Ezekiel -29 -

ယေဇကျေလအနာဂတ္တိကျမ်း - ၂၉

အဲဂုတ္တု ပြည်နှင့်ဆိုင်သောဗျာဒိတ်

1သက္ကရာဇ်ဆယ်ခု၊ ဒသမလ တစ်ဆယ်တစ်ရက်နေ့တွင်၊ ထာဝရဘုရား၏နှုတ်ကပတ်တော်သည် ငါ့ဆီသို့ ရောက်လာ၍၊ 2အချင်းလူသား၊ သင်သည် အဲဂုတ္တုရှင်ဘုရင် ဖာရောမင်းတစ်ဖက်၌ မျက်နှာထား၍၊ သူနှင့် အဲဂုတ္တုပြည် တစ်ပြည်လုံးတစ်ဖက်၌ ပရောဖက်ပြုလျက်၊ 3အရှင်ထာဝရဘုရား၏ အမိန့်တော်ကို ဆင့်ဆိုရမည်မှာ၊ အို အဲဂုတ္တုရှင်ဘုရင် ဖာရောမင်း၊ ကိုယ်မြစ်များအလယ်၌ နေလျက်၊ ငါ့မြစ်ကို ငါပိုင်၏။ ငါ့အဖို့ ငါဖန်ဆင်းပြီဟု ဆိုတတ်သော မိကျောင်းကြီး၊ သင့်တစ်ဖက်၌ ငါနေ၏။ 4သင့်ပါးရိုးကို သံချိတ်နှင့်ချိတ်၍၊ သင့်မြစ်၌နေသော ငါးတို့ကို သင့်အကြေးတို့၌ ငါကပ်စေမည်။ သင့်မြစ်များအလယ်ထဲက သင့်ကိုငါနုတ်၍ မြစ်၌ရှိသမျှသော ငါးတို့သည် သင့်အကြေးတို့၌ ကပ်ကြလိမ့်မည်။ 5သင်နှင့် သင့်မြစ်၌ရှိသမျှသော ငါးတို့ကို တော၌ ငါပစ်ထားမည်။ လွင်ပြင်၌ကျ၍ နောက်တစ်ဖန် စုဝေးခြင်းကိုမပြုရ။ တောသားရဲများ၊ မိုးကောင်းကင်ငှက်များ စားစရာဖို့ သင့်ကိုငါအပ်၏။ 6ငါသည် ထာဝရဘုရားဖြစ်ကြောင်းကို အဲဂုတ္တုပြည်သားအပေါင်းတို့သည် သိရကြလိမ့်မည်။ အကြောင်းမူကား၊ သင်သည် ဣသရေလအမျိုး၌ ကျူတောင်ဝှေး ဖြစ်လေပြီ။ 7သင့်ကို လက်နှင့်ကိုင်သောအခါ သင်သည် အကိုင်မခံ။ သူတို့ ပခုံးဆစ်ကို ဖြုတ်လေ၏။ သင်နှင့်ကိုယ်ကိုထောက်သောအခါ သင်သည်ကျိုး၍ သူတို့ခါးကို နာစေ၏။

