Isaiah -10 -

ဟေရှာယအနာဂတ္တိကျမ်း - ၁၀

1ငတ်မွတ်သောသူတို့ကို တရားရှုံးစေခြင်းငှာလည်းကောင်း၊ 2ငါ၏လူမျိုးတွင် ဆင်းရဲသားတို့၏အခွင့်အရာကို ရုပ်သိမ်းခြင်းငှာလည်းကောင်း၊ မုဆိုးမတို့ကို ညှဉ်းဆဲ၍၊ မိဘမရှိသောသူတို့၏ဥစ္စာကို လုယူခြင်းငှာလည်းကောင်း၊ မတရားသဖြင့် စီရင်သောသူ၊ ကျပ်တည်းစွာသော မှတ်ချက်ကို မှတ်သားသော စာရေးတို့သည် အမင်္ဂလာရှိကြ၏။ 3ငါကြည့်ရှုစီရင်သည်ကာလ၊ အဝေးကရောက်လတ္တံ့သော ဖျက်ဆီးခြင်းဖြစ်သည်ကာလ၌၊ သင်တို့သည် ချမ်းသာရအံ့သောငှာ၊ အဘယ်သူထံသို့ ပြေးကြလိမ့်မည်နည်း။ သင်တို့စည်းစိမ်ဥစ္စာကို အဘယ်မှာသိုထားကြလိမ့်မည်နည်း။ 4ငါ့ကျေးဇူးကို မခံရသောသူတို့သည်၊ ချုပ်ထားလျက်ရှိသော သူတို့အောက်မှာ ဦးချရကြလိမ့်မည်။ အသေသတ်ခြင်းကိုခံရသော သူတို့အောက်မှာ လဲရကြလိမ့်မည်။ သို့သော်လည်း၊ အမျက်တော်သည်မငြိမ်း၊ လက်တော်သည် ဆန့်လျက်ရှိသေး၏။

အာရှုရိကိုအသုံးပြုခြင်း

5အာရှုရိလူသည် အမင်္ဂလာရှိ၏။ ငါ့အမျက်၏လှံတံဖြစ်၏။ သူကိုင်သောတောင်ဝှေးသည် ငါဒဏ်ပေးစရာဖို့ ဖြစ်၏။ 6အဓမ္မလူမျိုးရှိရာသို့ သူ့ကိုငါစေလွှတ်မည်။ ငါ့အမျက်ခံရာလူစုကို လုယူဖျက်ဆီး၍၊ လမ်း၌ ရွှံ့ကိုကဲ့သို့ ကျော်နင်းစေခြင်းငှာ၊ သူ့ကိုငါမှာထားမည်။ 7သို့သော်လည်း၊ သူသည် အခြားသောအကြံ၊ အခြားသောအလိုရှိ၏။ သူသည်ဖျက်ဆီး၍၊ များစွာသောလူမျိုးတို့ကို ပယ်ရှင်းခြင်းငှာ အလိုရှိ၏။ 8သူသည် အဘယ်သို့ဆိုသနည်းဟူမူကား၊ ငါ၏မှူးမတ်တို့သည် မင်းကြီးဖြစ်ကြသည် မဟုတ်လော။ 9ကာလနောမြို့သည် ခါခေမိတ်မြို့ကဲ့သို့လည်းကောင်း၊ ဟာမတ်မြို့သည် အာပဒ်မြို့ကဲ့သို့လည်းကောင်း၊ ရှမာရိမြို့သည် ဒမာသက်မြို့ကဲ့သို့လည်းကောင်း ဖြစ်သည်မဟုတ်လော။ 10ရှမာရိရုပ်တုနှင့် ယေရုရှလင်ရုပ်တုထက် သာ၍မြတ်သော ရုပ်တုဆင်းတုကို ကိုးကွယ်သောတိုင်းနိုင်ငံများကို ငါလုယူသကဲ့သို့လည်းကောင်း၊ 11ရှမာရိမြို့နှင့် သူ၏ရုပ်တုတို့ကို ငါပြုသကဲ့သို့လည်းကောင်း၊ ယေရုရှလင်မြို့နှင့် သူ၏ရုပ်တုတို့ကို ငါပြုမည်မဟုတ်လောဟု ဆိုတတ်၏။

