Nahum -1 -

နာဟုံအနာဂတ္တိကျမ်း - ၁

1ဧလကောရှရွာသား နာဟုံခံရ၍၊ နိနေဝေမြို့နှင့် ဆိုင်သော ဗျာဒိတ်တော်အချက်ဟူမူကား၊

ထာဝရဘုရား၏အမျက်တော်

2အပြစ်ရှိသည်ဟု ထာဝရဘုရားသည် ယုံလွယ်၍ ဒဏ်ပေးသောဘုရား ဖြစ်တော်မူ၏။ ထာဝရဘုရားသည် ဒဏ်ပေး၍ အမျက် ပြင်းထန်တော်မူ၏။ ထာဝရဘုရားသည် ရန်ဘက်ပြုသောသူတို့ကို ဒဏ်ပေး၍၊ ရန်သူတို့ကို အငြိုးထားတော်မူ၏။ 3ထာဝရဘုရားသည် စိတ်ရှည်တော်မူ၏။ တန်ခိုးလည်း ကြီးတော်မူ၏။ သို့ရာတွင်၊ အပြစ်တည်သော သူတို့ကို အပြစ်မှ လွှတ်တော်မမူ။ ထာဝရဘုရားသည် လေပွေ၌လည်းကောင်း၊ မိုးသက်မုန်တိုင်း၌လည်းကောင်းကြွတော်မူ၍၊ မိုးတိမ်တို့သည် စက်တော်အောက်၌ မြေမှုန့်ကဲ့သို့ ဖြစ်ကြ၏။ 4ပင်လယ်ကို ဆုံးမ၍ ခန်းခြောက်စေတော်မူ၏။ ခပ်သိမ်းသော မြစ်ရေကိုလည်း ကုန်စေတော်မူ၏။ ဗာရှန်တောင်နှင့် ကရမေလတောင်တို့သည် ညှိုးနွမ်းကြ၏။ လေဗနုန်အပွင့်လည်း ညှိုးနွမ်း၏။ 5ကိုယ်တော်ကြောင့် တောင်တို့သည် တုန်လှုပ်လျက်၊ ကုန်းတို့သည် အရည်ကျိုလျက်၊ ရှေ့တော်၌ မြေကြီးနှင့် လောကဓာတ်မှစ၍ လောကသားအပေါင်းတို့သည် ရွေ့လျက်ရှိကြ၏။ 6အမျက်တော်ရှေ့မှာ အဘယ်သူ ရပ်နိုင်သနည်း။ အမျက်တော်အရှိန်ကို အဘယ်သူ ဆီးတားနိုင်သနည်း။ မီးလောင်သကဲ့သို့ အမျက်ထွက်၍၊ ကျောက်တို့ကို ဖြိုချတော်မူ၏။ 7ထာဝရဘုရားသည် ကောင်းတော်မူ၏။ အမှုရောက်သောအခါ ရဲတိုက်ဖြစ်တော်မူ၏။ ခိုလှုံသောသူတို့ကို သိမှတ်တော်မူ၏။ 8ရန်သူနေရာကို လွှမ်းမိုးသောမြစ်ရေနှင့် ဆုံးရှုံးစေတော်မူသဖြင့်၊ ရန်သူတို့ကို မှောင်မိုက်လိုက်လိမ့်မည်။

9ထာဝရဘုရားတစ်ဖက်၌ အဘယ်သို့ ကြံစည်ကြသနည်း။ အပြီးဆုံးရှုံးစေတော်မူမည်။ တစ်ဖန် နှိပ်နင်းစရာ အကြောင်းမရှိရ။ 10သူတို့သည် ဆူးပင်ကဲ့သို့ အချင်းချင်း ညှိတွယ်လျက်၊ စပျစ်ရည်နှင့် ယစ်မူးသကဲ့သို့ဖြစ်လျက်၊ သွေ့ခြောက်သော အမှိုက်ကဲ့သို့ မီးလောင်ခြင်းကို ခံရကြလိမ့်မည်။ 11ထာဝရဘုရားတစ်ဖက်၌ မကောင်းသော အကြံကို ကြံစည်သော အဓမ္မတိုင်ပင်အမတ်သည် သင့်အထဲက ပေါ်လာပြီ။ 12ထာဝရဘုရား မိန့်တော်မူသည်ကား၊ သူတို့သည် စုံလင်၍ အရေအတွက်အားဖြင့် များပြားသော်လည်း၊ ဆုံးရှုံး၍ ကွယ်ပျောက်ရကြလိမ့်မည်။ သင့်ကို ငါညှဉ်းဆဲဖူးသော်လည်း နောက်တစ်ဖန် မညှဉ်းဆဲ။ 13ယခုမှာ သင်၌ သူတင်သော ထမ်းပိုးကို ငါချိုးပယ်၍၊ ချည်နှောင်သော ကြိုးတို့ကိုလည်း ဖြတ်မည်။ 14သင်၏အမှု၌ ထာဝရဘုရား စီရင်တော်မူသည်ကား၊ သင်၏အမျိုး မဆက်မနွယ်ရ။ ထုသောရုပ်တုနှင့် သွန်းသော ရုပ်တုတို့ကို သင်၏ဘုရားကျောင်းမှ ငါပယ်ရှင်းမည်။ သင်သည် ယုတ်မာသောကြောင့် သင်၏သင်္ချိုင်းကို ငါလုပ်မည်။ 15ငြိမ်သက်ခြင်း၏ ဝမ်းမြောက်စရာသတင်းစကားကို ကြားပြောသောသူ၏ ခြေတို့ကို တောင်ပေါ်မှာ ကြည့်ကြလော့။ အို ယုဒအမျိုး၊ သင်၏ဓမ္မပွဲကိုခံလော့။ သစ္စာကတိထားသည်အတိုင်း သစ္စာဝတ်ကို ဖြေလော့။ အဓမ္မလူသည် ရှင်းရှင်းပယ်ဖြတ်ခြင်းကို ခံရသောကြောင့် နောက်တစ်ဖန်သင့်ကို မကျော်မနင်းရ။

