Acts-22 -

တမန်တော်၀တ္ထု - ၂၂

1ညီအစ်ကို၊ အဘတို့၊ အကျွန်ုပ်သည် ကိုယ်အပြစ်ဖြေရာ စကားကို သင်တို့ရှေ့မှာ ယခုပြောစဉ်တွင် နားထောင်ကြပါဟု ဆိုလေသော်၊- 2ဟေဗြဲဘာသာအားဖြင့် ပြောသည်ကို ထိုသူတို့သည် ကြားလျှင် သာ၍ အလွန်တိတ်ဆိတ်စွာနေကြ၏။

3ပေါလုကလည်း၊ အကျွန်ုပ်သည် ကိလိကိပြည် တာရှုမြို့၌ မွေးဖွားသော ယုဒလူဖြစ်ပါ၏။ ဤမြို့မှာလည်း၊ ဂါမလျေလအမည်ရှိသော ဆရာ၏ခြေရင်း၌ ကျွေးမွေးခြင်းကိုခံ၍ မိစဉ်ဘဆက်ကျင့်သော တရားကို သေချာစွာသိနားလည်ခြင်းငှာ နည်းဥပဒေသကိုခံပါပြီ။ သင်တို့ ရှိသမျှသည် ယနေ့တိုင်အောင် ဘုရားသခင်ဘက်၌ စိတ်အားကြီးသည်နည်းတူ၊ အကျွန်ုပ်လည်း စိတ်အားကြီးသဖြင့်၊-တ၊ ၅:၃၄-၃၉။ 4ယောက်ျားမိန်းမတို့ကို ချည်နှောင်၍ ထောင်ထဲမှာ လှောင်ထားလျက် အသေသတ်ခြင်းသို့ တိုင်အောင်၊ ထိုဘာသာကိုညှဉ်းဆဲပါပြီ။- 5ထိုကဲ့သို့ပင် ယဇ်ပုရောဟိတ်မင်းမှစ၍ လူအကြီးအကဲအပေါင်းတို့သည် အကျွန်ုပ်ဘက်၌ သက်သေဖြစ်ကြပါ၏။ သူတို့ထံမှလည်း အကျွန်ုပ်သည် ညီအစ်ကိုတို့ထံသို့ မှာစာကိုခံပြီးမှ၊ ဒမာသက်မြို့၌ရှိသော ထိုဘာသာဝင်သူတို့ကို ဒဏ်ခံစေခြင်းငှာ ချည်နှောင်၍ ယေရုရှလင်မြို့သို့ပို့မည်ဟု ဒမာသက်မြို့သို့ အကျွန်ုပ်သွားပါ၏။တ၊ ၈:၃၊ ၂၆း၉-၁၁။

ပြောင်းလဲလာပုံကိုပြောပြခြင်း

(တ၊ ၉:၁-၁၉။ ၂၆:၁၂-၁၈)

