Nehemiah -6 -

နေဟမိမှတ်စာ - ၆

နေဟမိအားလုပ်ကြံရန်

1ထိုအခါ မြို့တံခါးတို့ကို မထူထောင်သေးသော်လည်း၊ မြို့ရိုးတည်၍ လုံကြောင်းကို သမ္ဘာလတ်၊ တောဘိ၊ အာရပ်လူဂေရှင်မှစ၍ ကြွင်းသော ရန်သူတို့သည် သတင်းကြားသောအခါ၊ 2သမ္ဘာလတ်နှင့်ဂေရှင်တို့က လာပါ။ ဩနောချိုင့်တွင် ခေဖိရိမ်ရွာမှာ တွေ့ကြကုန်အံ့ဟု မကောင်းသော အကြံရှိ၍ ငါ့ကိုမှာလိုက်ကြ၏။ 3ငါကလည်း၊ ငါသည် ကြီးသောအမှုကို ဆောင်ရွက်ရသောကြောင့် မဆင်းမလာနိုင်။ ထိုအမှုကို မဆောင်ရွက်ဘဲ သင်တို့ရှိရာသို့ ဆင်းသွား၍၊ အဘယ်ကြောင့် အမှုပြတ်ရမည်နည်းဟု တမန်တို့ကို စေလွှတ်၍ ပြန်ပြော၏။ 4ထိုသို့ လေးကြိမ်တိုင်အောင် မှာလိုက်၍၊ ငါသည်လည်း ယခင်ကဲ့သို့ ပြန်ပြော၏။ 5နောကျပဉ်စမအကွိမျ၌ သမ်ဘာလတျသညျ ယခငျကဲ့သို့ မိမိကြှနျကို စလှှေတျ၍၊ ကြှနျတှငျ တံဆိပျမခတျသောစာ ပါ၏။ 6စာချက်ဟူမူကား၊ သင်နှင့်ယုဒလူတို့သည် ပုန်ကန်မည်အကြံ ရှိသည်ဟု လူအမျိုးမျိုး ပြောဆိုကြ၏။ ဂေရှင်လည်း သက်သေခံ၏။ ထိုစကားနှင့်အညီ သင်သည် ယုဒရှင်ဘုရင် ဖြစ်လိုသောငှာ၊ မြို့ရိုးကိုတည်၏။ 7ယုဒပြည်၌ ရှင်ဘုရင်ရှိသည်ဟု သင့်ကိုရည်ဆောင်၍ ယေရုရှလင်မြို့၌ ဟောပြောရသော ပရောဖက်တို့ကို သင်ခန့်ထားပြီ။ ထိုစကားအတိုင်း ရှင်ဘုရင်အား ကြားလျှောက်ရမည်။ သို့ဖြစ်၍ လာပါ။ တိုင်ပင်ကြကုန်အံ့ဟု စာ၌ပါသတည်း။ 8ငါကလည်း၊ သင်ပြောသော စကားတစ်ခွန်းမျှမမှန်၊ ကိုယ်စိတ်ထဲမှာ အချည်းနှီး ထင်တတ်သည်ချည်းဟု စေလွှတ်၍ ပြန်ပြော၏။ 9အကြောင်းမူကား၊ သူတို့က ထိုအလုပ်ကို လက်စမသတ်နိုင်အောင် သူတို့သည် အားလျော့ကြလိမ့်မည်ဟု ဆိုလျက် ငါတို့ကို ခြိမ်းခြောက်ကြ၏။ သို့ရာတွင် ထိုစကားကြောင့် ငါသာ၍အားရှိ၏။ 10ထိုအခါ မဟေတဗေလသားဖြစ်သော ဒေလာယ၏သား ရှေမာယသည်၊ ပုန်းရှောင်လျက်နေသော အိမ်သို့ ငါသွားလျှင်၊ သူက ဘုရားသခင်၏အိမ်တော် အတွင်းခန်းထဲမှာ ငါတို့သည် စုဝေး၍၊ ဗိမာန်တော်တံခါးတို့ကို ပိတ်ထားကြကုန်အံ့။ ကိုယ်တော်ကို သတ်အံ့သောငှာ လာကြလိမ့်မည်။ ယနေ့ည၌ပင် လာကြလိမ့်မည်ဟု ဆို၏။ 11ငါကလည်း၊ ငါကဲ့သို့သောသူသည် ပြေးရမည်လော။ ငါနှင့်တူသောသူသည် အသက်ချမ်းသာခြင်းငှာ ဗိမာန်တော်ထဲသို့ ဝင်ရမည်လော။ ငါမဝင်ဟု ပြန်ပြော၏။ 12ထိုသူကို ဘုရားသခင် စေလွှတ်တော်မမူ။ တောဘိနှင့်သမ္ဘာလတ် ငှားသောကြောင့်၊ ထိုသို့ ငါ့တစ်ဖက်၌ ဟောပြောသည်ကို ငါရိပ်မိ၏။ 13သူတို့သည် ငါ့ကို ကဲ့ရဲ့စရာအကြောင်း ရှိစေလျက်၊ ငါကြောက်၍ ထိုသို့ပြုသဖြင့်၊ ပြစ်မှားစေခြင်းငှာ ထိုသူကို ငှားကြ၏။ 14အို အကျွန်ုပ် ဘုရားသခင်၊ ထိုသို့ပြုတတ်သော တောဘိနှင့် သမ္ဘာလတ်ကိုလည်းကောင်း၊ နောဒိအမည်ရှိသော ပရောဖက်မမှစ၍ အကျွန်ုပ်ကို ခြိမ်းခြောက်သော ပရောဖက်တို့ကိုလည်းကောင်း မှတ်တော်မူပါ။