12သို့သော်လည်း၊ ထာဝရဘုရားသည် ဇိအုန်တောင်နှင့် ယေရုရှလင်မြို့၌ အမှုတော်ကိုလက်စသတ်တော်မူပြီးမှ၊ အာရှုရိရှင်ဘုရင်၏ မာနထောင်လွှားခြင်း၊ မော်သောမျက်နှာနှင့် စော်ကားခြင်းကို ငါကြည့်ရှု၍စီရင်မည်။ 13ထိုမင်းက၊ ငါသည် ကိုယ်လက်ရုံးသတ္တိနှင့် ကိုယ်ဉာဏ်အားဖြင့် ငါတတ်နိုင်၏။ ပညာသတိနှင့် ငါပြည့်စုံ၏။ လူမျိုးနေရာ အပိုင်းအခြားတို့ကို ငါရွှေ့ပြီ။ သူတို့၏ဘဏ္ဍာကိုလုယူပြီ။ ဘုရင်တို့ကို သူရဲကဲ့သို့နှိမ့်ချပြီ။ 14ငါ့လက်သည် ငှက်သိုက်ကို တွေ့သကဲ့သို့၊ လူတို့၏ဥစ္စာပစ္စည်းကိုတွေ့ပြီ။ စွန့်ပစ်သောငှက်ဥတို့ကို သိမ်းယူသကဲ့သို့၊ မြေကြီးတန်ဆာ ရှိသမျှတို့ကို ငါသိမ်းယူပြီ။ အဘယ်သူမျှ အတောင်ကိုမလှုပ်၊ နှုတ်သီးကိုမဖွင့်၊ မမြည်မတွန်ဟုဆိုသည်ဖြစ်၍၊ 15ကြိမ်လုံးသည် ကိုင်သောသူကို လှုပ်သကဲ့သို့လည်းကောင်း၊ တောင်ဝှေးသည် မိမိသခင်ကို ချီကြွသကဲ့သို့လည်းကောင်း၊ ပုဆိန်သည် ခုတ်သောသူကို စော်ကားရမည်လော။ လွှသည် တိုက်သောသူကို ရန်ပြု၍ထောင်လွှားရမည်လော။ 16ထိုကြောင့်၊ ကောင်းကင်ဗိုလ်ခြေသခင် အရှင်ထာဝရဘုရားသည် ထိုမင်း၏ဆူဝသောသူတို့၌ ပိန်ကျုံခြင်းကို သွင်းပေးတော်မူမည်။ သူ၏ဘုန်းအောက်၌လည်း မီးလောင်သကဲ့သို့ လောင်စေခြင်းငှာ ရှို့တော်မူမည်။ 17ဣသရေလအမျိုး၏အလင်းသည် မီးဖြစ်တော်မူမည်။ သန့်ရှင်းသောဘုရားသည် မီးလျှံဖြစ်တော်မူမည်။ တစ်နေ့ချင်းတွင်၊ ထိုမင်း၏ ဆူးပင်အမျိုးမျိုးတို့ကို မီးရှို့၍၊ ကျွမ်းစေတော်မူမည်။ 18တော၏ဘုန်းကိုလည်းကောင်း၊ အသီးအနှံထွက်သော လယ်၏ဘုန်းကိုလည်းကောင်း၊ သူ၏ကိုယ်ခန္ဓာ နာမ်ဝိညာဉ်နှင့်တကွ ကုန်စေတော်မူသဖြင့်၊ ထိုမင်းသည် နာသောသူကဲ့သို့အားလျော့လိမ့်မည်။ 19ကြွင်းသောတောပင်တို့ကို သူငယ်သည် စာရင်းယူနိုင်အောင်၊ အနည်းငယ်မျှသာ ဖြစ်လိမ့်မည်။

