Psalms-80 -

ဆာလံကျမ်း - ၈၀

ပြန်လည်ထူထောင်ရေးအတွက်ဆုတောင်း

1သိုးစုကို ပို့ဆောင်သကဲ့သို့ ယောသပ်အမျိုးကို ပို့ဆောင်တော်မူသော ဣသရေလသိုးထိန်းကြီး၊ နားထောင်တော်မူပါ။ ခေရုဗိမ်တွင် ကျိန်းဝပ်တော်မူသောဘုရား၊ ရောင်ခြည်တော်ကို လွှတ်တော်မူပါ။ 2ဧဖရိမ်အမျိုး၊ ဗင်္ယာမိန်အမျိုး၊ မနာရှေအမျိုးတို့ရှေ့မှာ တန်ခိုးတော်ကိုနှိုးဆော်၍၊ အကျွန်ုပ်တို့ကို ကယ်တင်ခြင်းငှာ ကြွတော်မူပါ။ 3အို ဘုရားသခင်၊ အကျွန်ုပ်တို့ကိုပြောင်းလဲစေ၍၊ မျက်နှာတော်အလင်းကို ပြတော်မူပါ။ သို့ပြုလျှင်၊ အကျွန်ုပ်တို့သည် ကယ်တင်ခြင်းသို့ ရောက်ကြပါလိမ့်မည်။

4ကောင်းကင်ဗိုလ်ခြေအရှင် ဘုရားသခင်ထာဝရဘုရား၊ ကိုယ်တော်၏လူတို့ပြုသော ပတ္ထနာစကားကို အဘယ်မျှကာလပတ်လုံး အမျက်ထွက်တော်မူမည်နည်း။ 5သူတို့ကို မျက်ရည်မုန့်နှင့်ကျွေး၍၊ မျက်ရည်ကိုလည်း ကြွယ်ဝစွာ တိုက်တော်မူ၏။ 6အနီးအပါး၌နေသောသူတို့သည် အကျွန်ုပ်တို့အတွက် ငြင်းခုံကြပါ၏။ ရန်သူတို့သည်လည်း ဝါကြွား၍ အကျွန်ုပ်တို့ကို ပြက်ရယ်ပြုကြပါ၏။ 7ကောင်းကင်ဗိုလ်ခြေအရှင် ဘုရားသခင်၊ အကျွန်ုပ်တို့ကို ပြောင်းလဲစေ၍၊ မျက်နှာတော်အလင်းကို ပြတော်မူပါ။ သို့ပြုလျှင် အကျွန်ုပ်တို့သည် ကယ်တင်ခြင်းသို့ ရောက်ကြပါလိမ့်မည်။

8ကိုယ်တော်သည် စပျစ်နွယ်ပင်ကို အဲဂုတ္တုပြည်ကဆောင်ခဲ့၍၊ တစ်ပါးအမျိုးသားတို့ကို နှင်ထုတ်ပြီးမှ စိုက်ပျိုးတော်မူ၏။ 9သူ၏နေရာကိုပြုပြင်တော်မူသဖြင့်၊ သူသည် အမြစ်ကျ၍ တစ်ပြည်လုံးကို နှံ့ပြားပါ၏။ 10သူ၏အရိပ်သည်တောင်တို့ကိုလည်းကောင်း၊ အခက်အလက်တို့သည် အမြင့်ဆုံးသော အာရဇ်ပင်တို့ကိုလည်းကောင်း လွှမ်းမိုးကြပါ၏။ 11သူသည် အခက်အလက်တို့ကို ပင်လယ်တိုင်အောင်လည်းကောင်း၊ အညွန့်တို့ကို မြစ်ကြီးတိုင်အောင်လည်းကောင်း ပြန့်ပွားစေပါ၏။

