၂ကော - ၇

1ထိုကြောင့် ချစ်သူတို့၊ ထိုကတိတော်များနှင့် ငါတို့သည် ဆိုင်ကြသည်ဖြစ်၍၊ ကိုယ်ခန္ဓာ၏ အညစ်အကြေး၊ စိတ်ဝိညာဉ်၏ အညစ်အကြေးရှိသမျှတို့နှင့် ကိုယ်ကိုကိုယ်ကင်းစင်စေလျက်၊ ဘုရားသခင်ကို ကြောက်ရွံ့၍ သန့်ရှင်းခြင်းပါရမီနှင့် ပြည့်စုံကြကုန်အံ့။
ပေါလုဝမ်းမြောက်ခြင်း
2ငါတို့ကို လက်ခံကြလော့။ ငါတို့သည် အဘယ်သူကိုမျှ မပြစ်မှား။ အဘယ်သူကိုမျှ မယိုယွင်းစေ၊ အဘယ်သူ၏ဥစ္စာကိုမျှ ပရိယာယ်အားဖြင့် မယူ။- 3သင်တို့ကို အပြစ်တင်၍ ဤသို့ငါဆိုသည်မဟုတ်။ သင်တို့နှင့်အတူ အသက်ရှင်ခြင်းငှာလည်းကောင်း၊ သေခြင်းငှာလည်းကောင်း၊ အလိုရှိသည်တိုင်အောင်၊ ငါတို့သည် သင်တို့ကိုချစ်ကြ၏ဟု အထက်ကငါပြောခဲ့ပြီ။- 4သင်တို့ကြောင့် အလွန်ရဲရင့်ခြင်းရှိ၏။ သင်တို့ကြောင့် အလွန်ကြွားဝါခြင်း ရှိရ၏။ သက်သာခြင်းနှင့် ပြည့်စုံ၏။ ညှဉ်းဆဲခြင်းကို ခံလေရာရာ၌ အတိုင်းထက်အလွန် ဝမ်းမြောက်ခြင်းရှိ၏။- 5ငါတို့သည် မာကေဒေါနိပြည်သို့ ရောက်သောအခါ၊ ကိုယ်ကာယငြိမ်ဝပ်ခြင်း အလျှင်းမရှိ၊ အရာရာ၌ ညှဉ်းဆဲခြင်းကို ခံရကြ၏။ ပြင်၌ကား တိုက်လှန်ခြင်း ရှိ၏။ အတွင်း၌ကား စိုးရိမ်ခြင်းရှိ၏။
6သို့သော်လည်း နှိမ့်ချလျက်ရှိသော သူတို့ကို သက်သာစေတော်မူတတ်သော ဘုရားသခင်သည်၊ တိတုရောက်လာသောအားဖြင့် ငါတို့ကို သက်သာစေတော်မူ၏။- 7တိတုရောက်လာခြင်းအားဖြင့်သာ သက်သာစေတော်မူသည် မဟုတ်။ တိတုသည် သင်တို့ဆီမှာရသော သက်သာခြင်းအားဖြင့်လည်း သက်သာစေတော်မူ၏။ အဘယ်သို့နည်း ဟူမူကား၊ သင်တို့၏တောင့်တခြင်း၊ ညည်းတွားခြင်း၊ ငါ၏အကျိုးအလိုငှာ စေတနာစိတ်အားကြီးခြင်း အကြောင်းအရာများကို သူသည် ငါတို့အား ကြားပြော၏။ ထိုကြောင့် ငါသည်သာ၍ ဝမ်းမြောက်ခြင်းရှိ၏။- 8အထက်ကပေးလိုက်သော စာအားဖြင့် သင်တို့ကို ဝမ်းနည်းစေသောကြောင့်၊ ငါသည် ယခင်အခါ၌ နောင်တရှိသော်လည်း ယခုအခါ၌ မရှိ။ အကြောင်းမူကား၊ ထိုစာသည် သင်တို့ကို ခဏသာဝမ်းနည်းစေသည်ကို ငါမြင်၏။
9သင်တို့ကို ဝမ်းနည်းစေသောကြောင့် ငါဝမ်းမြောက်သည် မဟုတ်။ ဝမ်းနည်းစေ၍ နောင်တရသောကြောင့် ငါဝမ်းမြောက်ခြင်းရှိ၏။ ငါတို့အားဖြင့် သင်တို့၏အကျိုး အလျှင်းမပျက်ရမည်အကြောင်း၊ ဘုရားသခင်၏ အလိုတော်နှင့်အညီ ဝမ်းနည်းစေကြ၏။- 10အဘယ်သို့နည်း ဟူမူကား၊ ဘုရားသခင်၏ အလိုတော်နှင့်ညီသော ဝမ်းနည်းခြင်းသည် ကယ်တင်ခြင်းနှင့်ယှဉ်သော နောင်တစိတ် တည်းဟူသော၊ မပြောင်းလဲနိုင်သော နောင်တစိတ်ကို ပြုပြင်တတ်၏။ လောကီ ဝမ်းနည်းခြင်းမူကား၊ သေခြင်းကိုပြုပြင်တတ်၏။- 11ဘုရားသခင်၏ အလိုတော်နှင့်ညီသော သင်တို့၏ဝမ်းနည်းခြင်းသည် သင်တို့၌ အဘယ်သို့သော သတိပြုခြင်း၊ ကိုယ်အပြစ်ကိုဖြေခြင်း၊ အမျက်ထွက်ခြင်း၊ ကြောက်ရွံ့ခြင်း၊ အလွန်တောင့်တခြင်း၊ ငါ၏အကျိုးအလိုငှာ စိတ်အားကြီးခြင်း၊ တရားသဖြင့် ဒဏ်စီရင်ခြင်းတို့ကို ပြုပြင်သည်ကို ကြည့်ရှုကြလော့။ သင်တို့သည် ဤအမှု၌ အပြစ်ကင်းသည်ကို အရာရာအားဖြင့် ထင်ရှားပြကြပြီ။- 12ထိုသို့နှင့်အညီ၊ ငါသည်သင်တို့အား ရေး၍ပေးလိုက်သောအခါ၊ ပြစ်မှားသောသူနှင့် ပြစ်မှားခြင်း ခံရသောသူကိုသာ ထောက်၍ ရေးသည်မဟုတ်။ သင်တို့အကျိုးကို ငါတို့သည် ဘုရားသခင့်ရှေ့တော်၌ ပြုစုချင်သော စေတနာစိတ်ရှိကြောင်းကို သင်တို့အား ထင်ရှားစေခြင်းငှာ ရေးသတည်း။- 13ထိုကြောင့် သင်တို့၏ သက်သာခြင်းအကြောင်းအားဖြင့်၊ ငါတို့သည်လည်း သက်သာခြင်းသို့ရောက်သည် သာမက၊ တိတု၏ ဝမ်းမြောက်ခြင်းအကြောင်းအားဖြင့် သာ၍ အလွန်ဝမ်းမြောက်ကြ၏။ သင်တို့ရှိသမျှသည် ထိုသူ၏စိတ်နှလုံးကို သက်သာဝမ်းမြောက်စေကြသည် ဖြစ်၍၊- 14အထက်က ငါသည် သင်တို့ကိုအကြောင်းပြု၍ ဝါကြွားသော စကားကို ထိုသူအားပြောပြီးလျှင်၊ ယခု ရှက်ကြောက်ခြင်းမရှိ။ ငါတို့သည် အရာရာ၌ သင်တို့အား ဟုတ်မှန်စွာပြောသည်နည်းတူ၊ တိတုရှေ့၌ ငါဝါကြွားသောစကားသည်လည်း မှန်သောစကားဖြစ်ကြောင်း ထင်ရှား၏။- 15သင်တို့သည် ကြောက်ရွံ့တုန်လှုပ်ခြင်းနှင့် သူ့ကိုလက်ခံ၍ နားထောင်ကြသည်ကို သူသည် အောက်မေ့သဖြင့်၊ သင်တို့ကို ချစ်သနားခြင်း မေတ္တာကရုဏာစိတ်နှင့် အလွန်ပြည့်စုံ၏။- 16ငါသည် အရာရာ၌ သင်တို့ကို ယုံနိုင်သောကြောင့် ဝမ်းမြောက်ခြင်းရှိ၏။