15အရက် ငါးဆယ်နှစ်ရက်ကြာမှ ဧလုလ လနှစ်ဆယ်ငါးရက်နေ့တွင် မြို့ရိုးကို လက်စသတ်ကြ၏။

လုပ်ငန်းအပြီးသတ်ခြင်း

16ထိုသတင်းကို ရန်သူတို့သည်ကြား၍၊ ပတ်လည်ဝန်းကျင်၌ နေသော တစ်ပါးအမျိုးသား အပေါင်းတို့သည် မြို့ရိုးကို မြင်သောအခါ၊ ရှက်ကြောက်ခြင်းသို့ ရောက်ကြ၏။ အကြောင်းမူကား၊ ထိုအမှုသည် ငါတို့၏ ဘုရားသခင့်အခွင့်နှင့် ပြီးကြောင်းကို ရိပ်မိကြ၏။

17ထိုကာလတွင်၊ ယုဒမှူးမတ်တို့သည် များစွာသော မေတ္တာစာကို တောဘိထံသို့ပေးလိုက်၍၊ တောဘိပြန်ပေးသော စာအများကိုလည်း ရကြ၏။ 18တောဘိသည် အာရာသား ရှေကနိ၏သမက် ဖြစ်သောကြောင့်လည်းကောင်း၊ သူ၏သား ယောဟနန်သည် ဗေရခိသား မေရှုလံသမီးနှင့် စုံဖက်သောကြောင့်လည်းကောင်း၊ ယုဒလူအများတို့သည် တောဘိထံ၌ သစ္စာကိုခံကြပြီ။ 19သူတို့သည် တောဘိပြုသောအမှုကောင်းတို့ကို ငါ့အားပြန်ပြောကြ၏။ ငါ့စကားကိုလည်း သူ့အား ပြန်ပြောကြ၏။ သူသည်လည်း ငါကြောက်စေခြင်းငှာ စာပေးလိုက်လေ၏။

နေဟမိမှတ်စာ - ၆ (အနက်ဖွင့်)

