Malachi -1 -

မာလခိအနာဂတ္တိကျမ်း - ၁

ယာကုပ်အတွက်မေတ္တာ

1ထာဝရဘုရားသည် မာလခိလက်တွင် ဣသရေလအမျိုးသို့ ပေးလိုက်တော်မူသော ဗျာဒိတ်နှုတ်ကပတ်တော်တည်းဟူသော၊ 2ထာဝရဘုရားမိန့်တော်မူသော စကားဟူမူကား၊ သင်တို့ကို ငါချစ်လေပြီ။ အကျွန်ုပ်တို့ကို အဘယ်သို့ ချစ်တော်မူသနည်းဟု သင်တို့မေးကြလျှင်၊ ဧသောသည် ယာကုပ်၏အစ်ကို ဖြစ်သည်မဟုတ်လော။ သို့သော်လည်း ယာကုပ်ကိုငါချစ်၏။ 3ဧသောကို ငါမုန်း၍ သူနေသောတောင်တို့ကို လွင်ပြင်ဖြစ်စေပြီ။ သူ့အမွေခံရာမြေကို မြေခွေးတို့၌ အပ်လေပြီဟု ထာဝရဘုရား မိန့်တော်မူ၏။ 4ဧဒုံအမျိုးသားတို့က၊ ငါတို့သည်ပျက်စီးသော်လည်း၊ ပျက်စီးသောအရပ်တို့ကို တစ်ဖန် တည်ဆောက်ဦးမည်ဟု ဆိုရာတွင်၊ ကောင်းကင်ဗိုလ်ခြေအရှင် ထာဝရဘုရား မိန့်တော်မူသည်ကား၊ သူတို့သည်တည်ဆောက်သော်လည်း ငါဖြိုဖျက်မည်။ သူတို့ကို ဒုစရိုက်ပြည်သား၊ ထာဝရဘုရား အစဉ်အမျက်ထွက်တော်မူသော လူမျိုးဟူ၍ သမုတ်ကြလိမ့်မည်။ 5ထိုအမှုကို သင်တို့သည် မြင်သောအခါ၊ ထာဝရဘုရားသည် ဣသရေလပြည်၏ပြင်မှာ ဘုန်းတန်ခိုးကြီးတော်မူသည်ဟု ဆိုကြလိမ့်မည်။

ယဇ်ပုရောဟိတ်တို့အားပြစ်တင်ခြင်း

6သားသည် အဘကို ရိုသေတတ်၏။ ကျွန်သည် သခင်ကို ကြောက်ရွံ့တတ်၏။ ငါသည် အဘမှန်လျှင်၊ ငါ့ကို အဘယ်သူ ရိုသေသနည်း။ သခင်မှန်လျှင်၊ အဘယ်သူကြောက်ရွံ့သနည်းဟု ကောင်းကင်ဗိုလ်ခြေအရှင် ထာဝရဘုရားသည် နာမတော်ကို မထီမဲ့မြင်ပြုသော ယဇ်ပုရောဟိတ်တို့အား မေးတော်မူ၏။ အကျွန်ုပ်တို့သည် နာမတော်ကို အဘယ်သို့ မထီမဲ့မြင်ပြုပါသနည်းဟု သင်တို့မေးရာတွင်၊ 7ညစ်ညူးသောအစာကို ငါ့ယဇ်ပလ္လင်သို့ ဆောင်ခဲ့ကြသည်တကား။ အကျွန်ုပ်တို့သည် ကိုယ်တော်ကို အဘယ်သို့ ရှုတ်ချပါသနည်းဟု မေးရာတွင်၊ ထာဝရဘုရား၏စားပွဲသည် ယုတ်မာ၏ဟုဆိုသောကြောင့် ငါ့ကို ရှုတ်ချကြပြီ။ 8မျက်စိကန်းသောအကောင်ကို ယဇ်ပူဇော်လျှင် အပြစ်ရှိသည် မဟုတ်လော။ ခြေဆွံ့သောအကောင်နှင့် နာသောအကောင်ကို ယဇ်ပူဇော်လျှင် အပြစ်ရှိသည် မဟုတ်လော။ မြို့ဝန်မင်းအား ဆက်ပါလော့။ မင်း၏စိတ်နှင့် တွေ့လိမ့်မည်လော။ သင့်မျက်နှာကို ထောက်လိမ့်မည်လောဟု ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။ 9ယခုမှာ ဘုရားသခင်သည် ငါတို့ကို ကယ်မသနားတော်မူမည်အကြောင်း၊ ထာဝရဘုရားရှေ့တော်၌ ဆုတောင်းကြပါလော့။ သင်တို့လက်ခံသောကြောင့် ဤသို့ ပြုတတ်ကြ၏။ သင်တို့မျက်နှာကို ထောက်ရမည်လောဟု ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။ 10သင်တို့တွင် အဘယ်သူသည် ငါ့တံခါးတို့ကို ပိတ်လိမ့်မည်နည်း။ သင်တို့သည် ငါ့ယဇ်ပလ္လင်ပေါ်မှာ မီးကို အချည်းနှီးမညှိရကြ။ သင်တို့ကို ငါအလိုမရှိ၊ သင်တို့ပြုသော ပူဇော်သကာကို ငါလက်မခံဟု ကောင်းကင်ဗိုလ်ခြေ အရှင်ထာဝရဘုရား မိန့်တော်မူ၏။

