Esther-6 -

ဧသတာ၀တ္ထု - ၆

မော်ဒကဲကိုချီးမြှင့်ခြင်း

1ထိုနေ့ညမှာ ရှင်ဘုရင်သည် စက်တော်ခေါ်၍ မပျော်နိုင်သောကြောင့်၊ နန်းတော်မှတ်စာကိုယူခဲ့ဟု မိန့်တော်မူ၍ ရှေ့တော်၌ ဖတ်ရကြ၏။ 2ရှင်ဘုရင် အာရွှေရုကို လုပ်ကြံမည်ဟု ရှာကြံသော နန်းတော်မိန်းမစိုး၊ တံခါးစောင့်နှစ်ယောက်၊ ဗိဂသန်နှင့် တေရက်အကြံကို မော်ဒကဲဖော်ပြကြောင်းကို တွေ့လျှင်၊ 3ရှင်ဘုရင်က၊ ထိုအကြံကို ဖော်ပြသောကြောင့်၊ မော်ဒကဲအား အဘယ်ဆု အဘယ်အရာကို ပေးပြီနည်းဟု မေးတော်မူသော်၊ အထံတော်၌ ခစားသော ကျွန်တော်တို့က၊ အဘယ်ဆုကိုမျှ ပေးတော်မမူပါသေးဟု ပြန်လျှောက်ကြ၏။ 4ရှင်ဘုရင်ကလည်း၊ တံတိုင်းတွင်း၌ အဘယ်သူရှိသနည်းဟု မေးတော်မူလျှင်၊ ဟာမန်သည် မိမိလုပ်နှင့်သော လည်ဆွဲချတိုင်၌ မော်ဒကဲကို လည်ဆွဲချရမည်အကြောင်း၊ နန်းတော်ပြင် တံတိုင်းတွင်းသို့ ဝင်မိသည်ဖြစ်၍၊ 5ရှင်ဘုရင်၏ ကျွန်တို့က၊ ဟာမန်သည် တံတိုင်းတော်တွင်း၌ရှိပါ၏ဟု လျှောက်ကြသော်၊ အထဲသို့ဝင်စေဟု မိန့်တော်မူ၏။ 6ဟာမန်သည် ဝင်လျှင် ရှင်ဘုရင်က၊ ရှင်ဘုရင် ချီးမြှောက်လိုသောသူ၌ အဘယ်သို့ပြုသင့်သနည်းဟု မေးတော်မူလျှင်၊ ဟာမန်က ငါမှတစ်ပါး၊ ရှင်ဘုရင်သာ၍ ချီးမြှောက်လိုသောသူ တစ်စုံတစ်ယောက် ရှိနိုင်သလောဟု စိတ်ထဲမှာအောက်မေ့လျက်၊ 7ရှင်ဘုရင်ချီးမြှောက်ခြင်းငှာ အလိုတော်ရှိသောသူအဖို့၊ 8ရှင်ဘုရင် ဝတ်ဆင်တော်မူသော မင်းမြောက်တန်ဆာ၊ ရှင်ဘုရင်စီးတော်မူသော မြင်းတော်၊ ဆောင်းတော်မူသော ရာဇသရဖူကိုယူခဲ့၍၊ 9ထိုတန်ဆာတော်နှင့် မြင်းတော်ကို ဘုန်းကြီးသော မှူးတော်မတ်တော်တစ်ပါး၌ အပ်ပြီးမှ၊ ရှင်ဘုရင် ချီးမြှောက်ခြင်းငှာ၊ အလိုတော်ရှိသောသူကို ထိုအဝတ် တန်ဆာတော်နှင့် ဝတ်ဆင်စေ၍၊ မြင်းတော်ကို စီးစေပြီးလျှင်၊ မြို့တော်လမ်းမ၌ ဆောင်သွားလျက်၊ ရှင်ဘုရင် ချီးမြှောက်ခြင်းငှာ အလိုတော်ရှိသောသူ၌ ဤသို့ပြုရသည်ဟု သူ့ရှေ့မှာ ကြွေးကြော်ပါစေဟု ရှင်ဘုရင်အား ပြန်လျှောက်လေ၏။ 10ထိုအခါ ရှင်ဘုရင်က၊ သင်ပြောသည်အတိုင်း အလျင်အမြန်သွား၍၊ အဝတ်တန်ဆာနှင့် မြင်းတော်ကိုယူပြီးလျှင်၊ ယုဒအမျိုးသား၊ နန်းတော်တံခါးမှူး မော်ဒကဲ၌ ပြုလော့။ သင်ပြောသမျှတွင်၊ တစ်စုံတစ်ခုမျှ မလပ်စေနှင့်ဟု ဟာမန်အား မိန့်တော်မူ၏။ 11ထိုအခါ ဟာမန်သည် အဝတ်တန်ဆာတော်နှင့် မြင်းတော်ကိုယူ၍၊ မော်ဒကဲကို ဝတ်ဆင်စေပြီးလျှင်၊ မြင်းတော်ကိုစီးစေသဖြင့်၊ မြို့တော်လမ်းမ၌ ဆောင်သွားလျက် ရှင်ဘုရင်ချီးမြှောက်ခြင်းငှာ အလိုတော်ရှိသောသူ၌ ဤသို့ပြုရသည်ဟု သူ့ရှေ့မှာ ကြွေးကြော်၏။ 12သို့ပြီးမှ၊ မော်ဒကဲသည် နန်းတော်တံခါးသို့ ပြန်လာ၏။ ဟာမန်မူကား ညည်းတွားလျက် ခေါင်းကိုခြုံလျက်၊ မိမိအိမ်သို့ အလျင်အမြန်သွားပြီးလျှင်၊ 13မိမိ၌ဖြစ်လေသမျှကို မယားဇေရက်နှင့် အဆွေခင်ပွန်းရှိသမျှတို့အား ကြားပြောလေ၏။ မယားဇေရက်နှင့် ဟာမန်၏အဆွေ ပညာရှိတို့ကလည်း၊ ကိုယ်တော်ရှုံးစရှိသော မော်ဒကဲသည်၊ ယုဒအမျိုးမှန်လျှင်၊ ကိုယ်တော်သည် သူ့ကိုမနိုင်။ သူ့ရှေ့မှာ ဧကန်အမှန်ရှုံးရမည်ဟု ပြန်ပြောကြ၏။ 14ထိုသို့ပြောဆိုစဉ်တွင်၊ နန်းတော်မိန်းမစိုးတို့သည် လာ၍ ဧသတာပြင်ဆင်သောပွဲသို့ ဟာမန်ကို အလျင်အမြန် ခေါ်သွားကြ၏။