8သို့ဖြစ်၍၊ အရှင်ထာဝရဘုရား မိန့်တော်မူသည်ကား၊ ငါသည် သင့်အပေါ်သို့ ဓားကိုဆောင်ခဲ့၍ လူနှင့်တိရစ္ဆာန်တို့ကို ပယ်ဖြတ်သဖြင့်၊ 9အဲဂုတ္တုပြည်သည် လူဆိတ်ညံလျက်၊ ပျက်စီးလျက်ရှိသောအခါ၊ ငါသည် ထာဝရဘုရားဖြစ်ကြောင်းကို သိရလိမ့်မည်။ သင်က၊ ငါ့မြစ်ကိုငါပိုင်၏။ ငါဖန်ဆင်းပြီဟု ဆိုမိသောကြောင့်၊ 10သင်နှင့် သင့်မြစ်တစ်ဖက်၌ ငါနေ၏။ အဲဂုတ္တုပြည်ကို မိဂဒေါလမှစ၍ သုဏေမြို့တိုင်အောင်လည်းကောင်း၊ အဲသယောပိပြည် စွန်း တိုင်အောင်လည်းကောင်း၊ ဓားနှင့်ဖျက်ဆီး၍ ဆိတ်ညံစေမည်။ 11အနှစ်လေးဆယ်ပတ်လုံး လူလျှောက်၍မသွားရ။ တိရစ္ဆာန်လည်း လျှောက်၍မသွားရ။ အဘယ်သူမျှ မနေရ။ 12ပျက်စီးသောပြည်တို့တွင် အဲဂုတ္တုပြည်ကို ငါဖျက်ဆီးမည်။ လူဆိတ်ညံသောမြို့တို့တွင် အနှစ်လေးဆယ်ပတ်လုံး အဲဂုတ္တုမြို့တို့သည် ပျက်စီးလျက်ရှိကြလိမ့်မည်။ အဲဂုတ္တုလူတို့ကို အတိုင်းတိုင်း အပြည်ပြည်တို့ကို ငါကွဲပြား ပျံ့လွင့်စေမည်။

13သို့ရာတွင်၊ အရှင်ထာဝရဘုရားမိန့်တော်မူသည်ကား၊ အနှစ်လေးဆယ်စေ့သောအခါ၊ ကွဲပြားလျက်နေရသော လူမျိုးတို့မှ အဲဂုတ္တုလူတို့ကို ငါခေါ်၍ စုဝေးစေမည်။ 14သိမ်းသွားခြင်းကိုခံရသော အဲဂုတ္တုလူတို့ကို ငါတစ်ဖန်ဆောင်ခဲ့၍ သူတို့နေရင်းပြည်၊ ပါသရုပြည်သို့ ပြန်စေမည်။ ထိုပြည်၌ ယုတ်သောနိုင်ငံ ဖြစ်ရလိမ့်မည်။ 15တစ်ပါးသောလူမျိုးတို့ကို နောက်တစ်ဖန်အစိုးမရ။ နိုင်ငံတကာတို့တွင် အယုတ်ဆုံးဖြစ်ရလိမ့်မည်။ တစ်ပါးသောလူမျိုးတို့ကို နောက်တစ်ဖန် အစိုးမရစေခြင်းငှာ ငါရှုတ်ချမည်။ 16ဣသရေလအမျိုးသားတို့သည် ထိုပြည်သားတို့ကို မျှော်လင့်၍၊ မိမိအပြစ်ကို ငါအောက်မေ့စေသဖြင့်၊ နောက်တစ်ဖန် ထိုပြည်သည် သူတို့ခိုလှုံရာ မဖြစ်ရာ။ ငါသည် ထာဝရဘုရားဖြစ်ကြောင်းကို သိရကြလိမ့်မည်ဟု မိန့်တော်မူ၏။

