Daniel -6 -

ဒံယေလအနာဂတ္တိကျမ်း - ၆

ဒံယေလကိုကြံစည်ခြင်း

1ဒါရိမင်းကြီးသည် နိုင်ငံတော် အမှုအရေးအလုံးစုံတို့ကို စီရင်ရသော မြို့ဝန်တစ်ရာနှစ်ဆယ် တို့ကိုလည်းကောင်း၊ 2အကျိုးတော်ကို မယုတ်မလျော့စေခြင်းငှာ၊ ထိုမြို့ဝန်အပေါင်းတို့ကို အုပ်ချုပ်စစ်ကြောရသော ဝန်ကြီးသုံးပါးကိုလည်းကောင်း အလိုတော်ရှိသည်အတိုင်း ခန့်ထားတော်မူ၏။ ထိုဝန်ကြီးသုံးပါးတွင် ဒံယေလသည် ဝန်ကြီးအရာကိုရသည်သာမက၊ 3ထူးဆန်းသော ဉာဏ်နှင့်ပြည့်စုံ၍ မြို့ဝန်တကာ၊ ဝန်ကြီးတကာတို့ထက် လွန်ကဲသောကြောင့်၊ နိုင်ငံတော်တစ်နိုင်ငံလုံးကို သူ၌ အပ်နှင်းမည်ဟု ရှင်ဘုရင်သည် အကြံရှိတော်မူ၏။

4ထိုအခါ ဝန်ကြီးနှင့် မြို့ဝန်တို့သည် ဒံယေလ၌ အပြစ်တင်ခွင့်ကိုရှာ၍၊ နိုင်ငံတော်အမှုအရေးများကို စစ်ကြောကြ၏။ ဒံယေလသည် သစ္စာနှင့်ပြည့်စုံ၍ အပြစ်တစ်စုံတစ်ခုမျှ မရှိသောကြောင့်၊ အပြစ်တင်ခွင့်ကို ရှာ၍မတွေ့ကြသည်ရှိသော်၊ 5ဘုရားသခင်၏ ဘာသာမှုမှတစ်ပါး အခြားသောအမှုတွင် ဒံယေလ၌ အပြစ်တင်ခွင့်ကို ငါတို့မတွေ့နိုင်ကြဟု တိုင်ပင်ပြောဆိုပြီးမှ၊ 6အထံတော်သို့ လာရောက်စည်းဝေးကြ၍၊ အရှင်မင်းကြီးဒါရိ၊ အသက်တော် အစဉ်အမြဲရှင်ပါစေ။ 7ကိုယ်တော်မြတ်မှတစ်ပါး အခြားသော လူကိုဖြစ်စေ၊ ဘုရားကို ဖြစ်စေ၊ အရက်သုံးဆယ်အတွင်းတွင် ဆုတောင်းသောသူမည်သည်ကို ခြင်္သေ့လှောင်သောတွင်းထဲသို့ ချပစ်ရမည်ဟု မဖောက်ပြန်နိုင်သော အမိန့်တော်မြတ်ကို ထုတ်စေခြင်းငှာ နိုင်ငံတော်ဝန်ကြီး၊ မြို့ဝန်၊ စော်ဘွား၊ တိုင်ပင်မှူးမတ်၊ စစ်ကဲအပေါင်းတို့သည် အညီအညွတ် တိုင်ပင်ကြပါပြီ။ 8သို့ဖြစ်၍၊ အရှင်မင်းကြီး၊ အမိန့်ရှိတော်မူပါ။ မပြောင်းလဲတတ်သော မေဒိ၊ ပေရသိဓမ္မသတ်အတိုင်း အမိန့်တော်တည်စေခြင်းငှာ၊ တံဆိပ်ခတ်တော်မူပါဟု လျှောက်ထားကြလျှင်၊ 9ဒါရိမင်းကြီးသည် အမိန့်တော်ကိုပေး၍ တံဆိပ်ခတ်တော်မူ၏။

