တိမောသေဩဝါဒစာဒုတိယစောင် - ၄

1ကိုယ်တော်တိုင်ပေါ်ထွန်း၍ နိုင်ငံတော်ထင်ရှားသောကာလ၊ အသက်ရှင်သောသူ၊ သေသောသူတို့ကို စစ်ကြောစီရင်တော်မူသော သခင်ယေရှုခရစ် ရှေ့မှာလည်းကောင်း၊ ဘုရားသခင် ရှေ့မှာလည်းကောင်း၊ ငါသည် သင့်ကို သစ္စာပေးသည်ကား၊- 2နှုတ်ကပတ်တရားတော်ကို ဟောပြောလော့။ အချိန်ရှိသည်ဖြစ်စေ၊ မရှိသည်ဖြစ်စေ၊ ကြိုးစားအားထုတ်လော့။ အပြစ်ကို ဖော်ပြလော့။ ဆုံးမခြင်းကိုပြုလော့။ အလွန်ရှည်သောစိတ်နှင့် ဩဝါဒမျိုးကိုပေး၍ တိုက်တွန်းသွေးဆောင်လော့။- 3အကြောင်းမူကား၊ နောင်ကာလ၌ လူတို့သည် စင်ကြယ်သောဩဝါဒကို နားမခံနိုင်ဘဲ၊ ယားတတ်သော နားရှိလျှင်၊ မိမိတပ်မက်ခြင်းအတိုင်း များပြားသော ဆရာတို့နောက်သို့ လိုက်ကြလိမ့်မည်။- 4သမ္မာတရားကို နားမထောင်ဘဲ၊ ဒဏ္ဏာရီစကားကို နားထောင်၍ လွဲသွားကြလိမ့်မည်။- 5သင်မူကား၊ အရာရာ၌ သမ္မာသတိရှိစေလော့။ ဆင်းရဲဒုက္ခကို သည်းခံလော့။ သာသနာပြုဆရာ ဆောင်ရွက်ရသောအမှုကို ဆောင်ရွက်လော့။ ဓမ္မဆရာအရာ၌ ခန့်ထား၍ ပြုရသောဝတ်များကို အကုန်အစင်ပြုလော့။- 6အကြောင်းမူကား၊ ငါ့ကိုယဇ်ပေါ်မှာ လောင်းရသော အချိန်ရှိပြီ။ စုတေရသောအချိန် ရောက်လေပြီ။- 7ကောင်းစွာသော တိုက်လှန်ခြင်းကို ငါပြုပြီ။ ပြေးရသောလမ်းကို အဆုံးတိုင်အောင်ပြေးပြီ။ ယုံကြည် ခြင်းတရားကို စောင့်ရှောက်ပြီ။- 8ယခုမှစ၍ ဓမ္မသရဖူသည် ငါ့အဖို့ သိုထားလျက်ရှိ၏။ ထိုနေ့ရက်၌ တရားသဖြင့် စီရင်သောသူတည်းဟူသော သခင်ဘုရားသည် ထိုသရဖူကို ငါ၌အပ်ပေးတော်မူမည်။ ထိုမျှမက၊ ပေါ်ထွန်းတော်မူခြင်းကို တောင့်တသောသူအပေါင်းတို့၌လည်း အပ်ပေးတော်မူမည်။
ကိုယ်ရေးကိုယ်တာအမှာစကား
9-10ငါ့ထံသို့ မြန်မြန်လာခြင်းငှာ ကြိုးစားလော့။ အကြောင်းမူကား၊ ဒေမသည် ယခုဘဝကို နှစ်သက်သော စိတ်ရှိသည်နှင့် ငါ့ကိုစွန့်ပစ်၍၊ သက်သာလောနိတ်မြို့သို့ သွားပြီ။ ကရက္ကေသည် ဂလာတိပြည်သို့လည်းကောင်း၊ တိတုသည် ဒါလမာတိပြည်သို့လည်းကောင်း သွားပြီ။- 11လုကာတစ်ယောက်တည်းသာ ငါ့ထံမှာရှိ၏။ မာကုကို သင်နှင့်အတူခေါ်ခဲ့လော့။ သူသည် ဆရာအမှုကိုပြုရာမှာ ငါအကျိုးရှိ၏။- 12တုခိတ်ကိုလည်း ဧဖက်မြို့သို့ ငါစေလွှတ်ပြီ။- 13တရောမြို့တွင် ကာပုလက်၌ ငါထားခဲ့သော ဝတ်လုံကိုလည်းကောင်း၊ စာစောင်ကိုလည်းကောင်း၊ အထူးသဖြင့် သားရေစာကိုလည်းကောင်း၊ သင်သည်လာသောအခါ ယူခဲ့လော့။- 14ပန်းတဉ်းသမားအာလေဇန္ဒြုသည် ငါ၌ မကောင်းသော အမှုအများကို ပြုလေပြီ။ ထိုသူကျင့်သော အကျင့်တို့၏ အကျိုးအပြစ်ကို သခင်ဘုရား ဆပ်ပေးတော်မူပါစေသော။- 15သူ့ကိုသတိပြုလော့။ ငါတို့စကားကို အလွန်ငြင်းပယ်လေပြီ။- 16ပထမအချိန်၌ အပြစ်တင်ခွင့်ကိုဖြေ၍ ငါသည် အစီရင်ခံရသောအခါ၊ ငါ့ဘက်၌ အဘယ်သူမျှမနေ။ လူအပေါင်းတို့သည် ငါ့ကို စွန့်ပစ်ကြ၏။- 17သူတို့၌ အပြစ်တင်တော်မမူပါစေနှင့်။ လူအပေါင်းတို့သည် စွန့်ပစ်ကြသော်လည်း၊ ဒေသနာတော်ကို အကုန်အစင်ဟောပြော၍၊ ခပ်သိမ်းသောလူမျိုးတို့သည် ကြားသိစေခြင်းငှာ၊ သခင်ဘုရားသည် ငါ့ဘက်၌နေ၍ ငါ့ကို ခွန်အားနှင့် ပြည့်စုံစေတော်မူသောကြောင့်၊ ခြင်္သေ့ခံတွင်းမှ ကယ်နုတ်ခြင်းချမ်းသာကို ငါရ၏။- 18ထိုမျှမက၊ သခင်ဘုရားသည် မကောင်းသော အမှုရှိသမျှတို့မှ ငါ့ကိုကယ်နုတ်၍၊ မိမိကောင်းကင်နိုင်ငံတော်သို့ တိုင်အောင် မစပို့ဆောင်တော်မူလိမ့်မည်။ ထိုသခင်သည် ကမ္ဘာအဆက်ဆက် ဘုန်းကြီးတော်မူစေသတည်း။ အာမင်။
နောက်ဆုံးနှုတ်ဆက်စကား
19ပြစ်ကိလနှင့်အာကုလမှစ၍ ဩနေသိဖော်၏ အိမ်သူအိမ်သားများကို နှုတ်ဆက်လော့။- 20ဧရက္ကုသည် ကောရိန္သုမြို့၌နေ၏။ တရောဖိမ်သည် နာ၍ မိလက်မြို့၌ငါထားခဲ့၏။- 21ဆောင်းကာလမရောက်မီ ကြိုးစား၍ လာခဲ့လော့။ ဥဗုလု၊ ပုဒေ၊ လိနု၊ ကလောဒိမှစ၍ ညီအစ်ကို အပေါင်းတို့သည် သင့်ကို နှုတ်ဆက်ကြ၏။- 22သခင်ယေရှုခရစ်သည် သင်၏စိတ်ဝိညာဉ်နှင့် အတူ ရှိတော်မူပါစေသော။ သင်၌ ကျေးဇူးတော်ရှိစေသတည်း။ အာမင်။
တိမောသေဩဝါဒစာဒုတိယစောင်ပြီး၏။

