ဆာ ၈၁၊တံပိုးမှုတ်ပွဲတော်

ယုဒလူများ၏ အလုပ်ပိတ်ရက်ရုံးအားရက်ကို Unger ကအောက်ပါအတိုင်းဆိုထားသည်။

တံပိုးမှုတ်ပွဲတော်သည် တရက်လုံးကျင်းပရသော ပွဲတော်ဖြစ်သည်။ ထိုနေ့တွင်အလုပ်မလုပ်ကြ။ ဦးချိုများ မှုတ်ကြသည်။ သန့်ရှင်းသောပွဲတော်ဖြစ်သည်။ နောက်ပိုင်းတွင် စားသောက်ပွဲများ ပါလာသည်။ ဆာ ၈၁ ပါအတိုင်းယဇ်ပရောဟိတ်နှင့် လေဝိသားများက စပျစ်ဝိုင်လောင်းကြသည်။ ပွဲတော်ညနေခင်းတွင် ဆာ၂၉ သီဆို ကြသည်။ နံနက်မိုးလင်းယံမှ ညနေခင်းတိုင်အောင် ယေရုရှလင်တမြို့လုံး၌ အုန်းအုန်းကျွတ်ကျွတ် သောသောညံညံအောင် တံပိုးမှုတ်ကြသည်။ ရဗ္ဗိဆရာများက ထိုနေ့ရက်သည် ဘုရားသခင်က လောကလူသား များအား တရားစီရင်ရာနေ့ဟု ခံယူကြသည်။ သိုးအုပ်များကို သိုးထိန်းထံသို့အပြောင်းအလွဲလုပ်ကြသည်။

တံပိုးမှုတ်ပွဲတော်သည် မိမိအိမ်ယာ၊အသင်းတော်နှင့်ဝေးလံလေလွင့်သူများအား ပြန်လည်ခေါ်ယူ စုစည်း သည့် သဘောပုံဆောင်သည်။

၈၁:၁–၅က။ ကျမ်းအဖွင့်တွင် ဣသရေလလူများက လူများအား ဘုရားသခင်ချီးမွမ်း သီချင်းဆိုဖို့ဖိတ် ခေါ်သည်။ ထိုဘုရားရှင်သည် ဣသရေလတို့၏ ခွန်အားအရင်းအမြစ် ချီးမွမ်းထိုက်သော ယာကုပ်၏ဘုရား ကျေးဇူးတော်မြစ်ဖျားခံရာ အရှင်သခင်ဖြစ်သည်။ ခုံးမျက်စသုံးရက်လ အလွန်လဆန်း(၇)ရက်တွင် ယဇ်ပရောဟိတ်များက အချက်ပေးသည်နှင့်တပြိုင်နက် လေဝိလူများသည် သူရိယာများ တီးမှုတ်ကြသည်။ ဣသရေလတမျိုးလုံးအလုပ်နားရက် ရုံးပိတ်ရက်အဖြစ်ဘုရားရှင်က ပြဌါန်းပေးသည်  (၀တ် ၂၃:၂၃-၂၅၊ ကော ၂၉:၁) အဲဂုတ္တုပြည်တဘက်၌ ကြွသွားသည်နှင့် ယောသပ်အမျိုး၌သက်သေခံချက်တည်၏။ ဤနေရာတွင် ယောသပ်အမျိုးဆိုသည်မှာ ဣသရေလတမျိုးလုံးကိုခြုံငုံခေါ်ဆိုသည်။ ထိပ်တိုက်ရင်ဆိုင် ခဲ့ရသော အဲဂုတ္တုလူမျိုး လက်အောက်မှ လွတ်မြောက်သည့်အထိမ်းအမှတ်ပွဲတော်လည်းဖြစ်သည်။

၈၁:၅ခ။ အပိုဒ်ငယ် ၅တွင် နားမလည်သောစကား ကြားရာအရပ်ဟု ဆိုသည်။ ထိုစကားပြောသူသည် ဆာလံဆရာလား၊ ဣသရေလလား၊ ဘုရားသခင်လား ဆင်ခြင်စဉ်းစားစရာရှိသည်။

အကယ်၍ ဆာလံဆရာ သို့မဟုတ် ဣသရေလဖြစ်နေလျှင် အောက်ပါအတိုင်းနားလည်ရသည်။

၁။ အဲဂုတ္တုပြည်စကားမဟုတ်သော တိုင်းတပါးဘာသာစကား (ဆာ ၁၁၄:၁)။

၂။ ဘုရားသခင်က ဣသရေလလူများအား အဲဂုတ္တုပြည်မှ ရွေးထုတ်စဉ် ဘုရားသခင်က ဗျာဒိတ်တော် အသစ်ဖွင့် ပြခဲ့သည်။

၃။ ဘုရားသခင်၏ ဗျာဒိတ်စကားဖြစ်ကြောင်း ဆာလံကျမ်းပိုဒ်များ၌ ထပ်တွေ့နိုင်သည်။

အကယ်၍ ဘုရားသခင်၏စကားတော်မှန်လျှင် အောက်ပါအတိုင်းစဉ်းစားစရာဖြစ်လာသည်။

ဘာသာစကားမျိုးကြားရသည် (အဲဂုတ္တုဘာသာစကား)ဟု ဆိုသည်။ Williams က “ကိုယ်တော်၏ သိုးများစကားကဲ့သို့ အဲဂုတ္တုပြည်သားတို့၏ စကားနားမလည်ဟု အနက်ဖွင့်သည်။

ဆာလံကျမ်းများတွင် “ငါ”ဟူသော ဝေါဟာရသည် ဘုရားသခင်ကိုရည်ညွှန်းလေ့ရှိသော ကြောင့်ဘုရားသခင်၏ စကားတော်ဟုယူဆရသည်။

