Isaiah -51 -

ဟေရှာယအနာဂတ္တိကျမ်း - ၅၁

ဇိအုန်တောင်အတွက်နှစ်သိမ့်စကား

1ဖြောင့်မတ်ခြင်းတရားသို့ လိုက်၍ ထာဝရဘုရားကို ရှာသောသူတို့၊ ငါ့စကားကို နားထောင်ကြလော့။ သင်တို့ကို ခုတ်ယူရာကျောက်နှင့်၊ တူးယူရာတွင်းဝကို ကြည့်ရှုကြလော့။ 2သင်တို့၏အဘ အာဗြဟံနှင့်၊ သင်တို့ကိုဖွားသောသူ စာရာတို့ကို ကြည့်ရှုကြလော့။ ငါသည် တစ်ယောက်တည်းသောသူ အာဗြဟံကို ခေါ်၍၊ ကောင်းချီးပေးသဖြင့် များပြားစေ၏။ 3ထိုသို့နှင့်အညီ၊ ထာဝရဘုရားသည် ဇိအုန်မြို့ကို ချမ်းသာပေးတော်မူမည်။ သူ၏ဆိတ်ညံရာ အရပ်အလုံးစုံတို့ကို ချမ်းသာပေးမည်။ သူ၏တောကို ဧဒင်အရပ်ကဲ့သို့လည်းကောင်း၊ သူ၏လွင်ပြင်ကို ထာဝရဘုရား၏ ဥယျာဉ်ကဲ့သို့လည်းကောင်း ဖြစ်စေတော်မူသဖြင့်၊ ဇိအုန်မြို့သည် ဝမ်းမြောက်ရွှင်လန်းခြင်း၊ ကျေးဇူးတော်ကိုချီးမွမ်းခြင်း၊ သီချင်းဆိုခြင်းနှင့် ပြည့်စုံလိမ့်မည်။

4ငါ၏လူမျိုး၊ ငါ့လူစုတို့၊ ငါ့စကားကို နားထောင်နာယူကြလော့။ ငါ့ထံမှတရားထွက်၍ ငါစီရင်ချက်သည် လူများလင်းစရာဖို့ တည်ရလိမ့်မည်။ 5ငါ၏ ဖြောင့်မတ်ခြင်းတရားသည် အနီးမှာရှိ၏။ ငါ၏ကယ်တင်ခြင်းတရားသည် ထွက်သွားပြီ။ ငါ့လက်ရုံးသည် လူတို့တွင် တရားမှုကို စီရင်လိမ့်မည်။ တစ်ကျွန်းတစ်နိုင်ငံသားတို့သည် ငါ့ကိုမျှော်လင့်၍၊ ငါ့လက်ရုံးကို ကိုးစားကြလိမ့်မည်။ 6မိုးကောင်းကင်ကို မျှော်၍ ကြည့်ကြလော့။ မြေကြီးကိုလည်း ငုံ့၍ ကြည့်ကြလော့။ မိုးကောင်းကင်သည် မီးခိုးကဲ့သို့ ကွယ်ပျောက်၍၊ မြေကြီးသည် အဝတ်ကဲ့သို့ ဟောင်းနွမ်းလိမ့်မည်။ မြေကြီးသားတို့သည် ခြင်ကောင်ကဲ့သို့ သေကြလိမ့်မည်။ ငါ၏ကယ်တင်ခြင်းတရားမူကား အစဉ်အမြဲတည်လိမ့်မည်။ ငါ၏ဖြောင့်မတ်ခြင်းတရားလည်း ပပျောက်ခြင်း မရှိနိုင်ရာ။