6လမ်း၌သွား၍ ဒမာသက်မြို့အနီးသို့ ရောက်သောအခါ၊ မွန်းတည့်အချိန်တွင် ကောင်းကင်ထဲက ကြီးသောအလင်းသည် အကျွန်ုပ် ပတ်လည်၌ ရုတ်ခနဲ ထွန်းတောက်ပါ၏။- 7အကျွန်ုပ်သည် မြေပေါ်မှာလဲ၍ နေစဉ်၊ ရှောလု၊ ရှောလု၊ အဘယ်ကြောင့်ငါ့ကို ညှဉ်းဆဲသနည်းဟု အကျွန်ုပ်အား ပြောသောစကားသံကိုကြားလျှင်၊- 8သခင်၊ ကိုယ်တော်သည် အဘယ်သူနည်းဟု အကျွန်ုပ်ပြန်၍ မေးလျှောက်သော်၊ ငါကား၊ သင်ညှဥ်းဆဲသော နာဇရက်မြို့သားယေရှုဖြစ် သတည်းဟု မိန့်တော်မူ၏။- 9အကျွန်ုပ်နှင့်ပါသောသူတို့သည် ထိုအလင်းကိုမြင်၍ ကြောက်ရွံ့ခြင်းသို့ရောက်သော်လည်း၊ အကျွန်ုပ်အားပြောသောသူ၏ စကားသံကို မကြားမသိရကြ။- 10ထိုအခါ အကျွန်ုပ်ကလည်း၊ သခင်၊ အကျွန်ုပ်သည် အဘယ်သို့ ပြုရပါမည်နည်းဟု လျှောက်လျှင်၊ သခင်ဘုရားက၊ ထလော့။ ဒမာသက်မြို့သို့သွားလော့။ သင်ဆောင်ရွက်စရာဖို့ ခွဲခန့်စီမံသမျှတို့ကို ထိုမြို့၌ ပြောလိမ့်မည်ဟုမိန့်တော်မူ၏။- 11ထိုအလင်း၏ရောင်ခြည်အရှိန်အားဖြင့် အကျွန်ုပ်သည် မျက်စိကန်းသောကြောင့်၊ အကျွန်ုပ်နှင့် ပါသောသူတို့၏ လက်ဆွဲခြင်းကိုခံရ၍ ဒမာသက်မြို့သို့ ရောက်ပါ၏။

12ထိုအခါ ပညတ်တရားနှင့်အညီ ဘုရားဝတ်၌မွေ့လျော်သောသူဖြစ်၍၊ ထိုမြို့မှာနေသောယုဒလူအပေါင်းတို့တွင် အသရေရှိသောသူ အာနနိသည်၊- 13အကျွန်ုပ်ဆီသို့လာ၍ အနား၌ရပ်လျက်၊ ညီရှောလု၊ တစ်ဖန်မျက်စိမြင်ခြင်းသို့ ရောက်လော့ဟုဆို၏။ ထိုခဏ၌ အကျွန်ုပ်သည် သူ့ကိုကြည့်ရှု၍မြင်ရ၏။- 14သူကလည်း၊ သင်သည်မြင်လေသမျှ၊ ကြားလေသမျှတို့ကို လူအပေါင်းတို့အားပြော၍ သခင်ဘုရား၏ သက်သေခံဖြစ်ရမည် အကြောင်း၊- 15သင်သည် ဘုရားသခင်၏ အလိုတော်ကို သိစေခြင်းငှာလည်းကောင်း၊ ဖြောင့်မတ်တော်မူသောသူကိုမြင်၍ နှုတ်တော်ထွက်ကို ကြားစေခြင်းငှာလည်းကောင်း၊ ငါတို့ဘိုးဘေးများ၏ ဘုရားသခင်သည် သင့်ကို ခန့်ထားတော်မူ၏။- 16ယခုလည်း သင်သည် အဘယ်ကြောင့် ဆိုင်းလင့်၍ နေသနည်း။ ထလော့။ သခင်ဘုရားကို ပတ္ထနာပြုလျက် ဗတ္တိဇံကိုခံ၍၊ သင်၏အပြစ်များကို ဆေးကြောလော့ဟု ဆိုပါ၏။

