Isaiah -23 -

ဟေရှာယအနာဂတ္တိကျမ်း - ၂၃

တုရုမြို့နှင့်ဆိုင်သောဗျာဒိတ်

1တုရုမြို့နှင့်ဆိုင်သော ဗျာဒိတ်တော်ကား၊ တာရှုသင်္ဘောများတို့၊ ညည်းတွားမြည်တမ်းကြလော့။ မြို့သည် အိမ်မရှိ၊ တည်းခိုစရာ မရှိသည်တိုင်အောင် ရှင်းရှင်းပျက်စီးလေပြီ။ ခိတ္တိမ်ပြည်မှ သတင်းကြားရ၏။ 2ပင်လယ်ကူးတတ်သော ဇိဒုန်ကုန်သည်တို့သည် စည်ပင်စေသော၊ ပင်လယ်ကမ်းနားမှာ နေသောသူတို့၊ မှိုင်တွေကြလော့။ 3များသောရေကို အမှီပြုသော ရှိဟောရမျိုးစေ့၊ မြစ်၏အသီးအနှံကို ထိုမြို့သည် အခွန်ရ၍၊ အတိုင်းတိုင်း အပြည်ပြည်တို့၏ ဈေးဖြစ်လေပြီ။ 4အိုဇိဒုန်မြို့၊ ရှက်ကြောက်ခြင်းရှိလော့။ အကြောင်းမူကား၊ ပင်လယ်တည်းဟူသော ပင်လယ်မြို့ကြီးက၊ ငါသည် ကိုယ်ဝန်မဆောင်၊ သားမဖွား၊ လူပျိုနှင့် အပျိုမတို့ကို မမွေးမြူရဟု ပြောဆို၏။ 5အဲဂုတ္တုပြည်သားတို့သည် တုရုမြို့သတင်းကိုကြားသောအခါ၊ ထိုသတင်းကြောင့် အလွန်စိတ်ပူပန်ခြင်းသို့ ရောက်ကြလိမ့်မည်။ 6တာရှုမြို့သို့ ကူးကြလော့။ ပင်လယ်နားမှာ နေသောသူတို့၊ ညည်းတွားမြည်တမ်းကြလော့။ 7ဤမြို့သည် ရှေးကာလ၌တည်သဖြင့် သင်တို့ ရွှင်လန်းသောမြို့လော။ ဝေးသောအရပ်၌ တည်းခိုခြင်းငှာ၊ မိမိခြေတို့သည် မိမိကိုဆောင်သွားကြ၏။ 8တုရုမြို့သည် ရာဇသရဖူကို ပေးတတ်သောမြို့ ဖြစ်လျက်၊ သူ၏ကုန်သည်တို့သည် မင်းသား၊ ဖောက်ကားရောင်းဝယ်သော သူတို့သည် မြေကြီးမှူးမတ်ဖြစ်လျက်၊ ထိုမြို့တစ်ဖက်၌ အဘယ်သူသည် ဤအကြံကို ကြံစည်သနည်း။ 9ကောင်းကင်ဗိုလ်ခြေအရှင် ထာဝရဘုရားသည်၊ ရှိသမျှသော ဘုန်းအသရေ၏မာနကို အရှက်ခွဲခြင်းငှာလည်းကောင်း၊ မြေကြီးမှူးမတ်အပေါင်းတို့ကို ရှုတ်ချခြင်းငှာလည်းကောင်း ထိုသို့ ကြံစည်တော်မူ၏။ 10အို တာရှုမြို့၏သမီး၊ ကမ်းရိုးပျက်လေပြီ။ မြစ်ကဲ့သို့ ကိုယ်ပြည်ကိုနှံ့ပြားလော့။ 11ရန်သူသည် ပင်လယ်ပေါ်မှာ လက်ကိုဆန့်၍၊ တိုင်းနိုင်ငံတို့ကို လှုပ်ရှားလေ၏။ ခါနာန်ပြည်၌ ခိုင်ခံ့သောအရပ်တို့ကို ဖျက်ဆီးစေခြင်းငှာ၊ ထာဝရဘုရား အမိန့်တော်ရှိ၏။ 12ညှဉ်းဆဲခြင်းကို ခံရသောကညာ၊ ဇိဒုန်မြို့၏သမီး၊ သင်သည် နောက်တစ်ဖန် ရွှင်လန်းခြင်းမရှိရ။ ထလော့။ ခိတ္တိမ်ပြည်သို့ ကူးသွားလော့။ ထိုအရပ်၌လည်း ငြိမ်သက်ခြင်းမရှိရဟု မိန့်တော်မူ၏။ 13အထက်ကမရှိသော ခါလဒဲအမျိုးသားတို့နေသောပြည်ကို ကြည့်ရှုလော့။ ထိုပြည်ကို အာရှုရိမင်းသည် တောတွင်းသားတို့ နေစရာဖို့ တည်ထောင်၏။ ထိုပြည်သားတို့သည် ပြအိုးတို့ကို တည်ဆောက်၍၊ တုရုအိမ်တော်များနှင့် မြို့ကိုလည်း ရှင်းရှင်းဖျက်ဆီးကြ၏။ 14တာရှုသင်္ဘောများတို့၊ ညည်းတွားမြည်တမ်းကြလော့။ သင်တို့၏မြို့ကြီးသည် ပျက်ကုန်ပြီ။