နာဟုံအနာဂတ္တိကျမ်း - ၁ (အနက်ဖွင့်)

၁။ ဘုရားသခင်၏ ဂုဏ်အင်လက္ခဏာ–တရားသူကြီး (၁:၁–၈)

၁:၁–၅ ဘုရားသခင် ဂုဏ်အင်လက္ခဏာများမှာ သဝန်တိုခြင်း၊ ဒဏ်ပေးခြင်၊ အမျက်တော်ပြင်းခြင်းဖြစ်သကဲ့သို့ အခြားတစ်ဘက်တွင်လည်း စိတ်ရှည်ခြင်း၊။ တန်ခိုးကြီးခြင်းလည်း ဖြစ်၏။ စကြဝဠာနှင့် တကွမှီတင်းနေထိုင်ကြကုန်သော ခပ်သိမ်းသတ္တဝါ တို့ကိုလည်း ထိန်းချုပ်သည်။ သဝန်တိုခြင်းဆိုသည်မှာ ခင်ပွန်းသည်က ဇနီးအပေါ်ထားသော သဝန်တိုမှုမျိုးဖြစ်သည်။ သူများပျော်ရွှင်မှုကို မနာလိုခြင်းမဟုတ်။ ဣသရေလလူမျိုးကို ယေဟောဝါဘုရား၏ ဇနီးအဖြစ်ပုံနှိုင်းထားသည်။ (NKJV, ဟောရှေကျမ်းကိုကြည့်)။

၁:၆–၈ ဘုရားသခင်၏အရေးယူခြင်းကို ကြံ့ကြံ့ခံရပ်နိုင်သူ တစ်စုံတစ်ဦးမှ မရှိပါ။ သို့သော် သူအားယုံကြည်သူများပေါ်တွင် ကောင်းမြတ်သည်။ ဘုရားရှင်၏ အမျက်ဒေါသသည် နိနေဝေမြို့တော်အပါအဝင်အာရှုရိပြည်တခွင်လုံး အားတိုက်စားလွှမ်းမိုးသော မြစ်ရေကဲ့သို့ ဆေးကြောပယ်ရှင်းမည်။

၂။ နိနေဝေမြို့၏ကံကြမ္မာဆိုး(၁:၉–၁၅)

၁:၉–၁၁ ဤကျမ်းစကားများကို အာရှုရိပြည်သားများသို့ လိပ်မူပြောဆိုခြင်းဖြစ်သည်။ သူတို့အား ဖျက်စီးပစ်တော့မည်။ ထာဝရဘုရားတဖက်၌ မကောင်းကြံစည်သူသည် ပျက်စီးရမည်။ ထိုစကားမှာ သနာခရိပ်မင်း သို့မဟုတ် သူ၏အမတ်စစ်သူကြီး ရာဗရှာခကို ရည်ညွှန်းဟန်ရှိသည်။

၁:၁၂–၁၃ မျက်မှောက်ကာလတွင် အာရှုရိသားများသည် ဘဝလုံခြုံကြသော်လည်း အပင်မှချိုင်ပစ်သည့် သစ်ကိုင်းပမာ ခြောက်သွေ့ကြဦးမည်။ ဣသရေလတို့ ယခုဆင်းရဲဖိစီးခံနေရသော်လည်း နောင်တွင် ဖိနှိပ်ခံရတော့မည်မဟုတ်။ အာရှုရိတို့ တင်ထားသော ထမ်းပိုးကို ဘုရားသခင်က ရိုက်ချိုးပစ်လိမ့်မည်။

၁:၁၄ နောက်တစ်ခွန်းမှာ အာရှုရီဘုရင်သို့ တိုက်ရိုက်ပြောကြားသော စကားတော်ဖြစ်သည်။ ထိုမင်းအမည်ကို သမိုင်းတွင် မကျန်စေရ။ သူတည်ထားခဲ့သော ရုပ်တုဆင်းတုများနှင့်မတူ တိမ်ကောပပျောက်မည်။ သူ၏ယုတ်မာမှုအတွက် ဘုရားရှင်ကိုယ်တော်တိုင် သချိုင်းပြင်ဆင်ပေးမည်။

၁:၁၅ ဤကျမ်းပိုင်းတွင် အာရှုရိပြည် ပျက်သုဉ်းမည့်အကြောင်းနှင့် ယုဒပြည်တွင် ငြိမ်သက်ခြင်း မင်္ဂလာသတင်းစကားကြားပြောသူကိုတွေ့ရသည်။ ဤကျမ်းချက်ကို ရောမ၊ ၁၀:၁၅ တွင် ပေါလုက ဧဝံဂေလိသတင်းကောင်း ဟောကြားသူ အမြင်ရှုထောင့်ဖြင့် ကိုးကားထားသည်(ဟေရှာ၊ ၅၂:၇ကိုလည်းကြည့်)။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။