Isaiah -14 -

ဟေရှာယအနာဂတ္တိကျမ်း - ၁၄

ယုဒပြည်ကိုပြန်လည်ထူထောင်ခြင်း

1အကြောင်းမူကား၊ ထာဝရဘုရားသည် ယာကုပ်အမျိုးကိုသနား၍ ဣသရေလအမျိုးကို တစ်ဖန်ရွေးကောက်သဖြင့်၊ သူတို့ကို နေရင်းပြည်၌ နေရာချတော်မူလိမ့်မည်။ တစ်ကျွန်းတစ်နိုင်ငံသားတို့သည် သူတို့နှင့်ပေါင်းဖော်၍ ယာကုပ်အမျိုး၌ ဆည်းကပ်ကြလိမ့်မည်။ 2တစ်ပါးအမျိုးသားတို့သည် သူတို့ကို နေရင်းအရပ်သို့ ပို့ဆောင်ကြလိမ့်မည်။ ဣသရေလအမျိုးသားတို့သည် တစ်ပါးအမျိုးသားတို့ကို ထာဝရဘုရား၏ပြည်တော်တွင်၊ ကျွန်နှင့် ကျွန်မအရာ၌ထား၍ စေစားကြလိမ့်မည်။ အထက်က သိမ်းသွားဖူးသော သူတို့ကို တစ်ဖန် သိမ်းယူခဲ့ကြလိမ့်မည်။ ညှဉ်းဆဲဖူးသောသူတို့ကိုလည်း အုပ်စိုးကြလိမ့်မည်။

ဗာဗုလုန်ဘုရင်

3ထိုအခါ ထာဝရဘုရားသည် သင့်ကိုငြိုငြင်ခြင်း၊ စိုးရိမ်ခြင်း၊ သူတစ်ပါးစေစား၍ ဆင်းရဲစွာ အစေကျွန်ခံရခြင်းထဲကနုတ်၍၊ ချမ်းသာပေးတော်မူလျှင်၊ 4သင်သည် ဗာဗုလုန်ရှင်ဘုရင်ကို ရည်ဆောင်၍၊ ပုံစကားကို ဤသို့ မြွက်ဆိုလိမ့်မည်။ အစိုးတရပြုသောသူသည် ဆုံးလေပြီတကား။ ရွှေမြို့တော်သည် ဆုံးလေပြီကား။ 5လူသတ္တဝါတို့ကို အမျက်ထွက်၍၊ အစဉ်မပြတ် ရိုက်ခြင်း၊ အတိုင်းတိုင်း အပြည်ပြည်တို့ကို မာနစိတ်နှင့် အုပ်စိုး၍၊ အစဉ်မပြတ် ညှဉ်းဆဲခြင်းကိုပြုသော အဓမ္မလူတို့၏ တောင်ဝှေးကိုလည်းကောင်း၊ 6ထိုသို့ အစိုးရသောသူတို့၏ ရာဇလှံတံကိုလည်းကောင်း၊ ထာဝရဘုရားချိုးတော်မူပြီ။ 7မြေတစ်ပြင်လုံးသည် ငြိမ်ဝပ်ချမ်းသာခြင်းရှိ၏။ ရွှင်လန်းစွာ သီချင်းဆိုသံနှင့် ကြွေးကြော်ကြ၏။ 8ထင်းရှူးပင်နှင့် လေဗနုန်အာရဇ်ပင်တို့က၊ သင်တို့သည် လဲပြီးသည်နောက်၊ ငါတို့ကို ခုတ်လှဲသောသူသည် မတက်မလာရဟု သင့်ကိုရည်ဆောင်၍ ဝမ်းမြောက်ကြ၏။

