Esther-3 -

ဧသတာ၀တ္ထု - ၃

ဟာမန်၏အကြံအစည်

1ထိုနောက်မှ ရှင်ဘုရင်အာရွှေရုသည် အာဂတ်အမျိုး၊ ဟမ္မေဒါသသားဟာမန်ကို ချီးမြှောက်၍၊ အထံတော်၌ရှိသော မှူးမတ်အပေါင်းတို့ထက် သာ၍မြင့်မြတ်သော နေရာကို ပေးတော်မူ၏။ 2နန်းတော်တံခါးသို့ရောက်သော ရှင်ဘုရင်၏ ကျွန်အပေါင်းတို့သည်၊ အမိန့်တော်ရှိသည်အတိုင်း ဟာမန်ကို ဦးချရှိခိုးကြ၏။ မော်ဒကဲမူကား ဦးမချ၊ ရှိမခိုး။ 3နန်းတော်တံခါးသို့ ရောက်သော ရှင်ဘုရင်၏ကျွန်တို့က၊ သင်သည် ရှင်ဘုရင်အမိန့်တော်ကို အဘယ်ကြောင့် ငြင်းဆန်သနည်းဟု နေ့တိုင်း မော်ဒကဲအား မေးမြန်းသတိပေးသော်လည်း၊ 4မော်ဒကဲက၊ ငါသည် ယုဒလူဖြစ်သည်ဟု ပြန်ပြော၍၊ သူတို့စကားကို နားမထောင်သောကြောင့်၊ သူတို့သည် မော်ဒကဲစကားတည်မည်၊ မတည်မည်ကို သိလိုသောငှာ၊ ဟာမန်အား ကြားပြောကြ၏။ 5ထိုသို့ မော်ဒကဲသည် ဦးမချ၊ ရှိမခိုးဘဲ နေကြောင်းကို ဟာမန် သိမြင်သောအခါ၊ အလွန်အမျက်ထွက်၍၊ 6သူတို့သည် မော်ဒကဲအမျိုးကို ဖော်ပြသောကြောင့်၊ မော်ဒကဲတစ်ယောက်တည်းကို ကွပ်မျက်လျှင်၊ စိတ်မပြေလောက်ဟု ဟာမန်သည် အောက်မေ့လျက်၊ မော်ဒကဲအမျိုးသားချင်း တည်းဟူသော အာရွှေရုနိုင်ငံ အရပ်ရပ်၌ရှိသော ယုဒလူအပေါင်းတို့ကို ဖျက်ဆီးခြင်းငှာ ရှာကြံလေ၏။