၆:၁–၄ နေဟမိ၏ လုပ်ဆောင်ချက် အကောင်အထည်ဖော် ရုပ်လုံးပေါ်သောအခါ မနာလိုမုန်းထား အဖျက်သမားများက အကောက်ကြံပြန်သည်။ သမ္ဘာလတ်နှင့် ဂေရှင်တို့က သြနောချိုင့်ဝှမ်းတွင် တွေ့ဆုံဖို့ နေဟမိအား (၄)ကြိမ်တိုင်တိုင် မျှားခေါ်ကြံစည်ကြသည်။ သူ့ကို ဒုက္ခပေးမည့်အကြောင်း နေဟမိရိပ်မိသဖြင့် အမိုက်ခံ၍ မသွား။ ဘုရားပေးအလုပ်ကိုသာလျှင် ဣန္ဒြေရရ ဆက်လက်ဆောက်လုပ်သည်။ ခွေးလေးခုန်၍ ဖုန်မထနိုင်ပါတကား။

၆:၅–၉ သြနောချိုင့်ဝှမ်းသို့ လိမ်ညာခေါ်ဆောင် မရမှန်းသိသောအခါ သမ္ဘာလတ်သည်ပဉ္စမအကြိမ်မြောက် နေဟမိထံသို့ စာရေးခြိမ်းခြောက်သည်။ စာထဲတွင် နေဟမိသည် ယုဒဘုရင်အဖြစ် မိမိကိုယ်ကို ချီးမြှောက်၍ ယဇ်ပုရောဟိတ်များ ခန့်အပ်ကြောင်း ပါရှားဘုရင်ထံ တိုင်ကြားမည်ဟုဆိုသည်။ အကယ်၍ ထိုသို့ပျက်စီးခြင်းမရောက်လိုလျှင် သူနှင့်ဆွေးနွေးအပေးအယူ လုပ်မည်ဟု ဆင်ကြံကြံသည်။ သို့သော်လည်း မအောင်မြင်ပြန်။ နေဟမိက သူ့စာကို စိတ်မဝင်စား၊ အရေးမလုပ်ဟု စာပြန်သည်။

မှန်ရာလုပ်နေသော နေဟမိသည် မိမိကိုယ်ကို ယုံကြည်စိတ်ချသည်။ မည်သူတရားပျက်ပျက် ကိုယ်မပျက်။ ကိုယ်မှန်လျှင် ခေါင်းမရွေ့နိုင်။

၆:၁၀–၁၄ နေဟမိသည် ဘုရားတရားကိုင်းရှိုင်းသူ၊ နှုတ်ကပတ်တော်ကို စောင့်ထိန်းသူဖြစ်သည်။ သမ္ဘာလတ်တို့အဖွဲ့သည် ပရောဖက်အတု ငှား၍ ကလိမ်ငြမ်းစင်ကြပြန်သည်။ သမ္ဘာလတ်တို့၏ သတင်းပေး ဒေလယ၏ သားရှေမာယသည် နေဟမိထံသို့သွား၍ ရန်သူများ၏ အသက်ဘေးအန္တရာယ် ရှာဖွေခြင်းမှ ကင်းလွတ်ရန် ဗိမာန်တော်ထဲသို့ ပုန်းအောင်းဖို့ အကြံပေးသည်။ ထိုပရောဖက်တု၏ စကားသည်ချောက်တွန်းခြင်းဖြစ်ကြောင်း နေဟမိသိရှိသည်။ ဘုရားသခင်က အာရုံပေးသောကြောင့် ဗိမာန်တော်သို့မဝင်။ နေဟမိသည် ဘုရားသခင်၏ အမှုတော်အတွက် အသက်စွန့်လွှတ်ရန် အသင့်ရှိသူဖြစ်သည်။ ထိုသို့ဖြင့် သမ္ဘာလတ်တို့ လူစု၏ အကြံသည် သဲထဲရေသွန်မှောက်ကျပြန်သည်။

ငယ် ၉နှင့်၁၄သည် မြှားသို့ ထက်မြက်သော ဆုတောင်းချက်ဖြစ်သည်။ (၂:၄၊ ၄:၉၊ ၅:၁၉) ကိုလည်း ကြည့်ပါ။ နေဟမိသည် အကြပ်အတည်း ကြုံတိုင်း ဘုရားသခင်ကို တိုင်တည်သည်။ ဘုရားရှင်လက်ထဲသို့ အပ်နှံသည်။ ထိုအကြောင်းကို Matthew Henry ကဤသို့ဆိုသည်။

