2 Chronicles -30 -

ရာဇဝင်ချုပ်ဒုတိယစောင် - ၃၀

ပသခါပွဲတော်ပြင်ဆင်ခြင်း

1တစ်ဖန် ဧဖရိမ်အမျိုး၊ မနာရှေအမျိုးနှင့်တကွ ဣသရေလအမျိုး၊ ယုဒအမျိုးသားအပေါင်းတို့သည် ယေရုရှလင်မြို့၊ ဗိမာန်တော်သို့လာ၍၊ ဣသရေလအမျိုး၏ ဘုရားသခင် ထာဝရဘုရားအား၊ ပသခါပွဲကို ခံစေခြင်းငှာ၊ ဟေဇကိသည် စာရေး၍ ပေးလိုက်လေ၏။ 2ဒုတိယလတွင်၊ ပသခါပွဲကိုခံခြင်းငှာ ရှင်ဘုရင်သည် တိုင်ပင်၍၊ မှူးတော်မတ်တော်တို့နှင့် ယေရုရှလင်မြို့၌ စည်းဝေးသောသူ အပေါင်းတို့သည် စီရင်ကြပြီ။ 3ယဇ်ပုရောဟိတ်တို့သည် အမှုတော်ကို ဆောင်ရွက်နိုင်မည်အကြောင်း၊ ကိုယ်ကိုသန့်ရှင်းစွာ မပြုကြသေး။ ပြည်သူပြည်သားတို့သည် ယေရုရှလင်မြို့၌ မစည်းဝေးသောကြောင့် လွန်ခဲ့သောလတွင် ထိုပွဲကိုမခံနိုင်ကြ။ 4ရှင်ဘုရင်နှင့်စည်းဝေးသော သူအပေါင်းတို့သည် ထိုအမှုကိုနှစ်သက်သောကြောင့်လည်းကောင်း၊ ကျမ်းစာ၌လာသည်အတိုင်း၊ ကြာမြင့်စွာသော ကာလပတ်လုံး၊ ပသခါပွဲကို မခံသောကြောင့်လည်းကောင်း၊ 5အရပ်ရပ်တို့ကလာ၍၊ ဣသရေလအမျိုး၏ဘုရားသခင် ထာဝရဘုရားအား၊ ယေရုရှလင်မြို့၌ ပသခါပွဲကိုခံစေခြင်းငှာ၊ ဣသရေလပြည် တစ်လျှောက်လုံး၊ ဗေရရှေဘမြို့မှစ၍ ဒန်မြို့တိုင်အောင်၊ ကြော်ငြာစေမည်အကြောင်း အမိန့်တော်နှင့်စီရင်ကြ၏။ 6ရှင်ဘုရင်နှင့် မှူးမတ်တို့ပေးလိုက်သောစာကို စာပို့လုလင်တို့သည်ယူ၍၊ အမိန့်တော်အတိုင်း ဣသရေလပြည်နှင့် ယုဒပြည်တစ်လျှောက်လုံးသို့ ပြေးကြ၏။ စာ၌ပါသောစကားဟူမူကား၊ အိုဣသရေလအမျိုးသားတို့၊ အာဗြဟံ၊ ဣဇာက်၊ ယာကုပ်တို့၏ ဘုရားသခင် ထာဝရဘုရားထံသို့ ပြန်လာကြလော့။ အာရှုရိရှင်ဘုရင်တို့လက်မှလွတ်၍၊ ကျန်ကြွင်းသေးသောသူတို့ရှိရာသို့ ပြန်လာတော်မူမည်။ 7ဘိုးဘေးတို့၏ ဘုရားသခင် ထာဝရဘုရားကို ပြစ်မှားသော သင်တို့၏အဘများ၊ ညီအစ်ကိုများကဲ့သို့ မပြုကြနှင့်။ ပြစ်မှားသော ထိုသူတို့ကို သင်တို့မြင်သည်အတိုင်း၊ သုတ်သင်ပယ်ရှင်းခြင်းသို့ အပ်တော်မူပြီ။ 8သင်တို့အဘများကဲ့သို့ ခိုင်မာသောသဘော မရှိကြနှင့်။ ထာဝရဘုရား၌ ကိုယ်ကိုအပ်နှံကြလော့။ အစဉ်သန့်ရှင်းစေတော်မူသော သန့်ရှင်းရာဌာနတော်သို့ လာကြလော့။ ပြင်းစွာသော အမျက်တော်သည် သင်တို့မှ လွှဲသွားမည်အကြောင်း၊ သင်တို့၏ဘုရားသခင် ထာဝရဘုရား၏အမှုတော်ကို စောင့်ကြလော့။ 9သင်တို့သည် ထာဝရဘုရားထံတော်သို့ ပြန်လာလျှင်၊ သင်တို့၏ညီအစ်ကို သားသမီးတို့သည် သိမ်းသွားသောသူတို့ထံမှာ၊ ကရုဏာစိတ်နှင့် တွေ့ကြုံ၍၊ ဤပြည်သို့ တစ်ဖန် ပြန်လာကြလိမ့်မည်။ သင်တို့၏ ဘုရားသခင် ထာဝရဘုရားသည် ကျေးဇူးပြုချင်သောသဘော၊ သနားတတ်သောသဘောရှိသောကြောင့်၊ သင်တို့သည် အထံတော်သို့ပြန်လာလျှင်၊ မျက်နှာတော်ကို သင်တို့မှ လွှဲတော်မမူဟု စာ၌ပါသတည်း။ 10စာပို့လုလင်တို့သည် ဧဖရိမ်ခရိုင်၊ မနာရှေခရိုင် တစ်လျှောက်လုံး၊ ဇာဗုလုန်ခရိုင်တိုင်အောင် တစ်မြို့မှ တစ်မြို့သို့ ပြေးကြ၏။ ပြည်သားတို့သည် ပြက်ရယ်ပြု၍ ကဲ့ရဲ့ကြ၏။ 11သို့ရာတွင် အာရှာခရိုင်သား၊ မနာရှေခရိုင်သား၊ ဇာဗုလုန်ခရိုင်သားအချို့တို့သည် ကိုယ်ကိုနှိမ့်ချ၍ ယေရုရှလင်မြို့သို့ လာကြ၏။ 12ယုဒပြည်သားတို့သည် ထာဝရဘုရားမိန့်တော်မူသည်အတိုင်း၊ ရှင်ဘုရင်နှင့် မှူးမတ်တို့ စီရင်သည်အတိုင်း၊ တညီတညွတ်တည်း ပြုချင်သော စေတနာစိတ်ကို၊ ဘုရားသခင်တန်ခိုးတော်ကြောင့်ရကြ၏။

