ဓမ္မရာဇဝင်စတုတ္ထစောင် - ၁၀

အာဟပ်၏သားမြေးများအသတ်ခံရခြင်း
1အာဟပ်၏သားခုနစ်ကျိပ်တို့သည် ရှမာရိမြို့၌ ရှိသည်ဖြစ်၍၊ ယေဟုသည် ယေဇရေလမြို့အုပ်များ၊ အသက်ကြီးသူများ၊ အာဟပ်သားတို့ကိုလုပ်ကျွေးသော သူများရှိရာ၊ ရှမာရိမြို့သို့ စာရေး၍ ပေးလိုက်လေ၏။ 2မှာလိုက်သောစာချက်ဟူမူကား၊ သင်တို့၌ သင်တို့ သခင်၏သားများ၊ စစ်သူရဲ၊ မြင်းစီးသူရဲများ၊ ခိုင်ခံ့သောမြို့၊ လက်နက်စုံရှိသည်ဖြစ်၍၊ ဤစာရောက်သောအခါ၊ 3သင်တို့သခင်၏သားတို့တွင် သာ၍ ကောင်းမြတ်တော်သင့်သောသူကို ရွေးကောက်၍ ခမည်းတော်၏ရာဇပလ္လင်ပေါ်မှာ တင်ပြီးလျှင်၊ သခင်အမျိုးအဖို့ စစ်တိုက်ကြလော့ဟု မှာလိုက်သတည်း။ 4ထိုသူတို့က၊ ရှင်ဘုရင်နှစ်ပါးတို့သည် သူ့ရှေ့မှာ မခံမရပ်နိုင်သည်ဖြစ်၍၊ ငါတို့သည် အဘယ်သို့ ခံရပ်နိုင်မည်နည်းဟု အလွန်ကြောက်လျက် ဆိုကြ၏။ 5နန်းတော်အုပ်၊ မြို့အုပ်၊ အသက်ကြီးသူ၊ အာဟပ်သားတို့ကို လုပ်ကျွေးသောသူတို့ကလည်း၊ ကျွန်တော်တို့သည် ကိုယ်တော်ကျွန်ဖြစ်ပါ၏။ မိန့်တော်မူသည်အတိုင်း ပြုပါမည်။ ကျွန်တော်တို့သည် ရှင်ဘုရင်ကို မချီးမြှောက်ပါ။ အလိုတော်ရှိသည်အတိုင်း ပြုတော်မူပါဟု ယေဟုထံသို့ ပြန်စာကိုပေးလိုက်ကြ၏။ 6ယေဟုကလည်း၊ သင်တို့သည် ငါ၏လူဖြစ်၍ ငါ့စကားကို နားထောင်လျှင်၊ သင်တို့သခင့်သားတို့၏ ဦးခေါင်းများကိုယူ၍ ယေဇရေလမြို့၊ ငါရှိရာသို့ နက်ဖြန်နေ့ယခုအချိန်၌ လာကြလော့ဟု တစ်ဖန် စာပေးလိုက်လေ၏။ ရှင်ဘုရင်၏သားတော်ပေါင်း ခုနစ်ကျိပ်ရှိသည်ဖြစ်၍၊ လုပ်ကျွေးသော မြို့သားအကြီးအကဲတို့၌ ရှိကြ၏။ 7ထိုစာရောက်သောအခါ၊ ရှင်ဘုရင်၏သားတော် ခုနစ်ကျိပ်တို့ကိုယူ၍ သတ်သဖြင့်၊ ဦးခေါင်းများကို တောင်းတို့၌ ထည့်ပြီးလျှင်၊ ယေဇရေလမြို့၊ ယေဟုထံသို့ ပေးလိုက်လေ၏။ 8လုလင်တစ်ယောက်သည် လာ၍ ရှင်ဘုရင်သားတို့၏ ဦးခေါင်းများကို ဆောင်ခဲ့ပါပြီဟု လျှောက်လျှင်၊ ယေဟုက၊ မြို့တံခါးဝမှာ နံနက်တိုင်အောင် နှစ်စုပုံထားတော့ဟု ဆို၏။ 9နံနက်ရောက်မှ ယေဟုသည် ထွက်၍ရပ်လျက် လူများတို့အား၊ အိုဖြောင့်မတ်သောလူတို့၊ ငါသည် ငါ့သခင်တစ်ဖက်၌ သင်းဖွဲ့၍ သတ်လေပြီ။ ဤသူအပေါင်းတို့ကိုကား အဘယ်သူသတ်သနည်း။ 10ထာဝရဘုရားသည် အာဟပ်အမျိုး၌ မိန့်တော်မူသောစကားတော်တစ်ခွန်းမျှ မြေသို့မကျရသည်ကို သင်တို့သိမှတ်ကြလော့။ ထာဝရဘုရားသည် မိမိကျွန်ဧလိယအားဖြင့် မိန့်တော်မူသည်အတိုင်း ပြုတော်မူမည်ဟု ဆိုသဖြင့်၊ 11ယေဇရေလမြို့၌ ကျန်ကြွင်းသော အာဟပ်အမျိုးသားအပေါင်းတို့နှင့် သူ၏ လူကြီးပေါက်ဖော်၊ ယဇ်ပုရောဟိတ်အပေါင်းတို့ကို တစ်ယောက်မျှမကျန်စေဘဲ သတ်လေ၏။
