Nehemiah -8 -

နေဟမိမှတ်စာ - ၈

ပညတ္တိကျမ်းဖတ်ပြခြင်း

1သတ္တမလရောက်မှ၊ မြို့ရွာအရပ်ရပ်၌နေသော ဣသရေလအမျိုးသား လူအပေါင်းတို့သည် လာ၍ ရေတံခါးလမ်းတွင် စည်းဝေးကြ၏။ ဣသရေလအမျိုး၌ ထာဝရဘုရားထားတော်မူသော မောရှေပညတ္တိကျမ်းစာကို ဆောင်ခဲ့ပါဟု ကျမ်းတတ်ဆရာဧဇရကို တောင်းသည်အတိုင်း၊ 2နားထောင်နားလည်နိုင်သမျှသော ပရိသတ်ယောက်ျား မိန်းမတို့ ရှေ့သို့ သတ္တမလပထမနေ့ရက်တွင်၊ ပညတ္တိကျမ်းစာကို ယဇ်ပုရောဟိတ်ဧဇရသည် ဆောင်ခဲ့၍၊ 3နားလည်နိုင်သောသူ၊ ယောက်ျားမိန်းမတို့ ရှေ့မှာ နံနက်အချိန်မှစ၍ မွန်းတည့်အချိန်တိုင်အောင် ရေတံခါးလမ်းတွင် ဖတ်ရွတ်လေ၏။ လူအပေါင်းတို့သည် ပညတ္တိကျမ်းစကားကို စေ့စေ့နားထောင်ကြ၏။ 4သူတို့လုပ်ကြသော တရားဟောရာ သစ်သားပလ္လင်ပေါ်မှာ၊ ကျမ်းတတ်ဆရာဧဇရသည် ရပ်၍ မတ္တိသ၊ ရှေမ၊ အနာယ၊ ဥရိယ၊ ဟိလခိ၊ မာသေယတို့သည် လက်ယာဘက်၌လည်းကောင်း၊ ပေဒါယ၊ မိရှေလ၊ မာလခိ၊ ဟာရှုံ၊ ဟာရှဗဒါန၊ ဇာခရိ၊ မေရှုလံတို့သည် လက်ဝဲဘက်၌လည်းကောင်း ရပ်နေကြ၏။ 5ထိုသို့ ဧဇရသည် လူအပေါင်းတို့ထက်သာ၍ မြင့်လျက်၊ လူအပေါင်းတို့ရှေ့မှာ ကျမ်းစာကိုဖွင့်သောအခါ၊ လူအပေါင်းတို့သည် ထကြ၏။ 6ဧဇရသည် မြတ်စွာဘုရားသခင် ထာဝရဘုရားကို ကောင်းချီးပေး၏။ လူအပေါင်းတို့က အာမင်၊ အာမင်ဟု လက်တို့ကိုချီလျက်၊ ဝန်ခံ၍ ဦးချပျပ်ဝပ်လျက် ထာဝရဘုရားကို ကိုးကွယ်ကြ၏။ 7ယောရှု၊ ဗာနိ၊ ရှေရဘိ၊ ယာမိန်၊ အက္ကုပ်၊ ရှဗ္ဗေသဲ၊ ဟောဒိယ၊ မာသေယ၊ ကေလိတ၊ အာဇရိ၊ ယောဇဗဒ်၊ ဟာနန်၊ ပေလာယအစရှိသော လေဝိသားတို့သည်လည်း လူများတို့အား ပညတ္တိကျမ်းစာအနက်ကို ပြန်ကြားကြ၏။ လူများတို့သည်လည်း မိမိတို့နေရာ၌ နေကြ၏။ 8ထိုသို့ ဘုရားသခင်၏ ပညတ္တိကျမ်းစာကို သေချာစွာဖတ်ရွတ်၍ အနက်ကိုပြန်သဖြင့်၊ လူများနားလည်စေခြင်းငှာ ပြုကြ၏။