ကြွင်းသောသူသာနောင်တရခြင်း

20ထိုအခါမှစ၍၊ ဘေးလွတ်လျက်ကြွင်းသော ဣသရေလအမျိုးနှင့် ယာကုပ်အမျိုးသားတို့သည်၊ မိမိတို့ကို ညှဉ်းဆဲသောသူ၌ နောက်တစ်ဖန် မကိုးစားဘဲ၊ ဣသရေလအမျိုး၏ သန့်ရှင်းသောအရှင်ထာဝရဘုရား၌ အမှန်ကိုးစားကြလိမ့်မည်။ 21ကြွင်းသောသူတည်းဟူသော၊ ယာကုပ်အမျိုး၌ ကြွင်းသောသူတို့သည် တန်ခိုးကြီးတော်မူသော ဘုရားသခင့်ထံသို့ ပြန်လာကြလိမ့်မည်။ 22အိုဣသရေလအမျိုး၊ သင်၏အမျိုးသားတို့သည် သမုဒ္ဒရာသဲလုံးနှင့်အမျှ များသော်လည်း၊ ကြွင်းသောသူတို့သာလျှင် ပြန်လာကြလိမ့်မည်။ စီရင်ဆုံးဖြတ်သော သုတ်သင်ပယ်ရှင်းခြင်းသည် တရားသဖြင့် လွှမ်းမိုးရလိမ့်မည်။ 23ကောင်းကင်ဗိုလ်ခြေအရှင် ထာဝရဘုရားသည် မြေတစ်ပြင်လုံးအလယ်၌ စီရင်ဆုံးဖြတ်သော၊ သုတ်သင်ပယ်ရှားခြင်းကို ပြုတော်မူလိမ့်မည်။

အာရှုရိပြည်ကိုအပြစ်ဒဏ်ခတ်မည်

24ထိုကြောင့်၊ ကောင်းကင်ဗိုလ်ခြေသခင်အရှင် ထာဝရဘုရား မိန့်တော်မူသည်ကား၊ ဇိအုန်မြို့၌နေသောငါ၏လူမျိုး၊ အာရှုရိမင်းကြောင့် မကြောက်နှင့်။ သူ၏ကြိမ်လုံးနှင့် သင့်ကိုရိုက်မည်။ အဲဂုတ္တုမင်းပြုသည်နည်းတူ သူ၏လှံတံကို သင်၏အပေါ်မှာမိုးလိမ့်မည်။ 25သို့သော်လည်း၊ ခဏကြာပြီးမှ သူတို့သည်ပျက်စီးခြင်းသို့ ရောက်သောအားဖြင့်၊ ငါ့အမျက်သည်ငြိမ်း၍၊ ငါ့စိတ်လည်းပြေ လိမ့်မည်။ 26ကောင်းကင်ဗိုလ်ခြေအရှင် ထာဝရဘုရားသည် ဩရဘကျောက်နားမှာ မိဒျန်အမျိုးသားတို့ကို ဒဏ်ခတ်သကဲ့သို့လည်းကောင်း၊ ပင်လယ်ကို လှံတံတော်နှင့် မိုးသကဲ့သို့လည်းကောင်း၊ ထိုမင်းအဖို့ ဘေးဥပဒ်ကိုပြင်ဆင်၍၊ အဲဂုတ္ထုလက်ထက်၌ကဲ့သို့ တစ်ဖန်လှံတံတော်ကို ချီတော်မူမည်။ 27ထိုကာလ၌ သူ၏ဝန်ကို သင်၏ပခုံးပေါ်ကလည်းကောင်း၊ သူ၏ထမ်းပိုးကို သင်၏လည်ပင်းပေါ်ကလည်းကောင်းချရ၏။ ဆူဝခြင်းကျေးဇူးကြောင့် ထမ်းပိုးပျက်စီးရ၏။

