Ezra -4 -

ဧဇရမှတ်စာ - ၄

ဗိမာန်တော်တည်ဆောက်မှုကိုအတိုက်အခံပြုခြင်း

1သိမ်းသွားခြင်းကိုခံရသော အမျိုးသားတို့သည်၊ ဣသရေလအမျိုး၏ ဘုရားသခင် ထာဝရဘုရားအဖို့ ဗိမာန်တော်ကို တည်ကြသည်ဟု ယုဒအမျိုးနှင့် ဗင်္ယာမိန်အမျိုး၏ ရန်သူတို့သည် ကြားလျှင်၊ 2ဇေရုဗဗေလနှင့် အဆွေအမျိုး သူကြီးတို့ထံသို့ လာ၍၊ ငါတို့သည် သင်တို့ထံ၌ တည်းခိုပါရစေ။ သင်တို့၏ ဘုရားသခင်ကို သင်တို့ရှာသကဲ့သို့ ငါတို့လည်း ရှာကြ၏။ ငါတို့ကို ဤပြည်သို့ဆောင်ခဲ့သော အာရှုရိရှင်ဘုရင် ဧသရဟဒ္ဒုန် လက်ထက်မှစ၍ ထိုဘုရားသခင်အား ယဇ်ပူဇော်ကြသည်ဟု ဆိုကြသော်၊ 3ဇေရုဗဗေလနှင့် ယောရှု အစရှိသော ဣသရေလအဆွေအမျိုး သူကြီးတို့က၊ ငါတို့၏ ဘုရားသခင်အဖို့ ဗိမာန်တော်တည်ခြင်းအမှုကို၊ သင်တို့သည် ငါတို့နှင့်ဝိုင်း၍ မလုပ်ရ။ ပေရသိရှင်ဘုရင် ကုရုမင်းကြီး အမိန့်တော်အတိုင်း၊ ဣသရေလအမျိုး၏ ဘုရားသခင် ထာဝရဘုရားအဖို့ ငါတို့သည် ကိုယ်တိုင်တည်ရမည်ဟု ပြန်ပြောကြ၏။ 4ထိုအခါ ပြည်သားတို့သည် ယုဒအမျိုးတို့ကို လက်အားလျော့စေ၍၊ တည်ဆောက်ခြင်းအမှုကို နှောင့်ယှက်ကြ၏။ 5ယုဒအမျိုးသားတို့၏ အကြံကို ဖျက်ဆီးခြင်းငှာ၊ ပေရသိရှင်ဘုရင် ကုရုလက်ထက် ကာလပတ်လုံးမှသည်၊ ပေရသိရှင်ဘုရင် ဒါရိလက်ထက်တိုင်အောင်၊ ရှေ့နေတို့ကို ငှား၍ထားကြ၏။

ယေရုရှလင်မြို့ပြန်လည်တည်ဆောက်မှုကို အတိုက်အခံပြုခြင်း

6အာရွှေရုနန်းထိုင်စက ယုဒပြည်သူ၊ ယေရုရှလင်မြို့သားတို့၌ အပြစ်တင်သောလွှာစာကို ပေးလိုက်ကြ၏။

