Habakkuk -1 -

ဟဗက္ကုတ်အနာဂတ္တိကျမ်း - ၁

ဟဗက္ကုတ်တိုင်တန်းခြင်း

1ပရောဖက်ဟဗက္ကုတ်ခံရသော ဗျာဒိတ်တော်အချက်ဟူမူကား၊ 2အို ထာဝရဘုရား၊ ကိုယ်တော်သည် ကြားတော်မမူဘဲ၊ အဘယ်မျှကာလပတ်လုံး အကျွန်ုပ် အော်ဟစ်ရပါမည်နည်း။ ကယ်တင်တော်မမူဘဲ အကျွန်ုပ်သည် အဓမ္မအမှုကိုခံ၍၊ ရှေ့တော်၌ အဘယ်မျှကာလပတ်လုံး အော်ဟစ်ရပါမည်နည်း။ 3မတရားသောအမှုကို အကျွန်ုပ်အား အဘယ်ကြောင့် ပြတော်မူသနည်း။ အဓမ္မအမှုကို အဘယ်ကြောင့် မြင်စေတော်မူသနည်း။ လုယူခြင်း၊ အနိုင်အထက်ပြုခြင်းအမှုသည် အကျွန်ုပ်ရှေ့မှာ အဘယ်ကြောင့် ရှိရပါသနည်း။ ငြင်းခုံခြင်း၊ ရန်တွေ့ခြင်းကိုလည်း အဘယ်ကြောင့် လူချင်းပြုရပါသနည်း။ 4သို့ဖြစ်၍ တရားလျော့ပါ၏။ တရားသဖြင့် စီရင်ဆုံးဖြတ်ခြင်း မရှိပါ။ မတရားသောသူတို့သည် ဖြောင့်မတ်သောသူတို့ကို ဝိုင်းသောကြောင့်၊ မတရားသဖြင့် စီရင်ဆုံးဖြတ်ကြပါ၏။

ထာဝရဘုရားပြန်လည်မိန့်ကြားချက်

5သစ္စာပျက်သောသူတို့၊ ကြည့်ရှုဆင်ခြင်၍ အလွန်မှိုင်တွေကြလော့။ အကြောင်းမူကား၊ သင်တို့အား သူတစ်ပါးပြညွှန်သော်လည်း သင်တို့ မယုံသောအမှုကို သင်တို့လက်ထက်ကာလ၌ ငါပြု၏။ 6ပြင်းထန်လျင်မြန်သော ခါလဒဲအမျိုးကို ငါနှိုးဆော်၏။ ကိုယ်မပိုင်သော နေရာအရပ်တို့ကို သိမ်းယူခြင်းငှာ မြေတစ်ပြင်လုံး၌ ချီသွားကြလိမ့်မည်။ 7အလွန်ကြောက်မက်ဖွယ်သော သူဖြစ်၍ ကိုယ်အလိုအလျောက် တရားစီရင်ဆုံးဖြတ်ကြ၏။ 8သူတို့၏မြင်းသည် ကျားသစ်ထက်လျင်မြန်၏။ ည၌ လည်သောတောခွေးထက် ကြမ်းတမ်း၏။ မြင်းစီးသူရဲတို့သည် အဝေးကလာ၍ ခုန်ကြလိမ့်မည်။ အကောင်ကို ကိုက်စားခြင်းငှာ လျင်မြန်သော ရွှေလင်းတကဲ့သို့ ပျံလာကြလိမ့်မည်။ 9ထိုသူအပေါင်းတို့သည် ညှဉ်းဆဲခြင်းငှာ လာကြ၏။ ရှေ့သို့သာ မျက်နှာပြုသော အလုံးအရင်းဖြစ်၍၊ ဖမ်းမိသောသူတို့ကို သဲလုံးနှင့်အမျှ စုဝေးစေကြလိမ့်မည်။ 10ရှင်ဘုရင်တို့ကို အားမနာ၊ မင်းများတို့ကို ပြက်ရယ် ပြုကြလိမ့်မည်။ ရဲတိုက်ရှိသမျှတို့ကို ကဲ့ရဲ့လျက်၊ မြေမှုန့်ကိုပုံထား၍ တိုက်ယူကြလိမ့်မည်။ 11ထိုနောက် သူတို့သည် သဘောပြောင်းလဲလျက် လွန်ကျူး၍ အပြစ်ခံရကြလိမ့်မည်။ မိမိတို့တန်ခိုးသည် မိမိတို့ဘုရား ဖြစ်လေသည်တကား။

