Nehemiah -11 -

နေဟမိမှတ်စာ - ၁၁

ယေရုရှလင်မြို့တွင်နေထိုင်သူများ

(၅ရာ၊ ၉း၁-၃၄)

1ထိုအခါ လူများတို့တွင် မင်းလုပ်သောသူတို့သည် ယေရုရှလင်မြို့၌ နေကြ၏။ ကြွင်းသောသူတို့သည် သန့်ရှင်းသောအရပ်၊ ယေရုရှလင်မြို့၌ တစ်ကျိပ်တွင်တစ်ယောက်၊ အခြားသောမြို့တို့၌ ကိုးယောက် နေရမည်အကြောင်း စာရေးတံပြုကြ၏။ 2ယေရုရှလင်မြို့၌ နေခြင်းငှာ အလိုလိုဝန်ခံသော သူအပေါင်းတို့ကို၊ လူများတို့သည် ကောင်းချီးပေးကြ၏။ 3ယုဒမြို့ရွာတို့တွင် ဣသရေလလူ၊ ယဇ်ပုရောဟိတ်၊ လေဝိသား၊ ဘုရားကျွန်၊ ရှောလမုန်၏ကျွန် အမျိုးသားအသီးအသီးတို့သည် မိမိတို့ဆိုင်ရာအရပ်၌ နေကြ၏။ ယေရုရှလင်မြို့၌နေသော ပြည်သူပြည်သား အကြီးအကဲ၊ မင်းအရာရှိဟူမူကား၊ 4ယုဒအမျိုး၊ ဖာရက်၊ မဟာလေလ၊ ရှေဖတိ၊ အာမရိ၊ ဇာခရိ၊ ဩဇိတို့မှ ဆင်းသက်သော အသာယတစ်ပါး၊ 5ရှိလောနိ၊ ဇာခရိ၊ ယောယရိပ်၊ အဒါယ၊ ဟဇာယ၊ ကောလဟောဇ၊ ဗာရုတ်တို့မှ ဆင်းသက်သော မာသေယတစ်ပါးနှင့်တကွ၊ 6ယေရုရှလင်မြို့၌နေသော ဖာရက်အမျိုးသား၊ သူရဲ လေးရာခြောက်ဆယ်ရှစ်ယောက်တည်း။ 7ဗင်္ယာမိန်အမျိုး၊ ယေရှာယ၊ ဣသေလ၊ မာသေယ၊ ကောလာယ၊ ပေဒါယ၊ ယောဒ၊ မေရှုလံတို့မှ ဆင်းသက်သော သလ္လု၊ 8သုနောက်၊ ဂဗ္ဗဲနှင့်သလ္လဲ အစရှိသော ကိုးရာ နှစ်ဆယ်ရှစ်ယောက်တည်း။ 9ဇိခရိသား ယောလသည် ဗင်္ယာမိန် အမျိုးအုပ်ဖြစ်၏။ သေနွာသား ယုဒသည် ပြင်မြို့ကိုအုပ်ရ၏။

10ယဇ်ပုရောဟိတ်မူကား ယေဒါယ၊ ယောယရိပ်၊ ယာခိန်နှင့်တကွ၊ 11အဟိတုပ်၊ မရာယုတ်၊ ဇာဒုတ်၊ မေရှုလံ၊ ဟိလခိတို့မှ ဆင်းသက်သော ဘုရားသခင်၏ အိမ်တော်အုပ်စရာယ အစရှိသော၊ 12အိမ်တော်အမှုကို ဆောင်ရွက်သော အမျိုးသားချင်း ရှစ်ရာနှစ်ဆယ်နှစ်ယောက်တည်း။ ထိုမှတစ်ပါး၊ မာလခိ၊ ပါရှုရ၊ ဇာခရိ၊ အာမဇိ၊ ပေလလိ၊ ယေရောဟံတို့မှ ဆင်းသက်သော အဒါယအစရှိသော၊ 13အဆွေအမျိုးသူကြီး အမျိုးသားချင်း နှစ်ရာလေးဆယ်နှစ်ယောက်တည်း။ ဣမေရ၊ မေရှိလမုတ်၊ အဟာသဲ၊ အာဇရေလတို့မှ ဆင်းသက်သော အာမရှဲအစရှိသော၊ 14ခွန်အားကြီးသောသူရဲ အမျိုးသားချင်း တစ်ရာနှစ်ဆယ်ရှစ်ယောက်တည်း။ ဟဂဒေါလိမ်သား ဇာဗဒေလသည် သူတို့ကိုအုပ်ရ၏။

