2 Kings -2 -

ဓမ္မရာဇဝင်စတုတ္ထစောင် - ၂

ဧလိယကိုကောင်းကင်သို့ဆောင်ယူသွားခြင်း

1ထာဝရဘုရားသည် ဧလိယကို လေပွေအားဖြင့် ကောင်းကင်သို့ ချီတော်မူချိန်နီးသောအခါ၊ ဧလိယသည် ဧလိရှဲနှင့်အတူ ဂိလဂါလမြို့သို့ သွား၏။ 2ဧလိယကလည်း၊ ဤအရပ်၌ နေရစ်ပါလော့။ ထာဝရဘုရားသည် ငါ့ကို ဗေသလမြို့သို့ စေလွှတ်တော်မူသည်ဟု ဧလိရှဲအားဆိုလျှင်၊ ဧလိရှဲက ထာဝရဘုရားအသက်၊ ကိုယ်တော်အသက်ရှင်တော်မူသည်အတိုင်း၊ ကိုယ်တော်နှင့်အကျွန်ုပ် မကွာရပါဟု ပြန်ပြောလျက်၊ ထိုသူနှစ်ယောက်တို့သည် ဗေသလမြို့သို့သွားကြ၏။ 3ထိုမြို့၌ရှိသော ပရောဖက်အမျိုးသားတို့သည် ဧလိရှဲကို ခရီးဦးကြိုပြုအံ့သောငှာ ထွက်လာ၍၊ ထာဝရဘုရားသည် ကိုယ်တော်သခင်ကို ကိုယ်တော်ခေါင်းမှ ယနေ့နုတ်သွားတော်မူမည်ကို သိတော်မူသလောဟု မေးလျှင်၊ ဟုတ်ကဲ့ ငါသိ၏။ တိတ်ဆိတ်စွာနေကြပါဟု ပြောဆို၏။ 4ဧလိယကလည်း၊ အို ဧလိရှဲ၊ ဤအရပ်၌နေရစ်ပါလော့။ ထာဝရဘုရားသည် ငါ့ကိုယေရိခေါမြို့သို့ စေလွှတ်တော်မူသည်ဟုဆိုလျှင်၊ ဧလိရှဲက၊ ထာဝရဘုရားအသက်၊ ကိုယ်တော်အသက် ရှင်တော်မူသည်အတိုင်း၊ ကိုယ်တော်နှင့်အကျွန်ုပ် မကွာရပါဟု ပြန်ပြောလျက်၊ ထိုသူနှစ်ယောက်တို့သည် ယေရိခေါမြို့သို့သွားကြ၏။ 5ထိုမြို့၌ရှိသော ပရောဖက်အမျိုးသားတို့သည် ဧလိရှဲထံသို့လာ၍ ထာဝရဘုရားသည် ကိုယ်တော်သခင်ကို ကိုယ်တော်ခေါင်းမှ၊ ယနေ့ နုတ်သွားတော်မူမည်ကို သိတော်မူသလောဟု မေးလျှင်၊ ဟုတ်ကဲ့ ငါသိ၏။ တိတ်ဆိတ်စွာ နေကြပါဟု ပြောဆို၏။ 6ဧလိယကလည်း ဤအရပ်၌ နေရစ်ပါလော့။ ထာဝရဘုရားသည် ငါ့ကိုယော်ဒန်မြစ်သို့ စေလွှတ်တော်မူသည်ဟု ဆိုလျှင်၊ ဧလိရှဲက၊ ထာဝရဘုရားအသက်၊ ကိုယ်တော်အသက်ရှင်တော်မူသည်အတိုင်း၊ ကိုယ်တော်နှင့် အကျွန်ုပ်မကွာရပါဟု ပြန်ပြောလျက်၊ ထိုသူနှစ်ယောက်တို့သည် အတူသွားကြ၏။ 7ပရောဖက်အမျိုးသားငါးကျိပ်တို့သည် အဝေးကကြည့်ရှုခြင်းငှာ သွား၍ရပ်နေကြ၏။ ထိုသူနှစ်ယောက်တို့သည် ယော်ဒန်မြစ်နားမှာ ရပ်နေကြ၏။ 8ဧလိယသည် မိမိဝတ်လုံကိုယူ၍လိပ်ပြီးမှ၊ ရေကိုရိုက်သဖြင့် ရေသည် တစ်ဖက်တစ်ချက်ကွဲ၍၊ ထိုသူနှစ်ယောက်တို့သည် မြေပေါ်မှာ လျှောက်သွားကြ၏။ 9မြစ်တစ်ဖက်သို့ ရောက်သောအခါ၊ ဧလိယက၊ သင်နှင့်ငါမကွာမီ ငါ၌ တစ်စုံတစ်ခုသောဆုကို တောင်းလော့ဟု ဧလိရှဲအားဆိုလျှင်၊ ဧလိရှဲက၊ ကိုယ်တော်ဝိညာဉ်နှစ်ဆသောအဖို့ကို အကျွန်ုပ်အပေါ်မှာ ရှိပါစေသောဟု တောင်းသော်၊ 10ဧလိယက သင်သည်ရခဲသောဆုကို တောင်း၏။ သင်နှင့်ငါကွာသည်ကို မြင်လျှင်ရမည်။ သို့မဟုတ် မရဟု ပြောဆို၏။ 11ထိုသို့ နှုတ်ဆက်လျက်သွားကြစဉ်တွင်၊ မီးရထားနှင့် မီးမြင်းတို့သည် ပေါ်လာ၍ ထိုသူနှစ်ယောက်တို့ကို ခွဲခွာသဖြင့်၊ ဧလိယသည် လေပွေအားဖြင့် ကောင်းကင်သို့ တက်လေ၏။ 12ဧလိရှဲသည် ကြည့်မြင်လျှင် ငါ့အဘ၊ ငါ့အဘ၊ ဣသရေလရထား၊ ဣသရေလမြင်းပါတကားဟု ဟစ်သော်လည်း၊ နောက်တစ်ဖန် ဧလိယကိုမမြင်ရ။ မိမိအဝတ်ကိုကိုင်၍ နှစ်ပိုင်းဆုတ်လေ၏။ 13အောက်သို့ကျသော ဧလိယဝတ်လုံကို ကောက်၍ ပြန်လေ၏။ ယော်ဒန်မြစ်နားမှာရပ်၍၊ 14ရေကို ဝတ်လုံနှင့်ရိုက်လျက်၊ ဧလိယကိုးကွယ်သော ဘုရားသခင်ထာဝရဘုရားသည် အဘယ်မှာရှိတော်မူသနည်းဟူ၍ တစ်ဖန် ရိုက်သောအခါ၊ ရေသည်တစ်ဖက်တစ်ချက်ကွဲသဖြင့် ဧလိရှဲသည်ကူးသွား၏။ 15ယေရိခေါမြို့မှာ ကြည့်ရှုသောပရောဖက်အမျိုးသားတို့သည် ဧလိရှဲကိုမြင်လျှင်၊ ဧလိယ၏ဝိညာဉ်သည် ဧလိရှဲအပေါ်မှာ ကျိန်းဝပ်သည်ဟုဆိုလျက် ခရီးဦးကြိုပြုအံ့သောငှာသွား၍ သူ့ရှေ့၌ မြေပေါ်မှာပျပ်ဝပ်ကြ၏။ 16သူတို့ကလည်း၊ ကိုယ်တော်ကျွန်တို့၌ ခွန်အားကြီးသောသူ ငါးကျိပ်ရှိပါ၏။ သူတို့သည်သွား၍ ကိုယ်တော်၏သခင်ကို ရှာမည်အကြောင်း၊ အခွင့်ပေးတော်မူပါ။ ထာဝရဘုရား၏ဝိညာဉ်တော်သည် သူ့ကိုချီယူ၍ တစ်စုံတစ်ခုသော တောင်ပေါ်၌ဖြစ်စေ၊ ချိုင့်ထဲသို့ဖြစ်စေ ချကောင်းချတော်မူလိမ့်မည်ဟု အခွင့်တောင်းလျှင်၊ မစေလွှတ်ကြနှင့်ဟု ဧလိရှဲသည် မြစ်တားသော်လည်း၊ 17သူတို့သည် ဧလိရှဲစိတ်အားလျော့သည်တိုင်အောင် အလွန်တောင်းပန်သောအခါ၊ စေလွှတ်ကြဟု ဆို၏။ သူတို့သည် လူငါးကျိပ်ကို စေလွှတ်သဖြင့်၊ သုံးရက်ပတ်လုံးရှာ၍ မတွေ့နိုင်ကြ။ 18ဧလိရှဲသည် ယေရိခေါမြို့မှာ နေသေးသည်ဖြစ်၍၊ လူတို့သည် ပြန်လာသောအခါ၊ မသွားကြနှင့်ဟု ငါမြစ်တားသည် မဟုတ်လောဟု ဆို၏။