7အာတဇေရဇ်လက်ထက်၌ ဗိရှလံ၊ မိသရေဒတ်၊ တဗေလနှင့် အခြားသောအပေါင်းအဖော်တို့သည်၊ ရှုရိဘာသာစကားနှင့် ရေးသောလွှာစာကို၊ ပေရသိရှင်ဘုရင် အာတဇေရဇ်ထံသို့ ပေးလိုက်ကြ၏။ 8စာတိုက်စိုးရေဟုံနှင့် မြို့စာရေးရှိမရှဲတို့သည်၊ ယေရုရှလင်မြို့ကို ရန်ဘက်ပြုလျက်၊ အာတဇေရဇ်မင်းကြီးထံသို့ စာပေးလိုက်၍၊ 9စာတိုက်စိုးရေဟုံ၊ မြို့စာရေးရှိမရှဲနှင့် အခြားသောအပေါင်းအဖော်၊ ဒိနဲပြည်သား၊ အဖာသသက်ပြည်သား၊ တာပေလပြည်သား၊ အဖာရသပြည်သား၊ အာခေဝပြည်သား၊ ဗာဗုလုန်ပြည်သား၊ ရှုရှနက်ပြည်သား၊ ဒေဟဝပြည်သား၊ ဧလံပြည်သား အစရှိသော၊ 10ကြီးမြတ်သောမင်း အာသနပ္ပါဆောင်ခဲ့၍၊ ရှမာရိမြို့ရွာတို့၌ နေရာချသောသူများနှင့်၊ မြစ်အနောက်ဘက်၌နေသော အခြားသူများတို့သည်၊ ဤမည်သော နေ့ရက်ကာလတွင်၊ 11အာတဇေရဇ်မင်းကြီးထံသို့ ပေးလိုက်သော စာဟူမူကား၊ မြစ်အနောက်ဘက်၌ နေသော ကိုယ်တော်ကျွန်တို့သည်၊ ဤမည်သော နေ့ရက်ကာလတွင် လျှောက်ပါ၏။ 12အထံတော်မှ ကျွန်တော်တို့ရှိရာသို့ ရောက်လာသောယုဒလူတို့သည် ဆိုးညစ်၍၊ ပုန်ကန်တတ်သောယေရုရှလင်မြို့ကို တည်လျက်၊ မြို့ရိုးအမြစ်ကိုချ၍ လက်စသတ်လုသည်ကို သိမှတ်တော်မူပါ။ 13ထိုမြို့ကို တည်ပြန်၍ မြို့ရိုးကိုလက်စသတ်လျှင်၊ ငွေတော်ခွဲခြင်းကို မခံ၊ အခွန်တော်အကောက်တော်ကို မပေးဘဲနေ၍၊ နိုင်ငံတော်အကျိုးနည်းပါလိမ့်မည်ကို သိမှတ်တော်မူပါ။ 14ကျွန်တော်တို့သည် ကျေးဇူးတော်အားဖြင့် အသက်မွေးရသောသူ ဖြစ်သည်နှင့်အညီ၊ ကိုယ်တော်၌ ဘုန်းတော်လျော့ကြောင်းကို ကြည့်၍မနေသင့်သောကြောင့်၊ ဘိုးတော်ဘေးတော်တို့၏ မှတ်စာကို စစ်ကြောတော်မူမည်အကြောင်း ဤလျှောက်စာကို ပေးလိုက်ပါ၏။ 15ယေရုရှလင်မြို့သည် ပုန်ကန်တတ်သောမြို့၊ ရှင်ဘုရင်အကျိုးနှင့် နိုင်ငံတော်အကျိုးစီးပွားကို ဖျက်ဆီးတတ်သောမြို့ ဖြစ်ဖူး၍၊ ရှေးကာလ၌ မြို့ထဲမှာ ပုန်ကန်သောအကြံကို အစဉ်ပြုစုသောကြောင့်၊ အတိုက်အဖျက် ခံရပါသည် အကြောင်းအရာများကို ထိုမှတ်စာ၌တွေ့၍ သိတော်မူပါလိမ့်မည်။ 16ထိုမြို့ကိုတည်ပြန်၍ မြို့ရိုးကို လက်စသတ်လျှင်၊ ကိုယ်တော်သည် မြစ်အနောက်ဘက်၌ အစိုးရတော်မမူကြောင်းကို ကျွန်တော်တို့ လျှောက်ထားပါသည်ဟု စာ၌ပါသတည်း။

