Nahum -2 -

နာဟုံအနာဂတ္တိကျမ်း - ၂

နိနေဝေမြို့ကျဆုံးခြင်း

1ဖျက်ဆီးသောသူသည် သင့်ရှေ့သို့ ရောက်လာပြီ။ သင်၏ရဲတိုက်ကို သတိပြုလော့။ လမ်းကို စောင့်လော့။ ကိုယ်ခါးကို ခိုင်ခံ့စေလော့။ ကျပ်ကျပ် အားယူလော့။ 2အကြောင်းမူကား၊ ထာဝရဘုရားသည် ဣသရေလ၏ဘုန်းကဲ့သို့ ယာကုပ်၏ဘုန်းကို ပြုပြင်တော်မူ၏။ သုတ်သင်သောသူတို့သည် ယာကုပ်အမျိုးကို သုတ်သင်၍၊ သူ၏အခက်အလက်တို့ကို ပယ်ရှင်းကြပြီ။ 3သူရဲတို့သည် နီသော ဒိုင်းလွှားကိုဆောင်၍၊ နီသောအဝတ်ကို ဝတ်ကြ၏။ ခင်းကျင်းသောနေ့၌ ရထားတို့သည် သံလက်နက်နှင့် တောက်ပ၍၊ လှံတံတို့သည် အလွန်လှုပ်ရှားကြ၏။ 4ရထားတို့သည် လမ်း၌ဟုန်းဟုန်းမြည်၍၊ လမ်းမတို့၌ တောင်မြောက်ပြေးကြ၏။ မီးရှူးအဆင်းအရောင်ရှိ၍၊ လျှပ်စစ်ကဲ့သို့ ပြေးကြ၏။ 5စစ်သူရဲတို့ကို နှိုးဆော်တော်မူ၏။ သူတို့သည် ချီသွားစဉ် သူတစ်ပါးကို တွန်းချကြ၏။ မြို့ရိုးသို့ အလျင်အမြန်သွား၍ ပြအိုးတို့ကို ပြင်ဆင်ကြ၏။ 6မြစ်တံခါးပွင့်လျှင်၊ နန်းတော်သည် ကွယ်ပျောက်၏။ နိနေဝေသတို့သမီးကို အဝတ်ချွတ်၍ ထုတ်ရ၏။ 7အပျိုတော်တို့သည် ချိုးကဲ့သို့ ကူ၍ ရင်ပတ်ကို တီးလျက် လိုက်ရကြ၏။ 8ရှေးကာလမှစ၍ နိနေဝေမြို့သည် ရေကန်ကဲ့သို့ ဖြစ်၏။ ယခုမူကား၊ ရေတို့သည် စီးထွက်ကြ၏။ ရပ်ကြ။ ရပ်ကြဟု ဟစ်သော်လည်း အဘယ်သူမျှ ပြန်၍မကြည့်။ 9ငွေကို လုယူကြ။ ရွှေကိုလည်း လုယူကြ။ နှစ်သက်ဖွယ်သော တန်ဆာများကို ရွှေတိုက်တော်ထဲက ထုတ်၍ မကုန်နိုင်။ 10မြို့တော်သည် ဟင်းလင်းနေရ၏။ ဥစ္စာမရှိ၊ လူဆိတ်ညံလျက် ဖြစ်၏။ မြို့သားအပေါင်းတို့သည် စိတ်ပျက်လျက်၊ ဒူးချင်းထိခိုက်လျက်၊ အလွန်ခါးကိုက်လျက်၊ မျက်နှာမည်းလျက်ရှိကြ၏။

11ခြင်္သေ့နေရာအရပ်၊ ခြင်္သေ့ပျိုစားရာအရပ်၊ ခြင်္သေ့၊ ခြင်္သေ့မ၊ ခြင်္သေ့ကလေးတို့သည် အဘယ်သူမျှ မကြောက်စေဘဲ၊ ကျင်လည်ရာအရပ်သည် အဘယ်မှာရှိသနည်း။ 12ခြင်္သေ့သည် သားငယ်များ ဖို့ကိုက်ဖြတ်လျက်၊ ခြင်္သေ့မတို့ လည်ပင်းကို ညှစ်လျက်၊ လုယူဖျက်ဆီးသော အကောင်များကိုဆောင်ခဲ့၍ မိမိမှီခိုရာတွင်းတို့ကို ပြည့်စေတတ်၏။ 13ကောင်းကင်ဗိုလ်ခြေအရှင် ထာဝရဘုရား မိန့်တော်မူသည်ကား၊ သင့်တစ်ဖက်၌ ငါနေ၏။ သင်၏ရထားတို့ကို မီးခိုးထဲမှာ မီးရှို့မည်။ သင်၏ခြင်္သေ့ပျိုတို့ကို ဓားဖြင့် ဖျက်ဆီးမည်။ သင်လုယူသောဥစ္စာကို မြေကြီးမှ ပယ်ရှင်းမည်။ သင်၏သံတမန်တို့ စကားသံကို နောက်တစ်ဖန် အဘယ်သူမျှ မကြားရ။