တိမောသေဩဝါဒစာဒုတိယစောင် - ၄ (အနက်ဖွင့်)

: ရှင်ပေါလု၏ နောက်ဆုံးတိုက်တွန်းချက်ဖြစ်သည်။ ဘုရားသခင်နှင့် ယေရှုခရစ်တော်၌ ရပ်တည်ရန် တွန်းအားပေးသည်။ ဘုရားသခင်ကို ရှုမှတ်ခြင်းဖြင့် အရာခပ်သိမ်းကို လုပ်ဆောင်ရန် သွန်သင်သည်။

သခင်ယေရှုကို အသက်ရှင်သောသူ၊ သေသောသူများအား စစ်ကြောစီရင်မည့်သူအဖြစ် ဖော်ပြထားသည်။ အင်္ဂလိပ်ကျမ်းမူတွင် ကယ်တင်ရှင် ဘုရား တဖန် ကြွလာ၍ နိုင်ငံတော် တည်ထောင်သောအခါ အထွေထွေ ထမြောက်ခြင်းနှင့် တရားစီရင်ခြင်း ရှိမည်ဟု ဆိုထားသည်။ ဂရိကျမ်းစာ မူရင်းတွင် Kata၂၉ ဟု ဆို၍ “ရှိလာမည်၊ ဖြစ်လာမည်” ဟု အဓိပ္ပါယ်ရသည်။

အသက်ရှင်သောသူ သေသောသူများကို စစ်ကြောစီရင်မည်ဟု ဆိုသော်လည်း အချိန်ကာလ မပြောပါ ခရစ်တော်ပေါ်ထွန်းခြင်းနှင့် နိုင်ငံတော် တည်ထောင်ခြင်းသည် ယုံကြည်သူများ သစ္စာစောင့်သိဖို့ တိုက်တွန်းခြင်း ဖြစ်သည်။

အခြားကျမ်းစာစောင်တွင် ခရစ်တော်ဘုရား ဒုတိယကြွရောက်လာရာတွင် အသက်ရှင်သူ၊ သေသူများ စီရင်မည့်အကြောင်း မတွေ့ရပါ။ သေလွန်သော ဆိုးမိုက်သူများသည် အနှစ်တစ်ထောင် အုပ်စိုးခြင်း မကုန်ဆုံးမီ ထမြောက်မည်မဟုတ် (ဗျာ ၂၀:၅)။

ယုံကြည်သူများ၏ အမှုတော်၌ ပါဝင်မှုကို ယေရှုခရစ်တရားစီရင်ခြင်း ပလ္လင်ပေါ်တွင် ထိုင်တော်မူသည့်အခါ ဆုလာက်ဆောင် ချီးမြှင့်ပါမည်။ သို့သော် ထိုဆုလက်ဆောင်မှာ ခရစ်တော်ပေါ်ထွန်းခြင်းနှင့် နိုင်ငံတော် တည်ထောင်ခြင်း ဖြစ်သည်။ ထိုဆုလက်ဆောင်သည် ခရစ်တော်နှင့်အတူ အနှစ်တစ်ထောင် အုပ်စိုးခြင်း ဖြစ်သည်။ ထိုသစ္စာရှင်များသည် မြို့ကြီး (၁၀)မြို့ကို အုပ်စိုးရမည် (လု ၁၉:၁၇)။

: ဘုရားသခင်၏ အမြင်တွင် တိမောသေ၏ အသက်တာသည် အနာဂတ်တွင် ဆုလက်ဆော်င ထိုက်တန်သူဖြစ်သည်။ အခွင့်အရေးဟူသမျှ မလွတ်တမ်း အမှုတော်အတွက် အသုံးချသည်။ နှုတ်ကပတ်တော် ဟောပြောခြင်း မဖြစ်နိုင်ဟု အချို့က ထင်ကောင်းထင်ကြမည်။ အထက်မှ ခေါ်တော်မူသော တိမောသေအတွက် အမှန်တကယ်ဖြစ်သည်။ အမှားထောက်ပြမည်၊ နှိုးဆော်မည်၊ နှစ်သိမ့်မည်၊ အပြစ်သားများအားလုံး ယုံကြည်၍ သန့်ရှင်းသူများ ဖြစ်ဖို့ သွေးဆောင်မည်။

: အခန်းငယ် ၃မှ ၆တွင် အချက်(၂)ချက်ကို အလေးအနက်ပေးထားသည်။ ပထမအချက်မှာ လူအပေါင်းတို့ တပ်မက်ခြင်းနောက်သို့ လိုက်ပါသွားကြရမည့်အကြောင်းနှင့် ဒုတိယအချက်မှာ ရှင်ပေါလုနှင့် တိမောသေတို့ ခွဲခွာသွားကြရမည့်အချိန် နီးကပ်လာသည့်အကြောင်း ဖြစ်သည်။

