Isaiah -58 -

ဟေရှာယအနာဂတ္တိကျမ်း - ၅၈

မှန်ကန်သောအစာရှောင်ခြင်း

1အသံမလျော့ဘဲ ကြွေးကြော်လော့။ တံပိုးသံကဲ့သို့ အသံကိုလွှင့်၍၊ ယာကုပ်အမျိုးသားဖြစ်သော ငါ၏လူတို့အား၊ သူတို့ဒုစရိုက်အပြစ်ကို ဖော်ပြလော့။ 2သူတို့သည် တရားကျင့်သောအမျိုး၊ မိမိဘုရားသခင်၏ပညတ်တို့ကို မစွန့်သောအမျိုးကဲ့သို့၊ နေ့တိုင်းငါ့ကိုရှာ၍ ငါ၏တရားလမ်း၌ မွေ့လျော်ကြသည်တကား။ ဖြောင့်မတ်စွာ တရားစီရင်ချက်တို့ကို ငါ့ထံမှာအစဉ်မေးမြန်း၍၊ ဘုရားသခင့်ထံသို့ ချဉ်းကပ်ရာ၌ မွေ့လျော်ကြသည်တကား။ 3အကျွန်ုပ်တို့သည် အစာရှောင်ခြင်းအကျင့်ကို ကျင့်သောအခါ၊ ကိုယ်တော်သည် အဘယ်ကြောင့် မြင်တော်မမူသနည်း။ အကျွန်ုပ်တို့သည် ခြိုးခြံစွာကျင့်သောအခါ၊ ကိုယ်တော်သည် အဘယ်ကြောင့် သိမှတ်တော်မမူသနည်းဟု ဆိုသော်၊ သင်တို့သည် အစာရှောင်သောနေ့၌ ကိုယ်တိုင်ပျော်မွေ့၍၊ ကျွန်တို့ကိုပင်ပန်းစွာလုပ်စေကြ၏။ 4သင်တို့သည် ငြင်းခုံရန်တွေ့လျက်၊ အဓမ္မလက်ဆုပ်နှင့် ထိုးလျက် အစာရှောင်ကြ၏။ မြင့်သောအရပ်၌ မိမိတို့အသံကို ကြားစေခြင်းငှာ၊ ယခုကာလအခါ အစာရှောင်ကြသည်မဟုတ်။ 5ငါနှစ်သက်သော အစာရှောင်ခြင်းသည် ထိုသို့သော လက္ခဏာရှိသလော။ လူသည် တစ်ရက်တွင် ခြိုးခြံစွာကျင့်ခြင်း၊ ကိုင်းပင်ကဲ့သို့ ဦးချခြင်း၊ အိပ်ရာဖို့ လျှော်တေနှင့်ပြာကို ခင်းခြင်း၊ လက္ခဏာရှိလျှင်၊ အစာရှောင်ခြင်းဟူ၍လည်းကောင်း၊ ထာဝရဘုရား နှစ်သက်တော်မူသောနေ့ရက် ဟူ၍လည်းကောင်း မှည့်အပ်သလော။ 6ငါနှစ်သက်သော အစာရှောင်ခြင်းဟူမူကား၊ မတရားသော အချည်အနှောင်ကို ချွတ်ခြင်း၊ လေးသောဝန်ကိုချခြင်း၊ ညှဉ်းဆဲခံရသော သူတို့ကို လွှတ်ခြင်း၊ ထမ်းပိုးရှိသမျှကို ချိုးခြင်းမဟုတ်လော။ 7မွတ်သိပ်သောသူကို အစာကျွေးခြင်း၊ နေရာမရှိ၊ ဆင်းရဲသောသူတို့ကို ကိုယ်အိမ်သို့ဆောင်ခြင်း၊ အဝတ်မရှိသောသူကိုမြင်လျှင်၊ အဝတ်ကိုပေးခြင်း၊ ကိုယ်အသားကို မရှောင်ဘဲနေခြင်း မဟုတ်လော။