၂ကော - ၇ (အနက်ဖွင့်)

: ဤကျမ်းပိုဒ်သည် အထက်ပါကျမ်းချက်၏ အဆက်ဖြစ်သည်။ ၆:၁၄ မှစသော သင်ခန်းစာ၏ အဆက်ဖြစ်သည်။

ဤကျမ်းပိုဒ်မှ ကတိတော်များသည် (၆:၁၇-၁၈)တွင် ဖော်ပြသော “သင့်ကို ငါလက်ခံမည်၊ ငါသည်သင် တို့ အဘဖြစ်မည်၊ သင်တို့သည်လည်း ငါ၏သားသမီးများဖြစ်မည်”ဟူသော ကျမ်းစကားများနှင့် ဆက်စပ်သည်။ ထိုအံ့ဖွယ်ကတိတော်များကို အလေးအနက်ထား၍ ကိုယ်ကာယအညစ်အကြေးနှင့် ဝိညာဉ် အညစ်အကြေး များကိုဖြူစင်သန့်ရှင်းစေရသည်။ ကိုယ်ကာယအညစ်အကြေးဆိုရာတွင် ဝိညာဉ်အညစ်အကြေး ဖြစ်စေနိုင်သော စိတ်ကူးစိတ်သန်း၊ အကြံအစည်များမှစ၍ ခန္ဓာကိုယ်အစိတ်အပိုင်းအားလုံး ပါဝင်သည်။