ခြင်္သေ့တွင်းထဲမှဒံယေလ

10အမိန့်တော်ထုတ်၍ တံဆိပ်ခတ်ကြောင်းကို ဒံယေလသည် ကြားသိသော်လည်း၊ မိမိအိမ်သို့သွား၍ ယေရုရှလင်မြို့သို့ မျက်နှာပြုရာ အထက်ခန်းပြတင်းပေါက် ပွင့်လျက်ပင်၊ အထက်ပြုလေ့ရှိသည်အတိုင်း၊ တစ်နေ့သုံးကြိမ် ဒူးထောက်လျက် ဘုရားသခင်ကို ဆုတောင်း၍ ဂုဏ်ကျေးဇူးတော်ကို ချီးမွမ်းလေ၏။ 11ထိုသို့ဘုရားသခင်ကို ဆုတောင်းပတ္ထနာပြုလျက်နေသည်ကို မှူးမတ်အရာရှိတို့သည် စည်းဝေး၍ တွေ့မြင်ကြလျှင်၊ 12အထံတော်သို့ဝင်၍၊ အရှင်မင်းကြီး၊ ကိုယ်တော်မြတ်မှတစ်ပါး အခြားသောလူကိုဖြစ်စေ၊ ဘုရားကိုဖြစ်စေ၊ အရက်သုံးဆယ်အတွင်းတွင် ဆုတောင်းသောသူ မည်သည်ကို ခြင်္သေ့လှောင်သောတွင်းထဲသို့ ချပစ်စေဟု အမိန့်တော်ကို တံဆိပ်ခတ်တော်မူလျက် ရှိပါသည်မဟုတ်လောဟု အမိန့်တော်အကြောင်းကို မေးလျှောက်ကြ၏။ ရှင်ဘုရင်ကလည်း၊ မပြောင်းလဲတတ်သော မေဒိ၊ ပေရသိဓမ္မသတ်အတိုင်း မှန်ပေသည်ဟု မိန့်တော်မူ၏။ 13မှူးမတ်အရာရှိတို့ကလည်း၊ အရှင်မင်းကြီး၊ ယုဒပြည်ကသိမ်းယူခဲ့သော ယုဒလူမျိုးဒံယေလသည် အာဏာတော်ကို ပမာဏမပြု၊ တံဆိပ်ခတ်တော်မူသော အမိန့်တော်ကို ဆန့်ကျင်လျက်၊ တစ်နေ့သုံးကြိမ်တိုင်အောင် ဆုတောင်း၍နေပါသည်ဟု လျှောက်ထားကြ၏။ 14ထိုစကားကို ကြားလျှင်၊ ရှင်ဘုရင်သည် အလွန်နောင်တရ၍ ဒံယေလကို လွှတ်ခြင်းငှာ စိတ်အားကြီးသဖြင့်၊ လွှတ်ရသောအခွင့်ကို နေဝင်သည်တိုင်အောင် ကြိုးစား၍ ရှာတော်မူ၏။

15တစ်ဖန် မှူးမတ်အရာရှိတို့သည် အထံတော်သို့ စည်းဝေး၍၊ အရှင်မင်းကြီး၊ တစ်ခါထုတ်ပြီးသော အမိန့်တော် မပျက်နိုင်ရာဟု မေဒိ၊ ပေရသိဓမ္မသတ်၌ ပါကြောင်းကို သတိထားတော်မူပါဟု လျှောက်ကြပြန်လျှင်၊ 16တစ်ဖန် ရှင်ဘုရင်မိန့်တော်မူသည်အတိုင်း၊ ဒံယေလကိုခေါ်၍ ခြင်္သေ့တွင်းထဲသို့ ချပစ်ကြ၏။ ရှင်ဘုရင်ကလည်း၊ သင်မပြတ်ကိုးကွယ်သော ဘုရားသခင်သည် သင့်ကိုကယ်လွှတ်ပါစေဟု ဒံယေလကို မိန့်တော်မူ၏။ 17ကျောက်ပြားကိုလည်း ယူခဲ့၍ တွင်းဝကို ပိတ်ပြီးလျှင်၊ ဒံယေလအမှု၌ စီရင်ချက်ကို မတိုးမလျော့ စေခြင်းငှာ၊ ရှင်ဘုရင်တံဆိပ်နှင့် မှူးမတ်တို့တံဆိပ်ကို ခတ်တော်မူ၏။

