Isaiah -37 -

ဟေရှာယအနာဂတ္တိကျမ်း - ၃၇

ဟေရှာယထံအကြံဉာဏ်တောင်းခံခြင်း

(၄ရာ၊ ၁၉:၁-၇။ ၆ရာ၊ ၃၂း၂၀-၂၃)

1ထိုစကားကို ဟေဇကိမင်းကြီးသည် ကြားလျှင်၊ မိမိအဝတ်ကိုဆုတ်၍ လျှော်တေအဝတ်ကို ခြုံလျက် ဗိမာန်တော်သို့ သွားလေ၏။ 2လျှော်တေအဝတ်ကို ဝတ်လျက်ရှိသော နန်းတော်အုပ် ဧလျာကိမ်၊ စာရေးတော်ကြီး ရှေဗန၊ အသက်ကြီးသော ယဇ်ပုရောဟိတ်တို့ကို၊ အာမုတ်သား ပရောဖက်ဟေရှာယထံသို့ စေလွှတ်လေ၏။ 3ဟေဇကိမင်းမှာထားသော စကားဟူမူကား၊ ယနေ့သည် ဒုက္ခနေ့၊ ဆုံးမသောနေ့၊ ကဲ့ရဲ့ခြင်းကိုခံရသောနေ့ဖြစ်၏။ သားဖွားချိန်ရောက်၍ သားကို ဖွားနိုင်အောင်ခွန်အားမရှိ။ 4အသက်ရှင်တော်မူသော ဘုရားသခင်ကို ကဲ့ရဲ့စေခြင်းငှာ၊ အာရှုရိရှင်ဘုရင် စေလွှတ်သော မိမိကျွန် ရာဗရှာခစကားကို သင်၏ဘုရားသခင် ထာဝရဘုရားကြားတော်မူပါစေသော။ သင်၏ဘုရားသခင် ထာဝရဘုရားသည် ကိုယ်တော်တိုင် ကြားသောစကားကို ချေတော်မူပါစေသော။ သင်သည်လည်း ကျန်ကြွင်းသော လူတို့အဖို့ ဆုတောင်းပတ္ထနာပြုပါဟု ပြောစေခြင်းငှာ၊ 5ဟေဇကိမင်း စေလွှတ်သောကျွန်တို့သည် ဟေရှာယထံသို့ ရောက်လာကြ၏။

6ဟေရှာယကလည်း၊ ထာဝရဘုရားမိန့်တော်မူသည်ကား၊ အာရှုရိရှင်ဘုရင်၏ ကျွန်တို့သည် ငါ့ကိုကဲ့ရဲ့၍၊ သင်သည် ကြားရသောစကားကြောင့် မကြောက်နှင့်။ 7ထိုမင်း၌ အခြားသောစိတ်သဘောကို ငါသွင်းပေးမည်။ သူသည် သတင်းကြား၍ မိမိပြည်သို့ ပြန်သွားလိမ့်မည်။ ထိုပြည်၌ ဓားဖြင့် ငါဆုံးစေမည်ဟူသော စကားတော်ကို သင်တို့၏သခင်အား ပြန်ကြားကြလော့ဟု ပြောဆို၏။

အာရှုရိအမျိုးသားတို့ထံခြိမ်းခြောက်စာပေးပို့ခြင်း

(၄ရာ၊ ၁၉:၈-၁၉)