သို့သော် ဘုရားရှင်သည် တားမြစ်ခြင်းကိုသာ ပြဌာန်းသည်မဟုတ်။ တိုက်တွန်းခြင်းလည်း ရှိသေးသည်။ ပြည့်စုံသောစင်ကြယ်ခြင်းဆိုသည်မှာ ဘုရားသခင်ကို ချစ်ကြောက်ခြင်းဖြစ်သည်။ အညစ်အကြေးများကို သန့်စင်စေသည်သာမက၊ နေ့စဉ်အသက်တာတွင် သခင်ခရစ်တော်ယုံကြည်ခြင်း၌ တိုးတက်ရင့်ကျက်နေရမည်။ ဤလောကမှာ ရှိနေသရွေ့ ပြည့်စုံသောစင်ကြယ်ခြင်း ရောက်နိုင်မည်မဟုတ်ပါ။ သို့သော် တိုးတက်နေရမည်။ ခရစ်တော်နှင့် မျက်နှာချင်းဆိုင်တွေ့ဆုံမှသာ ပြည့်စုံသွားမည်။ စိတ်နှလုံးထဲတွင် ဖြူစင်ခြင်းကို လိုလားတောင့်တ နေရမည်။ ထိုအကြောင်းနှင့် ပတ်သတ်၍ Mc Cheyene က ဤသို့ဆုတောင်းဘူးသည်။ “အို အဘဘုရားသခင် ဤလောကတွင် ရှိနေစဉ်တွင်လည်း ကောင်းကင်နိုင်ငံ၌ ဖြူစင်ခြင်းကဲ့သို့ ဖြူစင်အောင် လုပ်ဆောင်ရသော အခွင့်အရေး ပေးသနားတော်မူပါ။”

(ကောရိန္သု မင်္ဂလာသတင်းကြောင့် ပေါလု၏ ပီတိ (:၁၆)

          : “ငါတို့ဘက်သို့ သင်တို့နှလုံးသား တံခါးဖွင့်ကြလောဟူသော ပေါလု၏စကားသည် တံခါးပိတ် ကြ၍ပြောခြင်းဖြစ်သည်။ တစုံတယောက်ကိုမှ မပြစ်မှားခဲ့ပါ။ တယောက်ကိုမှ ပျက်စီးအောင်မလုပ်ခဲ့ပါ။ လိမ်လည်လှည့်ဖျားခြင်း အလျဉ်းမလုပ်ခဲ့ပါ။ မည်သူ့ထံမှ အခွင့်အရေးမယူခဲ့။ အလှူငွေမှစ၍ အကူအညီတောင်း ခံခြင်း မပြုခဲ့ပါ။ တယောက်မှ ဒုက္ခမပေး။ ပြဿနာမရှာပါ။

          : ကောရိန္သုသားများအား ပြစ်တင်ရှုတ်ချလို၍ ပြောခြင်းလည်းမဟုတ်ပါ။ ပြောနေကြစကားအတိုင်း ကောရိန္သုသားများနှင့် မရှိအတူ၊ ရှိအတူ၊ အေးတူပူမျှ နေထိုင်လိုကြောင်း ထပ်လောင်းပြောခြင်းဖြစ်သည်။

: ကောရိန္သုသားများကို အမှန်တကယ်ချစ်ခင်သောကြောင့် ထိုကဲ့သို့ ပြောမနာဆိုမနာ ပွင့်ပွင့် လင်းလင်း ပြောဆိုခြင်းဖြစ်သည်။       ကောရိန္သုများ၏ ယုံကြည်မှုကို ပေါလုက ဂုဏ်ယူဝမ်းမြောက်သည်။ ထိုသို့ ပြောရာတွင် ပေါလုအား တံခါးမဖွင့်ပေးခြင်းကို ဂုဏ်ယူခြင်းဖြစ်သည်ဟု တလွဲအဓိပ္ပါယ်ကောက် မမှားရ။ ချို့တဲ့ကြပ်တည်းသော ယေရုရှလင်သန့်ရှင်းသူများအား ကူညီရန် ကောရိန္သုယုံကြည်သူများ၏စေတနာအား ဂုဏ် ယူခြင်းဖြစ်သည်။ ထိုအကြောင်းကို ရောက်လေရာမှာ ပေါလုက သက်သေခံခဲ့သည်။ ထိုအကြောင်းကို ချန်ထား ခဲ့ကြပါစို့။

အမျိုးမျိုးသော ဆင်းရဲဒုက္ခခံရသော်လည်း ငါသည် အားတက်လျက် အလွန်ရွှင်လန်းဝမ်းမြောက်၏။ အဘယ့်ကြောင့် ထိုသို့ဝမ်းသာရွှင်လန်းသနည်း။ တိတုယူဆောင်လာသော သတင်းကောင်းဖြစ်သည်။ ထိုသတင်း ထဲတွင် ကောရိန္သုယုံကြည်သူများ၏ စေတနာ သဒ္ဒါတရားက ပေါလုအား ရွှင်လန်းတက်ကြွစေသည်။

