Lamentations -4 -

ယေရမိမြည်တမ်းစကား - ၄

ဇိအုန်မြို့ကိုပြစ်ဒဏ်ပေးခြင်း

1ရွှေသည် အလွန်သမ်းညိုသည်တကား။ အကောင်းဆုံးသော ရွှေသည် အလွန်ဖောက်ပြန်သည်တကား။ သန့်ရှင်းသော ကျောက်တို့သည် ခပ်သိမ်းသောလမ်းဝတို့၌ ဖရိုဖရဲ ကွဲပြားလျက်ရှိကြ၏။ 2အမြတ်ဆုံးသော ရွှေနှင့်အမျှ အလွန်အဖိုးထိုက်သော ဇိအုန်မြို့သားတို့ကို၊ အိုးထိန်းသမားလုပ်သောမြေအိုးကဲ့သို့ မှတ်တတ်သည်တကား။ 3မြေခွေးမတို့ပင် မိမိတို့သားငယ်တို့အား နို့သီးကိုပေး၍ နို့တိုက်တတ်၏။ ငါ၏လူမျိုးသတို့သမီးမူကား၊ တော၌နေသော ကုလားအုတ်ငှက်ကဲ့သို့ ကြမ်းကြုတ်သောသဘောရှိ၏။ 4နို့စို့ကလေးသည် နို့ငတ်သောကြောင့်၊ လျှာသည် အာခေါင်၌ ကပ်လျက်ရှိ၏။ သူငယ်တို့သည် မုန့်ကိုတောင်း၍ အဘယ်သူမျှမပေး။ 5ကောင်းမွန်စွာ စားတတ်သော သူတို့သည် ကိုးကွယ်ရာမရှိ၊ လမ်း၌နေကြ၏။ နီမောင်းသော အိပ်ရာပေါ်မှာ ပျော်မွေ့ဖူးသော သူတို့သည် နောက်ချေးပုံကို ဖက်ရကြ၏။ 6အဘယ်သူမျှ အားမထုတ်ဘဲ ချက်ချင်းပျက်စီးခြင်းသို့ရောက်သော၊ သောဒုံမြို့ခံရသော အပြစ်ဒဏ်ထက်၊ ငါ၏လူမျိုး သတို့သမီးခံရသော အပြစ်ဒဏ်သည် သာ၍ကြီးပေ၏။ 7သူ၏မှူးမတ်တို့သည် မိုးပွင့်ထက်သန့်ရှင်း၍၊ နို့ရည်ထက်လည်း ဖြူကြ၏။ သူတို့အသားသည် ကျောက်နီထက် နီ၏။ သွေးကြောလည်း နီလာနှင့်တူ၏။ 8ယခုမူကား၊ သူတို့အဆင်းသည် မှောင်မိုက်ထက်မည်းသည်ဖြစ်၍ လမ်း၌မထင်ရှား။ သူတို့အရေသည် အရိုး၌ကပ်၍ ထင်းကဲ့သို့ သွေ့ခြောက်လေ၏။ 9ဓားဖြင့်သေသောသူသည်၊ ငတ်မွတ်၍ သေသောသူထက်သာ၍ မင်္ဂလာရှိ၏။ ငတ်မွတ်၍ သေသောသူသည် အသီးအနှံပြတ်ခြင်းအားဖြင့် ထိုးဖောက်၍ ပိန်ကြုံရ၏။ 10စိတ်ကြင်နာတတ်သော မိန်းမတို့သည် မိမိတို့သားကိုပင် ပြုတ်ရကြ၏။ ငါ၏လူမျိုးသတို့သမီးသည် ပျက်စီးသောကာလ၌ မိမိတို့သားကိုပင် စားရကြ၏။ 11ထာဝရဘုရားသည် အမျက်တော်ကို စုံလင်စေတော်မူပြီ။ ပြင်းစွာသော အမျက်တော်အရှိန်ကို လွှတ်တော်မူပြီ။ ဇိအုန်မြို့ကို မီးရှို့၍ မြို့ရိုးအမြစ်တိုင်အောင် လောင်စေတော်မူပြီ။ 12ရန်ပြုသောသူနှင့် စစ်တိုက်သောသူသည် ယေရုရှလင်မြို့ တံခါးအတွင်းသို့ ဝင်နိုင်သည်ဟု၊ လောကီရှင်ဘုရင်နှင့် လောကီသတ္တဝါ တစ်စုံတစ်ယောက်မျှ မယုံကြ။

