ဆာ ၁၄၈၊ ဖန်ဆင်းခြင်းသံပြိုင်တေး

သံစုံအမျိုးမျိုးဆိုပြပုံ တွေ့မြင်ခဲ့ဘူးပါသည်။ ယခု ကဲ့သို့ ဆိုပြပုံမျိုးမတွေ့ဘူးပါ။ သက်ရှိသတ္တဝါများ၊ သက်မဲ့များ၊ ဖန်ဆင်းခံသူများအားလုံး သီဆိုကြသည်။ ခုံတန်းများမဆုံးနိုင်။ စကြာဝဋ္ဌာတခုလုံးက ဆိုကြသောကြောင့် အထပ်ထပ်အလွှာလွှာဖြစ်ကြသည်။

၁၄၈:၁–၆ ထိပ်ဆုံးမှာ ကောင်းကင်တမန်များနေရာယူကြသည်။ ကောင်းကင်သားများ ကောင်းကင် တမန်များက ယေဟောဝါဘုရားသခင်၏ဘုန်းတော်ဘွဲ့ ကျူးဧကြသည်။ လနှင့်ကြယ်များက ဒုတိယ။ တေးဂီတ အဝင်အထွက်  မှန်မှန်ဆိုကြသည်။ အမြင့်ဆုံးသော ကောင်းကင်ယံမှ ကောင်းကင်တန်ဆာများနှင့် ရေပြင်လွှာ တိမ်သလ္လာများက “ဘုရားသခင်၏ ဘုန်းတန်ခိုးတော်သည် အမြင့်ဆုံးမှာတည်စေသား”ဟု သံပြိုင်ဆိုကြသည်။ မိမိတို့ကို ဖန်ဆင်းသော ဖန်ဆင်းရှင်သခင်ကို ချီးမွမ်းကြသည်။ ထိုအရှင်ဘုရားက စကားတော်တခွန်းရှိလိုက်သည်နှင့် တကမ္ဘာလုံး လှုပ်ရှားသွားသည်။ ကိုယ်တော်၏ ဘုရားလက်ရာတော်သည် စနစ်ကျန၍ တည်တံ့ခိုင်မြဲသည်။ မပျောက်ကွယ်နိုင်သော ဓမ္မတာ စီရင်တော်မူသည်။

၁၄၇:၇–၈ နောက်တသုတ်မှာ ရေပျော်ငါးများနှင့် ရေနေသတ္တဝါများဖြစ်သည်။ ဘုရားသခင်၏ လက်ရာတော်များဖြစ်ကြောင်း ထုတ်ဖော်ဝန်ခံကြသည်။ မီး၊ မိုးသီး၊ ဆီးနှင်း၊ တိမ်များနှင့် မုန်တိုင်း တို့ကလည်း ကိုယ်တော်၏စကားကို နာခံကြသည်။ ယေဟောဝါဘုရားသခင်က မိုးလေဝသ၊ ရာသီဥတုများကို အလိုရှိသည့်အတိုင်း ထိန်းချုပ်ကြောင်းမမေ့ပါနှင့်။

၁၄၈:၉–၁၀ တောင်ကုန်းတောင်တန်းများနှင့် တောင်ပူစာများသည်လည်း ခေါင်းမွှေးထောင်၍ ချီးမွမ်းကြသည်။ ထိုတောင်ကုန်းတောင်တန်းများပေါ်ရှိ သစ်ပင်ကြီးငယ်များသည်လည်း ဘယ်ညာယိမ်းနွဲ့ ကာ နာမတော်ကို ချီးမွမ်းကြသည်။ မိမိတို့အသီးအပွင့်များဖြင့် ဂါရဝပြုကြသည်။ တောပျော်သားကောင်များ၊ အိမ်မွေးသားယဉ်များ၊ တွားသွားသတ္တဝါများနှင့် တေးဆိုငှက်များပါမကျန် ဘုရားသခင်၏ဉာဏ်တော်နှင့် တန်ခိုးတော်ကို ဦးညွှတ်ကြသည်။

၁၄၈:၁၁–၁၂ ရှေ့ဆုံးတန်းမှာ လှည့်ကြည့်သော်ရှင်လောင်းများ နန်းတွင်းသူ နန်းတွင်းသားများ၊ နိုင်ငံတော်အရာရှိမင်းများ၊ ထိုနောက်မှ ပရိသတ်များ တွေ့ရသည်။ လူပျိုအပျိုများ ကလေးသူငယ်များနှင့် သက်ကြီးရွယ်အိုများကလည်း ယေဟောဝါဘုရားရှင်သည် ကြီးမြတ်ပါပေသည်ဟု ထုတ်ဖော်ဝန်ခံကြသည်။

၁၄၈:၁၃–၁၄ သံစုံတီးဝိုင်းကြီးသည် မြိုင်ဆိုင်လှသည်။ နာမတကာတို့ထက်ကြီးမြတ်သော နာမတော်ကို ချီးမွမ်းကိုးကွယ်ကြသည်။ ထိုနာမတော်သည် ဘုန်းအသရေ တင့်တယ်ပေစွ။ ဤတေး၏အဓိက ရည်ရွယ်ချက်သည် ဣသရေလလူမျိုးအပေါ်သို့ ပြုတော်မူခဲ့သော ဘုရားသခင်၏လက်ရာတော်ကို ညွှန်းဖွဲ့ သည်။ သူ့လူများ၏ ဦးချိုကို တင့်တယ်စေသည်။ မေရှိယသခင်ကို ပေးတော်မူသည်။ သခင်ယေရှုဘုရား ဒုတိယအကြိမ် ပြန်လည်ကြွလာသောအခါ သန့်ရှင်းသူများက အထူးချီးမွမ်းကြမည်။ ဣသရေလလူမျိုးမှ တဆင့် တကမ္ဘာလုံးကို ကောင်းချီးမင်္ဂလာ စီးဆင်းကြမည်။ ထိုသံစုံသီချင်းတွင် ပါဝင်သည့် စာသားတိုင်း ဟာလေလုယာဟု ချီးမွမ်းကြစို့။ ဟာလေလုယာ။