Isaiah -56 -

ဟေရှာယအနာဂတ္တိကျမ်း - ၅၆

လူမျိုးတကာတို့ထံသို့

1ထာဝရဘုရား မိန့်တော်မူသည်ကား၊ တရားကိုစောင့်၍ ဖြောင့်မတ်စွာ ကျင့်ကြလော့။ ငါ၏ကယ်တင်ခြင်းကျေးဇူး ရောက်ချိန်နှင့်၊ ငါ၏ ဖြောင့်မတ်ခြင်းတရား ထင်ရှားချိန်ရောက်လုနီးပြီ။ 2ထိုသို့ပြုသောသူ၊ အမြဲစွဲလမ်းသော လူသားသည်၊ ဥပုသ်နေ့ကို မရှုတ်ချ၊ စောင့်ရှောက်၍ ဒုစရိုက်ကိုမပြုမည်အကြောင်း၊ မိမိလက်ကို ချုပ်တည်းလျှင်လည်း မင်္ဂလာရှိ၏။

3ထာဝရဘုရား၌ မှီဝဲသော တစ်ပါးအမျိုးသားက၊ ထာဝရဘုရားသည် ငါ့ကို မိမိလူမျိုးနှင့် ရှင်းရှင်းခွဲထားတော်မူပြီဟု မဆိုစေနှင့်။ မိန်းမလျှာကလည်း၊ ငါသည် သွေ့ခြောက်သောအပင်ဖြစ်သည်ဟု မဆိုစေနှင့်။ 4ထာဝရဘုရား မိန့်တော်မူသည်ကား၊ ငါ၏ဥပုသ်နေ့ကိုစောင့်လျက်၊ ငါနှစ်သက်သောအရာကို ရွေးယူ၍၊ ငါ၏ပဋိညာဉ်ကို မှီဝဲသော မိန်းမလျှာတို့အား၊ 5သားသမီးတို့ ထက်မြတ်သောအရာ၊ မြတ်သောနာမကို ငါ့အိမ်၊ ငါ့တံတိုင်းအတွင်း၌ ငါပေးမည်။ မပျောက်နိုင်သော ထာဝရနာမကို သူတို့အား ငါပေးမည်။ 6ထာဝရဘုရားထံ၌ အမှုစောင့်ခြင်း၊ နာမတော်ကိုချစ်ခြင်း၊ ကျွန်တော်ရင်းဖြစ်ခြင်းအလိုငှာ၊ ထာဝရဘုရား၌ မှီဝဲသော တစ်ပါးအမျိုးသား တို့ကိုလည်းကောင်း၊ ဥပုသ်နေ့ကို မရှုတ်ချ၊ စောင့်ရှောက်၍၊ ငါ၏ပဋိညာဉ်ကို စွဲလမ်းသောသူ အပေါင်းတို့ကိုလည်းကောင်း၊ 7ငါ၏သန့်ရှင်းသောတောင်သို့ ငါဆောင်ခဲ့၍၊ ငါ၏ပတ္ထနာအိမ်၌ ဝမ်းမြောက်စေမည်။ သူတို့မီးရှို့ရာယဇ်နှင့် ယဇ်အမျိုးမျိုးတို့ကို ငါ့ယဇ်ပလ္လင်ပေါ်မှာ လက်ခံမည်။ ငါ့အိမ်ကို လူအမျိုးမျိုးဆုတောင်းရာအိမ်ဟူ၍ ခေါ်ဝေါ်ကြလတ္တံ့။ 8အရပ်ရပ်၌ ကွဲပြားသော ဣသရေလအမျိုးသားတို့ကို စုဝေးစေသော အရှင်ထာဝရဘုရား မိန့်တော်မူသည်ကား၊ စုဝေးပြီးသော သူများမှတစ်ပါး အခြားသောသူတို့ကို ထိုအစုအဝေး၌ ငါစုဝေးစေဦးမည်ဟု မိန့်တော်မူ၏။

