည်သည်။ လူတိုင်း သတ္တဝါတိုင်းက ချီးမွမ်းထောမနာပြုကြသည်။ သို့ကြောင့် စကြဝဋ္ဌာအနှံ့ရှိ ဝေနေယျသတ္တဝါအပေါင်းအား ဘုရားသခင်ကို ချီးမွမ်းသီဆိုကြရန် ဖိတ်ခေါ်သည်။ ဒါဝိဒ်က သံပြိုင်သီချင်းဦးဆောင်မည်။ ပထမအသုတ်တွင် ကောင်းကင်တမန်များက သံပြိုင်သီဆိုမည်။ သူတို့နောက်တွင် ဖိတ်ခေါ်ထားသူများက မိမိတို့ ယူဆောင်လာသော ဂီတတူရိယာများ ကိုယ်စီတီးခတ်လျက် တေးသွားလိုက်ဆိုကြမည်။ နောက်တခါ အချက် ပေးလိုက်သည်နှင့်တပြိုင်နက် ဖန်ဆင်းခံဝေနေယျသတ္တဝါများက မြိုင်မြိုင်ဆိုင်ဆိုင် ဖြည့်ဆိုကြမည်။ ထိုချီးမွမ်းဂုဏ်ပြုသည့် ဟာလေလုယတေးသံသည် ကောင်းကင်ဘဝဂ်တိုင်ပျံ့နှံ့မည်။ တေးသီချင်း ဦးဆောင် သူက ဘုရားရှင်အား ကောင်းချီးပေးကြလော့ဟု တကိုယ်တော်ဖြည့်စွက်သီဆို၍ အဆုံးသတ်မည်။ ဒါဝိဒ်က “ဖန်ဆင်းခံတို့အလယ်မှာ ကိုယ်တော်ချီးမွမ်းပါရစေ”ဟု ဆိုလိမ့်မည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။

Recent Views: 0