Esther-2 -

ဧသတာ၀တ္ထု - ၂

ဧသတာမိဖုရားဖြစ်လာခြင်း

1တစ်ဖန် ရှင်ဘုရင်အာရွှေရုသည် စိတ်တော်ပြေသောအခါ၊ ဝါရှတိကိုလည်းကောင်း၊ သူပြုသောအမှုနှင့် သူ့တစ်ဖက်၌စီရင်သော အမှုကိုလည်းကောင်း အောက်မေ့တော်မူ၏။ 2အထံတော်၌ ခစားသော ကျွန်တော်တို့ကလည်း၊ အဆင်းလှသော သမီးကညာတို့ကို အရှင်မင်းကြီးအဖို့ ရှာရပါမည်အကြောင်း အခွင့်ပေးတော်မူပါ။ 3အဆင်းလှသော သမီးကညာအပေါင်းတို့ကို ရှုရှန်နန်းတော်တွင် အပျိုတော်နေရာသို့ စုဝေးစေ၍၊ နန်းတော်မိန်းမစိုး၊ အပျိုတော်အုပ်ဟေဂဲ၌ အပ်စေခြင်းငှာ၊ နိုင်ငံတော် အတိုင်းတိုင်းအပြည်ပြည် မင်းအရာရှိတို့ကို ခန့်ထားတော်မူပါ။ စင်ကြယ်စေခြင်းငှာ ဆေးမျိုးကို အပ်ပေးတော်မူပါ။ 4နှစ်သက်တော်မူသော သမီးကညာကို မိဖုရားဝါရှတိအရာ၌ ခန့်ထားတော်မူပါဟု လျှောက်သောစကားကို ရှင်ဘုရင်နှစ်သက်၍ ထိုသို့ စီရင်တော်မူ၏။

5ထိုကာလတွင် ရှုရှန်မြို့တော်၌၊ ဗင်္ယာမိန်အမျိုး ကိရှ၊ ရှိမိ၊ ယာဣရတို့မှ ဆင်းသက်သော မော်ဒကဲအမည်ရှိသော ယုဒလူတစ်ယောက်ရှိ၏။ 6ထိုသူသည် ဗာဗုလုန်ရှင်ဘုရင် နေဗုခဒ်နေဇာ သိမ်းသွားသော ယုဒရှင်ဘုရင် ယေခေါနိမှစ၍၊ ဖမ်းဆီးသိမ်းသွားခြင်းကို ခံရသောလူစု၌ ပါသတည်း။ 7ထိုသူသည် ဘထွေးသမီး ဟဒဿတည်းဟူသော ဧသတာကို မွေးမြူ၏။ ထိုသတို့သမီးသည် မိဘမရှိ၊ ပုံပြင်ယဉ်ကျေး၍ အသွေးအဆင်းလည်း လှ၏။ မိဘသေသောအခါ၊ မော်ဒကဲသည် ယူ၍ ကိုယ်သမီးကဲ့သို့ မှတ်သတည်း။

8ရှင်ဘုရင် အမိန့်တော်ကိုထုတ်၍ ကျော်သောအခါ၊ အပျိုများတို့ကို ရှုရှန်နန်းတော်သို့ စုဝေးစေ၍၊ မိန်းမစိုးဟေဂဲ၌ အပ်ရာတွင်၊ ဧသတာကိုလည်း နန်းတော်သို့ ခေါ်ဆောင်၍ ဟေဂဲ၌ အပ်ကြ၏။ 9ဧသတာသည် ဟေဂဲစိတ်နှင့်တွေ့၍ မျက်နှာရသဖြင့်၊ ဟေဂဲသည် စင်ကြယ်စေသောဆေးမျိုးနှင့် ပေးရသော အဝတ်အစားကို အလျင်အမြန်ပေး၏။ နန်းတော်၌ ရွေးကောက်သော ကျွန်မခုနစ်ယောက်တို့ကိုလည်း ပေး၍၊ ဧသတာနှင့် သူ၏ကျွန်မတို့ကို အပျိုတော်နန်းတွင် အမြတ်ဆုံးသောနေရာ၌ ချီးမြှောက်လေ၏။ 10ဧသတာသည် မိမိအမျိုးနှင့် မိမိဆွေညာတကာကို မဖော်မပြမည်အကြောင်း၊ မော်ဒကဲ သတိပေးသည်အတိုင်း မဖော်မပြဘဲ နေ၏။ 11ဧသတာသည် အဘယ်သို့ရှိသည်ကိုလည်းကောင်း၊ သူ၌ အဘယ်သို့ ပြုကြလိမ့်မည်ကိုလည်းကောင်း၊ မော်ဒကဲသည် သိခြင်းငှာ အပျိုတော်နန်းဝင်းရှေ့မှာ နေ့တိုင်းသွားလာ၏။

