Jonah -1 -

ယောန၀တ္ထု - ၁

အမိန့်တော်ကိုမနာခံသူ

1အမိတ္တဲ၏သား ယောနသို့ရောက်လာသော ထာဝရဘုရား၏ နှုတ်ကပတ်တော်ဟူမူကား၊ 2သင်ထ၍ နိနေဝေမြို့ကြီးသို့ သွားပြီးလျှင်၊ ခြိမ်းခြောက်သောစကားနှင့် ကြွေးကြော်လော့။ ထိုမြို့ပြုသော ဒုစရိုက်အပြစ်သည် ငါ့ရှေ့သို့ တက်လာပြီဟု မိန့်တော်မူ၏။ 3သို့သော်လည်း၊ ယောနသည် ထာဝရဘုရားထံတော်မှ တာရှုမြို့သို့ ပြေးမည့်အကြံရှိသည်နှင့် ထလျက် ယုပ္ပေမြို့သို့သွား၍ ရောက်သဖြင့်၊ တာရှုမြို့သို့သွားသော သင်္ဘောကို တွေ့ကြုံ၍ သင်္ဘောခကိုပေးပြီးလျှင်၊ ထာဝရဘုရားထံတော်မှ သင်္ဘောသားတို့နှင့်အတူ တာရှုမြို့သို့လိုက်ခြင်းငှာ သင်္ဘောကို စီးလေ၏။ 4ထာဝရဘုရားသည်လည်း ပြင်းစွာသောလေကို ပင်လယ်ပေါ်သို့ စေလွှတ်တော်မူသဖြင့်၊ ပင်လယ်၌ ကြီးစွာသော မိုးသက်မုန်တိုင်းဖြစ်၍၊ သင်္ဘောသည် ပျက်လုသောလက္ခဏာရှိ၏။ 5ထိုအခါ သင်္ဘောသားတို့သည် ကြောက်ရွံ့၍ အသီးအသီး မိမိတို့ဘုရားကို အော်ဟစ်ကြ၏။ သင်္ဘောပေါ့စေခြင်းငှာ ဝန်များကိုလည်း ပင်လယ်ထဲသို့ ပစ်ချကြ၏။ ယောနမူကား၊ သင်္ဘောဝမ်းထဲသို့ ဆင်း၍ အိပ်ပျော်လျက်နေ၏။ 6သင်္ဘောသူကြီးသည် လာ၍၊ အို အိပ်ပျော်သောသူ၊ အဘယ်သို့နည်း။ ထလော့။ သင်၏ဘုရားကို ဆုတောင်းလော့။ ငါတို့အသက်လွတ်စေခြင်းငှာ ထိုဘုရားသည် ငါတို့ကို အောက်မေ့ကောင်း အောက်မေ့လိမ့်မည်ဟု ဆို၏။ 7နောက်တစ်ဖန် သူတို့က၊ လာကြ။ အဘယ်သူ၏အပြစ်ကြောင့် ဤအမှုရောက်သည်ကို ငါတို့သိရမည်အကြောင်း စာရေးတံချကြကုန်အံ့ဟု တိုင်ပင်၍၊ စာရေးတံချလျှင် ယောန၌ စာရေးတံကျ၏။ 8တစ်ဖန် သူတို့က၊ အဘယ်အပြစ်ကြောင့် ဤအမှုရောက်သည်ကို ပြောပါလော့။ သင်ဆောင်ရွက်သောအမှုကား၊ အဘယ်အမှုနည်း။ သင်သည် အဘယ်အရပ်က လာသနည်း။ အဘယ်ပြည်၊ အဘယ်အမျိုးသား ဖြစ်သနည်းဟု မေးမြန်းကြသော်၊ 9ငါသည် ဟေဗြဲအမျိုးသားဖြစ်၏။ ရေမြေကို ဖန်ဆင်းတော်မူသော ကောင်းကင်ဘုံ၏အရှင် ဘုရားသခင် ထာဝရဘုရားကို ကိုးကွယ်သောသူဖြစ်၏ဟုဆိုလျှင်၊ 10ထိုသူတို့သည် အလွန်ကြောက်ရွံ့၍၊ သင်သည် အဘယ်ကြောင့် ဤသို့ပြုသနည်းဟု မေးကြ၏။ ယောနသည် ထာဝရဘုရားထံတော်မှ မိမိပြေးကြောင်းကို ဖော်ပြသောကြောင့် သူတို့သိကြ၏။

