Joel -2 -

ယောလအနာဂတ္တိကျမ်း - ၂

ထာဝရဘုရား၏ နေ့ရက်နီးပြီ။

1ဇိအုန်တောင်ပေါ်မှာ တံပိုးကို မှုတ်ကြလော့။ သန့်ရှင်းသော ငါတောင်ပေါ်မှာ သတိပေးသော အသံကို ပြုကြလော့။ ပြည်သူပြည်သား အပေါင်းတို့သည် တုန်လှုပ်ကြစေ။ အကြောင်းမူကား၊ ထာဝရဘုရား၏ နေ့ရက်သည် လာ၍ နီးပြီ။ 2မိုက်မဲသောနေ့၊ မိုးအုံ့၍ မှောင်မိုက်ထူထပ်သော နေ့ဖြစ်၏။ နေအရုဏ်သည် တောင်ထိပ်တို့ကို နှံ့ပြားသကဲ့သို့၊ အများဖြစ်၍ အားကြီးသောအမျိုးသည် လာ၏။ ရှေးကာလ၌ ထိုသို့ မဖြစ်စဖူး။ နောင်ကာလ အစဉ်အဆက်၌လည်း မဖြစ်ရလတ္တံ့။ 3သူတို့ရှေ့မှာ မီးလောင်၏။ နောက်၌လည်း မီးလျှံတောက်၏။ ရှေ့တွင်ရှိသော ပြည်သည် ဧဒင်ဥယျာဉ်ကဲ့သို့ ဖြစ်၏။ နောက်၌ကား၊ သုတ်သင်ပယ်ရှင်းသော လွင်ပြင်ဖြစ်၏။ အကယ်စင်စစ် သူတို့လက်မှ အဘယ်အရာမျှ မလွတ်ရ။ 4သူတို့သည် အဆင်းအားဖြင့် မြင်းနှင့်တူ၍၊ မြင်းစီးသူရဲကဲ့သို့ ပြေးကြလိမ့်မည်။ 5ရထားမြည်သံ ကဲ့သို့လည်းကောင်း၊ အမှိုက်ကို လောင်သော မီးမြည်သံကဲ့သို့လည်းကောင်းအသံမြည်၍ တောင်ထိပ်တို့အပေါ်မှာ ခုန်ကြလိမ့်မည်။ စစ်တိုက်ခြင်းငှာ ခင်းကျင်း၍ အားကြီးသောလူ အလုံးအရင်းကဲ့သို့ ဖြစ်ကြလိမ့်မည်။ 6သူတို့ရှေ့မှာ လူတို့သည် အလွန်ပင်ပန်းသောစိတ်ရှိ၍၊ ခပ်သိမ်းသော သူတို့သည် မျက်နှာမည်းကြလိမ့်မည်။ 7သူတို့သည် သူရဲကဲ့သို့ ပြေး၍ စစ်သူရဲကဲ့သို့ မြို့ရိုးကို တက်ကြလိမ့်မည်။ လမ်းမလွှဲဘဲ အသီးအသီး မိမိတို့လမ်းသို့ တည့်တည့်လိုက်ကြလိမ့်မည်။ 8တစ်ဦးကိုတစ်ဦး မတိုက်ဘဲ မိမိလမ်းသို့ မိမိလိုက်ကြလိမ့်မည်။ ဓားသွားကို ထိသော်လည်း ရှနခြင်းကို မခံရကြ။ 9မြို့ထဲမှာ တလည်လည်ပြေးလျက်၊ မြို့ရိုးကိုကျော်လျက်၊ အိမ်ပေါ်သို့ တက်လျက်၊ သူခိုးကဲ့သို့ ပြတင်းပေါက်ထဲသို့ ဝင်လျက်ရှိကြလိမ့်မည်။ 10သူတို့ရှေ့မှာ မြေကြီးလှုပ်လိမ့်မည်။ မိုးကောင်းကင်လည်း တုန်ခိုက်လိမ့်မည်။ နေနှင့် လသည် မိုက်၍၊ ကြယ်တို့သည် မထွန်းလင်းဘဲ နေကြလိမ့်မည်။ 11ထာဝရဘုရားသည်လည်း မိမိတပ်တော်ရှေ့မှာ အသံကို လွှင့်တော်မူမည်။ တပ်တော်သည်အလွန်ကြီးမား၏။ စကားတော်အတိုင်း စီရင်သောသူသည် တန်ခိုးကြီးတော်မူ၏။ ထာဝရဘုရား၏နေ့ရက်သည် ကြီး၍ အလွန်ကြောက်မက်ဖွယ်သော နေ့ရက်ဖြစ်၏။ အဘယ်သူ ခံနိုင်သနည်း။