ဧသတာ၀တ္ထု - ၆ (အနက်ဖွင့်)

(ခ) ဟာမန်အရှက်ကွဲခြင်းနှင့် မော်ဒကဲ၏ ဂုဏ်ကျက်သရေ (အခန်း ၆)

၆:၁–၃ ဟာမန်သည် အားရကျေနပ်စွာ အိပ်ပျော်နေသော်လည်း ဘုရင်အာရွှေရုသည် အိပ်မရသောကြောင့် အစီရင်ခံစာအမှုတွဲများကို တခုပြီးတခု ဖတ်ရှုသည်။ ဗိဂသုန်နှင့် တေရက်က ဘုရင်အား လုပ်ကြံဖို့ကြံစည်နေကြစဉ် သတင်းပေးသူမှာ မော်ဒကဲဖြစ်ကြောင်း တွေ့ရှိဖတ်ရှုသည်။ ထိုအဖြစ်အပျက်နှင့် ယခုမော်ဒကဲအား မည်သည့်ဆုလက်ဆောင် ချီးမြှင့်ပြီးကြောင်း မေးမြန်းရာ ဆုလက်ဆောင် ပေးခြင်းမရှိသေးပါ။

ထိုအကြောင်းနှင့်ပတ်သက်၍ J.G.Bellett ၏ စကားကိုမှတ်သားသင့်သည်။

ဤနေရာတွင် ရင်တုန်မိန်းမော ဖွယ်ရာတွေ့ရသည်။ ဇာတ်လမ်းထဲတွင် မြှုပ်ထားသော ဇာတ်ကွက်အကြောင်းအရာထဲက အချင်းအရာ၊ လှည့်ကွက်ထဲပရိယာယ်များ ပါဝင်သည်။ ဇာတ်လမ်းဇာတ်ကွက် အခင်းအကျင်းအားလုံးသည် အံ့သြဖွယ်ရာ ဘုရားသခင်၏ အမှုတော်ဖြစ်သည်။၁၁ ဘုရားသခင်သည် လိုလေသေး မရှိ၊ ပြည့်စုံသော ဇာတ်ညွှန်းဆရာကြီးဖြစ်သည်။

၆:၄–၁၁ နောက်တနေ့နံနက်သည် ဟာမန်သည် မော်ဒကဲအား သစ်တိုင်တွင် ဆွဲချီသတ်ရန် နန်းတော်ရင်ပြင်သို့ ဝင်လာသည်။ အာရွှေရုဘုရင်က ဟာမန်အား ရှင်ဘုရင်၏ စိတ်တော်ထိတွေ့စေသူအား မည်သို့ချီးမြှင့်သနည်းဟု မေးသည်။ ဟာမန်ကသူ့အား ရှင်ဘုရင်က ဆုလက်ဆောင် ပဏာချီးမြှင့်မည်ဟုထင်၍ တလေးတစားဖြင့် ရှင်ဘုရင်၏ ချီးမြှင့်ခြင်း ခံရသူဖြစ်ကြောင်း မြို့ထဲသို့ လှည့်လည်ပြသသင့်သည်ဟုဆိုသည်။ သို့ကြောင့် ရှင်ဘုရင်ကဟာမန်အား ထိုကဲ့သို့ ချက်ချင်းပြုလုပ်ခိုင်းသည်။ သို့သော်ဟာမန်မဟုတ်။ မော်ဒကဲဖြစ်သည်။ ဟာမန်သည် မျက်မုန်းကျိုး မြင်ပြင်းကပ်၍ သတ်မည်တကဲကဲလုပ်နေသော မော်ဒကဲအား ဘုရင်ရှေ့တော်၌ ဂုဏ်ပြုလေးစားနေရပြီ။ “မာနသည် ပျက်စီးခြင်းအရင်၊ ထောင်လွားသောသဘောသည် ရှုတ်ချခြင်းအရင်၌ နေရာကျတတ်၏” (သု ၁၆:၁၈)။

ယနေ့ခေတ်ကာလတွင် ဘုရားသခင်၏ စိတ်တော်ထိတွေ့စေသောသူမှာ ခရစ်တော်ဘုရားသာရှိပါသည်။ “ခပ်သိမ်း’သောသတ္တဝါတို့သည် ယေရှု၏ဘွဲ့နာမတော်ကို ဒူးထောက်၍ ယေရှုခရစ်တော်သည် သခင်ဖြစ်တော်မူ၏ ဟု နှုတ်ဖြင့်ဝန်ခံသဖြင့် ခမည်းတော်ဘုရား၏ ဘုန်းအသေရေတော်ကို ထင်ရှားစေကြမည့်အကြောင်းတည်း” ဟု ကျမ်းစာစကားသက်သေရှိပါသည် (ဖိ ၂:၁၀-၁၁)။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။