Micah -7 -

မိက္ခာအနာဂတ္တိကျမ်း - ၇

အကျင့်စာရိတ္တပျက်ခြင်း

1ငါသည် အမင်္ဂလာရှိ၏။ နွေကာလ၌ ဆွတ်သော သင်္ဘောသဖန်းသီးကဲ့သို့လည်းကောင်း၊ လိုက်၍ ကောက်သော စပျစ်သီး အကျန်အကြွင်းကဲ့သို့လည်းကောင်း ငါဖြစ်၏။ စားစရာဖို့ စပျစ်သီးပြွတ် မရှိ။ အဦးမှည့်သော သင်္ဘောသဖန်းသီးကို ငါတောင့်တရ၏။ 2ကောင်းသောပြည်သားအပေါင်းတို့သည် ကွယ်ပျောက်ကြပြီ။ ဖြောင့်မတ်သောသူ တစ်ယောက်မျှမရှိ။ ခပ်သိမ်းသောသူတို့သည် လူအသက်ကို သတ်ခြင်းငှာ ချောင်း၍ ကြည့်တတ်ကြ၏။ အချင်းချင်း တစ်ယောက်ကို တစ်ယောက် ကျော့ကွင်းနှင့် ဖမ်းတတ်ကြ၏။ 3ဒုစရိုက်ကို ကြိုးစား၍ပြုခြင်းငှာ အသင့်ရှိကြ၏။ မင်းသည် လက်ဆောင်ကို တောင်းတတ်၏။ တရားသူကြီးသည် တံစိုးကို စားတတ်၏။ သူတစ်ပါးထက်ကြီးသောသူသည် မတရားသော လောဘကို ထင်ရှားစေတတ်၏။ ထိုသို့အမှုကို ရှုပ်စေခြင်းငှာ ပြုတတ်ကြ၏။ 4အကောင်းဆုံးသော သူသည် ဆူးပင်ကဲ့သို့ ဖြစ်၏။ အဖြောင့်ဆုံးသော သူသည် ဆူးခြံထက်ခက်လှ၏။ သင်၏ကင်းစောင့်တို့သည် သတိပေးသောနေ့၊ သင်စစ်ကြောခြင်းကို ခံရသော နေ့ရက်သည် ရောက်လာပြီ။ နှိပ်စက်နှောင့်ယှက်ရာကာလ ဖြစ်၏။ 5အဆွေခင်ပွန်းကို မယုံနှင့်။ လမ်းပြသောသူကို အမှီမပြုနှင့်။ သင့်ရင်ခွင်၌ အိပ်သောမယားကို မယုံမူ၍၊ သင့်နှုတ်တံခါးကို ပိတ်ထားလော့။ 6အကြောင်းမူကား၊ သားသည် အဘ၏အသရေကို ဖျက်လိမ့်မည်။ သမီးသည် အမိကိုလည်းကောင်း၊ ချွေးမသည် ယောက္ခမကိုလည်းကောင်း ရန်ဘက်ပြုလိမ့်မည်။ ကိုယ်အိမ်သူအိမ်သားတို့သည်လည်း ကိုယ်ရန်သူဖြစ်ကြလိမ့်မည်။

7ငါမူကား၊ ထာဝရဘုရားကို မျှော်လင့်မည်။ ငါ့ကို ကယ်တင်တော်မူသော ဘုရားသခင်ကို ငါခိုလှုံမည်။ ငါ၏ဘုရားသခင်သည် ငါ့စကားကို နားထောင်တော်မူမည်။