ထာဝရဘုရား၏ချစ်သနားခြင်း

12သို့ဖြစ်၍၊ ထာဝရဘုရားမိန့်တော်မူသည်ကား၊ ယခုတွင် အစာရှောင်ခြင်း၊ ငိုကြွေးမြည်တမ်းခြင်းနှင့်တကွ စိတ်နှလုံးအကြွင်းမဲ့ ငါ့ထံသို့ ပြန်လာကြလော့။ 13အဝတ်ကို မဆုတ်ဘဲ နှလုံးကိုဆုတ်လျက်၊ သင်တို့၏ ဘုရားသခင်ထာဝရဘုရား ထံတော်သို့ ပြန်လာကြလော့။ ချစ်သနားခြင်း မေတ္တာကရုဏာနှင့် ပြည့်စုံ၍ စိတ်ရှည်သောသဘော၊ အလွန် ကျေးဇူးပြုချင်သောသဘော၊ အပြစ်ပေးခြင်းကို နောင်တရတတ်သောသဘော ရှိတော်မူ၏။ 14သင်တို့သည် သင်တို့၏ ဘုရားသခင် ထာဝရဘုရားအား ဘောဇဉ်ပူဇော်သကာနှင့် သွန်းလောင်းရာ ပူဇော်သကာကို ဆက်ကပ်ရန် ဖြစ်စေခြင်းငှာ၊ ဘုရားသခင်သည် တစ်ဖန် ပြန်လာ၍ နောင်တရပြီးလျှင်၊ ကောင်းကြီးမင်္ဂလာကို ထားရစ်စေတော်မူမည် မမူမည်ကို အဘယ်သူသိနိုင်သနည်း။

15ဇိအုန်တောင်ပေါ်မှာ တံပိုးကို မှုတ်ကြလော့။ အစာရှောင်ရသော အချိန်ကို ခန့်ထား၍ ခြိုးခြံစွာ ကျင့်ရသောအချိန်ကို ကြော်ငြာကြလော့။ 16လူများတို့ကို ခေါ်၍ စုဝေးသော ပရိသတ်တို့ကို သန့်ရှင်းစေကြလော့။ အသက်ကြီးသော သူတို့ကိုလည်းကောင်း၊ ငယ်သောသူနှင့် နို့စို့သောသူတို့ကိုလည်းကောင်း စုဝေးစေကြလော့။ မင်္ဂလာဆောင်လုလင်သည် မိမိအခန်းထဲကလည်းကောင်း၊ မင်္ဂလာ ဆောင်သတို့သမီးသည် မိမိကွယ်၍နေသော ကုလားကာတွင်းကလည်းကောင်း ထွက်စေ။ 17ထာဝရဘုရား၏ အမှုတော်စောင့်၊ ယဇ်ပုရောဟိတ်တို့သည် အိမ်တော်ဦးနှင့် ယဇ်ပလ္လင်စပ်ကြားမှာ ငိုကြွေးလျက်၊ အို ထာဝရဘုရား၊ ကိုယ်တော်၏လူများကို သနားတော်မူပါ။ တစ်ပါးအမျိုးသားတို့သည် အစိုးရ၍ အမွေတော်လူတို့ကို ကဲ့ရဲ့စေခြင်းငှာ အပ်နှံတော်မမူပါနှင့်။ သူတို့ ဘုရားသခင်ကား၊ အဘယ်မှာရှိသနည်းဟု တစ်ပါးအမျိုးသားတို့သည် အဘယ်ကြောင့် ဆိုရကြပါသနည်းဟု လျှောက်ကြစေ။