9လူအပေါင်းတို့သည် ပညတ္တိကျမ်းစကားကို ကြားသောအခါ ငိုကြွေးကြသည်ဖြစ်၍၊ ပြည်အုပ်မင်း နေဟမိ၊ ကျမ်းတတ်ဆရာ ယဇ်ပုရောဟိတ်ဧဇရ၊ လူများတို့အား သွန်သင်သော လေဝိသားတို့က၊ ဤသည်နေ့ရက်သည် သင်တို့၏ဘုရားသခင် ထာဝရဘုရားအဖို့ သန့်ရှင်းသောနေ့ဖြစ်၏။ ငိုကြွေးမြည်တမ်းခြင်းကို မပြုကြနှင့်။ 10သွားကြလော့၊ မြိန်စွာသောအစာကို စားကြလော့။ ချိုသောအရည်ကို သောက်ကြလော့။ ဆင်းရဲသောသူတို့အား ဝေမျှကြလော့။ ဤသည်နေ့ရက်သည် ငါတို့ဘုရားရှင်အဖို့ သန့်ရှင်း၏။ ဝမ်းမနည်းကြနှင့်၊ ထာဝရဘုရား ပေးတော်မူသောအခွင့်နှင့် အားယူ၍ ဝမ်းမြောက်ကြလော့ဟု လူအပေါင်းတို့အား ဆိုကြ၏။ 11ထိုသို့ လေဝိသားတို့က၊ ဤသည်နေ့ရက်သည် သန့်ရှင်းသောနေ့ ဖြစ်သောကြောင့် တိတ်ဆိတ်စွာ နေကြလော့။ ဝမ်းနည်းမနေကြနှင့်ဟု ဆို၍ လူအပေါင်းတို့ကို ငြိမ်းစေကြ၏။ 12လူအပေါင်းတို့သည် ဟောပြောသော စကားများကို နားလည်သောကြောင့်၊ စားသောက်ခြင်း၊ သူတစ်ပါးတို့အား ဝေမျှခြင်း၊ အလွန်ပျော်မွေ့ခြင်းကို ပြုအံ့သောငှာ သွားကြ၏။

သစ်ခက်တဲနေပွဲတော်

13ဒုတိယနေ့ရက်တွင်၊ အဆွေအမျိုး သူကြီးများတို့နှင့်တကွ ယဇ်ပုရောဟိတ် လေဝိသားတို့သည် ပညတ္တိကျမ်းစကားကို နားလည်အံ့သောငှာ၊ ကျမ်းတတ်ဆရာဧဇရထံ၌ စည်းဝေးကြ၏။ 14သတ္တမလပွဲကိုခံကြစဉ်၊ ဣသရေလ အမျိုးသားအပေါင်းတို့သည် သစ်ခက်တဲ၌ နေရကြမည်ဟု မောရှေအားဖြင့် ထာဝရဘုရား ထားတော်မူသော ပညတ္တိကျမ်းစာ၌ ရေးထားကြောင်းကို တွေ့ကြ၏။ 15ထိုစကားကိုကြားသောအခါ၊ ကျမ်းစာ၌ ပါသည်အတိုင်း သစ်ခက်တဲတို့ကို လုပ်ခြင်းငှာ တောင်သို့သွားကြ။ သံလွင်ခက်၊ ထင်းရှူးခက်၊ မုရတုခက်၊ စွန်ပလွံခက် အစရှိသော ထူထပ်သော အခက်အလက်မျိုးတို့ကို ဆောင်ခဲ့ကြဟု ယေရုရှလင်မြို့မှစ၍ ခပ်သိမ်းသော မြို့ရွာတို့၌ ကြော်ငြာကြ၏။ 16လူများတို့သည် ထွက်သွား၍၊ သစ်ခက်တို့ကို ဆောင်ခဲ့ပြီးလျှင် အိမ်မိုးပေါ်မှာလည်းကောင်း၊ မိမိဝင်းထဲ၊ ဗိမာန်တော် တံတိုင်းထဲမှာလည်းကောင်း၊ ရေတံခါးလမ်းနှင့် ဧဖရိမ်တံခါးလမ်းမှာလည်းကောင်း သစ်ခက်တဲများကို လုပ်ကြ၏။ 17ထိုသို့ သိမ်းသွားခြင်းကို ခံရရာထဲက ထွက်လာသော ပရိသတ်အပေါင်းတို့သည် သစ်ခက်တဲတို့ကိုလုပ်၍ ထိုင်နေကြ၏။ နုန်သား ယောရှုလက်ထက်မှစ၍ ဣသရေလအမျိုးသားတို့သည် တစ်ခါမျှ ထိုသို့မပြုကြ။ အလွန်ဝမ်းမြောက်လျက် နေကြ၏။ 18ပထမနေ့မှစ၍ နောက်ဆုံးသောနေ့တိုင်အောင်၊ နေ့ရက်အစဉ်အတိုင်း ဘုရားသခင်၏ ပညတ္တိကျမ်းစာကို ဖတ်ရွတ်ကြ၏။ ထိုပွဲကို ခုနစ်ရက်ပတ်လုံးခံကြ၏။ ရှစ်ရက်မြောက်သောနေ့၌ တရားတော်အတိုင်း ဓမ္မပွဲကိုလည်းခံကြ၏။