9သင်သည် ရောက်လာသောအခါ၊ အောက်အရပ် မရဏနိုင်ငံသည် ကြိုဆိုအံ့သောငှာ လှုပ်လေ၏။ သင်္ချိုင်းသားများနှင့် လောကီမင်းများအပေါင်းတို့ကို သင့်အတွက်ကြောင့် နှိုးဆော်လေ၏။ အတိုင်းတိုင်း အပြည်ပြည်သော ရှင်ဘုရင်အပေါင်းတို့ကို ရာဇပလ္လင်တို့မှထစေ၏။ 10ထိုသူအပေါင်းတို့က၊ သင်သည်လည်း ငါတို့ကဲ့သို့ အားနည်းပါသည်တကား။ ငါနှင့် တူပါသည်တကား။ 11သင်၏ဘုန်းအသရေနှင့် သင်၏တူရိယာမျိုး အသံဗလံတို့ကို မရဏနိုင်ငံတွင် ရှုတ်ချလေပြီတကား။ သင့်အောက်၌ ပိုးကောင်များကိုခင်းလျက်၊ သင့်အပေါ်၌ တီကောင်များကို ခြုံလျက်ရှိပါသည်တကားဟု သင့်ကိုနှုတ်ဆက်၍ ပြောဆိုကြလိမ့်မည်။

12အို နံနက်သား၊ မိုးသောက်ကြယ်၊ သင်သည် ကောင်းကင်က ကျလေပြီတကား။ အပြည်ပြည်တို့ကို နှိပ်စက်သောသင်သည်၊ မြေတိုင်အောင် ခုတ်လှဲခြင်းကို ခံရလေပြီတကား။ 13သင်ကလည်း၊ ကောင်းကင်ပေါ်သို့ ငါတက်မည်။ ဘုရားသခင်၏ကြယ်တို့အပေါ်မှာ ငါ့ပလ္လင်ကို ငါချီးမြှောက်မည်။ မြောက်မျက်နှာဘက်၊ ဗျာဒိတ်တော်တောင်ပေါ်မှာ ငါထိုင်မည်။ 14မိုးတိမ်ထိပ်ပေါ်သို့ ငါတက်မည်။ အမြင့်ဆုံးသောဘုရားကဲ့သို့ ငါနေမည်ဟု စိတ်အကြံရှိလေပြီ။ 15သို့သော်လည်း၊ သင်သည်မရဏနိုင်ငံ၊ သင်္ချိုင်းတွင်းထဲသို့ နှိမ့်ချခြင်းကို ခံရလေပြီ။

16သင့်ကို မြင်သောသူတို့သည် စေ့စေ့ကြည့်ရှု၍ ဆင်ခြင်ပြီးလျှင်၊ မြေကြီးကိုတုန်လှုပ်စေ၍၊ တိုင်းနိုင်ငံများကို လှုပ်ခြောက်သောသူကား ဤသူလော။ 17လောကီနိုင်ငံကို တောကဲ့သို့ဖြစ်စေ၍၊ မြို့များကို ဖျက်ဆီးသောသူ၊ အချုပ်ခံရသောသူတို့ကို မိမိနေရာသို့ တစ်ဖန်မလွှတ်သောသူကား ဤသူလော။ 18အပြည်ပြည်သော ရှင်ဘုရင်အပေါင်းတို့သည် အသီးအသီး မိမိတို့စေတီ၌ ဘုန်းအသရေနှင့် အိပ်ကြ၏။ 19သင့်ကိုမူကား၊ ရွံရှာဖွယ်သောသစ်ခက်ကဲ့သို့ သင်္ချိုင်းထဲက ထုတ်ပစ်ရ၏။ ကွပ်မျက်သောသူ၊ ဓားဖြင့်ထိုးသောသူ၊ သင်္ချိုင်းတွင်း၌ ကျောက်စုထဲသို့ချသောသူများနှင့် ဖုံးအုပ်လျက်၊ ခြေဖြင့်ကျော်နင်းသော အသေကောင်ဖြစ်လေ၏။ 20သူတစ်ပါးတို့နှင့် ရောနှော၍ သင်္ဂြိုဟ်ခြင်းကိုမခံရ။ အကြောင်းမူကား၊ မိမိပြည်ကို ဖျက်ဆီးပြီ။ မိမိအမျိုးသားချင်းတို့ကို သတ်လေပြီ။ အဓမ္မပြုသောသူတို့၏အနွယ်သည် ဂုဏ်အသရေအလျှင်းမရှိရဟု ပြောဆိုကြလိမ့်မည်။

