Jeremiah -6 -

ယေရမိအနာဂတ္တိကျမ်း - ၆

ယေရုရှလင်မြို့ကိုဆုံးမခြင်း

1အို ဗင်္ယာမိန်အမျိုးသားတို့၊ ယေရုရှလင်မြို့ထဲကထွက်၍၊ လွတ်အောင်ပြေးကြလော့။ တေကောရွာ၌ တံပိုးမှုတ်ကြလော့။ ဗေသက္ကရင်ရွာ၌ မီးရှူးကို မြှောက်၍ ပြကြလော့။ အကြောင်းမူကား၊ ဘေးဥပဒ်တည်းဟူသော ကြီးစွာသောပျက်စီးခြင်း အကြောင်းအရာသည် မြောက်မျက်နှာက ပေါ်လာ၏။ 2အဆင်းလှ၍ နူးညံ့သိမ်မွေ့သောသူတည်းဟူသော ဇိအုန်သတို့သမီးကို ငါဖျက်ဆီးမည်။ 3သိုးထိန်းတို့သည် သိုးစုများပါလျက် သူ့ထံသို့လာ၍၊ သူ့တစ်ဖက်ပတ်လည်၌ တဲဆောက်၍၊ အသီးအသီး မိမိတို့နေရာမှာ ကျက်စားကြလိမ့်မည်။ 4သူ့ကို စစ်တိုက်ခြင်းငှာပြင်ကြလော့။ ထကြ။ မွန်းတည့်အချိန်၌ တက်သွားကြကုန်အံ့။ ငါတို့၌ခက်လှ၏။ မွန်းလွဲပြီ။ မိုးချုပ်လေပြီ။ 5ထကြ။ ညအခါတက်သွား၍၊ သူ၏ဘုံဗိမာန်တို့ကို ဖျက်ဆီးကြကုန်အံ့ဟု ဆိုကြလိမ့်မည်။ 6ကောင်းကင်ဗိုလ်ခြေအရှင် ထာဝရဘုရားမိန့်တော်မူသည်ကား၊ သစ်ပင်တို့ကို ခုတ်လှဲကြလော့။ ယေရုရှလင်မြို့တစ်ဖက်၌ မြေရိုးကိုဖို့ကြလော့။ ဤမြို့သည် ဆုံးမစရာကောင်းသောမြို့ ဖြစ်၏။ မြို့ထဲ၌ ညှဉ်းဆဲခြင်းသက်သက် ရှိ၏။ 7စမ်းရေပေါက်ဝမှ ရေသည် စီးထွက်သကဲ့သို့၊ ထိုမြို့သည် ဒုစရိုက်ကို ထွက်စေတတ်၏။ မြို့ထဲ၌ လုယူဖျက်ဆီးခြင်းအသံကို ကြားရ၏။ အနာများနှင့် ဒဏ်ချက်ရာများကို အစဉ်ငါမြင်ရ၏။ 8အို ယေရုရှလင်မြို့၊ ဆုံးမခြင်းကိုခံလော့။ သို့မဟုတ်၊ သင့်ကိုငါရွံရှာမည်။ သင့်ကိုပယ်ရှင်း၍ လူဆိတ်ညံရာအရပ် ဖြစ်စေမည်။

