Lamentations -5 -

ယေရမိမြည်တမ်းစကား - ၅

ကရုဏာထားရန်ဆုတောင်း

1အို ထာဝရဘုရား၊ အကျွန်ုပ်တို့၌ရောက်သောအမှုကို အောက်မေ့တော်မူပါ။ အကျွန်ုပ်တို့ခံရသော ကဲ့ရဲ့ခြင်းကို ကြည့်ရှု၍ ဆင်ခြင်တော်မူပါ။ 2အကျွန်ုပ်တို့ အမွေခံရာမြေသည် တစ်ပါးအမျိုးသားလက်သို့လည်းကောင်း၊ နေရာအိမ်တို့သည်လည်း တစ်ကျွန်းတစ်နိုင်ငံသားတို့ လက်သို့လည်းကောင်း ရောက်ပါပြီ။ 3အကျွန်ုပ်တို့သည် မိဘမရှိသောသူငယ် ဖြစ်ကြပါ၏။ အဘဆုံးပါပြီ။ အမိသည် မုဆိုးမကဲ့သို့နေရပါ၏။ 4ငွေပေးမှ ရေကို သောက်ရပါ၏။ ထင်းကိုလည်း ဝယ်ရပါ၏။ 5ထမ်းပိုးကို အစဉ်ထမ်းရပါ၏။ မရပ်မနေဘဲ လုပ်ကိုင်ရပါ၏။ 6စားစရာကိုရခြင်းငှာ အဲဂုတ္တုပြည်သား၊ အာရှုရိပြည်သားတို့၌ ကျွန်ခံရပါ၏။ 7ဘိုးဘေးတို့သည် ပြစ်မှား၍ သေပြီးမှ၊ အကျွန်ုပ်တို့သည် သူတို့ အပြစ်များကို ခံရပါ၏။ 8သူ့ကျွန်တို့သည် အကျွန်ုပ်တို့ကို အုပ်စိုးကြပါ၏။ သူတို့လက်မှ အဘယ်သူမျှ မကယ်မနုတ်ပါ။ 9တော၌ ဓားဘေးနှင့်တွေ့၍ အသေခံလျက် စားစရာကို ရှာရကြပါ၏။ 10မွတ်သိပ်ခြင်းအရှိန်ကြောင့် အကျွန်ုပ်တို့၏အရေသည် မီးဖိုကဲ့သို့ မည်းပါ၏။

11ဇိအုန်မြို့၌ မိန်းမများကိုလည်းကောင်း၊ ယုဒမြို့ရွာတို့၌ မိန်းမပျိုများကိုလည်းကောင်း၊ အဓမ္မပြုကြပါ၏။ 12မှူးမတ်တို့ကို လက်ဖြင့် ဆွဲထားကြပါ၏။ အသက်ကြီးသူတို့ကိုလည်း မရိုသေကြပါ။ 13လူပျိုတို့သည် ကြိတ်ဆုံကို ထမ်းရကြပါ၏။ သူငယ်တို့သည်လည်း ထင်းအောက်မှာ လဲရကြပါ၏။ 14အသက်ကြီးသူတို့သည် မြို့တံခါးဝ၌လည်းကောင်း၊ လူပျိုတို့သည် ပွဲသဘင်၌လည်းကောင်း ကွယ်ပျောက်ကြပါ၏။ 15အကျွန်ုပ်တို့သည် နှလုံးရွှင်လန်းခြင်းပြတ်၍၊ ကခြင်းအရာ၌ ညည်းတွားခြင်းရှိကြပါ၏။ 16အကျွန်ုပ်တို့ဆောင်းသော သရဖူသည် ကျပါပြီ။ အကျွန်ုပ်တို့သည် ပြစ်မှားသောကြောင့် အမင်္ဂလာရှိကြပါ၏။ 17ထိုကြောင့် အကျွန်ုပ်တို့သည် စိတ်ပျက်ကြပါပြီ။ ထိုအပြစ်ကြောင့် မျက်စိတို့သည်လည်းမွဲကြပါ၏။ 18လူဆိတ်ညံလျက်ရှိသော ဇိအုန်တောင်ပေါ်မှာ မြေခွေးတို့သည် သွားလာကြပါ၏။ 19အို ထာဝရဘုရား၊ ကိုယ်တော်သည် နိစ္စအမြဲတည်တော်မူ၏။ ပလ္လင်တော်သည်လည်း ထာဝရပလ္လင်ဖြစ်ပါ၏။ 20ကိုယ်တော်သည် အဘယ်ကြောင့် အကျွန်ုပ်တို့ကို အစဉ်မပြတ် မေ့လျော့တော်မူသနည်း။ အဘယ်ကြောင့် ကာလကြာမြင့်စွာ စွန့်ပစ်တော်မူသနည်း။ 21အိုထာဝရဘုရား၊ အကျွန်ုပ်တို့ကို အထံတော်သို့ လှည့်စေတော်မူပါ။ သို့ပြုလျှင်၊ အကျွန်ုပ်တို့သည် ပြန်၍ လာကြပါမည်။ ရှေးကာလကဲ့သို့ အကျွန်ုပ်တို့ကာလကို အသစ်ပြုပြင်တော်မူပါ။ 22အကယ်၍ ကိုယ်တော်သည် အကျွန်ုပ်တို့ကို ရှင်းရှင်းပယ်တော်မူမည်လော။ ပြင်းစွာ အမျက်ထွက်တော်မူမည်လော။

ပရောဖက်ယေရမိမြည်တမ်းသောစကားပြီး၏။

ယေရမိမြည်တမ်းစကား - ၅ (အနက်ဖွင့်)