ပသခါပွဲတော်ကျင်းပခြင်း

13ဒုတိယလတွင် အဇုမပွဲကိုခံလိုသောငှာ၊ များစွာသောလူတို့သည် ယေရုရှလင်မြို့၌စည်းဝေးကြ၍၊ အလွန်ကြီးသောပရိသတ် ဖြစ်လေ၏။ 14သူတို့သည်ထ၍၊ ယေရုရှလင်မြို့၌ရှိသော ယဇ်ပလ္လင်တို့ကိုလည်းကောင်း၊ နံ့သာပေါင်းမီးရှို့ရာ ယဇ်ပလ္လင် ရှိသမျှတို့ကိုလည်းကောင်း ပယ်ရှင်း၍၊ ကေဒြုန်ချောင်းထဲသို့ ပစ်ချကြ၏။ 15ဒုတိယလ တစ်ဆယ်လေးရက်နေ့တွင်၊ ပသခါသိုးသငယ်ကို သတ်ကြ၏။ ယဇ်ပုရောဟိတ်၊ လေဝိသားတို့သည် သတိရ၍ ကိုယ်ကိုသန့်ရှင်းစေလျက်၊ မီးရှို့ရာယဇ်တို့ကို ဗိမာန်တော်ထဲသို့ သွင်းကြ၏။ 16ဘုရားသခင်၏လူ မောရှေပညတ်တရား၌ စီရင်သော ထုံးစံအတိုင်း၊ မိမိတို့နေရာ၌ ရပ်နေလျက်၊ ယဇ်ပုရောဟိတ်တို့သည် လေဝိသားတို့လက်မှ အသွေးကိုယူ၍ဖျန်းကြ၏။ 17မသန့်ရှင်းသောသူအများတို့သည် ပရိသတ်၌ပါသောကြောင့်၊ ထိုမသန့်ရှင်းသောသူ ရှိသမျှတို့ကို၊ ထာဝရဘုရားအဖို့ သန့်ရှင်းစေခြင်းငှာ၊ ပသခါသိုးသငယ်သတ်ခြင်းအမှုကို၊ လေဝိသားတို့သည် စောင့်ရကြ၏။ 18များစွာသောလူတည်းဟူသော၊ ဧဖရိမ်အမျိုး၊ မနာရှေအမျိုး၊ ဣသခါအမျိုး၊ ဇာဗုလုန်အမျိုးသားအများတို့သည် ကျမ်းစာ၌ပါသော တရားသို့မလိုက်၊ ကိုယ်ကိုမသန့်ရှင်းစေဘဲ၊ ပသခါသိုးသငယ်ကို စားကြ၏။ 19သို့ရာတွင်၊ ဟေဇကိက၊ သန့်ရှင်းရာဌာနထုံးစံအတိုင်း၊ သန့်ရှင်းခြင်းမရှိသော်လည်း၊ ဘိုးဘေးတို့၏ဘုရားသခင် ထာဝရဘုရားကို ဆည်းကပ်ခြင်းငှာ၊ သဘောကျသောသူအပေါင်းတို့၏ အပြစ်ကို ကောင်းမြတ်သော ထာဝရဘုရားသည် လွှတ်တော်မူပါစေသောဟု ထိုသူတို့အဖို့ ဆုတောင်းသဖြင့်၊ 20ထာဝရဘုရားသည် ဟေဇကိစကားကို နားထောင်တော်မူ၍၊ လူများတို့ကို ချမ်းသာပေးတော်မူ၏။ 21ယေရုရှလင်မြို့၌ စည်းဝေးသော ဣသရေလအမျိုးသားတို့သည်၊ ခုနစ်ရက်ပတ်လုံး အလွန်ရွှင်လန်းသောစိတ်နှင့် အဇုမပွဲကိုခံကြ၏။ ယဇ်ပုရောဟိတ်လေဝိသားတို့သည် အသံကျယ်သောတူရိယာမျိုးကို တီးမှုတ်လျက်၊ နေ့ညမပြတ် ထာဝရဘုရားအား ထောမနာသီချင်း ဆိုကြ၏။

