Amos -4 -

အာမုတ်အနာဂတ္တိကျမ်း - ၄

1ဆင်းရဲသောသူတို့ကို ညှဉ်းဆဲလျက်၊ ငတ်မွတ်သောသူတို့ကို နှိပ်စက်လျက်၊ မိမိသခင်တို့အား ငါတို့သောက်ဖို့ယူခဲ့ကြဟု ဆိုတတ်လျက်၊ ရှမာရိတောင်ပေါ်မှာနေသော ဗာရှန်နွားတို့၊ ဤစကားတော်ကို နားထောင်ကြလော့။ 2အရှင်ထာဝရဘုရားသည် မိမိသန့်ရှင်းခြင်း ပါရမီတော်ကို တိုင်တည်၍ ကျိန်ဆိုတော်မူသည်အတိုင်း၊ သင်တို့ကို ငါးမျှားနှင့်လည်းကောင်း၊ သင်တို့သားမြေးတို့ကို ပိုက်ကွန်နှင့်လည်းကောင်း ဖမ်းဆီးယူသွားရသောကာလ ရောက်လိမ့်မည်။ 3သင်တို့သည် အသီးအသီးကိုယ်စီတွေ့သော အပေါက်ဖြင့်ထွက်၍ ရဲတိုက်ထဲသို့ ချခြင်းကိုခံရကြမည်ဟု ထာဝရဘုရား မိန့်တော်မူ၏။

ဣသရေလတို့၏ပြစ်မှားခြင်း

4ဗေသလမြို့သို့သွား၍ ပြစ်မှားကြလော့။ ဂိလဂါလမြို့သို့လည်း သွား၍ များစွာသောပြစ်မှားခြင်းကို ပြုကြလော့။ နံနက်တိုင်း ပူဇော်သောယဇ်ကိုလည်းကောင်း၊ သုံးနှစ်တစ်ခါ ဥစ္စာဆယ်ဖို့တစ်ဖို့ကိုလည်းကောင်း ဆောင်ခဲ့ကြလော့။ 5လုယူသောဥစ္စာထဲက ကျေးဇူးချီးမွမ်းရာ ပူဇော်သကာကို မီးရှို့ကြလော့။ အလိုလိုပြုသော ပူဇော်သကာများကိုလည်း ကြားပြော၍ ကြော်ငြာစေကြလော့။ အို ဣသရေလအမျိုးသားတို့၊ ထိုသို့ပြုရာတွင် သင်တို့သည် မွေ့လျော်တတ်ကြသည်ဟု အရှင်ထာဝရဘုရား မိန့်တော်မူ၏။

6ငါသည်လည်း၊ သင်တို့မြို့ရွာ ရှိသမျှတို့၌ သွားတို့၏စင်ကြယ်ခြင်းကိုလည်းကောင်း၊ သင်တို့နေရာ အရပ်ရှိသမျှတို့၌ အစာခေါင်းပါးခြင်းကိုလည်းကောင်း ပေးသော်လည်း၊ သင်တို့သည် ငါ့ထံသို့ပြန်၍ မလာကြဟု ထာဝရဘုရား မိန့်တော်မူ၏။ 7စပါးရိတ်ရာကာလ မရောက်မီ သုံးလအထက်က၊ မိုးမရွာစေခြင်းငှာ မိုးကိုငါဆီးတားပြီ။ မြို့တစ်မြို့ပေါ်မှာ ရွာစေခြင်းငှာလည်းကောင်း၊ တစ်မြို့ပေါ်မှာ မရွာစေခြင်းငှာလည်းကောင်းပြုလျက်၊ မြေတစ်ကွက်သည် မိုးရေကိုခံရ၍ တစ်ကွက်သည် မခံရ၊ သွေ့ခြောက်လျက်နေရ၏။ 8ထိုသို့ မြို့နှစ်မြို့သုံးမြို့သားတို့သည် ရေသောက်ခြင်းငှာ မြို့တစ်မြို့သို့သွားရ၍ မဝရကြ။ သို့သော်လည်း၊ သင်တို့သည် ငါ့ထံသို့ ပြန်၍မလာကြဟု ထာဝရဘုရား မိန့်တော်မူ၏။ 9လေထိ၍ အပင်သေခြင်း၊ အရည်ယို၍သေခြင်းဘေးဖြင့် ငါသည်ဒဏ်ခတ်လေပြီ။ သင်တို့၌ များပြားသောလယ်ယာ၊ စပျစ်ဥယျာဉ်၊ သင်္ဘောသဖန်းပင်၊ သံလွင်ပင်တို့ကို ကျိုင်းကောင်တို့သည် ကိုက်စားကြပြီ။ သို့သော်လည်း၊ ငါ့ထံသို့ ပြန်၍မလာကြဟု ထာဝရဘုရား မိန့်တော်မူ၏။ 10အဲဂုတ္တုပြည်ခံရသော ကာလနာဘေးကို သင်တို့ရှိရာသို့ ငါစေလွှတ်လေပြီ။ လုလင်တို့ကို ဓားဖြင့် ကွပ်မျက်စေပြီ။ မြင်းတို့ကို သိမ်းသွားစေပြီ။ သင်တို့တပ်၌ ပုပ်စပ်သောအနံ့ကို သင်တို့နှာခေါင်း၌ လှိုင်စေပြီ။ သို့သော်လည်း၊ ငါ့ထံသို့ ပြန်၍မလာကြဟု ထာဝရဘုရား မိန့်တော်မူ၏။ 11ဘုရားသခင်သည် သောဒုံမြို့နှင့် ဂေါမောရမြို့ကိုမှောက်လှန်သကဲ့သို့၊ သင်တို့အချို့ကို ငါမှောက်လှန်၍ သင်တို့သည် မီးထဲကနုတ်သော ထင်းစကဲ့သို့ ဖြစ်ကြပြီ။ သို့သော်လည်း၊ ငါ့ထံသို့ ပြန်၍မလာကြဟု ထာဝရဘုရား မိန့်တော်မူ၏။ 12သို့ဖြစ်၍၊ အို ဣသရေလအမျိုး၊ အထက်ကပြုသကဲ့သို့ သင်တို့၌ ငါပြုဦးမည်။ ထိုသို့ပြုမည် ဖြစ်သောကြောင့်၊ အို ဣသရေလအမျိုး၊ သင်၏ဘုရားသခင်နှင့် တွေ့ခြင်းငှာ ကိုယ်ကိုပြင်ဆင်လော့။ 13တောင်တို့ကို လုပ်၍ လေကိုဖန်ဆင်းထသော၊ လူစိတ်အကြံအစည်ကို လူအားဖော်ပြထသော၊ နံနက်အလင်းကို အမိုက်ဖြစ်စေထသော၊ မြင့်သောမြေအရပ်တို့ကို နင်းသောသူသည် ကောင်းကင်ဗိုလ်ခြေအရှင် ထာဝရဘုရားတည်းဟူသော ဘွဲ့နာမရှိတော်မူ၏။