ဟဗက္ကုတ်တိုင်တန်းပြန်ခြင်း

12အို ထာဝရဘုရား၊ အကျွန်ုပ်၏ဘုရားသခင်၊ သန့်ရှင်းတော်မူသောဘုရား၊ ကိုယ်တော်သည် နိစ္စထာဝရ တည်တော်မူသည်မ ဟုတ်လော။ သို့ဟုတ်လျှင်၊ အကျွန်ုပ်တို့သည် သေခြင်းနှင့် ကင်းလွတ်ကြပါမည်။ အို ထာဝရဘုရား၊ အကျွန်ုပ်တို့ကို စစ်ကြောစေခြင်းငှာ သူတို့ကို ခန့်ထားတော်မူပြီ။ အို ကျောက်ထရံ၊ ဆုံးမစေခြင်းငှာ သူတို့ကို နေရာချတော်မူပြီ။ 13ကိုယ်တော်သည် ဒုစရိုက်ကို ကြည့်ရှုတော်မမူ။ သန့်ရှင်းသော မျက်စိရှိတော်မူ၏။ အဓမ္မအမှုကို ကြည့်ရှု၍ နေတော်မမူတတ်ပါ။ သို့ဖြစ်၍၊ သစ္စာပျက်သောသူတို့ကို အဘယ်ကြောင့် ကြည့်ရှု၍ နေတော်မူသနည်း။ အဓမ္မလူသည် မိမိထက်ဖြောင့်မတ်သောသူကို ကိုက်စားသောအခါ၊ အဘယ်ကြောင့် တိတ်ဆိတ်စွာ နေတော်မူသနည်း။ 14လူသတ္တဝါတို့ကိုလည်း ပင်လယ်ငါးကဲ့သို့လည်းကောင်း၊ မင်းမရှိသော ပိုးကောင်ကဲ့သို့လည်းကောင်း အဘယ်ကြောင့် ဖြစ်စေတော်မူသနည်း။ 15ရန်သူသည် ထိုသူအပေါင်းတို့ကို ငါးမျှားနှင့် မျှားလျက်၊ ကွန်နှင့်အုပ်လျက်၊ ပိုက်နှင့်လှောင်လျက် ဝမ်းမြောက်ရွှင်လန်းတတ်၏။ 16မိမိကျွန်အား ယဇ်ပူဇော်၍၊ မိမိပိုက်အား နံ့သာပေါင်းကို မီးရှို့တတ်၏။ အကြောင်းမူကား၊ ထိုတန်ဆာအားဖြင့် ဥစ္စာရတတ်၍ ဝစွာစားရ၏။ 17သို့ဖြစ်၍၊ သူသည် ပိုက်ကွန်ထဲက ငါးတို့ကို သွန်းလောင်းရပါမည်လော။ လူအမျိုးမျိုးတို့ကို မနှမြောဘဲ အစဉ်လုပ်ကြံရပါမည်လော။

ဟဗက္ကုတ်အနာဂတ္တိကျမ်း - ၁ (အနက်ဖွင့်)

၁။ အကျင့်ပျက်ယွင်းကြသောယုဒလူမျိုးများအပေါ် ဘုရားရှင်အရေးမယူခြင်းအား ပရောဖက်က နားမလည်နိုင်ခြင်း(၁:၁–၄)

ကျမ်းစာတစ်အုပ်လုံးတွင် ဟဗက္ကုတ်က သူ့ပုခုံးပေါ်သို့ကျရောက်သော ကြီးလေးသည့် တာဝန် (ဗျာဒိတ်NKJV Marg) ကို ထုတ်ဖော်ရေးသားသည်။ အငယ်၂-၄ ၌ ယုဒလူမျိုးအကြား၌ မတရားသောအမှု၊ လုယက်ခြင်း၊ အနိုင်အထက်ပြုကျင့်ကြခြင်း၊ ငြင်းခုံခြင်း၊ ရန်တွေ့ခြင်း၊ မတရာသဖြင့် ဆုံးဖြတ်ခြင်း စသည့်အမင်္ဂလာများကို အဘယ့်ကြောင့်ကြည့်နေသနည်းဟု ဘုရားသခင်ထံစောဒကတက်သည်။ ထိုအသရေယုတ်သူများကို အဘယ်ကာလတိုင်အောင် ပြစ်ဒဏ်မပေး၊ အရေးမယူဘဲ နေတော်မူမည်နည်းဟု မေးမြန်းသည်။ ထို့သို့ အမေးမြန်းထူသောကြောင့် ဟဗက္ကုတ်ကို အချို့ကျမ်းစာပညာရှင်များက “ဓမ္မဟောင်းခေတ်၏ သံသယသောမ”ဟု ကင်ပွန်းတတ်ကြသည်။

ပထမအပိုဒ်ငယ်(၁၁)ပိုဒ်သည် ဘုရားသခင်နှင့် ဟဗက္ကုတ်တို့အကြား အပြန်အလှမ်မေးမြေးဖြေကြားကြသော စကားများဖြစ်သည်။

၂။ ယုဒလူမျိုးအားအရေးရန် ဗာဗုလုန်တို့ကို အသုံးပြုမည့်အကြောင်း ဘုရားသခင်၏ ဖြေကြားချက် (၁:၅– ၁၁)