8သို့ပြုလျှင် သင်၏အလင်းသည် မိုးသောက်သော အလင်းကဲ့သို့ပေါ်ထွန်း၍၊ အလျင်အမြန် ကျန်းမာခြင်းသို့ရောက်လိမ့်မည်။ သင်၏ ဖြောင့်မတ်ခြင်းပါရမီသည် သင့်ရှေ့၌ သွား၍၊ ထာဝရဘုရား၏ဘုန်းတော်သည် နောက်၌ လုံခြုံစေလိမ့်မည်။ 9သို့ပြုလျှင်၊ ထာဝရဘုရားသည်၊ သင်ခေါ်သောအခါ ထူးတော်မူလိမ့်မည်။ အော်ဟစ်သောအခါ၊ ငါရှိသည်ဟု မိန့်တော်မူလိမ့်မည်။ သင်သည် သင်၏အထဲက ထမ်းပိုးကိုလည်းကောင်း၊ လက်ညှိုးထိုးခြင်းကိုလည်းကောင်း၊ ကဲ့ရဲ့သောစကားကိုလည်းကောင်း ပယ်ရှား၍၊ 10မွတ်သိပ်သောသူနှင့် ဆင်းရဲခံရသောသူကို သနားသောစိတ်နှင့် ချမ်းသာပေးလျှင်၊ မရှင်းလင်းသော အရာမှာ သင်၏အလင်းသည် ပေါ်ထွန်း၍၊ သင်၏မှောင်မိုက်သည် မွန်းတည့်အလင်းကဲ့သို့ ဖြစ်လိမ့်မည်။ 11ထာဝရဘုရားသည် သင့်ကိုအစဉ် ပဲ့ပြင်တော်မူမည်။ အစာခေါင်းပါးသည် ကာလ၌ ဝစွာကျွေး၍၊ သင်၏အရိုးတို့ကို ခိုင်ခံ့စေတော်မူမည်။ သင်သည် ရေလောင်းသောဥယျာဉ်ကဲ့သို့လည်းကောင်း၊ ရေမပြတ်နိုင်သော စမ်းရေတွင်းကဲ့သို့လည်းကောင်း ဖြစ်လိမ့်မည်။ 12သင်၏အမျိုးအနွယ်သည် ရှေးပြိုပျက်ရာတို့ကို ပြုပြင်ကြလိမ့်မည်။ ရှေးကာလ၌ တည်ဖူးသော တိုက်မြစ်များအပေါ်မှာ ထပ်ဆင့်၍ တည်ဆောက်ကြလိမ့်မည်။ သင်သည်လည်း၊ ပြိုပျက်သော မြို့ရိုးကို ပြုပြင်သောသူ၊ လူနေရာလမ်းများကို ပြင်ဆင်သောသူဟူ၍ သမုတ်ခြင်းကို ခံရလိမ့်မည်။

ဥပုသ်နေ့ကိုစောင့်ထိန်းခြင်း

13သင်သည် ဥပုသ်နေ့ကို မရှုတ်ချ။ ငါသန့်ရှင်းသောနေ့မှာ ကိုယ်အလိုသို့မလိုက်၊ ဥပုသ်နေ့ကို မွေ့လျော်ရာနေ့၊ ထာဝရဘုရားအဖို့ သန့်ရှင်းသောနေ့၊ ရိုသေဖွယ်သောနေ့ဟူ၍ ခေါ်သဖြင့် ကိုယ်အမှုကိုမပြု၊ ကိုယ်အလိုသို့မလိုက်၊ ကိုယ်စကားကို မပြောဘဲနေ၍ ထိုနေ့ကို ရိုသေလျှင်၊ 14သင်သည် ထာဝရဘုရား၌ ပျော်မွေ့ရလိမ့်မည်။ မြေကြီးပေါ်မှာ မြင့်သောအရပ်တို့ကို ငါစီးစေ၍၊ သင့်အဘယာကုပ်၏ အမွေဥစ္စာနှင့် ငါကျွေးမည်ဟု ထာဝရဘုရား၏နှုတ်တော်ထွက်အမိန့်တော် ရှိ၏။

ဟေရှာယအနာဂတ္တိကျမ်း - ၅၈ (အနက်ဖွင့်)

(ဂ)ဣသရေလ၏ဒုစရိုက်၊အပြစ်စီရင်ခြင်း၊နောင်တနှင့်ပြန်လည်ထူထောင်ခြင်း(အခန်း၅၈–၆၆)