7ဖြောင့်မတ်ခြင်းတရားကို သိ၍၊ ငါ၏တရားကို နှလုံးသွင်းမိသော သူတို့၊ ငါ့စကားကို နားထောင်ကြလော့။ လူတို့သည် အပြစ်တင်မည်ဟု မစိုးရိမ်ကြနှင့်။ လူတို့ကဲ့ရဲ့ခြင်းကို မကြောက်ကြနှင့်။ 8အကြောင်းမူကား၊ ပိုးရွတို့သည် သိုးမွေးအဝတ်ကို ကိုက်စားသကဲ့သို့၊ ထိုသူတို့ကို ကိုက်စားဖျက်ဆီးကြလိမ့်မည်။ ငါ၏ ဖြောင့်မတ်ခြင်းတရားမူကား နိစ္စထာဝရဖြစ်၍၊ ငါ၏ကယ်တင်ခြင်းတရားသည်လည်း ကမ္ဘာအဆက်ဆက် တည်လိမ့်သတည်း။

9အို ထာဝရဘုရား၏လက်ရုံးတော်၊ နိုးတော်မူပါ။ နိုး၍ ခွန်အားကို ယူတော်မူပါ။ ရှေးကာလနှင့် လွန်ဖူးသောကာလ၌ကဲ့သို့ နိုးတော်မူပါ။ ရာခပ်ကိုဒဏ်ခတ်၍ နဂါးကို နာစေသောသူကား၊ ကိုယ်တော်ပင် မဟုတ်လော။ 10ပင်လယ်ရေ၊ နက်နဲရာရေတို့ကို ခန်းခြောက်စေ၍၊ ပင်လယ်နက်နဲရာ အရပ်တို့ကို ရွေးနုတ်သောသူများ သွားစရာလမ်း ဖြစ်စေသောသူကား၊ ကိုယ်တော်ပင် မဟုတ်လော။ 11သို့ဖြစ်၍၊ ထာဝရဘုရား ကယ်လွှတ်တော်မူသောသူတို့သည် ပြန်လာ၍ သီချင်းဆိုလျက်၊ ထာဝရဝမ်းမြောက်ခြင်း သရဖူကို ဆောင်းလျက်၊ ဇိအုန်မြို့သို့ ရောက်ကြလိမ့်မည်။ ဝမ်းမြောက်ရွှင်လန်းခြင်း အခွင့်ကိုရကြ၍၊ ဝမ်းနည်းခြင်းနှင့် ညည်းတွားခြင်းသည် ပြေးသွားရလိမ့်မည်။ 12သင်တို့ကို နှစ်သိမ့်စေသောသူကား၊ အခြားသူမဟုတ်၊ ငါ့ကိုယ်တိုင်ပေတည်း။ သေရသောလူကိုလည်းကောင်း၊ မြက်ပင်ကဲ့သို့ ဖြစ်လတ္တံ့သော လူသားကိုလည်းကောင်း၊ သင်သည် ကြောက်ရမည်အကြောင်း၊ အဘယ်သို့သော သဘောရှိသနည်း။ 13မိုးကောင်းကင်ကို ကြက်တော်မူထသော၊ မြေကြီးကိုလည်း တည်တော်မူထသော၊ သင့်ကို ဖန်ဆင်းတော်မူသော ထာဝရဘုရားကို သင်သည် မေ့လျော့၍၊ ညှဉ်းဆဲသောသူသည် ငါ့ကိုဖျက်ဆီးလုပြီဟု စိတ်ထင်နှင့်၊ သူ၏ဒေါသအမျက်ကို အစဉ်ကြောက်ရမည်အကြောင်း၊ အဘယ်သို့သော သဘောရှိသနည်း။ ယခုမှာ ညှဉ်းဆဲသောသူ၏ ဒေါသအမျက်သည် အဘယ်မှာရှိသနည်း။ 14အချုပ်ခံရသောသူသည် ထောင်ထဲမှာမသေ၊ ရေစာမပြတ်၊ လျင်မြန်စွာကယ်နုတ်ခြင်းသို့ ရောက်လိမ့်မည်။ 15ငါသည်သမုဒ္ဒရာကိုဆုံးမ၍ လှိုင်းတံပိုးကို ဟုန်းစေသော သင်၏ ဘုရားသခင်ထာဝရဘုရား ဖြစ်၏။ ထိုဘုရား၏ နာမတော်ကား၊ ကောင်းကင်ဗိုလ်ခြေအရှင် ထာဝရဘုရားပေတည်း။ 16မိုးကောင်းကင်ကို ဆောက်၍၊ မြေကြီးကို တည်စေခြင်းငှာလည်းကောင်း၊ သင်သည် ငါ၏လူမျိုးဖြစ်၏ဟု ဇိအုန်မြို့ကို ပြောစေခြင်းငှာလည်းကောင်း၊ ငါ့စကားကိုသင်၏နှုတ်ထဲမှာ ငါထားပြီ။ ငါ့လက်၏အရိပ်နှင့် သင့်ကိုငါမိုးပြီ။