ဟဗက္ကုတ်၏ စောဒကဟစကားကို အငယ် ၅-၁၁ တွင် ဘုရားရှင်ကပြန်လည်ဖြေကြားထားသည်။ ခါလဒဲစစ်တပ်ကြီးအားအသုံးပြု၍ ယုဒပြည်ကို ပြစ်ဒဏ်ပေးမည်။ ခါလဒဲများသည် လျင်မြန်သွက်လက်သည်၊ ရက်စက်သည်၊ ဥစ္စာဓနတပ်မက်သည်။ ကြမ်းတမ်းသည်။ ခက်ထန်သည်။ ထိုဗာဗုလုန်သားများသည် အစာငတ်သွေးဆာနေသော ဝံပုလွေများထက် ရက်စက်ကြသည်။ ရှင်ဘုရင်မင်းစိုးရာဇာများကိုလည်း မညှာတာ၊ ပြက်ယယ်ပြုလေ့ရှိသည်။ သူတို့တန်ခိုးအာဏာသာ သူတို့ဘုရားဖြစ်သည်။ ထိုအကြောင်းကို Feinberg က ဤသို့ထောက်ခံထားသည်။

ထိုခါလဒဲများသည် စစ်ပွဲများစွာကို အောင်မြင်ခဲ့ကြသည်။ လေဟုန်တိုက်၍ ပစ္စည်းများလွင့်စင်ကုန်သကဲ့သို့ မြင်မြင်သမျှကို ပြောင်သလင်းခါအောင် လုယက်ယူငင်သွားကြမည်။ ခါလဒဲတို့၏ အောင်ပွဲနှင့်အတူ သူတို့အပြစ်သည် ဘုရားသခင်ရှေ့တွင် တောင်ပုံယာပုံ မို့မောက်နေသည်။ အကြောင်းမှာ သူတို့တိုက်ခိုက်ကျွန်ပြု၍ ခိုကိုးရာမဲ့နေသူတို့အပေါ် တရားလက်လွတ် ပြုကျင့်ကြသည်။၄

၃။ ယုဒလူမျိုးအားအရေးယူရန် ပိုမိုဆိုးယုတ်ကောက်ကျစ်သည့်လူမျိုးကို ဘုရားသခင်ရွေးချယ်မှုအပေါ် စောဒကတက်ခြင်း (၁:၁၂–၁၇)

ဘုရားသခင်၏ အဖြေစကားကြားရသောအခါ ဟဗက္ကုတ်ရင်ထဲမရွှင်၊ ဘဝင်မကျနိုင်သောကြောင့် ဘုရားသခင်ထံ ဒုတိယမ္ပိ စောဒကတက်ရပြန်သည်။ ဆိုးညစ်သော ယုဒလူမျိုးကိုဆုံးမရန် သူတို့ထက် သာ၍ဆိုးယုတ်သောသူကို အဘယ်ကဲ့သို့ရွေးချယ်ရသနည်း။ ဆိုးယုတ်ခြင်းအမှုကိုကြည့်မြင်ရန် သန့်ရှင်းသောမျက်စိတော်ရှိလျက်ပင် ဘုရားသခင်သည် သူတို့၏ အဓမ္မဒုစရိုက်ကို မမြင်ရသလောဟု ဟဗက္ကုတ်မိမိအသိဉာဏ်တစ်ထွာတစ်မိုင်ဖြင့် ငြင်းချက်ထုတ်မိသည်။ ဗာဗုလုန်သားများဆိုးယုတ်ကြသည်မှာ သံသယဖြစ်ဖွယ်မရှိ။ သို့သော်ဗာဗုလုန်ထက် ယုဒလူများ၏ ဆိုးညစ်မှုကပိုကြီးမားသည်။ အမြင့်ဆုံးသောဘုရားသခင်ကို သိလျက်နှင့် ဆန့်ကျင်ကြသည်။ ဘုရားရှင်သည် ထိုဆိုးယုတ်သော ဗာဗုလုန်သားများအား ငါးမျှားချိတ်နှင့် ပိုက်ကွန်ကိုပေးလျက် ဖမ်းဆီးမည်။ ထိုသူများသည် ရုပ်တုဆင်းတုကိုးကွယ်ကြခြင်းဖြင့် ဝလင်စွာစားကြရသည်။ တိုင်းနိုင်ငံသား-သားသတ်သမားများသည် ဆုံးစမထင် အစဉ်တည်တံ့မည်လော။ J. E. Evans က ဤသို့ရှင်းပြထားသည်။

ပုံခိုင်းနှိုင်းချက်ဖြစ်(ခါလဒဲ) တံငါသည်အဖြစ် တင်စားထားသည်။ လူများသည်ပိုက်ထဲမိသော ငါးများနှင့်တူသည်။ တံငါသည်သည်မိမိအား ချမ်းသာကြွယ်ဝစေသော ပိုက်ကွန်ကို အလေးအမြတ်ထား၍ ကိုးကွယ်သည်။ ဤပုံဥပမာတွင် ကမ္ဘာလောကကို ပင်လယ်၊ လူမျိုးကိုငါးများ၊ နေဗုခပ်နေဇာက တံငါသည်၊ ပိုက်ကွန်မှာ ခါလဒဲ စစ်သည်တော်တို့၏ စစ်ရေးစွမ်းရည် (တန်ခိုးအာဏာ) တို့ဖြစ်သည်။ တန်ခိုးအာဏာက စစ်အောင်ပွဲများဖြင့် ချမ်းသာကြွယ်ဝမှုကို ဆောင်ကြဉ်းပေးသည်။၅

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။