Nehemiah -1 -

နေဟမိမှတ်စာ - ၁

နေဟမိ၏ဆုတောင်းခြင်း

1ဟာခလိသား နေဟမိစကားဟူမူကား၊ အာတဇေရဇ်မင်းကြီး နန်းစံနှစ်ဆယ်၊ ခိသလုလတွင်၊ ငါသည် ရှုရှန်နန်းတော်၌ ရှိနေစဉ်၊ 2ငါ့ညီ ဟာနန်နှင့် ယုဒလူအချို့တို့သည် ရောက်လာ၍၊ ငါသည် သိမ်းသွားခြင်းကို ခံရသော ယုဒလူစုထဲက လွတ်သောသူတို့၏ အကြောင်းအရာနှင့်၊ ယေရုရှလင်မြို့၏ အကြောင်းအရာကိုမေးမြန်းလျှင်၊ 3သူတို့က၊ သိမ်းသွားခြင်းကို ခံရသောလူစုထဲက လွတ်၍၊ ထိုပြည်၌ နေသောသူတို့သည် ကြီးစွာသော ဆင်းရဲခြင်း၊ ကဲ့ရဲ့ခြင်းကို ခံရကြ၏။ ယေရုရှလင်မြို့ရိုးသည် ပြိုပျက်လျက်၊ မြို့တံခါးလည်း မီးလောင်၍ကုန်ပြီဟု ပြန်ပြောကြ၏။ 4ထိုစကားကိုကြားလျှင်၊ ငါသည်ထိုင်၍ အင်တန်ကာလပတ်လုံး ငိုကြွေးမြည်တမ်းလျက်၊ အစာရှောင်လျက်နေ၍၊ ကောင်းကင်ဘုံ၏အရှင် ဘုရားသခင့်ရှေ့တော်၌ ဆုတောင်းသောပတ္ထနာ ဟူမူကား၊ 5အိုကောင်းကင်ဘုံ၏အရှင် ဘုရားသခင် ထာဝရဘုရား၊ ကြီးမြတ်၍ ကြောက်မက်ဖွယ်သောဘုရား၊ ပညတ်တော်တို့ကို နှစ်သက်၍ ကျင့်စောင့်သော သူတို့နှင့်ဖွဲ့သော ကရုဏာပဋိညာဉ်ကို မဖျက်၊ တည်စေတော်မူသော ဘုရား၊ 6ကိုယ်တော်ကျွန် ဣသရေလအမျိုးသားတို့အဖို့၊ ရှေ့တော်၌ နေ့ညမပြတ် အကျွန်ုပ်ဆုတောင်း၍၊ ဣသရေလအမျိုးသားဖြစ်သော အကျွန်ုပ်တို့သည် ကိုယ်တော်ကို ပြစ်မှားမိသော အပြစ်များကို ဖော်ပြ၍ တောင်းပန်သော ကိုယ်တော်ကျွန်၏ ပတ္ထနာစကားကို ကြားခြင်းငှာ၊ ယခုနားထောင်၍ စေ့စေ့ကြည့်ရှုတော်မူပါ။ 7အကျွန်ုပ်နှင့် အကျွန်ုပ်အဆွေအမျိုးတို့သည် ပြစ်မှားပါပြီ။ ကိုယ်တော်ကို ပြစ်မှား၍၊ အလွန်ဆိုးညစ်သော အမှုတို့ကို ပြုမိပါပြီ။ ကိုယ်တော်ကျွန်မောရှေ၌ ထားတော်မူသော ပညတ်တရား၊ စီရင်ထုံးဖွဲ့တော်မူချက်တို့ကို မစောင့်ဘဲနေပါပြီ။ 8ကိုယ်တော်က၊ သင်တို့သည် လွန်ကျူးလျှင်၊ သင်တို့ကို တစ်ပါးအမျိုးသားတို့တွင် ငါကွဲပြားစေမည်။ 9တစ်ဖန် ငါ့ထံသို့ ပြန်လာ၍၊ ငါ့ပညတ်တို့ကို ကျင့်စောင့်ပြန်လျှင်၊ မိုးကောင်းကင်အောက် အဝေးဆုံးသောအရပ်သို့ နှင်ထုတ်ခြင်းကို ခံရသော်လည်း၊ ထိုအရပ်က ငါသိမ်းယူ၍၊ ငါ့နာမတည်ရာဖို့ ငါရွေးချယ်သောအရပ်သို့ ဆောင်ခဲ့မည်ဟု ကိုယ်တော်ကျွန်မောရှေ၌ ထားတော်မူသော ကတိတော်ကို အောက်မေ့တော်မူပါ။ 10ယခုမှာ၊ ဤသူတို့သည် မဟာတန်ခိုးတော်နှင့် အားကြီးသောလက်တော်ဖြင့် ရွေးနုတ်တော်မူသော ကိုယ်တော်ကျွန်၊ ကိုယ်တော်လူမျိုး ဖြစ်ကြပါ၏။ 11အို ဘုရားရှင်၊ ကိုယ်တော်ကျွန်ပြုသော ပတ္ထနာစကားနှင့် နာမတော်ကို ရိုသေချင်သော ကျွန်တော်များပြုသော ပတ္ထနာစကားကို နားထောင်တော်မူပါ။ ကိုယ်တော်ကျွန်ကို ယနေ့ ကောင်ချီးပေးတော်မူပါ။ ဤလူရှေ့မှာ မျက်နှာရပါမည်အကြောင်း ကယ်မသနားတော်မူပါဟု ဆုတောင်းလေ၏။ ထိုအခါ ငါသည် ရှင်ဘုရင်၏ ဖလားတော်ကိုင် ဖြစ်သတည်း။