အာမုတ်အနာဂတ္တိကျမ်း - ၄ (အနက်ဖွင့်)

(ခ) ဒုတိယအကြိမ်ဆင့်ခေါ်ခြင်း(အခန်း၄)

၄:၁–၃ ရှုမာရိသူကြွယ်မများသည် အဝအလင်ကျွေးမွေးထားသော ဗာရှန်နွားမများနှင့် တူသည်။ မရှိဆင်းရဲသားများ၏ ဂုပ်သွေးဖောက်စုတ် ခေါင်းပုံဖြတ်လျက် မတရားသဖြင့် ဇိမ်ခံနေကြသည်။ ထို့ကြောင့်မိမိမွေးရပ်မြေကို စွန့်ခွါလျက် အာရှုရိတို့၏ ဖမ်းဆီးကျွန်ပြုခြင်းခံရမည်။ သူတို့နှင့်တကွ သူတို့သားစဉ်မြေးဆက်တို့သည် ငါးမျှားချိတ်နှင့် ပိုက်ကွန်၌မိသော ငါးကဲ့သို့ ဖမ်းဆီးသွားခြင်းခံရလိမ့်မည်။ သူတို့မြို့ရွာ စည်းရိုးတံတိုင်း များပြိုလဲပျက်စီ:ကုန်မည်။

အချို့ကျမ်းမူများ(RSV,NASB,NKJV) ကထိုအရပ်ဒေသကို Harmon ဟုဆိုကြသည်။ KJV ကျမ်း၌ “နန်းတော်” ဟုသုံးထားသည်။ ထိုအကြောင်းကို Darby ကဤသို့ဆိုထားပလါသည်။

အချို့က “တောင်ကုန်းများ” ဟု ဘာသာပြန်ဆို၍ အချို့က “(ရန်သူ)ခံတပ်” ဟုပြန်ဆိုကြသည်။ KJV ကျမ်းမူတွင် “နန်းတော်” ဟုဆိုထားသည်။ ၁:၄ တွင်ပါရှိသည့်အတိုင်း အဓိပ္ပါယ်မထူးခြားလှပါ။

၄:၄–၁၃ ဘုရားသခင်က ထိုသူကိုးကွယ်သော ရုပ်တုဆင်းတုများကို ကိုးကွယ်ဖို့ ဗေသလသို့ယူဆောင်လာရန် အရွဲ့တိုက်ခိုင်းသည်။ အမှန်တကယ်ကိုးကွယ်စေဖို့မဟုတ်။ အငေါ်တူးစကားဖြစ်သည်။ သူတို့အရပ်ဒေသ၌ အစာခေါင်းပါးစေသည်(ငယ်၊၆) ။ မိုးခေါင်စေသည်(ငယ်၊၇-၈)။ အပင်ရောဂါ၊မှို၊ ပိုးနှင့် ကျိုင်းကောင်အန္တရာယ်များကျရောက်စေသည်(ငယ်၊၉) ။ ကာလနာ၊ စစ်မက်ရေးရာနှင့် လုယက်သတ်ဖြတ်မှုများ ဖြစ်ပေါ်စေသည်(ငယ်၊၁၀)။ သဘာဝဘေးဆိုးကြီးများ(ငယ်၊၁၁) ရုတ်ချည်းဖြစ်ပေါ်စေသည်။ သို့သော်လည်း ဣသရေလလူမျိုးတို့သည် နောင်တမရကြ။ ထို့ကြောင့်သူတို့သည် ကောင်းကင်ဗိုလ်ခြေအရှင်ဘုရားသခင်နှင့် တွေ့ဆုံဖို့ ပြင်ဆင်ကြရမည်။ အပိုဒ်ငယ်(၁၂)သည် မေတ္တာရပ်ခံဟောပြောခြင်းမဟုတ်။ တရားစီရင်မည့်အကြောင်းသတိပေးချက ဖြစ်သည်။၄

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။