ဒုတိယအကြိမ်ပွဲတော်ကျင်းပခြင်း

22ထာဝရဘုရား၏ တရားတော်မြတ်ကို သွန်သင်သော လေဝိသားအပေါင်းတို့ကို၊ ဟေဇကိသည် အားပေးသောစကားနှင့် နှုတ်ဆက်သဖြင့်၊ သူတို့သည် ခုနစ်ရက်ပတ်လုံးပွဲခံစဉ်အခါ၊ စားသောက်လျက် မိတ်သဟာယ ပူဇော်သကာကိုပြုလျက်၊ ဘိုးဘေးတို့၏ဘုရားသခင် ထာဝရဘုရားအား တောင်းပန်လျက် နေကြ၏။ 23စည်းဝေးသောသူ အပေါင်းတို့သည် ခုနစ်ရက်ထပ်၍ ပွဲခံခြင်းငှာ တိုင်ပင်ပြီးမှ၊ ရွှင်လန်းသောစိတ်နှင့် ခုနစ်ရက်ထပ်၍ ပွဲခံကြ၏။ 24ယုဒရှင်ဘုရင်ဟေဇကိသည် နွားတစ်ထောင်နှင့် သိုးခုနစ်ထောင်တို့ကိုလည်းကောင်း၊ မှူးမတ်တို့သည် နွားတစ်ထောင်နှင့် သိုးတစ်သောင်းကိုလည်းကောင်း၊ စည်းဝေးသောသူတို့အား ပေးကြ၏။ များစွာသောယဇ်ပုရောဟိတ်တို့သည် ကိုယ်ကို သန့်ရှင်းစေကြ၏။ 25ယဇ်ပုရောဟိတ်၊ လေဝိသားတို့နှင့်တကွ ယုဒပရိသတ်များ၊ ဣသရေလပြည်မှလာသော ပရိသတ်များ၊ ယုဒပြည်၌နေသော တစ်ပါးအမျိုးသား၊ ဣသရေလပြည်မှလာသော တစ်ပါးအမျိုးသားတို့သည် ဝမ်းမြောက်ဝမ်းသာကြ၏။ 26ထိုသို့ ယေရုရှလင်မြို့၌ ကြီးစွာသောဝမ်းမြောက်ခြင်းရှိ၏။ ဣသရေလရှင်ဘုရင် ဒါဝိဒ်သားရှောလမုန် လက်ထက်မှသည်၊ နောက်တစ်ဖန် ယေရုရှလင်မြို့၌ ထိုမျှလောက်ကြီးစွာသော ဝမ်းမြောက်ခြင်းမရှိ။ 27ထိုအခါ ယဇ်ပုရောဟိတ်၊ လေဝိသားတို့သည်ထ၍ လူများတို့ကို ကောင်းချီးပေးကြ၏။ သူတို့စကားသံကို ဘုရားသခင်ကြားတော်မူ၏။ သန့်ရှင်းသောကျိန်းဝပ်တော်မူရာ၊ ကောင်းကင်ဘုံသို့ ပတ္ထနာစကားတက်လေ၏။

ရာဇဝင်ချုပ်ဒုတိယစောင် - ၃၀ (အနက်ဖွင့်)

၃၀:၁–၅ အခန်း(၃၀) သည် ဟေဇကိမင်း၏ ပသခါပွဲတော်ကျင်းပခြင်းအကြောင်းစုံဖြစ်သည်။ ဣသရေလပြည်နှင့် နှစ်ပိုင်းကွဲပြားသည့်အချိန်မှစ၍ လစ်လျှူရှုပစ်ပယ်ကြသည့်ပွဲတော်ဖြစ်သည် (၆ရာ ၈:၁၃)။

ဟေဇကိမင်းသည် ပထမလတွင် ဗိမာန်တော်အတွင်းအပြင်အား သန့်ရှင်းရေးပြုလုပ်သည်။ ဒုတိယတွင် ပသခါပွဲတော်နှင့် တဆေးမဲ့မုန့်ပွဲတော်ကျင်းပရန် ပြင်ဆင်သည်။ ဟော ၉:၁၁ အရခရီးလွန်ခြင်း၊ အသုဘအလောင်းကောင် ကိုင်တွယ်သဖြင့် ပထမလတွင် မပါဝင်ခြင်းရှိသူများအတွက် ဒုတိယလတွင် ပသခါပွဲတော်ကျင်းပစီရင်သည်။ ဟေဇကိမင်းသည် ထိုအချက်များနှင့် အကြုံးမဝင်သော်လည်း ယဇ်ပုရောဟိတ်များကိုယ်တိုင်၌ ပထမလတွင် ပသခါပွဲတော်ကျင်းပရန် အသင့်မဖြစ်ကြသေး(ငယ်၃)။ ပသခါပွဲတော်သည် အမျိုးသားများအားလုံးနှင့် သက်ဆိုင်သောကြောင့်လူတိုင်းကို ဖိတ်ခေါ်သည်။သို့ကြောင့် ယုဒပြည်အဝှမ်း၊ ဣသရေလပြည်အနှံ့ ကြေညာမောင်းခတ်ခိုင်းသည်။ ထိုကာလတွင် ဣသရေလပြည်သည် အာရှုရိလက်အောက်၌ ကျရောက်သည်။ အချို့က ဖမ်းဆီးခေါ်ဆောင်သွားခြင်းခံရသည်။သို့သော် ဟေဇကိမင်းသည် ဝတ္တရားရှိသည့်အတိုင်း ဖိတ်ခေါ်သည်။ အာရှုရိလူများကို ထိပါးနှောင့်ရှောက်ခြင်းမဟုတ်။