နောင်ကာလ၌ လူတို့သည် စင်ကြယ်သော ဩဝါဒကို နားမခံနိုင်ကြမည့်အကြောင်း နှုတ်ကပတ်တော်ကို ပစ်ခွါကြမည့်အကြောင်း တမန်တော်ကြီးက ကြိုတင်ပြေးမြင်သည်။ ပညာရှိစကားသည် ပြေးကြည့်စရာမလို။ သမ္မာစကားကို နားထောင်ချင်ကြတော့မည်မဟုတ်။ အခြားသူများမှ ပေါ့သွပ်သော တရားကိုသာ နားထောင်၍ ထိုသူများနောက်သို့ လိုက်သွားကြရမည်။

: ကြားသိချင်ကြသောစကားမှာ ဒဏ္ဍာရီပုံပြင် စကားများဖြစ်သည်။ ထိုသို့ ပြောင်းလဲခြင်းသည် အဆိုးဘက်သို့ ယုတ်လျော့ခြင်းဖြစ်သည်။ ပုံပြင်ဒဏ္ဍာရီများ ကိုးကွယ်ခြင်း ဖြစ်သွားသည်။ သမ္မာတရားကို ငြင်းပယ်ခြင်းသည် ဆိုးသော လက်ဆောင်ရရှိရာဖြစ်သည်။

: အရာရာ၌ သမာသတိရှိခြင်း ဆိုသည်မှာ အရာရာ၌ တည်ငြိမ်ရင့်ကျက်ခြင်းဖြစ်သည်။ အလုပ်ကြိုးစားရာတွင် ချိန်ခွင်လျှာညီနေရမည်။ ဆင်းရဲဒုက္ခကို ရှောင်ကြဉ်စရာ မလိုသော်လည်း ထိုဆင်းရဲဒုက္ခနှင့် အမှုတော်ကို ချင့်ချိန်ရမည်။

ဓမ္မဆရာပြုရသော ဝတ်ကို အကုန်အစင်ပြုလော့ ဟု ဆိုရာတွင် အယူအဆ ကွဲပြားစရာအကြောင်း ရှိသည်။ အချို့က တိမောသေသည် ဧဝံဂေလိဆရာဟု ယူဆကြသည်။ ရှင်ပေါလုက ဤနေရာတွင် နားလည်အောင်ပြောခြင်းဖြစ်သည်။ တိမောသေသည် ဧဝံဂေလိဆုကျေးဇူးရရှိသူ မဟုတ်၊ အမှုတော်ဆောင် သို့မဟုတ် သင်ဆရာသာဖြစ်သည်ဟု ဆိုကြသည်။ စင်စစ်တွင် တိမောသေသည် ဧဝံဂေလိဆရာဖြစ်သည်။ ပေါလုက ပုံဥပမာပေး၍ တိုက်တွန်းအားပေးခြင်းသာ ဖြစ်သည်။

မည်သို့ပင်ဖြစ်စေ ရရှိထားသော ဆုကျေးဇူးကို အိတ်သွန်ဖာမှောက် အကုန်အစင် အသုံးချသည်။

: ဒုတိယအချက်မှာ ပေါလု သေပွဲဝင်ရမည့်အကြောင်း ဖြစ်သည်။ ယဇ်ပလ္လင်ပေါ်မှာ လောင်းရသောအချိန် ရှိပြီဟု ဆိုထားသည်။ သူ့သွေးများသည် မာတုရသွေးအဖြစ် ယဇ်ပလ္လင်ပေါ်မှာ လောင်းရမည်။ (ထွ ၂၉:၄၀၊ တော၁၅:၁-၁၀ ကိုကြည့်)။ ရှင်ပေါလုသည် သူ့အသွေးသွန်းလောင်းရမည့် အကြောင်းကို (ဖိ ၂:၁၇)တွင် ထိုအကြောင်းကို Hiebert က “သူ့ဘဝအသက်တာတစ်ခုလုံးကို ယဇ်ကောင်အဖြစ် ဘုရား၌ အပ်နှံထားသည်။ သူ့အသွေးကို နောက်ဆုံးအကြိမ်သွန်းလောင်းသည်။ ပြည့်စုံသော ပူဇော်သက္ကာ ဖြစ်ပါသည်”၃၀ ဟုဆိုသည်။

စုတေရသောအချိန်ရောက်လေပြီ ဟု ဆိုသည်။ (ဂရိ ဝေါဟာရ analusis သည် အင်္ဂလိပ် ဝေါဟာရ analysis ဖြစ်သည်) ပေါလု၏စကားကို လေ့လာရာတွင် ပုံရိပ်(၄)မျိုးတွေ့ရသည်။ (၁)ဖြေလွှတ်ခြင်း လှေသမားများ လက်သုံးစကားဖြစ်၍ ချည်တိုင်မှ ကြိုးဖြေလွှခြင်း ဖြစ်သည်။ (၂)လယ်ယာခွင် စကားလုံးလည်း ဖြစ်သ်ည။ ထမ်းပိုးတပ်ထားသော တိရစ္ဆာန်များ ပင်ပန်းကြီးစွာ တစ်နေကုန် လုပ်ဆောင်ပြီးမှ ထမ်းပိုးချွတ်၍ အနားပေးခြင်း ဖြစ်သည်။ (၃) ခရီးသည်များ သုံးသော စကားလုံးလည်း ဖြစ်သည်။ ညအိပ်ရပ်နားဖို့ တဲထိုးကြသည်။ နောက်တစ်နေ့ ခရီးဆက်သောအခါ ထိုတဲကိုဖြုတ်သိမ်းရသည်။ (၄) ဒဿန ဆန်ဆန်ပြောရလျှင် ပြဿနာချုပ်ငြိမ်းခြင်း ဖြစ်သည်။ တမန်တော်ကြီး၏ ကြွယ်ဝသော အသက်တာ ရင့်ကျက်သော ဒဿနကို တွေ့မြင်ကြမည်။

: ပေါလု၏ ကြွေးကြော်သံကို တွေ့ရသည်။ ပြီးမြောက်အောင် မတိုက်လှန်နိုင်သော်လည်း တိုက်လှန်ခဲ့သည်။ ယခုလည်း တိုက်လှန်နေသည်။ ယုံကြည်ခြင်း၌ တိုက်လှန်နေသည်။ ရှိသမျှ ခွန်အားကို ထုတ်သုံးသည်။ တိုက်လှန်ခြင်းဆိုသည်မှာ လက်နက်ကိုင် တိုက်ခိုက်ခြင်းကို မဆိုလိုပါ။ ယှဉ်ပြိုင်ခြင်း ဖြစ်သည်။