8ထိုအခါ အာရှုရိရှင်ဘုရင်သည် လာခိရှမြို့မှ ထွက်သွားကြောင်းကို ရာဗရှာခကြားလျှင်၊ ပြန်သွား၍ လိဗနမြို့ကို ရှင်ဘုရင်တိုက်နေသည်ကို တွေ့လေ၏။ 9နောက်တစ်ဖန် ကုရှမင်းကြီးတိရက္ကသည် စစ်ချီ၍လာပြီဟု သတင်းကြားသောအခါ၊ ဟေဇကိမင်းထံသို့ တမန်တို့ကို စေလွှတ်ပြန်၍၊ 10သင်တို့သည် ယုဒမင်းကြီးဟေဇကိကို ပြောရသောစကားဟူမူကား၊ သင်ကိုးစားသော ဘုရားသခင်က၊ ယေရုရှလင်မြို့သည် အာရှုရိရှင်ဘုရင်လက်သို့ မရောက်ရဟူ၍ သင့်ကို မလှည့်စားစေနှင့်။ 11အာရှုရိရှင်ဘုရင်တို့သည် ခပ်သိမ်းသောပြည်တို့ကို လုပ်ကြံ၍ ရှင်းရှင်းဖျက်ဆီးကြောင်းကို သင်သည်ကြားရပြီ။ ကိုယ်တိုင် လွတ်လိမ့်မည်လော။ 12ငါ့ဘိုးဘေးတို့သည် ဖျက်ဆီးသောအမျိုးသား၊ ဂေါဇန်အမျိုးသား၊ ခါရန်အမျိုးသား၊ ရေဇပ်အမျိုးသား၊ တေလသာမြို့၌ရှိသော ဧဒင်အမျိုးသားတို့ကို၊ သူတို့၏ဘုရားများတို့သည် ကယ်ယူကြပြီလော။ 13ဟာမတ်မင်းကြီး၊ အာပဒ်မင်းကြီးနှင့် သေဖရဝိမ်မြို့၊ ဟေနမြို့၊ ဣဝါမြို့ကို စိုးစံသောမင်းကြီးတို့သည် အဘယ်မှာရှိကြသနည်းဟု မှာလိုက်လေ၏။

ဟေဇကိမင်း၏ဆုတောင်း

14ထိုမှာစာကို ဟေဇကိမင်းသည် သံတမန်လက်မှခံယူ၍ ကြည့်ပြီးလျှင်၊ ဗိမာန်တော်သို့သွား၍ ထာဝရဘုရားရှေ့တော်၌ ဖြန့်ထားလေ၏။ 15ထိုအခါ ဟေဇကိမင်းသည် ထာဝရဘုရားရှေ့တော်၌ လျှောက်ဆိုသည်ကား၊ 16ခေရုဗိမ်ပေါ်မှာ ထိုင်တော်မူသော၊ ဣသရေလအမျိုး၏ ဘုရားသခင်ကောင်းကင်ဗိုလ်ခြေအရှင် ထာဝရဘုရား၊ ကိုယ်တော်သည် ဘုရားသခင်ဖြစ်တော်မူ၏။ ကိုယ်တော်တစ်ပါးတည်းသာလျှင်၊ မြေကြီးပေါ်မှာရှိသမျှသော အတိုင်းတိုင်းအပြည်ပြည်တို့၏ ဘုရားသခင် ဖြစ်တော်မူ၏။ ကိုယ်တော်သည် ကောင်းကင်နှင့် မြေကြီးကို ဖန်ဆင်းတော်မူ၏။ 17အို ထာဝရဘုရား၊ နားတော်ကို လှည့်၍ နားထောင်တော်မူပါ။ အိုထာဝရဘုရား၊ မျက်စိတော်ကိုဖွင့်၍ ကြည့်ရှုတော်မူပါ။ သနာခရိပ်မင်းသည် အသက်ရှင်တော်မူသော ဘုရားသခင်ကိုကဲ့ရဲ့၍၊ ပြောစေသောစကားအလုံးစုံတို့ကို မှတ်တော်မူပါ။ 18အို ထာဝရဘုရား၊ အကယ်စင်စစ် အာရှုရိရှင်ဘုရင်တို့သည် အတိုင်းတိုင်း အပြည်ပြည်တို့ကို ဖျက်ဆီး၍၊ 19သူတို့၏ဘုရားများကို မီးထဲသို့ချပစ်ကြပါပြီ။ ထိုဘုရားတို့သည် ဘုရားမဟုတ်၊ လူလက်ဖြင့်လုပ်သော သစ်သားနှင့် ကျောက်ဖြစ်သောကြောင့်၊ ပျက်စီးခြင်းသို့ ရောက်ကြပါပြီ။ 20အို အကျွန်ုပ်တို့ ဘုရားသခင်ထာဝရဘုရား၊ ကိုယ်တော် ထာဝရဘုရားတစ်ပါးသာ၊ ဘုရားသခင် ဖြစ်တော်မူသည်ကို မြေကြီးပေါ်မှာရှိသမျှသော တိုင်းနိုင်ငံတို့သည် သိမည်အကြောင်း၊ အကျွန်ုပ်တို့ကို ထိုမင်းလက်မှ ယခုကယ်ယူတော်မူပါ၊ အကျွန်ုပ်တောင်းပန်ပါသည်ဟု ပတ္ထနာပြုလေ၏။