ထာဝရဘုရား၏ကတိတော်

18သို့ပြုလျှင်၊ ထာဝရဘုရားသည် ပြည်တော်ကို မစချင်သော စိတ်အားကြီး၍ မိမိလူတို့ကို ကယ်မသနားတော်မူလိမ့်မည်။ 19အကယ်စင်စစ် ထာဝရဘုရားသည် ထူးတော်မူလျက်၊ ငါသည် ဆန်စပါး၊ စပျစ်ရည်၊ ဆီကို ပေးလိုက်၍ သင်တို့သည် ဝကြလိမ့်မည်။ နောက်တစ်ဖန် တစ်ပါးအမျိုးသား ကဲ့ရဲ့ရာဖြစ်စေခြင်းငှာ ငါမပြု။ 20မြောက်မျက်နှာ တပ်သားတို့ကို သင်တို့နေရာမှ ငါပယ်ရှားမည်။ အဘယ်သူမျှ မရှိ၊ သွေ့ခြောက်သော အရပ်သို့ နှင်ထုတ်မည်။ အရှေ့ပင်လယ်ကို မျက်နှာပြုလျက်၊ အနောက်ပင်လယ်ကို ကျောခိုင်းလျက် ချီသွားလိမ့်မည်။ ပုပ်စပ်နံစော်သော အနံ့ထွက်လိမ့်မည်။ ထာဝရဘုရားသည် ကြီးသော အမှုတို့ကို ပြုတော်မူမည်ဟု မိန့်တော်မူလိမ့်မည်။

21အို ပြည်တော်၊ မစိုးရိမ်နှင့်။ ဝမ်းမြောက်ရွှင်လန်းခြင်းရှိလော့။ ထာဝရဘုရားသည် ကြီးသောအမှုတို့ကို ပြုတော်မူမည်။ 22အို တောသားရဲတို့၊ မစိုးရိမ်ကြနှင့်။ တောမြက်ပင် ပေါက်လျက်၊ သစ်ပင်တို့သည် အသီးကိုသီးလျက်၊ သင်္ဘောသဖန်းပင်နှင့် စပျစ်နွယ်ပင်တို့လည်း အားထုတ်လျက် ရှိကြ၏။ 23အို ဇိအုန်မြို့သားတို့၊ ဝမ်းမြောက်၍ သင်တို့၏ ဘုရားသခင်ထာဝရဘုရားကို အမှီပြုလျက် ရွှင်လန်းကြလော့။ အကြောင်းမူကား၊ ဓမ္မဆရာကို ပေးတော်မူ၍ အစအဦး၌လည်း အရင်မိုးနှင့် နောက်မိုးကို သင်တို့အပေါ်မှာ ရွာစေတော်မူမည်။ 24ကောက်နယ်တလင်းတို့သည် စပါးနှင့်ပြည့်၍၊ အသီးနယ်ရာ ကျင်းတို့၌လည်း စပျစ်ရည်နှင့် ဆီ လျှံကြလိမ့်မည်။ 25အရာဘကျိုင်း၊ ယာလက်ကျိုင်း၊ ခါသိလကျိုင်း၊ ဂါဇံကျိုင်းတည်းဟူသော ငါစေလွှတ်သော ငါ၏မဟာဗိုလ်ခြေတို့ ကိုက်စားသော နှစ်ပေါင်းကာလကို ငါပြန်ပေးမည်။ 26သင်တို့သည် ဝစွာ စားရကြလိမ့်မည်။ အံ့ဩဖွယ်သော အမှုတို့ကို သင်တို့၌ပြုသော သင်တို့၏ဘုရားသခင် ထာဝရဘုရား၏ နာမတော်ကို ချီးမွမ်းကြလိမ့်မည်။ နောက်တစ်ဖန် ငါ၏လူတို့သည်လည်း ရှက်ကြောက်ခြင်း မရှိရကြ။ 27ငါသည် ဣသရေလအမျိုး၏အလယ်၌ ရှိကြောင်းကိုလည်းကောင်း၊ အခြားသောဘုရား မရှိ၊ ငါထာဝရဘုရားသည် သင်တို့၏ဘုရားသခင် ဖြစ်ကြောင်းကိုလည်းကောင်း သင်တို့ သိရကြလိမ့်မည်။ နောက်တစ်ဖန် ငါ၏လူတို့သည် ရှက်ကြောက်ခြင်း မရှိရကြ။