ပေါလုစာအတိုင်း သေခြင်းသည် သူ့လက်ထဲသို့ ရောက်နေပြီ။ ပန်းတုံးတိုင်အောင် ပန်းဝင်နေပြီ။

ပေါလုသည် ယုံကြည်ခြင်းကို စောင့်ထိန်းသည်။ ထိုသို့ သက်ဆုံးတိုင် ယုံကြည်နာခံခြင်းသာ မကပါ။ အစေခံပီပီ သမ္မာတရားကို စောင့်ထိန်းပြီး တစ်ပါးသူများသို့ မူရင်းအတိုင်း စင်ကြယ်စွာ လက်ဆင့်ကမ်းပေးသည်။

: သစ္စာရှိစွာ ဆက်ကပ်ခဲ့သောကြောင့် ထိုနေ့ရက်၌ ဓမ္မသရဖူလက်ဆောင်ရမည့် အကြောင်း ပေါလု မျှော်လင့်သည်။

သခင်ဘုရားသည် ဖြောင့်မတ်မှန်ကန်စွာ စီရင်သည့်အတိုင်း ဟု ဆိုထားသည်။ ထိုစကားသည် ပြစ်မှုတရားသူကြီးက စီရင်ဆုံးဖြတ်ချက်မျိုး မဟုတ်ပါ။ အားကစားပြိုင်ပွဲတွင် ဆုံးဖြတ်စီရင်ခြင်းမျိုး ဖြစ်သည်။ သခင်ဘုရားသည် လောကတရားသူကြီးကဲ့သို့မဟုတ်။ အလုံးစုံကို သိမြင်တော်မူသော အရှင်ဖြစ်သည်။ လူ့မျက်နှာကို မကြည့်ပါ။ တောင်းသည့်အတိုင်း ဆုံးဖြတ်ပေးသည်။ မျက်နှာလိုက်ခြင်း မရှိ။ ထိရောက်စွာစီရင်သည်။

ဓမ္မသရဖူ ဆိုသည်မှာ ယုံကြည်သူများ ဖြောင့်မတ် စင်ကြယ်သည့်အတိုင်း ချီးမြှင့်သော လက်ဆောင်ဖြစ်သည်။ အမှန်စင်စစ်တွင် ခရစ်တော်ပေါ်ထွန်းသည့် အခါ ယုံကြည်သူတိုင်း၊ သစ္စာရှိသူတိုင်းအား ချီးမြှင့်မည့်ဆုဖြစ်သည်။ ခရစ်တော်ကြွလာခြင်းကို မျှော်လင့်၍ အလင်းထဲ၌ မွေ့လျော်၍ ဖြောင့်မတ်စင်ကြယ်သူတိုင်း ရရှိသည်။ ဤနေရာတွင် ယုံကြည်သူသည် အသက်တာ၌ စင်ကြယ်သူများအား ခရစ်တော်ဘုရား ဒုတိယအကြိမ်ကြွရောက်လာမည့်အကြောင်းကို ထပ်မံနှိုးဆော်ထားသည်။

၄။ ပုဂ္ဂိုလ်ရေးမေတ္တာရပ်ခံချက်နှင့် မှတ်ချက် (:၂၂)

          : ပေါလုသည် အသက်အရွယ်အိုမင်းလာသောကြောင့် အဖိုးကြီးများ ထုံးစံအတိုင်း သခင်ဘုရား၌ ညီတော်အား သတိရ၍ ရောမသို့ လာရောက် တွေ့ဆုံမည့်အရေးကို ငံ့လင့်သည်။ ရောမအကျဉ်းထောင်ထဲမှ အထီးကျန် နေ့ရက်များကို ငြီးငွေ့သည်။

:၁၀ ခရစ်ယာန်အသက်တာတွင် ဆိုးရွားသော အပြစ်မှာ လုပ်ဖော်ဆောင်ဖက်များ လက်တွဲဖြုတ်ခြင်း ဖြစ်သည်။ ဒေမသည် ပေါလု၏ မိတ်ဆွေကောင်း လုပ်ဖော်ဆောင်ဖက် ဖြစ်ခဲ့သည်။ ယခုကာလတွင် ပေါလုသည် ထောင်နန်းစံလျက် ညှဉ်းဆဲခြင်းခံနေရသည်။ ရာသီဥတုကလည်း ခရစ်ယာန်များ၏ ကျန်းမာရေးကို ဒုက္ခပေးနေသည်။ ဒေမသည် သခင်ဘုရားပေါ်ထွန်းလာမည့်အကြောင်းကို မျှော်လင့်မည့်အစား လောကအရာကို သံယောဇဉ်ညှိတွယ်သောကြောင့် ပေါလုကို စွန့်ခွာကာ သက်သာလောနိတ်သို့ ထွက်သွားသည်။ သို့သော် ဒေမ၏ ခရစ်ယာန် လုပ်စားခြင်း၊ အယူမှားခြင်းကို ဖော်ပြလိုခြင်းမဟုတ်ပါ။ စစ်မှန်သော ယုံကြည်သူ မဟုတ်ခြင်းကိုလည်း မဖော်ပြလိုပါ။ ဖောက်ပြန်ခြင်းကို နှမြောတသစွာ တမ်းတခြင်းသာဖြစ်သည်။

ဂလာတိသို့ ကရက္ကေသွားကြောင့်နှင့် ဒါလမာတိသို့ တိတုသွားကြောင်းကိုလည်း ထည့်ပြောသည်။ ထိုသို့ ခရီးသွားကြခြင်းသည် အပြစ်ရှာပြေခြင်းမဟုတ်။ အမှုတော်အတွက်သွားခြင်း ဖြစ်၍ ဂုဏ်ယူခြင်း ဖြစ်သည်။ ကျမ်းစာ၌ ကရေက္ကေ၏ နာမည်ကို ဤတစ်နေရာတွင်သာ တွေ့ရသည်။ (ကုရေက္ကေ၏ အဓိပ္ပါယ်မှာ ကြီးထားခြင်းဟု အနက်ရသည်) သူ့အကြောင်း တခြားနေရာတွင် မတွေ့ရပါ။ ဤအချက်သည် ယုံကြည်သူများကို ခွန်အားပေးခြင်း ဖြစ်သည်။ အသက်တာတွင် နှိမ့်ချခြင်း  ရှိသူသည် ပတ်ဝန်းကျင်က အသိအမှတ်မပြုလျှင် သခင်ဘုရား၌ ဆုမရဘဲ မနေကြောင်း တိုက်တွန်းအားပေးခြင်း ဖြစ်သည်။