မင်းကြီးထံဟေရှာယပေးပို့သည့်သတင်းစကား

(၄ရာ၊ ၁၉:၂၀-၃၇)

21ထိုအခါ အာမုတ်သား ဟေရှာယသည် ဟေဇကိမင်းထံသို့ စေလွှတ်၍၊ ဣသရေလအမျိုး၏ ဘုရားသခင် ထာဝရဘုရား မိန့်တော်မူသည်ကား၊ သင်သည် အာရှုရိရှင်ဘုရင်သနာခရိပ် အကြောင်းကြောင့်၊ ငါ့ရှေ့မှာ ပတ္ထနာပြုသည်ဖြစ်၍၊ 22ထိုမင်း၏အမှုမှာ ထာဝရဘုရားမိန့်တော်မူသော စကားဟူမူကား၊ ဇိအုန်သတို့သမီးကညာသည် သင့်ကိုမထီမဲ့မြင်ပြု၍ ပြက်ရယ်၏။ ယေရုရှလင်သတို့သမီးသည် သင့်နောက်၌ ခေါင်းညိတ်၏။ 23သင်သည် အဘယ်သူကို ကဲ့ရဲ့ဆဲရေးသနည်း။ အဘယ်သူကို အော်ဟစ်၍ မျက်နှာထောင်လွှားသနည်း။ ဣသရေလအမျိုး၏ သန့်ရှင်းသောဘုရားကိုပင် ပြုပါသည်တကား။ 24သင်သည် ကျွန်များအားဖြင့် ထာဝရဘုရားကို ကဲ့ရဲ့၍၊ ငါသည် ရထားများပြားသဖြင့် တောင်ထိပ်သို့လည်းကောင်း၊ လေဗနုန်တောင်အထွတ်သို့လည်းကောင်း တက်လာပြီ။ အရပ်မြင့်သော အာရဇ်ပင်နှင့် အကောင်းဆုံးသော ထင်းရှူးပင်တို့ကို ငါခုတ်လှဲပြီ။ အမြင့်ဆုံးသောအရပ်၊ အသီးများသောတောထဲသို့ ငါဝင်ပြီ။ 25ငါသည် တွင်းတူး၍ ရေကိုသောက်ရပြီ။ ငါ၏ခြေဖဝါးအားဖြင့် အဲဂုတ္တုမြစ်လက်ကြား ရေရှိသမျှကို ခန်းခြောက်စေပြီဟု သင်ဆိုမိပြီတကား။ 26ငါသည်အထက်က ဤအမှုကို စီရင်ကြောင်းနှင့်၊ ရှေးကာလ၌ ပြုပြင်ကြောင်းကို သင်သည် မကြားသလော။ ယခုမှာလည်း သင်သည် ခိုင်ခံ့သောမြို့တို့ကို ဖျက်ဆီး၍၊ ကျောက်ပုံ ဖြစ်စေသောသူ ဖြစ်မည်အကြောင်း ငါစီရင်ခန့်ထားလေပြီ။ 27ထိုကြောင့်၊ မြို့သားတို့သည် အားနည်းကြ၏။ မှိုင်တွေ၍ စိတ်ပျက်လျက်ရှိကြ၏။ တောမြက်ပင်နှင့် စိမ်းသောစပါးပင် ကဲ့သို့လည်းကောင်း၊ အိမ်မိုးပေါ်မှာ ပေါက်သော မြက်ပင်နှင့်၊ မကြီးမီညှိုးနွမ်းသော စပါးပင်ကဲ့သို့လည်းကောင်း ဖြစ်ကြ၏။ 28သင်၏ နေထိုင်ခြင်း၊ ထွက်ဝင်ခြင်း၊ ငါ၌အမျက်ဟုန်းခြင်းတို့ကိုငါသိ၏။ 29ငါ၌ သင်၏အမျက်ဟုန်းခြင်း၊ စော်ကားခြင်းကို ငါကြားရသောကြောင့်၊ သင့်ကို နှာရှုတ်တပ်၍ ဇက်ခွံ့ပြီးမှ၊ သင်လာသောလမ်းဖြင့် ပြန်စေမည်။

