Isaiah -21 -

ဟေရှာယအနာဂတ္တိကျမ်း - ၂၁

ရေလွှမ်းမိုးသောတောနှင့်ဆိုင်သောဗျာဒိတ်

1ရေလွှမ်းမိုးသောတောနှင့် ဆိုင်သောဗျာဒိတ်တော်ကား၊ တောင်လေမုန်တိုင်းတိုက်သကဲ့သို့ ကြောက်မက်ဖွယ်သောပြည်၊ တောကြီးမှလာ၏။ 2ကြောက်မက်ဖွယ်သော ရူပါရုံကိုငါမြင်ရ၏။ လုယူတတ်သောသူသည် လုယူ၏။ ဖျက်ဆီးတတ်သောသူသည် ဖျက်ဆီး၏။ ဧလံပြည်သားတို့၊ တက်သွားကြလော့။ မေဒိပြည်သားတို့၊ မြို့ကို ဝိုင်းထားကြလော့။ ထိုမြို့ကြောင့်၊ သူတစ်ပါး ညည်းတွားခြင်းရှိသမျှကို ငါငြိမ်းစေ၏။

3ထိုကြောင့်၊ ငါသည် ခါးနာလှ၏။ သားဖွားသော မိန်းမခံရသကဲ့သို့ ဝေဒနာကိုခံရ၏။ နားမကြားနိုင်အောင် ပြင်းထန်စွာခံရ၏။ မျက်စိမမြင်နိုင်အောင် မှိုင်တွေလျက်ရှိ၏။ 4ငါ့စိတ်နှလုံးသည် မူးလျက်ရှိ၏။ ကြောက်မက်ဖွယ်သောအရာဖြင့် ငါသည် ထိတ်လန့်လျက်ရှိ၏။ ငါပျော်မွေ့သောညကို ဘေးနှင့် ပြည့်စုံစေတော်မူ၏။ 5စားပွဲကို ပြင်ပြီ။ ကင်းစောင့်ကို ထားပြီ။ စားသောက်လျက် နေကြ၏။ အို မင်းများတို့၊ ထကြ၊ လွှားကိုဆီလောင်းကြ။ 6အကြောင်းမူကား၊ ဘုရားရှင်က၊ သင်သွား၍ ကင်းစောင့်ကိုထားလော့။ မြင်သည်အတိုင်း ပြောစေလော့ဟု ငါ့အားမိန့်တော်မူ၏။ 7ကင်းစောင့်သည်လည်း၊ နှစ်စီးစီ နှစ်စီးစီ ချီလာသော မြင်းတပ်တစ်တပ်၊ မြည်းတပ်တစ်တပ်၊ ကုလားအုတ်တပ်တစ်တပ်ကို မြင်၍၊ သတိနှင့် စေ့စေ့ကြည့်ရှု နားထောင်ပြီးလျှင်၊ 8သခင်၊ ကျွန်တော်သည် နေ့အချိန်၌ ကင်းမျှော်စင်ပေါ်မှာအစဉ်ရပ်၍၊ တစ်ညလုံး၌လည်း ကင်းစောင့်လျက်နေပါ၏။ 9ယခုမှာ နှစ်စီးစီ နှစ်စီးစီ ချီလာသော မြင်းစီးသူရဲတပ်ကိုမြင်ပါသည်ဟု ခြင်္သေ့ကဲ့သို့ ကြွေးကြော်၏။ သူကလည်း၊ ဗာဗုလုန်မြို့ ပြိုလဲပြီ၊ ပြိုလဲပြီ၊ သူ၏ဘုရားရုပ်တုဆင်းတုရှိသမျှတို့သည် မြေပေါ်မှာ ကျိုးပဲ့လျက် ရှိကြပါသည်ဟု ထပ်၍ဆိုလေ၏။ 10ငါနင်းနယ်၍ ငါ့တလင်းပြင်မှ ထွက်သောစပါး၊ ကောင်းကင်ဗိုလ်ခြေအရှင် ထာဝရဘုရား၊ ဣသရေလအမျိုး၏ဘုရားသခင် မိန့်တော်မူသည်ကို ငါကြားရသည်အတိုင်း၊ သင်တို့အားငါဆင့်ဆိုသတည်း။

ဒုမာပြည်နှင့်ဆိုင်သောဗျာဒိတ်

11ဒုမာပြည်နှင့်ဆိုင်သော ဗျာဒိတ်တော်ကား၊ အိုကင်းစောင့်၊ ညအမှုကား အဘယ်သို့နည်း။ အို ကင်းစောင့်၊ ညအမှုကား အဘယ်သို့နည်းဟု စိရတောင်ပေါ်က ငါ့ကို ဟစ်ခေါ်လေ၏။ 12ကင်းစောင့်ကလည်း၊ နံနက်သည် လာ၏။ ညလည်းလာ၏။ သင်တို့သည် မေးမြန်းလိုလျှင် မေးမြန်းကြ။ ပြန်သွားကြ။ တစ်ဖန် လာကြဟု ဆိုလေ၏။

