ရှောလမုန်သီချင်း - ၁

သီချင်းတကာတို့တွင် အထွဋ်ဖြစ်သော ရှောလမုန်သီချင်း
1သီချင်းတကာတို့တွင် အထွတ်ဖြစ်သော ရှောလမုန်သီချင်း။
သတို့သမီးနှင့်မိတ်ဆွေများ
2သခင်နှုတ်ဆက်သော နမ်းခြင်းဖြင့် ကျွန်မကိုနမ်းပါစေ။ ကိုယ်တော်၏မေတ္တာသည် စပျစ်ရည်ထက် သာ၍ကောင်းပါ၏။ 3ကိုယ်တော်၌ မွှေးကြိုင်သော နံ့သာဆီကဲ့သို့၊ နာမတော်သည် သွန်းလောင်းသော နံ့သာဆီဖြစ်ပါ၏။ ထိုကြောင့် သတို့သမီးကညာတို့သည် ကိုယ်တော်ကို ချစ်ကြပါ၏။ 4ကျွန်မကို သွေးဆောင်တော်မူပါ။ ကျွန်မတို့သည် နောက်တော်သို့ ပြေး၍လိုက်ကြပါမည်။ အရှင်မင်းကြီးသည် အိမ်တော်အတွင်းခန်းထဲသို့ ကျွန်မကို ဆောင်ခဲ့တော်မူပြီ။ ကျွန်မတို့သည် ကိုယ်တော်ကြောင့် ဝမ်းမြောက်ရွှင်လန်းကြမည်။ မေတ္တာတော်ကို စပျစ်ရည်ထက် သာ၍ချီးမွမ်းကြမည်။ သတို့သမီးကညာတို့သည် ကိုယ်တော်ကို မှန်ကန်စွာ ချစ်ကြပါ၏။
5အိုယေရုရှလင်မြို့သမီးတို့၊ ငါသည် ကေဒတဲကဲ့သို့ မည်းသောအဆင်းရှိသော်လည်း၊ ရှောလမုန်မင်း၏ကုလားကာကဲ့သို့ တင့်တယ်သေး၏။ 6ငါသည် နေပူကိုခံ၍ မည်းသောအဆင်းရှိသောကြောင့်၊ ငါ့ကို မကြည့်ရှုကြပါနှင့်။ ငါ့မိခင်၏သားသမီးတို့သည် ငါ့ကို မနာလိုသောစိတ်ရှိ၍၊ စပျစ်ဥယျာဉ်တို့ကို စောင့်စေကြ၏။ ကိုယ်ဥယျာဉ်ကို မစောင့်ရပါ။
7ကျွန်မ နှစ်သက်နှစ်လိုရာအရှင်၊ ကိုယ်တော်သည် သိုးများကို အဘယ်မှာ ထိန်းတော်မူသည်ကိုလည်းကောင်း၊ မွန်းတည့်ချိန်၌ အဘယ်မှာ အရိပ်ခိုစေတော်မူသည်ကိုလည်းကောင်း ပြတော်မူပါ။ ကျွန်မသည် အခြားတစ်ပါးသော သိုးထိန်းနောက်သို့ အဘယ်ကြောင့် လမ်းလွဲ၍လိုက်ရပါအံ့နည်း။
8မိန်းမတကာတို့ထက် အဆင်းလှသောအစ်မ၊ သင်သည်မသိလျှင်၊ သိုးများခြေရာသို့ လိုက်သွား၍၊ သိုးထိန်းတဲများအနားမှာ သင်၏သိုးသငယ်တို့ကို ကျွေးမွေးပါလော့။
သတို့သားနှင့်သတို့သမီး
9ငါချစ်သောနှမ၊ သင့်ကို ဖာရောမင်းရထား၌ ကသောမြင်းနှင့် ငါပုံပြမည်။ 10သင်၏ပါးသွယ်၌ မုတ်ပုတီး တန်ဆာဆင်လျက်၊ လည်ပင်း၌ ပုလဲအသွယ်သွယ်ဆွဲလျက်၊ သင်သည် တင့်တယ်လှ၏။ 11ငွေနှင့် အပြောက်ချယ်သော ရွှေပုတီးအသွယ်သွယ်ကိုလည်း လုပ်၍ပေးဦးမည်။
12အရှင်မင်းကြီးသည် စားပွဲတော်နားမှာထိုင်နေစဉ်၊ ငါထုံသော နာဒုဆီမွှေးအနံ့သည် တပျံ့ပျံ့တလှိုင်လှိုင် ဖြစ်လေ၏။ 13ငါချစ်ရာသခင်သည် ငါ၌ မုရန်နံ့သာပုံဖြစ်၍၊ ငါ့ရင်အုံကြားမှာ တစ်ညလုံး အိပ်ရမည်။ 14ငါချစ်ရာသခင်သည် အင်္ဂေဒိဥယျာဉ်မှ ဖြစ်သော ဟင်္နာခက်ရွက်စည်းကဲ့သို့ ဖြစ်ပါ၏။
15ငါချစ်သောနှမ၊ သင်သည် အဆင်းလှပေ၏။ အလွန်လှပေ၏။ ချိုးမျက်စိနှင့် ပြည့်စုံ၏။
16ငါချစ်ရာသခင်သည် အဆင်းလှ၍၊ ချစ်ဖွယ်သော လက္ခဏာနှင့် ပြည့်စုံတော်မူ၏။ ငါတို့အိပ်ရာခင်းသည် စိမ်းသောအဆင်းရှိ၏။ 17ငါတို့ဗိမာန်တိုင်တို့သည် အာရဇ်ပင်၊ အမိုးသည် ထင်းရှူးပင်ဖြင့် ပြီးသတည်း။

