2 Kings -9 -

ဓမ္မရာဇဝင်စတုတ္ထစောင် - ၉

ယေဟုအားဣသရေလဘုရင်အဖြစ် ဘိသိက်ပေးခြင်း

1ထိုအခါပရောဖက်ဧလိရှဲသည် ပရောဖက်အမျိုးသားတစ်ယောက်ကို ခေါ်၍၊ သင်၏ခါးကို စည်းလော့။ ဤဆီဘူးကိုယူ၍ ဂိလဒ်ပြည် ရာမုတ်မြို့သို့ သွားလော့။ 2ရောက်သောအခါ၊ နိမ်ရှိသား ယောရှဖတ်၏သားယေဟုကိုရှာ၍ သူ့ထံသို့ဝင်လျက်၊ သူ့ကို သူ၏အပေါင်းအဖော်စုထဲက ထွက်စေ၍၊ အတွင်းအခန်းထဲသို့ခေါ်ပြီးလျှင်၊ 3ဤဆီဘူးကိုကိုင်၍ သူ၏ခေါင်းပေါ်၌ ဆီကိုလောင်းလျက်၊ ထာဝရဘုရားက၊ ငါသည်သင့်ကို ဣသရေလရှင်ဘုရင်အရာ၌ ခန့်ထား၍ ဘိသိက်ပေးသည်ဟု မိန့်တော်မူကြောင်းကို ဆင့်ဆိုပြီးမှ၊ တံခါးကိုဖွင့်၍ မဆိုင်းမလင့်ဘဲပြေးလော့ဟု မှာထားလေ၏။ 4ထိုပရောဖက်အမျိုးသား လုလင်သည် ဂိလဒ်ပြည် ရာမုတ်မြို့သို့သွား၏။ 5ရောက်သောအခါ၊ ဗိုလ်မင်းတို့သည် အတူထိုင်လျက်ရှိကြ၏။ ပရောဖက်က၊ အိုဗိုလ်မင်း၊ ကိုယ်တော်အား ပြောစရာရှိသည်ဟု ဆိုလျှင်၊ ယေဟုက၊ ငါတို့အပေါင်းတွင် အဘယ်သူအားပြောစရာရှိသနည်းဟု မေးသော်၊ အိုဗိုလ်မင်း၊ ကိုယ်တော်အား ပြောစရာရှိသည်ဟု ပြန်ဆို၏။ 6ထိုအခါ ယေဟုသည် ထ၍အိမ်ထဲသို့ဝင်သဖြင့်၊ ပရောဖက်သည် သူ၏ခေါင်းပေါ်၌ ဆီကိုလောင်းလျက်၊ ဣသရေလအမျိုး၏ ဘုရားသခင်ထာဝရဘုရားက၊ ငါသည်သင့်ကို ထာဝရဘုရား၏လူ ဣသရေလအမျိုး၏ ရှင်ဘုရင်အရာ၌ ခန့်ထား၍ ဘိသိက်ပေး၏။ 7ငါ့ကျွန်ပရောဖက်တို့ကိုသတ်သောအပြစ်၊ ထာဝရဘုရား၏ ပရောဖက်အပေါင်းကို သတ်သောအပြစ်အလျောက်၊ ယေဇဗေလ၌ ငါဒဏ်ပေးမည်အကြောင်း၊ သင်သည် သင့်သခင်အာဟပ်အမျိုးကို လုပ်ကြံရမည်။ 8အာဟပ်အမျိုးသားရှိသမျှတို့ကို ပျက်စီးစေခြင်းငှာ၊ ဣသရေလမြို့ရွာ၌ အချုပ်ခံသောသူဖြစ်စေ၊ အလွတ်ပြေးသောသူဖြစ်စေ၊ အာဟပ်အမျိုးသား ယောက်ျားများကိုငါပယ်ဖြတ်မည်။ 9အာဟပ်အမျိုးကို နေဗတ်၏သား ယေရောဗောင်အမျိုးကဲ့သို့လည်းကောင်း၊ အဟိယ၏သား ဗာရှာအမျိုးကဲ့သို့လည်းကောင်း ဖြစ်စေမည်။ 10ယေဇဗေလကို သင်္ဂြိုဟ်သောသူ မရှိ။ ယေဇရေလမြေကွက်၌၊ ခွေးတို့သည် သူ့ကိုစားကြလိမ့်မည်ဟု မိန့်တော်မူကြောင်းကို ဆင့်ဆိုပြီးမှ တံခါးကိုဖွင့်၍ ပြေး၏။ 11ထိုအခါ ယေဟုသည် မိမိသခင်၏ကျွန်တို့ရှိရာသို့ ထွက်၍၊ တစ်ယောက်က၊ ရှိသမျှကောင်းသလော။ ထိုအရူးသည် အဘယ်ကြောင့် လာသနည်းဟု မေးလျှင်၊ ယေဟုက၊ သင်တို့သည် ထိုသူကိုလည်းကောင်း၊ သူပြောသော စကားကိုလည်းကောင်း သိကြ၏ဟုဆိုသော်၊ 12သူတို့က ငါတို့မသိ။ ပြောပါလော့ဟု ဆိုပြန်သော်၊ ယေဟုက၊ ထိုသူသည် ဤမည်သောစကားကို ပြော၏။ ထာဝရဘုရားက၊ ငါသည်သင့်ကို ဣသရေလရှင်ဘုရင်အရာ၌ ခန့်ထား၍ ဘိသိက်ပေးသည်ဟု မိန့်တော်မူကြောင်းကို ဆင့်ဆိုသည်ဟု ပြန်ပြောသောအခါ၊ 13သူတို့သည် အလျင်အမြန်ထသဖြင့်၊ အသီးအသီး မိမိတို့ဝတ်လုံကိုယူ၍ လှေကားထိပ်ပေါ် ယေဟုအောက်မှာ ခင်းလျက်၊ ယေဟုသည် ရှင်ဘုရင်ဖြစ်တော်မူ၏ဟုတံပိုးမှုတ်၍ ဟစ်ကြော်ကြ၏။