ပုန်ကန်သည့်ဣသရေလ

9ကောင်းကင်ဗိုလ်ခြေအရှင်ထာဝရဘုရား မိန့်တော်မူသည်ကား၊ စပျစ်နွယ်ပင်၌ အကျန်အကြွင်းကို လိုက်၍ ဆွတ်သကဲ့သို့၊ ထိုသူတို့သည် ဣသရေလ၌ ကျန်ကြွင်းသောအရာကိုလိုက်၍ အကုန်အစင်ဆွတ်ကြလိမ့်မည်။ စပျစ်သီးဆွတ်သော သူကဲ့သို့၊ သင်၏လက်ကို ခြင်းတောင်းထဲသို့ တစ်ဖန်သွင်းဦးလော့။ 10သူတို့သည် နားထောင်မည်အကြောင်း၊ အဘယ်သူကို ငါပြော၍ သတိပေးရမည်နည်း။ သူတို့နားသည် အရေဖျားလှီးခြင်းမခံသော နားဖြစ်၍၊ သူတို့သည် နားမထောင်နိုင်ကြ။ ထာဝရဘုရား၏နှုတ်ကပတ်တော်သည် သူတို့ကဲ့ရဲ့စရာဖြစ်၏။ ထိုနှုတ်ကပတ်တော်ကို မနှစ်သက်ကြ။ 11ထိုကြောင့်၊ ငါသည် ထာဝရဘုရား၏အမျက်တော်နှင့် ပြည့်ဝ၏။ အောင့်၍ မနေနိုင်။ လမ်း၌ရှိသော သူငယ်များနှင့် စုဝေးသော လူပျိုများအပေါ်သို့ အမျက်တော်ကို ငါသွန်းလောင်းမည်။ လင်မယားအစုံကိုလည်းကောင်း၊ အသက်ကြီးသောသူနှင့် အိုလွန်းသောသူကိုလည်းကောင်း သိမ်းသွားမည်။ 12သူတို့အိမ်နှင့်တကွ လယ်ယာ၊ မိန်းမတို့သည် သူတစ်ပါးလက်သို့ ရောက်ကြလိမ့်မည်။ အကြောင်းမူကား၊ ပြည်သူပြည်သားတို့ကို ငါဒဏ်ခတ်မည်ဟု ထာဝရဘုရား မိန့်တော်မူ၏။ 13အငယ်ဆုံးသောသူမှစ၍ အကြီးဆုံးသောသူအပေါင်းတို့သည် မတရားသော စီးပွားကိုရှာကြ၏။ ပရောဖက်မှစ၍ ယဇ်ပုရောဟိတ် ရှိသမျှတို့သည် မုသားကိုသုံးကြ၏။ 14ချမ်းသာမရှိသောအခါ ချမ်းသာ၊ ချမ်းသာဟု ပြောဆိုလျက်၊ ငါ၏လူမျိုးသတို့သမီးအနာကို ပေါ့လျော့စွာ ကုကြ၏။ 15သူတို့သည် ရွံရှာဖွယ်သော အမှုကိုပြုပြီးမှ ရှက်ကြသလော။ အလျှင်းမရှက်ကြ။ မျက်နှာ မပျက်ကြ။ ထိုကြောင့်၊ တစ်ယောက်နောက်တစ်ယောက် လဲကြလိမ့်မည်။ ငါစစ်ကြောသောအခါ နှိမ့်ချခြင်းသို့ ရောက်ကြလိမ့်မည်ဟု ထာဝရဘုရား မိန့်တော်မူ၏။

ဘုရားသခင်၏တရားကိုငြင်းပယ်ခြင်း

16ထာဝရဘုရား မိန့်တော်မူသည်ကား၊ လမ်းနားမှာရပ်၍ ကြည့်ရှုကြလော့။ ရှေးလမ်းဟောင်းတို့ကို ရှာဖွေလျက်၊ ကောင်းသောလမ်းသည် အဘယ်မှာရှိသနည်းဟု မေးမြန်း၍၊ ထိုလမ်းသို့လိုက်ကြလော့။ သို့ပြုလျှင်၊ စိတ်နှလုံးသက်သာကြလိမ့်မည်။ သို့ရာတွင်၊ ငါတို့သည် မလိုက်ဟု ပြန်ပြောကြ၏။ 17ငါကလည်း၊ တံပိုးမှုတ်သံကိုနားထောင်ကြလော့ဟု ဆိုလျက်၊ သင်တို့အပေါ်၌ ကင်းစောင့်တို့ကို ခန့်ထားသောအခါ၊ ငါတို့သည် နားမထောင်ဟု ပြန်ပြောကြ၏။ 18သို့ဖြစ်၍၊ အို တစ်ပါးအမျိုးသားတို့၊ နားထောင်ကြလော့။ တစ်ပါးအမျိုးသားတို့တွင် ရှိနေသောပရိသတ်တို့၊ သိမှတ်ကြလော့။ 19အို မြေကြီးသားတို့၊ နားထောင်ကြလော့။ ဤလူမျိုးသည် ငါ့စကားကို နားမထောင်၊ ငါ့တရားကိုလည်းငြင်းပယ်သောကြောင့်၊ သူတို့အလိုအလျောက် ကြံစည်ခြင်းအကျိုးအပြစ်တည်းဟူသော၊ ကြီးစွာသော ဘေးဥပဒ်ကို၊ သူတို့အပေါ်သို့ ငါသက်ရောက်စေမည်။ 20ရှေဘပြည်မှ လောဗန်ကိုလည်းကောင်း၊ ဝေးသောပြည်မှ မွှေးသောကြံကိုလည်းကောင်း၊ အဘယ်ကြောင့် ငါ့ထံသို့ဆောင်ခဲ့သနည်း။ သင်တို့မီးရှို့ရာယဇ်တို့ကို ငါအလိုမရှိ။ ပူဇော်သောယဇ်အမျိုးမျိုးကို ငါမနှစ်သက်။ 21ထိုအကြောင်းကြောင့် ထာဝရဘုရားမိန့်တော်မူသည်ကား၊ ထိမိ၍ လဲစရာတို့ကို ဤလူမျိုးရှေ့မှာ ငါထားမည်။ အဘနှင့် သားတို့သည် ထိမိ၍ လဲကြလိမ့်မည်။ အိမ်နီးချင်းနှင့် အဆွေခင်ပွန်းတို့သည် အတူပျက်စီးကြလိမ့်မည်။