12ယခုမူကား၊ လမ်း၌ လျှောက်သွားသောသူအပေါင်းတို့သည် ဆွတ်စေခြင်းငှာ၊ သူ၏ခြံကို အဘယ်ကြောင့် ချိုးဖျက်တော်မူသနည်း။ 13တောဝက်သည် ထိုအပင်ကိုကိုက်ခဲ၍၊ တောသားရဲသည်လည်း စားပါ၏။ 14ကောင်းကင်ဗိုလ်ခြေအရှင် ဘုရားသခင်၊ တစ်ဖန် ကြွလာတော်မူမည်အကြောင်း တောင်းပန်ပါ၏။ ကောင်းကင်ကကြည့်ရှုတော်မူပါ။ ထိုစပျစ်နွယ်ပင်ကို အကြည့်အရှု ကြွလာတော်မူပါ။ 15လက်ယာလက်တော်နှင့် စိုက်ပျိုးသောအပင်၊ ကိုယ်တော်အဖို့ ခိုင်မာစေတော်မူသော ပျိုးပင်ကို ကွယ်ကာတော်မူပါ။ 16မီးရှို့ပါပြီ။ ခုတ်လှဲပါပြီ။ မျက်နှာတော်ဖြင့် ဆုံးမခြင်းကို ခံရသောသူတို့သည် ပျက်စီးခြင်းသို့ ရောက်ရကြပါ၏။ 17လက်ယာလက်တော်နှင့် ဆိုင်သောလူ၊ ကိုယ်တော်အဖို့ ခိုင်မာစေတော်မူသော လူသား၏အပေါ်မှာ လက်တော်ကိုတင်ပါစေသော။ 18သို့ပြုလျှင် အကျွန်ုပ်တို့သည် ကိုယ်တော်ထံမှ မဆုတ်ရကြပါ။ အကျွန်ုပ်တို့ကို အသက်ရှင်စေတော်မူပါ။ နာမတော်ကို ပတ္ထနာပြုကြပါမည်။ 19ကောင်းကင်ဗိုလ်ခြေအရှင် ဘုရားသခင်ထာဝရဘုရား၊ အကျွန်ုပ်တို့ကို ပြောင်းလဲစေ၍၊ မျက်နှာတော်အလင်းကို ပြတော်မူပါ။ သို့ပြုလျှင် အကျွန်ုပ်တို့သည် ကယ်တင်ခြင်းသို့ ရောက်ကြပါလိမ့်မည်။

ဆာလံကျမ်း - ၈၀ (အနက်ဖွင့်)

ဆာ ၈၀၊ ညာလက်ရုံးတော်လူသားတော်

ဤသီချင်းတွင်လည်း ဆာလံဆရာက ကြေကွဲ၀မ်းနည်းခြင်းစမ်းချောင်းများတွင် မျက်ရည်များစီးဆင်း စေသည်။ ပထမတွင်သိုးအုပ် နောက်စပျစ်နွယ်၊အဖြစ်တင်စား၍ ဣသရေလလူများကို ခွင့်လွှတ်ပြီး ပြန်လည်ထူထောင်ဖို့ တစ်လျှောက်ထားပါသည်။

၈၀:၁–၃ ဘုရားသခင်ကို ယောသပ်အား ကောင်းချီးပေးသော ယာကုပ်၏ဘုရားဟု လိပ်မူခေါ်ဆိုသည်။ ‘ဣသရေလတို့၏သိုးထိန်းကြီး၊ကျောက်ဆောင်’ (က ၄၉:၂၄)ဟု ခေါ်သည်။ ယောသပ်သိုးထိန်းသကဲ့သို့ ဣသရေလ လူများကို အဲဂုတ္တုပြည်မှ ခါနာန်ပြည်သို့ ထိန်းကျောင်းခေါ်ဆောင်သော သိုးထိန်းကြီး ဘုရားရှင်ဖြစ် သည်။ ထိုအရှင်သည် ခေရုဗိမ်နှစ်ပါးက တောင်ပန်များဖြင့် အရပ်မိုးပေးလျက် ကရုဏာတော်ပလ္လင်၌ စိုးစံသည်။ ယခုအခါတွင်မူ ဣသရေလလူများကို စွန့်ခွာပစ်ထားသောကြောင့် ဗိမာန်တော်လည်း မတော်မလျော် ပျက်စီးခြင်းခံရသည်။ ဧဖရိမ်၊ဗင်္ယာမိန်နှင့် မနာရှေတို့ရှေ့မှာ ရောင်ခြည်တော်တန်ခိုးလွှတ်၍ကယ်မတော်မူပါ။ ဤလူမျိုးသုံးပါသည်။ ကောကပ်အနွယ်များက ကဋိညာဉ်သေတ္တာသယ်ထမ်းကြစဉ် လုံခြုံရေးအစောင့်အရှောက် တာ၀န်ယူထားရသော ရှေ့ပြေးတပ်ဦး ဖြစ်ကြသည်။ ဣသရေလတစ်မျိုးသားလုံးကို ကိုယ်စားပြုသည်။ ဘုရားသခင်၏ခွန်အားနိုးထမူကို အစဉ်မျှော်လင့်ကြသည်။ ရန်သူ၏ဖမ်းစီးခံရမှု ကျေးကျွန်ဘ၀မှ ရုန်းထွက်စေနိုင်သည်။ ထိုသူတို့ မျက်နှာပေါ်သို့ ရောင်ခြည်တော်ဖြန့်ဖို့သာ လိုအပ်သည်။ ထိုသို့ပြုလျှင်မလွှဲဧကန်အောင်နိုင်ကြမည်။