17ထာဝရဘုရား၏လက်တော်၌ အမျက်တော်ဖလားကို သောက်သော ယေရုရှလင်မြို့၊ နိုးလော့။ နိုး၍ထလော့။ သင်သည် တုန်လှုပ်စေသောဖလားကို အကုန်သောက်ခဲ့ပြီ။ အနည်အဖတ်ကိုလည်း ညှစ်ခဲ့ပြီ။ 18ကိုယ်တိုင်ဖွားမြင်သော သားတို့တွင်၊ သင့်ကို လမ်းပြသောသူ တစ်ယောက်မျှမရှိ။ ကိုယ်တိုင်မွေးစားသော သားတို့တွင်၊ သင့်ကို လက်ဆွဲသောသူ တစ်ယောက်မျှမရှိ။ 19အစာခေါင်းပါး၍ လူဆိတ်ညံခြင်းဘေး၊ ဓားဖြင့်ဖျက်ဆီးခြင်းဘေးတည်းဟူသော ဘေးနှစ်ပါးတို့သည် သင်၏အပေါ်မှာ ရောက်လာသည်ဖြစ်၍၊ သင့်အတွက် အဘယ်သူငိုကြွေးမြည်တမ်းသနည်း။ ငါသည် အဘယ်သို့ ချမ်းသာပေးနိုင်သနည်း။ 20သင်၏သားတို့သည် မိန်းမောတွေဝေကြ၏။ ကျော့ကွင်း၌ဖမ်းမိသောစိုင်ကဲ့သို့ ခပ်သိမ်းသော လမ်းဝမှာအိပ်၍၊ ထာဝရဘုရား၏ အမျက်ထွက်တော်မူခြင်း၊ သင်၏ဘုရားသခင် ဆုံးမတော်မူခြင်းနှင့် ဝကြ၏။

21သို့ဖြစ်၍၊ ညှဉ်းဆဲခြင်းကို ခံရသောသူ၊ စပျစ်ရည်မှတစ်ပါး အခြားသောယစ်မျိုးနှင့် ယစ်မူးသောသူ၊ နားထောင်လော့။ 22သင်၏အရှင်၊ မိမိလူတို့၏အမှုကို စောင့်တော်မူသော သင်၏ဘုရားသခင်ထာဝရဘုရား မိန့်တော်မူသည်ကား၊ ကြည့်ရှုလော့။ တုန်လှုပ်စေသောဖလား၊ ငါ့အမျက်တော်ဖလား၏ အနည်အဖတ်ကို သင်၏လက်မှငါရုပ်၍၊ သင်သည် နောက်တစ်ဖန် မသောက်ရ။ 23သင်သည် ခရီးသွားသောသူတို့ရှေ့မှာ ကိုယ်ကို မြေတန်တားလုပ်၍၊ အလျားဝပ်စေခြင်းငှာ ဝပ်လျက်နေတော့။ ငါကျော်သွားမည်ဟု ဆို၍၊ သင့်ကိုညှဉ်းဆဲသော သူတို့လက်၌ ထိုဖလားကိုငါထားမည်။

ဟေရှာယအနာဂတ္တိကျမ်း - ၅၁ (အနက်ဖွင့်)

၃။ ဖြောင့်မတ်သောသခင်မေရှိယရှင် (၅၁:၁-၅၂:၁၂)