ဧလိရှဲ၏နိမိတ်လက္ခဏာများ

19ထိုမြို့သားတို့က၊ ကိုယ်တော်မြင်တော်မူသည်အတိုင်း၊ ဤမြို့တည်ရာအရပ်သည် သာယာပါ၏။ သို့ရာတွင် ရေမကောင်း၊ မြေလည်း ကိုယ်ဝန်ပျက်စေတတ်ပါသည်ဟု ဧလိရှဲအားလျှောက်ကြလျှင်၊ 20ဧလိရှဲက၊ ဘူးသစ်တစ်လုံးကို ဆားထည့်၍ ယူခဲ့ကြလော့ဟုဆိုသည်အတိုင်း ယူခဲ့ကြ၏။ 21ဧလိရှဲသည် စမ်းရေတွင်းသို့သွား၍ ဆားကိုခတ်လျက်၊ ထာဝရဘုရားမိန့်တော်မူသည်ကား ဤရေကိုငါချိုစေ၏။ နောက်တစ်ဖန် သေစေမည်အကြောင်း၊ ကိုယ်ဝန်ပျက်စေမည်အကြောင်းကို မပြုရဟု၊ 22ဧလိရှဲဆင့်ဆိုသောအမိန့်တော်အတိုင်း ထိုရေသည် ယနေ့တိုင်အောင် ချိုလေ၏။

23ထိုမြို့မှ ဗေသလမြို့သို့ပြန်၍ ခရီးသွားစဉ်တွင်၊ လုလင်ပျိုတို့သည် မြို့ထဲကထွက်၍၊ ဟေဦးပြည်း၊ တက်ဦးလော့။ ဟေဦးပြည်း၊ တက်ဦးလော့ဟု ကဲ့ရဲ့ကြ၏။ 24ဧလိရှဲသည် လှည့်ကြည့်ပြီးလျှင်၊ ထာဝရဘုရား၏အခွင့်နှင့် ကျိန်ဆိုသဖြင့်၊ ဝံမနှစ်ကောင်တို့သည် တောထဲကထွက်၍ လုလင်ပျို လေးကျိပ်နှစ်ယောက်တို့ကို ကိုက်သတ်လေ၏။ 25ထိုမြို့မှ ကရမေလတောင်သို့လည်းကောင်း၊ ထိုတောင်မှ ရှမာရိမြို့သို့လည်းကောင်း အစဉ်အတိုင်းသွား၏။

ဓမ္မရာဇဝင်စတုတ္ထစောင် - ၂ (အနက်ဖွင့်)

(ခ) ဧလိယ၏ကြွမြန်းခြင်း (၂:၁–၁၂)