နာဟုံအနာဂတ္တိကျမ်း - ၂ (အနက်ဖွင့်)

၃။ နိနေဝေမြို့ဝိုင်းရံခံရခြင်း(၂:၁–၁၂)

၂:၁ အပိုဒ်ငယ်ပေါင်း (၁၀)ခုတွင် ဗာဗုလုန်က နိနေဝေမြို့ကို ဝိုင်းရံတိုက်ခိုက်မည့် အကြောင်းရေးထားသည်။ ဖျက်ဆီးသောသူမှာ ဘုရားသခင် ့မဟုတ် ဗာဗုလုန်သားများဟု ဖွင့်ဆိုနိုင်သည်။ မြို့တော်သူမြို့တော်သားများအား အမိန့်(၄)ရပ်ပေး၍ ပြင်ဆင်ခိုင်းထားသည်။ “သင်၏ ရဲတိုက်ကို သတိပြုလော့။ လမ်းကို စောင့်လော့။ ကိုယ်ခါးကို ခိုင်စေ့ာ။ ကျပ်ကျပ်အားယူလော့ဟုဆိုထားသည်။

၂:၂ ဘုရားသခင်က သူ့လူများကို ပြန်လည်စုစည်းမည်။ ဣသရေလတို့ကို ဘုန်းသရေရှိဦးမည်။ သို့သော် ချက်ချင်းမဟုတ်သေး။ တောင်ပိုင်းနိုင်ငံသည် ပြည်တော်မှနှင်ထုတ်ခံရသေး။ ကောင်းချီးခံရနေဆဲဖြစ်သည်။

ဤကျမ်းပိုဒ်ကို အခြားအဓိပ္ပါယ်ကောက်ယူနိုင်သေးသည်။ ဤတိုတောင်းသော နာဟုံအနာဂတ္တိကျမ်းကို စာမျက်နှာခန့်(၄၀၀)ခန့်ဖြင့် အနက်ဖွင့်ဆိုထားသော Walter A. Maier က “ပြန်လည်စုစည်းခြင်း”ကို ဆန့်ကျင်ဘက်စကား “ဖြတ်တောက်ခြင်း” ဟု ၎င်း၊ “ဘုန်းအသရေ”ကို “မာန်မာန” ဟု၎င်း ကောက်ယူကာ ဤသို့သို့ရေးထားသည်။

“ယေဟောဝါသည် ယာကုပ်၏ မာန်မာနကို ဖြတ်တောက်သည်”ဆိုသည်မှာ (ဣသရေလ=ယာကုပ်) မြောက်ပိုင်းနိုင်ငံကို အပြစ်ပေး၍ ယုဒ(တောင်ပိုင်း–ပရောဖက်၏မွေးရပ်မြေ) သို့ အလည်အပတ် ကြွလာကြည့်အရှုကြွလာခြင်း ဖြစ်သည်။ ဣသရေလနိုင်ငံသည် အနန္တတန်ခိုးရှင်ကို ငြင်းပယ်ခဲ့ကြသောကြောင့်ဖြစ်သည်။ ပရောဖက်နာဟုံသည် ယုဒနိုင်ငံကို ဖျက်ဆီးပြီဟု ကြွားလုံးထုတ်သော သနာခရိပ်မင်းအား မြင်ယောင်ခြင်းဖြစ်သည်။၂

ဣသရေလနိုင်ငံကို အပျက်အစီး၊ အရှင်းခုတ်လှဲခံထားသော စပျစ်ခြံအဖြစ် ဓမ္မဟောင်းကျမ်းများ၌ ပြဆိုခဲ့ပြီဖြစ်သည် (ဆာ၊၈၀:၁၂ နောက်ပိုင်း။ ဟေရှာ၊ ၅:၅-၆။ ယေ၊၁၂:၁၀။ ဟောရှေ၊၁၀:၁)။