နေဟမိမှတ်စာ - ၈ (အနက်ဖွင့်)

(စ) ယေရုရှလင်တွင် ဘာသာရေးရှင်သန်လာခြင်း (အခန်း ၈–၁၀)

၈:၁–၈ အခန်း (၈)သည် ယုံကြည်သူများ ဝိညာဉ်တန်ခိုးကြီးစေရာ သတင်းကောင်းဖြစ်၍ အရေးကြီးသည်။ ဤအခန်းတွင် နေဟမိသည် ပထမလူပုံစံဖြင့်မရေးဘဲ၊ တတိယလူပုံစံဖြင့် (၁၂:၃၁)ထိ စီရင်ရေးဖွဲ့သည်။ လာမည့်အခန်းများတွင် ဧဇရ၏ သွင်ပြင်လက္ခဏာများကိုလည်း အနည်းအကျဉ်းတွေ့ရမည်။

သတ္တမလ၏ ပထမနေ့ရက်တွင် ပြည်သူလူထုကြီးသည် တံပိုးမှုတ်ပွဲတော် ပါဝင်ဆင်နွဲဖို့ ကြက်ပျံမကျ၊ ငှက်ပျံမကျစုရုံးကြသည် (ဝတ် ၂၃:၂၄-၂၅)။ တပါးအမျိုးသားများအကြားရှိ ယုဒလူများသည်လည်း အစီအရီပေါ်ထွက်လာကြသည်။ သီးသန့်သတ်မှတ်ထားသော နေရာတွင် လေဝိအမျိုးသား (၁၇)ဦး မတ်တပ်ရပ်၍ ဧဇရက မောရှေကျမ်းအား နာရီပေါင်းများစွာ ကြာအောင် ရွတ်ဖတ်ကြသည်။ လေဝိသားများက ပရိသတ်ကြီးသည် ဘုရားသခင်၏ နှုတ်ကပတ်တော်အား နက်ရှိုင်းစွာ ခံယူကြသည် (ငယ် ၇)။ အငယ် (၈)တွင်အနက်ဖွင့် ရှင်းပြသည်ဟု ဆိုသည်။ အာရမိဘာသာစကားဖြင့် ရွတ်ဆိုပြီး၊ အနက်ကို ဟေဗြဲဘာသာဖြင့် ရှင်းပြသည်။ အယူအဆခံယူချက် ရှင်းပြရန် လိုအပ်သည်။⁶

ယနေ့ခေတ်ကာလတွင်ကာလဒေသ ရာစုချီ၍ ပြောင်းလဲသွားပြီ။ အယူအဆ၊ အတွေးအခေါ် စာပေဒဿနပြောင်းလဲကုန်ပြီ။ သို့ကြောင့် ကျမ်းစာပညာရှင်များက နှိုက်နှိုက်ချွတ်ချွတ် ပိုမိုရှင်းပြရန် လိုအပ်သည်။ ထိုအကြောင်းနှင့် ပတ်သက်၍ Dr. Donald Cambell ကဤသို့ဆိုသည်။

ဧဇရ နှင့် သူ၏ လုပ်ဖော်ဆောင်ဖက်များသည် နှစ်လရှည်ကြာနေရာနှင့်တကွ သမ္မာကျမ်းစာ သင်ကြားပို့ချသူများဖြစ်သည်။ ထိုသို့သွန်သင်ခြင်းနည်းလမ်းသည် ဘုရားသခင်ကောင်းကြီးပေးသော နည်းလမ်းကောင်းတစ်ခုဖြစ်သည်။ ဝိညာဉ်ရေးရာတွင် ထိရောက်သော လက်နက်စွမ်းတစ်မျိုးဖြစ်သည်။ ဒေသနာခေါင်းစဉ် တခုတည်းနှင့် ခွန်အားရရှိနိုင်သကဲ့သို့ တရားဒေသနာအာဘော်ဖြင့် ပိုမိုဖြည့်ဆည်းပံ့ပိုးပေးသည်လည်း ရှိသည်။ ဧဇရ၏ တရားဒေသသည် နှိုင်းယှဉ်စရာမရှိအောင် ရိုးစင်းနားလည် ရလွယ်ကူသည်။ ထိမိ၍ ဆောက်တည်ဖွယ်ရာ တရားဒေသနာ ဟောပြောနိုင်ခြင်းသည် ဘုရားပေး ဝိညာဉ်ဆုကျေးဇူး ဖြစ်၍ ထိုတရားဒေသနာ ကြားနာခွင့် ရရှိသူများသည် ပါရမီ အခံကောင်းသူများ ဖြစ်သည်။၇