အာခဇိ၏ဆွေမျိုးများအသတ်ခံရခြင်း
12နောက်မှထ၍ ရှမာရိမြို့သို့သွား၏။ လမ်းနားမှာရှိသော သိုးမွေးညှပ်ရာဇရပ်သို့ ရောက်သောအခါ၊ 13ယုဒရှင်ဘုရင်အာခဇိ၏ပေါက်ဖော်တို့ကိုတွေ့လျှင်၊ သင်တို့သည် အဘယ်သူနည်းဟု မေးသော်၊ ငါတို့သည် အာခဇိမင်း၏ ဆွေတော်မျိုးတော် ဖြစ်၏။ ရှင်ဘုရင်၏သားတော်တို့နှင့် မိဖုရား၏သားတော်တို့ကို နှုတ်ဆက်အံ့သောငှာ သွားသည်ဟု ဆိုကြ၏။ 14ယေဟုကလည်း၊ အရှင်ဖမ်းကြဟု စီရင်သည်အတိုင်း၊ အရှင်ဖမ်း၍ သိုးမွေးဇရပ်တွင်းနားမှာ လေးကျိပ်နှစ်ယောက်တို့ကို တစ်ယောက်မျှမကျန်စေဘဲ သတ်ကြ၏။
အာဟပ်၏ကျန်သောဆွေမျိုးများအသတ်ခံရခြင်း
15ထိုဇရပ်မှ ထွက်သောအခါ ခရီးဦးကြိုပြုအံ့ဟုလာသော ရေခပ်သားယောနဒပ်ကို တွေ့၍ နှုတ်ဆက်သဖြင့်၊ ငါ့စိတ်နှလုံးသည် သင့်စိတ်နှလုံးနှင့်သင့်၍ သဘောဖြောင့်သကဲ့သို့ သင့်စိတ်နှလုံးသည် သဘောဖြောင့်သလောဟု မေးလျှင်၊ ဖြောင့်ပါသည်ဟု လျှောက်ဆိုသော်၊ ထိုသို့မှန်လျှင် သင့်လက်ကိုပေးပါဟု ဆိုသည်အတိုင်း၊ လက်ကိုပေး၍ ယေဟုသည် မိမိအနားသို့ ရထားပေါ်မှာ ဆွဲတင်လျက်၊ 16ငါနှင့်အတူလိုက်၍ ထာဝရဘုရားဘက်၌ ငါ့စိတ်အားကြီးကြောင်းကို ကြည့်ရှုလော့ဟု ဆိုသဖြင့် မိမိရထားကို စီးစေ၏။ 17ရှမာရိမြို့သို့ရောက်သောအခါ၊ ထာဝရဘုရားသည် ဧလိယအားမိန့်တော်မူသော စကားတော်အတိုင်း၊ အာဟပ်အမျိုး အကုန်အစင် ပျက်စီးသည်တိုင်အောင် ထိုမြို့၌ ကျန်ကြွင်းလေသမျှတို့ကို သတ်လေ၏။
ဗာလဘုရားကိုးကွယ်သူတို့အသတ်ခံရခြင်း
18တစ်ဖန် ယေဟုသည် လူအပေါင်းတို့ကို စုဝေးစေ၍၊ အာဟပ်သည် ဗာလဘုရားကို အနည်းငယ်သာဝတ်ပြု၏။ ငါယေဟုမူကား များစွာပြုမည်။ 19သို့ဖြစ်၍ ဗာလဘုရား၏ပရောဖက်များ၊ အမှုစောင့်များ၊ ယဇ်ပုရောဟိတ်များ အပေါင်းတို့ကို ခေါ်ကြ။ တစ်ယောက်မျှ မကြွင်းစေနှင့်။ ငါသည် ဗာလဘုရားအား ယဇ်ကြီးကိုပူဇော်မည်။ ကြွင်းသောသူ မည်သည်ကား အသက်မရှင်ရဟု ဆို၏။ ထိုသို့ဆိုသော်၊ ဗာလကို ကိုးကွယ်သောသူတို့ကို ဖျက်ဆီးမည်အကြံနှင့် ပရိယာယ်ပြု၍ဆို၏။ 20ဗာလဘုရားအဖို့ ဓမ္မပွဲကိုပြင်ဆင်ကြဟု တစ်ဖန်စီရင်သည်အတိုင်း ဓမ္မပွဲကို စောင့်ရမည်ဟု ကြော်ငြာကြ၏။ 21ဣသရေလပြည် တစ်လျှောက်လုံးသို့ စေလွှတ်၍၊ ဗာလတပည့်ရှိသမျှတို့သည် တစ်ယောက်မျှမကြွင်း လာကြ၏။ ဗာလကျောင်းထဲသို့ ဝင်ကြသဖြင့် တစ်ကျောင်းလုံးပြည့်လျက်ရှိ၏။ 22ယေဟုသည် အဝတ်တန်ဆာတိုက်စိုးကိုခေါ်၍၊ ဗာလဘုရားတပည့်တို့အဖို့ အဝတ်တန်ဆာကို ထုတ်ကြဟု ဆိုသည်အတိုင်း ထုတ်လေ၏။ 23တစ်ဖန် ရေခပ်သားယောနဒပ်နှင့်အတူ ဗာလကျောင်းထဲသို့ဝင်၍၊ သင်တို့သည် ထာဝရဘုရားတပည့် တစ်ယောက်မျှမပါ၊ ဗာလဘုရားတပည့် သက်သက်ရှိစေမည်အကြောင်း ကြည့်ရှုစစ်ကြောကြလော့ဟု ဗာလတပည့်တို့အား ဆို၏။ 24မီးရှို့ရာယဇ်အစရှိသော ယဇ်မျိုးကိုပူဇော်ခြင်းငှာ အထဲသို့ဝင်သောအခါ၊ ယေဟုသည် ကျောင်းပြင်၌ လူရှစ်ကျိပ်ကိုထား၍၊ သင်တို့လက်သို့ ငါဆောင်ခဲ့သော ဤသူတစ်စုံတစ်ယောက်မျှလွတ်လျှင်၊ လွတ်စေသောသူသည် အသက်သေရမည်ဟု စီရင်၍၊ 25မီးရှို့ရာယဇ်ကို ပူဇော်မှုပြီးသောအခါ၊ ယေဟုကဝင်၍ သတ်ကြလော့။ တစ်ယောက်ကိုမျှ မထွက်စေနှင့်ဟု တပ်သားနှင့်တပ်မှူးတို့အား ဆိုသည်အတိုင်း၊ တပ်သားနှင့်တပ်မှူးတို့သည် ဓားနှင့်လုပ်ကြံ၍ အသေကောင်များကို ထုတ်ပစ်ပြီးမှ၊ 26ဗာလကျောင်းနှင့်ဆိုင်သော မြို့သို့သွား၍ ဗာလကျောင်းထဲက ရုပ်တုများကို ထုတ်ပြီးလျှင် မီးရှို့ကြ၏။ 27ဗာလ ဆင်းတုကိုလည်းကောင်း၊ ကျောင်းကိုလည်ကောင်း ဖြိုဖျက်၍ ယနေ့တိုင်အောင် ကိုယ်သုတ်သင်ရာအိမ် ဖြစ်စေကြ၏။ 28ထိုသို့ယေဟုသည် ဗာလကို ဣသရေလပြည်မှ ပယ်ရှားဖျက်ဆီးလေ၏။
29သို့ရာတွင် ဣသရေလအမျိုးကို ပြစ်မှားစေသော နေဗတ်သားယေရောဗောင်၏ ဒုစရိုက်တည်းဟူသော၊ ဗေသလမြို့နှင့် ဒန်မြို့မှာရှိသော ရွှေနွားသငယ်တို့ကို မစွန့်။ 30ထာဝရဘုရားကလည်း၊ သင်သည်ငါ့ရှေ့မှာ ဖြောင့်သောအကျင့်ကိုကျင့်၍ ကောင်းမွန်စွာ ပြုသောကြောင့်လည်းကောင်း၊ ငါအလိုရှိသမျှအတိုင်း အာဟပ်အမျိုး၌ စီရင်သောကြောင့်လည်းကောင်း၊ သင့်သားမြေး လေးဆက်တိုင်အောင် ဣသရေလနိုင်ငံ ရာဇပလ္လင်ပေါ်မှာထိုင်ရမည်ဟု ယေဟုအား မိန့်တော်မူသော်လည်း၊ 31ယေဟုသည် ဣသရေလအမျိုး၏ဘုရားသခင် ထာဝရဘုရားတရားတော်လမ်းသို့ စိတ်နှလုံးအကြွင်းမဲ့ လိုက်ခြင်းငှာ သတိမပြု၊ ဣသရေလအမျိုးကိုပြစ်မှားစေသော ယေရောဗောင်၏ ဒုစရိုက်တို့ကို မစွန့်။
ယေဟုကွယ်လွန်ခြင်း
32ထိုကာလတွင်၊ ထာဝရဘုရားသည် ဣသရေလပြည်စွန်းတို့ကို ဖြတ်တော်မူ၏။ 33ဟာဇေလသည် ယော်ဒန်မြစ်အရှေ့ဘက်၊ ဂဒ်အမျိုး၊ ရုဗင်အမျိုး၊ မနာရှေအမျိုး နေရာ၊ အာနုန်မြစ်နား၌ရှိသော အာရော်မြို့မှစ၍ ဂိလဒ်ပြည်၊ ဗာရှန်ပြည်တစ်လျှောက်လုံး အရပ်ရပ်တို့ကို လုပ်ကြံလေ၏။
34ယေဟုပြုမူသော အမှုအရာကြွင်းလေသမျှတို့နှင့် တန်ခိုးကြီးခြင်းအရာသည်၊ ဣသရေလရာဇဝင်၌ ရေးထားလျက်ရှိ၏။ 35-36ယေဟုသည် ရှမာရိမြို့၌မင်းပြု၍၊ ဣသရေလနိုင်ငံကို နှစ်ဆယ်ရှစ်နှစ်စိုးစံပြီးမှ၊ ဘိုးဘေးတို့နှင့် အိပ်ပျော်၍၊ ရှမာရိမြို့၌ သင်္ဂြိုဟ်ခြင်းကို ခံလေ၏။ သားတော်ယောခတ်သည် ခမည်းတော်အရာ၌ နန်းထိုင်၏။