: တိတုကိုတွေ့ဖို့ ဧဖက်မှ တရောမြို့သို့ ပေါလုထွက်သွားကြောင်း ယခင်ကျမ်းပိုဒ်များတွင် ရေးပြခဲ့ပြီးဖြစ်သည်။ တရောမြို့တွင် တိတုမတွေ့သောအခါ မာကေဒေါနိသို့ ခရီးဆက်သွားသည်။ မာကေဒေါနိသို့ ရောက်သောအခါ တွင်လည်း တဏှာမငြိမ်နိုင်။ စိတ်သောကရောက်နေသည်။ မယုံကြည်သူများ၏ဖိစီးမှု ဒဏ်ခံရသဖြင့် စိတ်လှုပ် ရှားသည်။ အထူးသဖြင့် တိတုနှင့် မတွေ့ဆုံသောကြောင့် သောကဗျာပါဒများသည်။

          : ထိုသို့ ရတက်မအေးဖြစ်နေချိန်တွင် ဘုရားရှင်က တိတုအား အရောက်စေလွှတ်ပေးသောကြောင့် ပေါလု စိတ်သက်သာရာရသွားသည်။ ထိုအခိုက်အတန့်သည် ပေါလုအတွက် “သံကိုသံဖြင့်ထက်အောင် ပြုရသကဲ့ သို့ လူတို့သည်လည်း အချင်းချင်း ပညာသင်ယူရကြ၏” (သု ၂၇:၁၇)ဟူသော ကျမ်းစကားသည် တကယ်မှန်ကန် သည်။ ထိုသူနှစ်ယောက် တွေ့ဆုံခန်းကို မြင်ယောင်ကြည့်ပါ။ အဘယ်မျှ ဝမ်းသာလုံးစို့၍ ရေပက်မဝင်အောင် စကားဖောင်ဖွဲ့ကြမည်နည်း။ ပေါလု၏သိချင်ဇောကို တိတုက မည်သို့ဖြေမည်နည်း။ (သု ၂၅:၂၅ ကိုလည်း ယှဉ်ဖတ်ပါ)။

          : လုပ်ဖော်ဆောင်ဖက်နှစ်ဦး ပြန်လည်တွေ့ဆုံခြင်းကြောင့် ဝမ်းမြောက်ရွှင်လန်းခြင်းသာမကပါ။ တိတုယူဆောင်လာသော ကောရိန္သုသားများ၏ မင်္ဂလာသတင်းစကားများက ပို၍ဝမ်းမြောက်စေပါသည်။

ကောရိန္သုယုံကြည်သူများ၏ မင်္ဂလာသတင်းသည် ပေါလုကြားချင်လှသော သတင်းစကားဖြစ်သည်။ အယူမှားဆရာများ ဝင်ရောက်ထိုးဖောက်ခြင်း ခံရချိန်ဖြစ်သော်လည်း ပေါလုနှင့် သန့်ရှင်းသူများ၏သံယောဇဉ် ကြိုး ခိုင်မာလျက်ရှိနေသေးသည်။ ပေါလုအတွက် စိတ်ပူပန်ကြသည်သာမက လွမ်းလည်းလွမ်းကြသည်။ သတိ ရကြသည်။ ထိုသို့ လွမ်းရခြင်းမှာ အသင်းတော်ထဲသို့ အပြစ်ခြေလှမ်းဝင်ရောက်ခြင်းနှင့် ပေါလုအတွက် ပူပန်ခြင်း ကြောင့် ဖြစ်ပေမည်။ ကောရိန္သုသားများ၏ လွမ်းဆွတ်သတိရခြင်းသည် ပေါလုအား စိတ်သက်သာစေပါသည်။

ပေါလု၏ ဝမ်းသာခြင်းသည် တိတုနှင့်တွေ့ဆုံသည်သာမက ကောရိန္သုသားများ၏ မင်္ဂလာသတင်း ကြောင့်ဖြစ်သည်။ ပေါလု၏သွန်သင်ဟောကြားချက်များ ကောရိန္သုသားများက လေးစားကြည်ညိုလျက်ရှိနေဆဲ ဖြစ်သည်။

: အထက်ကပေးလိုက်သော စာအားဖြင့် သင်တို့ကို ဝမ်းနည်းစေသောကြောင့် ငါသည်ယခုအခါ နောင်တရသော်လည်း ယခုငါ၌မရှိတော့။ အကြောင်းမူကား ထိုစာသည် သင်တို့ကိုခဏသာ ဝမ်းနည်းစေသည်ကို ငါမြင်၏။

အထက်ကပေးလိုက်သောစာဆိုသည်မှာ ကောရိန္သုသြဝါဒစာ ပထမစောင် ဖြစ်နိုင်သည်။ သမ္မာကျမ်းစာ တွင် ပါသောစာစောင်လည်း ဖြစ်နိုင်သည်။

ရေးလိုက်သော စာပေါ်တွင် ပေါလုနောင်တရသည်မှာ သေချာသည်။ ထိုစကားအရ ကောရိန္သုသြဝါဒစာ ပထမစောင်မဖြစ်နိုင်သည်မှာ ရှင်းပါသည်။ ထိုစာသည် ဝိညာဉ်တော် မပါရှိသောစာဖြစ်ပေမည်။ ပေါလု၏စာများ သည် သခင်ဘုရားအား ချီးမွမ်းခြင်းသာ ရေးလေ့ရှိသည်။ ပေါလုသည်လည်း လူသားဖြစ်သောကြောင့် ထိုစာသည် လူ့ဇာတိအမြင်ဖြင့် ရေးသားခြင်းဖြစ်ပေမည်။ ထိုသို့ ရေးသားသောကြောင့်လည်း ကျမ်းစာမျက်နှာပေါ်တွင် မတွေ့ခြင်း ဖြစ်ပေမည်။ ထိုစာကြောင်းကို William ကထောက်ခံထားသည်။