မြောက်မျက်နှာမှပေါ်လာမည်

22ထာဝရဘုရား မိန့်တော်မူသည်ကား၊ လူမျိုးတစ်မျိုးသည် မြောက်မျက်နှာမှ ပေါ်လာလိမ့်မည်။ ကြီးစွာသောလူမျိုးကို မြေကြီးစွန်းမှ ငါနှိုးဆော်မည်။ 23လေးနှင့်လှံတို့ကို လက်စွဲကြ၏။ ကြမ်းကြုတ်သောအမျိုးဖြစ်၍၊ သနားခြင်းကရုဏာ မရှိ။ သူတို့စကားသံသည် သမုဒ္ဒရာမြည်သံကဲ့သို့ ဟုန်းတတ်၏။ အို ဇိအုန်သတို့သမီး၊ စစ်သူရဲကဲ့သို့ တပ်ခင်းကျင်းလျက် မြင်းစီး၍၊ သင်ရှိရာသို့ ချီလာကြလိမ့်မည်။ 24ထိုသတင်းကို ငါတို့သည်ကြား၍ လက်အားလျော့ကြ၏။ ဒုက္ခဆင်းရဲကိုလည်းကောင်း၊ သားဖွားသောမိန်းမခံရသကဲ့သို့ ပြင်းစွာသော ဝေဒနာကိုလည်းကောင်း ခံရကြ၏။ 25တောသို့ မထွက်ကြနှင့်။ လမ်းမှာမသွားကြနှင့်။ ရန်သူ၌ ဓားပါ၏။ အရပ်ရပ်၌ ဘေးရှိ၏။ 26အို ငါ၏လူမျိုးသတို့သမီး၊ လျှော်တေအဝတ်ကို ဝတ်စည်း၍ ပြာ၌လူးလည်းလော့။ တစ်ယောက်တည်းသောသားသေသည်ကို ငိုကြွေးသကဲ့သို့၊ ငိုကြွေး၍ ပြင်းစွာမြည်တမ်းလော့။ လုယူဖျက်ဆီးသောသူသည် ငါတို့ကို ချက်ချင်းတိုက်လိမ့်မည်။

27သင်သည် ငါ၏လူမျိုးကျင့်သော အကျင့်ဓလေ့တို့ကို စစ်၍သိမည်အကြောင်း၊ စစ်သောသူအရာ၌ရဲတိုက်ကဲ့သို့ သင့်ကို ငါခန့်ထား၏။ 28ထိုသူအပေါင်းတို့သည် အလွန်ဖောက်ပြန်သောသူ၊ ကုန်းတိုက်တတ်သောသူ ဖြစ်ကြ၏။ ကြေးဝါနှင့် သံသက်သက်၊ ဖျက်တတ်သော အရာသက်သက် ဖြစ်ကြ၏။ 29ဖိုကို မီးလောင်ပြီ။ ခဲလည်းကုန်ပြီ။ စစ်သောသူသည်မှုတ်၍ အကျိုးကိုမရ။ ညံ့သောအရာကို မထုတ်မပယ်နိုင်။ 30ထိုသူတို့ကို ပယ်သောငွေဟူ၍ခေါ်ရမည်။ ထာဝရဘုရားသည် ပယ်တော်မူ၏။

ယေရမိအနာဂတ္တိကျမ်း - ၆ (အနက်ဖွင့်)

(၅) ယေရုရှလင်မြို့ပျက်သုဉ်းမည့်အကြောင်းနိမိတ်ပေးခြင်း (အခန်း ၆)

၆:၁–၈ ဗင်္ယာမိန်အမျိုးအစား ယေရုရှလင်မှ ထွက်ပြေးတိမ်းရှောင် ကြဖို့ သတိပေးတံပိုးမှုတ်သံနှင့် မီးလန့်သံချောင်းခေါက်သံကြမည်။ အဘယ်ကြောင့်ဆိုသော် ဗာဗုလုန်သိုးထိန်းများနှင့် သိုးအုပ်များ စစ်သူကြီးများနှင့် စစ်သားများ) စစ်ပြင်ဆင်နေကြပြီ။ ခါဒလဲသားများသည် စစ်ရေးစစ်ရာနည်းဗျူးဟာ ကြွယ်ဝသူများ ဖြစ်သည်။ သို့ကြောင့် ယုဒလူများသည် ညဉ်းပန်းနှိပ်စက်ခြင်း၊ ဖိနှိပ်ချူပ်ချယ်ခြင်း၊ တိုက်ခိုက်လုယက်ခြင်း ခံစားကြပြီး၊ တိုင်းတပါးပြည်သို့ ကျွန်ပြုခံကြရမည်။ သို့သော်လည်း ဘဝပျောင်းခြင်းသို့ မရောက်ရဘုရားရှင်က နောက်ဆုံးအချိန်နာရီ ပြင်ဆင်ပေးထားပါသည်။