နောက်ဆုံးအခန်းကြီး(၉)ခုတွင်သစ္စာရှိသောယုံကြည်သူများနှင့်မယုံကြည်သူများခြားနားပုံကိုရှင်းပြထားသည်။ Alfred Martinကထိုအကြောင်းကိုဤသို့စာမြည်းပေးထားသည်။ ကျမ်းစာ၏နိဂုံးပိုင်းတွင် ဘုရားသခင်၏အစေခံ၊ ဣသရေလလူများပြန်လည် စုစည်းနလံထူ ကြမည့်အကြောင်း၊ထိုသို့ ဘုရားသခင်ထံပြန်လည်ရောက်ရှိကြခြင်းဖြင့် ယေဟောဝါဘုရား၏ ကောင်းကြီးမင်္ဂလာများကိုကမ္ဘာအနှံ့သို့ စီးဆင်းစေမည့် မင်္ဂလာရေစီးကြောင်းများဖြစ်ကြမည်။ ယုံကြည်သူများနှင့် ပုန်ကန်ခြားနား သူများသည် ဘုရားသခင်၏ နှုတ်ကပတ်တော်များကိုဘယ်သောအခါမှ ကြား ရတော့မည်မဟုတ်။၆၆

၁။ ဝိညာဉ်ပြည့်ဝသူ၏ ပျော်ရွှင်ချမ်းမြေ့ခြင်း(အခန်း၅၈)

၅၈:၁-၅ ယုဒတို့၏ ဘာသာတရားကိုင်းရှိုင်းပုံကို ပရောဖက်ဟေရှာယ ဟားတိုက်ရယ်မောသည်။ လူအပေါင်းသည် နေ့ရက်စဉ်ဆက် ဘာသာရေး ပညတ်တရားကိုလိုက်လုပ်စောင့်ထိန်းခြင်းကိုပျော်ရွှင်မှုအမှန်ဟုထင် မှတ်ကြသည်။ သို့သော် ထိုအပြုအမူများကို ဘုရားသခင်ကမကြိုက်။ ထိုသူများ၏ အစာရှောင်ခြင်း၊ အလှူဒါနပြုခြင်းများကို ဘုရားရှင်က အသိအမှတ်မပြု။ အဘယ်ကြောင့်ဆိုသော် ထိုနေ့ရက်တွင် ကျေးကျွန်အစေ ခံများကို အဆမတန် ပင်ပန်းအောင်ခိုင်းကြသည်။ လူမြင်ကောင်းအောင် ပေးကမ်းလှူဒါန်းကြသော်လည်း တပည့်သားမြေး၊ ပတ်သက်ရာလူများကို ထောက်ပံ့ခြင်းမပြု။ အငတ်ငတ်အပြတ်ပြတ်ထားကြသည်။ ထို့ကြောင့် ထိုကဲ့သို့သောအစာရှောင်ခြင်းသည်အလိုတော်နှင့်ညီသော အစာရှောင်ခြင်းမဟုတ်။ အစာရှောင်ခြင်း ဆိုသည်မှာလူမြင်ကွင်းသာမဟုတ်။၆၇

၅၈:၆-၈ အလိုတော်ရှိသောအစာရှောင်နည်းမှာ မတရားသောအမှု အကျင့်များ ဖယ်ရှားခြင်း၊ လေးသောထမ်းပိုးလျှော့ပေးခြင်း၊ ငတ်မွတ် နေသူများ ကျွေးမွေးခြင်း၊ခိုလှုံရာမရှိသူများ တည်းခိုးရာပေးခြင်း၊ အဝတ် အစားမရှိသူများပေးကမ်းခြင်း၊အိမ်နီးနားခြင်းများ ကူပံ့ခြင်းမျိုး ဖြစ်သည်။ ထိုကဲ့သို့လက်တွေ့လုပ်ဆောင်သူများသည် ဘုရား သခင်၏လမ်းပြခြင်း၊ အနာရောဂါကင်းဝေးခြင်း၊ အကွယ်အကာ လုံခြုံခြင်းရရှိကြသည်။ ”သင်၏ဖြောင့်မတ်ခြင်း” ဆိုသည်မှာ အထက်ကဖေါ်ပြသော ကုသိုလ်ကောင်းမှုများသို့မဟုတ် ဘုရားသခင်က ယုံကြည်သူများ ပို့ပေးထားသော ဖြောင့်မတ်ခြင်း တရားဖြစ်သည်။ အပိုဒ်ငယ် 5-8ကို Scottish Psalter က ဤသို့ ကိုးကားဖေါ်ပြထားသည်။