30သင်မှတ်ရသော နိမိတ်လက္ခဏာဟူမူကား၊ ယခုနှစ်တွင် အလိုလိုကြီးရင့်သော အသီးအနှံကိုလည်းကောင်း၊ ဒုတိယနှစ်တွင် ထိုအတူ ပေါက်သောအရာများကိုလည်းကောင်း သင်တို့သည်စားရမည်။ တတိယနှစ်တွင် မျိုးစေ့ကိုကြဲ၍ စပါးကို ရိတ်ကြလော့။ စပျစ်ဥယျာဉ်ကိုလည်းစိုက်၍ အသီးကို စားကြလော့။ 31ဘေးလွတ်၍ ကျန်ကြွင်းသော ယုဒအမျိုးသားတို့သည် တစ်ဖန်အောက်မှာအမြစ်စွဲ၍၊ အထက်မှာ အသီးသီးကြလိမ့်မည်။ 32ကျန်ကြွင်းသောသူတို့သည် ယေရုရှလင်မြို့ထဲကလည်းကောင်း၊ ဘေးလွတ်သောသူတို့သည် ဇိအုန်တောင်ပေါ်ကလည်းကောင်း ပေါ်လာကြလိမ့်မည်။ ကောင်းကင်ဗိုလ်ခြေအရှင် ထာဝရဘုရားသည် အလိုတော်အားကြီး၍၊ ထိုအမှုကို စီရင်တော်မူလိမ့်မည်။

33သို့ဖြစ်၍၊ ထာဝရဘုရားသည် အာရှုရိရှင်ဘုရင်ကို ရည်မှတ်၍မိန့်တော်မူသည်ကား၊ သူသည် ဤမြို့သို့ မဝင်ရ။ မြို့ထဲသို့ မြားကို မပစ်ရ။ မြို့ရှေ့မှာ ဒိုင်းလွှားကို မပြရ။ မြို့ပြင်မှာ မြေရိုးကိုမဖို့ရ။ 34လာသောလမ်းဖြင့် ပြန်သွားရမည်။ ဤမြို့ထဲသို့ မဝင်ရ။ 35ငါသည် ကိုယ်မျက်နှာကိုလည်းကောင်း၊ ငါ့ကျွန်ဒါဝိဒ်၏မျက်နှာကိုလည်းကောင်းထောက်၍၊ ဤမြို့ကို ကယ်တင်ခြင်းငှာ စောင့်မမည်ဟု ထာဝရဘုရားမိန့်တော်မူ၏။