12ထိုအပျိုတော်တို့ ထုံးစံအတိုင်း၊ တစ်နှစ်စေ့သောအခါ တစ်ယောက်နောက်တစ်ယောက် အလှည့်သင့်သည်အတိုင်း၊ ရှင်ဘုရင်အာရွှေရုထံသို့ ဝင်ရ၏။ ခြောက်လပတ်လုံး မုရန်ဆီ၊ ခြောက်လပတ်လုံး နံ့သာမျိုး အစရှိသော စင်ကြယ်စေသော ဆေးမျိုးကိုသုံး၍၊ စင်ကြယ်ခြင်းအမှု ပြီးသည်တိုင်အောင် ထိုမျှကာလကို လွန်စေရ၏။ 13ထိုနောက်မှ အပျိုတော်သည် ရှင်ဘုရင်ထံသို့ ဝင်ချိန်ရောက်သောအခါ၊ အလိုရှိသမျှတို့ကို တောင်း၍၊ အပျိုတော်နန်းမှ ရှင်ဘုရင်နန်းတော်သို့ ယူသွားရ၏။ 14ညဉ့်ဦးအချိန်၌ဝင်၍ နံနက်အချိန်၌ နန်းတော်မိန်းမစိုး၊ မောင်းမမိဿံအုပ်၊ ရှာရဂါဇစောင့် ဒုတိယမိန်းမနန်းသို့ ပြန်ရ၏။ ရှင်ဘုရင်ချစ်၍ နာမည်အားဖြင့် ခေါ်တော်မမူလျှင် နောက်တစ်ဖန် အထံတော်သို့မဝင်ရ။

15မိမိသမီးကဲ့သို့ မော်ဒကဲမွေးမြူသော ဘထွေး အဘိဟဲလသမီး ဧသတာသည် အလှည့်သင့်၍၊ ရှင်ဘုရင်ထံသို့ ဝင်ရသောအခါ၊ နန်းတော်မိန်းမစိုး၊ အပျိုတော်အုပ် ဟေဂဲစီရင်သော အရာမှတစ်ပါး အဘယ်အရာကိုမျှ မတောင်း၊ ဧသတာကို တွေ့မြင်သမျှသောသူတို့သည် ချစ်တတ်ကြ၏။ 16ထိုသို့ ရှင်ဘုရင်အာရွှေရုသည် နန်းစံခုနစ်နှစ်၊ တေဗက်အမည်ရှိသော ဒသမလတွင်၊ ဧသတာကို နန်းတော်၌ သိမ်းတော်မူပြီးလျှင်၊ 17အခြားသော သမီးကညာအပေါင်းတို့ထက် ဧသတာသည် စိတ်တော်ကိုနူးညွတ်စေ၍၊ အထံတော်၌ မျက်နှာရသဖြင့်၊ ရှင်ဘုရင်သည် အခြားသော မိန်းမတကာတို့ကို ချစ်သည်ထက် ဧသတာကိုသာ၍ ချစ်သောကြောင့်၊ သူ့ခေါင်းပေါ်မှာ ရာဇသရဖူကိုတင်၍ မိဖုရားဝါရှတိအရာ၌ ချီးမြှောက်တော်မူ၏။ 18ထိုအခါ ရှင်ဘုရင်သည် ဧသတာပွဲဟူ၍ ကြီးသောပွဲကို မှူးတော်မတ်တော် ကျွန်တော်တို့အဖို့ လုပ်သဖြင့်၊ နိုင်ငံတော်တိုင်းပြည်တို့ကို မင်းမှုလွှတ်၍၊ စည်းစိမ်တော်နှင့်လျော်စွာ ဆုချတော်မူ၏။