လူမျိုးခြားတို့ကိုဟောပြောရန်

17ထိုနောက်မှ အကျွန်ုပ်သည် ယေရုရှလင်မြို့သို့ ပြန်၍၊ ဗိမာန်တော်၌ ဆုတောင်းစဉ် ဘဝင်ကျ၍ 18သခင်ဘုရားက၊ သင်သည်ကြိုးစား၍ ယေရုရှလင်မြို့မှ အလျင်အမြန် ထွက်သွားလော့။ ငါ၏အကြောင်းကို သင်သည်ပြော၍ သက်သေခံသော စကားကို ဤလူတို့သည် မခံဘဲနေကြလိမ့်မည်ဟု မိန့်တော်မူလျက်ရှိသည်ကို အကျွန်ုပ်မြင်လေ၏။- 19အကျွန်ုပ်ကလည်း၊ သခင်၊ ကိုယ်တော်ကို ယုံကြည်သောသူတို့ကို အကျွန်ုပ်ထောင်ထဲ၌ လှောင်ထား၍၊ တရားဇရပ်များ၌ ရိုက်သည်အကြောင်းကို သူတို့သိကြပါ၏။- 20ကိုယ်တော်၏ သက်သေခံဖြစ်သော သတေဖန်၏ အသွေးကို သွန်းသောအခါ အကျွန်ုပ်သည် အနား၌နေလျက်၊ ကွပ်မျက်ခြင်းအမှုကို ဝန်ခံ၍၊ ကွပ်မျက်သော သူတို့၏အဝတ်ကို စောင့်နေပါ၏ဟု၊-တ၊ ၇:၅၈။ 21လျှောက်ဆိုလျှင်၊ သခင်ဘုရားက၊ သွားလော့။ ငါသည်တစ်ပါးအမျိုးသားတို့ရှိရာသို့ သင့်ကိုဝေးလှစွာ စေလွှတ်မည်ဟု အကျွန်ုပ်အား မိန့်တော်မူသည်ဟု ပေါလု မြွက်ဆို၏။

22ထိုမျှတိုင်အောင် ပေါလု၏စကားကို နားထောင်ပြီးလျှင်၊ ထိုသူတို့သည်အော်ဟစ်၍၊ ထိုသို့သောသူကို မြေကြီးပြင်မှ သုတ်သင်ပယ်ရှင်းလော့။ သူသည် အသက်မရှင်သင့်ဟု ဆိုကြ၏။- 23ထိုသို့အော်ဟစ်ခြင်း၊ ကိုယ်အဝတ်ကိုချွတ်ခြင်း၊ မြေမှုန့်ကို မိုးကောင်းကင်သို့ ပစ်လိုက်ခြင်းကို ပြုကြစဉ်တွင်၊- 24ပေါလုကို အဘယ်ကြောင့် ထိုသို့အော်ဟစ်ကြသည်ကို စစ်သူကြီးသည် သိလို၍၊ ပေါလုကို ရဲတိုက်ထဲသို့သွင်းစေ။ ရိုက်၍ စစ်ကြောစေဟု စီရင်လေ၏။- 25သားရေကြိုးနှင့် ဆွဲတင်ကြသောအခါ၊ ပေါလုက၊ ရောမလူဖြစ်သောသူကို ဓမ္မသတ်အတိုင်း မစီရင်ဘဲလျက်၊ သင်တို့သည် ရိုက်ရသလောဟု အနား၌ရပ်နေသော တပ်မှူးအားဆို၏။- 26တပ်မှူးသည်ကြားလျှင် စစ်သူကြီးထံသို့သွား၍၊ အဘယ်သို့ပြုမည်ကို သတိထားပါလော့။ ဤသူသည် ရောမလူဖြစ်ပါသည်ဟု ကြားလျှောက်၏။- 27စစ်သူကြီးသည်လည်း၊ ပေါလုထံသို့လာ၍၊ သင်သည်ရောမလူမှန်သလော၊ ငါ့အား ပြောလော့ဟုဆိုလျှင်၊ မှန်ပါသည်ဟု ပေါလုပြောဆို၏။- 28စစ်သူကြီးကလည်း၊ အကျွန်ုပ်သည် ငွေအများကိုပေး၍ ရောမလူ၏ အရိပ်အရာကိုရသည်ဟုဆိုလျှင်၊ ပေါလုက၊ အကျွန်ုပ်သည် ဇာတိအားဖြင့် ရပါသည်ဟု ဆို၏။- 29ထိုအခါ စစ်ကြောမည်ပြုသောသူတို့သည် ပေါလုထံမှချက်ချင်းသွား၍၊ သူသည်ရောမလူ ဖြစ်သည်ကိုလည်းကောင်း၊ ရောမလူကို ချည်နှောင်မိသည်ကိုလည်းကောင်း၊ စစ်သူကြီးသိလျှင် ကြောက်ခြင်းသို့ရောက်လေ၏။