ဣသရေလဘုရင်ယောရံလုပ်ကြံခံရခြင်း

14ထိုသို့ နိမ်ရှိသားယောရှဖတ်၏သားယေဟုသည် ယောရံမင်းတစ်ဖက်သင်း ဖွဲ့လေ၏။ ထိုအခါ ရှုရိရှင်ဘုရင် ဟာဇေလကြောင့်၊ ယောရံမင်းနှင့် ဣသရေလလူအပေါင်းတို့သည် ဂိလဒ်ပြည်ရာမုတ်မြို့ကို စောင့်ရှောက်ကြ၏။ 15သို့ရာတွင် ယောရံမင်းသည် ရှုရိရှင်ဘုရင်ဟာဇေလကို စစ်တိုက်သောအခါ၊ ရှုရိလူထိခိုက်သော အနာကို ပျောက်စေခြင်းငှာ ယေဇရေလမြို့သို့ ပြန်သွားနှင့်ပြီ။ ယေဟုကလည်း၊ သင်တို့အလိုရှိလျှင်၊ ယေဇရေလမြို့သို့သွား၍ သတင်းကြားပြောရသောသူ တစ်စုံတစ်ယောက်ကိုမျှ မြို့ထဲကမထွက်မသွားစေနှင့်ဟု စီရင်၏။ 16ထိုသို့ ယောရံမင်းသည် ယေဇရေလမြို့၌ ရှိနေသောကြောင့်၊ ယေဟုသည် ရထားကိုစီး၍ ထိုမြို့သို့သွား၏။ ထိုအခါ ယုဒရှင်ဘုရင်အာခဇိသည်လည်း၊ ယောရံမင်းကို ကြည့်ရှုအံ့သောငှာ ရောက်လာပြီ။ 17ယေဇရေလမြို့၌ မျှော်စင်ပေါ်မှာ စောင့်သောသူသည် ရပ်လျက်၊ ယေဟုနှင့်လိုက်လာသော အလုံးအရင်းကို မြင်သောအခါ၊ လူအလုံးအရင်းကို ငါမြင်သည်ဟု ဆိုလျှင်၊ ဆီးကြိုခြင်းငှာသွား၍ ငြိမ်သက်ခြင်းရှိသလောဟု မေးမည်အကြောင်း၊ ယောရံသည် မြင်းစီးသူရဲတစ်ယောက်ကို စေလွှတ်သည်အတိုင်း၊ 18မြင်းစီးသူရဲသည် ဆီးကြိုခြင်းငှာသွား၍၊ ငြိမ်သက်ခြင်းရှိသလောဟု ရှင်ဘုရင်မေးတော်မူကြောင်းကိုပြောဆိုသော်၊ ယေဟုက၊ သင်သည် ငြိမ်သက်ခြင်းနှင့် အဘယ်သို့ဆိုင်သနည်း။ ငါ့နောက်သို့လှည့်၍ လိုက်လော့ဟုဆို၏။ စောင့်သောသူကလည်း၊ မြင်းစီးသူရဲသည် အလုံးအရင်းသို့ရောက်၍ ပြန်မလာပါဟုဆိုသော်၊ 19ရှင်ဘုရင်သည် အခြားသော မြင်းစီးသူရဲတစ်ယောက်ကို စေလွှတ်ပြန်၍၊ သူသည် ရောက်သောအခါ၊ ငြိမ်သက်ခြင်းရှိသလောဟု ရှင်ဘုရင်မေးတော်မူကြောင်းကို