အလင်းနှင့်ကယ်တင်ခြင်း

8အချင်းရန်သူ၊ ငါ့အပေါ်မှာ ဝါကြွားဝမ်းမြောက်ခြင်း မရှိနှင့်။ ငါလဲသော်လည်း ထဦးမည်။ မှောင်မိုက်၌ ထိုင်ရသော်လည်း၊ ထာဝရဘုရားသည် ငါ၏အလင်းဖြစ်တော်မူလိမ့်မည်။ 9ငါသည် ထာဝရဘုရားကို ပြစ်မှားသောကြောင့်၊ အမျက်တော်ကို ခံရ၏။ ငါ့အမှုကို စစ်ကြော၍ တရားဆုံးဖြတ်တော် မမူမီတိုင်အောင် ငါခံရ၏။ ငါ့ကို အလင်းထဲသို့ထုတ်၍ နေရာပေးတော်မူသောအားဖြင့် ဖြောင့်မတ်ခြင်း ပါရမီတော်ကို ငါမြင်ရလိမ့်မည်။ 10သင်၏ ဘုရားသခင် ထာဝရဘုရားကား၊ အဘယ်မှာရှိသနည်းဟုမေးသော ငါ့ရန်သူသည် ထိုအမှုကို မြင်၍ ရှက်ကြောက်လိမ့်မည်။ သူ၌ ငါ့စိတ်ပြေလိမ့်မည်။ သူသည် လမ်းမှာ ရွှံ့ကဲ့သို့ ကျော်နင်းခြင်းကို ခံရလိမ့်မည်။

11သင်၏မြို့ရိုးတည်သောကာလသည် ရောက်လိမ့်မည်။ အမိန့်တော်အရှိန် ကုန်လိမ့်မည်။ 12ထိုကာလ၌ အာရှုရိပြည်နှင့် အဲဂုတ္တုမြို့များမှလည်းကောင်း၊ အဲဂုတ္တုပြည်နှင့် မြစ်ကြီးစပ်ကြား အရပ်မှလည်းကောင်း၊ ပင်လယ်ကမ်းနားအရပ်ရပ်၊ တောင်ခြေရင်း အရပ်ရပ်တို့မှလည်းကောင်း၊ သင့်ထံသို့ လာကြလိမ့်မည်။ 13ထိုသို့ မဖြစ်မီ ပြည်သူပြည်သားပြုမိသော ဒုစရိုက်အပြစ်ကြောင့် ပြည်တော်သည် လူဆိတ်ညံလျက် ရှိရလိမ့်မည်။

ဣသရေလတို့အပေါ်သနားခြင်း

14ကိုယ်တော်၏ လူတည်းဟူသော အပေါင်းအဖော်မရှိဘဲ၊ တောတွင် ကရမေလတောင်ပေါ်မှာ နေရသော အမွေတော်သိုးစုကို သိုးထိန်းနှင်တံနှင့် ထိန်းတော်မူပါ။ ရှေးကာလ၌ ရှိသကဲ့သို့၊ ဗာရှန်ပြည်နှင့် ဂိလဒ်ပြည်၌ ကျက်စားသော အခွင့်ကို ပေးတော်မူပါ။ 15သင်သည် အဲဂုတ္တုပြည်မှ ထွက်သောနေ့၌ မြင်သည်အတိုင်း၊ တစ်ဖန် အံ့ဩဖွယ်သောအမှုတို့ကို ငါပြမည်။ 16လူအမျိုးမျိုးတို့သည် ငါ၏လူတို့၌ရှိသမျှသော တန်ခိုးကိုမြင်၍ မိန်းမောတွေဝေလျက်၊ မိမိတို့နှုတ်ကို လက်နှင့်ပိတ်၍ နားပင်းကြလိမ့်မည်။ 17မြွေကဲ့သို့ မြေမှုန့်ကိုလျက်၍၊ တီကဲ့သို့တွင်းထဲက တုန်လှုပ်လျက် ထွက်ကြလိမ့်မည်။ ငါတို့ဘုရားသခင် ထာဝရဘုရားကိုလည်းကောင်း၊ သင့်ကိုလည်းကောင်း ကြောက်ရွံ့ကြလိမ့်မည်။

18အပြစ်မှ လွှတ်တော်မူထသော၊ ကျန်ကြွင်းသော အမွေတော်လူတို့၏ လွန်ကျူးခြင်းများကို သည်းခံတော်မူထသော၊ ကရုဏာ၌ မွေ့လျော်သောကြောင့် အစဉ်အမျက်ထွက်တော်မမူသော ကိုယ်တော်ကဲ့သို့ အဘယ်ဘုရား ရှိပါသနည်း။ 19ကိုယ်တော်သည် အကျွန်ုပ်တို့ကို တစ်ဖန်သနား၍၊ အကျွန်ုပ်တို့၏ ဒုစရိုက်ရှိသမျှတို့ကို ကျော်နင်းတော်မူလိမ့်မည်။ အကျွန်ုပ်တို့၏ အပြစ်အလုံးစုံတို့ကို နက်နဲသော ပင်လယ်ထဲသို့ ချပစ်တော်မူလိမ့်မည်။ 20ရှေးကာလမှစ၍ ဘိုးဘေးတို့အား ကျိန်ဆိုတော်မူသည်အတိုင်း၊ ယာကုပ်၌ သစ္စာစောင့်ခြင်း၊ အာဗြဟံအား ကရုဏာကျေးဇူးပြုခြင်းကို စီရင်တော်မူလိမ့်မည်။