လွှတ်တော်ရှေ့ရောက်ရှိခြင်း

30နက်ဖြန်နေ့တွင် အဘယ်အပြစ်ကို ယုဒလူတို့သည် ပေါလု၌ တင်ကြသည်ကို စစ်သူကြီးသည် အမှန်သိလိုသောကြောင့်၊ ပေါလု၌ ချည်နှောင်သောသံကြိုးကို ချွတ်၍၊ ယဇ်ပုရောဟိတ်အကြီးတို့နှင့် လွှတ်အရာရှိအပေါင်းတို့ကို စည်းဝေးစေခြင်းငှာ စီရင်ပြီးလျှင်၊ ပေါလုကိုခေါ်၍ သူတို့ရှေ့၌ထားလေ၏။

တမန်တော်၀တ္ထု - ၂၂ (အနက်ဖွင့်)

၂၂:၁–၂ မိန့်ခွန်းပြောကြားရာတွင် ရှင်ပေါလုသည် ဂရိဘာသာစကားထက် ဟေဗြဲဘာသာစကားကို ပါးနပ်ကျွမ်းကျင်စွာသုံး၍ ယုဒပရိသတ်ထဲသို့ ပစ်ထည့်သည်။ မိမိတို့ မိခင်ဘာသာစကားကို ကြားသိရသောအခါ ဝမ်းမြောက်ဝမ်းသာဖြစ်လျက် နားရွက်မလှုပ်ဘဲ ငြိမ်သက်ကြသည်။ တိတ်ဆိတ်ကြသည်။

၂၂:၃–၅ ရှင်ပေါလုက သူ့ဇာတိဖြစ်စဉ်များကို ဦးစွာ ထုတ်ဖော်ရှင်းပြသည်။ ကိလိကိပြည် တာရှုအရပ်တွင် ယုဒမိဘမျိုးနွယ်မှ ပေါက်ဖွားသူဖြစ်ကြောင်း ယုဒထုံးတမ်းစဉ်များကိုလည်း ဂါမလျေလခြေတော်ရင်းမှာ တပည့်သားရင်း ခံလျက် ယေရုရှလင်မြို့၌ ကြီးပြင်းကြောင်းရှင်းပြခဲ့သည်။ ယုဒဘာသာထုံးတမ်းစဉ်လာကိုလည်း စိတ်အားထက်သန်စွာ စောင့်ထိန်းခဲ့ကြောင်း ယေရှုယုံကြည်သူ ခရစ်ယာန်များကို လိုက်လံဖမ်းဆီး၍ ညှင်းပန်းနှိပ်စက် ထောင်ချခဲ့ဖူးကြောင်း သူ့လုပ်ဆောင်ချက်များကို ယဇ်ပုရောဟိတ်ကြီးများနှင့် မင်းတိုင်ပင်အမတ်များက သက်သေခံနိုင်ကြကြောင်း ခရစ်ယာန်များပေးစာများကိုလည်း ဒမာသက် လမ်းမှ လုယူပြီး သက်ဆိုင်သူများကို အရေးယူပေးခဲ့ကြောင်း ရှင်းပြခဲ့သည်။

၂၂:၆–၈ ရှင်းပြသောအချက်အလက်များကို အကုန်နားလည်ကြမည်ဟု ယုံကြည်ကြောင်း မှန်သောစကားဖြစ်သည်ကိုလည်း ယုဒများလက်ခံကြမည့်အကြောင်း ယုံကြည်သည်။ ထို့ကြောင့် တမန်တော်၏ အသက်ကံကြမ္မာကို တရားစီရင်နိုင်ကြောင်း၊ သို့သော် ဘုရားသခင်၏ အလိုတော်ဖြစ်သည်ဟု ခံယူကြောင်း ထုတ်ဖော် ပြောခဲ့သည်။