၂:၃–၆ ဗာဗုလုန်စစ်သားများအကြောင်းကို အပိုဒ်(၃)နှင့်(၄)၌ သူတို့ဝတ်ဆင်သော စစ်ဝတ်တန်ဆာများနှင့်တကွ သရုပ်ဖော်ထားသည်။ ဗာဗုလုန်စစ်သားများက အနီရောင်၊ သူတို့၏ မဟာမိတ်များက မေဒိစစ်သည်တို့က ကြက်သွေးရောင်ဝတ်ဆင်ကြသည်(အာရှုရိစစ်သားများက အပြာရောင် ဖြစ်သည်)။ အပိုဒ်ငယ်(၅)တွင် အာရှုရိစစ်သူရဲကို ဆိုလိုသည်ဟု ထင်မှတ်ရသော်လည်း စကားဆက်စပ်မှုများအရ ကျူးကျော်ရေးသမား ဗာဗုလုန်စစ်သားများ ဖြစ်သည်။ မြစ်ရေကို မြို့ထဲဖောက်ချကြသဖြင့် နိနေဝေမြို့ နန်းရင်ပြင်တစ်ခုလုံး ရေဖုံးလွှမ်းနစ်မြှုပ်သွားသည်။

၂:၇–၁၀ ဘုရင်မကို ဖမ်းဆီး ခေါ်ဆောင်သွားကြသည်။ မြို့သူမြို့သားများမှာ ကမ္ဘာပျက်တမျှ ယောက်ယက်ခတ် ထွက်ပြေးရသည်။ နိနေဝေမြို့၏ စည်းစိမ်ဥစ္စာများကို လုယူသိမ်းဆည်းသွားကြပြီ။ ရွှေငွေများ လုယက်ယူငင်သွားကြသည်။ မြို့တော်ကြီးသည် ပျက်သုဉ်းလျက် ခြောက်ချားစိုးရိမ်နေကြပြီ။

၂:၁၁–၁၂ ဤကျမ်းပိုဒ်စာသားပါ အချက်ကိုယူ၍ ဂရိတ်ဗြိတိန်နိုင်ငံကခြင်္သေ့၊ အမေရိကန်နိုင်ငံက လင်းယုန်ငှက်အား နိုင်ငံတော်အမှတ်တံဆိပ် အဖြစ်ယူသည်။ အာရှုရိသည် ခြင်္သေ့ကိုအရူးအမူးနှစ်သက်ကြသူများ ဖြစ်သည်။ လူဦးခေါင်းနှင့်ခြင်္သေ့ခန္ဓာ၊ ခြင်္သေ့ဦးခေါင်းနှင့်လူခန္ဓာ အနုပညာလက်ရာမြောက်ရုပ်တုထု လုပ်ကြလေ့ရှိသည်။ မိမိကိုယ်ကို တောဘုရင် ခြင်္သေ့အဖြစ် အထင်ရောက်လျက်ခြင်္သေ့အကျင့်အကြံကို တုပကျင့်ကြံပြုလေ့ရှိသည်။

ထိုစိတ်ကူးခံယူချက်အတိုင်း နိနေဝေမြို့သည် ခြင်္သေ့ဂူအဖြစ်မှတ်ယူကြသည်။ ပရောဖက်နာဟုံက သူတို့ကို ခြင်္သေ့ဂူ၌ အောင်းနေသော ခြင်္သေ့များအဖြစ် ခြင်္သေ့နေရာ၊ခြင်္သေ့ပျိုစားရာနေရာ၊ ခြင်္သေ့၊ ခြင်္သေ့မ၊ ခြင်္သေ့ကလေးများဟု သရော်ရော်တော်တော် ဆိုထားသည်။ ဤကျမ်းပိုဒ်ငယ်နှစ်ခုမှာပင် ခြင်္သေ့ဟူသော ဝေါဟာရကို(၇)ကြိမ်သုံးစွဲ၍ ခနဲ့ထားသည်။

၄။ နိနေဝေမြို့တော်အား ဖျသ်စီးရန်သဘောတော် (၂:၁၃–၃:၁၉)

၂:၁၃ ထာဝရဘုရားသခင်က နိနေဝေမြို့ကို ဖျက်ဆီးမည့်အကြောင်းကြေညာသည်။ နိနေဝေမြို့၏ ဆန့်ကျင်ဘက်၌ဘုရားသခင်ရပ်တည်သောကြောင့် အန်တုနိုင်စွမ်းမရှိ။ စစ်ရထားများကို မီးလောင်ကျွမ်းစေမည်။ ခြင်္သေ့ပျို(စစ်လက်နက်) ခုတ်ပိုင်းပစ်မည်။ နိနေဝေမြို့ သံတမန်စကားသံကို နောက်တဖန် အဘယ်သူမျှမကြားရ။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။