21သူ၏သားမြေးတို့သည်မထ၊ မြေကြီးကိုမပိုင်၊ မြေတစ်ပြင်လုံးတွင် ရန်သူများကို မနှိုးဆော်နိုင်မည်အကြောင်း၊ သူတို့အဖို့ ဘိုးဘေးတို့၏အပြစ်ကြောင့် ကွပ်မျက်ခြင်းကိုပြင်ကြလော့။

22ကောင်းကင်ဗိုလ်ခြေအရှင် ထာဝရဘုရား မိန့်တော်မူသည်ကား၊ ငါသည် သူတို့တစ်ဖက်၌ထ၍ ဗာဗုလုန်မြို့၏နာမနှင့် အကြွင်းအကျန်ကိုလည်းကောင်း၊ သားမြေးတို့ကိုလည်းကောင်း ပယ်ဖြတ်မည်ဟု ထာဝရဘုရား မိန့်တော်မူ၏။ 23တစ်ဖန်လည်း၊ ငါသည် ထိုမြို့ကို ဖြူကောင်များနေရာ၊ ရေလွှမ်းမိုးရာအရပ်ဖြစ်စေမည်။ ဖျက်ဆီးခြင်း၏ တံမြက်စည်းဖြင့်လှည်းမည်ဟု ကောင်းကင်ဗိုလ်ခြေအရှင် ထာဝရဘုရားမိန့်တော်မူ၏။

အာရှုရိအမျိုးသားတို့ကိုဖျက်ဆီးမည်

24ကောင်းကင်ဗိုလ်ခြေအရှင် ထာဝရဘုရားသည် ကျိန်ဆို၍မိန့်တော်မူသည်ကား၊ 25ငါ၏မြေပေါ်မှာ အာရှုရိမင်းကို ငါနှိပ်စက်မည်။ ငါ၏တောင်ရိုးပေါ်မှာ ခြေဖြင့်ကျော်နင်းမည်ဟု ငါကြံစည်သည်အတိုင်းဖြစ်၍၊ ငါစီရင်ချက်လည်း တည်ရလိမ့်မည်။ ထိုအခါ သူ၏ထမ်းပိုးကို သူတစ်ပါးအပေါ်ကရွှေ့၍၊ သူတို့ပခုံးပေါ်မှာ တင်သောဝန်ကို ချရသောအခွင့်ရှိလိမ့်မည်။ 26မြေတစ်ပြင်လုံးတွင် ထိုသို့ကြံစည်တော်မူ၏။ ခပ်သိမ်းသော ပြည်တို့အပေါ်မှာ ထိုသို့ လက်တော်ကိုဆန့်လျက် ရှိ၏။ 27ကောင်းကင်ဗိုလ်ခြေအရှင် ထာဝရဘုရား၏အကြံတော်ကို အဘယ်သူ ဖျက်လိမ့်မည်နည်း။ ဆန့်တော်မူသောလက်တော်ကို အဘယ်သူလှန်လိမ့်မည်နည်း။