စာရေးသူနှင့် ဝိညာဉ်တော်တန်ခိုး မပါရှိခြင်းကို ဤအခန်းငယ် (၈)တွင်တွေ့ရသည်။ ပထမစာစောင်သည် ဝိညာဉ်တော်ပါရှိသည်။ ဘုရားသခင်ကို ချီးမွမ်းဂုဏ်ပြုခြင်းဖြစ်သည်။ သို့သော် ပေါလုသည်လည်း သာမန်လူသားဖြစ်သည့်အားလျော်စွာ ကောရိန္သုသားများနှင့် ဆက်ဆံရာတွင် ပြည့်စုံသူမဟုတ်။ တခါတရံ အားနည်းချက်များ၊ စိုးရိမ်ခြင်းများရှိနိုင်သည်။ ကောရိန္သုများက စိတ်နှလုံးနာကျင်စေသည်။ ဤကျမ်းပိုဒ် သည် ပုဂ္ဂိုလ်ရေး ပရောပြုချက်နှင့် သန့်ရှင်းသော ဝိညာဉ်တော်ဖြင့် တရားဒေသနာ ဟောပြောခြင်း၏ ကွာခြားချက် သင်ခန်းစာဖြစ်သည်။၃၄

အကျဉ်းချုံးလျှင် ပေါလု၏ ပထမစာစောင်သည် ကောရိန္သုသားများအား အပြစ်တင်စာဖြစ်သောကြောင့် ဖတ်ရှုကြသောအခါ စိတ်ထိခိုက် ဝမ်းနည်းကြပေမည်။ ကောရိန္သုသားများ၏ တုံ့ပြန်စာဖတ်ရသောအခါ ထိုသို့ ရေးခဲ့မိသည့်အတွက် ပေါလုစိတ်မကောင်းဖြစ်သည်။ သို့သော်လည်း ကောရိန္သုသားများက အညှိုးမထား၊ ဗွေမယူ ကြသောကြောင့် စိတ်သက်သာရာရသည်။ သူ၏ဝမ်းနည်းခြင်းများကိုလည်း ကြာရှည်မထား။ ထိုဝမ်းနည်းခြင်း များကို အမှုတော်ထမ်းဆောင်ရာ၌ ခွန်အားအဖြစ် ပြောင်းလဲပစ်လိုက်သည်။

ပေါလု၏စာကြောင့် ကောရိန္သုသားများ ဝမ်းနည်းကြသည်ဟု အပိုဒ်ငယ်(၈)နိဂုံးပိုင်းတွင် ရေးထားသည်။ သို့သော် တဏသာ စိတ်မကောင်းဖြစ်ကြသည်။ ခဏသာဝမ်းနည်းကြသည်။ ကြာရှည်မခံ။

ပေါလုအတွက် စိတ်မကောင်းဖြစ်ကြသည်။ ခွဲစိတ်ကုသရမည့် အခြေအနေဆိုးမရောက်။ လူ့ကိုယ်ခန္ဓာ တွင် နာကျင်သောဝေဒနာများသည် ခွဲစိတ်ကုသရသည်။ အကယ်၍ ခွဲစိတ်ဆရာဝန်သည် ရင်းနှီးသောမိတ်ဆွေ ဖြစ်လျှင် စိတ်ရှည်စွာ ဂရုတစိုက်လုပ်ဆောင်ပေးသည်။ ခွဲစိတ်ဖို့လို မလိုစောင့်ကြည့်ပေးသည်။ ထိုကဲ့သို့ပင် ပေါလု ၏စိတ်မကောင်းခြင်းသည်လည်း ခွဲစိတ်ကုသရလောက်အောင် မဆိုးရွား။ သီးခံစောင့်ဆိုင်းလျှင် ပျောက်ကင်းနိုင် သော ယာယီအနာရောဂါသာဖြစ်သည်။ တခါတရံအချိန်သည် သမားတော်ကြီးဖြစ်သည် မဟုတ်လော။

: ယခု ပေါလုဝမ်းမြောက်နေသည်။ ထိုသို့ ဝမ်းမြောက်ခြင်းသည် ကောရိန္သုသားများအား စိတ်ထိခိုက်သောကြောင့် မဟုတ်။ ကောရိန္သုသားများ နောင်တရစေသောကြောင့် ဖြစ်သည်။ တနည်းအားဖြင့် ပေါလု၏စာကြောင့် ကောရိန္သုသားများ နောင်တရ၍ အသက်တာပြောင်းလဲစေသည်။ နောင်တရခြင်းကို Hoolge က ဤသို့ဖွင့်ဆိုထားသည်။ “နောင်တဆိုသည်မှာ ရည်ရွယ်ချက်ပြောင်းလဲခြင်းသာ မဟုတ်ပါ။ အပြစ်လမ်းမှ စိတ်နှလုံးလမ်းကြောင်း ပြောင်းခြင်းဖြစ်သည်။ အပြစ်ကို နာကျဉ်းမုန်းတီး၍ ဘုရားသခင်ဘက်သို့ ခြေဦးလှည့်ခြင်း ဖြစ်သည်။”၃၅