ဤအခန်းကို ဧလိယ၊ ကောင်းကင်ယံသို့ ကြွမြန်းခြင်းဖြင့် (ငယ် ၁-၁၁)ဖြင့် အခန်းအနား ဖွင့်လှစ်၍ ဗေလေလ ဟော့ရမ်းလူငယ်များ ဘဝနိဂုံးချုပ် ကျက်သရေယုတ်ခြင်းဖြင့် ပွဲသိမ်းသည် (ငယ် ၂၃-၂၅)။

၂:၁–၆ ဧလိယ၏အမှုတော်ဆောင်ကာလ ပြီးဆုံးတော့မည် ဖြစ်သဖြင့် လက်ထောက် ဧလိရှဲအား ခန့်အပ်ခဲ့သည်။ သို့သော် ချက်ချင်းမပျောက်ကွယ်သေး။ ဧလိရှဲနှင့်အတူ ဗေသလ၊ ယေရိခေါစသော ယော်ဒန်မြစ် ဒေသသို့ သွားကြသေးသည်။ ဧလိရှဲသည် ဧလိယနောက်သို့ ယုံကြည်စိတ်ချစွာ တကောက်ကောက်လိုက်သည်။ ဗေသလ အရောက်တွင် ပရောဖက်သားများက ဧလိရှဲအား ဘုရားသခင်သည် ဧလိယကို ခေါင်းမှ နှုတ်ယူသွားမည့်အကြောင်း သိပါသလားဟု မေးကြသည်။ ဧလိရှဲကလည်း သိပါသည်ဟု ဖြေသည်။ သို့ကြောင့်လည်း ဆရာသမားကို မခွဲရက်သဖြင့် တဖဝါးမှမကွာ လိုက်လံခြင်းဖြစ်ပေမည်။ ဆရာသည် ခေါင်းဖြစ်၍ တပည့်သည် ဆရာ၏ ခြေရင်းမှာ ဝပ်တွားခယရသည်မှာ ဓမ္မတာထုံးစံရှိပေသကိုး။ တပည့် ဧလိရှဲအတွက် ဝမ်းနည်းအားငယ်စရာ ဖြစ်သောကြောင့် ထိုအကြောင်းကို မပြောလို၊ မကြားလို။ ထို့ကြောင့် တိတ်ဆိတ်စွာ နေကြပါဟု တားမြစ်သည်။

၂:၇–၉ ဧလိယနှင့် ဧလိရှဲတို့ ဆရာတပည့် ယေါ်ဒန်မြစ်သို့ ဆင်းသည့်အခါ ပရောဖက် ငါးဆယ်တို့က ခပ်လှမ်းလှမ်းမှ စောင့်ကြည့်နေကြသည်။ ဧလိယက ဝတ်လုံဖြင့် ယေါ်ဒန်မြစ်ရေပြင်အား ရိုက်ခတ်ရာ မြစ်ရေ နှစ်ပိုင်းကွဲသွားသည်။ ဆရာတပည့်နှစ်ယောက်လည်း ခြောက်သွေ့စွာ တဖက်ကမ်းသို့ ကူးသွားကြသည်။ ဧလိယသည် အာဟပ်မင်းလက်ထက်တွင် ယေါ်ဒန်မင်း အရှေ့ဘက်ကမ်းမှ စတင်ရောက်ရှိလာသည် (၃ရာ ၁၇:၁)။ ယခုအမှုတော် အဆုံးသတ်သည့်အခါ လာရာလမ်းအတိုင်း ယေါ်ဒန်မြစ်အရှေ့ဘက်ကမ်းသို့ ပြန်ကူးပြီး ကောင်းကင်ယံသို့ ကြွမြန်းသွားသည်။ ကောင်းကင်ယံသို့ ကြွလုလုခါနီးတွင် ဧလိရှဲအား ဘာလက်ဆောင်ပေးခဲ့ရမည်လဲဟု မေးသည်။ ဧလိယဝိညာဉ်ခွန်အား နှစ်ဆ တောင်းသည်။ ဝိညာဉ်ခွန်အား နှစ်ဆဆိုသည်မှာ သားဦးအရာနှင့် အောင်မြင်သော အမှုတော်ဆောင်ဟု ဖြစ်နိုင်သည်ဟု ယူဆကြသည်။ George William ကမူ ဧလိယသည် အံ့ဘွယ်နိမိတ် (၈)ခု ပြခဲ့၍ ဧလိရှဲသည် (၁၆)ခု ပြခဲ့သည်ဟု ဆိုသည်။၂