ပရောဖက်မိက္ခာ စီရင်ရေးထားသော အနာဂတ္တိကျမ်းပြီး၏။

မိက္ခာအနာဂတ္တိကျမ်း - ၇ (အနက်ဖွင့်)

၈။ တိုင်းနိုင်ငံများ မိမိတို့တိုင်းပြည်အတွက် ငိုကြွေးမည့်အကြောင်း(၇:၁–၁၀)

၇:၁-၂ ဤနေရာတွင် မိက္ခာသည် ဘုရားသခင်နှင့်တိုင်းနိုင်ငံများအကြားတွင် ရပ်တည်သည်။ မြို့ရွာများမှ ဖြောင့်မတ်သော ပြည်သားများသည် ပျောက်ကွယ်သွားကြပြီ။ အကြမ်းဖက်သတ်ဖြတ်မှု အနှံ့အပြားဖြစ်နေကြသည်။ ခေတ်ကာလလူများ၏ အခြေအနေကို ဆွတ်ယူစားချင့်စဖွယ်မကောင်း (အပြွတ်အခိုင်လိုက် တွဲလျက်မရှိ) သောနွေကာလနှောင်း သင်္ဘောသဖန်းသီးနှင့်၎င်း၊ လိုက်လံစကောက်ထားသော စပျစ်သီးအကြွင်းအကျန်နှင့်၎င်း ခိုင်းနှိုင်းထားသည်။

၇:၃–၆ အုပ်စိုးမည့်သူများနှင့် တရားသူကြီးများသည် တံစိုးလက်ဆောင် လာဘ်ယူကြသောကြောင့် စီရင်ခြင်းပြစ်ဒဏ် ခံရလုနီးပြီ။ ယုံကြည်မှီကိုးထိုက်သူတစ်ယောက်မျှမရှိ။။ မိတ်ဆွေများ၊ အိမ်နီးနားချင်းများနှင့် ဆွေမျိုးများလည်း တစ်ဦးကိုတစ်ဦး သစ္စာဖောက်ဖျက်ရန်ဘက်ပြုကြပြီ။

၇:၇–၁၀ ထာဝရဘုရားသခင် တစ်ပါးတည်းသာလျှင် မှီခိုအားကိုးစရာရှိတော့သည်။ ကြွင်းကျန်သောယုံကြည်သူများက ရန်သူအား “မိမိတို့အပေါ်မှာ ဝါကြွားဝမ်းမြောက်နေမှု မလွန်ကဲကြနှင့်”ဟု သတိပေးသည်။ ဒုစရိုက် အဓမ္မလူတို့အဖို့ ပျက်စီးခြင်းအဆုံးရှိ၏။ ဘုရားသခင်သည် သူ၏လူများကိုမှု ကရုဏာတော်ဖြင့် ပြန်လည်ထူမပေးမည်။ သူတို့၏ ရန်ကိုလည်း မရှူနိုင်မရှိုက်နိုင်အောင် ရှက်ရွံ့စေလိမ့်မည်။

၉။ ဣသရေလတို့၏အနာဂတ်ကောင်းချီးမင်္ဂလာ (၇:၁၁–၂၀)

၇:၁၁–၁၂ ထိုနောက်ယေရုရှလင်မြို့သို့ လိပ်မူပြောဆိုသည်။ မြို့ရိုးပြန်တည်ရမည့်အကြောင်းနှင့် နယ်နိမိတ်စည်းရိုးများ မြဲမြံမည့်အချိန်ရောက်လာမည်။ ဖမ်းဆီးခေါ်ဆောင်ခံရသူများ အမိမြေသို့ ပြန်လာကြမည်။ မိစ္ဆာတိုင်းနိုင်ငံတို့သည် သူတို့ဆိုးယုတ်မှုအတွက် အပြစ်စီရင်ခြင်းခံရမည်။

