Ezekiel -26 -

ယေဇကျေလအနာဂတ္တိကျမ်း - ၂၆

တုရုမြို့နှင့်ဆိုင်သောဗျာဒိတ်

1သက္ကရာဇ်ဆယ်တစ်ခု၊ ပထမတစ်ရက်နေ့တွင်၊ ထာဝရဘုရား၏ နှုတ်ကပတ်တော်သည် ငါ့ဆီသို့ရောက်လာ၍၊ 2အချင်းလူသား၊ တုရုမြို့က၊ အေ့ဟေ၊ တိုင်းနိုင်ငံတို့၏တံခါးဖြစ်သော ယေရုရှလင်မြို့သည် ပျက်စီးသည်ဖြစ်၍၊ ငါ့လက်သို့ ရောက်လိမ့်မည်။ ထိုမြို့ဆိတ်ညံသောကြောင့် ငါစည်ပင်လိမ့်မည်ဟု ယေရုရှလင်မြို့တစ်ဖက်၌ ဆိုမိသောကြောင့်၊ 3အရှင်ထာဝရဘုရား မိန့်တော်မူသည်ကား၊ အိုတုရုမြို့၊ သင့်တစ်ဖက်၌ ငါနေ၏။ သမုဒ္ဒရာလှိုင်းတံပိုးတက်သကဲ့သို့၊ လူအမျိုးမျိုးတို့သည် သင့်ကိုတက်၍ တိုက်စေမည်။ 4သူတို့သည် တုရုမြို့ရိုးကိုဖျက်၍ ပြအိုးတို့ကို ဖြိုချကြလိမ့်မည်။ မြေမှုန့်ကို ငါခြစ်ခွာ၍ ရှင်းလင်းသောကျောက်ကဲ့သို့ ဖြစ်စေမည်။ 5ပင်လယ်အလယ်၌ ပိုက်ကွန်လှန်းရာအရပ် ဖြစ်လိမ့်မည်။ ငါပြောပြီဟု အရှင်ထာဝရဘုရားမိန့်တော်မူ၏။ လူမျိုးလုယူရာ ဖြစ်ရလိမ့်မည်။ 6လယ်ပြင်၌ရှိသော သမီးတို့သည် ဓားဖြင့်သေ၍၊ ငါသည်ထာဝရဘုရားဖြစ်ကြောင်းကို သိရကြလိမ့်မည်ဟု မိန့်တော်မူ၏။

7တစ်ဖန် အရှင်ထာဝရဘုရား မိန့်တော်မူသည်ကား၊ ဘုရင်တို့၏ဘုရင်တည်းဟူသော မြောက်မျက်နှာရှင်ဘုရင်နေဗုခဒ်နေဇာကို၊ မြင်းရထား၊ မြင်းစီးသူရဲ၊ လူများအလုံးအရင်းနှင့်တကွ တုရုမြို့သို့ ငါဆောင်ခဲ့မည်။ 8သူသည် လယ်ပြင်၌ရှိသော သင်၏သားသမီးတို့ကို ဓားနှင့်သတ်လိမ့်မည်။ သင့်တစ်ဖက်၌ ရဲတိုက်ကိုတည်၍ မြေရိုးကိုဖို့ပြီးလျှင်၊ ဒိုင်းလွှားတို့ကို ချီကာလိမ့်မည်။ 9သင်၏မြို့ရိုး တစ်ဖက်တစ်ချက်၊ ဝက်ခွတိုင်၌ တုံးတို့ကို ဆွဲထား၍ သင်၏ရဲတိုက်တို့ကို တူးရွင်းနှင့် ဖြိုချလိမ့်မည်။ 10မြင်းများသောကြောင့် မြေမှုန့်သည် သင့်ကိုဖုံးလွှမ်းလိမ့်မည်။ တိုက်ဖျက်သောမြို့ထဲသို့ ဝင်တတ်သကဲ့သို့ သင်၏မြို့တံခါးသို့ ဝင်သောအခါ၊ လှည်းရထားမျိုး မြည်သံ၊ မြင်းစီးသူရဲတို့အသံကြောင့် သင်၏မြို့ရိုးလှုပ်ရှားလိမ့်မည်။ 11မြင်းခွာတို့ဖြင့် သင်၏လမ်းရှိသမျှတို့ကိုနင်းလျက်၊ သင်၏လူတို့ကို ဓားနှင့်သတ်၍၊ သင်ခိုလှုံစရာ ရုပ်တုဆင်းတုတို့သည် မြေတိုင်အောင် ပြိုလဲကြလိမ့်မည်။ 12သင်၏ဥစ္စာကို လုယူ၍ သင်၏ကုန်များကိုလည်း သိမ်းယူကြလိမ့်မည်။ သင်၏အုတ်ထရံတို့ကို ဖြို၍ဘုံဗိမာန်တို့ကို ဖျက်ပြီးလျှင်၊ သင်၏ကျောက်၊ သစ်သား၊ မြေတို့ကို ရေထဲမှာချပစ်ကြလိမ့်မည်။ 13သင်ဆိုသောသီချင်းသံကို ငါငြိမ်းစေ၍၊ သင်တီးသောစောင်းသံကို နောက်တစ်ဖန် အဘယ်သူမျှမကြားရ။ 14သင်သည် ရှင်းလင်းသောကျောက်ကဲ့သို့ ပိုက်ကွန်လှန်းရာအရပ်ဖြစ်ရလိမ့်မည်။ နောက်တစ်ဖန် မတည်ပြန်ရ။ ငါထာဝရဘုရားပြောပြီဟု အရှင်ထာဝရဘုရား မိန့်တော်မူ၏။