ရှောလမုန်သီချင်း - ၁ (အနက်ဖွင့်)

၁။           ခေါင်းစဉ်

ဤသီချင်းကို “သီချင်းတကာ့သီချင်း”ဟုအမည်ပေးထားသည်။ ရှောလမုန်၏ အချစ်အတ္ထုပ္ပတ္တိ တပုဒ်ဖြစ်သည်။

၂။            ခစြျသူသိုးထိနျးနှငျ့ကငျးဝေးသော ရှောလမုနျထံရောကျ ရှုလမိတျအားနနျးတှငျးသူမြားက ဖြောငျးဖပြုံ (၁း၂-၈)

၁း၂-၄ ရှုလမိတ်မိန်းမလှသည် သူ့ချစ်သူသိုးကျောင်းသား၏  အနမ်းအပွေ့များကို သတိရလွမ်းဆွတ် နေသည်။ သူ့အချစ်သည် ၀ိုင်ထက်ချိုမြကြောင်းပတ်ချွဲပုံများကို ကြားယောင်သည်။ သူ၏တန်ဖိုးသည် ဘိသိက်ပေးရာနံ့သာဆီမွှေးနှင့်ညီသည်။ ထို့ကြောင့် ပျိုတိုင်းကြိုက်သော နှင်းဆီခိုင်ဖြစ်သည်။ သို့သော်လည်း အခြားသူများကို မချစ်စေချင်။ သူ့ကိုသာချစ်စေချင်သည်။ ယေရုရှလင်သမီး များကိုလည်း သတိပေးလိုက်မည်။ သူသာလျှင် မောင့်မူပိုင်ရှင် အချစ်ဖြစ်ရမည်။ သူ့အချစ်မောင်တော်ကို ပိုးပန်းဖို့မကြိုးစားကြနှင့်။ မောသွားမည်။ ရှောလမုန်ဘုရင်က ရှုလမိတ်အား သလွန်ဆောင်တော်သို့ပင့်ဆောင် ပိုးပန်းခဲ့သော်လည်း တုန့်ပြန်ခြင်းမပြု။ ယေရုရှလင်သမီးပျိုးများက ရှောလမုန်အား အသဲစွဲချစ်ကြိုက်ကြသည် ဖြစ်လောက်ပါပေသည်။

၁း၅-၆   ရှုလမိတ်၏အသားအရောင်သည် နန်းတော်နှင့်အထိုက်တန်၊ စပျစ်ဥယျာဉ်တောတွင် အနေများသဖြင့် ညိုပြာညက်သည်။ သို့သော် မဆိုးလှ။ ပို၍ပင်ချစ်စရာကောင်းသေးသည်။