ရန်သူများဝင်ရောက်တိုက်ခိုက်ခြင်း

28အာရပ်မြို့သို့ ရောက်လေပြီ။ မိဂရုန်မြို့တိုင်အောင် လွန်သွားပြီ။ မိတ်မတ်မြို့၌ လှည်းများကိုချထားပြီ။ 29တောင်ကြားကို လွန်ကြပြီ။ ဂေဗမြို့၌ စခန်းချကြပြီ။ ရာမမြို့သည် ကြောက်လန့်လျက်ရှိ၏။ ရှောလုနေရာ ဂိဗာမြို့သည် ပြေး၏။ 30အို ဂလ္လိမ်မြို့သမီး၊ ကြွေးကြော်လော့။ အို လဲရှမြို့၊ နားထောင်လော့။ အာနသုတ်မြို့သည် အမင်္ဂလာရှိ၏။ 31မာဒမေနမြို့သည် ပြောင်းသွားပြီ။ ဂေဗိမ်မြို့သားတို့သည် လွတ်အောင်ပြေးကြ၏။ 32နောဘမြို့၌ တစ်ရက်နေပြီးမှ၊ ဇိအုန်သတို့သမီး၏တောင်တည်းဟူသော ယေရှုရှလင်တောင်ကိုရွယ်၍၊ မိမိလက်ကို လှုပ်လိမ့်မည်။ 33ကောင်းကင်ဗိုလ်ခြေသခင်အရှင် ထာဝရဘုရားသည် ကြောက်မက်ဖွယ်သောအခြင်းအရာနှင့် သစ်ပင်အထွတ်ကိုပယ်ရှင်းတော်မူမည်။ အရပ်မြင့်သော အခက်တို့ကိုခုတ်လှဲ၍၊ ကြီးမားသောအခက်တို့ကို နှိမ့်ချတော်မူမည်။ 34တောအုပ်ကို ပုဆိန်နှင့် ခုတ်ပယ်တော်မူ၍၊ လေဗနုန်တောသည် တန်ခိုးကြီးသောသူ၏လက်အားဖြင့် လဲလျက်နေလိမ့်သတည်း။

ဟေရှာယအနာဂတ္တိကျမ်း - ၁၀ (အနက်ဖွင့်)

၁၀:၁-၄ အတင်းအဓမ္မကြံစည်သောမင်း၊ဆင်းရဲသားများကိုနှိပ်စက်သူ၊မတရားသဖြင့်စီရင်တတ်သောသူများသည်အမင်္ဂလာ(အကုသိုလ်ကောင်)များ ဖြစ်သည်။ ဘုရားသခင်၏တရားစီရင်ခြင်းနေ့ရက်ကာလ၌ထိုသူများသည်ရှိရှိ သမျှလက်လွှတ်ဆုံးကြမည်။ မူလရှိသည့်ချမ်းသာခြင်းများကိုလည်းပျက်စီးမည်။ စာရင်းထဲမှပါသွားမည်။

၁၀:၅-၁၁ ယုဒများအားအရေးယူစီရင်ရန်ဘုရားသခင်သည်အာရှုရိများကိုလက်နက်တန်ဆာအဖြစ်အသုံးပြုသည်။ သို့သော်အာရှုရိများသည်ထိုထက် ကြီးမားသောကိုယ်ပိုင်စီမံကိန်းရှိသည်။ ကမ္ဘာကြီးတစ်ခုလုံးကိုသိမ်းပိုက်ပိုင်ဆိုင် ချင်သည်။ ရှင်ဘုရင်မှူးမတ်များ(စစ်သူရဲကောင်းများ)အပေါ်ဂုဏ်ပြုကြွားဝါ ခြင်းသည်တိုက်ခိုက်သိမ်းပိုက်ထားသောတိုင်းနိုင်ငံများထက်ကြီ:ကျယ်သည်။ ဣသရေလနှင့်ယုဒပြည်များမှသိမ်းပိုက်မည့်ရုပ်တုဆင်းတုအရုပ်ဘုရားများ သည်ဖမ်းဆီးသိမ်းဆည်းထားသောအခြားနိုင်ငံများမှဘုရားရုပ်များနှင့်ယှဉ် လျှင်ပြောပလောက်စရာမရှိ။