သနာခရိပ်သေဆုံးခြင်း

36ထိုအခါ ထာဝရဘုရား၏ကောင်းကင်တမန်သည် ထွက်၍၊ အာရှုရိတပ်တွင် လူတစ်သိန်းရှစ်သောင်း ငါးထောင်တို့ကို ဒဏ်ခတ်လေ၏။ နံနက်စောစော ထချိန်ရောက်သောအခါ၊ ထိုသူအပေါင်းတို့သည် အသေကောင် ဖြစ်ကြ၏။ 37အာရှုရိရှင်ဘုရင် သနာခရိပ်သည်လည်း၊ ထိုအရပ်မှထွက်၍ ပြန်သွားပြီးလျှင်၊ နိနေဝေမြို့၌ နေလေ၏။ 38နောက်တစ်ဖန် သူသည် မိမိဘုရားနိသရုတ်၏ ဗိမာန်၌ ကိုးကွယ်စဉ်တွင်၊ သားတော်အာဒြမ္မေလက်နှင့် ရှရေဇာသည် ခမည်းတော်ကို ဓားနှင့်သတ်ပြီးလျှင်၊ အာရမနိပြည်သို့ ပြေးကြ၏။ သားတော် ဧသရဟဒ္ဒုန်သည်လည်း၊ ခမည်းတော်အရာ၌ နန်းထိုင်၏။

ဟေရှာယအနာဂတ္တိကျမ်း - ၃၇ (အနက်ဖွင့်)

၂။ ဘုရားသခင်က အာရှုရိပြည်ဖျက်ဆီးခြင်း(အခန်း၃၇)

၃၇:၁-၄ ရာဗရှာခ၏စကားကိုကြားသောအခါဟိဇကိမင်းသည်ပူဆွေး ဝမ်းနည်းစွာဖြင့်ဗိမာန်တော်သို့သွားသည်။ ဗိမာန်တော်သို့ရောက်ရှိသောအခါ ပရောဖက်ဟေရှာယသို့“သားဘွားချိန်ရောက်သော်လည်းသားဘွားနိုင်သော ခွန်အားမရှိသည့်ဘဝ”ရောက်နေကြောင်းသတင်းစကားသွားပြောခိုင်းသည်။ ထိုအကြောင်းကိုJ.A.Alexander က“အဆုံးစွန်သောဒေသနာသေရေးရှင် ရေးပြဿနာအရေးပေါ်ဆုံးဖြတ်ရမည့်ကိစ္စ၊အားအင်ပြတ်လပ်၍တစုံတစ်ခုခုမှီ တွယ်ရမည့်အခြေအနေဆိုးဖြစ်သည်”၄၃ဟုဆိုသည်။ ယေဟောဝါဘုရားသခင်က ရာဗရှာခ၏မင်္ဂလာမရှိသောစကားကိုကြားသိ၍သူ့ကိုတဖန်အပြစ်တင်ပါစေ ဟုဟိဇကိမင်းဆိုလိုဟန်ရှိသည်။

၃၇:၅-၇ ဘုရားသခင်ကပရောဖက်မှတဆင့်အဖြေစကားပြန်ပေးထား သည်။ ဘုရားသခင်ကဝိညာဉ်တော်စေလွှတ်၍ထိုစကားသည်ကောလဟာလ သတင်းအဖြစ်သဘောထားခိုင်းသည်။ ထိုသူများအားမိမိတို့နေရပ်ဌာနေသို့ပြန် သွားခိုင်း၍ဓါးချက်ဖြင့်သေဆုံးခိုင်းသည်။

၃၇:၈-၁၃ ရာဗရှခသည်ယေရုရှလင်မှထွက်ခွာ၍သနာခရိပ်ထံသို့ပြန် ရောက်သောအခါအနောက်မြောက်အရပ်ဆယ်မိုင်အကွာတွင်လာခိရှနှင့်လိဗန မြို့သားများချဉ်းနင်းဝင်ရောက်လာကြောင်းစစ်သတင်းကြားသိရသည်။ အ ခြားတစ်ဘက်တွင်ယေရုရှလင်ဘေးရန်ကိုစိတ်မအေးနိုင်။ ထိုသို့စိတ်ပူထွေပြား နေခိုက်တွင်တပူပေါ်တပူထပ်ဆင့်လာသည်။ အဲဂုတ္တုပြည်ကိုအစိုးရသောဧသ ယောပိမင်း တိရက္က သည်လည်းစစ်တိုက်ဖို့ချီတက်လာသည်ဟုသတင်းရသည်။ သနာခရိပ်သည်ဟိဇကိမင်းထံခြေမြန်တော်စေလွှတ်၍သတင်းစကားပြောခိုင်းသည်။ သူ့စာထဲတွင်ဘုရားတရားပြစ်မှားမိကြောင်းရာဗရှခဖြင့်လုံခြုံရာရ ကြောင်းယေဟောဝါဘုရားသခင်ကိုကိုးစားခြင်းဖြင့်အမှုမင်းများအပေါ် အောင်မြင်ခြင်းအကြောင်းများရေးထားသည်။