အာရပ်ပြည်နှင့်ဆိုင်သောဗျာဒိတ်

13အာရပ်ပြည်နှင့် ဆိုင်သော ဗျာဒိတ်တော်ကား၊ ခရီးသွားသော ဒေဒန်လူစုတို့၊ သင်တို့သည် အာရပ်တောမှာ ညကို လွန်စေရကြမည်။ 14တေမပြည်သားတို့၊ ရေငတ်သောသူအဖို့ ရေကိုယူခဲ့ကြ၏။ ပြေးသောသူကို မုန့်နှင့်ဆီး၍ ကြိုကြ၏။ 15အကြောင်းမူကား၊ သူတို့သည် ဓားဘေးမှလည်းကောင်း၊ ထုတ်သောဓား၊ တင်သောလေး၊ အလွန်ခက်သော စစ်မှုမှလည်းကောင်း ပြေးကြ၏။ 16ထာဝရဘုရားသည် ငါ့အားမိန့်တော်မူသည်ကား၊ အခစားသောသူရေတွက်သည်အတိုင်း၊ တစ်နှစ်တွင် ကေဒါမြို့၏ ဘုန်းအသရေရှိသမျှကွယ်ပျောက်၍၊ 17ကျန်ကြွင်းသော ကေဒါအမျိုးသား၊ လေးစွဲသူရဲတို့သည် အလွန်နည်းကြလိမ့်မည်ဟု၊ ဣသရေလအမျိုး၏ ဘုရားသခင်ထာဝရဘုရား မိန့်တော်မူ၏။

ဟေရှာယအနာဂတ္တိကျမ်း - ၂၁ (အနက်ဖွင့်)

၈။ ဗာဗုလုန်အမျိုး(၂၁:၁-၁၀)

၂၁:၁-၄ အခန်းကြီး(၂၁)တွင်ပါရှိသည့်ဗျာဒိတ်တော်များသည်ဗာဗုလုန်၊ ဧဒုံနှင့်အာရေဗျများအတွက် အမင်္ဂလာသတင်းဖြစ်သည်။

ရေလွှမ်းမိုးသောကန္တရတောဆိုသည်မှာဗာဗုလုန်ပြည်ဖြစ်သည်။ ပါရှန် ပင်လယ်ကွေ့ဒေသကိုမြင်သာအောင်ညွှန်းဆိုသည်။ ဖျက်ဆီးခြင်းတောင် လေမုန်တိုင်းတိုက်သံသည်ကြောက်မက်ဘွယ်မြည်ဟိန်းသည်။ ပါရှန်း (ဧလံပြည်)နှင့်မေဒိ(မိဒျန်)ပြည်သားများကအနှံ့အပြားဖုံးလွှမ်းလာကြမည်။ ဗာဗုလုန်ပြည်ခံစားရသောပျက်စီးခြင်းမျိုးအခြားသူများကြုံဖူးကြမည်မ ဟုတ်။ မြင်ရသောရူပါရုံသည်ကြောက်လန့်စိုးထိတ်ဖွယ်ရာဖြစ်သောကြောင့် ဟေရှာယသည်အကြီးအကျယ်တုန်လှုပ်ခြောက်ခြားသည်။

၂၁:၅ အုပ်စိုးသူမင်းများသည်လုံခြုံရေးအစောင့်အကြပ်ချ၍ပွဲတော် တည်နေကြစဉ်“လွှားကိုဆီလောင်းကြ”ဟူသောသတိပေးစကားကြရသည်။ ဤကျမ်းပိုဒ်သည်(ဒံ၅)တွင်ပါရှိသည့်ဗေရှာဇာမင်း၏ပွဲတော်ကိုရည်ညွှန်းကိုး ကားခြင်းဖြစ်မည်။