ဖိလိတ္တိအမျိုးသားတို့ကိုဖျက်ဆီးမည်

28အာခတ်မင်းကြီး အနိစ္စရောက်သောနှစ်တွင် ခံရသောဗျာဒိတ်တော်ဟူမူကား၊ 29အို ဖိလိတ္တိပြည်လုံး၊ သင့်ကိုရိုက်သော ကြိမ်လုံးကျိုးသည်ကိုထောက်၍၊ ဝမ်းမမြောက်နှင့်။ ထိုမြွေအမျိုးထဲက မြွေဆိုးပေါက်လိမ့်မည်။ သူ၏အနွယ်သည်လည်း ပျံတတ်သော မီးမြွေဖြစ်လိမ့်မည်။ 30အတိုင်းထက်အလွန် ဆင်းရဲသောသူတို့သည် စားရကြလိမ့်မည်။ ဆင်းရဲ ငြိုငြင်သောသူတို့သည် ဘေးလွတ်လျက် အိပ်ရကြလိမ့်မည်။ ငါသည် သင်၏အမြစ်ကို သွေ့ခြောက်ခြင်းအားဖြင့် သတ်၍၊ သင်၏အကြွင်းကိုလည်း မြွေဆိုးသည် ကွပ်မျက်လိမ့်မည်။ 31အို တံခါး၊ ညည်းတွားလော့။ အို မြို့၊ ငိုကြွေးမြည်တမ်းလော့။ အို ဖိလိတ္တိပြည်လုံး၊ သင်သည် မှိုင်တွေလျက်ရှိ၏။ မြောက်မျက်နှာမှ မီးခိုးထွက်လာ၏။ ထိုအလုံးအရင်း၌ တစ်ယောက်တခြားစီ နေသောသူမရှိ။ 32တစ်ပြည်တစ်နိုင်ငံမှ ရောက်လာသော သံတမန်တို့အား အဘယ်သို့ ပြန်ပြောရမည်နည်းဟူမူကား၊ ထာဝရဘုရားသည် ဇိအုန်မြို့ကို တည်ထောင်တော်မူသည် ဖြစ်၍၊ ကိုယ်တော်၏ဆင်းရဲသားတို့သည် ထိုမြို့၌ ကိုးစားကြ၏။

ဟေရှာယအနာဂတ္တိကျမ်း - ၁၄ (အနက်ဖွင့်)

၁၄:၁-၂ ဘုရားသခင်သည်ဣသရေလလူမျိုးအားကရုဏာတော်မပြတ်၊ သံယောဇဉ်အမျှင်တန်းနေသောကြောင့်မိမိတို့နေရပ်ဌာနေသို့ပြန်လည်ခြေချ ခွင့်ပြုမည်။ တပါးအမျိုးသားများသည်လည်းဘုရားသခင်ထံ၌ငြိမ်သက်ချမ်း မြေ့စွာစုစည်းကြမည်။ ဣသရေလများကိုပြန်လည်သိမ်းယူ၍ယခင်အတိုင်းဘုရားသခင်၏အစေခံများဖြစ်ကြမည်။

ယာကုပ်နှင့်ဣသရေလမိသားစုဆိုသည်မှာဗာဗုလုန်သို့အဖမ်းခံသွား သောဂျူးလူမျိုးများဖြစ်သည်။ ဘုရားသခင်ကရွေးချယ်ခြင်းဆိုသည်မှာဖမ်း ဆီးခြင်းခံရသောတိုင်းပြည်မှပြန်လည်ရွေးထုတ်ပြီး၊မွေးရပ်မြေသို့ပြန်လည်ပို့ ဆောင်မည့်အကြောင်းဖြစ်သည်။ တကျွန်းတနိုင်ငံသားများသည်ထိုယာကုပ် အမျိုး၌လာရောက်ဆည်းကပ်မှီခိုကြမည်။ မိမိနေရပ်ဌာနေသို့ပြန်ရောက်မည့် သူများဆိုသည်မှာ ရေရုမင်းအခြားသူများအကူအညီဖြင့်ပြန်လည်ရောက်ရှိမည့် ဂျူးလူမျိုးဖြစ်သည်။