11ထိုအခါ ပင်လယ်၌ လှိုင်းတံပိုးသည် တိုး၍ထသောကြောင့် သူတို့က၊ ငါတို့၌ လှိုင်းတံပိုးငြိမ်းစေခြင်းငှာ သင့်ကို အဘယ်သို့ပြုရပါမည်နည်းဟုမေးကြသော်၊ 12ငါ့ကိုချီ၍ ပင်လယ်ထဲသို့ ချပစ်ကြလော့။ သို့ပြုလျှင်၊ လှိုင်းတံပိုးသည် သင်တို့၌ ငြိမ်းလိမ့်မည်။ ဤပြင်းစွာသော မိုးသက်မုန်တိုင်းသည် ငါ့ကြောင့်သာ သင်တို့အပေါ်သို့ ရောက်သည်ကို ငါသိ၏ဟု ပြန်ပြောသော်လည်း၊ 13သင်္ဘောသားတို့သည် ကမ်းသို့ရောက်အံ့သောငှာ ပင်ပန်းစွာ တက်ခတ်ကြ၏။ သို့ရာတွင်၊ သူတို့တစ်ဖက်၌ လှိုင်းတံပိုးတိုး၍ ထသောကြောင့်၊ သူတို့သည် မတတ်နိုင်သောအခါ၊ 14အို ထာဝရဘုရား၊ အကျွန်ုပ်တို့သည် တောင်းပန်ပါ၏။ ဤသူ၏အသက်ကြောင့် အကျွန်ုပ်တို့သည် အကျိုးနည်းမဖြစ်ပါစေနှင့်။ အပြစ်မရှိသောသူ၏အသက် သတ်သောအပြစ်ကို အကျွန်ုပ်တို့၌ တင်တော်မမူပါနှင့်။ အို ထာဝရဘုရား၊ ကိုယ်တော်သည် အလိုရှိတော်မူသည်အတိုင်း ပြုတော်မူ၏ဟု ထာဝရဘုရားအား ကြွေးကြော်တောင်းပန်ပြီးမှ၊ 15ယောနကိုချီ၍ ပင်လယ်ထဲသို့ ချပစ်ကြ၏။ ထိုအခါ ပင်လယ်လှိုင်းတံပိုးသည် ငြိမ်းလေ၏။ 16သင်္ဘောသားတို့သည်လည်း ထာဝရဘုရားကို အလွန်ကြောက်ရွံ့သဖြင့် ယဇ်ပူဇော်၍ သစ္စာကတိထားကြ၏။

17ယောနကို မျိုစေခြင်းငှာ ငါးကြီးကို ထာဝရဘုရားခန့်ထားတော်မူသည်နှင့်အညီ၊ ယောနသည် ငါး၏ဝမ်းထဲမှာ သုံးရက်ပတ်လုံး နေရ၏။

ယောန၀တ္ထု - ၁ (အနက်ဖွင့်)

၁။ ပရောဖက်ယောန၏မနာခံမှု (အခန်း၁)

(က) အမှုတော်အတွက်ယောနအားခေါ်ယူခြင်း(၁:၁–၂)

ဣသရေလတို့၏မဟာရန်သူ အာရှုရိမြို့တော် နိနေဝေသို့ အမှုတော်ပြုရန်ဘုရားရှင်က ယောနစေခိုင်းသည်။ ထိုအရပ်ဒေသသို့ယောန မသွားချင်။ နိုင်ငံရေးအခြေအနေအရ မသွားရဲ။ ကြောက်လန့်နေသည်။ (နောက်ခံသမိုင်းကြောင်းကို အထက်တွင် ကြည့်ပါ။)

(ခ) ယောနတာရှုသို့ထွက်ပြေးခြင်း(၁:၃)

နိနေဝေသို့ မသွားလိုသောကြောင့် ယောနသည် သင်္ဘောဖြင့် တာရှုသို့ထွက်ပြေးတိမ်းရှောင်သည်။ (စပိန်တောင်ပိုင်းဖြစ်ဟန်ရှိသည်) ယောန၏မနာခံ အာခံခြင်းအကြောင်းကို H.C.. Woodring ကဤသို့ဖော်ပြထားသည်။