၂၁:၆-၁၀ ဘုရားသခင်ကဟေရှာယအားကင်းချထားခိုင်းသည်။ ရန်သူ များသည်မြင်းများရထားများစီး၍အလုံးအရင်းဖြင့်ဝင်ရောက်လာကြမည်။ မြင်းစစ်သည်တော်များသည်နေ့နေ့ညဉ့်ညဉ့်တတွဲစီ၊တတွဲစီဖြင့်အဆက်မ ပြတ်ဝင်ရောက်လာကြမည်။ ထိုစကားသည်မေဒိနှင့်ပါရှန်း(ပေရသိ)များ လက်တွဲဝင်ရောက်လာမည့်အကြောင်းဖြစ်သည်။ ထိုမြင်ကွင်းကြောင့်ဗာဗု လုန်မြို့ပြိုလဲပျက်စီးပါပြီဟု ခြင်္သေ့အော်သံကဲ့သို့ငယ်သံပါအောင်အလန့်တ ကြားထအော်မိသည်။ ထိုသတင်းစကားသည်ဗာဗုလုန်လူများအတွက်သ တင်းဆိုးဖြစ်သော်လည်းဣသရေလများအတွက်စိတ်သက်သာရာဖြစ် သည်။ ဟေရှာယ၏ထိုပရောဖက်ပြုချက်သည်ဗာဗုလုန်မပျက်စီးမီနှစ်ပေါင်း (၂၀၀)ခန့်ကနိမိတ်ဖတ်ခြင်းဖြစ်သည်။

ယနေ့ခေတ်ကာလယုံကြည်သူများသည်လည်းဘုရားသခင်၏နိုင်ငံ တော်ကိုကင်းစောင့်သူများဖြစ်သင့်သည်။

ကင်းစောင့်သည်ဘုရားသခင်၏အမှုတော်တွင်တိုင်ပင်ဖော်တိုင်ပင် ဖက်ဖြစ်သည်။ ချဉ်းကပ်လာသောကြမ္မာဆိုးများကိုစောင့်ကြည့်ရသည်။ သမ္မာကျမ်းစာပါဘုရားသခင်၏အကြံအစည်တော်များကိုအနက်ဖွင့်ဆိုရုံ မျှသာမက၊သမ္မာကျမ်းစာသွန်သင်ချက်နှင့်နေ့စဉ်အသက်တာကိုချင့်ချိန် သုံးသပ်ရသည်။ အခြားသူများကိုဝေငှခြင်း၊တိုက်တွန်းခြင်း၊သတိပေးခြင်း ပြုရသည်။ ဘုရားသခင်သည်ကင်းစောင့်မျှော်စင်တွင်ကင်းစောင့်နေသူကို အထက်မှကြည့်နေပါသည်(ငယ်၇)။ ကင်းစောင့်ခြင်းဖြင့်ဘုရားသခင်နှင့်မိ ဿဟာယဖွဲ့ကြပါစို့။၃၀

၉။ ဒူမာ(ဧဒုံံ)အမျိုး(၂၁:၁၁-၁၂)

ဒုမာကို အီဒုမိ(သို့)ဧဒုံဟုလည်းခေါ်သည်။ စိုးရိမ်သောကရောက်တတ် သောဧဒုံလူမျိုးများကကင်းသမားအားညဉ့်အချိန်မည်သို့ကုန်လွန် ကြောင်းမေးကြသည်။ အာရှုရိတို့၏ခြိမ်းခြောက်သံကတချိန်လုံးစိုးထိတ်စေ သည်။ ဤသို့ဖြေကြားထားပါသည်။

တညဉ့်လုံးပူပန်သောကရောက်သည့်အဖြစ်ဆုံးကာလကုန်လွန်ပါမည်။ နေ့ကုန်လျှင်တခြားညဉ့်ပြန်ရောက်လာမည်။ အကယ်၍ထိုစိုးရိမ်သောကနေ့ ရက်များကုန်ခမ်းလွတ်မြောက်လိုလျှင်အဖြေစကားသည်တစ်ခုတည်းသာဖြစ်ပါ သည်။ နောင်တရလော့။ သင့်မျှော်လင့်ချက်ပြည့်စုံလာမည်။ နေ့ညဉ့်မပြတ်အိပ် ရေးပျက်သည့်ကာလပြီးဆုံးသွားမည်။ နံနက်အာရုဏ်သစ်စန်းထ၍နေခြည် သစ်မှာနွေးကြမည်။၃၁

၁၁။ အာရေဗျအမျိုး(၂၁:၁၃-၁၇)
အာရေဗျအမျိုးလည်းပူပန်သောကရောက်၍စိုးရိမ်ကြောင့်ကြကြမည်။ အာရှုရိစစ်သားများ၏ဘေးရန်မှလွတ်ကင်းအောင်အစာရေစာအငတ်ခံ၍သစ် တောဝါးတောထဲတွင်ပုန်းခိုကြမည်။ အာရေဗျ၏ကောင်းစားမှုသည်တနှစ်သား ခံမည်ဟုဘုရားသခင်ကသတိပေးထားသည်။ တခဏအောက်မြင်ကျော်ကြား ပြီးနောက်တွင်ပြေးလွှားကုန်ရုံးရမည်။ ”အခစားသောသူရေတွက်သည့်အ တိုင်း”ဟူသောစကားသည်တရက်ကိုဆိုလိုခြင်းမဟုတ်။ တနှစ်ထက်ပိုသည် ဟုအနက်ရသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။