11နေထွက်ရာအရပ်မှသည် နေဝင်ရာအရပ်တိုင်အောင် တစ်ပါးအမျိုးသားတို့တွင် ငါ၏နာမတော်သည် ကြီးမြတ်ရလိမ့်မည်။ ခပ်သိမ်းသောအရပ်တို့၌ နံ့သာပေါင်းကို ငါ၏နာမတော်အားမီးရှို့၍၊ သန့်ရှင်းသော ပူဇော်သကာကို ဆက်ကပ်ရကြလိမ့်မည်။ ငါ၏နာမတော်သည် တစ်ပါးအမျိုးသားတို့တွင် ကြီးမြတ်ရလိမ့်မည်ဟု ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။ 12သင်တို့က၊ ထာဝရဘုရား၏စားပွဲတော်သည် ညစ်ညူး၏။ တင်ထားသောဘောဇဉ်ပူဇော်သကာသည် ယုတ်မာ၏ဟု ဆိုသောကြောင့် စားပွဲတော်ကို ရှုတ်ချကြပြီ။ 13တစ်ဖန် သင်တို့က၊ အမှုတော်ကို ဆောင်ရွက်၍ ပင်ပန်းစွတကားဟု ဆိုလျက်၊ ကဲ့ရဲ့သံကိုပြုတတ်ကြသည်ဟု ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။ လုယူသောအကောင်၊ ခြေဆွံ့သောအကောင်၊ နာသောအကောင်ကို ဆောင်ခဲ့ကြပြီ။ ထိုသို့သော ပူဇော်သကာကို ဆောင်ခဲ့ကြပြီတကား။ သင်တို့လက်မှ ငါခံရမည်လောဟု ထာဝရဘုရား မေးတော်မူ၏။ 14သစ္စာကတိထားပြီးမှ မိမိသိုးစု၌ အထီးရှိလျက်ပင်လှည့်စား၍၊ ထာဝရဘုရားအား ချို့တဲ့သော အကောင်ကို ယဇ်ပူဇော်သောသူသည် အမင်္ဂလာရှိစေသတည်း။ ငါသည် ကြီးမြတ်သော ရှင်ဘုရင်ဖြစ်၏။ ငါ၏နာမတော်သည် လူအမျိုးမျိုးတို့တွင် ကြောက်မက်ဖွယ်ဖြစ်ရမည်ဟု ကောင်းကင်ဗိုလ်ခြေအရှင် ထာဝရဘုရား မိန့်တော်မူ၏။

မာလခိအနာဂတ္တိကျမ်း - ၁ (အနက်ဖွင့်)

၁။ ဣသရေလလူမျိုးအား အပြစ်ဆိုခြင်း၊ ဣသရေလတို့၏တုန့်ပြန်ခြင်းနှင့် တရားစီရင်မည့်အကြောင်း (၁:၁–၃:၁၅)

(က) ကျေးဇူးကန်းကြခြင်း (၁:၁–၅)

၁:၁–၅ ဤအခန်းကြီးတွင် ဘုရားသခင်က ရွေးကောက်ထားသော လူမျိုးတော်အား အပြစ်တင်ပြီး၊ လူမျိုး တော်က ငြင်းဆိုခြင်းကို တွေ့ရသည်။ ပထမဦးစွာ ဘုရားရှင်က ဣသရေလတို့အား ချစ်မြတ်နိုးသည်ဟု ဆိုသည်။ အကျွန်ုပ်တို့ကို အဘယ်သို့ချစ်သနည်းဟု ပြန်ထောက်ကြသည်။ ထို့ကြောင့် ကိုယ်တော်ဘုရားမေတ္တာကြီးမားပုံကို ဧသောနှင့်ယာကုပ်ဇာတ်လမ်း ပြန်ထောက်ကြသည်။ ယာကုပ်သည် သူတို့ဘိုးဘေးကြီးဖြစ်၍ ဧသောသည် ဧဒုံလူမျိုးနွယ်၏ ဘိုးဘေးကြီးဖြစ်သည်။ ဧဒုံအမျိုးပျက်စီးပုံကို ဣသရေလတို့ မျက်ဝါးထင်ထင်တွေ့မြင်ခြင်းဖြင့် ဘုရားသခင်၏ကြီးမြတ်ပုံကို နားလည်သဘောပေါက်သင့်သည်။