၁၄:၃-၁၁ ညှဉ်းပန်းနှိပ်စပ်ခြင်း၊ဆင်းရဲကြပ်တည်းခြင်းဘေးဒဏ်မှလွတ် မြောက်လာသောဣသရေလတို့သည်ဗာဗုလုန်ဘုရင်အားဆန့်ကျင်သည့်သီချင်း များကိုအော်ဟစ်သီဆိုကြမည်။ ဗာဗုလုန်ဘုရင်၏တန်ခိုးအာဏာနှင့်စွမ်းပကာ များကိုဘုရားသခင်ကရိုက်ချိုးပစ်မည်။ အာဏာရှင်စနစ်ချုပ်ငြိမ်းမည်။ ကမ္ဘာ မြေနှင့်သစ်တောဝါးတောများသက်သာရာရကြမည်။ ဗာဗုလုန်စစ်သားများ လည်းငြိမ်ကျသွားမည်။ ဗာဗုလုန်၏အသံဗလံများကိုမရဏနိုင်ငံကနားငြီး၍ ရှုတ်ချနေပြီ။ ဗာဗုလုန်ဘုရင်၏အဆောင်အယောင်များနှင့်အခမ်းအနားများ သည်ပြည့်ဖုံးကာချခဲ့ပြီ။ နန်းတွင်းမှဂီတသံများ၊ကချေသည်များ၏အသံများ လည်းမကြားရတော့ပါ။ ပိုးကောင်များကိုမွေ့ယာထားလျက်တီကောင်များကို ခြုံစောင်အဖြစ်ထား၍အိပ်စက်နေရပြီ။

၁၄:၁၂-၁၇ ကဲ့ရဲ့ ပြစ်တင်ခြင်းသီချင်းများဆက်ကာဆက်ကာပေါ်လာသည်။ ဗာဗုလုန် ပြိုလဲကျရှံးခြင်းသည်စာတန်(လူစီဖာ)၂၅ ကိုယ်တိုင်ပြုတ်ကျခြင်း ဖြစ်သည်။ Ryrieက“ဤအကြောင်းသည်စာတန်ကိုရည်ညွှန်းခြင်းဖြစ်သည်။ ထိုအဖြစ် အပျက်များကိုခရစ်တော်ကိုယ်တိုင်က(လု၁၀:၁၈)တွင်ဆိုထားသည်။ ထို့အပြင်(ဟေရှာ၁၄:၁၃-၁၄)တွင်နှုတ်ဖြင့်အတိအလင်းဆိုထားသည်။ ထိုသူသည်စာတန်မာရ်နတ်ဖြစ်သည်(၁တိ၃:၆)နှင့်ယှဉ်ဖတ်)၂၆ ဟုဆိုသည်။ အဘယ့် ကြောင့်ဆိုသော်ထိုနံနက်သား၊မိုးသောက်ကြယ်သည်ဘုရားသခင်၏အထက်တွင်နေရာယူမည်တကဲကဲလုပ်နေသဖြင့်၊ကောင်းကင်မှပြုတ်ကျသည်။ အပိုဒ် ငယ်၁၃-၁၄တွင်စာတန်၏သရုပ်သကန်ကိုရှင်းပြထားသည်။ ငါ့ပလ္လင်ကိုငါချီး မြောက်မည်ဟုစာတန်ကဘုရားသခင်ကိုအန်တုဖက်ပြိုင်သည်။ ထို့ကြောင့်မရဏနိုင်ငံသို့ပစ်ချလိုက်သည်။ ကောင်းကင်ယံထက်ဘုရားသခင်ပေါ်သို့တက်ချင် သောမာနသခင်စာတန်မာရ်နတ်သည်အနိမ့်ဆုံးသောဘုံဘဝမရဏနိုင်ငံသို့ပစ် ချခြင်းခံရပြီ။