ကောရိန္သုသားများ၏ ဝမ်းနည်းမှုသည် အလိုတော်နှင့်ညီသော ကြေကွဲခြင်းဖြစ်သည်။ အဘယ့်ကြောင့် ဆိုသော် ဝမ်းနည်းခြင်းနောက်တွင် နောင်တရခြင်းလိုက်လာသည်။ အပြစ်ဖို့ခြင်းကို တနုံ့နုံ့ခံစား ဝမ်းနည်းခြင်း မပြုဘဲ၊ နောင်တရကာ ဘုရားသခင်ဘက်သို့ လျှောက်လှမ်းကြသည်။

:၁၀ ဘုရားသခင်၌ ဝမ်းနည်းခြင်းနှင့် လောကလူသား ဝမ်းနည်းခြင်းသည် မတူပါ။ ဘုရားသခင်၌ ဝမ်းနည်းခြင်းဆိုသည်မှာ အပြစ်အတွက် ဝမ်းနည်းခြင်းဖြစ်၍ ဝမ်းနည်းခြင်းနှင့်အတူ နောင်တ တရားပါရှိသည်။ ဘုရားသခင်နှင့် စကားပြောခြင်းဖြစ်သည်။ အပြစ်တရားကို ဆန့်ကျင်၍ ဘုရားသခင်ဘက်သို့ ခြေလှမ်းသည်။

ဘုရားသခင်အလိုတော်နှင့်ညီသော ဝမ်းနည်းခြင်းသည် ကယ်တင်ခြင်းကို ဖြစ်စေ၏ဟု ဆိုထားသည်။ ဝိညာဉ်ကယ်တင်ခြင်းကို မဆိုလိုပါ။ ကောရိန္သုသားများသည် ကယ်တင်ခြင်းရရှိသူများဖြစ်သည်။ ကယ်တင်ခြင်း ဆိုသည်မှာ အပြစ်အမျိုးမျိုး ဘဝ ဝန်ထုပ်ဝန်ပိုး၊ လူ့ဘဝပြဿနာများမှ ရွေးနှုတ်ခြင်းဖြစ်သည်။

မပြောင်းလဲသော နောင်တဆိုသည်မှာ အဘယ်နည်း။ နောင်တမှား သို့မဟုတ် ကယ်တင်ခြင်းကို ဆိုလို သလား။ ကယ်တင်ခြင်းနှင့်မဆိုင်သော နောင်တရခြင်းကို ဆိုလိုသည်။

လောကီသားများ၏ နောင်တသည် စစ်မှန်သောနောင်တ မဟုတ်ပါ။ သံဝေဂ ဖြစ်သည်။ ခါးသီးခြင်း စိတ်ခိုင်မာခြင်း၊ စိတ်ပျက်အားငယ်ခြင်း ဖြစ်စေပြီး သေရွာသို့ပို့ဆောင်ပါသည်။ ယုဒရှကာရုတ်၏ အသက်တာကို သင်ခန်းစာယူနိုင်ပါသည်။ ရှကာရုတ်၏နောင်တသည် ဘုရားသခင်အတွက် နောင်တရခြင်းမဟုတ်။ တရား သံဝေဂရခြင်းဖြစ်သည်။ အဘယ့်ကြောင့်ဆိုသော် သူကိုယ်တိုင် ထိုကြောက်ရွံ့ဖွယ်ရာ အဖြစ်ဆိုးကို ထပ်မံကျူးလွန် သည်။

:၁၁ ကောရိန္သုသားများဝမ်းနည်းခြင်း အကြောင်းကို (အငယ် ၁၀)ပါ ပုံဥပမာဖြင့် ရှင်းပြသည်။ ဘုရားသခင်၌ ဝမ်းနည်းခြင်းသည် လူ့အသက်တာ၌ လက္ခဏာပေါ်လွင် ထင်ရှားသည်။ ယနေ့ခေတ်ကာလတွင် လည်း တွေ့ရှိနိုင်သည်။ ဘုရားသခင်၌ ဝမ်းနည်းခြင်းကို ကိုယ်ကျင့်သိက္ခာ၌ သက်သေအထောက်အထား တွေ့ရှိနိုင်သည်။

ပထမဆုံးအချက်မှာ လုံ့လဝီရိယရှိခြင်း သို့မဟုတ် ဂရုစိုက်ခြင်းဖြစ်သည်။ ဤကျမ်းပိုဒ်သည် ပထမ သြဝါဒစာစောင်ကို ရည်ညွှန်းနိုင်သည်။ ပထမသြဝါဒစာစောင်နှင့် ခြားနားခြင်းမရှိပါ။ အကုန်လုံး အကျုံးဝင် ပါသည်။