(ခ) ယဇ်ပုရောဟိတ်များက ဘုရားတရားပြစ်မှားခြင်း (၁:၆–၁၄)

၁:၆ ဣသရေလလူမျိုး၏ ဖောက်ပြန်မှုကို အပြစ်ဖော်ပြပြီးနောက် ယဇ်ပုရောဟိတ်များက နာမတော်အား ကြည်ညိုတန်ဖိုးထားခြင်းမရှိ၊ ရှုတ်ချပုတ်ကွက်ကြပုံကို ထုတ်ဖော်အပြစ်တင်သည်။ ယဇ်ပုရောဟိတ်များကလည်း ဘယ်နေရာမှာပျက်ကွက်ကြသနည်းဟု နှုတ်လှန်မေးကြသည်။

၁:၇–၈ မစင်ကြယ်သော ပူဇော်သက္ကာများဖြင့် ယဇ်ပလ္လင်ကို ညစ်ညူးစေပြီဟု အပြစ်ဆိုသည်။ အဘယ် အရာနည်းဟုမေးမြန်းသော် သင်တို့သည် မြို့ဝန်မင်းထံသို့ပင် မပေးဆက်ဝံ့သော ချိုလိမ်ခွါပဲ့ တိရစ္ဆာန်များ၊ အကန်းနှင့်ခြေခွင်သောအကောင်များ၊ အနာရောဂါရှိသော ယဇ်ကောင်များဖြင့် ယဇ်ပူဇော်ခဲ့ကြောင်း ဘုရားသခင် က ထောက်ပြသည်။

၁:၉ ထို့ကြောင့် ဘုရားသခင်၏အမျက်ဒေါသသင့်ခြင်းမှ ချမ်းသာရရန် မိမိတို့အပြစ်ကို နောင်တရရှိကြဖို့ ပရောဖက်ကြီးက သတိပေးသည်။

၁:၁၀ ထိုသို့ အရည်အချင်း စံမမီသော ယဇ်ကောင်များဖြင့် ယဇ်ပူဇော်ခြင်းသည် ယဇ်ပလ္လင်ပေါ်၌ အချည်း နှီးမီးရှို့ခြင်းသက်သက်သာဖြစ်သောကြောင့် လက်သင့်မခံနိုင်ပါ။ ထိုအရာရပ်ဆိုင်းစေဖို့ ဗိမာန်တော် တံခါးကိုပိတ် ရန် ကောင်းကင်ဗိုလ်ခြေအရှင်ဘုရားသခင်က အလိုတော်ရှိသည်။ မည်သူပိတ်ဆို့ပါမည်နည်း။

၁:၁၁ ရွေးကောက်တော်မူသော လူမျိုးတော်က တန်ဖိုးမထားကြသောကြောင့် ဘုရားသခင်၏နာမတော် သည် တပါးအမျိုးသားအလယ်တွင် ကြီးမြတ်ထင်ရှားလိမ့်မည်။

၁:၁၂–၁၄ ယုဒလူမျိုးများသည် ဗိမာန်တော်အမှုပြုခြင်း၌ ပင်ပန်းဆင်းရဲသည်ဟု ငြီးတွားကြသည်။ ညစ်ညူးသောခဲဘွယ်ဘောဇဉ်၊ အပြစ်မကင်းသော ယဇ်ကောင်များဖြင့် ပူဇော်သက္ကာပြုကြပြီ။ အသုံးမလို ရွေးဝယ် ပစ္စည်းများဖြင့် ကြီးမြတ်သောဘုရားကို ပူဇော်ကြသည်။ စင်စစ်မူ ဘုရားသခင်သည် ကြီးမြတ်သော ရှင်ဘုရင် ဖြစ်သည်။ လူမျိုးတိုင်းကြောက်ရွံ့ရိုသေရသောအရှင်ဖြစ်သည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။