၃၀:၆–၁၂ ဘုရားသခင်ထံတော်သို့ ပြန်လာကြပါဟူသော ရွာဆော်သံကို ကြားရသော ဣသရေလလူများက ရီမောဟားတိုက်ကြသည်။ သို့သော်လည်း ဘုရားမှန်ကိုသိရှိသော ဣသရေလလူနည်းစုသည် ဟေဇကိမင်းဦးစီးကျင်းပသော ပသခါပွဲတော်ပါဝင်ရန် ယေရှုရှလင်မြို့သို့ သွားကြသည်။ ထိုနှစ်သည် ဘီစီ ၇၁၆-၇၁၅ ဖြစ်သည်(၆ရာ ၂၉:၃)။

၃၀:၁၃–၁၅ လူထုပရိသတ်သည် စိတ်အားထက်သန်စွာပါဝင်သဖြင့် ယဇ်ပုရောဟိတ်များနှင့် လေဝိသားများသည် ဗျာများကြသည်။ ပင်ပန်းကြီးစွာလုပ်ဆောင်ကြသည်။ ယေရုရှလင်မြို့တော်တစ်ခုလုံးအား ဦးစွာစင်ကြယ်အောင်ပြုလုပ်ကြသည်။ ရုပ်တုဘုရားတုများကို ဖြိုဖျက်အမှုန့်ကြိတ်၍ ဂေဒြုန်ချောင်းသို့ မျှောပစ်ကြသည်။

၃၀:၁၆–၂၇ လေဝိသားများသည် မစင်ကြယ်သော အညစ်အနွမ်းများကို အားသွန်ခွန်စိုက်လုပ်ဆောင်ကြသည်။ ဟေဇကိမင်းဆုတောင်းချက်ကို ဘုရားသခင်နားညောင်းတော်မှန်း သိသောကြောင့် ပြည်သူများသည်လည်း လှိုက်လှဲစွာ ဝမ်းသာရွှင်မြူးကြသည်။ တဆေးမဲ့မှုန့်ပွဲတော်ကို နောက်ထပ်(၇)ရက်ကျင်းပရန်သဘောတူကြသည်။ ဟေဇကိမင်းနှင့် ခေါင်းဆောင်ကြီးများက ယဇ်ကောင်များထပ်မံထုတ်ပေးသောကြောင့် ယေရုရှလင်တမြို့လုံး ခြိမ့်ခြိမ့်သဲ ပျော်ရွှင်ကြသည်။ ဣသရေလတို့ ရွှေခတ်ကဲ့သို့ပင် ပွဲတော်တခုလုံး ကောင်းကြီးမင်္ဂလာပြည့်ဝသည်။ ယေဟောဝါဘုရားရှင်ဘုရင်၏ ယဇ်ပုရောဟိတ်များ၏ ဆုတောင်းသံများသည် ကောင်းကင်နိုင်ငံသို့ တိုက်ရိုက်ရောက်ရှိသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။