17ရှင်ဘုရင်သည် စာတိုက်စိုးရေဟုံနှင့် မြို့စာရေးရှိမရှဲ မှစ၍၊ ရှမာရိမြို့၌နေသော ထိုသူတို့၏ အပေါင်းအဖော်များ၊ မြစ်အနောက်ဘက်၌နေသော အခြားသူများတို့ရှိရာသို့ ပြန်ပေးလိုက်သော စာဟူမူကား၊ 18ဤမည်သော နေ့ရက်ကာလတွင်၊ ငါရေး၍ သင်တို့ချမ်းသာပါစေ။ ငါ့ထံသို့သင်တို့ ပေးလိုက်သောစာကို ငါ့ရှေ့မှာ အနက်ပြန်၍ ဖတ်ပြီ။ 19ငါမှာထားသည်အတိုင်း စစ်ကြောကြသောအခါ၊ ထိုမြို့သည် ရှေးကာလ၌ ရှင်ဘုရင်တို့ကို ပုန်ကန်ကြောင်း၊ မကောင်းသောအကြံကို ကြံတတ်သောမြို့၊ ပုန်ကန်တတ်သော မြို့ဖြစ်ကြောင်း၊ 20ငွေတော်ကိုခွဲလျက်၊ အခွန်တော်အကောက်တော်ကို ခံလျက်၊ မြစ်အနောက်ဘက် တစ်လျှောက်လုံးကိုအစိုးရ၍ တန်ခိုးကြီးသော ရှင်ဘုရင်တို့သည် ယေရုရှလင်မြို့၌ နေဖူးကြောင်းများကို သိရ၏။ 21သို့ဖြစ်၍ ငါသည်အခွင့်မပေးမီတိုင်အောင်၊ ထိုသူတို့သည် မြို့ကိုမတည်ဘဲ နေစေမည်အကြောင်း အမိန့်တော်ကိုဆင့်ဆိုကြလော့။ 22နိုင်ငံတော်အကျိုး မပျက်စီးစေခြင်းငှာ သတိပြု၍ ဤအမှုကို စေ့စေ့ကြည့်ရှုကြလော့ဟု မိန့်တော်မူ၏။ 23အာတဇေရဇ်မင်းကြီးစာကို ရေဟုံနှင့် မြို့စာရေးရှိမရှဲ အစရှိသော သူတို့အပေါင်းအဖော်ရှေ့မှာ ဖတ်ပြီးလျှင်၊ သူတို့သည် ယေရုရှလင်မြို့၊ ယုဒလူတို့ရှိရာသို့ အလျင်အမြန်သွား၍ ယုဒလူတို့၏ အလုပ်အကိုင်ကို အနိုင်အထက် ဆီးတားကြ၏။ 24ထိုသို့ ယေရုရှလင်မြို့၏ ဗိမာန်တော်တည်ခြင်းအမှု ပြတ်၍၊ ပေရသိရှင်ဘုရင် ဒါရိနန်းစံနှစ်နှစ်တိုင်အောင် လက်စမသတ်ဘဲ နေလေ၏။

ဧဇရမှတ်စာ - ၄ (အနက်ဖွင့်)

(င) ဗိမာန်တော်တည်ဆောက်ရန် ဆန့်ကျင်ကြခြင်း (အခန်း ၄)

၁။ ကုရုမင်းလက်ထက် (၄:၁–၅)

၄:၁–၃ အငယ် ၁တွင်ပါရှိသည့် အဖျက်သမားယုဒနှင့် ဗင်္ယာမိန်အမျိုးများမှာ ဗာဗုလုန်သို့ ဖမ်းဆီးခေါ်ဆောင်ခြင်းခံကြရာတွင် မပါဝင်ဘဲ၊ အခြားတိုင်းပြည်သို့ ထွက်ပြေးသော မျိုးမစစ်သူများဖြစ်သည်။ ထိုသူများသည် ရောက်လေရာအရပ်၌ အိမ်ထောင်ကျ၍ သွေးနှောသဖြင့် ယုဒလူမျိုးအစစ်ဟုမယူဆနိုင်။ ယေရုဗာဗေလ လက်ထက်တွင် ပြည်တော်ပြန်ဝင်လာကြပြီး ဗိမာန်တော်ဆောက်ကူလို ဟန်ဆောင်ကြသည်။ ယေဟောဝါဘုရားကို ကိုးကွယ်မည်ဟု ဆိုကြသော်လည်း စိတ်သဘော အရင်းတွင်မူ ရုပ်တုဘုရားတုများသာ ရှိကြသည်။ သို့ကြောင့် ဣသရေလလူကြီးသူကြီးများက သူတို့ ကမ်းလှမ်းချက်ကို ပယ်ချကြသည်။