:၁၁ မိတ်ဆွေကောင်း ဆေးဆရာ လုကာတစ်ဦးတည်းသာ ရောမသို့သွား၍ ပေါလုအား တွေ့ဆုံအားပေးသူရှိသည်။ ဝိညာဉ်တော်နှင့် ပြည့်စုံသော ဆေးဆရာ၏ အားပေးမှု လူမှုရေး နားလည်မှုသည် တမန်တော်အတွက် အဘယ်မျှ ကြီးမားပါသနည်း။

ကျေးဇူးတရား၏ကြီးမားပုံကို ငယ်၁၁တွင် တွေ့ရသည်။ အားနည်းသူများအား ကျေးဇူးပြုခြင်းသည် အလိုတော်နှင့် ညီ၍သခင်ဘုရားက အခြားသူများအပေါ် ပြုစေခိုင်းချက်ဖြစ်သည်။ မာကုသည် ဗာနဗ ပေါလုနှင့် အတူ ပထမဦးဆုံး လက်တွဲ၍ သာသနာခရီး ဆန့်ကြသည်သူများ ဖြစ်သည်။ ယခုအခါတွင် ပါဂါသို့ အိမ်ပြန်နေသည်။ ဒုတိယခရီးစဉ်တွင်မူ မာကုအား မခေါ်ဆောင်ပါ။ အဘယ်ကြောင့်ဆိုသော် ယခင်တစ်ခေါက်က ထိုလူငယ်လူရွယ် အပြုအမူကြောင့် ဖြစ်သည်။ ပေါလုနှင့်သိလတို့ ဆီးရီးယာနှင့် စီလီယာသို့ ထွက်သွားကြသည်။ ယခုပေါလုနှင့် မာကု ငြိမ်းချမ်းရေးရသောအခါ မာကုသည် အမှုတော်မြတ်၌ အသုံးဝင်မည့်သူဖြစ်ကြောင့် ပေါလုက တမ်းတနေပြန်သည်။

:၁၂ ရှင်ပေါလုက ဧဖက်ရှိ တိမောသေအား စာရေး၍ လူလွှတ်ခေါ်လိုက်သည်။ တိမောသေမရှိသည့် အချိန်တွင် ဟုခတ်အား ဧဖက်တွင်ရှိနေသည်။ ထိုသို့ စေလွှတ်ခြင်းမှာ ဧဖက်တွင် ဟုခတ်အမှုတော်ထမ်းဆောင်ရန် ပေါလု၏ ရည်ရွယ်ချက် ဖြစ်သည်။

:၁၃ ဝတ်လုံဆိုသည်မှာ အပေါ်အင်္ကျီ သို့မဟုတ် ကျမ်းစာအုပ် ထည့်စရာ အိတ်ဖြစ်သည်။ ဤနေရာတွင် စာအုပ်နှင့် သားရေစက္ကူ၃၁ အကြားအငြင်းပွားစရာမရှိပါ။ ပေါလု၏ စာများလား။ ကျမ်းစာလား၊ ပေါလုကို စုံစမ်းစစ်ကြောနိုင်သည့် စာများလား၊ စာရေးရန် သားရေစက္ကူများလား။ အတိအကျ မပြောနိုင်ပါ။ နားလည်ရမည့်အချက်မှာ ရေးဖို့မှတ်ဖို့၊ ထိန်းသိမ်းဖို့ လိုအပ်သော စာရွက်စာတန်းများဖြစ်သည်။

သမ္မာရေးရာတွင် အရေးမပါအရာမရောက်သော်လည်း စိတ်ပါဝင်စားဖွယ်ရာတစ်ခုဖြစ်သည်။ F.W.Newman ၏ညီငယ်က JN Darby ကို တစ်ခါက ဤအကြောင်းမေးဖူးသည်။ ဤကျမ်းစာပါ အကြောင်းအရာသည် အရေးမကြီးဟု ယူဆလျှင် ခဏတဖြုတ်သာ အသုံးဝင်သည်ဟု ဆိုရမည်လား။ အကယ်၍ ပေါလုလက်ရာများသာ မရှိခဲ့လျှင် အရာခပ်သိမ်း ဆုံးရှုံးနိုင်သည်ဟု ဆိုသည်။ Darby က ကောက်ကာငင်ကာ ထဖြေသည်မှာ “ဤကျမ်းပိုဒ်လေးကြောင့် ကျွန်တော့်စာကြည့်တိုက် မရောင်းဖြစ်တာပါ။ စကားလုံးတိုင်းသည် ဝိညာဉ်တော်အားဖြင့် အမှုတော်မြတ်၌ ထာဝရ စကားပြောနေသည်။၃၂ ဟု တုံ့ပြန်သည်။

:၁၄ ပန်းတိမ်သမား အာလေဇန္ဒြုအကြောင်းကို (၁တိ ၁:၂)တွင် ယုံကြည်ခြင်း သင်္ဘောပျက်၌ တွေ့ရသည်။ တမန်တော်ကြီးကို ဒုက္ခပေးသူဖြစ်သည်။ သူ၏ ဆိုးဝါးသော ဇာတိရုပ်ကို မြင်ယောင်နိုင်သည်။ အာလေဇ္ဒြုသည် တမန်တော်ကြီးအား မိစ္ဆာပရောဖက်များနှင့် ထိပ်တိုက်ရင်ဆိုင်သူဖြစ်သည်။ Conybeare နှင့် Howson က “ပန်းတိမ်သမား အာလေဇန္ဒြုက ငါ့ကို မကောင်းမှုများစွာပြုခဲ့သည်” ဟု ဆုကြသည်။ ယေရှုက ထိုသူအား အကြွေးဆပ်ပေးမည်ဟု တမန်တော်ကြီးက ယုံကြည်သည်။