ဒုတိယအချက်မှာ မိမိကိုယ်ကို အပြစ်ကင်းစင်ခြင်း ဖြစ်သည်။ မိမိကိုယ်ကို စစ်ကြောစီရင်ခြင်းမဟုတ်။ အခြားသူများအား ဝေဖန်ခြင်း၊ အပြစ်တင်ခြင်းမပြုရန် ဖြစ်သည်။ စိတ်သဘောထားက အပြုအမူများကို ထိန်းကျောင်း ပြောင်းလဲစေပါသည်။

အမျက်ဒေါသပြင်းခြင်းဆိုသည်မှာ လောကအမူအကျင့်နှင့်ကင်း၍ ခရစ်တော်နာမတော်ဖြစ်၍ ယဉ်ကျေး စွာပြုမူရန် သွန်သင်သည်။ စိတ်လိုက်မာန်ပါ ကိုယ်ထိလက်ရောက်မကျူးလွန်ရန် စိတ်ထိန်းဖို့ အဓိပ္ပါယ် သက်ရောက်သည်။

စိုးရိမ်ခြင်းဆိုသည်မှာ ဘုရားသခင်အား ချစ်ကြောက်ဖို့ဖြစ်သည်။ ပေါလု တုတ်ကိုင်၍ ရောက်လာမည်ကို စိုးရိမ်ခြင်းဖြစ်သည်။

တမ်းတခြင်းဆိုသည်မှာ ကောရိန္သုသို့ ပေါလုအလည်အပတ် ရောက်စေလိုခြင်း          ဖြစ်သည်ဟု ကျမ်းစာ ပညာရှင်အများစုက ဆိုကြသည်။ အမှားအမှန် ဝေဖန်ပိုင်ခြား အသိတရားလည်း ဖြစ်နိုင်ပါသည်။

စိတ်အားထက်သန်ခြင်းဆိုသည်မှာ တမန်တော်ပေါလု သွန်သင်ခဲ့သည့်အတိုင်း လောကညစ်ညူးခြင်းကို ပစ်ခွာ၍ ဘုရားသခင်အမှုတော်၌ စိတ်ပါဝင်စားစွာ အသက်တာ ဆက်ကပ်အပ်နှံခြင်းဖြစ်သည်။

ဒဏ်ပေးခြင်းဆိုသည်မှာ အပြစ်ပေးခြင်း၊ လက်စားတုံ့ပြန်ခြင်းဖြစ်သည်။ အပြစ်ချိုးဖောက်သူအား အသင်းတော်မှ မောင်းထုတ်ခြင်းဖြစ်သည်။ အပြစ်ကျူးလွန်သူသည် ပြစ်ဒဏ်ခံရသည်။

သင်တို့သည် အပြစ်အနာဆာများနှင့် ကင်းဝင်းကြပါသည်ဟု ပေါလုကဆိုထားသည်။ သို့သော် ထိုအပြစ် မျိုးကို တခါမှ ကျူးလွန်ခြင်းမရှိဟု ဆိုလိုသည်မဟုတ်။ အပြစ်အမျိုးမျိုး ကျူးလွန်ခဲ့သော်လည်း နောင်တနှင့် ဖြေခဲ့ကြပြီဟု ဆိုလိုသည်။

:၁၂ အရေးကြီးသော အချက်ကြီး (၄)ချက်ပါရှိသည်။ ပထမအချက်မှာ သင်တို့ထံသို့ ငါရေးခဲ့သောစာ ဖြစ်သည်။ ဒုတိယအချက်မှာ အမှားပြုသောသူဖြစ်၍၊ တတိယအချက်မှာ ပြစ်မှားခြင်းခံရသူ ဖြစ်သည်။ နောက်ဆုံးအချက်မှာ သင်တို့ထင်ရှားစေခြင်းငှာ ဖြစ်သည်။

သင်တို့ထံသို့ရေးခဲ့သောစာသည် ပထမသြဝါဒစာစောင်ဟုတ်သည်ဖြစ်စေ၊ အခြားထုတ်စာစောင်ဟုတ် သည်ဖြစ်စေ အဓိကမဟုတ်။ ပြစ်မှားသောသူဆိုသည်မှာ (၁ကော ၅)ပါ သွေးချင်းနှောသူ သို့မဟုတ် အသင်းတော် ထဲ၌ ဖောက်ပြန်သူဖြစ်သည်။ အကယ်၍ ပြစ်မှားသူသည် သွေးချင်းနှောသူမှန်လျှင် ပြစ်မှားခြင်းခံရသူသည် ထိုသူ၏ဖခင်ဖြစ်သွားမည်။ ပြစ်မှားသူသည် အသင်းတော်၏ သူပုန်သူကန်ဖြစ်လျှင် ပြစ်မှားခံရသူသည် ပေါလု ကိုယ်တိုင်ဖြစ်သည်။