7ထိုကြောင့် အာရွှေရုနန်းစံဆယ်နှစ်နှစ်၊ နိသန် အမည်ရှိသော ပထမလတွင်၊ နေ့ရက်အစဉ်၊ လအစဉ် အတိုင်းလိုက်၍၊ အာဒါအမည်ရှိသော ဒွါဒသမလတိုင်အောင်၊ ဟာမန်ရှေ့မှာ ပုရစာရေးတံချကြ၏။ 8တစ်ဖန် ဟာမန်သည် ရှင်ဘုရင်အာရွှေရုထံတော်သို့ ဝင်၍၊ အခြားတစ်ပါးသော လူမျိုးအပေါင်းတို့နှင့် ကျင့်ရာထုံးတမ်းမတူ၊ အရှင်မင်းကြီး စီရင်တော်မူချက်တို့ကို နားမထောင်၊ နိုင်ငံတော်အတွင်း၊ တိုင်းသူပြည်သား အမျိုးမျိုးတို့တွင် အရပ်ရပ်ကွဲပြားလျက်နေသော လူမျိုးတစ်မျိုးရှိပါ၏။ ထိုအမျိုးကို အခွင့်ပေးတော်မူရာ၌ ကျေးဇူးတော်မရှိပါ။ 9ကိုယ်တော်သဘောတူလျှင် ထိုအမျိုးကို ဖျက်ဆီးစေဟု အမိန့်ရှိတော်မူပါ။ ထိုအမှုကို ဆောင်ရွက်သော သူတို့သည် ဘဏ္ဍာတော်တိုက်ထဲသို့ ငွေအခွက်တစ်သိန်းကို သွင်းစေခြင်းငှာ၊ ကျွန်တော်အပ်ပေးပါမည်ဟု လျှောက်လေ၏။ 10ရှင်ဘုရင်ကလည်း၊ ထိုငွေကို သင့်အားငါပေး၏။ 11ထိုလူမျိုးကိုလည်း သင်သည် ပြုချင်သမျှ ပြုရသောအခွင့် ရှိစေခြင်းငှာ၊ သင်၌ငါအပ်သည်ဟု လက်စွပ်တော်ကိုချွတ်၍ ယုဒအမျိုး၏ ရန်သူဖြစ်သော အာဂတ်အမျိုး ဟမ္မေဒါသသား ဟာမန်အား ပေးတော်မူ၏။ 12ထိုအခါ ပထမလ တစ်ဆယ်သုံးရက်နေ့တွင်၊ စာရေးတော်ကြီးတို့ကိုခေါ်၍ ကိုယ်စားတော်မင်း၊ အပြည်ပြည်အုပ်သော မြို့ဝန်၊ အရပ်ရပ်စီရင်သော သူကြီးတို့ကို ဟာမန်မှာထားသမျှအတိုင်း၊ လူအမျိုးမျိုးပြောသော စကားအသီးအသီးအားဖြင့် ရှင်ဘုရင် အာရွှေရု၏အမိန့်တော်ကို စာရေး၍၊ ရှင်ဘုရင်၏ လက်စွပ်တော်နှင့် တံဆိပ်ခတ်လေ၏။ 13အာဒါအမည်ရှိသော ဒွါဒသမလ တစ်ဆယ်သုံးရက် တစ်နေ့ချင်းတွင်၊ ယုဒလူအကြီးအငယ် မိန်းမ ကလေးရှိရှိသမျှတို့ကို သတ်ဖြတ်သုတ်သင်ပယ်ရှင်း၍၊ သူတို့ဥစ္စာကို လုယူသိမ်းရုံးစေခြင်းငှာ၊ အမိန့်တော်စာကို စာပို့လုလင်တို့ဖြင့် နိုင်ငံတော်အပြည်ပြည်သို့ ပေးလိုက်လေ၏။ 14ဤရွေ့ကား၊ လူအမျိုးမျိုးတို့သည် ထိုနေ့ရက်တွင် အသင့်ရှိစေခြင်းငှာ၊ အတိုင်းတိုင်းအပြည်ပြည်၌ ကြော်ငြာရသော အမိန့်တော်စာချက် ဖြစ်သတည်း။ 15ရှုရှန်နန်းတော်၌ ထိုအမိန့်တော်စာကို ကြော်ငြာပြီးမှ၊ ရှင်ဘုရင် စီရင်သည်အတိုင်း၊ စာပို့လုလင်တို့သည် အလျင်အမြန် ပြေးသွားကြ၏။ ရှင်ဘုရင်နှင့် ဟာမန်သည် စပျစ်ရည်သောက်ပွဲ၌ ထိုင်၍၊ ရှုရှန်မြို့တော်သည် ဆင်းရဲခြင်းသို့ ရောက်သတည်း။

ဧသတာ၀တ္ထု - ၃ (အနက်ဖွင့်)

၃။ ယုဒလူများသတ်ဖြတ်ညှင်းဆဲခြင်းစီမံကိန်း (အခန်း ၃၊၄)

(က) ဟာမန်ကရှင်ဘုရင်အား လျှောက်လဲခြင်း (အခန်း ၃)