:၁၅ ရောမသို့ တိမောသေရောက်လာမည့်အကြောင်း မျှော်လင့်နေသည်။ တိမောသေကိုလည်း အာလေဇ္ဒြုကိုကြည့်ပေါင်းရန် သတိပေးထားသည်။ သို့မဟုတ်လျှင် ထိုလူဆိုး၏ လက်ချက်မိနေမည်။ အာလေဇန္ဒြုသည် ရှင်ပေါလု၏ စကားကို လူသိရှင်ကြား ဆန့်ကျင်ပုန်ကန်သူ မဟုတ်ပါ။

:၁၆ ပေါလုသည် ဖြတ်သန်းလာသော အတိတ်၏ နေ့ရက်ကာလကို ပြန်လည်ဆင်ခြင်သည်။ ပထမ အချိန်၌ အပြစ်တင်ခွင့်ကို ဖြေခြင်းဆိုသည်မှာ သူ၏ နောက်ဆုံးစုံစမ်းစစ်ကြောခြင်းကို ဆိုလိုသည်မှာ သူ၏ နောက်ဆုံးစုံစမ်းစစ်ကြောခြင်းကို ဆိုလိုသည်။၃၃ အသက်တာပြောင်းလဲ၍ တမန်တော်ဘဝသို့ ပြောင်းလဲကြောင်းကို နှုတ်တစ်ခွန်း စာတစ်လုံး မည်သူကမှ သက်သေမထူကြခြင်းကို ဆင်ခြင်အောက်မေ့သည်။ မည်သူမှ မရပ်တည်ပေးကြပါ။ ထိုသို့သော ခါးသီးမှုများကို ဗွေမယူ။ အားလုံး မေ့ပစ်လိုက်သည်။ သူ့ရှေ့မှာ ရပ်တည်နေသော သခင်ဘုရားကဲ့သို့ပင် ထိုသူများအား အပြစ်မမြင်၊ ခွင့်လွှတ်ပါသည်။

:၁၇ လူများက စွန့်ပစ်ကြသော်လည်း သခင်ဘုရားက ရပ်တည်ပေးသည်။ ထို့ကြောင့် တရားပေးသော ခွန်အားဖြင့် သတင်းကောင်းများကို လိုက်လံဟောပြောသည်။ ဟောပြောသော ဒေသနာစကားများသည်လည်း အဟန့်အတားမရှိ၊ တပါးအမျိုးသားများသို့တိုင်အောင် ကယ်တင်ခြင်း ရကြသည်။ ထိုအကြောင်းကို Stock Marvel က ဤသို့ဆိုသည်။

တပါးအမျိုးသားတို့ ရောမတို့တွင် မည်သည့်ကြိတ်ကြိတ်ထိုး ထူးဆန်းချက်ပြုကြသနည်း။ ယေရှုသည် လူသားများအား ကယ်တင်ရှင်အဖြစ် ကားတိုင်၌ အစေခံတော်မူကြောင်း ဘုရားသခင်က သတင်းစကား ပြောပါသည်။ စိတ်ကူးယဉ်အိပ်မက်သည် အကောင်အထည်ဖြစ်လာပြီ။ လူ့သမိုင်းမှတ်တိုင်တွင် မော်ကွန်းထူခဲ့ပြီ။ ထာဝရကာလအတွက် အဘယ်မျှ အကျိုးကျေးဇူးကြီးပါသနည်း။၁၄

ထိုခွန်အားနှင့် ပြည့်စုံသော မင်္ဂလာသတင်းစာသည် ဤကျမ်းပိုဒ်တစ်ခုတွင်သာ မဟုတ်ပါ။ ဓမ္မသစ်ကျမ်းစာတွင် (၈)ကြိမ်တိုင်တိုင် တွေ့ရပါသည်။ ပေါလုသည် အမှုတော်ကို စတင်ထမ်းဆောင်ချိန်တွင် “ငါ့ကိုခွန်အား ဖြစ်စေတော်မူသော” ဟု (တ၉:၂၂)၌လည်း ရေးထားပါသည်။ တဖန် ထိုစကားကို ထပ်သုံးထားသည်။ သို့သော် နိဒါန်းမဟုတ်၊ နိဂုံးစကားဖြစ်သည်။ တမန်တော်ကြီး၏ အမှုတော်၌ ခွန်အားရစေသော အရာကို ထပ်မံဖော်ကျူးထားခြင်းဖြစ်သည်။

ခြင်္သေ့ခံတွင်းမှ ကယ်နှုတ်ချမ်းသာကို ငါရ၏ဆိုလိုခြင်းမှာ သေဒဏ်ချက်ချင်း မခံရဘဲ အသက်ရှင်ခြင်းကို ဆိုလိုသည်။ သို့သော် ညှဉ်းပန်းနှိပ်စက်ခြင်း ခံနေရာကြသည်။ အသက်အန္တရာယ်က ခဏတဖြုတ် မျက်စိမှိတ်ခြင်းဖြစ်သည်။ ခြင်္သေ့ဟူသော တောရိုင်းတိရစ္ဆာန်မှာ နေရူးဘုရင်ကို ရည်ညွှန်ခြင်း ဖြစ်သည်။ သို့သော် အန္တရာယ်ကို ရည်ညွှန်းခြင်းဖြစ်သည်။ သို့သော် အန္တရာယ်စက်ကွင်း၌ ရောက်နေကြောင်းကို ဖော်ပြထားသည်။

:၁၈ ထိုမျှမက သခင်ဘုရားသည် မကောင်းသောအမှုရှိသမျှတို့မှ ငါ့ကိုပယ်နှုတ်၍ ဆိုခြင်းမှာ ကြုံတွေ့နေရသော အသက်ဘေးအန္တရာယ်မှ ကယ်နှုတ်သည်ဟု ဆိုလိုခြင်းမဟုတ်။ သေမည့်အချိန်သည် အလွန် နီးကပ်ကြောင်း ရှင်ပေါလုသိနေသည် (ငယ်၆)။ ထိုသို့ဆိုလျှင် ဘာကိုဆိုလိုသနည်း။ မကောင်းသောအမှု အရာတုန့်ပြန်ခြင်းမှ ကွယ်ကာကြောင်း ဆိုလိုပါသည်။ နာမတော်ငြင်းပယ်ခြင်း၊ သူရဲဘောကြောင်ခြင်း၊ စိတ်ဓာတ်ကျခြင်း၊ ယုံကြည်မှု စကားရုတ်သိမ်းခြင်းတို့ မရှိအောင် လုံခြုံစေသည်ဟု ဆိုလိုပါသည်။