13ယေရုရှလင်မြို့အလယ်၌ ဖြောင့်မတ်သောသူတို့ကို သတ်တတ်သော မြို့သားပရောဖက်တို့၏ဒုစရိုက်များနှင့်၊ ယဇ်ပုရောဟိတ်တို့၏ အပြစ်များကြောင့် ဤအမှုသည် ရောက်လေပြီ။ 14ထိုသူတို့သည် အရူးကဲ့သို့လမ်း၌လှည့်လည်၍၊ လူအသွေးနှင့် လူးသောကြောင့်၊ သူတို့အဝတ်ကို အဘယ်သူမျှ မထိဝံ့။ 15သွားကြ။ မစင်ကြယ်သောသူတို့၊ သွားကြ၊ သွားကြ။ မထိကြနှင့်ဟု သူတစ်ပါးတို့သည် ဟစ်တတ်ကြ၏။ အဝေးသို့ပြေး၍ အရပ်ရပ်သို့လှည့်လည်ရသောအခါ သာသနာပလူတို့က၊ သူတို့သည် မတည်းမနေရဟု ဆိုတတ်ကြ၏။ 16ထာဝရဘုရားသည် အမျက်တော်ထွက်၍ သူတို့ကို ကွဲပြားစေတော်မူပြီ။ သူတို့အမှုကို ကြည့်ရှုတော်မမူ။ သူတစ်ပါးတို့သည်လည်း၊ ယဇ်ပုရောဟိတ်တို့ကို မရိုသေ၊ အသက်ကြီးသူတို့ကို အားမနာဘဲနေကြ၏။ 17ငါတို့သည်ရှိစဉ်တွင် မစမည့်သူကို မျှော်လင့်၍ မမြင်ရကြ။ မကယ်တင်နိုင်သောလူမျိုးကို ကင်းစင်ပေါ်မှာ အကျိုးမရှိဘဲ စောင့်ကြပြီ။ 18ငါတို့သည် လမ်း၌မသွားရမည်အကြောင်း ငါတို့ခြေရာကို လိုက်ရှာကြ၏။ ငါတို့သည် ဆုံးချိန်နီးပြီ။ အသက်ရှင်ရသောကာလ စေ့ပြီ။ ဆုံးချိန်ရောက်လေပြီ။ 19ငါတို့ကိုလိုက်၍ ရှာသောသူတို့သည် မိုးကောင်းကင်ရွှေလင်းတထက် သာ၍ လျင်မြန်ကြ၏။ တောင်ရိုးပေါ်မှာ လိုက်ရှာကြ၏။ တော၌လည်း ချောင်းမြောင်းကြ၏။ 20ငါတို့ ထွက်သက်ဝင်သက်တည်းဟူသော၊ ထာဝရဘုရားသည်ပေးတော်မူ၍ ဘိသိက်ခံသောအရှင်ကို သူတို့သည် မြေတွင်း၌ ဖမ်းမိကြပြီ။ ထိုအရှင်၏ ဘုန်းတော်ကိုခိုလှုံ၍၊ ငါတို့သည် သာသနာပလူတို့တွင် အသက်ချမ်းသာရလိမ့်မည်ဟု အထက်ကဆိုတတ်ကြ၏။

21ဥဇပြည်၌နေသော ဧဒုံသတို့သမီး၊ ဝမ်းမြောက်ရွှင်လန်းလော့။ ဖလားတော်သည် သင်ရှိရာသို့ ကူးသွားလိမ့်မည်။ သင်သည်ယစ်မူး၍ အဝတ်အချည်းစည်း ရှိရလိမ့်မည်။ 22အို ဇိအုန်သတို့သမီး၊ သင်ခံထိုက်သမျှသော အပြစ်ဒဏ်ကုန်ပြီ။ သင်သည် နောက်တစ်ဖန် သိမ်းသွားခြင်းကိုမခံရ။ အို ဧဒုံသတို့သမီး၊ သင်ပြုသော ဒုစရိုက်ကိုစစ်ကြော၍ သင်၏အပြစ်ကိုဖော်ပြတော်မူမည်။