ထာဝရဘုရား၏ဝိညာဉ်တော်

28ထိုနောက်မှ လူမျိုးတကာတို့ အပေါ်သို့ ငါ၏ဝိညာဉ်တော်ကို ငါသွန်းလောင်းမည်။ သင်တို့၏ သားသမီးတို့သည် ပရောဖက်ဉာဏ်နှင့် ဟောပြောရကြလိမ့်မည်။ အသက်ကြီးသောသူတို့သည် နိမိတ်အိပ်မက်တို့ကို မြင်မက်ရကြလိမ့်မည်။ အသက်ငယ်သော သူတို့သည်လည်း ဗျာဒိတ်ရူပါရုံတို့ကို မြင်ရကြလိမ့်မည်။ 29ငါ၏အမှုကိုဆောင်ရွက်သော ယောက်ျားမိန်းမတို့အပေါ်သို့ ငါ၏ဝိညာဉ်တော်ကို ငါသွန်းလောင်း၍၊ သူတို့သည် ပရောဖက်ဉာဏ်နှင့် ဟောပြောရကြလိမ့်မည်။ 30မိုးကောင်းကင်၌လည်းကောင်း၊ မြေကြီးပေါ်၌လည်းကောင်း၊ အံ့ဖွယ်သောအရာတည်းဟူသော သွေး၊ မီးလျှံ၊ မီးခိုးတိုင်တို့ကို ငါပြမည်။ 31ထာဝရဘုရား၏ ကြောက်မက်ဖွယ်သော နေ့ကြီးမတိုင်မီ၊ နေသည် မှောင်မိုက်အတိ ဖြစ်လိမ့်မည်။ လသည်လည်း သွေးဖြစ်လိမ့်မည်။ 32ထိုအခါ ထာဝရဘုရားကို ပတ္ထနာပြုသောသူ ရှိသမျှတို့သည် ကယ်တင်တော်မူခြင်းသို့ ရောက်ရကြလတ္တံ့။ အကြောင်းမူကား၊ ထာဝရဘုရား မိန့်တော်မူသည်အတိုင်း ဇိအုန်တောင်၊ ယေရုရှလင်မြို့၌၊ ထာဝရဘုရား ခေါ်တော်မူသောသူ အကျန်အကြွင်းတို့အဖို့ ကယ်တင်ခြင်းအခွင့် ရှိရလတ္တံ့။

ယောလအနာဂတ္တိကျမ်း - ၂ (အနက်ဖွင့်)

၂။ ရန်သူများကျူးကျော်ဝင်ရောက်လာခြင်း (၂:၁–၁၁)

၂:၁–၃ စစ်ခရာတပ်လှန့်နှိုးဆော်သံသည် တိုက်ပွဲဝင်ရန် အချက်ပေးသံဖြစ်၍ အသင့်စောင့်နေကြသကဲ့သို့ ဘုရားသခင်၏ နေ့ရက်သည်လည်း ရောက်လာခါနီးပြီ။ လတ်တလောတွင် ဗာဗုလုန်ကျူးကျော်သူများ ဝင်ရောက်ဖျက်ဆီးခြင်းဖြင့် ပရောဖက်ပြုချက် တစိတ်တပိုင်းပြည့်စုံသကဲ့သို့ နောင်တွင် ပြည့်စုံလည်မည့် အချက်များလည်းရှိသည်။ ဗာဗုလုန်ကျူးကျော်သူများ ချဉ်းနင်းမဝင်ရောက်မီကာလတွင် ယုဒပြည်သည် ဧဒင်ဥယျာဉ်ကဲ့သို့ သာယာခဲ့သည်။ ရန်သူများဝင်ရောက်သည့်နောက်ပိုင်းတွင်မူ သုဿန်တစပြင်မြေကဲ့သို့ ခြောက်သွေ့ခဲ့သည်။