၁၇:၂၁-၂၉ ပရောဖက်ဟေရှာယကယေရုရှလင်မြို့အားမဒီကညာနှင့်တင် စားထားသည်။ သနာခရိပ်ကိုရှုံးနိမ့်သူအဖြစ်မခံချိမခံသာဖြစ်အောင်သရော် ထားသည်။ ယုဒနှင့်အဲဂုတ္တုပြည်ကိုအောင်မြင်တော့မည့်ဟန်လေလုံးကြီးသော အာရှုရိကိုလည်းပြက်ယယ်ပြုထားသည်။ ဘုရားရှင်ကသနာခရိပ်အားလက်ထဲမှစစ်ဘုရင်နယ်ရုပ်ကလေးဖြစ်ကြောင်းသတိပေးသည်။ ဖြစ်သမျှအကြောင်း သည်ရှေးမဆွကဘုရားသခင်အစီအစဉ်ရှိတော်မူသည့်အတိုင်းသာဖြစ်ပျက် နေသည်။ ဘုရားသခင်သည်အရာခပ်သိမ်းကိုသိရှိထားသည်နှင့်အညီဆိုးညစ် သောမင်းများကချည်တိုင်မှာနှာခေါင်းကြိုးချည်ထားသည့်တိရစ္ဆာန်များနှင့်အာ ရှုရိမင်းများထံသို့ခြေဦးလှည့်ကြမည့်အကြောင်းကိုလည်းသိသည်။

၃၇:၃၀-၃၂ ဘုရားသခင်ကဟိဇကိမင်းအားယခုနှစ်နှင့်လာမည့်နှစ်တွင် စိုက်ပျိုးသီးနှံအောင်မြင်စွာထွန်းမည်ဟုအာမခံချက်ပေးသည်။ တတိယနှစ်တွင်မူအာရှုရိသားများကလာရောက်လုယက်ကြသဖြင့်ပုံမှန်အနေအထားရှိမည်။ ယေရုရှလင်သားများသည်ဘဝမပျက်ပုံမှန်အခြေအနေရှိနိုင်ရန်တတိယနှစ်အ တွက်ကြိုတင်ပြင်ဆင်ထားကြရမည်။ ကြိုးစားအားထုတ်လုံ့လရှိသူများသည် ဘဝလုံခြုံမည်ဟုဘုရားရှင်ကကတိတော်ပြုသည်။

၃၇:၃၃-၃၅ အာရှုရိမင်းယေရုရှလင်မြို့ကိုကျူးကျော်တိုက်ခိုက်မည်မ ဟုတ်၊အနားသို့သီဝံ့မည်မဟုတ်ဘုရားသခင်ကဟိဇကိမင်းအားကတိတော် ပေးထားသည်။ ယေရုရှလင်မြို့ကိုဘုရားသခင်ကကွယ်ကာစောင့်ရှောက်မည်။ ကျူးကျော်ဖို့ချီတက်လာသူများအားလာရာလမ်းအတိုင်းဒုံရင်းဒုံရင်းနေရာသို့ ပြန်ပို့ပေးမည်။