17သက္ကရာဇ် နှစ်ဆယ်ခုနစ်ခု၊ ပထမလ တစ်ရက်နေ့တွင်၊ ထာဝရဘုရား၏ နှုတ်ကပတ်တော်သည် ငါ့ဆီသို့ရောက်လာ၍၊ 18အချင်းလူသား၊ ဗာဗုလုန်ရှင်ဘုရင် နေဗုခဒ်နေဇာသည်၊ သူ၏စစ်သူရဲတို့ကို တုရုမြို့တစ်ဖက်၌ များစွာသောအမှုကို ဆောင်ရွက်စေပြီ။ စစ်သူရဲတိုင်း ခေါင်းတုံးပြီ။ ပခုံးလည်း ပွန်းပြီ။ သို့ရာတွင်၊ ရှင်ဘုရင်နှင့် စစ်သူရဲတို့သည် တုရုမြို့တစ်ဖက်၌ အမှုဆောင်ရွက်ခကို ထိုမြို့တွင် မခံရကြ။ 19သို့ဖြစ်၍၊ အရှင်ထာဝရဘုရား မိန့်တော်မူသည်ကား၊ အဲဂုတ္တုပြည်ကို ဗာဗုလုန်ရှင်ဘုရင် နေဗုခဒ်နေဇာအား ငါပေးမည်။ ထိုမင်းသည် ပြည်သား အလုံးအရင်းကိုလည်းကောင်း၊ လက်ရဥစ္စာ အမျိုးမျိုးကိုလည်းကောင်း၊ သိမ်းယူပြီးလျှင်၊ မိမိစစ်သူရဲတို့ အခဖို့ ဝေငှလိမ့်မည်။ 20ငါ့အမှုကို ဆောင်ရွက်သောကြောင့်၊ တုရုမြို့တစ်ဖက်၌ အမှုဆောင်ရွက်ခဖို့ အဲဂုတ္တုပြည်ကို ငါပေးပြီ။ 21ထိုကာလ၌ ဣသရေလအမျိုး၏ ချိုကို ငါပေါက်စေ၍၊ သူတို့အထဲမှာ သင်ဟောပြောရသော အခွင့်ကို ငါပေးမည်။ ငါသည် ထာဝရဘုရားဖြစ်ကြောင်းကို သူတို့သိရကြလိမ့်မည်ဟု မိန့်တော်မူ၏။

ယေဇကျေလအနာဂတ္တိကျမ်း - ၂၉ (အနက်ဖွင့်)

(ဆ) အဲဂုတ္တုပြည် (အခန်း ၂၉−၃၂)

သတ္တမမြောက်နှင့် နောက်ဆုံးတရားစီရင်ခြင်းမှာ အဲဂုတ္တုပြည် ဖြစ်သည်။ အထောက်အညှာလုံးဝမရှိသည်။ တရားစီရင်ခြင်းဖြစ်ဟန်တူသည်။ နိုင်းမြစ်မရှိသောအခါ အဲဂုတ္တုပြည်တစ်ပြည်လုံး ပျက်စီးသွားမည်။ အချို့က အခြားလူမျိုးက ဝင်ရောက်တိုက်ခိုက်သိမ်းပိုက်ခြင်း ဖြစ်မည်ဟုဆိုသည်။ ထိုကဲ့သို့မဟုတ်ပါ။ အဲဂုတ္တုပြည်သည် မရဏာပြည် ဖြစ်လိမ့်မည်။ လူသေစာရင်းရေးရာတွင် အထင်ရှားဆုံး စာအုပ်ဖြစ်မည်။ အထင်ရှားဆုံးအထိမ်းအမှတ်မှာ ပိရမစ်သင်္ချိုင်းဂူကြီးများ ဖြစ်၏။ ထိုအရပ်ဒေသရှိရှင်ဘုရင်များသည် သေးငယ်သည့် စံနန်းကိုတည်ထောင်ကြသော်လည်း ကြီးမားသောဂူသင်္ချိုင်းကြီးများကို ဆောက်လုပ်ခဲ့ကြသည်။ သူတို့ဘဝတသက်တာမှာ ထိုဂူသင်္ချိုင်းကြီးများအတွက်သာ အချိန်ကုန်လွန်ကြရသည်။ အဲဂုတ္တုပြည်သူပြည်သားများမှာမှု စိတ်နှလုံးညှိုးချုံးလျက် အချိန်နှင့်အမျှသေမင်းကို ရင်ဆိုင်နေကြရသည်။ ထို့ကြောင့် အဲဂုတ္တုပြည်အား တရားစီရင်မည်။ သမ္မာကျမ်းစာတွင် အဲဂုတ္တုပြည်အား ဘုရားတရားမရှိသော လောကီနိုင်ငံအဖြစ် ပုံဆောင်ဖော်ပြလေ့ရှိပါသည်။