15လေဝိသားမူကား၊ ဗုန္နိ၊ ဟာရှဘိ၊ အာဇရိကံ၊ ဟာရှုပ်တို့မှ ဆင်းသက်သော ရှေမာယတစ်ပါး၊ 16လေဝိသားအကြီး ရှဗ္ဗေသဲနှင့် ယောဇဗဒ်တို့သည် ဘုရားသခင်၏အိမ်တော်၌ ပြင်အမှုကို ကြည့်ရှုစီရင်ရကြ၏။ 17အာသပ်၊ ဇာဗဒိ၊ မိက္ခာတို့မှ ဆင်းသက်သော မဿနိသည် ကျေးဇူးတော်ကိုချီးမွမ်းခြင်းနှင့် ဆုတောင်းခြင်းအမှုမှာ အကြီးလုပ်သောသူ ဖြစ်၏။ ဗာကဗုကိသည် အပေါင်းအဖော်တို့တွင် ဒုတိယသူဖြစ်၏။ ထိုမှတစ်ပါး၊ ယေဒုသုန်၊ ဂလာလ၊ ရှမွာတို့မှ ဆင်းသက်သော ဩဗဒိရှိ၏။ 18သန့်ရှင်းသောမြို့၌နေသော လေဝိသားပေါင်းကား နှစ်ရာရှစ်ဆယ်လေးယောက်တည်း။ 19တံခါးစောင့်အက္ကုပ်၊ တာလမုန်အစရှိသော တံခါးကိုစောင့်သော အမျိုးသားချင်းပေါင်းကား တစ်ရာခုနစ်ဆယ်နှစ်ယောက်တည်း။

20ကြွင်းသော ဣသရေလအမျိုးသား၊ ယဇ်ပုရောဟိတ်၊ လေဝိသားတို့သည် ယုဒမြို့ရွာတို့တွင်၊ မိမိတို့ ပိုင်ရင်းအရပ်၌ နေကြ၏။ 21ဘုရားကျွန်တို့သည် ဩဖေလအရပ်၌နေ၍၊ ဇိဟနှင့် ဂိသပတို့သည် ဘုရားကျွန်အုပ် ဖြစ်ကြ၏။ 22မိက္ခာ၊ မဿနိ၊ ဟာရှဘိ၊ ဗာနိတို့မှ ဆင်းသက်သော ဩဇိသည် ယေရုရှလင်မြို့၌နေသော လေဝိသားတို့ကို အုပ်ရ၏။ အာသပ်အမျိုးသား သီချင်းသည်တို့သည်လည်း ဘုရားသခင်၏ အိမ်တော်အမှုကို ကြည့်ရှုစီရင် ရကြ၏။ 23အကြောင်းမူကား၊ သီချင်းသည်တို့သည် နေ့ရက် အစဉ်အတိုင်း စားစရာရိက္ခာကို ခံရမည်အကြောင်း ရှင်ဘုရင် အမိန့်တော်ရှိ၏။ 24ယုဒအမျိုး ဇာရအနွယ် မေရှဇဗေလသား ပေသဟိသည်လည်း ရှင်ဘုရင်အခွင့်နှင့် ပြည်သားတို့ကို အုပ်၍ အရေးတော်ပိုင်မင်းဖြစ်၏။

အခြားမြို့ရွာတွင်နေထိုင်သူများ

25ယုဒလူအချို့တို့သည် မြို့ရွာကျေးလက်တည်းဟူသော ကိရယသာဘမြို့ရွာ၊ ဒိဘုန်မြို့ရွာ၊ ယေကပ်ဇေလမြို့ရွာ၊ 26ယေရွှ၊ မောလဒ၊ ဗက်ပါလက်၊ 27ဟာဇာရွှာလ၊ ဗေရရှေဘ မြို့ရွာများ၊ 28ဇိကလတ်၊ မေကောနမြို့ရွာများ၊ 29အင်ရိမ္မုန်၊ ဇာရ၊ ယာမုတ်၊ 30ဇာနော၊ အဒုလံ မြို့ရွာများ၊ လာခိရှမြို့နှင့် ကျေးလက်များ၊ အဇေကာမြို့ရွာများ၊ ဗေရရှေဘမြို့မှ စ၍ ဟိန္နုံချိုင့်တိုင်အောင် အနှံ့အပြားနေကြ၏။ 31ဗင်္ယာမိန်အမျိုးသားတို့သည်လည်း ဂေဗ၊ မိတ်မတ်၊ အာဣ၊ ဗေသလမြို့ရွာတို့၌လည်းကောင်း၊ 32အာနသုတ်၊ နောဗ၊ အာနနိ၊ 33ဟာဇော်၊ ရာမ၊ ဂိတ္တိမ်၊ 34ဟာဒိဒ်၊ ဇေဘိုင်၊ နေဗလ္လတ်၊ 35လောဒ၊ ဩနောမြို့များ၌လည်းကောင်း၊ ဆရာသမားချိုင့်၌လည်းကောင်း နေကြ၏။ 36လေဝိသားအသင်းအပေါင်း အချို့တို့သည် ယုဒပြည်၊ အချို့တို့သည် ဗင်္ယာမိန်ပြည်၌ နေကြ၏။