          ထို့အပြင် ကောင်းကင်နိုင်ငံတော်သို့ ပို့ဆောင်မည်ဟုလည်း ယုံကြည်သည်။ ကောင်းကင်နိုင်ငံတော် ဆိုသည်မှာ ဤကမ္ဘာမြေပေါ်၌ ခရစ်တော်အုပ်စိုးမည့် အနှစ်တစ်ထောင် အုပ်စိုးခြင်းကာလမဟုတ်။ သခင်ဘုရားနှင့် အလုံးစုံ သိကျွမ်းရင်းနှီးကြရာ ကောင်းကင်ဘုံ ဖြစ်သည်။

တမန်တော်ကြီးက ဘုရားသခင်သည် ကမ္ဘာအဆက်ဆက် ဘုန်းကြီးပါစေသတည်းဟု ရင်ထဲအသဲထဲမှ လှိုက်လှိုက်လှဲလှဲ ချီးမွမ်းပါသည်။ ကမ္ဘာအဆက်ဆက်ဆိုသည်မှာ  ကာလစဉ်ဆက်မပြတ် ဖြစ်သည်။ ကမ္ဘာအဆက်ဆက်ဟူ သောစကားလုံးသည် ဂရိဘာသာ စကားတွင် အချိန်ကာလ ကုန်ဆုံးခြင်းမရှိ၊ နိစ္စတာဝရဟု အနက်ရသည်။ လူ့အနေဖြင့် အချိန်ကန့်သတ်ချက် မရှိခြင်းကို နားမလည်နိုင်သော်လည်း အချိန်၏အတိုင်းအတာပမာဏ ပြသခြင်းဖြစ်သည်။

:၁၉ ပေါလု၏ သာသနာခရီးစဉ်တွင် ဧည့်ဝတ်ပျူငှာကြသော ပြစ်ကိလနှင့် အာကုလဇနီးမောင်နှံကိုလည်း နောက်ဆုံးအကြိမ်အဖြစ် နှုတ်ဆက်ခဲ့သည်။ ကောရိန္သု သို့မဟုတ် ခရီးစဉ်တွင် တွေ့ဆုံခြင်း ဖြစ်၍ ဧဖက်သို့ ခရီးလိုက်ပါသူများ ဖြစ်သည်။ ရောမတွင်လည်း ပေါလုနှင့်အတူ ခဏတဖြုတ် တဲလုပ်ကြသည်။ (ရော ၁၆:၃)

ဩနေသိဖော် အကြောင်းကို ၁:၁၆ တွင် ရေးပြီးဖြစ်သည်။ တမန်တော်ကြီးအား အမြဲတမ်း ခွန်အား ပေးသူဖြစ်၍ ထောင်ဝင်စာ တွေ့သူလည်း ဖြစ်သည်။

:၂၀ ဧရတ္တုသည် ကောရိန္သုအသင်းတော်မှ ဘဏ္ဍထိန်း ဖြစ်ဟန်ဟူသည်။ (ရော ၁၆:၂၃)

တရောဖိမ်သည် ဧဖက်အသင်းတော်မှ ပြောင်းလဲသူဖြစ်၍ တမန်တော်ကြီးနှင့်အတူ ယရုရှလင်သို့ လိုက်ပါသည်။ သူ့အကြောင်းကို (တ၂၀:၄နှင့် ၂၁:၂၉)တွင် ရေးထားပါသည်။ တရောဖိမ်ကို ဗိမာန်တော်သို့ ပေါလုခေါ်ဆောင်မည်ဟု ယုဒများက ထင်ကြသည်။ မိလက်မြို့၌ ချန်ထားခဲ့ကြောင်း တွေ့ရသည်။ ဤနေရာတွင် အရေးကြီးသော သင်ခန်းစာရှိပါသည်။ ရှင်ပါလုသည် အနာရောဂါကင်းလွန်ခြင်း တန်ခိုးရရှိထားသော်လည်း နေမကောင်းသော တရောဖိမ်ကို ကျန်းမာအောင် မပြုခြင်းမှာ သူ့ဝိညာဉ်ဆုကျေးဇူးကို နေရာတကာတွင် မသုံးပါ။ အံ့ဩဖွယ်ရာ နိမိတ်လက္ခဏာများသည် ယုံကြည်သူများ အတွက်မဟုတ်ပါ။ မယုံကြည်သူများ ယုဒများအား ဧဝံဂေလိတရား သိရှိဖို့ သုံးသော ဝိညာဉ်လက်နက်ဖြစ်သည်။

:၂၁ မည်သို့ပင် ခရီးကြမ်းတမ်း ခက်ခဲပါစေ ဆောင်းရာသီမရောက်ခင် အရောက်လာစေချင်သည်။ ထောင်သားက မိတ်ဆွေများအား လွမ်းဆွေးတသခြင်း ဖြစ်သည်။ တိမောသေအား အမြန်လာဖို့ ထပ်မံ နှိုးဆော်ခြင်း ဖြစ်သည် (၁:၃၊ ၄:၉ ကိုကြည့်ပါ)။

ဥဗုလု၊ ပုဒေ၊ လိနုနှင့် ကလောဒိများကိုလည်း နှုတ်ဆက်သည်။ ထိုသူများ၏ အမည်ကို ကျမ်းစာတွင် အနည်းငယ်သာပါရှိသည်။ Rodger က “ခရစ်ယာန်များ၏ အထူးပျော်ရွှင်ခြင်း အခွင့်အရေးမှာ ရင်းနှီးချစ်ခင်စွာ တစ်ဦးနှင့်တစ်ဦး ဆက်ဆံပေါင်းသင်းခြင်း ဖြစ်သည်” ဟု ဆိုသည်။

:၂၂ ရှင်ပေါလုက တိမောသေအား သခင်ယေရှုသည်၃၅သခင်၏ စိတ်ဝိညာဉ်နှင့်အတူ ရှိတော်မူပါစေသောဟု နောက်ဆုံးပိတ်နှုတ်ဆက်သည် ဤစာဖတ်ရှုသောအချိန်တွင် သင်၌ ကျေးဇူးတော်ရှိ စေသတည်း၊ အာမင် ဟု အမည်တပ်လိုက်သည်။