15တုရုမြို့ကို ရည်မှတ်၍ အရှင်ထာဝရဘုရား မိန့်တော်မူသည်ကား၊ သင့်အလယ်၌ ကြီးစွာသော လုပ်ကြံခြင်းအမှုဖြစ်၍၊ ထိခိုက်သောသူတို့သည် အော်ဟစ်သောအခါ၊ သင်ပြိုလဲခြင်းအသံကြောင့် တစ်ကျွန်းတစ်နိုင်ငံ အရပ်တို့သည် တုန်လှုပ်ကြလိမ့်မည်။ 16သမုဒ္ဒရာမင်းအပေါင်းတို့သည် ရာဇပလ္လင်ပေါ်ကဆင်း၍၊ အင်္ကျီတော်ကိုလည်းကောင်း၊ ချယ်လှယ်သော အဝတ်တော်ကိုလည်းကောင်း၊ ချွတ်ပယ်ပြီးမှ၊ တုန်လှုပ်ခြင်းအဝတ်ကိုဝတ်လျက်၊ မြေပေါ်၌ ထိုင်လျက် ခဏခဏတုန်လှုပ်၍၊ သင်၏အမှုကြောင့် မိန်းမောတွေဝေကြလိမ့်မည်။ 17သူတို့ကလည်း၊ အို ကျော်စောသောမြို့၊ ပင်လယ်သားနေ၍ ပင်လယ်၌ အားကြီးသောမြို့၊ ပင်လယ်သားအပေါင်းတို့ ရိုသေဖွယ်သော မြို့သားနှင့် ပြည့်စုံသောမြို့၊ သင်သည် အလွန်ပျက်စီးလေပြီတကားဟု သင့်အားဆိုလျက်၊ သင့်အတွက် မြည်တမ်းကြလိမ့်မည်။ 18သင်ပြိုလဲသောနေ့တွင် တစ်ကျွန်းတစ်နိုင်ငံအရပ်တို့သည် တုန်လှုပ်၍၊ သင်ကွယ်ပျောက်သောကြောင့် ပင်လယ်၌ရှိသော ကျွန်းများတို့သည် ထိတ်လန့်ကြလိမ့်မည်။ 19အရှင်ထာဝရဘုရား မိန့်တော်မူသည်ကား၊ လူမနေသောမြို့ကဲ့သို့ ငါသည် သင့်ကိုဆိတ်ညံစေလျက်၊ ပင်လယ်ကို သင့်အပေါ်သို့ဆောင်ခဲ့၍၊ လှိုင်းတံပိုးတို့သည် သင့်ကိုလွှမ်းမိုးသောအခါ၊ 20ရှေးလူဟောင်းတို့နေရာ မြေတွင်းထဲသို့ ဆင်းသောသူတို့နှင့်အတူ သင့်ကိုငါနှိမ့်ချ၍၊ သင်၌ လူမနေစေခြင်းငှာ မြေတွင်းထဲသို့ ဆင်းသောသူတို့နှင့်အတူ၊ ရှေးကာလမှစ၍ ဆိတ်ညံရာအရပ်၊ မြေအောက်အရပ်တို့၌ ငါချထားမည်။ ထိုအခါ အသက်ရှင်သောသူတို့၏ နေရာ၌ ငါ့ဘုန်းကို ငါဖွင့်မည်။ 21သင်မူကား၊ ကြောက်မက်ဖွယ်သောအရာဖြစ်၍၊ နောက်တစ်ဖန် အဘယ်သူမျှ ရှာ၍မတွေ့နိုင်အောင်၊ ပျောက်ကုန်ရာသို့ ရောက်လိမ့်မည်ဟု အရှင်ထာဝရဘုရား မိန့်တော်မူ၏။

ယေဇကျေလအနာဂတ္တိကျမ်း - ၂၆ (အနက်ဖွင့်)