၁၄:၁၈-၂၁ ဗာဗုလုန်အကြောင်းကိုပြန်လည်ရှင်းပြသည်။ ရှင်ဘုရင်များ သည်မိမိတို့သုဿန်အသီ:သီးတွင်အကျအနသင်္ဂြိုလ်ခံရလေ့ရှိကြသော်လည်း ဗာဗုလုန်မင်းသည်ထိုအခွင့်အရေးမရ။ သုဿန်မှာသင်္ဂြိုလ်ခြင်းမခံရ။ သားသမီးများသည်လည်းထီးမွေနန်းမွေမခံရ။ သမိုင်းမှတ်တမ်းမှတ်ရာမထားခဲ့။ အုတ် ကြားမြက်ပေါက်၊ရေမျှောကမ်းတင်ဘဝဖြင့်ဘဝနိဂုံးချုပ်မည်။

၁၄:၂၂-၂၃ ပျက်စီးသွားသောဗာဗုလုန်မြို့တွင်အကြွင်းအကျန်၊အမှိုက်သ ရိုက်တစ်စမျှမကျန်အောင်တံမြက်စည်းဖြင့်လှဲချပစ်မည်။ ဗာဗုလုန်နှင့်ပတ်သက်သောအရာတစ်ခုမှမကျန်ရှိစေရ။

၂။ အာရှုရိအမျိုး(၁၄:၂၄-၂၇)

အာရှုရိပျက်စီးသည့်အကြောင်းသင်ခန်းစာခေါင်းစဉ်ပြောင်းထားသည်။ အာရှုရိစစ်သားများသည်ဣသရေလတောင်ပေါ်တွင်ချေမှုန်းခြင်းခံနေကြရပြီ။၂၇

ဤပရောဖက်ပြုချက်သည်ဘေးဒဏ်ကြီးကာလ၊မြောက်ပိုင်းနိုင်ငံတစ်ခု လုံးပြားပြားဝပ်၍တံမြက်စည်းလှည်းပြီးဧမာနွေလတိုင်းပြည်ဖြစ်သည့်အချိန် ကာလတွင်ပြည့်စုံမည်။

၃။ ဖိလိတ္တိအမျိုး(၁၄:၂၈-၃၂)

၁၄:၂၈-၃၁ အာခတ်မင်းနတ်ရွာစံသော်လည်းဖိလိတ္တိအမျိုးသည်မပျော် ရွှင်နိုင်။ ထိုမင်းသည်ဥဇယိမင်း၏မြေး၊ ဖိလိတ္တိအမျိုးကိုနှိပ်ကွပ်သူ(ဤနေရာ တွင်ကြိမ်လုံးဟုဆိုသည်)ဖြစ်သည် (၆ရာ၂၆:၆၊၇)။ ထိုမင်းဆက်ခံသူဟေဇကိ မင်းကဖိလိတ္တိလူမျိုးကိုမြွေပွေး၊မြွေဟောက်ပမာတိုက်ခိုက်ပေါက်သတ်မည် (၄ရာ၁၈:၈)။ ငတ်မွတ်ခေါင်းပါး၍အချင်းချင်းလုယက်သတ်ဖြတ်ခွင့်ပြုသော် လည်းလုံခြုံစေမည်။ နယ်ချဲ့ကျူးကျော်ရေးသမားအာရှုရိတို့အားမီးခိုးတိမ်လိပ် သဖွယ်မြောက်အရပ်မှဝင်လာစေမည်။ သို့သော်လည်းဘုရားသခင်၏လူများကို ယေရုရှလင်တွင်လုံခြုံစွာသိမ်းဆည်းထားမည်။

၁၄:၃၂ ထိုအကျိုးအကြောင်းအားတပါးအမျိုးသားများကမေးမြန်းလာ ကြလျှင်ဘုရားသခင်၏ကတိတော်များပြည့်စုံလာပြီဟုဖြေကြားမည်။ ဇိအုန် တောင်နှင့်ပတ်သက်သောကတိတော်များပြည့်စုံ၍ကိုယ်တော်၌ဆင်းရဲသား များသည်ယေရုရှလင်ကိုမှီခိုကြမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။