၇။ ကြွင်းကျန်သူများ၊ ဘုရားသခင်ရှေ့တွင် ပြန်လည်ပေါ်ထွန်း၍ ကရုဏာတော်ခံစား စံစားကြရခြင်း (အခန်း၅)

၅:၁−၁၄ ဤကျမ်းများတွေ စိုးရိမ်ထိတ်လန့်ဖွယ်ရာ အဖြစ်ဆိုးကြောင့် ပရိတ်သတ်များ ငိုကြွေးရသည့်အကြောင်း ဖော်ပြထားပါသည်။ လိုအပ်သောအရာတိုင်းအတွက် အဖိုးအခပေးရသည် (ငယ်၄)။ မနေမနားလုပ်ဆောင်ရသည် (ငယ်၅)။ ဖိစီးနှိပ်စက်ခြင်းခံရသည် (ငယ်၈)။ ငတ်မွတ်ဆင်းရဲနှင့် ဘေးအန္တရာယ် ကြုံတွေ့ရသည် (အငယ်၉−၁၀)။ အပျိုကညာများ၊ မင်းညီမင်းသားများနှင့် အသက်ကြီးသူများ အနိုင်အထက်ပြုခြငးခံရသည် (ငယ်၁၁−၁၂)။ လူငယ်၊လူရွယ်မရွေး၊ ကလေးသူငယ်များမကျန် အသက်ကြီးသူအများအဆုံးဆင်းရဲဒုက္ခပြသနာနှင့် ရင်ဆိုင်ကြရသည်။

၅:၁၅−၁၈ ယုဒလူများ၏ ပြည့်ဆန်အကျင့် မူးယစ်သောက်စား မြူ’တူးပျော်ပါး ကခုန်ခြင်းများသည် အလွမ်းဇာတ်သို့ ပြောင်းလဲသွားကုန်သည်။ ဆောင်းထားသော သရဖူသည် ခြေထောက်အောက်သို့ ပြုတ်ကျသွားပြီ။ ဇိအုန်တောင်ကလည်း လူခြေတိတ်ပြီ။ အသံဗလံမ ပေါ်လာတော့ပါ။

ထိုအကြောင်းများကြောင့် ယုဒများသည် “အမင်္ဂလာရှိကြသည်။ အပြစ်ဒုစရိုက်ရှိသည်အတိုင်း ခံစားသင့်သည်” ဟုဝန်ခံကြပြီ။

၅:၁၉−၂၂ ယုဒလူများသည် ကြံရာမရသောအခြ ဘုရားသခင်ထံ ဆုတောင်းကြပြန်သည်။ ဘုရားသခင်ကိုယ်တော်တိုင် ရွေးနှုတ်ကယ်မ၍ အသစ်သော ဘဝထူထောင်ပေးဖို့ တောင်းလျှောက်ကြသည်။ ဟေဗြဲကျမ်းမူ အများပြားတွင် အပိုဒ်ငယ်၂၁ ကို အပိုဒ်ငယ်၂၂ အဆုံးတွင် တဖန်ထပ်မံဖော်ပြကြသည်မှာ အလွန်စိတ်ဝင်စားသူဖြစ်သည်။ ကံကြမ္မာထက် မျှော်လင့်ချက်ဖြင့် အဆုံးသတ်ကြသည်။၄ ထိုအကြောင်းကို ပိုမိုနားလည်နိုင်ရန် Keil ၏ရှင်းပြချက်ကို ဖော်ပြပါမည်။

ဤမြည်တမ်းစကားသည် ဆင်ခြင်ဆင်လက် ရတက်ဗလပွနှင့်အဆုံးသတ်သည်ဟု ထင်ကောင်းထင်ကြမည်။ ထိုသို့မဟုတ်ပါ။ မျှော်လင့်ချက်မရှိလျှင် ပျော်ရွှင်ခြင်း၊ အောင်မြင်ခြင်းလည်း လာနိုင်မည်မဟုတ်။ Gerlach က“မိုးသောက်ကြယ်ကို တိမ်ဖုံး၍ဖြစ်စေ၊ ညအမှောင်မပျယ်သေး၍ဖြစ်စေ၊ အလင်းမဖြစ်ရသေးသော်လည်း၊ နေရောင်ထွက်ပေါ်လာခါနီးကြောင်း အောင်မြင်ခြင်းလိုက်လာမည်ဖြစ်ကြောင်း” ဆိုထားပါသည်။၅

မှတ်စု

၁(၁:၁၂−၁၇) R.K. Harrison, Jeremiah and Lamentation,p.210.

၂(၃:၁၉−၃၉) အပိုဒ်ငယ် ၂၂၊၂၃ သည် ပုဂ္ဂိုလ်ရေး ဆန်သည်ဟု ယူဆလျှင် အယ်ဒီတာအတွက် သီးခြားအဓိပ္ပါယ် ရှိသည်။ “ဘုရားသခင်၏ ဂရုဏာတော်မခံစားထိုက်ပါ။” (ငယ် ၂၂) ဟု၄င်း၊ “ဘုရားသခင်၏ ကျေးဇူးတော်သည် ကြီးမြတ်လှပေစွ” (ငယ် ၂၃) ဟု၎င်း ဆိုမှသာလျှင် ရှေ့နောက်စကား ညီညွတ်ချေမည်။

၃(၃:၅၂−၆၆) C.F. Keil, “Lamentations” in Biblical Commentary on the Old Testament; XX: 455.

၄(၅:၁၉−၂၂) ဒေသနာကျမ်း၊ ယေရှာယကျမ်းနှင့် မာလခိကျမ်းများကိုလည်း ဤကျမ်းပိုဒ်ကဲ့သို့ပင် တရားစရပ်၌ ဖတ်ကြားလေ့ရှိသည်။

၅(၅:၁၉−၂၂) Keil, “Lamentations” XX:455.

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။