(င)တုရုလူမျိုး (၂၆:၁−၂၈:၁၉)

(၁) တုရုမြို့ပျက်စီးခြင်း(အခန်း ၁၆)

၂၆:၁−၂ ပဉ္စမြောက် တရားစီရင်ခြင်းခံရမည့်မြို့မှာ တုရုပင်လယ်ဆိပ်ကမ်းမြို့ ဖြစ်သည်။ အပြစ်ဒဏ်ခံရမည့် အကြောင်းကို ၂၆:၁ မှ ၂၈:၁၉ ထိ အကျယ်တတင့် ရေးသားထားသည်။ ကုန်သွယ်ရေးလမ်းကြောင့်အချက်အချာကျသော ထိုမြို့သည် ယေရုရှလင်မြို့ပျက်စီးသောအခါ စီးပွားရေးလုပ်ငန်းဟူသမျှ လက်ဝါးကြီးအုပ်ခွင့် ရသွားသည်။ အဲဂုတ္တုပြည်နှင့် တောင်ပိုင်းနိုင်ငံများ ကူးသန်းရောင်းဝယ်ရေး ကုန်သွယ်လုပ်ငန်းအား သိမ်းပိုက်ခွင့်ရရှိသွားသည်။

၂၆:၃−၁၁ ဘုရားသခင်သည် ထိုမြို့ပြနိုင်ငံအား ပဲ့ပြင်ဆုံးမရန် လူမျိုးများစွာကို အသုံးပြုမည်။ အငယ် ၄−၆၌ ကြိုတင်နိမိတ်ဖတ်ထားသလို ပြည့်စုံလာခဲ့ပြီ။ ဦးစွာ ဘုရင့်တကာ့ဘုရင်၂၃ ဗာဗုလုန်နေဗုခပ်နေဇာမင်းသည် မြောက်အရပ်မှ လာ၍ တုရုမြို့ကို တိုက်ခိုက်သည်(ငယ်၇−၁၁). ထိုထိတ်လန့်ခြောက်ခြားဖွယ်ကာလသည် ဘီစီ−၅၈၇ ခန့်တွင်စတင်၍ ဘီစီ−၅၈၄ တိုင်အောင် ရှည်ကြာသည်။ ထိုအနိဋ္ဌာရုံကာလနှင့် ပက်သက်၍ Feinberg ရေးသားခဲ့သည်မှာ−

ခံတပ်နှင့် မျှော်စင်များကြား၌ စစ်ခရာသံများကား ရိုးအီနေပြီဖြစ်သည်။ ဒိုင်း၊ လွှား၊ ကာများသည် မြို့ရိုး၊ ပြအိုးနှင့် ပစ်စင်များမှ ပစ်လွှတ်သော ရန်သူ့လက်နက်များကို ကာကွယ်ပေးသည်။ မြို့ရိုးနံရံများကို ထိုးလှဲဖြိုဖောက်မည့် မောင်းတုံးလှည်းများနှင့် မောင်းလွှဲများက တဒုံးဒုံ:ထုနှက်နေသည်။ ရဲတင်း၊ ပုဆိန်၊ ဓါး၊ လှံ၊ အဲမောင်း၊ တူရွင်း စသောတိုက်ပွဲဝင်လက်နက်ကရိယာများ တဖွားဖွား လှုပ်နေသည်။ အချို့ကအပိုဒ်ငယ်(၁၀) အစပိုင်းကို အတိဿယဝုတ္တိမြောက် တင်စားချက်အဖြစ် မှတ်ယူသည်။ သို့သော်လည်းကျမ်းစာပရောဖက်ပြုချက်မှာ အမှန်ဖြစ်ရပ်ထက်လွန်ကဲခြင်းမရှိပါ။ ထောင်သောင်းမသ များပြားလှသော ရန်သူ့စစ်မြင်းတို့၏ နှာမှုတ်သံ၊ ခွါပေါက်သံများကြားမှ အလိပ်အလိပ်တက်လာသော ဖုန်မှုန့်များသည် တစ်မြို့လုံး ဖုံးလွှားနေပါသည်။ ချီတက်လာသော မြင်းတပ် စစ်ရထားများအသံက တော်လဲမြေပြိုသည့်နှင့် မြေတပြင်လုံး သိမ့်သိမ့်တုန်စေသည်။ လမ်းမလမ်းသွယ်များ၌ စစ်မိန့်သံဖြင့် ဆူညံလျက်သေဆုံ:သော အလောင်းကောင်များကလည်း ပျံ့ကြဲနေသည်။ NIV ကျမ်းဖော်ပြသော Pillarsမှာ သမိုင်းပညာရှင်ဟီရိုဒိုးတပ်စ်(Herodotus) မှတ်တမ်းတင်ခဲ့သော ဟီရာကလိစ်(Heracles)နတ် ကွန်းမှပြိုလဲနေသည့် လေးမျက်နှာမော်ကွန်းတိုင်များ (Obelisks) ဖြစ်ဟန်ရှိသည်။ရွှေပိန်းချတိုင်များ သည် ညအချိန် ဝင်းလက်တောက်ပ ရှုမငြီးအောင် လှပခဲ့ကြောင်းဆိုစမှတ် ပြုကြသည်။ တုရု( Tyre) မြို့စောင့်နတ်ဘုရား Melkarth ကို ရည်မှတ် စိုက်ထူထားခြင်း ဖြစ်သည်။ (၃ရာ၊ ၇:၁၅ နှင့်ယှဉ်ဖတ်ပါ)။ ကျူးကျော်သူများက ထိုခန့်ညားကြီးကျယ်လှသော မော်ကွန်းတိုင်ကြီးများကို ဖြိုလှဲဖျက်ဆီးခဲ့သည်။၂၄