ခြင်္သေ့တွင်းမှလွတ်မြောက်ခြင်း

18ထိုနောက်၊ ရှင်ဘုရင်သည် နန်းတော်သို့ ပြန်၍ တစ်ညလုံး စားတော်မခေါ်၊ အငြိမ့်တန်ဆာကို အထံတော်သို့ မသွင်းစေဘဲ စက်တော်ခေါ်၍ မပျော်နိုင်။ 19နံနက်စောစောထ၍ ခြင်္သေ့တွင်းသို့ အလျင်အမြန် သွားတော်မူ၏။ 20ရောက်လျှင်၊ ငိုကြွေးသောအသံနှင့် ဒံယေလကိုခေါ်၍၊ အသက်ရှင်တော်မူသော ဘုရားသခင်၏ကျွန်ဒံယေလ၊ သင်မပြတ် ကိုးကွယ်သော ဘုရားသခင်သည် သင့်ကိုခြင်္သေ့ဘေးမှ ကယ်လွှတ်နိုင်သလောဟု မေးတော်မူ၏။ 21ဒံယေလက၊ အရှင်မင်းကြီး၊ အသက်တော် အစဉ်အမြဲ ရှင်ပါစေ။ 22အကျွန်ုပ်၏ ဘုရားသခင်သည် ကောင်းကင်တမန်ကို စေလွှတ်၍ ခြင်္သေ့နှုတ်ကို ပိတ်ထားတော်မူသဖြင့်၊ အကျွန်ုပ်သည် ခြင်္သေ့ဘေးနှင့် လွတ်ပါ၏။ အကြောင်းမူကား၊ ဘုရားသခင့်ရှေ့၌ အကျွန်ုပ်သည် အပြစ်ကင်းပါ၏။ ကိုယ်တော်မြတ်ကိုလည်း အလျှင်းမပြစ်မှားပါဟု ပြန်လျှောက်လေ၏။ 23ထိုအခါ ရှင်ဘုရင်သည် အလွန်ဝမ်းမြောက်၍၊ ဒံယေလကို တွင်းထဲက ထုတ်ယူစေဟု အမိန့်တော်ရှိသည်အတိုင်း ဒံယေလကို တွင်းထဲက ထုတ်ယူ၍၊ ဘုရားသခင်ကို ယုံကြည်သောကြောင့် သူ၌ထိခိုက်သောအနာ တစ်ခုမျှ မရှိ။

24ထိုနောက်၊ ဒံယေလ၌ အပြစ်တင်သော သူတို့ကို ရှင်ဘုရင်၏အမိန့်တော်နှင့် ခေါ်၍၊ သားမယားနှင့်တကွ ခြင်္သေ့တွင်းထဲသို့ ချပစ်ကြလျှင်၊ မြေသို့မရောက်မီ ခြင်္သေ့တို့သည်နိုင်၍ သူတို့ အရိုးရှိသမျှတို့ကို ချိုးဖဲ့ကြ၏။

25ထိုအခါ မြေကြီးတစ်ပြင်လုံးတွင် အရပ်ရပ်တို့၌ နေ၍၊ အသီးသီးအခြားခြားသော ဘာသာစကားကို ပြောသော လူမျိုးတကာတို့ရှိရာသို့ အမိန့်တော်စာနှင့် စေလွှတ်တော်မူ၏။ စာချက်ဟူမူကား၊ သင်တို့၌ ငြိမ်ဝပ်ချမ်းသာခြင်း များပြားစေသော။ 26ငါအစိုးရသော တစ်နိုင်ငံလုံးတွင် ရှိနေသော သင်တို့သည် ဒံယေလ၏ဘုရားသခင်ကို ကြောက်ရွံ့ရိုသေကြကုန်ဟု ငါအမိန့်တော်ရှိ၏။ အကြောင်းမူကား၊ ထို ဘုရားသခင်သည် အသက်ရှင်တော်မူသောဘုရား၊ နိစ္စထာဝရတည်တော်မူသော ဘုရား ဖြစ်တော်မူ၏။ နိုင်ငံတော်သည် ပျက်စီးခြင်းသို့ မရောက်နိုင်။ အာဏာစက်တော်လည်း အစဉ်အဆက် တည်လိမ့်မည်။ 27မစကယ်တင်ခြင်း ကျေးဇူးကို ပြုတော်မူ၏။ ကောင်းကင်မြေကြီး၌ နိမိတ်လက္ခဏာ၊ အံ့ဩဖွယ်တို့ကို ဖြစ်စေတော်မူ၏။ ဒံယေလကို ခြင်္သေ့လက်မှ ကယ်လွှတ်တော်မူသော ဘုရားသခင်သည် ထိုသို့သောဘုရား ဖြစ်တော်မူ၏ဟု အမိန့်တော်ရှိ၏။