ဓမ္မရာဇဝင်စတုတ္ထစောင် - ၁၀ (အနက်ဖွင့်)

၁၀:၁၁  ယေဟု၏ နောက်တဆင့် လုပ်ဆောင်ချက်မှာ ရှမာရိ ရှိအာဟပ်၏သား ခုနှစ်ဆယ်အား ကွပ်မျက်သတ်ဖြတ်ခြင်းဖြစ်သည်။ ထိုသို့မသတ်ဖြတ်မီ စစ်ရေးစစ်ရာ ကြွယ်ဝသော သားကို ရွေးချယ်၍ သူ့အားစီးချင်းထိုးရန် စိန်ခေါ်လိုက်သေးသည်။ သို့သော်လည်း ယေဇရေလတွင် ယောရံနှင့် အာခဇိမင်း နှစ်ပါးကို အနိုင်ယူခဲ့ပုံအား သိရှိကြသောကြောင့် အာမခံရဲကြ။ သို့ဖြင့် အမိန့်တော်အတိုင်း နာခံကြရသည်။ ယေဇရေလရှိ သစ္စာတော်ခံများသို့ စာရေး၍ အာဟပ်သားခုနှစ်ဆယ်တို့၏ ဦးခေါင်းကို ပြသခိုင်းသည်။ နောက်တနေ့နံနက်တွင် ယေဟုသည် မြို့ဝင်တံခါး၌ နှစ်ပုံပုံထားသော ဦးခေါင်းများကို သွားရောက် ကြည့်ရှုသည်။ ရုတ်တရက်တွင်မူ ယေဟု၏အမိန့်ကို သဘောမပေါက်ကြသဖြင့် လိုက်လုပ်ကြသည်။