၃:၁ “ထို့နောက်မှ” ဟူသောစကားသည် အခန်း ၂နှင့် ၃အကြား (၅)နှစ်ကြာညောင်းခြင်းကို ဆိုလိုသည်။ အပိုဒ်ငယ် (၁)တွင် ဇာတ်လမ်းစနေပြီ။ သရုပ်ဆောင် ဧသတာနှင့် ဗိလိန်ဟမ္မေဒါသ၏သားဟာမန်တို့ပေါ်လာပြီ။ ထိုနေရာ ရာထူးဠာနန္တရသို့ ဟာမန်ပေါ်ထွန်းရောက်ရှိလာပုံကို မရှင်းပြသော်လည်း စာတန်၏ ကြိုးကိုင်မှုဖြစ်သည်မှာ သေချာသည်။ ဟာမန်သည် အာမလက်တော်ဝင် မျိုးရိုးနန်းနွယ်ဖြစ်သည်။ အာမလက်တို့၏ စစ်ပွဲဆင်နွဲပုံကို ထွ ၁၇:၈-၁၆ တွင်ရှင်းပြထားသည်။ ဧသတာဝတ္ထုသည် ထိုစစ်ပွဲကို အစပြန်ကောက်ထားသည်။ (၁ ရာ ၁၅:၃၂၊ ၃၀:၁-၁၀၊ ၅၇၄:၄၃ကိုလည်း ကြည့်ပါ)။

၃:၂–၆ ဟာမန်သည် အာဏာရှိသူဖြစ်သောကြောင့် နန်းတွင်းသို့ဝင်သောအခါ တံခါးစောင့်များက အရိုအသေပေးကြရသည်။ သို့သော် မော်ဒကဲသည် ဘုရားသခင်မှလွဲ၍ မည်သူကိုမျှ ဦးချလေ့မရှိသော အာမလက်လူ ဟာမန်အား ဦးညွှတ်အရိုအသေမပေး။ မောရှေကျမ်းကလူလူချင်း အရိုအသေပေးဖို့ မတားမြစ်သော်လည်း ကိုးကွယ်ခြင်းကို တားမြစ်သည်။ အရှေ့တိုင်း သက်ဦးစံပိုင်များသည် ထိုသို့သော အရိုသေပြုခြင်းခံယူလေ့ရှိသည်။ မော်ဒကဲ၏ အနီးအနားရှိ လူများက မျက်ရိပ်မျက်ကဲ ပြကြသော်လည်း မော်ဒကဲသည်မဖြုံ။ ဦးညွတ်ရှိခိုးခြင်းမပြု။ မိမိကိုယ်ကို အထင်ကြီးလွန်းသူ မောက်မာသော ဟာမန်သည် အမျက်ဒေါသထွက်သည်။ ထို့ကြောင့် မော်ဒကဲတဦးတည်းသာမက တတိုင်းပြည်လုံးရှိ ယုဒလူများအား သတ်ဖြတ်ဝါးစားချင်သည်။ နိုင်ငံအဝှမ်းရှိ ယုဒလူဟူသမျှ ကျူပင်ခုတ် ကျူငုတ်မကျန် ရှင်းပစ်ရန် စီမံကိန်းရေးဆွဲသည်။