ရှင်ပေါလုသည် ဒမာသက်လမ်းခရီးသွားစဉ် ကောင်းကင်ယံမှ အလင်းရောင်ကြီးထွန်းတောက်လာသည်။ ထိုအလင်းရောင်ကြီးသည် နေထက်ထွန်းတောက်ပြီး ပေါလုအား မြေကြီးပေါ်သို့ လဲကျစေသည်။ ထိုသို့ လဲကျစဉ် အလင်းရောင်ကြီးမှ အသံတွေထွက်လာပြီး “ရှောလု၊ ရှောလု၊ ငါ့ကို ဘာကြောင့် ညှဉ်းဆဲသနည်း“ဟု ထွက်လာသည်။ အသင်က ဘယ်သူနည်းဟု ပြန်မေးသောအခါ ကောင်းကင်ယံမှ နာဇရက်သားယေရှု ဟု ပြန်ပြောသည်။ နာဇရက်သားယေရှုသည် သေခြင်းမှ ထမြောက်တော်မူပြီး ကောင်းကင်နိုင်ငံတွင် စံမြန်းတော်မူနေပြီ။

၂၂:၉ ပေါလု၏ခရီးသွားဖော်များကလည်း ထိုပေါလု၏ အဖြစ်အပျက်နှင့် အလင်းရောင်ကြီးကိုမြင်ကြသည်။ ကောင်းကင်မှ စကားသံကိုမူ ကြားသိရကြေသော်လည်း စကားလုံးကို သဲကွဲစွာ ကြားသိခွင့်မရကြ(၉:၇)။ တနည်းပြောရလျှင် အံ့အားသင့်လျက် အချင်းချင်း စကားဆူညံနေကြသောကြောင့် သဲသဲကွဲကွဲ မကြားရခြင်းဖြစ်သည်။

၂၂:၁၀–၁၁ ထိုသို့သီးသန့်တစ်ယောက်တည်း ကြားသိရခြင်းသည် အသက်တာတွင် ဘုရားသခင် ဘုန်းတော်ထင်ရှားခြင်းဖြစ်သည်။ ကယ်တင်ရှင်အား ကိုယ်၊စိတ်၊ ဝိညာဉ် သုံးပါးစလုံး လက်သင့်ခံခြင်းဖြစ်သည်။ ထိုသို့ဆိုလျှင် သခင် ကျွန်ုပ်ဘာလုပ်ရမည်နည်းဟု အမေးစကားဖြင့် ဝန်ခံခဲ့သည်။ သခင်ယေရှုက ဒမာသက်မြို့သို့ဝင်၍ လုပ်စရာရှိသည်များကိုသွားလုပ်ပါ။ ထိုမြို့တွင် လမ်းညွှန်ချက်ပေးထားသည်ဟုဆိုသည်။ အလင်းရောင်ကြီးကြောင့် မျက်စိမမြင်ရတော့သဖြင့် သူ့အဖော်များက လက်တွဲ၍ ဒမာသက်မြို့သို့ရောက်သွား၏။

၂၂:၁၂ ဒမာသက်မြို့သို့ရောက်လျှင် အာနနိနှင့်တွေ့သည်။ ထိုသူက ပေါလုတို့အဖွဲ့အား သူသည် ပညတ်တရားကို လိုက်လျှောက်ကျင့်သုံး၍ ဘုရားဝတ်၌ မွေ့လျော်ကြောင်း၊ ဒမာသက်မြို့ရှိ ယုဒအမျိုးသားများ၏ လေးစားကြည်ညိုသူဖြစ်ကြောင်း လာရောက်မိတ်ဖွဲ့သည်။ ထိုသူ၏ ပေါင်းသင်းဆက်ဆံရေး၊ ဧည့်ဝတ်ကျေပွန်ခြင်းသည် ရှင်ပေါလု၏ အသက်တာပြောင်းလဲခြင်း၌ အရေးကြီးသော သမိုင်းမှတ်တိုင်တစ်ခုဖြစ်သည်။

၂၂:၁၃ ထိုအာနိနိက ပေါလုအား “ငါ့ညီ ရှောလု” မျက်စိပြန်မြင်စေသတည်း ဟုဆိုရာ ချက်ချင်းမြင်နိုင်သဖြင့် ထိုသူအား ပထမဦးဆုံးမော့ကြည့်လိုက်သည်။