၅၁:၁-၃ ဘုရားသခင်ကိုရှာဖွေသောဣသရေလတိုင်းဘုရားသခင်က ကျောက်ဆောင်(မက်ဆိုပိုတေးယား)မှခေါ်ဆောင်လာပုံကိုမှတ်မိကြပေမည်။ အာဗြဟံ-စာရာတို့အားရင်းနှီးစွာဆက်ဆံ၍ကျေးဇူးပြုခဲ့ပုံကိုသတိရကြပေ မည်။ ကြွယ်ဝချမ်းသာပေးခဲ့ပုံကိုမေ့နိုင်ကြမည်မဟုတ်။ ဇိအုန်တောင်ကိုသစ္စာ ထား၍ကတိတော်ပြုခဲ့ပုံကိုစွဲမှတ်နေကြမည်။ နားထောင်ပါဟုသုံးကြိမ်တိုင်တိုင် ခေါ်သည်ကိုသတိပြုပါ(ငယ်၁၊၄၊၇)။ (၅၁:၇-၁၇၊၅၂:၁)သည်။ သုံးကြိမ်သုံးခါ တိုင်တိုင်နှိုးထခိုင်းသည်ကိုသတိပြုပါ။

၅၁:၄-၆ အနှစ်တစ်ထောင်နိုင်ငံတော်ကာလတွင်မေရှိယသခင်သည် ဣသရေလများကဲ့သို့တပါးအမျိုးသားများကိုလည်းတန်းတူသဘောထားအုပ် စိုးတော်မူသည်။ နိုင်ငံတော်အဆုံးသတ်သောအခါကောင်းကင်နှင့်မြေကြီးသည် လည်းပျောက်ဆုံးသွားမည်။ မယုံကြည်သူအားလုံးပျောက်လွင့်ကုန်မည်။ ယုံ ကြည်သူဘုရားသခင်၏လူများသာလျှင်ထာဝရကာလပတ်လုံးလုံခြုံရာရသွား ကြမည်။

၅၁:၇-၈ ဘေးဒဏ်ကြီးကာလလူသားများပေါ်သို့ဘုရားသခင်၏အမျက် ဒေါသကျရောက်သောအခါရွေးနှုတ်ထားသောလူနည်းစုသည်စိုးရိမ်ပူပန်ခြင်းမ ရှိရ။ အဘယ်ကြောင့်ဆိုသော်လူဆိုးလူယုတ်များကိုတံဆိပ်ခတ်ထားပြီးဖြစ် သည်။ ကယ်နှုတ်ခြင်းခံရမည့်သူများလည်းလုံခြုံရေးအာမခံချက်ပေးထားပြီး ဖြစ်သည်။

၅၁:၉-၁၁ ရွေးနှုတ်ထားသောလူနည်းစုသည်ဘုရားသခင်၏ကွယ်ကာ စောင့်ရှောက်ပုံကိုအမြဲသတိရမှတ်မိကြမည်။ အဲဂုတ္တုပြည်(ရာဟပ်)မှ၎င်း ဖာရော့(မြွေပွေး)လက်ထဲမှ၎င်းကယ်နှုတ်ခဲ့သည်။ ပင်လယ်နီကိုခမ်းခြောက်စေခြင်း ဖြင့်ဖြတ်ကူးစေနိုင်ခဲ့သည်။ အတိတ်ကာလတွင်ဘုရားသခင်၏ကွယ်ကာစောင် မပုံကိုထောက်ရှုခြင်းဖြင့်အနာဂတ်တွင်ဇိအုန်တောင်ပေါ်၌စုစည်းကြမည့်ကတိ တော်ကိုလည်းကြိုတင်လှမ်းမြင်နိုင်ပါသည်။ ထိုအကြောင်းကို F C Jennings ကဤသို့စာကဗျာသီထားသည်။