28ထိုသို့ဒံယေလသည် ဒါရိမင်းကြီးလက်ထက်၌လည်းကောင်း၊ ပေရသိအမျိုး ကုရုမင်းကြီး လက်ထက်၌လည်းကောင်း ကောင်းစားလျက်နေ၏။

ဒံယေလအနာဂတ္တိကျမ်း - ၆ (အနက်ဖွင့်)

၆။ ဒါရိ၏အမိန့်နှင့်ခြင်္သေ့သားရဲတွင်း (အခန်း၆)

၆:၁-၃ ဤကျမ်းပိုဒ်အရ ဒံယေလသည် ပါရှန်တို့လက်အောက်တွင် အမှုထမ်းဆောင်သည့်အကြောင်း သိရှိရသည့်တခုတည်းသော ကျမ်းချက်ဖြစ်သည်။ မြို့ဝန်တစ်ရာနှစ်ဆယ်တို့ကို အုပ်ချုပ်ရသော ဝန်ကြီးတစ်ပါးဖြစ်သည်။ ပညာဉာဏ်ပြည့်စုံသူဖြစ်သောကြောင့် နိုင်ငံတော် တဝှမ်းလုံးကိုလည်း အပ်နှင်းခံရမည့် လျာထားခြင်းခံရသူဖြစ်သည်။

၆:၄-၈ ဒံယေလသည် ဉာဏ်ပညာထက်မြက်၍ အကျင့်စာရိတ္တမြဲမြံသောကြောင့်လုပ်ဖော်ကိုင်ဘက်ဝန်မင်းများ မနာလိုကြ။ သို့ကြောင့် အပြစ်လိုက်ရှာကြသည်။ အပြစ်ရှာမတွေ့ကြသောကြောင့် ဒံယေလဘေးဒုက္ခရောက်စေရန် ရည်ရွယ်ချက်ဖြင့် မူးမတ်များသည် ဘုရင်ကြီးအား ရက်ပေါင်းသုံးဆယ်အတွင်းသူ့ထံသို့ ဖြစ်စေ၊ ဘုရားထံသို့ဖြစ်စေ ဆုတောင်းသူအား ခြင်္သေ့သားရဲတွင်းသို့ ပစ်ချဖို့ ကုန်းချော်တိုက် တွန်းကြသည်။ ထိုအမိန့်ကြော်ငြာထွက်လာသော်လည်း ဒံယေလအား ပြောင်းလဲတုန်လှုပ်ခြင်း မဖြစ်စေနိုင်။ ဒံယေလ၏ခိုင်မာသော ယုံကြည်ချက်သည် ကြီးမားသော သင်ခန်းစာဖြစ်သည်(၁ပေ ၃:၁၃-၁၇ကိုလည်းကြည့်)။

၆:၉-၁၃ ဒါရိဘုရင်သည် ထိုအမိန့်ကြော်ငြာအား လက်မှတ်ထိုးထုတ်ပြန်လိုက်သည်။ သို့သော် ဒံယေလသည် ထုံးဆံအတိုင်း ဘုရားရှင်ထံ ဆုတောင်းမြဲဆုတောင်းလေ့ရှိသည်။ တနေ့သုံးကြိမ်ပုံမှန် ဆုတောင်းသည်။ ထိုသို့အချိုးမပြင်သောအခါ ဒံယေလကို မလိုမုန်းတီးသူများသည် ဘုရင်ကြီးထံ အပြေးအလွှား သတင်းပေးသည်။