၂:၁၀–၁၂ ဧလိယကထိုဆုသည် ရတောင့်ရခဲဖြစ်၏ သူလူ့လောကမှာ ရှိနေစဉ် မပေးနိုင်။ သို့သော် မြေကြီးမှကွာသည်နှင့် တပြိုင်နက် ရရှိမည်ဟု ကတိပေးခဲ့သည်။ စကားတပြောပြောနှင့် လမ်းလျှောက်နေစဉ် မီးရထားနှင့် မီးမြင်းများပေါ်လာ၍ ဆရာနှင့်တပည့်အား လမ်းခွဲစေကြသည်။ ဧလိယစီးသော မီးရထားကို လေဘွေက ချီဆောင်၍ ကောင်းကင်ယံသို့ တက်သွားပြီး မိုးကုတ်စက်ဝိုင်းသို့ ပျောက်ကွယ်သွားသည်။ နောက်တဖန်မမြင်ရတော့ပါ။ ဧလိရှဲသည် မိုးပေါ်သို့ တတ်သွားသော ဆရာသမား ဧလိယကို ငေးမောကြည့်ရှုရင်း “ငါ့အဘ၊ ငါ့အဘ၊ ဣသရေလရထား၊ ဣသရေလမြင်းပါလား” ဟု အော်ဟစ်ကြွေးကြော်သည်။ ထိုအဖြစ်အပျက်က ဧလိယသည် ဘုရားသခင်၏ အထက်သန်ဆုံးလက်နက်၊ အကောင်းဆုံးဘုရားပေး ခွန်အားဟု ဆိုလိုဟန်ရှိသည်။

(ဂ) ဧလိရှဲအမှုတော်စတင်ခြင်း (၂:၁၃–၂၅)

၂:၁၃–၁၄ ဧလိရှဲသည် ဆရာသမားနှင့် ခွဲခွာရမှု ဝမ်းနည်းခြင်း အထိမ်းအမှတ်အဖြစ် သူ့ဝတ်လုံကို ပွေ့ပိုက်လျှက် ယေါ်ဒန်မြစ်နားသို့ ပြန်ရောက်လာသည်။ ဧလိယ၏ ဝတ်လုံဖြင့် ယေါ်ဒန်မြစ်ကို ရိုက်၍ ဧလိယ ကိုးကွယ်သော ဘုရားသခင် ထာဝရဘုရားသည် အဘယ်မှာ ရှိတော်မူသနည်း ဟုအော်သည်။ ထိုမေးခွန်းသည် ဘုရားသခင်အား သံသယရှိ၍သော်၎င်း၊ စိတ်ထင့်၍သော်၎င်း အော်ဟစ်မေးမြန်းခြင်းမဟုတ်။ သူသည် ဘုရားသခင်ရှေ့တွင် ဧလိယနှင့် အတူရှိခဲ့ကြောင့် ကြွေးကြော်ခြင်းဖြစ်သည်။ ယေါ်ဒန်မြစ်ရေ ရပ်တန့်သွားသည်နှင့် တဘက်ကမ်းသို့ ပြန်လည်ကူးမြောက်ပြီး ထားပစ်ခဲ့သော ပရောဖက်ငါးဆယ်နှင့် ပြန်လည်ပူးပေါင်းသွားသည်။