ဟိုပြေး၊သည်ပြေး ပြေးလွှား၍ဆံစနွယ်

ဖွာလန်ကြဲခဲ့သမျှပျော်ရွှင်ခြင်း၊ဝမ်းမြောက်

ခြင်း ပန်းခွေအဖြစ် ပြောင်းလဲပြီး။ ဘဝမုန်တိုင်း

ထန်၍တိမ်ညိုတိမ်လိပ်ဖြတ်သန်းသမျှ

မျက်ရည်စများသည်အပြုံးပုလဲပန်းကြိုးသီရပြီ။၅၉

၅၁:၁၂-၁၆ မင်းဆိုးမင်းညစ်အောက်၌ကျီးလန့်စာစားအသဲထိန်းသူများ ငြိမ်သက်ချမ်းသာသတင်းစကားဘုရားရှင်ကပြောကြားသည်။ ထိုစကားသည် နေဗုပ်ခပ်နေဇာမင်းလက်ထက်သို့မဟုတ် အနာဂတ်နေ့ရက်ကိုဆိုလိုခြင်းဖြစ်ပေ မည်။ ကောင်းကင်အရှင်သခင်နှင့်ကမ္ဘာမြေကြီး၏အရင်းအမြစ်ဖြစ်တော်မူ သောဘုရားသခင်ကိုချစ်ကြောက်ကြရမည်။ ယခုမှာညှင်းဆဲသောသူ၏ဒေါသ အမျက်သည်အဘယ်မှာရှိသနည်း။ အချုပ်ခံရသောသူသည်ထောင်ထဲမှာမသေ။ ရေစာမပြတ်လျင်မြန်စွာကယ်နှုတ်ခြင်းသို့ရောက်လိမ့်မည်။ အချုပ်ခံရသူများ လွတ်မြောက်ကြမည့်အကြောင်းမှာကုရုမင်းအစွမ်းဖြင့်လွတ်ကြသကဲ့သို့မေရှိ ယသခင်ပေါ်ထွန်းလာသည့်အခါတွင်လည်းထပ်လွတ်ကြဦးမည်။ ခရစ်တော် ဘုန်းတန်ခိုးပေါ်ထွန်းသောအခါ လက်တော်အရိပ်ထဲမှ ပုန်းခိုသူများ ပေါ်လွင် ထင်ရှားလာကြမည်။ ထိုသူများ၏ နှုတ်ဖျားတွင် နှုတ်ကပတ်တော်တပ်ဆင် ပေးသဖြင့် ကမ္ဘာအဝှန်းသို့ သတင်းကောင်းဟောကြလိမ့်မည်။ အပိုဒ်ငယ် ၁၆ သည်လည်း ခရစ်တော်နှင့်သက်ဆိုင်သည်။ ခမည်းတော်ဘုရားသခင်က နှုတ်ကပတ်တော်များကို မေရှိယ၏ နှုတ်ဖျားတွင် ကောင်းကင်သစ်နှင့် မြေ ကြီးသစ်လည်းတည်နေပါသည်။ အနှစ်တစ်ထောင်ကာလတွင် ဇိအုန်တောင်မှီခို သူများအား ဘုရားသခင်က ငါ၏လူများဟုခေါ်မည်။

၅၁:၁ရ-၂ဝ “နှိုးလော့၊ နှိုးလော့ ” ဘုရားသခင်၏ အမျက်တော်ဖလား သောက် ခဲ့ရသော အမှောင်ညဉ့်များ ကျော်လွန်ကုန်ဆုံးနေပြီ။ ယေရုရှလင်သား သမီး၊မွေးစားသားများကလည်းနိုးထစေမည့်သူမရှိ။ ဆင်းရဲငတ်မွတ်ခြင်းနှင့် ဓါးစာ၊လှံစာမိကုန်ပြီ။ ကျော့ကွင်းမှာပိထားသောစိုင်ကဲ့သို့ကယ်မည့်သူမရှိဖြစ်ရ ပြီ။

၅၁:၂၁-၂၂ အမျက်ဒေါသဖလားထဲမှအနယ်အကြွင်းအကျန်၊အကပ်အ သပ်များကိုယေရုရှလင်မြေပေါ်သို့မကျစေခြင်းငှာ၊ ဖယ်ရှားမည်။ ယေရုရှလင် ၏ရန်သူများပေါ်သို့ကျစေမည်။ ယေရုရှလင်ကိုသနားညှာတာစာနာခြင်းမရှိ အကြင်နာမဲ့သူများအပေါ်သို့သွန်းလောင်းမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။