၆:၁၄-၁၇ ထိုသတင်းကို ကြားသိသောအခါ ဒါရိမင်းကြီးသည် စိတ်မချမ်းသာသဖြင့် ဒံယေလအားနေဝင်မိုးချုပ် သည့်တိုင်အောင် အချိန်ဆွဲအခွင့်အရေးပေးသည်။ မတတ်သာသည့်အဆုံးတွင် ဒံယေလအား ခြင်္သေ့သားဲတွင်းထဲသို့ ပစ်ချခိုင်းသည်။ သင့်အားမပြတ်ကိုးကွယ်သော ဘုရားသခင်က သင့်အားကယ်လွှတ်ပါစေဟု ဒံယေလအား မှာလိုက်သည်။ ထိုစကားသည် ကျက်သရေမင်္ဂလာရှိသောစကားဖြစ်သည်။ မယုံကြည်သူများအလယ်တွင် ယုံကြည်သူများ၏ ယုံကြည်မှုကို အထင်အရှားတွေ့ရတတ်သည်။ မယုံကြည်များသည် ယုံကြည်သူများ၏ နေ့စဉ်မပြတ်စောင့်ကြည့်နေသည်ကို သတိပြုရမည်။ ယုံကြည်သူများ၏ အပြုအမူကြောင့် မယုံကြည်သူ မိတ်ဆွေများယုံကြည်သူ မဖြစ်လာရခြင်း၊ ယုံကြည်သူများ၏လောကသားများနှင့် မခြားသောအကျင့်စရိုက်များကြောင့် ဘုရားရှင်ထံ မယုံကြည်သူများ မလာရခြင်းဖြစ်သည်။ ဘုရားသခင်၏ လူများအသက်တာကို မယုံကြည်သူများအား ပုံသက်သေကောင်းပြသနိုင်ရမည်။

၆:၁၈-၂၂ ဒါရိမင်းသည် ညစဉ်ညတိုင်း ကျင်းပသော ပျော်ပွဲရွှင်ပွဲသို့ အကြည့်အရှုမကြွဘဲ၊ထိုနေ့ညတညလုံးစားတော်မခေါ်၊ တမှေးမမှိတ်ဘဲ မိုးစင်စင်လင်းခဲ့သည်။ နံနက်မိုးလင်းလျှင်လင်းခြင်း ဘုရင်ကြီ:သည် ခြင်္သေ့သားရဲတွင်းသို့ သွား၍ ထိုယုဒများအား သွားရောက်ကြည့်ရှုရာ၊ ဘေးမသီရန်မခ အသက်ရှင်လျက်ရှိနေသည်ကို တွေ့ရသည်။ အသားစားခြင်္သေ့များက ဘုရားသားသမီးတို့၏ အသားကိုမစား။ ဥပုသ်စောင့်ကြပါသည်။

ပရောဖက်ကြီးသည် ဘုရားသခင်အား “အကျွန်ုပ်ဘုရားသခင်သည် ကောင်းကင်တမန်ကို စေလွှတ်၍ ခြင်္သေ့နှုတ်ကို ပိတ်ထားတော်မူသဖြင့် အကျွန်ုပ်သည် ခြင်္သေ့ဘေးမှ လွှတ်ပါ၏” ဟု ချီးမွမ်းထောပနာပြုကြသည်။

ထိုသို့ဖြင့် ဒံယေလသည် ပြန်လည်လွှတ်မြောက်လာပြီး၊ သူ့ကိုမကောင်းကြံစည်သူများအား တဖန်ခြင်္သေ့ရဲတွင်းထဲသို့ ပစ်ချကြသည်။ “ဒါရိဘုရင်ကလည်း လူမျိုးတိုင်း တိုင်းနိုင်ငံတိုင်း၊ အမျိုးမျိုးသောဘာသာစကား ပြောသူတိုင်း၊ ဒံယေလ၏ဘုရား ကိုကိုးကွယ်ကြရန် အမိန့်ထုတ်ပြန်လိုက်သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။