၂၂:၁၄–၁၆ ဤကျမ်းပိုဒ်တွင် အာနနိကရှင်ပေါလုသို့ ပထမဆုံးပြောစကားများကို တွေ့ရသည်။

အာနနိက “သင်သည် ငါတို့ ဘိုးဘေးများကိုးကွယ်သည့် ဘုရားသခင်၏ အလိုတော်ကို သိစေရန်၎င်း၊ ကိုယ်တော်၏ ဖြောင့်မတ်သော အစေခံအား ဖူးမြင်ရစေရန်၎င်း၊ ထိုအရှင်၏ နှုတ်တော်မှ အသံတော်ကို ကြားရစေရန်၎င်း၊ ကိုယ်တော်သည် သင့်အားရွေးချယ်တော်မူပြီ။ သင်သည် မိမိမြင်ရကြားရသော အရာများကို လူအပေါင်းအား ပြောကြားရန် ထိုအရှင်၏သက်သေခံဖြစ်ရလိမ့်မည်။ သို့ဖြစ်၍ ယခုသင်သည် အဘယ်ကြောင့် အချိန်ဆွဲနေသနည်း။ လာ၍ ဗတ္တိဇံမင်္ဂလာကိုခံလော့။ သင်၏အပြစ်များကို ဖြေလွှတ်နိုင်သောငှာ ကိုယ်တော်အား ပတ္တနာပြုလော့” ဟုဆိုသည်။

ဤကျမ်းပိုဒ်တွင် စိတ်ဝင်စားဖွယ်ကောင်းသော အရေးကြီးအချက်များစွာ ပါရှိသည်။ ပထမအချက်မှာ အာနနိ၏ကျွန်ုပ်တို့၏အဘ ဘုရားသခင်သည် ဒမာ သက်လမ်းတွင် အမှုပြုခဲ့ပြီဟူသော စကားဖြစ်သည်။ အကယ်၍ ထိုအဖြစ်အပျက်ကို အသေအချာနားမလည်လျှင် ယုဒများသည် ဘုရားသခင်ကို ပို၍ ဆန့်ကျင်ပုန်ကန်နိုင်သည်။ ဒုတိယအချက်မှာ လူတိုင်းသို့ ဘုရားသခင်၏ သက်သေခံရမည်ဟူသော ပေါလုသို့ ပြောစကားဖြစ်သည်။ ဤစကားအရ ယုဒလူမျိုးပေါလုသည် တပါးအမျိုးသားများသို့လည်း စေလွှတ်သည်ဟု အနက်ရသည်။ တတိယအချက်မှာ ရှင်ပေါလုအား ဗတ္တိဇံခံစေ၍ အပြစ်များဆေးကြောခြင်းဖြစ်သည်။

အပိုဒ်ငယ် (၁၆) ကိုကည့်ရှု၍ နှစ်ခြင်းမင်္ဂလာခံခြင်းသည် အသက်တာပြောင်းလဲခြင်းဟု အဓိပ္ပာယ်များမကောက်စေလိုပါ။ ဤကျမ်းပိုဒ်သည် ဘုရားသခင်နှင့် ဆက်စပ်မှုမရှိပဲ ခရစ်တော်နှင့် နှစ်ခြင်းမင်္ဂလာ ငြင်းပယ်သော ရှင်ပေါလု၏ အသက်တာဖြစ်စဉ်ပြသခြင်းသာဖြစ်သည်။ (၂:၃၈ ကိုလည်းကြည့်)

ထိုထက်ပို၍ ရှင်းပြရလျှင် KJV နှင့် NKJV တွင် ဂရိသဒ္ဒါကိုသုံး၍ ရှင်းပြထားသည်။ “ထ၍ နှစ်ခြင်းခံပါ” က တပိုင်း၊ “သခင်ဘုရား၏ နာမတော်မြတ်၌ အပြစ်များကို ဆေးကြောခြင်း” က တပိုင်း ဖြစ်သည်။ ဒုတိယစကားစုကို သမ္မာကျမ်းစာ သွန်သင်ချက်များတွင် သီးခြားတွေ့ရှိရသည်။ (ယောလ ၂:၃၂၊ တ ၂:၂၁၊ ရော ၁၀:၁၃ တို့ကို ယှဉ်ကြည့်ပါ)။