၂:၄–၁၁ ကျိုင်းကောင်များသည် မြင်းစီးသရဲများသဖွယ် အားကောင်းမောင်းသန်ပြေးလွှားနေကသည်။ တိုက်ပွဲဝင်စစ်သည်များကဲ့သို့ အုတ်တံတိုင်ပေါ်သို့ ကျော်တက်ကြသည်။ သူခိုးများကဲ့သို့ နေရာအနှံ့ဝင်ရောက်ကြသည်။ ကျိုင်းကောင်အရေအတွက်များပြားလွန်းလှသဖြင့် နေကိုမမြင်ရလောက်အောင် ကောင်းကင်တပြင်လုံး၌ မဲမှောင်ပြည့်နှက်နေကြသည်။ ကျမ်းစကားအသုံးအနှုန်းများမှာ ကဗျာလင်္ကာဟန် တင်စားရေးဖွဲ့ထားသည်။

ထိုမျှ ဧရာမကြီးမားလှသော ပမာဏဖြင့် လာရောက်ကျူးကျော်ကြခြင်းသည် ဘုရားသခင်၏ အစီအစဉ်ဖြစ်သည်။

၃။ ယုဒလူများနောင်တရကြမည့် အကြောင်း(၂:၁၂–၁၄)

ဘုရားသခင်က သူ့လူများအား နောင်တရကြရန်လက်ကမ်းဖိတ်ခေါ်သည်။ ဘုရားသခင်ထံတော်သို့ ပြန်လည်တိုးဝင်ချဉ်းကပ်ရန် အချိန်နောက်မကျသေးပါ။ သို့သော်သူများယာင်၍ လိုက်ယောင်ခြင်းမဟုတ်ဘဲ၊ စိတ်နှလုံးအကြွင်းမဲ့ဖြင့်နောင်တရခြင်းဖြစ်ရမည်။ စိတ်ပါလက်ပါဖြင့် ဘုရားရှင်ထံသို့ ပြန်လည်တိုးဝင်ချဉ်းကပ်ခြင်း ဖြစ်ရမည်။ နောင်တမျက်ရည်၊အစာရှောင်ဥပုသ်စောင့်ခြင်းနှင့် တရားသံဝေဂရ၍ ပြန်လာခြင်းဖြစ်ရမည်။

၄။ အစာရှောင်ခြင်းအကြောင်း(၂:၁၅–၁၇)

ပြည်သူအားလုံးလှည်းနေလှေအောင်း မြင်းဇောင်းမကျန် ဝတ်ပြုကိုးကွယ်ရာသို့ စုဝေးကြ၍ အစာရှောင်ဆုတောင်းကြရမည်။ ယဇ်ပုရောဟိတ်များသည် အိမ်နှင့်ယဇ်ပလ္လင်အကြား လမ်းသွားရင် ငိုကြွေးလိမ့်မည်။ တပါးအမျိုးသားတို့၏ ဖိနှိပ်မှုမှ လွတ်ရန်ကရုဏာတော်ကို တောင်းကြဦးမည်။

၅။ ကယ်နှုတ်တော်မူမည့်အကြောင်း ကတိတော် (၂:၁၈–၃:၂၁)

(က) ရုပ်ဝတ္ထုပစ္စည်းကြွယ်ဝချမ်းသာခြင်း(၂:၁၈၊၁၉၊၂၁–၂၇)