ဘုရင်အသက်ကိုမော်ဒကဲကယ်ခြင်း

19သမီးကညာတို့သည် ဒုတိယအချိန်၌ စုဝေးသောအခါ၊ မော်ဒကဲသည် နန်းတော်၌ တံခါးမှူးဖြစ်၏။ 20ဧသတာသည် မော်ဒကဲထံ မွေးမြူခြင်းကိုခံ၍ နေစဉ်အခါ၊ သူ၏စကားကို နားထောင်သည်နည်းတူ နားထောင်သေးသည်ဖြစ်၍၊ မော်ဒကဲသတိပေးသည်အတိုင်း၊ မိမိအမျိုး၊ မိမိဆွေညာတကာတို့ကို မဖော်မပြဘဲ နေသတည်း။

21ထိုကာလတွင်၊ မော်ဒကဲသည် နန်းတော်၌ တံခါးမှူးဖြစ်စဉ်၊ ဗိဂသန်နှင့် တေရက်တည်းဟူသော နန်းတော်မိန်းမစိုး၊ တံခါးစောင့် နှစ်ယောက်တို့သည် ဒေါသစိတ်ရှိ၍ ရှင်ဘုရင်အာရွှေရုကို လုပ်ကြံမည်ဟု အားထုတ်ကြ၏။ 22ထိုအမှုကို မော်ဒကဲသိ၍ မိဖုရားဧသတာအား ဖော်ပြ၏။ ထိုသို့ မော်ဒကဲဖော်ပြကြောင်းကို ဧသတာသည် ရှင်ဘုရင်အား လျှောက်လေ၏။ 23ထိုအမှုကို စစ်ကြော၍ အမှန်သိသောအခါ၊ ထိုသူနှစ်ယောက်တို့ကို သစ်ပင်၌ လည်ဆွဲချပြီးမှ၊ ရှင်ဘုရင်ရှေ့၊ နန်းတော်မှတ်စာ၌ ရေးမှတ်သတည်း။

ဧသတာ၀တ္ထု - ၂ (အနက်ဖွင့်)

၂။ ဧသတာကို မိဖုရားမြောက်ခြင်း (အခန်း ၂)

၂:၁–၄ မိဖုရားဝါရှတိအား အိမ်တော်ရာ နန်းရင်ပြင်မှ မောင်းထုတ်လိုက်ပြီ။ နောက်တဆင့် ဘာလုပ်သင့်သနည်း။ မင်းတိုင်ပင်အမတ်များက မိဖုရားဖြစ်ထိုက်သော သမီးကညာ ရှာဖွေပေးခွင့်တောင်းသည်။ တပြည်လုံးရှိ အချောအလှ ပျိုကညာများကို ဆင့်ခေါ်စုဝေးစေသည်။

၂:၅–၇ အမိန့်တော်အတိုင်း လှပျိုဖြူများ ရှုရှန်နန်းတော်သို့ စုဝေးရောက်ရှိလာကြသည်။ ထိုအထဲတွင် အပျိုချော ဧသတာလည်းပါသည်။ ဧသတာသည်မိဘနှစ်ပါး ကွယ်လွန်သောကြောင့် ဘထွေးမော်ဒကဲက မွေးစားထားသည်။ မော်ဒကဲသည် ဗင်္ယာမိန်အမျိုးဖြစ်၍ ယေခေါနိဘုရင်နှင့်အတူ နေဗုခပ်နေဇာမင်း ဖမ်းဆီးခေါ်ဆောင်လာခြင်း ခံရသူဖြစ်သည် ( ၄ရာ ၂၄:၁၄-၁၆)၊။

၂:၈–၁၁ အပျိုတော် ထိန်း မိန်းမဟေဂဲက ဧသတာ၏ ရုပ်ဆင်းအင်္ဂါလက္ခဏာအား အကဲခတ်မိသောကြောင့် ပဏာမရွေးချယ်လိုက်သည်။ အကောင်းဆုံးအခန်းပေး၍ အခြွေအရံများကိုလည်း ပေးထားသည်။ မော်ဒကဲက ဧသတာအား ကိုယ်ရေးရာဇဝင် ဖုံးကွယ်ခိုင်းထားသည်။ မော်ဒကဲသည် ဧသတာအား နေ့စဉ်ဆက်သွယ်ခွင့် မရသော်လည်း ဧသတာ၏ ကောင်းသတင်းကြားနေရသည်။