၂၂:၁၇–၂၁ အသက်တာပြောင်းလဲပြီးနောက် ပထမဦးဆုံးအကြိမ် ယေရုရှလင်သို့ ပေါလု၏ ဘဝအတွေ့အကြုံကို တွေ့ရသည်။ ဗိမာန်တော်ထဲ၌ ဗျာဒိတ်ရူပါရုံရောက်လာလျက်၊ ယေရုရှလင်မြို့မှ အမြန်ဆုံး ထွက်ခွာခိုင်းသည်။ အ ဘယ်ကြောင့်ဆိုသော် ယေရုရှလင်သူများသည် ပေါလု၏ ဘဝအသက်တာအား အကုန်အစင်သိရှိထားသူများဖြစ်သောကြောင့် သူ၏ သက်သေခံချက်များအား လက်မခံကြ။ ယုဒဘာသာရေးတွင် စိတ်အားထက်သန်ခဲ့ပုံ၊ ယေရှုတပည့်တော်များ ဖမ်းဆီးရိုက်နှက်ထုထောင်းခဲ့ပုံ၊ အကျဉ်းချခဲ့ပုံ၊ သတေဖန်အား ကျောက်ခဲဖြင့် ပေါက်သတ်ခဲ့ကြစဉ်တွင်လည်း အလိုတူအလိုပါ ဖြစ်ခဲ့ပုံများကို သိမြင်ခဲ့ကြသည်။ ထို့ကြောင့် ဘုရားသခင်က “ဤနေရာမှ ထွက်ခွာလော့၊ တပါးအမျိုးသားများထဲသို့ သက်သေခံလော့“ ဟု ထပ်မံမိန့်ပေးခြင်းဖြစ်သည်။

၂၂:၂၂–၂၃ လူထုပရိသတ်ကြီးသည် ပေါလု၏ စကားကို တဆိတ်မျှ ငြိမ်သက်စွာ နားထောင်ခဲ့ကြပြီးနောက်၊ တပါးအမျိုးသားနှင့် ပေါင်းဖော်ကြောင်း လူတစ်ယောက်က ထအော်သည့်အခါ အလွန်အမင်းဒေါသထွက်လျက် အသားဖဲ့ချင်လောက်အောင် မုန်းတီးကြသည်။ လက်တီးလက်မောင်းတန်း၍ သတ်ပစ်၊ သတ်ပစ်ဟု အော်ဟစ်ကြသည်။

၂၂:၂၄–၂၅ ထိုသို့ လူထုပရိသတ်ကြီးက သွေးရူးသွေးတန်းဖြင့် ဆူပွက်သောင်းကျန်းနေသည်ကို ရောမစစ်သူကြီး တွေ့မြင်သောအခါ၊ ပေါလုတွင် ပြစ်မှုကျူးလွန်၍သာ ဤသို့ ရုန်းရင်းဆန်ခတ်ခြင်းဖြစ်မည်ဟု ကောက်ချက်ချသည်။ စောစောက ဟေဗြဲဘာသာစကားဖြင့် ပေါလုပြောကြားသည့်စကားကို နားထောင်ကြားသိခဲ့စဉ်ကမူ ပေါလုအား လူယဉ်ကျေး၊ ပညာရှိဟု မြင်ခဲ့သဖြင့် အဖြစ်အပျက်ကို နားမလည်နိုင်အောင် ဖြစ်နေသည်။ ထို့ကြောင့် ပေါလုအား စစ်တန်းလျားသို့ ခေါ်ဆောင်သွားပြီး ရိုက်နှက်စစ်ဆေးရန် အမိန့်ပေးလိုက်သည်နှင့် စစ်သားများက ခေါ်ဆောင်သွားသည်။ ပေါလုက ထိုစစ်သူကြီးအား “ရောမနိုင်ငံသားတစ်ယောက်ကို တရားဥပဒေနှင့်အညီ စစ်ဆေးစီရင်ခြင်းမပြုဘဲ၊ အဘယ်ကြောင့် ဥပဒေမဲ့လက်လွတ်စပယ် လုပ်ချင်သနည်း” ဟု လူကြီးလူကောင်းပီပီ ပြောလိုက်သည်။ ထိုခေတ်ကာလတွင် ရောမနိုင်ငံသားများသည် တရားဥပဒေအရသာ စစ်ဆေးစီရင်ရသည်။ ဥပဒေသနှင့် ကင်လွတ်၍ အရေးယူအပြစ်ပေးခြင်း မလုပ်ရပါ။