15ထိုကာလ၌ တုရုမြို့ကို၊ မင်းဆက်တစ်ဆက် အတိုင်းအရှည်၊ အနှစ်ခုနစ်ဆယ်ပတ်လုံး၊ အဘယ်သူမျှ မအောက်မေ့ရ။ အနှစ် ခုနစ်ဆယ်လွန်သောအခါ၊ ပြည့်တန်ဆာမိန်းမအား သီချင်းဆိုသကဲ့သို့၊ တုရုမြို့အား သီချင်းဆိုလိမ့်မည်။ 16အဘယ်သူမျှ မအောက်မေ့သော ပြည့်တန်ဆာမိန်းမ၊ စောင်းကိုကိုင်၍ မြို့တွင်လှည့်လည်လော့။ သူတစ်ပါးတို့သည် သင့်ကို သတိရစေခြင်းငှာ၊ သာယာသောအသံနှင့် တီး၍၊ သီချင်းကို များစွာဆိုလော့။ 17အနှစ်ခုနစ်ဆယ်လွန်သောအခါ၊ ထာဝရဘုရားသည် တုရုမြို့ကို အကြည့်အရှု ကြွလာတော်မူလိမ့်မည်။ သူသည်လည်း တစ်ဖန် အမြတ်ရသော ဘာသာသို့လိုက်ပြန်၍၊ မြေကြီးမျက်နှာပေါ်မှာ ရှိသမျှသော လောကီနိုင်ငံတို့နှင့် မတရားသောမေထုန်ကို ပြုလိမ့်မည်။ 18သို့ရာတွင်၊ သူ၏ကုန်သွယ်ခြင်း၊ အမြတ်ရခြင်းအရာတို့သည် ထာဝရဘုရားအဖို့ သန့်ရှင်းလိမ့်မည်။ ဆည်းပူးသိုထားခြင်းကို မပြုရ။ ကုန်သွယ်သော ဥစ္စာသည် ထာဝရဘုရားရှေ့တော်၌ နေသောသူတို့အဖို့ ဖြစ်၍ သူတို့သည်ဝစွာစား၍ ခိုင်သောအဝတ်ကို ဝတ်ကြလိမ့်မည်။

ဟေရှာယအနာဂတ္တိကျမ်း - ၂၃ (အနက်ဖွင့်)

၁၂။ တုရုသားများ (အခန်း၂၃)

၂၃:၁-၅တာရှု (စပိန်ပြည်)မှပြန်လာ၍ကုပရကျွန်းသို့ရောက်သောအခါ တံ ငါများထံမှတုရုမြို့ပျက်စီးသည့်သတင်းစကားကြားရသည်။ လူနေအိမ်ခြေများတစ်ခုမကျန်ပျက်စီးသွားသောကြောင့်ခိုလှုံတည်းခိုစရာနေရာမရှိကြ။ ဗလာကျင်း ဖြစ်သွားကြသည်။ တုရုသားများဘဝမုန်တိုင်းကျသောကြားသိရသောအခါအိမ် နီးနားခြင်းခိတုန်ကုန်သည်များသည်စကားတခွန်းမပြောနိုင်ဘဲရေငုံနှုတ်ပိတ်တိတ်ဆိတ်ကြသည်။ နိုင်းမြစ်ဝှမ်းဒေသအထက်ပိုင်းမှယူဆောင်လာသောအခါ မျိုးစေ့သီးနှံများကိုမည်ကဲ့သို့ရောင်းရတော့မည်နည်း။ တုရုပြည်၏ဗဟိုမြို့ တော် ခိတုန်မြို့သည်အရှက်ကွဲစေပြီ။ လှိုင်းပုတ်သံကြောင့်တမြို့လုံးပြိုကျပျက် စီးရပြီ။ မြို့တော်သူမြို့တော်သားများ၏ငိုကြွေးအော်ဟစ်သံသည်ပဲ့တင်သံ ထပ်နေပြီ။ တုရုမြို့သည်အမွေ့ဆက်ခံမည့်သူမရှိမျိုးကန်းပြီ။ ထိုသတင်းကြောင့်ဖောက်သည်ကြီးအဲဂုတ္တုပြည်သည်လည်းဝမ်းနည်းပက်လက်ကြေကွဲရပြီ။