KJV နှင့် NKJV ကျမ်းတွင် “သင်တို့အပေါ် ငါတို့၏ဂရုစိုက်ခြင်းသည် သင်တို့အပေါ်မှာ ပေါ်လွင်ထင် ရှားပါမည်ဟု ဆိုထားသည်။ ထိုနည်းနှင့်နှင်၊ ခေတ်သစ်ကျမ်းမူ NASBတွင်လည်း “ငါတို့လုပ်ဆောင်သမျှသည် သင်တို့အပေါ်၌ ဘုန်းတော်ထင်ရှားလိမ့်မည်”ဟု ဆိုထားသည်။

:၁၃ ပေါလု၏ပေးစာသည် အကျိုးအာနိသင်ရှိသောကြောင့် ဝမ်းမြောက်ဂုဏ်ယူသည်။ ပေါလု၏ ပေးစာကြောင့် ကောရိန္သုသားများ နောင်တရကြသည်။ ထိုဝမ်းနည်းကြကြောင်းကို တိတုက ထောက်ခံသော ကြောင့် ကောရိန္သုသားများအတွက် ရွှင်လန်းအားရသည်။ ဂုဏ်ယူဝမ်းမြောက်သည်။

:၁၄ တိတုအား ကောရိန္သုသို့ မစေလွှတ်မီ အားတက်သရော မှာကြားခဲ့သည်။ ကောရိန္သုသားများအတွက် ဂုဏ်ယူဝါကြွားခဲ့ခြင်းများသည်လည်း ဝါကြွားရကျိုးနပ်ပြီ။ ကောရိန္သုသားများသည် တိတုအားဖက်လှဲသတင်း နွေးထွေးစွာ ကြိုဆိုကြသည်။ ပေါလုဝါကြွားခဲ့သမျှသည် တိတုကိုယ်တိုင် နဖူးတွေ့ဒူးတွေ့ တွေ့ကြံခဲ့၍ အပြည့် အဝထောက်ခံသည်။

:၁၅ တိတုသည် ဂရိပြည်တောင်ပိုင်းတွင် ကြုံတွေ့ရမည့်အနာဂတ်ကို မမျှော်မှန်းရဲပါ။ မည်သို့လက်ခံ ကြမည်ကိုမသိ။ ကြမ္မာဆိုးကြုံတွေ့နိုင်သည်။ တကယ်ရောက်သောအခါ တက်တက်စင်လွဲသည်။ ကောရိန္သုသား များက ဖက်လှဲတကင်း ရင်းနှီးပျူငှာစွာ ကြိုဆိုကြသည်။ ယူဆောင်သွားသော ပေါလုစကားကိုလည်း တလေးတစား နာခံကြသည်။

တိတုအား ကြောက်ကြောက်ရွံ့ရွံ့ လက်ခံကြသည်ဆိုခြင်းမှာ ရွံ့ကြောက်ကြောက်နှင့် လက်ခံသည်ဟု ဆိုလို သည်မဟုတ်။ ချစ်ကြောက်ရိုသေစွာ ကြိုဆိုခြင်းကို ဆိုလိုသည်။ ဘုရားသခင် မျက်နှာတော်ကို ထောက်၍ရွှင်လန်း စွာ ကြိုဆိုကြသည်။

:၁၆ အရာရာ၌ ယုံကြည်သည် ဆိုသည်မှာ ဋီကာချဲ့စရာမရှိတော့ပါ။ ကောရိန္သုသားများ၏ ကျရှုံးခြင်း၊ လဲကျခြင်းမတွေ့ပါ။ ထို့ကြောင့် တိတုမသွားခင်က ပေါလု၏ ဂုဏ်ယူဝါကြွားခဲ့ခြင်းသည် အချည်းနှီးမဟုတ်၊ ကိုယ် တွေ့မျက်မြင်ဖြစ်ကြောင်း အားရဝမ်းသာသည်။ ပေါလု၏ အားကိုးယုံကြည်ချက်မှန်ကန်ကြောင်း ကောရိန္သုသား များက သက်သေပြကြသည်။ ပထမသြဝါဒစာရေးသားခဲ့စဉ်က အကြောင်းအရာများ လေးစားလိုက်နာရသည်ဟု ယုံကြည်ရသည်။

ဒုတိယသြဝါဒ စာစောင်၏ပထမပိုင်း နိဂုံးစကားဖြစ်သည်။ ပေါလုနှင့် သူ၏အမှုတော်ဆောင်ခြင်းဖြင့် ပြောင်းလဲသူများ၏အပြန်အလှန် ခင်မင်လေးစားသံယောဇဉ်ရှိကြပုံ၊ ဘုရားတရား ကြည်ညိုကြပုံကို တွေ့ရ သည်။ ကိုင်းကျွန်းမှီ ကျွန်းကိုင်မှီ အပြန်အလှန်ခွန်အား ရယူပုံတွေကို အားပါးတရ ဖတ်ရှုရသည်။ နောက်လာမည့် အခန်း(၂)ခုတွင် ပေးကမ်းလှူဒါန်းခြင်း ကျေးဇူးတော်အကြောင်းကို ဆက်လက်လေ့လာကြပါစို့။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက  http://bbcmm.net/the-believers-bible-commentary  တွင် လေ့လာနိုင်ပါသည်။

[post-views]

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။