လူဆိုးလူမိုက်များ၏ ခြိမ်းခြောက်ခြင်း သောကပင်လယ်ဝေနေခိုက် နေဟမိသည်စိတ်ပျက်အား ငယ်ထိတ်လန့်ခြင်းမရှိဘဲ၊ အားနွဲ့သော လက်နှစ်ဖက်ကို မိုးပေါ်မြှောက်၊ ဘုရားအကျွန်ုပ်၏ လက်များကို အားဖြည့်ခိုင်ခံ့စေတော်မူပါဟု ဆုတောင်းသည်။ မိမိ အခက်အခဲ အကြပ်အတည်းများကို ဘုရားသခင်လက်ထဲသို့ ဆက်ကပ်အပ်နှံခြင်းသည် ဘုရားသခင်၏ လူသားများ မမေ့အပ်သောအရာဖြစ်သည်။ ယုံကြည်ခြင်း၊ ဆုတောင်းချက်ဖြင့် စိုးရိမ်ကြောက်လန့်မှုများ ကင်းစင်သကဲ့သို့ ရဲစွမ်းသတ္တိ ဗလအင်အား ပြည့်ဝလာသည်။ အားနွဲ့သောလက်များ သန်မာစေသည်။ ယုံကြည်သူများ အသက်တာတွင်လည်း အခက်အခဲ အကြပ်အတည်း ပြဿနာများနှင့် ကြုံရပါသည်။ ထိုကဲ့သို့ ကြုံတွေ့ခြင်းသည် ဆုတောင်းခြင်း အင်အားရင့်သန်ဖို့ ဘုရားရှင် သွန်သန်ခြင်းဖြစ်သည်။ ဘုရားသခင် အကျွန်ုပ်မှာ လုပ်ဆောင်စရာများစွာရှိပါသေးသည်။ “ယခု နှောင့်ယှက်ဖျက်ဆီးခြင်းခံနေရပြီ။ အကျွန်ုပ်လက်များကို သန်မာစေတော်မှုပါ” ဟူသောနေဟမိ၏ ဆုတောင်းချက်ကိုအမြဲသတိရကြပါစေ။၅

၆:၁၅–၁၉ အနှောင့်အယှက် အဟန့်အတားကြားမှပင် နေဟမိသည် ယေရုရှလင်မြို့ရိုးအား (၅၅) ရက်အတွင်း လက်စသတ်နိုင်သည်မှာ မှတ်သားဖွယ်ရာ ဇွဲလုံလစိုက်ထုတ်ခြင်းဖြစ်သည်။ ဘုရားသခင်က ယုဒလူများအား ကောင်းကြီးပေး၍ ရန်သူများအားနှိမ်နင်းခြင်းဖြစ်သည်။ နေဟမိ ကြိုးပမ်းအားထုတ်မှုကို အငယ် ၁၇-၁၉တွင် တွေ့ရသည်။ ယေရုရှလင်လူကြီးသူမအချို့သည် တောဘိနှင့် ခမီးခမက်၊ သမီးသားဆက်စုံဖက် တော်စပ်သောကြောင့် အားပေးမိတ်ဖွဲ့ကြသည်။ (တောဘိသည် အမ္မုန်မင်းဖြစ်သည် ၂:၁၀)။ ထိုလူကြီးသူမများသည် နေဟမိစကားကို တဘက်တွင် ချီးမွမ်းကြသကဲ့သို့ အခြားတဘက်တွင် တောဘိထံသို့ ပို့ဆောင်ပေးကြသည်။ တောဘိအကြောင်းကို အခန်း ၁၃တွင် ဆက်လက်လေ့လာကြပါစို့။

နေဟမိသည် ရက်ပေါင်း (၅၂)ရက်ဖြင့် မြို့ရိုးတည်ဆောက်သည့်အပြင် (၁၂)ကျော် မြို့တော်ဝန်ထမ်းဆောင်သည့်ကာလအတွင်းတွင် မြို့တော်သူ မြို့တော်သားများ၏ စည်ပင်သာယာ ဖွံဖြိုးရေးကိစ္စအရပ်ရပ်ကို မနေမနား သယ်ပိုးခဲ့သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။