၂၂:၂၆ ပေါလု၏ စကားကြားသိသောအခါ ထိုတပ်မှူးကလည်း ဤလူသည် နှယ်နှယ်ရရ ပုဂ္ဂိုလ်မဟုတ်မှန်းသိသဖြင့် မည်သို့ဆက်၍ ဆောင်ရွက်ရမည့်အကြောင်း အထက်တပ်မှူးထံသွား၍ သတင်းပို့သည်။

၂၂:၂၇–၂၈ တပ်မှူးသည် ပေါလုထံ အသော့ပြန်လာ၍ သူသည် ငွေကြေးမြောက်များစွာ ပေးပြီးမှ ရောမနိုင်ငံသား အဖြစ်ကို မည်သို့ရရှိကြောင်း တိုးတိုးတိတ်တိတ်လာမေးသည်။ ပေါလုက မွေးရာပါ အခွင့်အရေးဖြစ်ကြောင်း ပြောပြသည်။ ထိုခေတ်ကာလတွင် ရောမနိုင်သားဖြစ်ရန် နည်းလမ်း(၃) မျိုးရှိသည်။ ပထမနည်းလမ်းမှာ ရောမနိုင်ငံ၌ မွေးဖွားသူဖြစ်သည်။ ပေါလုသည် ရောမအင်ပါယာအဝင် တာရှုမြို့မှာ မွေးဖွားကြီးပြင်းသူဖြစ်သည်။ သူ့မိဘများလည်း ရောမနိုင်ငံသားများဖြစ်သည်။ ထို့ကြောင့် အသွေးအသား မွေးရာပါဇာတိအားဖြင့် အရောမနိုင်ငံသားဖြစ်သည်။ တတိယနည်းလမ်းမှာ ငွေအမြောက်အမြားပေးသွင်းခြင်းဖြင့် နိုင်ငံသားခံယူခွင့် ရရှိခြင်းဖြစ်သည်။ ဤတပ်မှူးစစ်သူကြီးသည်လည်း ငွေကြေးအဆမတန်ပေး၍ ရောမနိုင်ငံသားဖြစ်ခွင့် ရရှိသူဖြစ်သည်။

၂၂:၂၉ ရောမနိုင်ငံသားစစ်စစ်ဖြစ်ကြောင်း သိရသောအခါ ဖမ်းဆီးချုပ်နှောင်သူများလည်း ရှဲကုန်သည်။ ချည်နှောင်ထားသော သံကြိုးကိုဖြေလွှတ်ပေးကြသည်။

၂၂:၃၀ ယုဒလူမျိုးများက ပေါလုအား အဘယ်ကြောင့် ရန်ရှာကြသနည်း။ မည်သည့်အပြစ် စွပ်စွဲကြသနည်း။ မည်သည့်အပြစ် ကျူးလွန်သနည်း။ အဖြစ်မှန်သိချင်သောကြောင့် နောက်တနေ့တွင် ယုဒတရားလွှတ်တော်အဖွဲ့နှင့် ယဇ်ပုရောဟိတ်ကြီးများကို စုဝေးစေသည်။ တရားဥပဒေနှင့်အညီ စစ်ဆေးစေသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။