၂:၁၂–၁၄ အပျိုတော်များသည် (၁၂)လတိတိ အလှည့်ကျ ရှင်ဘုရင်နှင့် တအိပ်ယာတည်း အိပ်ခွင့်ရကြသည်။ ထိုသို့ ရှင်ဘုရင်နှင့်အတူတကွ မနေခင် ကိုယ်နံ့မွှေးပျံဖို့ (၆)လတိတိ အမွေးနံ့သာစွဲအောင် ကြိုတင်ပြင်ဆင်ရသည်။ နောက်တဖန် ရှင်ဘုရင်ရှေ့သို့ ရောက်လျှင် ဆုလက်ဆောင်တောင်းဆိုခွင့်ရှိသည်။ သို့ဖြင့် တညတာ အတူတကွ အိပ်စက်ခွင့်ရကြပြန်သည်။ သို့သော်လည်း ဘုရင်က နာမည်တပ်၍ မခေါ်မချင်း ဘုရင်သလွန်တော်တွင် အိပ်စက်ခွင့်မရှိ။

ခရစ်ယာန်အသက်တာတွင်လည်း ထိုနည်းအတိုင်းဖြစ်သည်။ ဘုရားသခင် ကိန်းဝပ်ရာဗိမာန်တော်သို့ ဝင်သောအခါ သန့်ရှင်းစင်ကြယ်ရသည်။ အပြစ်အနာ အဆာမဲ့ တကွက်မစွန်းရ (ဧ ၅:၂၇)။

၂:၁၅–၁၈ ဧသတာသည် အပြင်အဆင်များသာမက ဟေဂဲ၏သွန်သင်ချက်ဖြင့် ဘုရင်သဘော တွေ့မနော ခွေ့အောင်နေတတ်သည်။ ပင်ကိုယ်၌လည်း ဧသတာသည် ရုပ်အဆင်းအင်္ဂါ ချောမောလှပသူဖြစ်သောကြောင့် မိမိအလှတွင် မာန်မာနမတက်ဖို့ သွန်သင်ခြင်းဖြစ်နိုင်သည်။ ရှင်ဘုရင်သည် ဧသတာအား အခြားအပျိုတော်များထက် ဘဝင်ကျစွဲမက်၍ မိဖုရားအဖြစ်တင်မြောက်သည်။ ပွဲလမ်းသဘင် ကျင်းပချီးမြှင့်သည်။ ထိုပွဲလမ်းကိုလည်း ဧသတာပွဲလမ်းသဘင်ဟု ဂုဏ်ပြုခေါ်ဆိုသည်။ တိုင်းပြည်အဝှမ်းတွင် ရုံးပိတ်ရက်သတ်မှတ်ပေးသည်။ ရာဇသရဖူကိုလည်း ချီးမြှင့်၍ အဖိုးတန်လက်ဆောင်များ ပေးအပ်သည်။

၂:၁၉–၂၃ ဒုတိယအကြိမ် အပျိုတော်ရွေးချယ်ပွဲ ကျင်းပသောအခါ မော်ဒကဲသည် တံခါးမှူးဖြစ်နေပြီး ဧသတာသည် မော်ဒကဲ၏လက်ထဲတွင် လူလားမြောက်ကြီးပြင်းလာသူဖြစ်သောကြောင့် ဘထွေး၏စကားကို မြေဝယ်မကျ နားထောင်သူဖြစ်သည်။ သို့သော် နန်းထုံးနန်းဓလေ့ကို မထိခိုက် မပျက်ပြားကြ။ ထိုကာလတွင် အာရွှေရုဘုရင်အား လုပ်ကြံမည့်သတင်းအား မော်ဒကဲက ဧသတာမှတဆင့် ဘုရင်ကြီးထံသို့ သတင်းပေးလက်ဦးခဲ့ကြ၍ သစ္စာဖောက် ဗိဂသန်နှင့် တေရက်တို့အား ဖမ်းဆီးကြိုးမိန့်ပေးခဲ့ရသည်။

ထိုသတင်းစကားသည် တပြည်လုံးသို့ ပျံ့နှံ့သွားသည်။ မော်ဒကဲသည် ဆုလက်ဆောင် ချက်ချင်းမရ။ သို့သော် စိတ်ရှည်စွာ စောင့်သည်။ စောင့်သည့်အတိုင်း ရောက်ရှိလာသည်။ ဘုရားသခင်၏ လူတို့၏ ကောင်းသော အမှုလုပ်ဆောင်ချက်များအား မေ့ရိုးထုံးစံမရှိ။ သမိုင်းဆရာ Herodotus က”ပါရှန်းခေတ်တွင် သစ္စာဖောက်များအတွက် အပြစ်ဒဏ်သည် ကြိုးမိန့်သေဒဏ်တခုတည်းသာရှိသည်” ဟုဆိုသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။