၈:၉–၁၂ တရားဒေသနာ ကြားနာသူများသည် ရင်မှာ မချိအောင် ခံစားကြရသောကြောင့် မျက်ရည်စများ ဝဲကုန်သည် (ငယ် ၉)။ ယခင်က သမ္မာကျမ်းစာ ဖတ်ဘူးခဲ့ကြသော်လည်း ယခုကဲ့သို့ စိတ်နှလုံး ကြွေပြုန်းအောင် မခံစားခဲ့ကြ။ တရားဒေသနာသည် ဝမ်းနည်းကြေကွဲစရာမဟုတ်။ ဆောက်တည်စရာ အားအင်ဖြစ်သည်။ ယုဒလူများအဖို့ အစာရှောင် ဥပုသ်စောင့်၍ မျက်နှာသေမည့်ရက်သည် အပြစ်ဖြေရာနေ့ရက်ဖြစ်သည်။ ထိုနေ့ရက် အပြစ်ဖြေခြင်းမပြုလုပ်သေးခင်တွင်သာ မျက်နှာညှိုးငယ်ရသည်။ အခြားပွဲရက်များ၌ ရွှင်လန်းပျော်မြူးရသည်။ ဝိညာဉ်အသီးအပွင့်များကို မြင်လွယ်သည်။ အချင်းချင်းမေတ္တာပြုကြရသည်။ ဘုရားသခင်ရှေ့၌ ပျော်ရွှင်စွာစားသောက်ကြရသည်။ ကြောက်ရွံတုန်လှုပ်ခြင်း၊ သောကစိုးရိမ်မှုများ ဘေးဖယ်၍ ငြိမ်သက်ချမ်းမြေ့ရသည်။ မျက်ရည်များကို ပီတိအဖြစ်သို့ ပြောင်းလဲပစ်ရသည်။ ဘုရားသခင်၌ ပျော်ရွှင်စွာ ခွန်အားယူကြသည်။

၈:၁၃–၁၅ နောက်တနေ့တွင် အမျိုးသားခေါင်းဆောင်များ၊ ယဇ်ပုရောဟိတ်များနှင့် လေဝိသားများသည် အထူးတလည် ကျမ်းစာလေ့လာကြသည်။ လာမည့်လတွင် တဲတော်ပွဲ ကျင်းပမည့်အမိန့်ကို နာခံကြသည်။ ပွဲတော်အကြောင်းလည်း စဉ်းစားစီစဉ်ကြသည်။

၈:၁၆–၁၈ ထိုပွဲတော်သည် ကတိတော်မြေ၌ ဣသရေလလူများ လုံခြုံစွာနေရသည့် အထိမ်းအမှတ်ဖြစ်သည်။ ထိုပရိသတ်ထဲတွင် ယောရှုလက်ထက်ကတည်းက တခါမှ မဆင်နွဲဘူးသူများ ပါဝင်ရာ ယခုကဲ့သို့ ကြံတွေ့သောအခါ အလွန်အားရပျော်ရွှင်ကြသည်။ တချို့သည် ဖမ်းဆီးကျွန်ပြုမှုခံစဉ် မွေးဖွားသူများဖြစ်၍ ယေရုဗာဗေလ လက်ထက်တွင် ပြည်တော်ပြန်ဝင်လာသူများဖြစ်သည် (ဧဇ ၃:၄)။ မြို့ပြပြည်ရွာ ကျေးလက်အနှံ့စည်ကား သိုက်မြိုက်စွာ ကျင်းပကြသည်။ ဘုရားသခင်၏ နှုတ်ကပတ်တော်သည် ဆာလောင်ငတ်မွတ်သူများအား လျင်မြန်စွာဝလင်စေပါသည်။ ထိုပွဲတော်သည် လ၏ (၁၅) ရက်နေ့မှ(၂၂) ရက်နေ့အထိ ခြိမ့်ခြိမ့်သဲ ကျင်းပဆင်နွဲခဲ့ကြသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။