၁၀:၁၂-၁၉ ရှင်ဘုရင်နှင့်စစ်သူကြီးများသည်အာရှုရိပြည်၏ဂုဏ်ယူဝင့် ကြွားရာဂုဏ်သိက္ခာဖြစ်သော်လည်းဘုရားသခင်အမြင်တွင်ရက်စက်သူများ ဖြစ်သည်။ ထို့ကြောင့်အာရှုရိမင်းများကိုဘုရားရှင်ကအရေးယူဒဏ်ပေးမည်။ ကျမ်းပိုဒ်နှောင်းပိုင်းတွင်အာရှုရိပြည်၏အင်အားကြီးမားပုံနှင့်ဉာဏ်ပညာ ပြည့်ဝပုံကိုဖော်ပြထားသည်။ ဘုရားသခင်လက်တော်ထဲမှကြိမ်လုံးနှင့်တောင် ဝှေးသည်ဂုဏ်ယူမာနကြီးခြင်းမဟုတ်။ အာရှုရိပြည်သားများဆုံးမဖို့ဖြစ်သည်။ သစ်တောအုပ်ကြီးသမျှအသီးအနှံကြွယ်ဝသောအာရှုရိပြည်ကိုအသီးအနှံတလုံး မှမကျန်အောင်ပြုလုပ်ဦးမည်။ ဣသရေလတို့၏အလင်းသည်ဘုရားသခင်၏ အလင်းတော်ဖြစ်သည်။ ဘုရားရှင်၏ဆူးခြုံတောနှင့်ပေါင်းမြက်ပင်များမှာအာရှုရိစစ်သားများဖြစ်သည်။ အာရှုရိစစ်သားများအရေအတွက်သည်များပြား လှသည်ဟုထင်မှတ်ကြသော်လည်းကလေးသူငယ်များလက်ချိုးရေမှတ်နိုင် အောင်ဘုရားသခင်ပြုလုပ်မည်။

၁၀:၂၀-၁၃ ထိုနေ့ရက်တွင်ကြွင်းကျန်သောဣသရေလလူနည်းစုသည် ဘယ်သောအခါမှအာရှုရိပြည်သားများတဖန်မှီခိုမည်။ အညံ့ခံမည်မဟုတ်။ အာ ခပ်မင်းကဲ့သို့လုပ်ကြမဟုတ်။ ဘုရားသခင်ကိုသာကိုးစားကြမည်။ ဤပရောဖက် ပြုချက်အများစုသည်ခရစ်တော်ဘုရားဒုတိယအကြိမ်ကြွလာမည့်အကြောင်း နှင့်သက်ဆိုင်သည်။

၁၀:၂၄-၂၇ အာရှုရိမင်းသည်ယေရုရှလင်ပြည်အားတိုက်ခိုက်သိမ်းပိုက် ရန်တဖန်ထပ်မံကြွလာလျှင်လည်းယုဒပြည်သားများကကြောက်လန့်စိုးရိမ်မည် မဟုတ်။ အဘယ်ကြောင့်ဆိုသော်ယုဒလူများဘက်တွင်ထာဝရဘုရားသည်ရပ်တည်မည်။ မေဒျန်းနှင့်အဲဂုတ္တုစစ်သားများအပေါ်အရေးယူပေးသကဲ့သို့အာရှုရိ သားများလက်တော်မှယုဒလူများအားလွတ်ငြိမ်းချမ်းသာခွင့်ပေးသည်။

၁၀:၂၈-၃၄ အာရှုရိသားများချီတက်လာသည့်လမ်းကြောင်းနှင့်ပထဝီအ နေအထားကိုမြေပုံပေါ်တွင်ရှင်းပြထားပါသည်။ ချီတက်ရာလမ်းကြောင်းတစ် လျှောက်တွင်စိုးရိမ်ထိတ်လန့်ဖွယ်ရာနှင့်မထင်မှတ်သောအန္တရာယ်များကြုံတွေ့ကြမည်။ နောက်ဆုံးတွင်ယေရုရှလင်တောင်ရိုးသို့ရောက်ရှိခြေချလာသည်။ ဘုရားသခင်ကကြားဝင်၍ထိုကျူးကျော်ရေးသမားများကိုချေမှုန်းဖျက်ဆီးသည်။ စစ်သားများ၊မှူးမတ်မင်းများနှင့်လူများကိုသုတ်သင်ပေးသည်။ တောင်ယာ ခုတ်ထွင်သကဲ့သို့ပြောင်သလင်းခါအောင်ထိုရန်သူတော်အုပ်ကြီးကိုရှင်းစေ သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။