ဣသရေလအမျိုးသားတို့အားရှုတ်ချခြင်း

9အို လယ်ပြင်သားအပေါင်းနှင့် တော၌လည်သော သားရဲအပေါင်းတို့၊ ကိုက်စားခြင်းငှာ လာကြလော့။ 10သူ၏ကင်းစောင့်တို့သည် မျက်စိကန်းကြ၏။ ရှိသမျှတို့သည် မိုက်ကြ၏။ အ၍ မဟောင်နိုင်သောခွေး၊ ယောင်ယမ်းသောခွေး၊ အိပ်လျက် အိပ်ချင်အားကြီးသောခွေး ဖြစ်ကြ၏။ 11စားချင်အားကြီး၍ ဝမ်းမပြည့်နိုင်သော ခွေးလည်း ဖြစ်ကြ၏။ သိုးထိန်းတို့သည်လည်း မကြည့်မရှုတတ်ကြ။ ထိုသိုးထိန်းရှိသမျှတို့သည် လမ်းလွှဲ၍ မိမိတို့လမ်းသို့ လိုက်ကြပြီ။ တစ်ယောက်မျှမကြွင်း၊ တညီတညွတ်တည်း ကိုယ်အကျိုးစီးပွားကိုသာ ရှာကြ၏။ 12လာကြ။ စပျစ်ရည်ကိုယူခဲ့မည်။ သေရည်သေရက်ကို ဝစွာသောက်ကြစို့။ ယနေ့ဖြစ်သကဲ့သို့ နက်ဖြန်နေ့ဖြစ်လိမ့်မည်။ ထိုမျှမက၊ သာ၍ ကြွယ်ဝလိမ့်မည်ဟု ဆိုတတ်ကြ၏။

ဟေရှာယအနာဂတ္တိကျမ်း - ၅၆ (အနက်ဖွင့်)

၅၆:၁-၈ ဘုရားသခင်က ပြန်လည်ရွေးနှုတ်သောကြောင့် ပြည်တော်ပြန်ဝင်ခွင့်ရသူများသည် တရားမျှတခြင်းနှင့် ဖြောင့်မတ်ခြင်းတွေ့ ရှိကြသဖြင့် ဥပုသ်နေ့ စောင့်ထိန်းကြသည်။ ခရစ်တော်၏ နိုင်ငံတော် အကျိုးကျေးဇူးခံစားဖို့ရန် မည်သည့်နိုင်ငံခြားသားများနှင့် ရှင်ဘုရင်ကမှ မတားဆီးနိုင်။ မလုယူနိုင်ကြ။ ဘုရားသခင်၏စကားနာခံသူများသာလျှင်ခံစား ခွင့်ရှိကြပါသည်။ ဗိမာန်တော်သည်လည်းတိုင်းနိုင်ငံသားများ၏စည်းဝေးဆု တောင်းရာအိမ်တော်ဖြစ်သွားမည်။ ဣသရေလသားများသာမကလူမျိုးတိုင်း ပါဝင်နိုင်သည်။ တပါးအမျိုးသားများကိုလည်းဘုရားသခင်၏အိမ်တော်တွင်း ထဲသို့ဝင်ရောက်ခွင့်ရကြမည်။

၇။ ဒုစရိုက်သမားများကိုအပြစ်စီရင်မည့်မေရှိယ (၅၆:၉-၅၇:၂၁)

၅၆:၉-၁၂ ဣသရေလတို့ဆိုးသွမ်းခဲ့ပုံကိုပြန်လည်ထုတ်ဖော်သည်။ တိုင်း နိုင်ငံသားများ(သားရဲများ)ကိုလည်းအန္တရာယ်ကင်းဝေးရာကင်းစောင့်မျက်စိ အောက်သို့ဆင့်ခေါ်သည်။ ထိုသူများသည်မဟောင်သောခွေး၊မကိုက်တတ်သော ကျားနှင့်တူသည်။ စိတ်ကူးယဉ်အိပ်မက်မက်သူများဖြစ်သည်။ ဆန်မရှိအစား ကြီးသူများ၊မကျွေးနိုင်သောသိုးထိန်းပိုင်ရှင်များဖြစ်သည်။ ပေါက်လွှတ်ပဲစား မိတ်ဆွေများကိုခေါ်ဖိတ်သောက်စားကြသည်။ “မနက်ဖြန်ကိုယနေ့အဖြစ်ဖြုန်း တီးသူများ၊လူပေါ်ကြော့များဖြစ်သည်”ဟုRonald Knoxကဆိုသည်။

ယခုအနက်ဖွင့်ကျမ်းကို သက်ဆိုင်ရာတို့၏ ခွင့်ပြုချက်ဖြင့် ဝေမျှပေးထားခြင်းဖြစ်ပါသည်။ မူရင်းကို သွားရောက်ကြည့်ရှုလေ့လာလိုပါက http://bbcmm.net/the-believers-bible-commentary တွင် လေ့လာနိုင်ပါသည်။

တစ်စုံတစ်ခုကို မှတ်ချက်ပြုရေးသားလိုပါက အောက်တွင်ရေးသားဖေါ်ပြနိုင်ပါတယ်။