၂၆:၁၂−၁၄ ပြည်သူပြည်သားအပေါင်းတို့သည် မိမိတို့ပိုင်စည်းစိမ်ဥစ္စာများကို သယ်ယူ၍ တုရုဟုပင်ခေါ်တွင်သော ပင်လယ်ကမ်းလွန်ကျွန်းငယ်သို့ ထွက်ပြေးပုန်းခို ကြသည်။ နှစ်ပေါင်း−၂၅၀ခန့် လုံခြုံစိတ်ချစွာ နေထိုင်ခဲ့ကြပြီးနောက် ဂရိမဟာအလက်ဇန္ဒားမင်း လက်ထက်၌ ကျွန်းနှင့်တဆက်တစပ်တည်း ဖြစ်အောင်တာရိုးဖို့ရန် အုတ်ကျိုးအုတ်ပဲ့များကို ပင်လယ်ထဲပစ်ချ ဆယ်ဖို့ သဖြင့် မူလမြို့တော်ဟောင်းနေရာနှင့် ဆက်စပ်သွားသည်။ ဘီစီ ၃၃၂ ခုနှစ်တွင် မဟာအလက်ဇန္ဒား၏ စစ်သားများက လုပ်ဆောင်ကြခြင်း ဖြစ်သည်။ လွန်ခဲ့သောနှစ်−၁၀၀ ခန့်က ခရီးသွားတစ်ဦးမှတ်တမ်းတင်ခဲ့သည့် တုရုမြို့အပျက်အစီးပုံသည် ကျမ်းစာပရောဖက်ပြုချက်အတိုင်း အပီအပြင် ဖြစ်လာသည်။

ထိုကျွန်းကား အလျားတစ်မိုင်ထက်မပိုပါ။ ကျွန်း၏တောင်ဖက်ကျွန်းဆက်တာ ရိုးအလွန်၌ နှစ်ဖာလုံခန့်သာ ကျယ်မည်။ ကျောက်ဆောင်ပေါ၍ မြေမျက်နှာ မညီပါ။ ယခုတွင် နေထိုင်သူကင်းမဲ့၍ တံငါသည်များ နားခိုပိုက်ကွန်လှမ်းရာ အရပ် ဖြစ်သည်။၂၅

၂၆:၁၅–၂၁ တုရုမြို့ကျဆုံးခြင်း အကြောင်းသည် တပါးအမျိုးသားများထံသို့ ရုတ်ခြည်းပျံ့နှံ့သွားသည်။ နှစ်လိုဖွယ်ရာကောင်းသော မြို့တော်၏ အလှအပများ အားလုံးသည်လည်း ပျက်စီးကုန်သည်။ သို့သော်လည်း ဘုရားသခင်သည် ထိုနေရာအား သတ္တဝါများနေထိုင်ကျက်စားရာ မင်္ဂလာနေရာအဖြစ် ပြန်လည်ဖြစ်ထွန်းစေမည်။

အပိုဒ်ငယ် ၂၁ တိုင်အောင် တုရမြို့ ပြန်လည်တည်ဆောက်ခြင်း မတွေ့ရပါ။ Peter Stoner ရေးသားသော Science Speaks ၌ တုရုမြို့အကြောင်းပရောဖက်ပြုချက်များကို အနုစိတ်လေ့လာပြီး သင်္ချာသဘောတရား ဖြစ်တန်စွမ်းသီအိုရိ (Principle of Probability) အရ ပရောဖက်ပြုချက်အပြည့်ဝ ပြီးမြောက်ပြည့်စုံရန်မှာ အကြိမ်သန်း−၄၀၀တွင် တစ်ကြိမ်သာ အခွင့်အရေးရှိနိုင်သည်ဟု ကောက်ချက်ချထားသည်။၂၆

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။