ပြောဆိုသော်၊ ယေဟုက၊ သင်သည် ငြိမ်သက်ခြင်းနှင့် အဘယ်သို့ဆိုင်သနည်း။ ငါ့နောက်သို့လှည့်၍ လိုက်လော့ဟု ဆို၏။ 20စောင့်သောသူကလည်း၊ မြင်းစီးသူရဲသည် ရောက်၍ ပြန်မလာပါ။ လာသောသူသည် နိမ်ရှိသားယေဟုနှင်တတ်သကဲ့သို့ အလွန်ပြင်းထန်စွာနှင်၍ လာပါသည်ဟုဆို၏။ 21ယောရံမင်းကလည်း၊ မြင်းရထားကို ပြင်ဆင်လော့ဟု ဆိုသည်အတိုင်း၊ မြင်းရထားကို ပြင်ဆင်ကြ၏။ ဣသရေလရှင်ဘုရင် ယောရံနှင့် ယုဒရှင်ဘုရင်အာခဇိတို့သည် ရထားတော်တစ်ခုစီစီးလျက် ယေဟုကို ဆီးကြိုမည်ဟု ထွက်သွား၍၊ ယေဇရေလမြို့သား နာဗုတ်၏မြေကွက်တွင် တွေ့ကြ၏။ 22ယောရံသည် ယေဟုကိုမြင်လျှင်၊ ယေဟု ငြိမ်သက်ခြင်းရှိသလောဟု မေးသော်၊ ယေဟုက၊ သင့်အမိယေဇဗေလပြုသော အဓမ္မမေထုန်အမှု၊ ပြုစားသောအမှု များသောကာလအတွင်းတွင်၊ အဘယ်သို့သော ငြိမ်သက်ခြင်းရှိလိမ့်မည်နည်းဟု ပြန်ပြောသော်၊ 23ယောရံက၊ အိုအာခဇိ၊ ပုန်ကန်မှုပါတကားဟုဆိုလျက် လှည့်၍ပြေး၏။ 24ယေဟုသည်လည်း လေးကိုတင်၍ပစ်သဖြင့်၊ ယောရံကို ပခုံးကြားမှာ မှန်၏။ မြားသည်လည်း နှလုံးကို ထုတ်ချင်းဖောက်၍၊ ယောရံသည် ရထားတော်ပေါ်မှာလဲနေ၏။ 25ယေဟုကလည်း၊ သူ့ကိုဆွဲ၍ ယေဇရေလမြို့သား နာဗုတ်မြေကွက်၌ ချပစ်လော့။ သင်နှင့်ငါသည် သူ့အဘအာဟပ်နောက်သို့ မြင်းစီး၍ လိုက်သောအခါ၊ ဤအမှုကို ထာဝရဘုရား ဗျာဒိတ်ထားတော်မူသည်ကို မမှတ်မိသလော။ 26အကယ်စင်စစ် နာဗုတ်အသွေး၊ သူ့သားတို့၏အသွေးကို မနေ့က ငါကြည့်မြင်ပြီဟု ထာဝရဘုရားမိန့်တော်မူ၏။ ဤမြေကွက်၌ သင့်ကို အပြစ်နှင့်အလျောက် ငါဒဏ်ပေးမည်ဟု ထာဝရဘုရားမိန့်တော်မူ၏။ သို့ဖြစ်၍ ထာဝရဘုရား၏အမိန့်တော်ရှိသည် အတိုင်း၊ ဤမြေကွက်၌ အလောင်းကိုချပစ်လော့ဟု မိမိရထားမှူးဗိဒကကို ဆို၏။

