Jeremiah -41 -

ယေရမိအနာဂတ္တိကျမ်း - ၄၁

1သတ္တမလတွင် ဆွေတော်မျိုးတော်ဖြစ်သော မင်းသား ဧလိရှမာသား နာသနိ၏သားဣရှမေလသည်၊ လူတစ်ကျိပ်နှင့်တကွ၊ အဟိကံသား ဂေဒလိရှိရာ မိဇပါမြို့သို့လာ၍၊ ထိုမြို့၌ တစ်စုတည်းစားသောက်ကြ၏။ 2ထိုအခါ နာသနိသား ဣရှမေလနှင့် ထိုလူတစ်ကျိပ်တို့သည်ထ၍၊ ဗာဗုလုန်ရှင်ဘုရင်အခွင့်နှင့် ပြည်အုပ်လုပ်သော ရှာဖန်၏သားဖြစ်သော အဟိကံ၏သားဂေဒလိကို ဓားနှင့်ခုတ်၍သတ်ကြ၏။ 3ဣရှမေလသည်လည်း၊ မိဇပါမြို့တွင် ဂေဒလိထံ၌ရှိသော ယုဒလူအပေါင်းတို့ကိုလည်းကောင်း၊ တွေ့သမျှသော ခါလဒဲစစ်သူရဲ တို့ကိုလည်းကောင်း သတ်လေ၏။ 4ဂေဒလိကိုသတ်၍၊ နှစ်ရက်လွန်သော်လည်း၊ ထိုအမှုကို အဘယ်သူမျှမသိသေးသဖြင့်၊ 5ရှေခင်မြို့၊ ရှိလောမြို့၊ ရှမာရိမြို့မှ ထွက်လာသော လူရှစ်ကျိပ်တို့သည် မိမိတို့မုတ်ဆိတ်ကို ရိတ်ပြီးလျှင်၊ အဝတ်စုတ်ကိုဝတ်၍ ရှနသောကိုယ်ရှိလျက်၊ ပူဇောသကာနှင့် နံ့သာပေါင်းကို ဗိမာန်တော်သို့ဆောင်ခဲ့လျက် ရောက်လာကြ၏။ 6ထိုသူတို့ကို ကြိုဆိုအံ့သောငှာ၊ နာသနိသား ဣရှမေလသည် ငိုကြွေးလျက်၊ မိဇပါမြို့မှထွက်၍ တွေ့သောအခါ၊ အဟိကံသားဂေဒလိထံသို့ လာကြလော့ဟု ခေါ်လေ၏။ 7မြို့ထဲသို့ရောက်ပြီးလျှင်၊ နာသနိသားဣရှမေလနှင့် သူ၏လူများတို့သည် ထိုသူတို့ကိုသတ်၍၊ မြေတွင်းထဲသို့ ပစ်ချကြ၏။ 8ထိုသူတို့တွင်ပါသော လူတစ်ကျိပ်တို့က၊ အကျွန်ုပ်တို့ကို မသတ်ပါနှင့်။ အကျွန်ုပ်တို့သိုထားသော ဥစ္စာတည်းဟူသော ဂျုံ၊ မုယော၊ ဆီ၊ ပျားရည်သည် တော၌ရှိပါ၏ဟု၊ ဣရှမေလအားပြောဆိုသောကြောင့်၊ ထိုသူတို့ကို သူတို့ ညီအစ်ကိုများနှင့်အတူ မသတ်ဘဲနေ၏။ 9ဣရှမေလသည် ဂေဒလိနှင့်အတူ သတ်သောသူ အသေကောင်များကို ပစ်ချသောတွင်းသည် အခြားတွင်းမဟုတ်၊ အာသမင်းကြီးသည် ဣသရေလရှင်ဘုရင်ဗာရှာကို ကြောက်၍တူးသောတွင်း ဖြစ်သတည်း။ ထိုတွင်းကို နာသနိသား ဣရှမေလသည် အသေကောင်များနှင့် ပြည့်စေ၏။ 10ထိုအခါ အဟိကံသား ဂေဒလိ၌ ကိုယ်ရံတော်မှူး နေဗုဇာရဒန်အပ်သော မင်းသမီးများအစရှိသော၊ မိဇပါမြို့၌ ကျန်ကြွင်းသမျှသော သူတို့ကို နာသနိသား ဣရှမေလသည်သိမ်းယူ၍၊ အမ္မုန်အမျိုးသားတို့ထံသို့ ထွက်သွားလေ၏။