နေဟမိမှတ်စာ - ၁၁ (အနက်ဖွင့်)

(ဆ) လူဦးရေထပ်တိုးခြင်းနှင့် ယေရုရှလင်ပရဝုဏ် (အခန်း ၁၁)

၁၁:၁–၂ အခန်း (၁၁)သည် အခန်း(၇)နှင့်ဆက်စပ်သည်။ နေဟမိသည် နောက်ထပ်တိုးပွားလာမည့် လူဦးရေကို ကြိုတင်မျှော်တွေး၍ စည်ပင်သာယာ နယ်နိမိတ်အား ကျယ်ပြန့်စွာ မြို့ရိုးကာသည်။ သို့သော် လူဦးရေနှင့်မတန် ကျယ်ပြန့်လွန်းသဖြင့် လုံခြုံရေးအင်အား စိုးရိမ်ရသည်။ အချို့က မြို့ထဲတွင် နေရခြင်းကို စိုးရိမ်ကြသည်။ ရန်သူများဝိုင်းရံ တိုက်ခိုက်၍ ငတ်သေမည်ကို စိုးရိမ်ကြသည်။ နောက်ဆုံးတွင် မဲနှိုက် ဆုံးဖြတ်ကြသည်။ မဲပေါက်သူများသည် မင်းနေပြည်တော်တွင်နေ၍ အခြား ၁၀ပုံ ၉ပုံသည် လွတ်လပ်စွာ နေခွင့်ပြုသည်။

၁၁:၃–၃၆ အခန်း(၇)တွင် စာရင်းကောက်ယူထားခဲ့သည့် အတိုင်း ယေရုရှလင်နေထိုင်သည့် ဆွေမျိုးမိသားစုစာရင်းကို ငယ် ၃-၂၄ တွင် တဖန်တွေ့ရှိရသည်။ မျိုးနွယ်စုခေါင်းဆောင် အသီးသီး ဦးစီးလျက် ယုဒလူပေါင်း လေးသောင်းခြောက်ဆယ့်ရှစ်ဦးရှိသည် ( ငယ် ၄-၆)။ ဗင်္ယာမိန်အမျိုးသည် ကိုးသောင်းနှစ်ဆယ့်ရှစ် ရရှိ၍ အတောင့်တင်းဆုံး ဖြစ်သည် (ငယ် ၇၊၈)။ ယောလနှင့် ယုဒလူတို့က ကြီးကြပ်ကွပ်ကဲကြသည် (ငယ် ၉)။ ယဇ်ပုရောဟိတ်မျိုးနွယ်စု စာရင်းကို ငယ် ၁၀-၁၄တွင် ရေးမှတ်၍ ယေဒါယက ဦးဆောင်သည်။ သန့်ရှင်းသော မြို့တော်တွင် လေဝိအမျိုးသားလေးရာလေးဆယ့်ခြောက်ဦးသာရှိ၍ ကျန်လူ တစ်ရာ့ခုနှစ်ဆယ့်နှစ်ဦးသည် ဂိတ်မှူးတံခါးစောင့် တာဝန်ထမ်းဆောင်ကြသည် (ငယ် ၁၅-၁၉)။ ယေရုရှလင်ဗိမာန်တော်အနီး သြဖီလတွင် ဇိဟနှင့် ဂိသဖခေါင်းဆောင်၍ ဗိမာန်တော်ဝန်ထမ်းများ နေထိုင်ကြသည် (ငယ်၂၁)။ ကျမ်းစာတွင် နာမည်တူများလှသော သြဇိနှင့် ပေသဟိတို့က လေဝိအမျိုးသားများအား ဘုရင့်ကိုယ်စား အုပ်စိုးရသည် (ငယ် ၂၂-၂၄)။ အခြားယုဒများသည် ယေရုရှလင်ဆင်ဖုံး ကျေးလက်တွင်နေထိုင်ကြသည်။ ကျေးလက်တောရွာများတွင် နေထိုင်သူများစာရင်းကို ငယ် ၂၅-၃၀ တွင်၎င်း၊ ရေးမှတ်ထားသည်။ ယခင်က ယုဒအမျိုးနေရာတွင် နေထိုင်ခဲ့သော ယဇ်ပုရောဟိတ်များသည် ဗင်္ယာမိန်အမျိုး နေရာသို့ ပြောင်းရွေ့လာခြင်းလည်းရှိသည် (ငယ် ၃၆)။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။