ယေရမိမြည်တမ်းစကား - ၄ (အနက်ဖွင့်)

၅။ အတိတ်နှင့်ပစ္စုပ္ပန်ကာလတွင် ယုဒတို့ကွာခြားမှု(၄:၁−၂၀)

အတိတ်က ယေရုရှလင်မြို့ စည်းစိမ်ချမ်းသာပုံနှင့် မျက်မှောက်ကာလတွင် သနားစဖွယ် မျက်စိသူငယ် နားသူငယ်ဖြစ်ပုံကို ယှဉ်ပြထားသည်။ ဗိမာန်တော်ပျက်စီးသွားပြီ။ သားသည်မိခင်များကလည်း သားသမီးများကို ကမ္ဘာမီးလောင်ချနင်းကုန်ပြီ(ငယ်၃−၄)။ လူများအငတ်ဆင်းရဲဖြင့် သေကြေကြသည် (ငယ်၅)။ အပြစ်ဒဏ်က ကြီးလေးသည်(ငယ်၆)။ မင်းညီမင်းသားများသည်လည်း လူမြင်ကွင်းတွင် လေးစားခြင်း အသိမှတ်ပြုခြင်းမရှိ (အငယ်၇−၈)။ ကမ္ဘာမီးလောင်စားစရာမရှိတော့သောကြောင့် သားသည် မိခင်များရင်တွင်းဖြစ်သားသမီးများကို ချက်စားကြသည်(ငယ်၁၀)။ မိန်းမများ သားဖျက်ရိုးထုံးစံမရှိဟု ယုံမှားကြသကဲ့သို့ ယေရုရှလင်မြို့တွင်းသို့ အဘယ်ကျူးကျော် ရန်သူများမဝင်ရောက်နိုင်ဟု ထင်မှတ်ကြသည် (အငယ်၁၂)။ ထိုသို့ အတွေးခေါ်မှောက်မှား၍ မြို့တော်ကြီး ပြိုလဲပျက်သုဉ်းခြင်းသည် ပရောဖက်အတုများ၊ အမှားပရောဖက်မများ၏ သွန်သင်ဟောကြားချက်နှင့် ပြည်သူတို့၏ အကျင့်ဆိုးများကြောင့် ဖြစ်သည်(ငယ်၁၃−၁၆)။ အဲဂုတ္တုပြည်ကို အားကိုးကြသော်လည်း အားကိုးရကျိုးမနပ်၊ အချည်းနှီးဖြစ်သည်(ငယ်၁၇)။ ဗာဗုလုန်သားများအလုံးအရင်းဖြင့် ချင်းနင်းဝင်ရောက်လာကြသည်(ငယ်၁၈−၁၉)။ ဘိသိက်ပေးထားသော ဇေဒေကိ ဘုရင်သည်လည်း ဖမ်းဆီးခြင်းခံနေရပြီ(ငယ်၂၀)။

၆။ အနာဂတ်မျှော်လင့်ချက်၊ ဧဒုံပျက်ဆီးခြင်းနှင့် ယုဒတို့ပြန်လည်နလံထူခြင်း(၄:၂၁−၂၂)

ယေရုရှလင်မြို့ ပြိုလဲပျက်စီးသောကြောင့် ဧဒုံသမီးများပျော်ရွှင် ကခုန်ကြသည်။ သို့သော်လည်း သူများဒုက္ခရောက်သည်ကို ဝမ်းသာသောအပြစ် ဒုစရိုက်ကြောင့် ဧဒုံသမီးပျိုများလည်း အရေးယူအပြစ်ပေးခြင်းခံ ရမည်။ ဇိအုန်တောင်သည် ပြန်လည်ဖွံ့ဖြိုး နလံထူရမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။