(၁) ဖာရောနှင့် သူ၏တိုင်းသူပြည်သားများအား ခြိမ်းခြောက်ခြင်း (အခန်း ၂၉)

၂၉:၁−၁၂ အပိုဒ်ငယ် ၁−၅ တွင် ဖာရောဘုရင်အား မဟာနိုင်းမြစ်ထဲရှိ မိကျောင်းနှင့်ခိုင်းနှိုင်းထားသည်။ ထိုမိကျောင်းသည် မာန်မာနကြီးသည်။ တုတ်ခိုင်သည်။ ငါးများမှာ ပြည်သူပြည်သားတို့ကို ပုံဆောင်သည်။ သူတို့အားလုံးကို ဘုရားသခင်က ပြစ်ဒဏ်စီရင်မည်။ ဣသရေလအကူအညီလိုအပ်၍ လိုက်ရှာသောအခါ ကျူးရိုးကျိုးအဲဂုတ္တုပြည်ကို သွား၍မှီခိုမိသည်(၆−၉)။ မမှီခိုထိုက်၊ မယုံကြည်ထိုက်ခြင်းတို့ကြောင့်အဲဂုတ္တုပြည်သည် ကြီးလေးသောပြစ်ဒဏ်ကို ခံရမည်။ ယနေ့ခေတ်ယုံကြည်သူများသည်လည်း မိမိတို့ အကျင့်စရိုက်အနာအဆာကို ကုစားဖို့ သခင်ဘုရားအကူအညီဖြင့် ပြောင်းလဲရန်လိုအပ်သည်။ ကိုယ်တော်သည် အကျင့်စရိုက်ပြုပြင် ပြောင်းလဲရေးလုပ်ငန်း လုပ်ကိုင်နေပါသည်။

ဖာရောဘုရင်၏မာန်မာန ထောင်လွှားမှုကြောင့် အဲဂုတ္တုပြည်သည် နှစ်ပေါင်းလေးဆယ်မျှ လူခြေတိတ်၊ ဖုန်းဆိုးမြေ ဖြစ်လိမ့်မည်(ငယ် ၉−၁၂)။

၂၉:၁၃−၂၁ ထို့နောက်ပိုင်းတွင် ဘုရားသခင်သည် လူများကို ပြန်လည်စုစည်းစေမည်။ သို့သော် အဲဂုတ္တုပြည်သည် တိုင်းခန်းပြည်ကြီး ပြန်ဖြစ်လာတော့မည် မဟုတ်။ ဣသရေလတို့သည် အဲဂုတ္တုတို့ထံမှာ အကူအညီရှာတော့မည်မဟုတ်(ငယ် ၁၃−၁၆)။ နေဗုခပ်နေဇာမင်းကြီးသည် တုရုမြို့ကို ခက်ခဲစွာဝန်းရံ တိုက်ခိုက်သော်လည်း အကျိုးအမြတ်မပေါ်၊ အချည်းနှီး ဖြစ်ခဲ့သည်။ အကြောင်းမှာ မြို့သူမြို့သားများသည် မိမိတို့ပစ္စည်းများကိုသယ်ယူ၍ ခံတပ်ကျွန်းသို့ ထံက်ပြေးကြလေပြီ။ ထို့ကြောင့် ဘုရားသခင်က အဖိုးအခအဖြစ် အဲဂုတ္တုပြည်ကို အပ်မည်(ငယ် ၁၇−၂၀)။ နေဗုခပ်နေဇာမင်းအား အဲဂုတ္တုပြည်ကို အဖိုးအခအဖြစ် ရသည့်နေ့တွင် ဣသရေလအိမ်တော်၌ ဦးချိုပေါက်စေမည်(ဣသရေလတို့ဘုန်းမီး ပြန်လည်နိုးထစေမည်)။ ယေဇကျေလသည် ဘုရားသခင်၏ သတင်းစကားကို ပရောဖက်ပြု ဟောပြောရမည်(ငယ်၂၁)။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။