ယုဒဘုရင်အာခဇိလုပ်ကြံခံရခြင်း

27ထိုအမှုကို ယုဒရှင်ဘုရင်အာခဇိသည်မြင်လျှင်၊ ဥယျာဉ်စံနန်းလမ်းဖြင့် ပြေး၏။ ယေဟုကလည်း၊ သူ့ကို ရထားပေါ်မှာထိုးတော့ဟု လိုက်လျက်ဆိုသည်အတိုင်း၊ ဣဗလံမြို့နား၊ ဂုရမြို့သို့သွားသောလမ်းတွင် ပြုကြသဖြင့်၊ သူသည် မေဂိဒ္ဒေါမြို့သို့ပြေး၍ သေ၏။ 28သူ၏ကျွန်တို့သည် အလောင်းကို ရထားပေါ်သို့တင်ပြီးလျှင်၊ ယေရုရှလင်မြို့သို့ ဆောင်သွား၍၊ ဒါဝိဒ်မြို့တွင် မိမိသင်္ချိုင်း၌ ဘိုးဘေးတို့နှင့်အတူ သင်္ဂြိုဟ်ကြ၏။ 29ထိုမင်းအာခဇိသည် အာဟပ်သား ယောရံနန်းစံ ဆယ်နှစ်နှစ်တွင် ယုဒနိုင်ငံ၌ နန်းထိုင်၏။