၂၃:၆-၉ တာရှု(စပိန်)သားများသည် ဝေးလံသောအရပ်ဒေသ၌ခိုလှုံစရာ ရှာကြမည်။ ရှေးယခင်ကဥစ္စာဓနကြွယ်ဝ၍စည်ပင်ဝပြောခဲ့သောမြို့သည်ယခုအခါတွင်ရပ်ဝေးမြေခြားသို့ခြေသလုံးအိမ်တိုင်ထူကြပြီ။ အလုပ်လက်မဲ့ဖြစ်နေ ကြပြီ။ တုရုမြို့၏ကြွယ်ဝချမ်းသာခြင်း၊ဘုန်းတန်ခိုးနှင့်ကျက်သရေများကိုမည်သူ လုယူသွားသနည်း။ မမှန်ကန်သောမာနထောင်လွှားခြင်း၊ လူ့အစွမ်းဘုန်းတန်ခိုး ၌သာယာကြခြင်းတို့ကြောင့်ထာဝရဘုရားသခင်ကယူဆောင်သွားသည်။

၂၃:၁၀-၁၇ နေဗုခ်နေဇာဘုရင်ကတုရုမြို့ကိုတိုက်ခိုက်သောအခါ၊အရပ်သူ အရပ်သားများသည်လွတ်ရာကျွတ်ရာအခြားတိုင်းပြည်များသို့အလျှိုလျှိုထွက် ပြေးတိမ်းရှောင်ကြသည်။ မြစ်ကဲ့သို့ကွဲပြားပျံ့လွင့်ကြသည်။ (ဥဖရတ်မြစ်သည် တိုင်းနိုင်ငံများစွာဖြတ်သန်းစီးဆင်းသည်။) ဘုရားရှင်သည်ကုန်သည်ပွဲစား ခါနာန်ပြည်အားဖျက်ဆီးရန်ဗာဗုလုန်ကိုအသုံးပြုသည်။ ကုရုပြည်သို့ထွက်ပြေးကြသူများသည်ငြိမ်သက်ချမ်းသာရကြမည်မဟုတ်။ တုရုပြည်ဖျက်သိမ်းရန်ဘုရားသခင်က အာရှုရိသားများအသုံးပြုခြင်းကိုပရောဖက်ဟေရှာယနားမလည်နိုင်။ အံ့အားသင့်သည်။ ခါလဒဲများကြီးစိုးခြင်းအနှစ်(၇၀)ကာလတွင်တုရုပြည်သည် အလူးအလဲခံစားရမည်။ ထိုကာလလွန်မြောက်လျှင်တဖန်ငွေနောက်သို့ပြန်လိုက်မည်။ ကမ္ဘာ့ ဒုစရိုက်မြို့တော်ပြန်ဖြစ်သည်။

၂၃:၁၈“တာရှုမြို့၏ကုန်သွယ်ခြင်း၊အမြတ်ရခြင်းအရာ”ဆိုသည်မှာ ခရစ်တော်ဘုရားဒုတိယအကြိမ်ပြန်လည်ကြွလာခြင်း“တုရုမင်းသမီးမှစ၍လူစုတွင်ဥစ္စာရတတ်သောသူတို့သည်လက်ဆောင်ပဏ္ဍပါလျက်သင့်ကိုဖျောင်းဖျရ ကြမည်”(ဆာ၄၅:၁၂) ကျမ်းပိုဒ်ကိုရည်ညွှန်းကိုးကားခြင်းဖြစ်သည်။ သူ့ဥစ္စာ ပစ္စည်းများသည်သန့်ရှင်းစင်ကြယ်သောပူဇော်သက္ကာအဖြစ်ကပ်လှူကြမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။