၈၁:၆–၇။ ဘုရားသခင်က ဣသရေလတို့ထမ်းပိုးနေသော အဲဂုတ္တု၀န်ထုပတ်၀န်ပိုးများကို ပုခုံးပေါ်မှ ချပေးလိုက်သည်။ တောင်းအပြည့်ရွှံ့စေးနှင့် ကျောက်များအား မနားမနေ သယ်ယူနေသောလက်များလည်း အနားပေးလိုက်သည်။ ဘုရားသခင်ကိုခေါ်ယူ ကြသည့်အတိုင်းရောက်လာ၍ အနားပေးအစာကျွေးလေပြီ။ မိုးကြိုးမုန်တိုင်းလွတ်ကင်းရာနေရာ၌ အနားပေးလေပြီ။ မိုးတိမ်ကလိုက်လံပြသလျက် ပညတ်တော်ပေးရာ သိနာတောင်ခြေသို့ ပို့ဆောင်သည်။ ထိုနေရာတွင်ဘုရားသခင်က ရေငတ်ခြင်းဖြင့် စုံစမ်းသည်။ မောရှေက မေရိဘအရပ်တွင် ကျောက်ဆောင်ကို ရိုက်ခွဲသဖြင့်ရေထွက်လာသော်လည်း ဘုရားသခင်ခိုင်းသည့်အတိုင်း မဟုတ်။

၈၁:၈–၁၀။ ဘုရားသခင်ကိုယုံကြည်ခြင်း သစ္စာစောင့်ထိန်းမှသာလျှင် ကောင်းချီးမင်္ဂလာခံစာကြမည်ဟု သတိပေးလိုက်သည်။ ရုပ်တုဆင်းတုလုံးဝ မကိုးကွယ်ရဟု တားမြစ်ထားသည်။ ထိုသို့ဂတိက၀တ် သတိပေးပြီးမှ အဲဂုတ္တုပြည်သို့ခေါ်ဆောင်လာခဲ့သည်။ ယုံကြည်ခြင်းသစ္စာရှိနေသရွေ့မပူရ။ ပါးစပ်မည်မျှ ကျယ်ကျယ် အ၀ကျွေးမည်။ ထိုကျမ်းစကားကို လူပျင်းတရားဟောဆရာများက တလွဲယူ၍ ကြိုတင်ပြင်ဆင်ခြင်းမပြု အားထုတ်ခြင်းမပြုဘဲ၊ ဘုရားသခင်ထံသို့ ပါးစပ်ကျယ်ကျယ်ဟဖို့ရန် သွန်သင်ကြသည်။ ထိုစကားသည်လုံး၀မှားယွင်းသည်။ အမှန်မှာအားကိုးတကြီးဖြင့် ဘုရားထံ ရောက်လာသူတိုင်း လက်ချည်းမပြန်ရဟု အနက်ပြန်သည်။ နာခံခြင်းရှိ သူသည်နားကိုသာ စိုက်ထောင်သည်မဟုတ်။ စကားတော်တွင်ပါရှိသည့်အတိုင်းလက်တွေ့လည်းလုပ်ရသည်။ Gaebelein က ဤသို့ဖွင့်ဆိုထားသည်-

ဝါကျတခုလုံး၏အဓိပ္ပါယ်ကို တိတိကျကျမည်သူနားလည်နိုင်သလဲ။ ဘုရားသခင်သည် အရာခပ်သိမ်းကို တတ်စွမ်းနိုင်သည်ဖြစ်၍ မလုပ်နိုင်သောအလုပ်မရှိ။ ကိုယ်တော်က ပါးစပ် နိုင်သမျှဟပါ၊ ပါးစပ်အပြည့်ကျွေးမည်ဟု ဆိုသည်။ ဓမ္မသစ်ကျမ်းတွင်ငါ၏နာမတော်၌ တောင်းဆိုပါကပေးမည်ဟု ကတိတော်ပေးထားသည်။ စိတ်တော်နှင့်ထိတွေ့အောင်တောင်းဆိုသမျှကို ကိုယ်တော်နားညောင်း တော်မူသည်။

၈၁:၁၁–၁၆။ သို့သော် ဘုရားသခင်၏ လူများသည်နားပင်းကိုးကားများဖြစ်ကြသည်။ အသံတော်မကြား၊ နာခံခြင်းမရှိ။ ပြန်မပြောနားမထောင် ထုံပေပေလုပ်ကြသည်။ သို့ကြောင့်ထင်ရာစိုင်းကြစေဟု လွှတ်ပေးသည်။ ဘယ်ကမ်းဘယ်သောင်ဆိုက်ကြမည်လဲ။ ထိုသို့ဘေးမဲ့ပေးလိုက်သော်လည်း စိတ်တော်မချမ်းသာ။ အမိုက်အမဲ လေးများ၏ခေါင်းမာမူကို သနားသည်။ နာခံခြင်းရှိကြလျှင် ရန်သူများကိုနှိမ်နင်းပေးမည်။ ရန်သူများသည် ဘုရားသခင်ရှေ့တော်တွင်ကြောက်ဒူးတုန်ကြမည်။ ဣသရေလတို့၏ စည်းစိမ်ဥစ္စာထိပါးခြင်းမရှိရ။ သူ့လူများ ကိုလည်းစားကောင်းသောက်ဖွယ်များဖြင့်ကျွေးမွေးမည်။ စိတ်ပိုင်နှင့်ရုပ်ပိုင်းနှစ်ခုစလုံး အဟာရဖြစ်စေရာ ပါလက်စတိုင်းကျောက်တောင်မှလာသော ပျားရည်ဖြင့်ဧည့်ခံမည်။