ယေဇဗေလအသတ်ခံရခြင်း

30ယေဟုသည် ယေဇရေလမြို့သို့ရောက်သည်ကို ယေဇဗေလသည် ကြားလျှင်၊ မျက်ခမ်းတို့ကို ဆေးသုတ်၍ ဆံပင်ကိုတန်ဆာဆင်ပြီးမှ၊ ပြတင်းပေါက်ဝ၌ ကြည့်ရှုလျက်နေ၏။ 31ယေဟုသည် တံခါးဝသို့ဝင်သောအခါ ယေဇဗေလက၊ မိမိသခင်ကိုသတ်သော ဇိမရိသည် ချမ်းသာရသလောဟု မေးလျှင်၊ 32ယေဟုသည် မျှော်ကြည့်၍၊ ငါ့ဘက်မှာအဘယ်သူနေသနည်း။ အဘယ်သူဟု မေးလေသော်၊ မိန်းမစိုး နှစ်ယောက်သုံးယောက်တို့သည် ပြတင်းပေါက်ထဲက ကြည့်ရှုကြ၏။ 33ယေဟုက၊ သူ့ကိုတွန်းချလိုက်ဟု ဆိုသည်အတိုင်း တွန်းချသဖြင့်၊ သူ၏အသွေးသည် နန်းတော်ထရံအပေါ်၌လည်းကောင်း၊ မြင်းတို့အပေါ်၌လည်းကောင်း စဥ်၏။ ယေဟုသည် သူ့ကိုယ်ကို နင်းလေ၏။ အထဲသို့ဝင်၍၊ 34စားသောက်ပြီးမှ၊ ထိုကျိန်အပ်သောမိန်းမသည် ရှင်ဘုရင်သမီးဖြစ်သောကြောင့်၊ သွားကြည့်၍သင်္ဂြိုဟ်လော့ဟု ဆိုသည်အတိုင်း၊ 35သင်္ဂြိုဟ်ခြင်းငှာ သွားသောအခါ၊ ဦးခေါင်းခွံ၊ ခြေဖျား၊ လက်ဝါးတို့ကိုသာတွေ့သောကြောင့်၊ တစ်ဖန်လာ၍ ကြားလျှောက်ကြ၏။ 36ယေဟုက၊ ယေဇရေလေမြေကွက်၌ ခွေးတို့သည် ယေဇဗေလ၏အသားကို စားကြလိမ့်မည်ဟု ထာဝရဘုရားသည် မိမိကျွန်တိရှဘိမြို့သား ဧလိယအားဖြင့် မိန့်တော်မူသောစကားတော်သည် ဤသို့ပြည့်စုံပြီ။ 37သို့ဖြစ်၍ ဤသင်္ချိုင်းသည် ယေဇဗေလသင်္ချိုင်းဖြစ်၏ဟု အဘယ်သူမျှ မပြောနိုင်မည်အကြောင်း၊ သူ၏အလောင်းသည် ယေဇရေလမြေကွက်တွင်၊ လယ်ပြင်၌ နောက်ချေးကဲ့သို့ရှိရလိမ့်မည်ဟု ဆို၏။

ဓမ္မရာဇဝင်စတုတ္ထစောင် - ၉ (အနက်ဖွင့်)

(ဇ) ဣသရေလဘုရင် ယေဟုနှင့် ပရောဖက် ဧလိရှဲ (အခန်း ၉၊၁၀)

၁။ ယေဟုအား ဘိသိက်ပေးခြင်း (၉:၁–၁၀)

၉:၁–၁၀ ဧလိရှဲသည် ပရောဖက်တပါးအား ရာမုတ် ဂိလဒ်သို့ စေလွှတ်၍ ယေဟုအား တိတ်တဆိတ် ဘိသိက်ပေးခိုင်း သည်။ ယေဘုသည် ယောရံဘုရင်ကို ဆက်ခံမည့် ဣသရေလဘုရင်ဖြစ်ပါသည်။ ထိုယေဟု သည် ယောရှဖတ်၏ သားဖြစ်သည် (ငယ် ၂)။ ယောရှဖတ်ဟု ဆိုရာတွင် ယုဒဘုရင်ယောရှဖတ် မဟုတ်ပါ။ ယောရံ၏စစ်သူကြီး၊ ရာမုတ် ဂိလဒ်တွင် တိုက်ပွဲဝင်နေသူ ဖြစ်သည်။ ထိုပရောဖက်က ယေဟုဘိသိက် ပေးနေစဉ် အာဟပ်၏ မိသားစုကို သိမ်းပိုက် နှိမ်နှင်းရမည်ဟု ဧလိရှဲမှာ ထားသည့်အတိုင်း ပရောဖက်ပြုခဲ့သည် (၃ရာ ၉:၁၆) ဖြစ်သော်လည်း လက်ထောက်ဧလိရှဲထံသို့ တာဝန်ကျရောက်သည်။ ဧလိရှဲကလည်း အမည်မဖေါ်ပြသော ပရောဖက်ပြုချက်ကြောင့် ယေဟု သည် အံ့သြသော်လည်း ရာဇပလ္လင်ကို ပါးနပ်စွာ သိမ်းပိုက်ဖြစ်သည်။