၁း၇-၈   ချစ်သူသက်ထားငယ်ရီးစားကိုသာ အတွေးစွဲညှိသည်။ သိုးများကို ဘယ်တော အုပ်ပျိုနားမှာ ထိန်းကျောင်း၍ အဘယ်တောရိပ်ခိုပါလိမ့်။ တွေးရင်းတောရင်း မိမိကိုယ်ကို ဖြေသိမ့်ရပြန်သည်။ ယခုမှု ကုလားကာခြားလို့ တပါးဆီသို့ရောက်ရပြီ။ အဘယ်သူလာ ချော့လှည့်ပါမည်လဲ။

သိုးခြေရာရောက်လျှင် တွေ့နိုင်မှာပေါ့ဟု ယေရုရှလင်သမီးပျိုများက သူ့အချစ်ကို မနာလို စောင်းချိတ်စကားဆိုကြသည်။

၃။           ရှေလမုန်ကရှုလမိတ်အား ပိုးပန်းသော်လည်း ခွန်းတု့ပြန်ရန် ဆွံ့အခြင်း (၁း၉-၂း၆)

၁း၉-၁၀ ရှောလမုန်က ရှုလမိတ်အား အချစ်ခုံရုံးတင်ထားသည်။ ရှုလမိတ်အား ကကြိုးတန်ဆာဆင်ထားသော ဖာရော့မြင်းရထားနှင့် ယှဉ်သည်။ လှသထက်လှ၊ ယဉ်သထက်ယှဉ်အောင် နှစ်သက်ရာလက်၀တ်တန်ဆာဆင်ပေးမည်။ ရွှေလည်တိုင်မှာ ပုလဲအသွယ် သွယ်သီပေးမည်။

၁း၁၁     ဒယ်ဒီတာ့စကားအရ ရွှေငွေလက်၀တ်လက်စား၊ ရတနာစည်းစိမ်များဖြင့် ပိုးပန်းသည်။ ငွေဖြင့် အချစ်၀ယ်ဖို့ကြိုးပမ်းသည်။

၁း၁၂-၁၄ ရှုလမိတ်သည် ရှောလမုန်၏ချစ်သွေးစကားများကို နားမ၀င်။ ဆွဲဆောင်မှုမရှိ။ ရန်ခုန်ခြင်းမပြုနိုင်။ ငယ်ချစ်ဦးကိုသာ လွမ်းတသသ ဆွေးမြေ့သည်။ ဘုရင်မင်းစားပွဲမှာ ထိုင်သော အခါ နံ့သာဆီမွှေးပျံ့ပျံ့ထုံပါ၏။ ချစ်သူရည်းစားသိုးကျောင်းသားမှာ ရင်အုံနှစ်မွှာကြား မုရန်ရနံ့သင်းလေးမွေး၏ အ‌‌ဂ်ေစပျစ် ဥယျာဉ်မှ ပွင့်ဦးရနဲ့သင်းမြမြဖြစ်ပါ၏။

၁း၁၅     အလို၊ မိန်းကလေး သင့်မျက်လုံးဆန်များသည် ၀င်းပပညှို့အားကောင်းလေစွ။  ချိုးမျက်လုံး အလှပြည့်စုံ၏ ။ အဆင်းတန်ဆာတင့်ပေ၏။

၁း၁၆-၁၇ သို့သော် ရှုလမိတ်၏နှလုံးသားကို မထိုးဖောက်နိုင်။ သူ့ချစ်သဲသည်လည်း သူ့အမြင်မှာလှပပေသည်။ ပြေပါပေသည်။ ဟင်းလင်းပြင်သည် သူတို့စုံတွဲပျော်စံရာ ဂေဟာ၊ မြက်ခင်းလွင်ပြင်သည် ကတ္ထီပါမွေ့ယာ၊ ဆီဒါကိုင်းနှင့် ထင်းရှူးရွက်များသည် နှစ်ကိုယ်တူချစ်သူ နှစ်ဦး တဲခေါင်မိုးများဖြစ်သည်။ နှစ်ကိုယ်တူတဲအိုပျက်မှာနေရနေရ မမှု၊ အချစ်ဗိမာန်သာလျှင် ဘ၀ဘုံနန်းဖြစ် သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက  http://bbcmm.net/the-believers-bible-commentary  တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။