၃:၇–၁၁ ဟာမန်၏ ပထမဦးဆုံး အစီအစဉ်မှာ ယုဒလူအုပ်ကြီးအား အစုလိုက်အပြုံလိုက် သတ်ဖြတ်မည့်နေ့ရက် ရွေးချယ်ခြင်းဖြစ်သည်။ ထိုနေ့ရက်ရွေးချယ်ရန် တနှစ်နီးပါးကြာသည်။ လူသည်မည်သို့ပင် ကြံစည်ကြိုးပမ်းစေကာမူ အထမြောက်ဖို့ရန် ဘုရားသခင်၏ ခွင့်ပြုချက်လိုသည်။ ” စာရေးတံတို့ကို စိတ်ထဲ၌ လောင်းလျက်ရှိရာတွင် ခွဲဝေစီရင်ခြင်းအမူကို ထာဝရဘုရားပိုင်တော်မူ၏” (သု ၁၆:၃၃)။ နောက်တဆင့်အဖြစ် ဟာမန်သည် ရှင်ဘုရင်ထံတော်သို့ ချဉ်းကပ်လုပ်ကြံ ဇာတ်လမ်းခင်းကြသည်။ နိုင်ငံတော်အတွင်းတွင် စိုးရိမ်စရာ အန္တရယ်သက်ရောက်နေကြောင်း သူ့အား ရှင်းလင်းခွင့်ပေးရန် ခွင့်တောင်းသည်။ မေဒိနှင့် ပါရှန်းတို့ထုံးတမ်းစဉ်လာအရ ရှင်ဘုရင်အမိန့်ကို ပြန်လည်ပြင်ဆင် ရုပ်သိမ်းခြင်းမရှိ။ အကယ်၍ ဘုရင်မင်းက ခွင့်ပြုအမိန့်တော်ချမှတ်လျှင် ဟာမန်ကိုယ်တိုင်က ဘုရင့်ဘဏ္ဍာတော်အဖြစ် ငွေအခွက် တစ်သိန်းသွင်းနိုင်မည်ဟု မက်လုံးတပ်ပေးလိုက်သည်။ ထိုရှင်ဘုရင်သည် ငွေအခွက်တစ်သိန်းအရိပ်က မျက်စိဖုံးသွားသည်။ သို့ဖြင့် အပြစ်ကင်းသော လူထောင်ပေါင်းများစွာသတ်ဖြတ်ဖို့ အမိန့်ပေးလိုက်သည်။ အမိန့်တော်အား ပိုမိုခိုင်မာစေရန် လက်စွပ်တော်ချွတ်ပေးလိုက်သည်။ ထိုငွေအကျပ်တစ်သိန်းသည် ဟာမန်သတ်ပစ်မည့်ယုဒလူများထံမှ သိမ်းဆည်းမည့်ငွေဖြစ်သည် (ငယ် ၁၁)။

၃:၁၂–၁၅ အပြစ်မဲ့သောလူသားများအား သတ်ပစ်မည့်အမိန့်ကို ဒွါဒသမသတ် တစ်ဆယ့်သုံးရက်နေ့တွင် ထုတ်ပြန်သည်။ အာရွှေရု၏ နန်းတော်ထဲတွင် အာရွှေရုနှင့်ဟာမန်သည် စားသောက်ပျော်ပါး မူးရူးနေကြသော်လည်း တိုင်းသူပြည်သားများသည် မျက်လုံးမျက်ဆံပြူး၍ သဲထိတ်ရင်ဖိုနေကြသည်။ ထိုအကြောင်းကို Irving Jensen ကဤသို့ဆိုသည်။

နောက်ဆုံးစာစုကို မှတ်သားစေချင်သည်။ “ရှင်ဘုရင်နှင့်ဟာမန်သည် စပျစ်ရည်သောက်ပွဲ၌ထိုင်၍ ရှုရှန်မြို့တော်သည် ဆင်းရဲခြင်းသို့ရောက်သည်။” ယုဒလူများသာမက ယုဒလူများနှင့် ဆက်နွယ်ပတ်သက်သူများလည်း စိုးရိမ်ကြသည်။ တတိုင်းပြည်လုံး စိတ်ဆင်းရဲကြသည်။ တခါတရံ ပြည်သူအများသည် မှားတတ်ကြသော်လည်း အမြဲတန်းမမှားနိုင်ကြ။ ယခု ဇာတ်လမ်းမူ ရှင်ဘုရင်နှင့် လက်ထောက်တော်၏ အသေးအဖွဲ့အမှားဖြစ်သော်လည်း ပြည်သူများဘဝပျက်ရသည်။ လူတိုင်းဘုရားတနေကြသည်။ လောကဘုရင်ကအမိန့်ထုတ်ပြန်သော်လည်း ထိုအမိန့်၏ နောက်ဆုံးအကျိုးသက်ရောက်မူသည် ဘုရားသခင်လက်ထဲတွင်ရှိသည်။၉

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။