၄:၄၊ ၅၊ ၂၄ ထိုနည်းလမ်းဖြင့် ဝင်ရောက်၍ မရသောအခါ မျိုးမစစ်ကပြားများသည် နည်းဗျူဟာ ပြောင်းလဲကြသည်။ ပထမဦးစွာ ယုဒလူများအား စိတ်ပျက်အားလျော့အောင် ပြုလုပ်ကြသည်။ ဗိမာန်တော်ဆောက်လုပ်ခြင်းအား နှောင့်ယှက်ကြသည်။ ရှေ့နေရှေ့ရပ်အတိုင်ပင်ခံ ငှါးရမ်း၍ ဥပဒေကြောင်းလမ်းအရ ဝင်ကြသည်။ ဗိမာန်တော် ဆောက်လုပ်ခြင်းကို ကဖျက်ကရက် ပြုကြသည်။

အပိုဒ်ငယ် ၂၄သည် ဖြစ်စဉ်အကြောင်းအရာ အရ အငယ် ၄၊၅ နှင့် ဆက်စပ်သည်။ ထိုသို့ အဖျက်အမှောင့် သမားများကြောင့် ဒါရိမင်းနန်းစံ ဒုတိယနှစ်တိုင်အောင် တိုးလို့တန်းလန်းဖြင့် လုပ်ငန်းရပ်ဆိုင်းရသည်။

၂။ အာရွှေရုမင်းလက်ထက် (၄:၆)

၄:၆ အငယ် ၆တွင်ပါရှိသည့် အာရွှေရုလက်ထက်ပေးစာသည် ယုဒလူများ၏ ဗိမာန်တော်ဆောက်လုပ်ခြင်းအား ခြိမ်းခြောက်စာဖြစ်သည်။ ငယ် ၇-၂၃ တွင်ပါရှိသည့် ပေးစာသည် အာတဇေရဇ်မင်းလက်ထက်တွင် ဖြစ်၍ မြို့တော်နှင့် မြို့ရိုးပြန်လည်တည်ဆောက်ခြင်းအား ဖျက်လိုဖျက်ဆီးလုပ်သည့်စာဖြစ်သည်။ ထို့ကြောင့် လုပ်ငန်းဆိုင်းငံ့ရပြန်သည်။

၃။အာတဇေရဇ်မင်းလက်ထက် (၄:၇–၂၃)

၄:၇–၂၃ အာရွှေရုမင်း(ငယ်၆) နှင့် အာတဇေရဇ်မင်း (ငယ် ၇) တို့၏ ရှေးကျသော ဒါရိမင်းလက်ထက်တွင် ဗိမာန်တော်ဆောက်လုပ်ခြင်းလက်စသတ်ကြသည်။ ငယ်၆-၂၃ တွင်ပါရှိသည့် ပေးစာသည် ဗိမာန်တော်ဆောက်လုပ်ပြီးစီးမှ ပစ်စာဖြစ်သည်။ ဗိမာန်တော်ပြီးစီးပြီဖြစ်၍ မြို့ရိုးခံတပ်ခိုင်ခံအောင် ဆောက်လုပ်ဖို့ စီမံကိန်း ရေးဆွဲကြသည်။ သို့သော်အများပြည်တူနည်းတူ ပါဝင်အားထုတ်ခြင်းမပြုဘဲ၊ အဖျက်အမှောက်လုပ်ငန်းလုပ်ကြုသည်။

၄:၆–၆:၈ ကိုဟေဗြဲဘာသာဖြင့် မရေးဘဲ၊ အာရမိတ်ဘာသာဖြင့် မူရင်းကျမ်းတွင် ရေးထားသည်။ ထိုခေတ်ကာလ၌ ပါရှားအရာရှိမင်း၏ ရုံးသုံးစကားဖြစ်သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။