၂။ ယေဟုလုပ်ကြံခြင်း (၉:၁၁–၁၀:၇)

၉:၁၁–၁၃ အခန်းထဲတွင် အရူးပရောဖက်က ယေဟုအား တိုးတိုးတိတ်တိတ်ဘာများ ပြောသွားကြောင်း အခြားဗိုလ်မင်းများက သိချင်ကြသည်။ ယေဟုက သင်တို့ကြားလိုက်သည့် အတိုင်းဟု အာပူလျှာလွှဲပြောလိုက်သည်။ ယောရံက ပုရောဖက်တပါး စေလွှတ်၍ ဘိသိက်ပေးခိုင်းခြင်း ဖြစ်သည်ဟု ထင်မှတ်ပုံရသည်။ ထို့ကြောင့် အခြားဗိုလ်မင်းများက သိရှိလောက်ပြီဟု ထင်မြင်ကြသည်။ သို့သော် မဖုံးသာ တော့သဖြင့် ဣသရေလရှင်ဘုရင် အဖြစ် လာရောက်ဘိသိက်ပေးကြောင်း ထုတ်ပြန်ကြေညာလိုက်သည်။

ယောရှဖတ်၏သား ယေဟုသည် ဘီစီ ၈၄၁- ၈၁၄/၁၃ ထိ နှစ်ပေါင်း (၂၈) နှစ်ကြာ ဣသရေလဘုရင် အဖြစ် စိုးစံခဲ့သည် (၆ရာ ၉:၁၄-၁၀:၃၆)။

၉:၁၄–၂၆ ယေဟုမင်းသည် မြောက်ပိုင်းနိုင်ငံ၌ ဣသရေလနန်းဆက် (၁၅) မြောက်ထူထောင်သည်။ ယေဟုသည် နန်းမတက် မခြင်း၊ ဘိသိက်ခံရသည့် သတင်းစကားကို ယေဇရေလရှိ ယောရံမင်းထံ သို့ မပေါက်ကြားအောင် ထိန်းချုပ်သည်။ ယေဟု၏ တပ်ဖွဲ့ကြီး တက်လာသည်ကို မြင်သော ကင်းစောင့်က ယောရံမင်းအား သွားရောက် သတင်းပို့သည်။ ကင်းစောင့်နှစ်ထပ်က ယေဟုအား ခရီးဦးကြိုကြသော်လည်း ပြန်မလွှတ်။ သူနှင့် တပါးတည်းလိုက်စေသည်။ ယောရံမင်းသည် အလည်အပတ်ရောက်နေသော ယုဒဘုရင်အာခဇိနှင့် အတူ ရထားတော် စီးလျှက် ခရီးဦးကြိုဆိုသည်။ ရာမုတ်ဂိလဒ်ဒေသမှ သတင်းထူး သတင်းကောင်း သယ်ဆောင်လာသည်ဟု မျှော်လင့်ပုံရသည်။ “ယေဟု၊ ငြိမ်သက်ခြင်းရှိပါစေသော” ဟု နှုတ်ခွန်းဆက်သောအခါ ကြားရသော စကားသည် မမျှော်လင့်သည့် ဆန့်ကျင်ဘက်သော ရန်စကားဖြစ် သည်။ အသက်ဘေးမှ လွတ်အောင် ယောရံထွက်ပြေးသော်လည်း မလွတ်၊ ယေဟု၏မြှားက နံကြားဖောက်သွားသည်။ သို့ဖြင့် ၃ရာ ၂၁:၁၉ ပါရှိသည့် ဧလိယ၏ ပရောဖက်ပြုချက်မှာ ပြည့်စုံလာသည်။ သူ့အလောင်းကို နာဗုတ်၏ မြေကွက်၌ ချပစ်ထားကြသည်။