ဘုရားသခင်က ယောနအား ပါလက်စတိုင်းအရှေ့မြောက်ဘက်ရှိ မိုင်ပေါင်း ငါးရာခန့်ဝေးသော နိနေဝေမြို့သို့သွားခိုင်းသည်။ အရှေ့ဘက်မိုင်ငါးရာခရီးအစား အနောက်ဘက် မိုင်နှစ်ထောင်ခရီးကို ရွေးချယ်သည်။ ဘုရားသခင်က ယောနအားကုန်းပေါ်မှာ လှမ်းသွားစေချင်သည်။ ယောနကရေလမ်းခရီးဖြင့် သွားသည်။(ယုဒတို့သည် ပင်လယ်ခရီးသွားလိုသူများမဟုတ်)။ ထိုခေတ်ကာလအကြီ:ကျယ်ဆုံးမြို့တော်သို့ ဘုရားစေလွှတ်သည်။ ယောနက နိမ့်ကျသော ပျံကျစျေးမြို့သို သွားသည်။ ဘုရားသခင်က ပရောဖက်ပြုစေလိုသည်။ ယောနကမူဘုရားသခင်ထံမှဝေးရာ ထွက်ပြေးဖို့ ကြိုးပမ်းသည်။၁

(ဂ) ပင်လယ်ထဲကလေမုန်တိုင်း(၁:၄–၁၀)

ဘုရားသခင်က ပြင်းစွာသော လေမုန်တိုင်းကို ပင်လယ်သို့စေလွှတ်တော်မူသဖြင့် ပင်လယ်၌ မိုးသက်မုန်တိုင်းဖြစ်ကာ ယောနစီးသော သင်္ဘောသည်ပျက်လုခမန်းဖြစ်သွားသည်။ သင်္ဘောသားများထိတ်လန့်စွာဘုရားတကြသည်။ သင်္ဘောဝန်ပေါ့စေရန် ဝန်စည်စလယ်များကိုရေထဲ ပစ်ချကြသည်။ ထိုမုန်တိုင်းကိုဖြစ်စေသည့်တရားခံမှာ ဟေဗြဲလူမျိုး ယောနသည်ဖြစ်သည်။ ဘုရားသခင်ထံတော်မှ ထွက်‌ပြေးသောအမှု ကျူးလွန်၍ဖြစ်သည်။

(ဃ) ယောနကိုရေထဲသို့ပစ်ချခြင်းနှင့် ငါးကြီ:ကမျိုချခြင်း(၁:၁၁–၁၇)

၁:၁၁–၁၆ “ငါတို့၌ လှိုင်းတံပိုးငြိမ်စေခြင်းငှါ၊ သင့်ကို အဘယ်သို့ပြုရပါမည်နည်း”ဟု မေးကြသည်။ လူတစ်ဦးတစ်ယောက်၏ အသက်ဝိညာဉ်ကို တန်ဖိုးထား၍ ဤနေရာတွင် တွေ့နိုင်သည်။ ရုပ်တုဆင်းတု ကိုးကွယ်သော အငံဓါတ် ပျောက်သည့်လူများအတွက် မှန်ကန်သောလုပ်ရပ်ဖြစ်ကောင်းဖြစ်နိုင်သည်။ ယောနက သူ့အားပင်လယ်သို့ချပစ်ဖို့ အကြံပေးသည်။ ချက်ချင်းမလုပ်ရက်။ ကမ်းကပ်ရန် လည်းမဖြစ်နိုင်။ ထို့ကြောင့်ယောနအကြံပေးသည့်အတိုင်း ပင်လယ်ထဲသို့ချပစ်ကြသည်။ ထိုအခါပင်လယ်လှိုင်းတံပိုးသည် ငြိမ်လေသည်။

၁:၁၇ ယောနအားမျိုချရန် ဘုရားသခင်ကငါးကြီ:ကြိုတင် ပြင်ဆင်ထားသည်နှင့်အညီ ပင်လယ်ထဲသို့ကျလာသော ယောနအားငါးကြီးက ပါးစပ်ဟမြိုချလိုက်သည်။ယောနသည် ငါးကြီးဝမ်းဗိုက်ထဲတွင် (၃)ရက် လုံးလုံးနေရသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။