၈၀:၄–၇။ ဘုရားသခင်နှင့် ဣသရေလလူတို့ကြားတွင် ဧရာမချောက်ကမ္ဘာကြီး ကွာခြားပြီး၊ ဣသရေလလူတို့၏အပြစ်ဒုစရိုက်များကို စိတ်ဆိုးသောကြောင့် ဆုတောင်းသံများကိုလည်း ပစ်ပယ်သည်။ ဣသရေလလူတို့ စားဖို့ငိုခြင်း၊ သောက်ဖို့မျက်ရည်ပေးသည်။ အခြားတဘက်ရှိ တပါးအမျိုးသားများအား ခွန်အား ကြီးစေပြီး၊ ဣသရေလလူများကို နိုင်ထက်စီးနင်းပြုစေသည်။ ဟားတိုက်လှောင်ပြောင်စေသည်။ ယေဟောဝါဘုရားသခင်၏ ကျေးဇူးတော် ကရုဏာတော်ကို မထီမဲ့မြင်ပြုသူများ၏သွားရာလမ်းတည်း။

၈၀:၈–၁၁။ ဘုရားသခင်က ဣသရေလလူမျိုးအား စပျစ်နွယ်ကဲ့သို့ အဲဂုတ္တုပြည်မှ ယူဆောင်လာခဲ့သည်။ ခါနာန်ဒေသခံလူများကို မောင်းထုတ်ပြီးထိုမြေပေါ်တွင် ရွှေ့ပြောင်းစိုက်ပျိုးဖို့ဖြစ်သည်။ ခြုံပိုင်ရှင်က ဂရုတစိုက် မြေယာပြုပြင်၍ စိုက်ပျိုးသော်လည်းသူ့လူများက ကောင်းမွန်စွာမရှင်သန်ခြင်းသည် စိတ်ဆိုးရင်နင့်ဖွယ်ရာ ဖြစ်ပါသည်။ ရွှေ့ပြောင်းစိုက်ပျိုးရေးစနစ်ကအောင်မြင်ပါသည်။ ရေသောက်မြစ် နက်နက်စွဲ၍ လယ်ယာမြေတခုလုံးပျံ့နှံ့သွားပါသည်။ အပင်ဖြစ်ထွန်း၍ တောင်ကုန်းထက်မြင့်မားသည်။ အခက်အလက်များသည် အာရစ်ပင်ထက် ထွားကျိုင်းကြသည်။ မြေထဲပင်လယ်တဘက်ကမ်းမှ ဥဖရတ်မြစ်တိုင်အောင် လူဦးရေပျံ့နှံ့ကြသည်။ ဆော်လမုန်ရှင်ဘုရင် လက်ထက်တွင် ဣသရေလနိုင်ငံသည် ဥဖရစ်မြစ်တိုင်အောင် ကျယ်၀န်းခဲ့သည် (၃ရာ ၄:၂၁-၂၄)။ သို့သော် ခေတ္တယာယီသာခံသည်။