၃၇:၃၆ ထိုစကားတော်နှင့်အညီဘုရားသခင်၏ကောင်းကင်တမန်သည်ထိုတ ညဉ့်တည်းတွင်ကျူးကျော်သူအာရှုရိစစ်သားတစ်သိန်းရှစ်သောင်း ငါးထောင်ချေမှုန်းသုတ်သင်ပေး လိုက်သည်။

၁၈၁၅-ခုနှစ်တွင် ဤအဖြစ်အပျက်ကိုပြဇာတ်ကြီးအဖြစ်အင်္ဂလိပ်ဇာတ်ဆ ရာကြီးတပါးကစင်တင်ကပြအသုံးတော်ခံဘူးသည်။ ယနေ့ခေတ်ကာလလူများကလက်လှမ်းမမှီတော့သဖြင့်အပြည့်အစုံပြန်လည်ဖေါ်ပြပါမည်။

သနာခရိပ်ပျက်သုဉ်းခြင်း

အာရှုရိသားများဝံပုလွေအုပ်ပမာအနှံ့အပြားမှပေါ်ထွက်လာကြ လည်ဆံမွှေးများသည်ရွှေရောင်၊ခရမ်းရောင်းတောက်ထိန်သည်။ ဓါးလှံများသည်ပင်လယ်ပြင်တွင်ကြယ်များပမာအရောင်ဟပ် လှိုင်းလုံးများသည်ဂါလိလဲအိုင်ရေပြင်တွင်အလိပ်လိုက်အလိပ်လိုက်။ နွေဦးရွက်နုများသည်တောအုပ်တခွင်စိုးစိုလျက် နေရောင်ခြည်အရှေ့မှာ တံခွန်အောင်လံပမာ ဆောင်းဦးရာသီရောက်ပြန်တော့ကြွေကျပြီ လေရူးနော့ တော့ရော်ရွက်တွေမြေခရပြီပေါ့။ သေမင်း၏စေတမန်တောင်ပုံစုံခတ်တော့ ရန်သူများ၏အသက်ရှူသံတိတ်ဆိတ်ပြန် အိပ်ပျော်စဉ်မှိတ်ထားသောမျက်လုံးများ ရင်ခုန်သံများတဖန်နိုးကြားခြင်းမရှိတော့ပါ။

နှာခေါင်းကျယ်ကျယ်အသက်ရှူပြင်းခဲ့သမျှ အသက်ပြင်းပြင်းရှူထုတ်ခဲ့သမျှ ပလုံစီအမြုပ်များထွက်နေရပြီ အသက်ရှူသံစည်းမျက်မှန်ပျောက်လွင့်ပြီ။

လွှင့်ထူခဲ့သောအောင်လံတလူလူလည်းအရောင်မှိန်ပြီ မျက်ခုံးများနှင်းသီလို့၊ချပ်ဝတ်တန်ဆာလည်းသံချေးကိုက်ပြီ တဲကလေးတွေတိတ်ဆိတ်လို့၊အလံနွမ်းသာကျန်ရှိ တပိုးသံလည်းမကြားရတော့ပြီ။

အာရှုရိမုဆိုးမများငိုဆွေးသံကျယ်လောင်လို့ ဗာလရုပ်တုဘုရားများကျိုးပဲ့ကြေမွကုန်ပြီ တပါးအမျိုးသားတို့အင်အားဓါးချက်မိကုန်ပြီ ဘုရားသခင်၏နှင်းပွင့်ကျေးဇူးတော်လင်းလက်ပြီပေါ့။

George Gordon, Lord Byron (1788-1824)

၃၇:၃၇-၃၈ သနာခရိပ်သည်နိနဝေသို့ပြန်ရောက်လာသည်။ ရောက်မည့် ရောက်တော့လည်းသားတော်အာဒြမွေလက်နှင့်ရှရေဇာတို့၏ခုတ်ပိုင်းလုပ်ကြံ ခြင်းခံရသည်။ ရုပ်တုဘုရားပျပ်ဝပ်ကိုးကွယ်နေသကိုး။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။