နေဟမိမှတ်စာ - ၁ (အနက်ဖွင့်)

၁။ နေဟမိ ပထမအကြိမ်ခရီး။ ယေရုရှလင် ပြန်လည်စုစည်းခြင်း (အခန်း ၁–၁၂)

(က) ယေရုရှလင်အပေါ် အံ့သြတုန်လှုပ်ခြင်း (အခန်း ၁)

၁:၁–၃ တခွန်းစ နှစ်ခွန်းစသာလျှင် မိတ်ဆက်သည်။ နေဟမိက သူသည် ဟာလခိ၏ သားဖြစ်ကြောင်းနှင့် အာတဇေရဇ်မင်းအနားတွင် အပါးတော်မြဲ အဖြစ်သာဆိုထားသည်။

မတင်မကျ ခေတ်ပျက်ကာလတွင် ကျီးကန်းတောင်းမှောက် ကျီးလန့်စာစားနေကြခိုက် ဧဇရ၏နိုင်ငံရေးနှင့် အမျိုးသားရေးဦးဆောင်မှုကြောင့် ဘာသာတရား ယုံကြည်သက်ဝင်စပြုသော်လည်း ယေရုရှလင်မြို့ရိုးခံတပ် ဆောက်လုပ်နိုင်ခြင်းမရှိခဲ့ကြ။ ဘုရားသခင်၏လူများကို အန္တရာယ်အမျိုးမျိုးပေးနေကြသော အရပ်မျက်နှာပေါင်းစုံမှ တံပျက်စီးသမားများက အာတဇေရဇ်မင်းအား မြို့ရိုးဆောက်လုပ်နိုင်အောင် နှောင့်ယှက်ကြသဖြင့် လုပ်ငန်းရပ်ဆိုင်းသွားသည်။ မြို့ရိုးဆက်ဆောက်လျှင် အာတဇေရဇ်မင်း၏ အသက်သည် ရန်သူ့လက်ထဲတွင်ရှိသည်ဟုခြိမ်းခြောက်လာကြသည်။ အနိဠာနရုံကြောင့် ယေရုရှလင်မြို့ရိုး ပုံပေါ်တွင်နေဟမိသည် မျက်ရည်ကြားမှ ခွန်အားယူ၍ ပေါ်ထွက်လာသည်။၂

၁:၄–၁၁ နေဟမိသည် ရွေးနှုတ်ထားသော ယုဒလူများအတွက် ရင်လေးဝန်ပိနေသည်။ ထိုသူများ၏ ဆင်းရဲဒုက္ခကို ကိုယ်တွေ့မခံစားခဲ့ရသော်လည်း ထပ်တူထပ်မျှ ခံစားသည်။ တယောက်တည်း ကိုယ်ကျိုးရှာ၍ နန်းတော်တွင် ဇိမ်ခံမနေ။ ကြေကွဲဝမ်းနည်းသည်။ အစာရှောင်ဆုတောင်းသည်။ ယုဒလူထု၏ အပြစ်ဒုစရိုက်ကဲ့သို့ မှတ်ယူ၍ ဘုရားသခင်ထံဝန်ချတောင်းပန်သည်။ ဘုရားသခင်ရှေ့မှောက်၌ ဖြောင့်မတ်စွာနေနိုင်ကြဖို့ သူ့လူများအား ပြန်လည်စုစည်းခွင့် တောင်းပန်သည်။ သူကိုယ်တိုင်လည်း ဘုရင်ရှေ့တွင် မျက်နှာသာရဖို့ ဆုပန်သည်။ မွေးချင်းပေါက်ဖော် ယုဒပြည်သူများအား ရိုင်းပင်းကူညီလိုစိတ် ထက်သန်သဖြင့် တိုးတက်ဖွံ့ဖြိုးရေးစီမံကိန်းများရေးဆွဲကြည့်သည်။ ဘုရားသခင်ရှေ့တွင် နေ့ရက်များစွာ လျှောက်လဲဆုတောင်းသည်။

နေဟမိ၏ ထက်မြက်ထိရောက်သော ခေါင်းဆောင်မှုကို မကြာခဏ ပုံဥပမာပေး သင်ခန်းစာယူလေ့ရှိသည်။ ပထမဦးစွာ ရည်မှန်းချက် စီမံကိန်းရေးဆွဲ၍ အောင်မြင်သည့် နည်းလမ်းရှာကြံသည်။ ပြဿနာကို အနုလုံပဋိလုံ အပြန်အလှန် စဉ်းစားဆင်ခြင်ပြီးမှ ဖြစ်နိုင်သည့် နည်းလမ်းကို ရွေးချယ်သည်။ ထိုရည်မှန်းချက် အကောင်အထည်ဖော်ရန် အခြားသူများကိုလည်း စည်းရုံးလက်တွဲ ခေါ်ဆောင်သည်။ လုပ်ငန်းကို ကိုယ်တိုင် ကြီးကြပ်ကွပ်ကဲ၍ စစ်ဆေးသည်။ လုပ်ငန်းအောင်မြင်ပြီးဆုံးသည်အထိ ကိုယ်တိုင်ကိုယ်ကျပါဝင်သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။