၇:၁၃ ဤကျမ်းပိုဒ်ကို ရုတ်တရက်ဖတ်လျှင် ထူးဆန်းသည်ဟုထင်ရသည်။ တပါးအမျိုးသားများ မိမိတို့ဆိုးယုတ်မှုမတိုင်း အပြစ်စီရင်ခြင်းခံရသောကြောင့် လူဆိတ်ညံရာ လွင်တီးခေါင်ပြင်ဖြစ်ရသည်ဟု ထင်မှတ်စရာရှိသည်။ “ပြည်တော်” ၏ မူရင်းဟေဗြဲစကားလုံးဖြစ်သည့် eretz ကို land “မြေ”နှင့်“ပြည်တော်”ဟု ပြန်ဆိုသကဲ့သို့ earth “ကမ္ဘာလောက” ဟုလည်း ပြန်လည်ဆိုလေ့ရှိသည်။၅ပြန်လည်စုစည်းခြင်းမပြုမီ ထိုအဖြစ်အပျက်ကြုံတွေ့ကြမည်။ Moffatt က “ကမ္ဘာလောကသည် ရုပ်တုဆင်းတုတို့နောက်သို့ ရေလိုက်လွဲခဲ့ကြသည့်အလျောက် အတုံ့အလှည့်အဖြစ် လူသူညံရာလွင်တီးခေါင်အဖြစ် လဲလျောင်းလိမ့်မည်” ဟုပြန်ဆိုသည်။

၇:၁၄–၁၇ အပိုဒ်ငယ် ၁၄ မှာ လုံလောက်သောအစားအစာနှင့် သိုးထိန်းရရှိဖို့ ဘုရားသခင်ထံ ဆုတောင်းခြင်းဖြစ်သည်။ ဘုရားသခင်က သူ့လူများအား အံ့သြဖွယ်အမှုများပြုမည့် အကြောင်းနှင့် လူမျိုးတော်အား ညှဉ်းပန်းနှိပ်စက်သူများသည် အရှက်တကွဲအကျိုးနည်းဖြင့် ကတိပေးထားသည်။

၇:၁၈–၂၀ ဤအနာဂတ္တိကျမ်းကို ဘုရားသခင်အား ချီးမွမ်းသီချင်းဖြင့် အဆုံးသတ်ထားသည်။ ဘုရားရှင်ထံတော်မှ ခံစားရသောသနားခြင်းကရုဏာတော်၊ အပြစ်ခွင့်လွှတ်ခြင်း၊ စာနာမှု၊ သစ္စာတရားနှင့် မကုန်ခမ်းနိုင်သော ချစ်ခြင်းမေတ္တာများဖွဲ့ဆိုဖော်ကျူးထားသည်။

မှတ်စု

၁။ (၁:၁၀-၁၄) စာပေသဒ္ဒါအားဖြင့် တိကျမှုကို NKJV Margin တွင်ကြည့်ပါ။

၂။ (၁:၁၀-၁၄) The Bible, A New Translation, by James Moffatt, Micah 1:10-14.

၃။ (၄:၁-၄) ဤစာသား (ကျမ်းပြိုင်-ဟေရှာယ၊၂:၂-၄၌ လည်းကြည့်)ကို နယူးယောက်မြို့ရှိ ကုလသမဂ္ဂ ရုံးချူပ်အဆောက်အဦးတွင် ရေးထွင်းထားသော်လည်း ငြိမ်သက်ခြင်း၏အရှင်သခင်၊ ခရစ်တော်ဘုရားကိုယ်တော်တိုင် မကြွလာမချင်း စစ်မှန်တည်တံ့သောငြိမ်သက်ခြင်း ရရှိနိုင်မည်မဟုတ်ပေ။

၄။ (၅:၄-၆) ဤဂဏန်းရေတွက်နည်းမှာ ဓမ္မဟောင်းကျမ်းတွင် အဆန်းအကျယ်မဟုတ်ပါ။ ယောဘ၊၅:၁၉။ဆာ၊၆၂:၁၁-၁၂၊အာမုတ်၊၁:၃ တို့တွင်ကြည့်ပါ။

၅။ NIV ကျမ်းမူတွင် “ဤနေရာ” ဟုပြန်ဆိုထားသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။