ထာဝရဘုရားသခင်သည် ပြည်တော်ကို မစချင်စိတ်အားကြီး၍ မိမိလူတို့ကို ကယ်မသနားတော်မူမည်။ စပါးဆန်ရေ၊ ဝိုင်သစ်၊ ဆီသစ်များလုံလောက်ရုံမက ဘုံးဘောလအော ပေးသနားမည်။ အထံတော်မှထွက်ပြေးခဲ့သူများကိုလည်း ပြန်လည်ခေါ်ဆောင်မည်။ လယ်မြေများသည် မြေသြဇာ ကြွယ်ဝလျက် ဆန်ရေစပါး အထွက်ကောင်းစေမည်။ ရွှေမိုးငွေမိုးရွာသွန်းစေတော်မူသဖြင့် သီးနှံအထွက်တိုးမည်။ထည့်စရာကျီ၊ ပုတ်များတွင် ဆန်စပါး ပြည့်လျှံစေမည်။ ဘုရားသခင်၏လူများသည်လည်း အားသစ်ခွန်သစ် ပြန်လည်ရရှိကြသဖြင့် နောက်တခါ အရှက်တကွဲ မကြုံစေရတော့ပါ။ ကျိုင်းကောင်များကိုက်စားခဲ့သော သီးနှံများကိုလည်း ဆထက်ထမ်းပိုးအလျှော်ပြန်ရမည် (၂:၂၅)။

(ခ) ရန်သူများကို ဖျက်ဆီးချေမှုန့်ပစ်မည်(၂:၂၀)

ယုဒလူမျိုးများအပေါ် ဘုရားသခင်ကရုစိုက်သည့်အကြောင်းကိုလည်း ပရောဖက်ယောလက ထပ်မံသတိပေးသည်။ မြောက်ပိုင်းအရပ်ရှိ ရန်သူ(အာရှိုရိ)ကို၎င်း၊ အရှေ့ဖက်ကမ်း(ပင်လယ်ဒေသ)နှင့် အနောက်ဖက်ကမ်းခြေ(မြေထဲပင်လယ်) ရှိရန်သူများကို၎င်း သုတ်သင်ပယ်ရှားမည်။

(ဂ) ဘုရားသခင်ဝိညာဉ်တော်သွန်းလောင်းမည့်အကြောင်း (၂:၂၈–၂၉)

ထိုနေ့ရက်တွင် လူအပေါင်းအပေါ်သို့ ဘုရားသခင်၏ဝိညာဉ်တော်သွန်းလောင်းမည်။ ငယ်ရွယ်နုပျိုသူများက ပရောဖက်ဉာဏ်ရရှိကြ၍ အသက်ကြီးသူများက ရှေ့ဖြစ်နိမိတ်မြင်မက်ကြမည်။ ဤကျမ်းချက်ပြည့်စုံလာကြောင်း (တ၊ ၂:၁၆-၂၁)တွင်တွေ့ရသည်။ သို့သော်ပင်တေကုတ္တေနေ့နှင့် မသက်ဆိုင်။ ခရစ်တော်ဘုရားအနှစ်တထောင်နိုင်ငံတော် ကာလတွင် အကုန်အစင်ပြည့်စုံမည်။

(ဃ) ခရစ်တော်ဘုရားဒုတရားကြွလာမည့် နိမိတ်လက္ခဏာ(၂:၃၀–၃၂)

ဘုရားသခင်၏ ဝိညာဉ်တော်သွန်းလောင်းခြင်းသည် ကောင်ကင်သားများကို အံ့အားသင့်စေမည်။ ကောင်းကင်နှင့်မြေကြီး၌ အံ့သြဖွယ်ဖြစ်စေသော အရာများမှာသွေး၊ မီးလျှံ၊ မီးခိုးတိုင် ၊ မှောင်မိုက်ကျသောနေနှင့် သွေးဖြစ်သွားသောလတို့ ဖြစ်၏။ သခင်ယေရှုအားမေရှိယအဖြစ်အသိမှတ်ခံယူ၍ နာမတော်၌ မှီခိုသူဟူသမျှသည် ကယ်တင်ခြင်းရရှိကြမည်။ ခရစ်တော်ဘုရား၏ အနှစ်တထောင်နိုင်ငံတော်ထဲသို့ ဝင်ရောက်စံမြန်းကြရမည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။