11ထိုသို့ နာသနိသား ဣရှမေလပြုသော အမှုဆိုးအလုံးစုံတို့ကို၊ ကာရာသားယောဟနန်နှင့် သူ့ထံ၌ရှိသမျှသော တပ်မှူးတို့သည်ကြားလျှင်၊ 12လူအပေါင်းတို့ကိုခေါ်၍၊ နာသနိသား ဣရှမေလကိုတိုက်ခြင်းငှာ ထွက်သွားသဖြင့်၊ ဂိဗောင်ကန်နားမှာ တွေ့လေ၏။ 13ဣရှမေလ၌ပါသောသူ အပေါင်းတို့သည် ကာရာသားယောဟနန်နှင့် သူ၌ပါသော တပ်မှူးအပေါင်းတို့ကို မြင်သောအခါ၊ ဝမ်းမြောက်ခြင်းသို့ရောက်ကြ၏။ 14ထိုအခါ မိဇပါမြို့မှ ဣရှမေလသိမ်းသွားသော လူအပေါင်းတို့သည် သူ့ထံမှထွက်၍၊ ကာရာသား ယောဟနန်ထံသို့ ကူးသွားကြ၏။ 15နာသနိသား ဣရှမေလသည် လူရှစ်ယောက်နှင့် တကွ၊ ယောဟနန်လက်မှ လွတ်ပြေး၍၊ အမ္မုန်အမျိုးသားတို့ထံသို့ သွားလေ၏။ 16ထိုသို့ အဟိကံသား ဂေဒလိကိုသတ်ပြီးသည်နောက်၊ ကာရာသားယောဟနန်နှင့် သူ့ထံ၌ရှိသော တပ်မှူးအပေါင်းတို့သည် နာသနိသားဣရှမေလလက်မှလည်းကောင်း၊ မိဇပါမြို့မှလည်းကောင်းနုတ်၍ ကျန်ကြွင်းသော သူတည်းဟူသော၊ အားကြီးသော စစ်သူရဲများ၊ မိန်းမများ၊ သူငယ်များ၊ မိန်းမစိုးများအပေါင်းတို့ကို ဂိဗောင်မြို့မှဆောင်ခဲ့ပြန်၍၊ 17ခါလဒဲလူတို့ကြောင့် အဲဂုတ္တုပြည်သို့ ပြောင်းမည်အကြံရှိလျက်၊ ဗက်လင်မြို့နှင့်နီးသော ခိမဟံရွာသို့ သွား၍နေကြ၏။ 18အကြောင်းမူကား၊ ပြည်အုပ်အရာ၌ ဗာဗုလုန်ရှင်ဘုရင်ခန့်ထားသော အဟိကံသားဂေဒလိကို နာသနိသားဣရှမေလ သတ်သောကြောင့်၊ ခါလဒဲလူတို့ကိုကြောက်ကြ၏။

ယေရမိအနာဂတ္တိကျမ်း - ၄၁ (အနက်ဖွင့်)

(၂)ဂေဒလိမမင်းလုပ်ကြံသတ်ဖြတ်ခံရခြင်း(အခန်း၄၁)

၄၁:၁-၉ နန်းမျိုးနန်းနွယ် ဣရှမေလနှင့် အပါးတော်မြဲတတစ်ကျိပ်တို့သည် မိဇပါမြို့သို့လာ၍ စားသောက်ပျော်ပါးကြသည်။ ဣရှမေလသည် ဗာဗုလုန်သားများနှင့် ဆက်ဆံရေးအဆင်ပြေသူများ၊ ဗာဗုလုန်အုပ်ချုပ်မှု လိုလားသူ၊ နန်းမျိုးနန်းနွယ် ဖြစ်သောကြောင့် ထိုသို့ လွပ်လပ်စွာ လှုပ်ရှားသွားလာခွင့် ရှိဟန်တူသည်။ ဣရှမေလသည် စိတ်ကောင်းစေတနာ ရှိဟန်ဆောင်လျက် ဗိမာန်တော်ထဲသို့ ဝင်ရောက်ပြီး၊ ဝတ်ပြုကိုးကွယ်ရန် ရောက်လာကြသော ရှေခင်အရပ်သူ အရပ်သားလူ (၇၀)ကို သတ်ဖြတ်သည်။ အလောင်းများကို ကျင်းတစ်ခုထဲသို့ ပစ်ချလိုက်သည်။ တွေ့သမျှလူကို တွေ့ရာသင်္ချိုင်းဓားမဆိုင်း ခုတ်ပိုင်းလိုက်သည်။ လူဆယ်ယောက်ကမူ ယူဆောင်လာသော စားနပ်ရိက္ခာများ ပေးကမ်းကြသောကြောင့် အသက်ချမ်းသာရာ ရကြသည်။

၄၁:၁၀–၁၈ ဘုရင်သမီးတော်များကိုမူ ယောဟနန် စစ်သားများက ဗက်သလင်သို့ ကယ်ထုတ် ခေါ်ဆောင်သွားကြသည်။ ခါလခဲတို့၏ ဘေးရန်ကို စိတ်မချကြသောကြောင့် အဲဂုတ္တုပြည်သို့ ထွက်ပြေးကြရန် စီစဉ်ကြသည်။ ခါလဒဲတို့၏ တန်ပြန်တိုက်စစ်ကြောင့် ဣသမေလနှင့် အပေါင်းပါ (၈)ယောက်တို့သည် အမ္မုန်အရပ်သို့ ထွက်ပြေးသွားကြသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။