၈၀:၁၂–၁၃။ ဘုရားသခင်က ကြာကြာကြည့်မရ။ မြို့ရိုးကိုဖြိုဖျက်၍ စပျစ်နွယ်ပင်များကိုလည်း လှီးဖြတ် ပစ်သည်။ တော၀က်သားရဲတို့သည် ခြံဥယျာဉ်ထဲသို့၀င်ရောက်ဖျက်ဆီးစေသည်။ အဲဂုတ္တု၊ အာရှုရိ၊ ဗာဗုလုန်၊ နှောင်ပိုင်းတွင် ပါရှား၊ ဂရိနှင့်ရောမတို့က ကျူးကျော်သိမ်းပိုက်စေသည်။ တော၀က်ဟု ဆိုခြင်းမှာအရမ်းကာရော သုံးနှုန်းခြင်းမဟုတ်။ ထိုစဉ်အခါက အဓိပ္ပါယ်သိသော်ငြားလည်း၊ နောင်နှစ်ပိုင်း ကြာလာသောအခါ ရောမတို့က လှန်လှောလာကြသည်။

၈၀:၁၄–၁၅။ ဣသရေလလူများသည် ထာ၀ရဘုရားအား တဖန်တောင်းပန်ကြသည်။ အကြည့်အရှု ကြွတော်မူရန် တောင်းဆိုကြသည်။ လက်ယာလက်တော်ဖြင့်စိုက်ပျိုးသောအပင်၊ ကိုယ်တော် အဘို့ခိုင်မာစေတော်မူသောအပင်ကို အကြည့်အရှုကြွတော်မူပါ။ သူတို့အဖြစ်သနစ်ကို ကောင်းကင်ဘုံမှ တခါငုံ့ကြည့်တော်မူပါဟု တောင်းဆိုကြသည်။ Targum ကျမ်းတွင်မူ “မေရှိယသခင်အဘို့ ကိုယ်တိုင်စိုက်ထူထားသောအပင်ကို လှည့်ကြည့်ပါ”ဟု ဆိုသည်။ အပိုဒ်ငယ်၁၅ ပါစပျစ်ခင်းနှင့်စပျစ်နွယ်သည် ဣသရေလလူများကို ရည်ညွှန်းကြောင်းထင်ရှားသည်။ မေရှိယသခင်နှင့် ဣသရေလတို့ဆက်နွယ်ပုံကို ထိုကျမ်းပိုဒ် (၂) ခုတွင် ဖော်ထုတ်ထားသည်။

၈၀:၁၆။ ကျူးကျော်စစ်သားများက စပျစ်ခတ်နွယ်များကို ခုတ်ပိုင်း၍ မီးရှို့ပစ်ကြသည်။ ဘုရားသခင်နှင့် ဝေးကွာကြသောကြောင့် ခြောက်သွေ့ ပျက်စီးကုန်သည်။

၈၀:၁၇–၁၈။ လက်ယာလက်တော်နှင့် ဆိုင်သောသူ၊ ကိုယ်တော်အဖို့ ခိုင်မာစေသော လူသားတို့အပေါ်မှာ လက်တော်ကို တင်ပါစေသော။ ဘုရားသခင်၏လက်ယာလက်တော်သည် ယေရှုခရစ်တော် (ဆာ ၁၁၀:၁ ၊ဟေဗြဲ ၁:၃၊ ၈:၁၊ ၁၀:၁၂)ဖြစ်သည်။ သခင်ယေရှုက ခရစ်၀င်ကျမ်းများတွင် သူ့ကိုသူ လူသားဟု တောက်လျှောက်ခေါ်ဝေါ်သုံးစွဲထားသည်။ ဘုရားသခင်က ဣသရေလမျိုးသို့ ကောင်းချီးမင်္ဂလာပေးထားပြီးဖြစ်သည်။ ဣသရေလ လူများသည် နောက်တခါဖောက်ပြန်စရာ အကြောင်းမရှိ။ ဘုရားသခင်က ပြန်လည်နိုးထစေပြီး နာမတော်ကို ချီးမွမ်းထောမနာပြုကြရမည်။

၈၀:၁၉။ ဆာလံဆရာက ရင်းနှီးခင်မင်စွာ လျှောက်လဲသွားသည်။ သိုးထိန်းကြီးအားသိုးများကို ဂရုစိုက် စောင့်ရှောက်ပေးပါရန် အသနားခံသည်။ ထာ၀ရဘုရားသခင်က သနားမှသာလျှင် ဣသရေလတို့ အသက်ချမ်းသာရာ ရကြမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။