သင်တို့တွင် ဤကဲ့သို့ သတ်ဖြတ်သော်လည်း အပြစ်မရှိ။ ငါ့တွင်လည်း အပြစ်မရှိပါ။ ငါ့သခင်ယောရံကို လုပ်ကြံသည်မှာ မှန်ကန်သည်။ သို့သော် လုပ်ကြံရသည့် အကြောင်းရင်းမှာ ဘုရားသခင်က ပရောဖက်ဧလိယအားဖြင့် ပရောဖက်ပြုချက် ပြည့်စုံစေခြင်း ဖြစ်သည်။

ဧလိယ၏ ပရောဖက်ပြုချက်တွင် ယေဟုအား အာဟပ်၏သွေးသားများကို အပြောင်သုတ်သင် ခိုင်းသည်။ လူကြီး၊ ပေါက်ဖေါ်၊ ယဇ်ပရောဟိတ်အပေါင်းကို သတ်စေသည်။

၁၀:၁၂၁၄  ယေဟုမင်း ရှမာရိသို့ သွားစဉ်လမ်းခရီးတွင် အာခဇိ၏ ဆွေမျိုးသားချင်း (၂၄ယောက် (ငယ် ၁၃)နှင့် တွေ့ဆုံသည်။ ပေါက်ဖေါ်များ သတ်ဖြတ်ကွပ်မျက်ခဲ့ပြီး ဖြစ်သောကြောင့် ဝမ်းကွဲညီအစ်ကို တော်သူများဖြစ်ပေမည် (၆ရာ ၂၁:၁၇)။ ယုဒပြည်မှ ဣသရေလပြည်သို့ ဘုရင်ဧည့်သည်တော် အဖြစ်အလည် အပတ်သွားခြင်းဖြစ်၏။ ကံဆိုးမိုးမှောင်ကျ၍ အသွားမတော်ကြခြင်း ဖြစ်သည်။ ယေဟုမင်း၏ အမိန့်ဖြင့် သိုးမွှေးစရပ်နားတွင် အကုန်သတ်ပစ်ခြင်း ခံ ကြရသည်။

၁၀:၁၅၁၇  ယေဟုသည် ရေခပ်သား ယောနဒပ်နှင့် လည်း တွေ့ဆုံသည်။ (Jehonadab သို့မဟုတ် Jonadab ဟုလည်း ခေါ်သည်)။ ယေဟု၏ မိတ်ဆွေကောင်းဖြစ်သော ကြောင့် မြင်းရထားအတူတူ စီး၍ ရှမာရိထိသွားကြသည်။ ယေဟုက ဘုရားသခင် ယုံကြည်ပုံကို သက်သေထူပြသည်။ ယေ ၃၅ တွင် ထိုယောနဒပ် အကြောင်း တွေ့ရသည်။ မိစ္ဆာပရောဖက်များ အယူသို့မလိုက်ဘဲ ဣသရေလလူများ မောရှေနှင့် ယောရှုကို သိမှတ်ကြသော ရှေးဦးယုံကြည်သူများ ဘဝကို ပုံဆောင်သည်။ ယောနဒပ်က ယေဟု ဘုရင် အသစ်စက်စက်ဖြစ်ကြောင်း သိရသောအခါ ဝမ်းသာလှိုက်လှဲစွာ ဂုဏ်ပြုသည်။ ပရောဖက် ဧလိယ မိန့်မှာသည့် အတိုင်း ယေဟုသည် ရှမာရိရှိ အာဟပ်၏ဆွေမျိုးသားချင်းနှင့် ခြေရာလက်ရာများကို အစဖျောက်ပစ်သည်။ ထိုအကြောင်းကို Morgan က ဤသို့ဆိုသည်။

ယေဟုသည် သူ၏ စိတ်အားထက်သန်မှုကို ထောင်လွှားသည်။ အမှန်စင်စစ် ထိုသို့ပြုလုပ်ခြင်းသည် မိမိပျက်စီးရာ ပျက်စီးကြောင်း ဖြစ်သည်။ ရောက်လေရာမှာ ဒုစရိုက်ကျူးလွန်သည်။ ဘုရားသခင်၏ တရားစီရင်ချက်သည် သူ့လမ်းကြောင်းနှင့် သူရှိရသည်။ မဆီမဆိုင်သူများအား ဝါကြွားထုတ်ဖေါ်ပြသစရာ မလို။၁၃