ဖိစီးမှုဝန်ထုတ်ဖယ်ပေးလို့ ကြင်နာ ယုယအဖေါ်မဲ့၊အိမ်မဲ့ဆင်းရဲသားပေးကမ်းမစထားမိဘမဲ့ငတ်မွတ် သူများသွားရောက်ကောင်းကြီးပေးလော့။ ခိုလှုံရာမဲ့သူများတံခါး ဖွင့်၍ဖိတ်ခေါ်နားခိုစေလော့။ ဝတ်စားမရှိ၊ချမ်းခိုက်တန်သူများနွေးထွေးစေလော့။ စိတ်အားငယ်၊ညှိုးနွမ်းသူများအားပေးနှစ်သိမ့်လော့။ သင်၏ ပျော်ရွင်ချမ်းမြေ့မူ ရက်ရောလာလိမ့်မည်။ ဘဝခရီးတလျှောက် ဘုရားရှင် အလင်းပြလိမ့်မည်။

၅၈း ၉-၁၂ ဘုရားရှင်ကိုယုံကြည်သူ၏ခေါ်သံတိုင်း၊ဘုရားရှင်ထူးသည်။“ငါဒီမှာရှိတယ်”ဟုအမြဲထူးသည်။ ဖိစီးမှုဒဏ်များကိုလက်ညိုးထိုး၍ရပ်တန့်ခိုင်းသည်။ ဆင်းရဲမှုဝေဒနာများရပ်စဲခိုင်းသည်။ ခန္ဓာ ကိုယ်ဆင်းရဲခြင်း၊စိတ်ဝိညာဉ်ပင်ပန်းခြင်းများဖယ်ရှားပေးသည်။ အမှောင်ညများကိုအလင်းပေးမည် ဟု ကတိပေးထားသည်။ ဘဝလမ်းညွှန်ပေးမည်။ ကျန်းမာခြင်း၊သုခချမ်းသာ၊ဘဝခွန်အား ၊ဘဝအလှနှင့်အသီးအပွင့်များပေးသနားမည်။ ”သင်၏အမျိုးအနွယ်သည်ရှေးပြိုပျက်ရာတို့ကိုပြုပြင်ကြလိမ့်မည်။ ရှေးကာလ၌တည် ဘူးသောတိုက်မြစ်များအပေါ်မှာထပ်ဆင့်တည်ဆောက်ကြလိမ့် မည်။ သင်သည်လည်းပြိုပျက်သောမြိုရိုးပြင်ဆင်သူ၊လူသွားရာ လမ်းကိုပြုပြင်သူဟုချီးမွမ်းခြင်းခံရမည်”(ငယ် ၁၂(ခ))။

၅၈:၁၃-၁၄ ဘုရားသခင်၏လူများသည်ဥပုသ်နေ့ကိုစောင့်ထိန်းရာတွင်၆၈ စီးပွားရေးလုပ်ငန်းနှင့်ကိုယ်ကာယသာယာခြင်းကိုစောင့်ထိန်း ရမည်။ ဘုရားသခင်၏ဥပုသ်နေ့ကိုကြည်ညိုလျှင်ထိုနေ့ရက်သည် ဘုရားသခင်ပြင်ဆင်ပေးရာနေ့ရက်ဖြစ်သည်နှင့်အညီဘုရားသခင် ကယာကုပ်အမျိုးအားအမွေတော်ခံကြရမည်ဟုကတိတော်ပေး ထားသကဲ့သို့အခြားသူများအားဘုရားသခင်ထံသို့ပို့ဆောင်နိုင်ကြရမည်။ ထို့သို့အခြားသူများအားဘုရားသခင်သို့ပို့ဆောင်လျှင်အ ဟန့်အတားအနှောင့်အယှက်စိုးရိမ်ပူပန်စရာရှိမည်မဟုတ်။ အဘယ့်ကြောင့်ဆိုသော်နှုတ်တော်ထွက်စကားဖြစ်သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။