ဤနေရာတွင် စာဆုံးသွားသည် ကလောင်လည်းတုံးသည်။ ရှင်ပေါလု၏ အမှုတော်ဆောင် လုပ်ငန်းလည်း နိဂုံးချုပ်သွားသည်။ သို့သော်လည်း တမန်တော်ကြီး၏ အသက်တာ ဆက်ကပ်ပုံနှင့် သက်သေခံချက်များသည် ယနေ့ထက်တိုင်အောင် အသက်ရှင်မွှေးကြိုင်နေဆဲ။ သူနှင့်ဆုံတွေ့သောအခါ ဧဝံဂေလိ သတင်းကောင်းနှင့် အသင်းတော်အကြောင်း ကို ထပ်မံပြောကြပါစို့။

မှတ်စု

၁။        (၁:၁) W.E.Vine, Exposition of Epistles to Timothy, pp.60,61.

၂။         (၁:၂) D Edmond Hiebert, Second Timothy, p.26.

၃။        (၁:၃) ဂရိဝေါဟာရ Latreuò မှ latreia ဆင်းသက်၍ “Worship” ဟု အနက်ရသည်။ (cf အင်္ဂလိပ် “mariolartry” နှင့်ယှဉ်ဖတ်၊ adoration of Mary)။

၄။        (၁:၄) Hiebert, Second Timothy p.31.

၅။        (၁:၅) ဂရိတို့အတွက် ‘genuine’သည် ‘un-hypocritical’ ဖြစ်သည်။ hypocrite သည် ပြဇာတ်များတွင် မျက်နှာဖုံး hupo ကိုစွပ်လျက် သရုပ်ဆောင်သူ ဖြစ်သည်။

၆။        (၁:၆) Vine, Exposition, under the verses listed.

၇။        (၁:၁၁) (NU)ကျမ်း၌ “of the Gentiles” ကို ခြွင်းချန်ထားသည်။

၈။        (၁:၁၆) J.H.Jowett. Things that Matter Most,p.161.

၉။        (၂:၃) NU ၌ “Share”ဟု တွေ့ရသည်။

၁၀။      (၂:၄) William Kelly, An Exposition of the Two Epistles to Timothy, p.213.

၁၁။      (၂:၇) အရေးပါသော NU ကျမ်းမူ၌ “The Lord will give you” ဟု ရေးသည်။

၁၂။      (၂:၈) Hiebert, Second Timothy, p.59.

၁၃။      (၂:၉) D.Edmond Hiebert ၏ Second Timothy ၌ ကောက်နုတ်ချက်။ p.60.

၁၄။      (၂:၁၀) Anne Rose Cousin စပ်ဆိုသော ချစ်စဖွယ်သီချင်း Immanuel’s Land ဖြစ်သည်။ သို့သော် S. Rutherford ထံမှ စာသားများကို တပိုင်းတစ်စကူးယူထားခြင်းဟု ဆိုကြသည်။

၁၅။      (၂:၁၁) Hiebert, Second Timothy, p.62.

၁၆။      (၂:၁၃) Dinsdale T.Young, Unfamiliar Texts, p,253.

၁၇။      (၂:၁၃) J.J.Van Oosterzee, “The pastoral Letters,” Lange’s Commentary on the Holy Scripture, XI:95.

၁၈။      (၂:၁၄) Dinsdale T.Young, The Enthusiasm of God. p.154.

၁၉။      (၂:၁၅) Henry Alford, The Greek Testiment, III:384.

၂၀။      (၂:၁၇) ဂရိဝေါဟာ gangraina ကို ပြန်ဆိုခြင်း ဖြစ်သည်။ သို့သော် အကောင်းဆုံးပြန်ဆိုချက် မဟုတ်။ အင်္ဂလိပ်ပြန်ဆိုချက်က သာ၍ကောင်းသည်။

၂၁။      (၂:၁၈) Hamilton Smith, The Second Epistle to Timothy, p.26.

၂၂။       (၂:၁၉) Smith, Ibid.

၂၃။      (၂:၁၉) R.C.H.Lenski, The Interpretation of St.Paul’s Epistles to The Colossians, Thessalonians, Timothy, TItus and Philemon, p.804.

၂၄။      (၂:၁၉) NU ကျမ်းနှင့် M ကျမ်းမူနှစ်ခုစလုံးက “Christ” အစား “Lord” ကိုသုံးသည်။ သသို့အားဖြင့် တောလည်ရာ ၁၆:၅ ကိုရည်ညွှန်းရာ ရောက်သည်။

၂၅။      (၂:၂၂) Hiebert, Second Timothy, p.76.

၂၆။      (၃:၅) Hibert, Ibid. p.86.

၂၇။      (၃:၁၆) ဂရိစကားလုံးမှာ “theopneutos” ဖြစ်သည်။

၂၈။      (၃:၁၇) Lenski, Epistle. p.841.

၂၉။      (၄:၁) အရေးပါသောကျမ်းများက ‘Kata’ အစား ‘Kai’ ကို အသုံးပြုသည်။ စကားဆက် “နှင့်” ‘and’ ပင် ဖြစ်သည်။

၃၀။      (၄:၆) Hibert, Second Timothy. pp.109-110.

၃၁။      (၄:၁၃) ဂရိစကားလုံး “Membranas” ဖြစ်သည်။ ဤစာစောင် စာလိပ်များ mss မှာ ပေါလု၏ သမ္မာကျမ်းအနက်ဖွင့်များ ဖြစ်နိုင်ဖွယ်ရှိသည်။

၃၂။      (၄:၁၃) Quoted by H.A.Ironside Timothy, Titus and Philemon, p.255.

၃၃။      (၄:၁၆) ရှင်ပေါလု ပထမထောင်အကျဉ်းကျချိန် အဆုံးပိုင်းကာလဖြစ်သည်။

၃၄။      (၄:၁၇) Eugene Stock, Plain Talks on the pastoral Epistles, စာမျက်နှာမသိ။

၃၅။      (၄:၂၂) NU ကျမ်းက Jesus Christ ကို ဖြုတ်ချန်ထားသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက  http://bbcmm.net/the-believers-bible-commentary  တွင် လေ့လာနိုင်ပါသည်။

[post-views]

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။