၃။ ဗာလဘုရားကိုးကွယ်သူများ သန့်စင်ခြင်း (၁၀:၁၈၃၆)

၁၀:၁၈၂၈  နောက်တဆင့်အဖြစ် ဗာလဘုရား ဝါဒီများကို သုတ်သင်သည်။ ဗာလဘုရားပွဲတော် ကျင်းပမည် ဟု လှည့်ဖျားသောကြောင့် ဗာလဘုရားကျောင်းတွင် လူသူပွတ်သိပ်ကြပ် နေသည်။ ဗာလဘုရား ဝတ်ပြုရာတွင် ဝတ်ဆင်ရသော ဝတ်ရုံများကိုယ်စီ ဝတ်လာကြသည်။ ထိုပရိသတ်ထဲတွင် ယေဟောဝါ ဘုရားကိုးကွယ်သူ ရှိမရှိစစ်ဆေးသည်။ မီးရှို့ရာယဇ်ပူဇော်သည် နှင့် တပြိုင်နက် ဘုရားကျောင်းအပြင်ဘက် တွင် အဆင်သင့် ချထားသော စစ်သည်တော် ရှစ်ဆယ်က ထိုဗာလရုပ်တုရှေ့ ကိုးကွယ်သူများကို ဝင်ရောက်သတ်ဖြတ် ကွပ်မျက်ကြသည်။ ကျောင်းဆောင်ကိုလည်း ခုတ်ပိုင်းဖြိုလှဲပြီး အကုန်လုံးမီး ရှို့ပစ်သည်။

၁၀:၂၉၃၀  ယေဟုမင်းသည် အခြားဣသရေလမင်းများထက်စာလျှင် ကောင်းချက်များစွာ ရှိပါသည်။ ဘုရားသခင်စီရင်ထားသော အာဟပ်သွေးသားများကို သုတ်သင်သည်။ ဗာလဘုရား ကိုးကွယ်သူများကို အစဖျောက်ပစ်သည်။ ထို့ကြောင့် သူ့လုပ်ဆောင်ချက်အပေါ် အသိအမှတ်ပြုသော အားဖြင့် ဘုရားသခင်က မျိုးရိုးစဉ်ဆက် ()ဆက်ကို နန်းစံစေသည်။ (ယောခတ်၊ ယောရှ၊ ဒုတိယယေရောဗောင် နှင့် ဇာခရိမင်းများ ဖြစ်သည်)။

၁၀:၃၁၃၆  မည်မျှကောင်းစေကာမူ ဆိုးကွက်တကွက် ရှိနေသည်။ ယေရောဗောင်ပြုခဲ့သော ရွှေနွားရုပ် ကိုးကွယ်ခြင်းကိုမူ မစွန့်။ အာဟပ်မိသားစု အပေါ် အလွန်အကျွံရက်စက်ခြင်း ကိုလည်း ဟော ၁:၄ တွင် အပြစ်တင်ထားသည်။ ထာဝရဘုရားသည် ဣသရေလပြည်ကို စွန့်ခွာသည်။ ရှုရိဘုရင် ဟာဇလသည် ရုဗင်၊ ဂဒ် နှင့် မနာရှေ လူတဝက်တို့ပိုင်သော ယော်ဒန်မြစ်အရှေ့ဘက်ကမ်းကို  သိမ်းပိုက်သည်။ ဟာဇလ၏ လှုပ်ရှားမှုကို ဧလိရှဲက ကြိုတင်ရိပ်မိသည် (၈:၁၂)။ ယေဟုက အာဟပ်မိသားစုသို့ ပြုကျင့်သည့် အတိုင်း ရှုရိဘုရင်သည် ဣသရေလလူများအား သုတ်သင်သည်။ ထိုသို့ မင်းဆိုးမင်းညစ် အသီးသီး ပုန်ကန်ထကြွ သောင်းကျန်းကြသော်လည်း ဘုရားသခင်၌ အစီအမံတော်ရှိနေသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက  http://bbcmm.net/the-believers-bible-commentary  တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။