၉:၂၇–၂၉ အလည်ပတ်ရောက်ရှိသော ယုဒဘုရင် အာခဇိသည်လည်း သေပြေးရှင်ပြေး ထွက်ပြေးကြသည်။ သို့သော် မြှားဒဏ်ရာဖြင့် မေဂိဒ္ဒေါမြို့တွင် သေလွန်သည်။ အလောင်းကို ယေရုရှလင်သို့ ပိုးဆောင်သင်္ဂြိုဟ်ကြသည်။ ၆ရာ ၂၂:၉တွင် ရှမာရိပြည်ကို ခြုံငုံပြောဆိုဟန်ရှိသည်။ အပိုဒ်ငယ် (၂၉)သည် သမိုင်း မှတ်တမ်းဟု ပြောဆိုခြင်းမဟုတ်ပါ။ ၈:၂၅ ကို ထပ်မံ အတည်ပြုခြင်းဖြစ်သည်။

၉:၃၀–၃၇ ယေဇရေလကို ယေဟုရောက်သောအခါ ယေဇဗေလမည်သော မိန်းမက “ကိုယ့်သခင်ကို သတ်သောဇိမရိထံမှ ငြိမ်သက်ခြင်း ရှိနိုင်မလား” ဟု ဆဲဆိုကြိမ်းမောင်းသည်။ ဇိမရိဆိုသည်မှာ မိမိသခင်ကို သတ်၍ နန်းတက်သော ဣသရေလဘုရင်ကို ရည်ညွှန်းခြင်းဖြစ်သည်။ (၇) ရက်သာ နန်းစံခဲ့သည် (၃ရာ ၁၆:၉-၁၉)။ ယေဇဗေလက ယေဟု၏ ပုန်ကန်မှုကို ရှုတ်ချသည်။ ယေဇဗေလ၏ အော်ဟစ်ဆဲဆိုသံကို ထွက်ကြည့်သော မိန်းမနှစ်ယောက်သည် ယေဟုအား ထောက်ခံသူများ ဖြစ်သောကြောင့် ယေဇဗေလအား အိမ်ပေါ်မှ တွန်းချပစ်ကြသည်။ ယေဇဗေလ၏ သွေးသည် အုတ်နံရံနှင့် အောက်ရှိမြင်းများပေါ်သို့ ပေကျံကုန် သည်။ အလောင်းကို ခွေးများက ကိုက်စားကြသည်။ သို့ဖြင့် ၃ရာ ၂၁:၂၃ ပရောဖက်ပြုချက်သည် ပြည့်စုံသွားသည်။ ယေဇဗေလ၏ သင်္ချိုင်းဟု နောင်လာနောင်သားများ ဆိုစရာမရှိအောင် ကျန်ကြွင်း သော အရိုးအသားကိုလည်း လယ်ကွင်းပြင်သို့ ပစ်ထားကြသည်။ ထို့အကြောင်းကို Campbell Morgan က ဤသို့ဆိုသည်။

မစင်ကြယ်သော သတ္တဝါခွေးများက၊ ခြေလက်ဦးခေါင်းများ ကိုက်စားခြင်းဆိုသည်မှာ နိမ့်ကျယုတ်ပတ်ခြင်းအမှတ် လက္ခဏာဖြစ်သည်။ အစောပိုင်းမြုပ်ရာ သင်္ချိုင်းအုတ်ဂူ လက်ညှိုးထိုးစရာ မရှိသော်လည်း သူ၏ သေပုံသေနည်းကို မူ အမြဲတန်းမှတ်မိကြပေမည်။၁၂

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။