၂:၁၅–၁၈ ဧလိရှဲ ယေါ်ဒန်မြစ် ဖြတ်ကူးလာပုံကို မြင်ကြသောအခါ ဧလိရှဲသည် ဧလိယခြေရာ လိုက်နင်းသူအမှန်ဖြစ်ကြောင်း ယုံကြည်သိမှတ်ကြသည်။ ဧလိရှဲ၏ အားငယ်ဝမ်းနည်းမှုကို မကြည့်ရက် ကြသောကြောင့် ဧလိယ အား လိုက်လံရှာဖွယ်ပေးမည် ဟု ဆိုကြသည်။ သို့သော် ဧလိရှဲအား ပြောသည့်အတိုင်း ရှာမတွေ့ကြ။ ဧလိယကောင်းကင်ယံသို့ ကြွခြင်းသည် ခဏတဖြုတ်ဖြစ်မည် သို့မဟုတ် တစ်နေရာတွင် ပြန်ပေါ်မည်ဟု ထင်မှတ်ကြသည်။

၂:၁၉–၂၂ ဤကျမ်းပိုဒ်မှစ၍ ၁၃:၃၀ တိုင်အောင် ဧလိရှဲက ဣသရေလလူများအား ရုပ်တုဘုရားအား စွန့်ခွာ၍ အသက်ရှင်တော်မူသော ဘုရားထံသို့ အကြွင်းမဲ့ ဆက်ကပ်ယုံကြည်ကြဖို့ သာသနာပြုပုံ ရှင်းပြထားသည်။ သို့သော် ဖြစ်စဉ်အကြောင်းအရာများသည် သက္ကရာဇ်အစဉ်လိုက် မဟုတ်ပါ။ ပထမဆုံး အံ့ဘွယ်နိမိတ်လက္ခဏာကို ယေရိခေါတွင် တွေ့ရသည်။ ရေခံမြေခံမကောင်း၊ ရေခါးသဖြင့် ကလေးသူငယ်များ သေကြေကြသည်။ ဧလိရှဲက ရေထဲသို့ ဆားခတ်ပေးရာ ထိုအဖြစ်ဆိုး ပပျောက်သွားသည်။ နောက်တဖန် ထိုကဲ့သို့သော အကုသိုလ်များ မကြုံတွေ့ကြရတော့ပါ။

၂:၂၃–၂၄ ယေရိခေါမှ ဗေသလသို့ ပြန်လာစဉ် ဆိုးသွမ်းလူငယ်လေးဆယ်က ဧလိရှဲအား “ထိပ်ပြောင်ကြီး၊ ထိပ်ပြောင်ကြီး” ဧလိယကဲ့သို့ ကောင်းကင်ယံသို့ ကြွပါလား” ဟု နောက်ပြောင် သရော်ကြသည်။ နောက်ပြန်လှည့်ကြည့် ကျိန်ဆိုလိုက်ရာ တောထဲမှ ဝက်ဝံမနှစ်ကောင် ထွက်လာပြီး ထိုဟော့ရမ်းလူငယ်များကို အကုန်ကိုက်စားပစ်ကြသည်။ ဘုရားသခင်၏ လူများကို ပြစ်မှားစော်ကားခြင်း သည် ဘုရားသခင်အား ပြစ်မှားစော်ကားခြင်း နှင့် အတူတူဖြစ်သည်။

၂:၂၅ ဧလိရှဲသည် ဧလိယ၏ခြေရာအတိုင်း လိုက်နင်းသည်။ ယေရိခေါ၊ ဗေသလရှိ ပရောဖက်များကို တွေ့ဆုံမိဿယဖွဲ့ပြီး ကရမေလတောနှင့် ရှမာရိ တို့သို့ ခရီးဆက်သည်။ ယေရိခေါသားများက တလေးတစား ဧည့်ဝတ်ကြို၍ ကောင်းကြီးပေးကြသည်။ အဘယ့်ကြောင့်ဆိုသော် ဆိုးသွမ်းလူငယ်များ အပေါ် ဧလိရှဲ၏ ဆောင်ရွက်ချက်တို့ ကြည့်၍ ဘုရားသခင်၏ လူအမှန်ဖြစ်ကြောင်း သိမှတ်ခံယူကြသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။