၆:၉–၁၅ အကြွင်းအကျန် စပျစ်သီးနှံများ ကောက်သင်းကောက်ရသကဲ့သို့ နယ်မြေတခွင်လုံးတွင် ဗာဗုလုန်သားများ လိုက်ကောက်ကြမည်ဟု ထာဝရဘုရားသခင်က သတိပေးထားသည်။ ယုဒလူမျိုးကို မည်သူကမှ သနားညှာတာမည်မဟုတ်။ စကားထဲထည့်ပြောကြမည်မဟုတ်။ သို့သော် လည်း ယေရမိကမူ ပစ်ပယ်မထားနိုင်။ ယုဒလူမျိုး၏ လောဘတပ်မက်မှု၊ မိစ္ဆာပရောဖက်များနှင့် ယုဇ်ပရောဟိတ်၏ အရှက်အကြောက်မရှိလုပ်ဆောင်မှုများကို ဘုရားသခင်က ယေရမိအားသတိ ပေးခိုင်းသည်။ မိစ္ဆာပရောဖက်များ၏ ပရောဖက်ပြု ချက်များသည် လူမျိုးရေးအကျင့်လက္ခဏာဖျက်ဆီးပပျောက်စေသည်။ ထိုပရောဖက် မှားများ၏ ဟောပြောချက်ကို ဝိညာဉ်ရေးရာကြွယ်ဝခြင်းဟု မှားယွင်း ခံယူခဲ့ကြပြီ။

၆:၁၆–၂၁ ဘုရားသခင်၏ လူများသည် ဘုရားသခင်ပြသ သောဖြောင့်မတ်ခြင်း ရှေးဟောင်းကို စွန့်လွှတ်ကြသည်။ သတိ ပေးချက်များကိုလည်း ဂရုမစိုက်ကြ။ ကပ်ဆိုးရောဂါကျရောက် သော်လည်း ရောဂါဟုမထင်။ မွှေးကြိုင်သော ပူဇော်ရနံ့သာ ဟု ထင်ကြ သည် ။ ပျက်စီးခြင်းတွင်းနက်နေကြသည်။

၆:၂၂–၂၆ သို့ကြောင့် မြောက်ဘက်နိုင်ငံ နယ်ချဲ့ကျူးကျော်သူများ အလုံးအရင်းဖြင့် ဝင်ရောက်လာကြသည်။ ထိုသူများ၏ လက်ချက် ကြောင့် ကြောက်ရွံ့ထိတ်လန့်ခြင်း။ ပူဆွေးဝမ်းနည်းခြင်း ကြုံတွေ့၍ မျက်ရည်ပေါက်ကြီးငယ်ကျကြသည်။

၆:၂၇–၃၀ ဘုရားသခင်က ယေရမိ အား သတ္တုအရည်အသွေးစစ် ဆေးသူအဖြစ် ခန့်အပ်သည်။ ယုဒလူမျိုး၏ ခေါင်းမာမှုကို ကြေးဝါခဲနှင့် သတ္တုအဖြစ် ပုံနှိုင်း၍ ပန်းဘဲဖိုတွင် စစ်ဆေးခိုင်းသည်။ မည်ကဲ့သို့ပင် သတ္တုချသော်လည်း အရည်အသွေ:တောက်ပြောင်ခြင်းမရှိလာသဖြင့် စွန့်ပစ်ငွေသားအဖြစ် ဖယ်ရှားရမည်။

လူများ၏ အပြစ်ဒုစရိုက်များပြားပုံ ၊ အပျင်းထူပုံ စိတ်ပါဝင်စားမ ရှိပုံတို့သည် သန့်ရှင်းသောဘုရားသခင်၏ အလိုတော်နှင့် လုံးဝခြား နားပုံကို တစ်နေ့တွေ့မြင်ရသည်။ ထိုအကျင့် လက္ခဏာများသည် ရည်ရွယ်ချက်ဦးတည်ရာမဲ့သော အချည်းနှီးဘဝဖြစ်သည်။ ထိုသို့တွေး မြင်နိုင်မှသာလျှင် ဘုရားမှန်ကိုလည်း ဖူးမြင်နိုင်ကြမည်။ အပယ်ခံ ၊စွန့်ပစ်ငွေသားကဲ့သို့ မဖြစ်စေချင်အပယ်ခံပစ္စည်းသည် အချည်းနှီး ဘဝကိုသိမြင်ခံယူသူအား ဘုရားသခင်က တန်ဖိုးထားချစ်ခင် မြတ်နိုးသည်။၆

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။